نص ساعه باقيه علي تنفيذ الاعدام

وانا اعاين للعساكر ديل وقلبي مقطوع من الخوف والا الخلعه مابعرف هسه مافضل لي من الدنيا الا مسافة بين الحبل ومكان واقفه دا
بس بسمع بقولو الموت للرجال لا داك السجن للرجال طيب السجن للرجال والموت لي انا ذنبي شنو مش كان هسه قاعده في بيتي راجيه راجلي يجي من صومعته الكان فيها مالي ومال الانقلابات اشان اقلب الحكومه دي اريتني كان كنت مدنيه وعيني للعسكري بجهز في حبل الشنق دا واهلي ديل مش كان يجو يحضرو يوم اعدامي التاريخي دا
هسه منو يخبر العالم عن بطولة تقبلي للاعدام بشجاعة غير منقطعة النظير
منو يقسم انه راني اتشهد واني شهيده
منو يشهد اني كنت البس سلسله ذهبيه كان مشتريها لي الراجل قبل ابقي متمرده
منو
ومنو
مافي زول زاتو بس انا وكم عسكري والمكان زاااتو ولا تقول قاعة تنفيذ احكام
وهسه بدل الحبل الشنقو بيهو قبالي المجرمين والمجرمات والمغتصبين للشفع والمغتصبات لو شنقوني بعمةمش اخير
بس يلا الموت للرجال هي الابطال امثالي
قلبنا الحكومه وطيرنا ناس ن وع وماالي ذلك
وان مت فمن اجل الوطن كل شي رخيييييييييييييييص حتي رقبتي دي
والله بنجرح وبخاف من الدم هسه العسكري دا بعد رقبتي تنكسر كان كبت دم بعمل شنو
قلبو قوي مالقي شغل غير اعدام الابطال امثالي وقعدت في الواطه راجيه الراجل يخلص من ربيط الحبل وسرحت ببصري لتلك الايام الفكرت اقلب الحكومه عنوه كانت ايام عصيبه عصيبه عصيبه عصيبه
يتبع

هههههههههه
بالغتي يا برلومتنا الجديدة
هو بالله موضوع بتاع الدكان دا تم! ‎:-)‎

سلامات ياحافظ ياسنيرنا
انتهت ويييييييييييييين انت

؟


تاريخ التسجيل هنا قلتي لي متين؟؟؟؟



عموما....سلامات

يناير 2013
!!!


عموما مرحب

الشي تلك الايام فد حيله نجحت ليخرج الشعب من جحوره مافيالمهم في قعدة الجبنه عن واحده صاحبة بت جيران واحده من نسوان الرئس جات سيرة العيش بقي بكم والسكر والبن وهكذا قمت اقترحت انا ست الجبنه المره الجايه رايكن شنو نقلب الحيكومه الماعا########ه دي
ووافقت النسوه في سرعه عجيبه شديد وبس الشي قلنا رجال مامعانا كان دار يقلبوها كان يمرقو المظاهرات داب انهم مامرقو براااااااااااااانا بنقلبهوبس بدات الترتيبات قائدات الالويه يكونن وين وقائدات المدفعيه ومنو يستلم الاذاعه والتلفزيون وقناة الشروقوالبتزيع الاعلان الاول اجملنا صوتا وصوره
والامور ماشه سمممممممممممح وقلنا مافي مره تدخل راجله اشان مايحميها ولا يبلغ فيها بس بت الجيران مابتتبلي في خشمه فوله كلمت راجله وفي فد ليل جو قبضونا جميعا قبيض الجراد والنسوان الفتانات ) السعالوها كلها قالت انا قائد الانقلاب الفاشل
وماسجنوني كتير تلاته يوم وقالو اعدموها فانها شرا مستطيرا
وجابوني ترا راجيه العسكري يخلص من ربيط الحبل دا
يتبع

لشي الراجل ماعرفتو بعقد في الحبل والا بعمل في شنو غايتو بعد مساااااافه اظنها دهراقال لي :
قومي لحيلك استعدي
واتذكرت الناس البعدموهم بقولو ليهو قول ااخر امنيه
قلت ليهو ماقلت لي اخر منيه شنو
اخلصي عندنا نسوان غيرك عاوزين نخلص
عاوزه جبنه
لا دا من تاثير الخوف
هي خوف شنو من الموت المافي منو فوت ابدا وطبعا لا لاتظنن اني جبنت وااااي عندي بت صغيرونه هسه البرضعه منو تلقي البكي دار يشقها واااي يابنوتي الصغيرونه هسه البرعاها منو مافي طريقه تهربوني من هنا
لا انت اكيد مجنونه نهرب شنو انتي بلوه
ورفعوني فوق كرسي ولفو الحبل في رقبتي انا اكثر النساء صبرا علي البلوه الدموع دي مامقياس يمكن وقعت في عيني ترابه والا شي
غايتو اشهد ان باقي الشهاده نسيته ياربي مالي كدي لقني الشهاده ياعسكري
سمح قوليها في قلبك
وشات الكرسي واطوطحت اطوطحت وكروووووووو جيت واقعه الحبل انقطع
فد عوجه جاتني مافي
يتبع

عسل

نص ساعة شنو يا برلومتنا ياخ ؟
نسيتي ؟ المشنقة ما حقت العساكر .
العساكر نبل رصاص والنبل في القلب تل .
..
ألف مرحب ونورتي الساحة

شكرا الساحه منوره بااهلها
بس هي ماعسكري

تسلمي

وبس بعد الحبل الهش الانقطع من تقلي دا اتبسمت معناه عندي امل كبييير في ان تمتد فترة اني حيه لسه كم دقيقه تانيه لمن يعقد الحبل من جديد هسه كان غالبن يشترو حبل جديد
كل زول يعدمو بحبل براه مالو وفجاه انا بفكر كدا صرخت البت السجمانه في راسي نامن نطيت علي حيلي لقيت نفسي نايمه في سريري وبتي جمبي
كنت بحلم اتاريني
ثم انه زاااته الجيش مافيهو نسوان








تمت

طيب ياخ تبديها بإعدام كداعلي طول.......تحياتي

لالا بديتها بخطوبة ياخ
انت المامتابع

سرحنا مع النص .. اتاريهو كان حلم :-)

بس عجبتني شجاعتكـ في الحلم .

شكرا
وانا زاتي عجبتني شجاعتها في الحلم

تحية للفاضلة مها
......
شاعر قصيدة الإعدام: مات في خناقة !!

قال لي " بشير " المصري زميلي في العمل : أقرأ لك قصيدة أعجبتني .
قلت اقرأ
وقرأ لي قصيدة مقفاة فيها أكثر من اثنتين وسبعين بيتاً من الشِعر الموزون المقفى .
منها :
أبتاه إن طلع الصباح وأضاء نور الشمس كل مكان
واستقبل العصفور بين غصونه يوما جديدا مشرق الألوان
وسمعت أنغام التفاؤل ترة تجرى على فم بائع الالبان
واتى يدق- كما تعود- بابنا سيدق باب السجن جلادان
وأكون بعد هنيهة متأرجحا فى الحبل مشدودا الى العيدان
ليكن عزاؤك ان هذا الحبل ما صنعته فى هذى الربوع يدان
نسجوه فى بلد يشع حضارة وتضاء منه مشاعل العرفان
او هكذا زعموا وجيء به الى بلدى الجريح على يد الأعوان
أنا لا اريدك ان تعيش محطما فى زحمة الآلام والأشجان
*

وهالتني الصورة واغتممت من محتواها . كم الأسى والحزن سال ، فاكتأبت .
قلت : أحكي لي عن الشاعر ، هل مات هو ذات الميتة ؟
قال : هو هاشم الرفاعي من مصر ، وقالوا مات في خناقة أواخر خمسينات القرن الماضي !!!
*

Quote: كل زول يعدمو بحبل براه مالو وفجاه انا بفكر كدا صرخت البت السجمانه في راسي نامن نطيت علي حيلي لقيت نفسي نايمه في سريري وبتي جمبي كنت بحلم اتاريني ثم انه زاااته الجيش مافيهو نسوان تمت

حمداً لله على سلامتك ... والجاتك في الحلم سامحتك ... مرحب بيك في الحوش الكبير ..

تحياتي

أختي مها تعجبني كتاباتك منذ " عكس الريح"
بسيطة ، وممتعة وذكية
رجاءاً واصلي بدون توقف
منير

سلامات منير
شكرا كتييييييييير

أى المشارق لم نغازل شمسها
و نميط عن زيف الغموض خمارها
أى المشانق لم نزلزل بالثبات وقارها
أى الأناشيد السماويات لم نشدد
لأعراس الجديد بشاشةً أوتارها
لك التحية أختي مها على هذا الإبداع الذي لاينتهي
و الرحمة لشاعرنا الرائع علي عبدالقيوم

الرحمه والمغفره ان شاءالله للشاعر الكبير
تسلم

شكرا تسلم

شكرا استاذ عبدالله
مع انه ماوصلتني شديد رسالتك

الاخت مها
خليك علي الليفل ( level ) بتاع الخطوبه و الا حا نلحق بوستاتك امات طه

معجب
ابن العوام

مع اني برلومه ماعارفه امات طه بمشن وين

نطالب بحبل جديد لكي محكوم بالإعدام ..

جميل جدا مها ..

مرحب بيك .. كتابة بالجد محتاجين ليها ..

تحياتي ،
الأرباب

الاخت مها

امات طه هي قصه مثل سوداني يضرب للتضحيه شئ بشئ ، يعني ان واصلت في مثل هذه القصه سوف يؤي لتخطي البوساتا التي تفتحينها و هذا يؤدي ان تفقدي الكثير من معجبيك الذين افتتنوا بالبوست الاول الخطوبه .


مازلنا معجبين

ابن العوام

شكرا كتيير ع التنبيه طبعا ماقصدت بس بصراحه شديده ماعرفت رديت وين ومارديت وين اكيد برجع للناس كللللللللهم الشرفني تعليقهم جدا بس اتعود شويه شويه وان شاءالله مافي زعل ابدا

ههههههههه اعجبني الحبل الجديد
شكرا
تسلم ياسيدي

الزميلة فى حوش بكرى مها عبدالمنعم مرحب بك
ومقدماً اعتذارى فى ان تسمحى لى ان اوجه ما قد يعتبر نقداً حاداً او راى قاسى او ماشابه
ولا تنتبهى ان كانت مفرداتى عنيفة بعض الشىء فلا احب ان اجاملك بقدر ما احب النقد البناء

لقد قرات لك قصة الخطوبة واعجبت بالسرد السهل والمستساغ فيها وتفاؤلنا ازداد بمجىء كاتب ومؤلف قصص مبدع سهل مستساغ مبلوع ممتعة كتاباته
لم تعجبنى القصة هذه من نواحى كثيرة ولو انها لا تصنف فى اى نوع القصص الا من الواضح محاولة اصباغ الروح الكوميدية ولكن الارتجالية جعلت تماسكها يتفكك وتسقط فى قسم النكات السمجة
حتى اننى توقعت ف نهايتها ستلجئى لان تفيقى من حلم
اولاً فهى تعطى انطباع استخفاف بصورة وموقف وقفات الابطال امام المشانق وفى الاذهان صور ابطال واجهوا المشنقة فعلاً بثبات ورجولة وكانما هى استهزاء بتلك الصورة والمواقف
ومن ناحية ادبية وفن كتابة القصة اجد انها كاختيار قصة انشاء عنوانها حلم او كابوس ظريف ومع ذلك الاختيار كان غير موقفاً وكذلك التخيل والسرد
انتى تمتلكين نواصى الخيال والابداع بلا شك ونتوقع من افضل من هذه القصة فقط اكتبى لنا عندما تكون فكرة القصة اكتملت وتبلورت فى ذهنك كاملة ويا حبذا لو بداتى الكتابة فى حاسوبك وتعيدى المراجعة ومن ثم نقلها الى المنبر
لم استمتع ولم استسيغ ما خطه قلمك هذه المرة ولكننى اتوقع المرة القادمة ستكون القصص شهية ومبلوعة


=======
تحياتى

لاخطاء املائية

اسمح لي شاكره جدا انتقادك للنص شي يشرفني اكيد كل مره قد يعجب نص ناس ومايعجب اخرين
بس طبعا يستحيل وانا ابنة مدينة عطبره استخف بالابطال والمشانق لم يرد ذلك بخاطرتي ابدا
ان شاءالله في مقبل النصوص الجايه احاول اعمل بنصيحتك
مقدره لمتابعتك

الاخت

مها

Quote: " عكس الريح"

شرفتى الحوش







































خارج النص:-

تحياتى لى ابوكرفته


DEEK-ELJEEN

سلامات حاتم تسلم

أسلوب سلس وراقي ..
انتي مشروع كاتبة قصصية ..
التجربة تحتاج إلى صقل وترتيب في الأفكار ..

وأصلي ابداعك ..

Quote: اسمح لي شاكره جدا انتقادك للنص شي يشرفني اكيد كل مره قد يعجب نص ناس ومايعجب اخرين بس طبعا يستحيل وانا ابنة مدينة عطبره استخف بالابطال والمشانق لم يرد ذلك بخاطرتي ابدا ان شاءالله في مقبل النصوص الجايه احاول اعمل بنصيحتك مقدره لمتابعتك

شكراً لك على رحابة الصدر وتقبل الرأى الاخر
وفعلاً ما يعجب البعض قدلا يعجب البعض الاخر وصدق من قال لولا اختلاف الاذواق , فالواضح ان عدد المعجبين هم الاكثر
قد يجوز اننى رآيت فى تصويرك للمشنقة بتلك الصورة استدراج كوميدي يدعو للسخرية من اوضاع معينة والفكرة جميلة وذكية
اختيارك وجعل مشهد مسرح المشانق اداة من ادواتها هزتنى بعكس المعجبين هنا , ولكن يمكن لشىء خاص فى نفسى لان لمشهد صور اخرى فى ذهنى
عموماُ اتمنى لك التوفيق دائماً ومزيداً من الابداع
وفى انتظار الجديد

مها
كتابة سلسة وممتعة
وحكي رائع

شكرا تسلم

تسلم محمد زكريا
وشاكره ليك تفاعلك مع النص

شكرا
ان شاءالله