كلــــــــــــــــــــــــــب السُـــــــــــــــــــــرة

سجمي يا محاسن مويتكم دي ما كسرت ،،، يا محااااسن ،،، يا محااااسن
أجي البيت ده ما فيهو زول والا شنو ؟!
يا محاااسن
محاسن - جايه جاية ،،، أصبري يا عوضية ،،،، جاياكي
،،،
هي سجمي الموية دي ما كسرت!
عوضية - وانا من قبيل بكورك ليكي في شنو؟
محاسن - دقيقة النقفل الماسورة ونجيك - خشي جوه البرنده لحدي ما نجيكي
عوضية - بري .. بري والله - مستعجلة - بس شفت مويتكم كاسرة قلت النحدثكم تقفلوها - انا كنت ماشة على سوق الخضار
محاسن - هاي هو سوق الخضار ماشي يقفل ؟! خشي اخدي ليكي خشم خشمين وحصلي سوقك !
عوضية - ما بقدر والله مابقدر - حلتي لسا ما شديدتها ،،، ماشة النجيب لي قرع لحلة الغداء
محاسن - والله انتي يا عوضية امورك دي أصلو ما بتخليها - إلا تطلقي - عليكي الله لحدي هسا ماسويتي الغداء
عوضية - هااي انا كان بتطلق كان اتطلقت زماان - الله يخليهو لي
ودعتك الله يا محاسن
مع السلامة

إحتمال ضعيف - يتبع !

للمزيد من الهراء
الزول ده كعب

ك ل ب السرور !!

وين السرة

ال######

ولا

الشايلاه

جيت جاري يخسي شيطانك قلت دي قصة قصيرةلقيتها طويلة خلاس ايش هايدا خيو

دا وفاء ولا بلاش
:))))

سلامات يا باشمهندس وألف مرحب بيك,,


أصل رواية بتاعة بتاع السرة دى شنو لو سمحت!!!!
حتى يكتمل الفهم..

فى رواية ضعيفة تداولها الناس لكن إحتمال
يكون عندك الخبر اليقين...

تحياتى,,

محمد يوسف طه

Quote: ك ل ب السرور !!

سُرة السرور كمان

showgi idriss

Quote: وين السرة الكلــــــــب ولا الشايلاه جيت جاري يخسي شيطانك قلت دي قصة قصيرة لقيتها طويلة خلاس ايش هايدا خيو

في الحقيقة هي قصة قصيرة - بس نعمل شنو مع المزاج المتقلب !

رانيه محمد الشيخ

Quote: دا وفاء ولا بلاش :))))

وفاء السرة مش؟

أيمن الطيب

Quote: سلامات يا باشمهندس وألف مرحب بيك,, أصل رواية بتاعة بتاع السرة دى شنو لو سمحت!!!! حتى يكتمل الفهم.. فى رواية ضعيفة تداولها الناس لكن إحتمال يكون عندك الخبر اليقين... تحياتى,,

سلام يا أيمن
قصة ###### السرة لو حكيناها - اسمنا المكتوب بالرصاص بيتمسح سريع

سلام وتحية .. الأخ / أيمن محمود..
حقيقة العنوان جاذب ، وكان يمكن أن تستمر فى سردك حتى تصبح رواية تصل الى مكامن المقولة الشعبية ، :
( ك ل ب . السرة ) لتعالج جانباً من فصولها ولا ضير من إختلاق شيء من الخيال الذى يعطى بعدا من الرمزية المحببه مع إطفاء شيء من واقع التراث القصصي فى مثل هذه الأمثال التى ماعاد الجيل الحاضر يعي حقيقة واقعها ، ....

( ك ل ب ) السرة تحكى أضابير زمانها، بأن هذا المثل كان يضرب على الرجل ( الإضينه ) الذى لا يملك حولاً لما تمليه وتقوله زوجته ولا يستطيع رفضاً فى ذلك ، وكان القوم يرونه دائماًوهي تتقدمه على غير حالة الرجل السودانى التي تكون دائماً زوجته خلفه ، أما السرة فقد كانت إمرأة مهابه فى ديار الشايقيه حسب بعض الروايات وكانت ذات رأي وعزيمه ولكن قسمتها كانت في رجلٍ أمره هين فما يقدر على حل أمرٍ إلا بالسرة زوجته .. ، كانت خطواتها سريعة وقوية حين تأتى من الحقل تحمل ثقلها من حصاد على رأسها ، كان (السر) وهو إسمه، يتبها من خلفها حاملاً معوله ، فيرقبه القوم كثيرا فى هذه الحالة ويلومونه ويتندرون عليه بسخف القول ، ...
وإن كانت هناك رواية أخرى مغايره لما قيل بأن السُرة كان لها ( ك ل ب ) حقيقة يتبها فى حلها وترحالها ولم تتزوج لنفور الرجال منها لقبحها، فوجدت فى ( ك ل بها) وفاءً وحرساً فأصبح جزء منها يتبعها كظلها وعرف ( ال ك ل ب ) بإسمها ..
ولاندرى أيهما أصح وربما هناك رواية أخرى ..
لك تحيتي ..
محمد مختار جعفر

ول###### السرة اسم وهو
"قنيــــط"

وكان يقال قنيـــط ###### السُرة ... ثم بمرور الزمن ولبذاءة الكلمة الاولى في المثل اسقطت ليصبح المثل

###### السُرة فقط

استاذنا محمد مختار ،،، شرفني مرورك

Quote: حقيقة العنوان جاذب ، وكان يمكن أن تستمر فى سردك حتى تصبح رواية تصل الى مكامن المقولة الشعبية ، : ( ك ل ب . السرة ) لتعالج جانباً من فصولها ولا ضير من إختلاق شيء من الخيال الذى يعطى بعدا من الرمزية المحببه مع إطفاء شيء من واقع التراث القصصي فى مثل هذه الأمثال التى ماعاد الجيل الحاضر يعي حقيقة واقعها ، ....

كلامك ده قولو لى زول عندو حديدة بتاعة كتابة سنينة
احنا يا الله - بنتعلم الحجامة في ضهور اليتامى ،،،
وبما انو يبدو انك صاحب باع طويل في الادب القصص والرواية ...الخ
عايز رأيك في لونيتي الخاصة في الكتابة (الهراء) وهي كالاتي - لايمكن وصفها بالقصة القصيرة بل هي عبارة عن (مشهد) أو مايمكن ان نسميه حوار ذو مسحة قصصية - يطول أو يقصر ولايتقيد بقيود القصة القصيرة - يشبه fast food

قصة كلـــب السرة رواياتها متعددة ،، أقربها في رأيي المتعلق بالمثل الشهير ( ###### السرة لابيعشر لا بخلى كلاب الحلة تعشر)

يا أبويمن,,

الواضح جدا إنو وليد فتح ليك الدرب عشان تقول الفى نفسك...
(ك ل ب السرة محترف إثارة نزاعات وشمطات وجوطات فى نص المحاولات الجادة والشغلة تقلب شكلة وكبسيبة ونبحيبة وواحد من رجال الحلة ماشى صلاة الصبح يردم التجمع بكمية من الطوب وكلو جريو يمشى يشوف أهلو بى وين,,,,

تحياتى,,

كرا .. رو .. رو .. كش .. كشرن.. كش
- كسرتها ؟! خلاص كسرتها وإرتحتا؟!! ،،، انا من قبيل ما قلت ليك ما تخش المطبخ ده؟
،،، قلت ليك والا ما قلت لييك ؟؟
- آي قلتي لي ،،، بس انا... انا كنت عايز أشرب موية !
- تشرب !؟ تشرب !؟ ... أنا ما قلت ليك تاني ما تشرب بكباية القزاز ؟ ... وبعدين الحافظة الخاتنها ليكم بره دي عشان شنو ؟
يلا امرق بره المطبخ ده .... مرقت روحك
- لكن يا امي انا لسا ما شربتا !
- قلت ليك امرق .. انا بجيبها ليك بره ... الله!
...
شوفو الولد عليكم الله ! عدمني الكبابي
...
- طيب أفتح التلفزيون ؟!
- افتحو ... افتحو الله يفتح نافوخك ده ... عذبتوني في حياتي دي!
كو .. كو .. كو
- قبال ما تفتح التلفزيون اجري شوف الباب ده فيهو منو ؟
....
....
امي ...امي
مااالك تاني – داير شنو؟
– ديل ناس خالتي زينب جو بره
جو؟ .. جو بتين ؟! ال في الباب ديل هم ؟!
- آي ديل هم ... جو بعربية بيضاء
- يااا حليلك يازينب والله ... خلاص اجري...اجري اتشطف سريع
- هي لكن هم ما شافوني
- حيييي انا منك ... خلاص أمشي رتب الصالون سريع ،،، وكلم اختك تجري تجيب طقم الشاي بتاع ناس محاسن
- كويس
....
- ياولد تعال
- شنو؟! في شنو تاني ؟!
- البس ليك سفنجة

أيمن الطيب

Quote: يا أبويمن,, الواضح جدا إنو وليد فتح ليك الدرب عشان تقول الفى نفسك... (ك ل ب السرة محترف إثارة نزاعات وشمطات وجوطات فى نص المحاولات الجادة والشغلة تقلب شكلة وكبسيبة ونبحيبة وواحد من رجال الحلة ماشى صلاة الصبح يردم التجمع بكمية من الطوب وكلو جريو يمشى يشوف أهلو بى وين,,,, تحياتى,,

شكلك عايز ليك عضة في راسك يا ايموني
غايتو ليد الفيهو اتعرفت

Quote: استاذنا محمد مختار ،،، شرفني مرورك Quote: حقيقة العنوان جاذب ، وكان يمكن أن تستمر فى سردك حتى تصبح رواية تصل الى مكامن المقولة الشعبية ، : ( ك ل ب . السرة ) لتعالج جانباً من فصولها ولا ضير من إختلاق شيء من الخيال الذى يعطى بعدا من الرمزية المحببه مع إطفاء شيء من واقع التراث القصصي فى مثل هذه الأمثال التى ماعاد الجيل الحاضر يعي حقيقة واقعها ، .... كلامك ده قولو لى زول عندو حديدة بتاعة كتابة سنينة احنا يا الله - بنتعلم الحجامة في ضهور اليتامى ،،، وبما انو يبدو انك صاحب باع طويل في الادب القصص والرواية ...الخ عايز رأيك في لونيتي الخاصة في الكتابة (الهراء) وهي كالاتي - لايمكن وصفها بالقصة القصيرة بل هي عبارة عن (مشهد) أو مايمكن ان نسميه حوار ذو مسحة قصصية - يطول أو يقصر ولايتقيد بقيود القصة القصيرة - يشبه fast food قصة كلـــب السرة رواياتها متعددة ،، أقربها في رأيي المتعلق بالمثل الشهير ( ك ل ب ) السرة لابيعشر لا بخلى كلاب الحلة تعشر)

السيد / أيمن ... لك التحية مرة أخرى
نعم كما تفضلت ، هي صياغة حوارية فى قالب درامي ومشهد قصصي قصير ، أشبه بفكرة كاريكاتوريه تمس شغاف العادات والتقاليد عند الأسرة السودانية البسيطة ببساطة أهلها ونياتهم الطيبة ، وياريت لو ( طعمتها ) أكثر بكلماتنا الدارجة التلقائية التي تصدر من حبوبات وأمهات زمان ويتناقلها جيل اليوم ، والكثير منهم لايعرف معناها ، ... وكما فى اللغة من معنى إصطلاحي ومعنى لغوي فدارجتنا السمحة فيها من المعاني التربوية والأخلاقية وفيها ما ترمي الى العظة والى السخرية ، ...
ياخي كلامنا البلدى ده حلو وجميل خلاص ... أكتب ياخي وكلنا سواء ...
شكراً ولك التقدير ...
محمد مختار جعفر

متابعين يا برلوم سابق

ليك الود

محمد مختار جعفر

Quote: السيد / أيمن ... لك التحية مرة أخرى نعم كما تفضلت ، هي صياغة حوارية فى قالب درامي ومشهد قصصي قصير ، أشبه بفكرة كاريكاتوريه تمس شغاف العادات والتقاليد عند الأسرة السودانية البسيطة ببساطة أهلها ونياتهم الطيبة ، وياريت لو ( طعمتها ) أكثر بكلماتنا الدارجة التلقائية التي تصدر من حبوبات وأمهات زمان ويتناقلها جيل اليوم ، والكثير منهم لايعرف معناها ، ... وكما فى اللغة من معنى إصطلاحي ومعنى لغوي فدارجتنا السمحة فيها من المعاني التربوية والأخلاقية وفيها ما ترمي الى العظة والى السخرية ، ... ياخي كلامنا البلدى ده حلو وجميل خلاص ... أكتب ياخي وكلنا سواء ... شكراً ولك التقدير ...

للاسف الجزء الاغلب من حياتي كانت خارج السودان منذ الطفولة (ليست الباكرة) وحتى الآن ،،، وما اكتبه انا اعده اعمال تجريبية ...لا أكثر