Post: #1
Title: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-28-2013, 10:56 AM
وفي الساعة التي يجتمع فيها النمتي حول اوراق اشجار المنقة نزلت دباستان (قمريتان) بالقرب من الشرك!
خفق قلبي بعنف وزاد معدل الادرنالين في دمي
كنت قد عدت قبل ايام قليلة من غربة قاتلة ... لم يكن لدي اصدقاء ولكن لدي الكثير من الواجبات الاجتماعية...
قالت امي منذ اليوم الاول : فلان مات وفلان مات وفلان مات وفلان عرّس وفلان مات وفلانة ولدت ولازم تمشي للناس ديل كلهم ..
اجبتها بطريقة تدربت عليها طويلا قبل بداية الاجازة : بكرة حا امشي البلد اعزي عمتي في راجلها ... تهللت اسارير امي .. اخيرا لديها ابن يعرف الواجب
نجحت خطتي بامتياز... عزيت عمتي امس بعد وصولي مباشرة وها انا ذا الآن امارس هوايتي القديمة في صيد الدباس .. تغير الناس كثيرا هنا لم يعد احد يمارس مثل هذه الهواية..
خالي كان مهذبا وهو يحاول اثنائي قال : ياخي حاتتملي غبار ساكت .. والنمتي حايعمي عيونك ! ابنه الصغير كان اكثر وضوحا وصراحة .. قال: ده شنو التخلف ده؟! وانا لا ابالي ..
لن يثنيني شيء فقد عدت في هذه الاجازة خصيصا لممارسة هذه الهواية... لن اهتم
نزلت دباسة اخرى وتبعتها اخريات فتضاعف الخفقان وتحررت جميع حواسي وغرائزي الحيوانية ... كنت سعيدا واشعر بتناغم تام مع الطبيعة
استطيع تمييز الاصوات كلها صوت بابور بعيد صياح كـلـب من خلف النيل صوت اهتزاز البرسيم مع الرياح رائحة الجروف المروية حديثا ورائحة الحفير بمياهه شبه الراكده
ازهار البرسيم وازهار نباتات متطفلة تنمو على اطراف النيل .. كنت اشعر ان حواسي متفتحة كأن لدي عشرون اذن وسبعة انوف ..
تركزت حواسي كلها نحو الدباس الذي يقترب رويدا رويدا من الشرك .. سمعت صوت حركة خفيفية الى يميني .. اهااااا صبرة ! عرفت انني مشرك ..
الصبرة ذكية جدا حاتنتظر لغاية ما الشرك يقبض ثم تسبقني الى الدباسة فتخطفها بي شركها وتهرب .. بقيت عايز انهر الصبرة لكن خايف الدباس يطير ..
فقلت بي صوت هامس : هىى هشش امشي .. هوي ها هش ! الصبرة اتلفتت عاينت لي كده وهزت راسها وركّزت مرة تانية ناحية الشرك والدباس التقول هي المشرّكة ما انا !
بديت افكر سريع في كيف حا اتصرف .. حكاية اطيّر الدباس دي ابدا ما واردة .. قست المسافة بين الصبرة والشرك ولقيت اني اقرب منها بي خطوات لكن هي بالتأكيد اسرع مني ..
حاولت استخدام قوانين الفيزيا والرياضيات عشان اعرف منو الحايصل اول... لكن لافائدة
مع اقتراب الدباس من الشرك تحفزت الصبرة وتحفزت انا .. نظرت ناحيتها ونظرت ناحيتي والتقت اعيننا بنظرة تحدي رهيبة.. حسنا سوف العب معك بقوانيين الغاب .. البقاء للاسرع والاقوى
في هذه اللحظة الحاسمة حدث مالم يكن ابدا ابدا في الحسبان ... سمعت صوت خطوات ورأيت ثوبا زاهيا وسط اشجار النخيل
يااه انها سلمى .. من اجمل بنات البلد .. بل اجملهن على الاطلاق .. نظرت الى ونظرت اليها وابتسمت !
يتبع ...
|
Post: #2
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-28-2013, 11:38 AM
Parent: #1
يلا انا بحاول اوصف ليكم اللحظة دي توصيف كويس وانتو ساعدوني بالخيال ...
سلمي جاية ناحيتي مبتسمة ابتسامة بنت البلد الطيبة واصيلة ... ابتسامة مرحّبة مزيج بين الخجل والشوق والمفاجأة .. كانت سلمى جميلة جمال خارق .. جمال اصيل معتق .. لها عيون آية في الجمال .. وجبين نبيل يحكي نبل اصلها ورثته من اجدادها كابر عن كابر ... ابتسامة سلمى المرحبة تلك لو كانت في ظروف غير تلك الظروف لجعلت يومها عيدا ... كان الجو ملائم تماما .. شعرت بدغدغة في ذلك المكان اسفل القلب .. نعم ينشأ الحب نتيجة لحظات كهذه
كان المنظر كالتالي .. الدباس قريب جدا من الشرك وممكن يقبض في اي لحظة ... الصبرة مركزة تماما ومتوثبة للهجوم ... سلمى جاية ناحيتي مبتسمة ومشاعرها سايلة من عيونها ... وانا مقسم تماما بين الجميع .. غرائز الصيد مع الدباس ... كرامتي وغرائز التنافس تجاه الصبرة ... وقلبي ومشاعري ولهفتي معلقة بسلمى !
صار الزمن بطيئا جدا .. الثانية الواحدة كأنها دهر .. اتحركت ناحية سلمى بحذر وانا خايف الدباس يطير ... مركز مع الشرك والصبرة .. المسافة قربت جدا بيني وبين سلمى .. هي مدت يدها المرتعشة للسلام وانا مديت يدي المرتعشة بفعل التوتر والادرنالين واشياء اخرى كثيرة
الدباسة وقفت فوق الشرك عديييل .. الصبرة تحفزت وتكورت وكانت مستعدة تماما للانطلاق ... يد سلمى اقتربت جدا من يدي وابتسامتها الخجولة المرحبة الفرحة تحولت الى شيء لست اوصفه ... كانت جميلة جميلة جميلة ... كنت متنازع تماما بين غرائزي الحيوانية وغرائزي الاخرى الاكثر آدمية
متخيلين معاي اللحظة دي ؟ سلمى حلم الجميع ودفء الغربة الموعود يدها في متناول يدي ... الدباسة واقفة تمام فوق الشرك .. الصبرة متحفزة ومستعدة كامل الاستعداد لهزيمتي ومرمطة كبريائي الحيواني بالارض
في هذه اللحظة الرهيبة جدا ومع تلامس اطراف اصابع يدي مع يد سلمى قبض الشرك ...
وتحرك الزمن سريعا جدا كأنما ليعوض بطئه في اللحظات السابقة ... طار بقية الدباس خائفا ... ارتفع جناح الدباسة المقبوضة وثار حولها غبار خفيف ... انطلقت الصبرة كالرصاصة ناحيتها ... يد سلمى رطبة وندية ومرتعشة تبعد ملمتر واحد عن يدي..
سحبت يدي من اتجاه سلمى وانطلقت بكل ما املك من قوة ناحية الشرك .. تركت قلبي معلق بيد سلمى الممدودة وعين على الشرك وعين على الصبرة ... كانت المنافسة في قمتها .. اقتربت من الدباسة واقتربت الصبرة ... بعملية حسابية بسيطة قدّرت ان الصبرة تسبقني بخطوة واحدة ... فكرت سريعا لن تهزمني صبرة ادنى مني بكثير في السلسلة الغذائية ... شهاداتي الجامعية .. وظيفتي المرموقة .. بدلة وكرفتة اربطها يوميا على عنقي ... استطيع اتخاذ قرارات ادارية ومالية تساوي حياة آلاف الصبرات مجتمعة ... الا ان كل ذلك لافائدة له هنا ... هنا النصر للاسرع فقط ... والصبرة تسبقني بخطوة .. وفتاة احلامي لازالت يدها ممدودة في الخلف .. تحررت غرائزي الحيوانية تماما وطغت على كل شيء ... شعرت اني اسد عجوز يوشك ان يهزم من مجرد صبرة ... مصير وكرامة وتاريخ اسلافي الاسود كلهم معلق الان بي ... تركزت عزيمتي وقوتي ومشاعري كلها في اقدامي الخلفية و... وثبت وثبة طوييييلة عظييمة ... وثبة ضمّنتها جميع خبرات وثبات اجدادي الاسود منذ بدء الخليقة والى يومنا هذا ... كانت كل وثبات الاسود التي وثبتها منذ وجودها وحتى اليوم انما هي تدريب لهذه الوثبة التاريخية ... وثبة واحدة طويييييلة جعلتني اتخطى الصبرة واسبقها بمتر كامل في هذا المكان والزمان الذي لكل سنتمتر معناهو وتاثيره ... انا اسد عجوز في سباق من اجل البقاء .. ولبوتي خلفي ويدها مازالت ممدودة .... وقعت على بطني وصدري بعنف وانا لا ابالي ... وضعت مخالب يدي اليسرى على الفريسة وبيدي اليمنى ابعدت الصبرة عنها ... وفي محاولة يائسة من الصبرة كشرت عن انيابها وزمجرت بوحشية عسى ان تخيفيني !! فكشرت عن انياب اكبر من انيابها بمراحل وزأرت في وجهها بصوت اهتزت له الجزيرة بأكملها ... عوووووووووووووووووووووووووو .. فواصلت الصبرة ركضها واختفت وسط الاشجار
وقبل ان امد عنقي الى اعلى واعوي عواء النصر ... عاد الزمن الى طبيعته واختفى اسلافي الاسود من بين الاشجار فرحين ...
انا خالد ود عبدالوهاب ود غالي ... لي اسرة ومعلومة واقرباء واشجار نخيل واطيان ... لي وظيفة معلومة ويعرفني اناس كثير .. ارقد على بطني في الارض ووجهي وشعري معفر بالتراب .. تسيل الدماء من يدي المتسلختين ... وفتاتي مازالت في الخلف ويدها ممدودة
وبكل ما املك من لهفة التفتّ ناحية سلمى ... كانت تقف هناك ويدها لازالت ممدودة ... نظرت في عينيها وحاولت ان ابتسم .. كانت سلمى هادئة تماما وفي عينيها صفاء عجيب .. كانت نظرتها ليست غاضبة .. ولا حزينة ... ولا مندهشة ... ولا سعيدة .. كانت نظرة سلمى ليست لها اسم ولاتوصيف .. لانها ببساطة نظرة لم يراها احد من قبل .. كانت الاولى والاخيرة لذلك ليس لها اسم ولاوصف ... هي نظرة سلمى في موقف كهذا وفقط ...
انزلت سلمى يدها ومضت ... وانا لا ازال راقدا على بطني ممسكا بالدباسة! تفقدت مشاعري واحاسيسي .. اشعر بالم في ركبتي وصدري .. هنالك دماء تغطي ايادي ... والتراب يملا وجهي وشعري ومناخيري
ضاعت سلمى الى الابد ... ضاع حلمي بدفء الغربة .. ولكني لست حزين ولا نادم ..انا الآن سعيد.. هذه لحظات النصر وعلي ان احتفي بها وفي غربتي متسع للتفكير والندم والحزن
ياسادتي هل تبحثون عن السعادة ؟؟؟
اطلقوا الصياد في داخلكم!
|
Post: #3
Title: Re: صَبَرة وبِنت ودَبَاسة.. توجد لحظات ونظرات رهيبة
Author: رشا سالم
Date: 01-28-2013, 12:03 PM
Parent: #2
Like جداً
|
Post: #4
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-28-2013, 12:27 PM
Parent: #3
شكرا يارشا على القراءة واللايك
تسلمي
|
Post: #5
Title: Re: صَبَرة وبِنت ودَبَاسة.. توجد لحظات ونظرات رهيبة
Author: حسين ديقول
Date: 01-28-2013, 12:36 PM
Parent: #4
يبيع سلمى عشان دباسة
غايتو ما عندك خوة
نص جميل ذكرنا أيام الشقاوة
|
Post: #6
Title: Re: صَبَرة وبِنت ودَبَاسة.. توجد لحظات ونظرات رهيبة
Author: محمد حامد
Date: 01-28-2013, 12:51 PM
Parent: #5
شكرًا للجمال دا يا خالد
كنت مفتكر الدباس ما بين القمري والبلوم فما عارف صحة الكلام دا
|
Post: #7
Title: Re: صَبَرة وبِنت ودَبَاسة.. توجد لحظات ونظرات رهيبة
Author: showgi idriss
Date: 01-28-2013, 01:09 PM
Parent: #6
كتاب
ياااااخ
..........
|
Post: #8
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-28-2013, 01:15 PM
Parent: #7
| Quote: يبيع سلمى عشان دباسة |
سلامات ياحسين
انا افتكرت سلمى حاتعوي معاي عواء النصر
لكن هي الخذلتني :)
|
Post: #16
Title: Re: صَبَرة وبِنت ودَبَاسة.. توجد لحظات ونظرات رهيبة
Author: حسين ديقول
Date: 01-28-2013, 01:44 PM
Parent: #8
Quote: Quote: سلامات ياحسين
انا افتكرت سلمى حاتعوي معاي عواء النصر
لكن هي الخذلتني :) |
غايتو في قصتكم دي كسبانة الصبرة
المرة الجاية سوي ليك نبلة
تحياتي
|
Post: #30
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-02-2013, 11:53 AM
Parent: #16
| Quote: المرة الجاية سوي ليك نبلة |
نبلة ذاتو عندي :)
|
Post: #17
Title: Re: صَبَرة وبِنت ودَبَاسة.. توجد لحظات ونظرات رهيبة
Author: نور الدين عثمان
Date: 01-28-2013, 01:52 PM
Parent: #6
يااااه ياخى رجعتنا لايام جميلة خلاس ...
شرك القلوبية وشرك السبيب وشرك القدح وخاصة لمن يكون القدح كركر ...
الله من القمرى والبلوم والصليعى والدفيق وبيض ام دريقة والتمساح ...
ياحليل بلدنا وحليل حامدابنا ... ْأه ه ..
اكيد شكرا جزيلا ... مع التحية
|
Post: #21
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-29-2013, 04:24 AM
Parent: #17
نورالدين عثمان
الصيد متعة لاتعدلها اي متعة في الدنيا لمن جربه
شكرا على القراءة والمرور اللطيف
|
Post: #9
Title: Re: صَبَرة وبِنت ودَبَاسة.. توجد لحظات ونظرات رهيبة
Author: علي محمد الفكي
Date: 01-28-2013, 01:16 PM
Parent: #5
خالد عبد الوهاب
نص جميل
وسرد قمة المتعة
صور حية وانت تقرأ كانك تشاهد فيلم امامك
شكراً لك على الامتاع
ـــــــــــــــــــــ
Quote:
يبيع سلمى عشان دباسة
غايتو ما عندك خوة
نص جميل ذكرنا أيام الشقاوة
|
ما ليهو حق يا ابوسلمى ..
غايتو سلمى كان عرفت تشلخو ..
|
Post: #10
Title: Re: صَبَرة وبِنت ودَبَاسة.. توجد لحظات ونظرات رهيبة
Author: محمد عوض السيد
Date: 01-28-2013, 01:29 PM
Parent: #9
سلامات عوافي
كتابة جميلة بحق ..
Quote: انا افتكرت سلمى حاتعوي معاي عواء النصر
لكن هي الخذلتني |
هناك شخص اعرفه يعوي كثيراً واحياناً يكون برمائياً لصيد الاسماك 
فهل انت هو ؟؟؟
مع ودي
واحترامي
|
Post: #11
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-28-2013, 01:30 PM
Parent: #9
Quote: شكرًا للجمال دا يا خالد
كنت مفتكر الدباس ما بين القمري والبلوم فما عارف صحة الكلام دا |
فعلا يامحمد حامد الدباس غير القمري
لكن معظم اهل الوسط من السودان يخلطون بينهم ويسمون الجميع قمري !
ذكرت قمري بين قوسين لضمان التعريف فقط
تحياتي
|
Post: #12
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-28-2013, 01:33 PM
Parent: #11
شكرا ياشوقي على كلماتك اللطيفة
وشكرا على القراءة
|
Post: #14
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-28-2013, 01:36 PM
Parent: #12
Quote: نص جميل
وسرد قمة المتعة
صور حية وانت تقرأ كانك تشاهد فيلم امامك
شكراً لك على الامتاع |
شكرا ياعلي على القراءة
تسلم ياجميل
|
Post: #13
Title: Re: صَبَرة وبِنت ودَبَاسة.. توجد لحظات ونظرات رهيبة
Author: عبدالله ود البوش
Date: 01-28-2013, 01:35 PM
Parent: #9
يعجز اجعص مصور أن يجمع هذه الصور في لوحة واحدة كما فعلت
إت مجنون يا خالد
.
.
كاتبي المفضل على الاطلاق
تحياتي وشكرا لهذا الامتاع
|
Post: #15
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-28-2013, 01:40 PM
Parent: #13
Quote: هناك شخص اعرفه يعوي كثيراً واحياناً يكون برمائياً لصيد الاسماك
فهل انت هو ؟؟؟ |
محمد عوض السيد ؟!
لقد عوّينا كثيرا جدا في ارض المعارض
وعلى ضفاف النيل الازرق قبالة الحصاحيصا
يا اخي مشتاقين
|
Post: #18
Title: Re: صَبَرة وبِنت ودَبَاسة.. توجد لحظات ونظرات رهيبة
Author: محمد عوض السيد
Date: 01-28-2013, 01:53 PM
Parent: #15
Quote: لقد عوّينا كثيرا جدا في ارض المعارض
وعلى ضفاف النيل الازرق قبالة الحصاحيصا
|
وكذلك اداب التي حفيت قدماك اليها
والاشواق من هنا لي عندك .. وشرفت البورد ياصاحب
كتبت لك قبل عدة ايام مرحباً ببوست لا اتذكر اسمه 
ومتين قلبت تصيد دباس كمان
نكلم ليك الديبة ويخلي نبلتك طير طير كمان وقت داير تزاحمه في حرفته كمان 
وابقي واصل في كتاباتك الجميلة دي
..
|
Post: #23
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-29-2013, 06:28 AM
Parent: #18
محمد عوض ياصديقي
ايام آداب ديك كانت ايام والله
بالله عليك وين الناس ديل ؟؟
سمعت انك مشيت السعودية ؟؟
تحندك فيني بي صور الصيد لمن بقت فيك الغربة ؟ اها خم وصر وتاني حندك سمح :)
شكرا ياجميل على الترحيب وورينا اخبارك
|
Post: #22
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-29-2013, 05:00 AM
Parent: #13
Quote: يعجز اجعص مصور أن يجمع هذه الصور في لوحة واحدة كما فعلت
إت مجنون يا خالد
.
.
كاتبي المفضل على الاطلاق
تحياتي وشكرا لهذا الامتاع |
عبدالله ود البوش
شكرا جزيلا ياخي على كلماتك اللطيفة
واتمنى حقيقة ان استحقها
يا اخي انت الحكيت النكتة بتاعة الزول الدخل الحمام قام موبايلو وقع قام دنقر يشوفوا نظارتو وقعت ...
انت الحكيت النكتة دي ولا زول تاني هههههههه
موبالغة ياخي
|
Post: #19
Title: Re: صَبَرة وبِنت ودَبَاسة.. توجد لحظات ونظرات رهيبة
Author: حسين ديقول
Date: 01-28-2013, 01:57 PM
Parent: #9
Quote: ما ليهو حق يا ابوسلمى ..
غايتو سلمى كان عرفت تشلخو |
شن تقول يا ود الفكي
غايتو البوست دا بكبشرو لسلمى
|
Post: #20
Title: Re: صَبَرة وبِنت ودَبَاسة.. توجد لحظات ونظرات رهيبة
Author: مها عبدالمنعم
Date: 01-28-2013, 05:35 PM
Parent: #2
كتااااااااااااااااااب يادفعه
|
Post: #24
Title: Re: صَبَرة وبِنت ودَبَاسة.. توجد لحظات ونظرات رهيبة
Author: حيدر بشير
Date: 01-29-2013, 08:29 AM
Parent: #20
الاخ خالد
لك التحايا النواضر
قصة جميلة و سرد ممتع و لك فيه جزيل الشكر و التقدير
بس برضو انت غلطان ما كان تمشى براك كان تاخد معاك ود عمتك عمر حجة فهو خبير فى
التعامل مع مثل هذه الحالات و قد قضى كل طفولته و ايام شبابه فى الشريك
|
Post: #25
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-29-2013, 09:13 AM
Parent: #20
| Quote: كتااااااااااااااااااب يادفعه |
مها يا ابو الزمل
شكرا على المجاملة اللطيفة ... ومتابعنك بهناك شدي حيلك حبة ياخي
|
Post: #26
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-29-2013, 10:21 AM
Parent: #25
Quote: بس برضو انت غلطان ما كان تمشى براك كان تاخد معاك ود عمتك عمر حجة فهو خبير فى
التعامل مع مثل هذه الحالات و قد قضى كل طفولته و ايام شبابه فى الشريك |
سلامات ياحيدر
عمر حجة شن عرفتو كمان بالصيد ..
الحريف في المجال ده مصطفى حجة اخوهو .. والقصة دي ذاااتها بطلها الحقيقي مصطفى حجة :)
تحياتي لك ولي عمر حجة .. وقول ليهو متذكر الكوارع ؟
لكن ماقلت لي انت منو :)
|
Post: #27
Title: Re: صَبَرة وبِنت ودَبَاسة.. توجد لحظات ونظرات رهيبة
Author: حيدر بشير
Date: 01-29-2013, 11:14 AM
Parent: #26
هو البيخلينا نقبض منو اذا كان بكرى خت لينا ناس تحت يحاحوا فى الطير اسه بعد ما دودرنا الدباس على الشرك جاء الطاهر دا زى قطعة الشيطان نجهوا لامن واحدى شقية هبرت الشرك و شالت حباية العيش
اخونا خالد يا خوى شوف عينى مو قول قايل مصطفى زول عوم ساكت يقطع فى البحر و يشهد فى خلق الله الا عشان نسابه نسابه لكن عمر دا من ما شفته ماسك شركه فى ايده و يدودر فى الدباس
اسمع وصية ودعمتك الكبير الكاتبها ليك تحت دى مش قال ليك استعين بى صديق ان شاء الله بى خالك عبدالرحمن
|
Post: #28
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-29-2013, 05:36 PM
Parent: #27
سلام ياحيدر
حا استعين بصديق واوريك قريييييييب
ههههههههههههه
|
Post: #29
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 01-29-2013, 05:39 PM
Parent: #28
ناس الفيس بوك
شرفتوا كتير والله .. وشكرا جزيلا على قراءتكم وتعليقاتكم وجاييكم مندلي بي تحت نتم ونستنا :)
|
Post: #47
Title: Re: صَبَرة وبِنت ودَبَاسة.. توجد لحظات ونظرات رهيبة
Author: على احمد النعيم
Date: 02-19-2013, 09:24 AM
Parent: #29
اخى خالد
والله والحق يقال لقد ابدعت حد الجنون فى هذا السرد الشيق والذى رجع بنا الى تلك الايام الحلوة والتى لن يجود الزمان بمثلها.
قل لا فض الله فوك
تحياتى لك ولايام الدباس اب طوق بلا حدود
اكرر عجبى واندهاشى لما ساقه يراعك المترع بتلك الذكريات.
واصل حياك الله
|
Post: #31
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-16-2013, 04:53 AM
Parent: #28
سلامات ياحيدر بشير
تم التعرف بعد الاستعانة بصديق حسب وصية الطاهر حجة
كيف صحتك واحوالك ؟
|
Post: #32
Title: Re: صَبَرة وبِنت ودَبَاسة.. توجد لحظات ونظرات رهيبة
Author: حيدر بشير
Date: 02-16-2013, 06:25 AM
Parent: #31
هلا خالد و التحايا لك و لمن معك و لمن تركته خلفك فى السودان ان كان فى الحصاحيصا او قوز هندى
ايوة الواحد لازم يسمع كلام اخوه الكبير و لك تحيات خالد حجة و الذى كان معى بالامس و قد ذكرت له هذه القصة
و قد أمن على كلامى بأنه مصطفى خبير فى العوم بالرغم من انه هو بطل القصة الحقيقية لكن عمر حريف فى الشريك
اما انت فقد اثنوا على انك احسن من يستخدم النبلة و نيشنجى درجة اولى ما ولد عساكر كان الوالد و اله عمك فى مدنى
لك التحايا و تحياتى الى الاخ محمد عبدالوهاب و آمل ان يكون الاخ عبده مسند قد بلغ الصحة التامة
|
Post: #33
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-17-2013, 07:11 AM
Parent: #32
سلامات ياحيدر ولعلك بخير
في اجازتي الفاتت اتلاقينا انا ومصطفى وعمر في البلد
كنّا بنطلع انا ومصطفى من الصباح ونمشي الجزيرة ونقضي يومنا كلو هناك .. مابين صيد دباس وحوامة جمب النيل
بناكل تمر وجوافة ونشرب من الجدول ونرقد في شوالات تحت ضل النخيل
مرّة نظارة مصطفى وقعت منو تحت شجرة جوافة ... والمسمار حقها الصغييييير داك وقع منها
تصدق انو مصطفى قعد في الواطة وفتش المسمار الصغييير داك لمن لقاهو ؟!!
لاحظ تحت شجرة جوافة صفقها حاتي ليهو سنين والمسمار قدر راس الابرة ومصطفى من غير نظارة!
مصطفى لازال يحتفظ بكل غرائزه وصفاته القديمة
لمّن نرجع نهاية اليوم كنّا بنلقى عمر راقد في البيت يلعب مع شفعو
نضيييييف وممسح وجلابيتو بيضااااااااء ... فماعارفو كان مؤجز من شنو بالظبط !!
عمر اتحول لي برجوازي .. ولن يشفع له تاريخه المزعوم في الصيد هههههههههههههه
تحياتي ياحيدر والجميع هنا بخير
شكرا على سؤالك
|
Post: #34
Title: Re: صَبَرة وبِنت ودَبَاسة.. توجد لحظات ونظرات رهيبة
Author: محمد جمعه الخير
Date: 02-17-2013, 09:01 AM
Parent: #33
سرد ممتع واسلوب رائع في الكتابة .
متابعين معاك محل ما تكتب تاني .
|
Post: #35
Title: Re: صَبَرة وبِنت ودَبَاسة.. توجد لحظات ونظرات رهيبة
Author: محمد عبد الماجد الصايم
Date: 02-17-2013, 09:11 AM
Parent: #34
يا سلااااااام يا خالد بلكونة!!
يمين متابع معاكـ لحدي ما شميت
ريحة الغبار لمن وقعت في اللرض قبل الصبرة!!
إنت وين من زمان ياخي!!
|
Post: #36
Title: Re: صَبَرة وبِنت ودَبَاسة.. توجد لحظات ونظرات رهيبة
Author: أمير محمد ادريس
Date: 02-17-2013, 09:29 AM
Parent: #35
فكرت سريعا لن تهزمني صبرة ادنى مني بكثير في السلسلة الغذائية ... شهاداتي الجامعية .. وظيفتي المرموقة .. بدلة وكرفتة اربطها يوميا على عنقي ... استطيع اتخاذ قرارات ادارية ومالية تساوي حياة آلاف الصبرات مجتمعة ...
-----------------------------------
ممتع يا أديب
|
Post: #40
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-18-2013, 07:20 AM
Parent: #36
شكرا يا امير على القراءة
تسلم
|
Post: #38
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-17-2013, 10:52 AM
Parent: #35
هههههههاي يا ود الصايم
يعني خلاص بلكونة دي اجيزت ؟!
انا قاعد ياخ بس ناس مطعم الباشا قيقراوي ديل عاملين زحمة شديدة خالص مامدننا اي فرصة
تشكرياحبيب على القراءة
|
Post: #37
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-17-2013, 10:31 AM
Parent: #34
محمد جمعة يادفعة
تسلم ياجميل على الاطراء اللطيف
تحياتي
|
Post: #39
Title: Re: صَبَرة وبِنت ودَبَاسة.. توجد لحظات ونظرات رهيبة
Author: معاوية المدير
Date: 02-17-2013, 01:13 PM
Parent: #37
يديك العافية يا خالد، وألف مرحب بيك في
كرقة أخونا بكري.
يا زول إتوهط تب، شركك ختلو دُرآبة وراهو
عشان القمرية ما تهبرو.
عندنا أُم خنآق دي القمرية أُم طوّق، وفي الحميرة وهي
اسغر من أُم طوق، ثمّ البليب.
الدباسة تُطلق علي الحميرة وأُم خناق.
مبدع يا خالد.
القوما ليك يا اخ...
|
Post: #41
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-18-2013, 11:06 AM
Parent: #39
سلامات يامعاوية المدير
عارف .. في منطقة الوسط كنّا بنسمي كل الانواع دي بي اسم واحد بس ( قمرية )
ماعدا الحميرية بنسميها حميرية عادي
مشيت الشمالية ولقيت عندهم اسماء كثيرة واكثر تفصيلا
الدباسة ... التمّارية .. البيوضية .. البرقيطة .. الخ
تحياتي وشكرا على الاطراء اللطيف
|
Post: #42
Title: Re: صَبَرة وبِنت ودَبَاسة.. توجد لحظات ونظرات رهيبة
Author: Adil Hamza
Date: 02-18-2013, 04:27 PM
Parent: #41
سلام يا ابن خالتى خالد عبد الوهاب
مرحب بك فى سودانيس اونلاين
قرأت هذه القصة لك فى الفيسبوك و لم اراها هنا الا اليوم
كتابتك جميلة و ممتعة و ذكرتنا بايام الصبا فى قوزهندى
لا تتوقف عن الكتابة يبدو انك متمكن فى هذا المجال
تحياتى لك و للاخوة محمد و اسامة عبدالوهاب
عادل عبد الحميد
|
Post: #43
Title: Re: صَبَرة وبِنت ودَبَاسة.. توجد لحظات ونظرات رهيبة
Author: امير الامين حسن
Date: 02-18-2013, 07:57 PM
Parent: #42
سلام يا خالد
شايف الناس نست الاهم اللى هو وزى ما انت عارف
التصنيف بتاعنا البى هناك مبدئياُ كده ح نمشيى الموضوع
لحد ما يجى ود كانديك ...!
|
Post: #49
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-19-2013, 12:01 PM
Parent: #43
اووو امير ياحبيب
بالله هو ود كانديك برضو بي جاي ؟!
التصنيف ياخ خليهو انا ماصدقت الناس نستو بهناك اوعك تنكتو تاني هههههه
|
Post: #46
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-19-2013, 08:44 AM
Parent: #42
اوووووووو عادل عبدالحميد شخصيا
بالله انت بي جاي
كيف صحتك واحوالك ياخي
محمد واسامة بخير
تحياتي لجميع الشباب طرفكم
|
Post: #44
Title: Re: صَبَرة وبِنت ودَبَاسة.. توجد لحظات ونظرات رهيبة
Author: أبوبكر محمد عثمان
Date: 02-18-2013, 10:41 PM
Parent: #1
الشرك متعة يصعب استيعابها من خلال الحكاوي
واعتبر ان كل من فاته الاستمتاع بهذه الحرفه ان طفولته ناقصه
لا تلقي اللوم علي ذاك الطفل الذي نعتك بالتخلف
فمن تربي علي البلي استيشن واسبيس تون
لن يدرك ابعاد ما فعلته سيما وانك تجاوزت العمر الافتراضي ( للشرك )
اعدتنا الي زمن جميل وصافي
ممتع حد الدهشه يا خالد
واصل وحتماً سأكون من المتابعين
|
Post: #45
Title: Re: صَبَرة وبِنت ودَبَاسة.. توجد لحظات ونظرات رهيبة
Author: محمد جبره
Date: 02-19-2013, 03:44 AM
Parent: #44
شركك قبض يا دفعة وبقيت كاتب كاتبي المفضل ود البوش
كامل تضامني مع الصبرة
|
Post: #48
Title: Re: صَبَرة وبِنت ودَبَاسة.. توجد لحظات ونظرات رهيبة
Author: محمد يوسف الزين
Date: 02-19-2013, 10:08 AM
Parent: #45
أووووو لاخد لاغي
حبابك الف يازول
طبعن يا عمكـ أنا من القلائل الذين يعرفون "الوحش داخل الانسان" الذي تتمتع به
وقد درسنا في اوقات سابقة "انطلوجيا الافتراس" عند فصيلتكـ :)
لذلك أؤكد على حقيقة "الحكي"، ثم أزوغ..!
رحم الله صديقنا يوسف (صاحب رحلة صيدي اليتيمة تلك؟! لو تتذكر)!
__________
حكاية ممتعة كما تفضل الأخوة،
جيب الباقيات الزمان، الوقت مناسب :)
|
Post: #52
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-20-2013, 06:29 AM
Parent: #48
عابد ياصديقي
بالله عليك تتذكر انطلوجيا الكوارع ؟؟
يا اخي كانت ايام جميلة والله ... ترترنا فيها كثيرا
وياللذكاء الفطري والوحش داخل الانسان
رحم الله صديقنا يوسف .. وستظل رحلة الصيد تلك في الخاطر دوما
ــــــــــــــــــــــــــــــــــــــــــ
هههههه الوقت مناسب بالنسبة ليشنو يعني :)
|
Post: #51
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-20-2013, 06:25 AM
Parent: #45
تشكر يامحمد جبرة على القراءة ولطيف القول
ود البوش راجل حبابو عشرة والله
|
Post: #50
Title: Re: صَبَرة وبِنت ودَبَاسة.. توجد لحظات ونظرات رهيبة
Author: خالد عبدالوهاب
Date: 02-19-2013, 12:07 PM
Parent: #44
شكرا يا ابوبكر على القراءة وعلى كلماتك اللطيفة
شكرا كثيرا عزيزي
|
|
|