هل للصور والمواد المنشورة في الفيس بوك خصوصية ؟

الفيس بوك
الذي اصبح يدخله الملايين كل يوم ..
خلونا نتسأل فيهو عن خصوصية المادة والصور المنشورة فيهو من قبلنا ..
وحدود الخصوصية دي ..
وهل وجود صورة من الصور الشخصية الخاصة على موقع الفيس تجعل منها حق مشاع لكل من استطاع الوصول اليها .. . ؟
سألت نفسي السؤال دا ...
طيب لو صاحبه ما عاوز حد ينتهك خصوصية الصورة بتاعتو او المادة الكتبه ليه نشره على موقع الفيس . ؟
بمعنى لو نزلت صورة في صفحتي في الفيس تخصني شخصياً او تخص احد افراد اسرتي وجيت لقيت صاحب ستديو او محل معلقة في واجهة المحل بتاعو .. هل هو مُلام ام ان اللوم يقع علي انا الارتضيت من البداية اخت صورتي في محل عام ..
وممكن شخص ليس من اصدقائي يشيل صورتي و من صفحتي في الفيس طالما الصفحة مفتوحة ويستخدمه في مواقع اخرى وصفحات فيسبوكية اخرى .. هل من حقي امنعو وهو اصلا لقى الصورة مشاعة للجميع ..
سألت نفسي الاسئلة دي وانا اشاهد كثير من الصور الاسرية لبعض الناس وفي اوضاع اسرية خاصة على صفحات الفيس ..
وماهي حدود الحماية الممكن نوفره لي صورنا وصور اسرنا وكتاباتنا وتعليقاتنا واخبارنا على الفيس .. هل في امكانية حماية ليها من الاخرين الغير مرغوب في رؤيتهم ليها لازم نضمن كده
او كمان ما ننزل صورنا عشان تبقى حق مشاع للجميع استخدامه ورؤيتو والتعليق عليهو ..
وحقيقة رايكم شنو في البضع صور وفيديوهات خاصة واسرية على صفحتو في الفيس وصفحتو مفتوحة للجميع او بشارك الحاجات دي مع اصدقائهم الصفحاتهم مفتوحة .. ؟ هل يمكن ان يكون عاقل او غيور .. ؟
وهل يستطيع ان يلوم احد ان استخدم هذه الصور والفيديوهات والتعليقات والمعلومات والاخبار ..
ما الاسفير دا مفتوح للجميع وهو مكتبة عامة ..

Quote: طيب لو صاحبه ما عاوز حد ينتهك خصوصية الصورة

لو ما عاوز ختها في الدولاب تحت الهدوم وتربس عليها

Quote: هل للصور والمواد المنشورة في الفيس بوك خصوصية ؟

اكيد
ممكن تمشي لي
إعدادات الخصوصية وأدواتها
من يستطيع رؤية محتواي؟
تعديل
من يستطيع رؤية منشوراتك المقبلة؟
العامة

عمر ارباب

تحياتي

شكراً على الافادة والمعلومة

الزبير صالح

تحياتي

يعني الزول البخلي العفش في السهلة

اذا جاء حد شال العفش واستخدمو

هو المسؤول عن شتيت عفشو

والشال العفش ما عليهو مسؤولية

الفكى ود الفكى
حبابك آمك
على قول احد الاخوان تمشى الاعدادات و تعمل الضبط العايزو
تحياتى

امجد
منور يا راجل

غايتو مواعيد عرقوب ( مع وش زعلان )

القصة في الزول الفرط وما عمل اعدادات الخصوصية

وخلى العفش في السهلة للغاشي والماشي

المسؤولية تقع علي منو لما العفش يتنشر ويعم البادية والحضر

الصور في الفيس يمكن التحكم فيها

إن عرضت صورتك الخاصة للعامة هنا تنتفي الخصوصية

تلقائيا لأنك براك سويتها بيدك وبعد دا كان تم استخدمها

من قبل إي شخص من الأحسن ان لا تزعل أوتطالب.

في صور شخصية وخاصة جدا وبمحض الارادة نضعها ليشاهدها

صديق عزيز تثق فيه.

حسين ديقول

الرجل الجميل اسعدني مرورك ولك مني التحايا

نعم من يضع صوره وصور اسرته الشخصية ويعرضها للعامة ..

ليس من حقه الغضب اذا تم استخدام هذه الصور ..

والبعض قد تكون هذه قناعاته انه لاضير من استخدامها ..

والبعض يكون نتيجة الجهل ..

والقانون لا يحمي المغفلين ..

ففي الحالتين يجب على صاحب الصورة تحمل نتيجة ترك الصورة للعامة ليشاهدها ويراها ويستخدمها من يشاء .

يعني من الاخر كده ما يزعل ولا يغضب على احد ولا يلقي باللوم على من استخدمها

السلام عليكم الاخ على

زكرنى الموضوع دا قبل كده فى حمامة خاتة ليها صورة خاصة فى الفيس قام واحد من ضكر الحمام نزل الصورة فى منتدى

وبعد شوى عينك ما تشوف الا النور ضكر الحمام بتاعها دور ليك دشمان وضرب من طرف هههههههههههههههههههه

وما تشوف الا ريش الحمام طاير لما عمك كفر ظاتوا

غايتوا كان فلم عجيب

بس ربك رب الخير حزموها ودفنوها وحذفوا البوست

يا زول النت دا غير المصائب فيه شنو علشان كده الواحد يعمل حسابوا شديد

الخاص خاص فى البيت بث ما للعام

فالبنشر الخاص فى العام يتحمل اى نتيجة هذا راى شخصى

Quote: وماهي حدود الحماية الممكن نوفره لي صورنا وصور اسرنا وكتاباتنا وتعليقاتنا واخبارنا على الفيس .. هل في امكانية حماية ليها من الاخرين الغير مرغوب في رؤيتهم ليها لازم نضمن كده

سلام يا صاحب البوست.

قاعدة عامة ...... الإنترنيت ما فيهو تأمين 100% ..... عندك مادة خايف عليها ... ما ترفعها في السيرفر من أصلو .... لا إعدادات بتنجدك لاحماية خصوصية ولا أي نوع من البرامج.

مرة تانية: مافيش تأمين 100%

Quote: وبعد شوى عينك ما تشوف الا النور ضكر الحمام بتاعها دور ليك دشمان وزعط من طرف ههه

؟؟؟؟؟؟؟؟؟؟؟؟؟؟؟؟؟؟؟

أبو الريش سلام

ياريت تمسح الاقتباس

لانو شايف الجماعة عدلو

أنا ذاتي ح أرجع امسح دي

ولك التحية

محمد ابو العزائم ابو الريش

تحياتي

يعني كل اجراءات الحماية والخصوصية الممكن تتعمل

جدواها ليست كاملة

اذاً ما لا نريد ان يراه الاخرين يجب علينا حفظه بعيداً عن النت

مشكور على المعلومة القيمة

وضاحة

تحياتي

الحمامة يمكن صورته عاجباها ..

ثتانياً ضكر الحمام الغافل ضربو دا كان يكون لي حمامتو الفرطت وختت صورتها ...

الناس التانين ذنبهم شنو لقو صورة في الفيس وعلقوا عليها وشالوها

والزول الاستخدم الصورة في منتدى تاني ما عليهو اي مسؤولية

وزي ما قالو العفش على مسؤولية صاحبه

والبخت عفشو في السهلة للغاشي والماشي يستاهل

نعم البنشر الخاص في العام لا يلومن الا نفسه

Quote: والزول الاستخدم الصورة في منتدى تاني ما عليهو اي مسؤولية

القال ليك منو ما عليهو مسؤلية

الواحد كان لقي فرصة في الناس طوالي يقع فيها

بشر إنتو ولا حيوانات

ياخ في ناس ما عارفة إنو الصور دي عامة ولا عارفين شنو يعني إعدادات الخصوصية

ياخ أخت الزول العمل ألفيس بوك قبل كدا دقست صورتها بقت عامة

ألانتهازية ما كويسة

وبعدين تعال هنا

صورة ما حقتك داير بيها شنو ؟

أمشي جيب صورك وصور أهلك وختها للناس لو ما شايف فيها حاجة

الكلام ده لي أي زول بقول ما فيها حاجة تشيل صور الناس

ايمن الفاضل

واحسب انك فاضل

تحياتي

الموضوع مطروح للنقاش بعيد عن السباب

ابرد يا زول

من وجهة نظري انو من يخطئ يتحمل مسؤولية خطأوه بوضعه لصورته وتقع عليه المسؤولية الاولى في كونها تم استخدامها من قبل اي شخص اخر ..

الحبيب علي محمد الفكي

تقبل إعتذاري عن أي إساءة وردت في كلامي

الموضوع حقيقة يزعل

الناس الخشت ألفيس ديل فيهم ناس مساكين ما عارفين أي شئ

في النوع اليجيك يقو ليك أعمل لي حساب في ألفيس بوك

تلقاهو بعد داك شايل ورقة حايم بيها فيها الباسورد

مش لاقوك زي ديل ؟

اها ده مسؤلية شنو يتحملها

Quote: من وجهة نظري انو من يخطئ يتحمل مسؤولية خطأوه

نعم المخطئ يتحمل مسؤلية خطؤه

والمخطئ هنا هو من يتلصص ويتطفل علي الناس

ايمن الفاضل يا حبيب

ليس بيننا ان شاء الله الا كل محبة ومودة واحترام

نعم كثير من مستخدمي الفيس يتعاملون بحسن النية وايضاً الجهل

مما يعرضهم لان تنتهك خصوصياتهم

والانتهاك للخصوصيات ايضاً يكون بحسن نية وجهل من البعض

ويكون بسؤ نية وقصد من اخرين

ومن عرض خصوصيته لتنتهك لا يرمي باللوم على الاخرين

وقديماً قيل من لا يتقي الشتم يشتم

وك كل الود والتقدير