حاجات نفسك تعملها وما منطقيه

امس ماشيه اجيب حاجات من سعد قشره فى بحرى
واتذكرت شارع العرايس الفى المؤسسه
يشرح لزول قلبه وهو بيعاين فى الابيض ابيض المفترن دا
قوم ايه بقى
قولت فيها شنووووووووووووو حسى دى
لو ركنت عربيتى ونزلت دخلت واحد من المحلات دى
وقست لى فستان زفاف ساى
من نفسسسسسسسسسسسسسسسسى كده ساى
هو يعنى لاااااااااااااااازم يكون فى عريس عشان اقيس
اقلها الزول يكون اخد خبره لمن تجى ساعه الصفر
ويكون حدد اتجاهو والشى الحيختاروا ويكسب زمن
اكتر هاجس للفتاه فستان زفافها
وانا بككككككككككككككره البوديهات الشوهوا بيها فساتين الزفاف
يعنى الوحده ما قادره تلبس استرابلس يبقى ما تتشالق وتشيل فستان استرابلس وتبشتنه ببودى
الاسترابلس جماله استراااااااااااااااااااااااابلس
المهم
خطرت فى بالى الفكره حقت الموضوع
اكيد اى زول فينا بتجى افكار لحاجات نفسه يعملها وهى فعليا ما منطقيه
فشنووووووووووووووو قولكم

Quote: حاجات نفسك تعملها وما منطقيه

انا نفسي اعيش واشتغل في السودان

عليك الله يا أساسى دى حاجه ما منطقيه
دى اسمها احلام زلووووووووووووووووط
لانك فطيت المنطق بشبرين وتكه
لكن لو جنيت فعليا ممكن تسويها
طول ما عقلك شغال بتاااااااااااااااااتا ما حتفكر حتى تتخيلها
عموما انا بحسسسسسسسسسسسسسد نفسى انى عايشه فى السودان وشغاله
لانى جربت الغربه وعارفه الفاااااااااااااايتكم ومورم فشفاشكم شنوووووووووووووووووووو
فى المقابل بتاكلوا لكن ماكدونلز وكنتاكى وهارديز
وطفاسه منكم ساى نفسك فى سمك عوضيه وبوش الجان
الحياه لا تعطى كل شى ولكن تمنحك ماهو مقسوم ليك فلااااااااااااااااااااا تحزن

يعجبني في بوستاتك يا رانيا في انك تتصدريها بنفسك وتقدميها كأنها تجربة علمية انت ادواتها .. قد يسئ البعض فهم المقصد وتلاقي البوست راح في اتجاه مختلف

الخواجات كانوا اشطر مننا في قواعد لغتهم وقسموا التمني لثلاثة انواع

النوع الاول وهو النوع الممكن يتحق بشروط معقولة F1


النوع الثاني وهو ذو شروط تعجيزية ويستحيل يتحقق الا بمعجزة f2 مثلا تقول لو كنت بعرف بطير هسع كان مشيت السودان حضرت المولد ورجعت





ونوع ثالث كان ممكن يحدث لو رجع الزمن للورا F3 يعني مثلا تقولي لو كان وافقت بخطوبة فلان ديك كان هسع يكون عندي طفلين ..

.............................

اعلاه هي محاولة للحفاظ على البوست حتى لا ينحرف ويتحول الى مسألة شخصية


و الغنى السوداني ملئ بانواع الامنيات اعلاه

مثلا لمصطفى سيد احمد

نفسي في داخلك اعاين ولروي روحي واشوف منابعك

نموزج لنوع f2 لانه عمره ما راح يقدر يعاين في نفسها حتى لو بجهاز الترا ساوند


حا راجع بنماذج

عارف يا درديرى من اول متاوقه لى فى الشبكه العنكبوتيه وانا بصادف الفهم دا وحسى بقيت لصراحه ما بشتغل بيه
انا بكتب البحس انى عايزه اكتبه واشاركه
يتفهم ما يتفهم دى مشكلة القارىء
بما انى ما تعديت حدودى الدينيه والادبيه والاخلاقيه فيه
ومع طول الزمن فعلا لقيت ناس بقيت فاهمه مقصدى كويس وما بتمشى لبعيد
والبيمشى لبعيد غايتو بتجى عليه لحظه بيلقى نفسه قدام حيطه سد نخرته مورمه منها
لذلك وعلى هذا المنطلق فأنا مازلت أنا
وبحب اكتب شى فعليا مشتق منى ما من غيرى
عشان احس بمعناه واقدر اوصل فكرته للقارىء العقليته ما حجريه وما تقليديه
والبيحاول يشيل البوست شمال بشيله هو زاتو والبوست يمين
يا بفجره فيه وبرتاح
نرجع بقى للامانى وموضوع البوست
:)
النوع الاول ما تبع الموضوع لانه يتحقق بشروط معقوله ونحنا هنا نرجح للغير منطقيه
:)))
التانى زى احلام زلوط واساسى وديل اخرتهم كشحت مويه عشان يفوقوا سمح
:))
الثالث بقى دى احلام الندامه وما بحبها بنوب لان اى شى فاتنى ما بفكر فيه بطريقه تخلينى اكدكد اعصابى
وبفهم نسائى حاقد بكون بمنطق روحى بانه كان فيه وفيه وفيه ويييييييييييع
لكن بفهم دينى اى شى فعلا فاتنا لخير لينا ولو صبرنا لقدام حنتاكد ان ربنا فعلا عوضنا خير

Quote: فشنووووووووووووووو قولكم

تلفحي أقرب استرابلس وتنكشي شعرك وشوية ليب قلوز وتاخدي صورة زي الورد ..الحياة دي قصيرة والحاجة

الفي نفسك أعمليها حبيبتي طال ما أنها ما بتضر زول ..


وتذكري دائما حكمة الفيلسوف قيقراوي قدس الله سره ..المافي شنو ؟\



ياخ أنت زولة نضيفة من جوة وأنا قاعدة أحب صدقك الله يديك الفي مرادك ..قولي آميين

رانـيا سنـة حلـوة عليـك 2013 يــارب ...

نفســي العــب واجـرى زى اولادى مـن غيـر مازول يقـول جنـت ههههه,,,

امين اجمعين سروره
تسلمى عيونى
غايتو انا لو مكانك بجرى وبلعب وانطط زاتو
من كم يوم مشينا معرض الخرطوم
لقينا ناس كوكاكولا عاملين لعب بتذاكر
واحده كانت تووووووووووووور كده بينفض الراكبه
والتانيه كرة سله لو الزول جاب نقطتين من اصل 3 بيدوا هديه
وقفت لاخويه اصر واصرصر الا امشى اللعب السله
نظرا لانى لابسه كنت جيبه لو ما كده كان اخترت التور
وفى زحمة الشفع الواقفين فى الصف اتزرعت انا بينهم
ما انكر الكبار بقوا يعاينوا لى باستغراب
دى الجابها هنا شنو
ولمن جيه دورى
مشيت فى امان الله رافعه راسىىىىىىىىىىىىىى امام الركب
وشلت الكوره ولقيتها مفسسسسسسسسسسسسسسسيه وقولت ليهم الكوره دى ياخى بيش
المهم جبت واحده من اتنين وطبعا الغلط من الكوره ما منى
وادونى بلووووووووووووونه
وحياتك ليسه بنفخه فيها طرشقت فى وشى
اخويه قعد يضحك قال لى حتى البلونه طلعت فشنك
:))))))))))))))))))))))))))))

دلويه العسل
تسلمى حبيبتى
غايتو من كم سنه كده فاتت شديد :)))))) كان بنت اهلى عروس جات تلبس عندنا وتتجهز
قومت يا زوله سرقت طرحتها وناديت اخويه
حنسته يصورنى بيها لضمان اقلها تبقى عندى ذكرى جميله
لكن احساس الفستان بيكون اجمل
ودى مابراها البتمنى احققها
غايتو نفسى اسااااااااااافر براى كده جزيره اركب فيها مكنة سايح واسيح
يا اقيف فى نص شارع القصر الساعه 3 صباحا اكورك
فستان الزفاف كان مجرد مدخل اتسبب فى فكرة البوست وموضوعه
واكيد داخل كل واحد فينا شى بيتمنى يعمله وخجلان يعمله لاسباب بيزينطيييييييييييييييييه

يا رنوية عاااارفة موضوع الفستان كان مدخل..

بس القصدي أقولو انو في حاجات بنفتكرا ما منطقية لأنو الناس حيرفضوها ..لكنها عادية ..عندي صديقتي ما متزوجة ..وكانت مهلوسة بالحنا وأنها نفسها تتحن ..، سقتها لأقرب حنانة ولمن بيقينا على الجد قالت بتحنن أيديها بس ـ حسب العرف ـ وفي رأي كان انو القصة ما حتحلا كدة لأنها رضخت للفكرة الأصلا مهجساها ..المهم في الأخر وافقت أنو الحنا تكون في باطن القدم عشان ما تظهر وفي نفس الوقت تكون حققت الفي نفسها..ما كان في يدي اضغط عليها أكتر من كدة لانو ما من حقي ..

عشان كدة كل زول يحدد المنطقي في ما يليهو حسب أفكاره وتقيده بالحاجات المفروضة علينا تحت اسماء مختلفة ..

اتفق معكى دلويه
وكده شجعتنى اعمل الصبحيه النفسى فيها بدون عريس
ههههههههههههههههههههههههههههههههه
فى مره انا وصحباتى روحنا حرقتنا على ربه
قومنا قررنا نجيب غنايه ونتلم فى بيت وحده فينا العصر نهجج
الحكايه والله كانت لذيذه
الضحكنى ان الغنايه الجبناها تسئل فينا المناسبه شنو
نقول ليها ساى عايزين نهجج بس ونفك الكبت الفينا
وهى ما قصرت عرفت الفوله وهججت حنان الدلوكه زاطووووووووووووووووو
عشان كده فعلا صدقتى فى القولتيه وخساره صحبتك ما كان عندها الشجاعه تكسر حاجز المنطق وتعمل الما منطق عشان تفش نفسها وامنيتها

Quote: امس ماشيه اجيب حاجات من سعد قشره فى بحرى واتذكرت شارع العرايس الفى المؤسسه يشرح لزول قلبه وهو بيعاين فى الابيض ابيض المفترن دا قوم ايه بقى قولت فيها شنووووووووووووو حسى دى لو ركنت عربيتى ونزلت دخلت واحد من المحلات دى وقست لى فستان زفاف ساى من نفسسسسسسسسسسسسسسسسى كده ساى هو يعنى لاااااااااااااااازم يكون فى عريس عشان اقيس اقلها الزول يكون اخد خبره لمن تجى ساعه الصفر ويكون حدد اتجاهو والشى الحيختاروا ويكسب زمن اكتر هاجس للفتاه فستان زفافها وانا بككككككككككككككره البوديهات الشوهوا بيها فساتين الزفاف يعنى الوحده ما قادره تلبس استرابلس يبقى ما تتشالق وتشيل فستان استرابلس وتبشتنه ببودى الاسترابلس جماله استراااااااااااااااااااااااابلس المهم خطرت فى بالى الفكره حقت الموضوع اكيد اى زول فينا بتجى افكار لحاجات نفسه يعملها وهى فعليا ما منطقيه فشنووووووووووووووو قولكم

صاحبتي زمان عملت حاجة قريبة لحاجتك دي..
رسمت حنة بالقلم الشيني ولبست لبس العروس وإتصورت بالدهب كامل..
وبعدين أجرت ليها فستان أبيض وبرضه مشت ليه الكوافير وإتصورت بيه..
دلوقتي صور زواجها الهظار كلها في الالبوم مبسوطة بيها..
........
........
أفتكر أي إنسان من حقه يعمل أي حاجة بتفرحه ومافيها أذية للآخرين..
أفرحي بشقاوتك وبحبك للحياة وأنبسطي..
فماهو منطقي لك قد لا يكون منطقي للآخرين..
الإخرين ديل ممكن يطرشقوا ليك الفكرة في راسك قبل ما تعمليها!

أفكارك حلوة يا رانية..

تسلمى يا منى
والله سعيده ان المداخلات اغلبهم من بنى جنسى
ودا فعلا حسسنى انكم فهمتونى صح
الروتين فى الحياه بقى ممل
ولو الزول جرب يعمل حاجه خطرت له فى بالو يعملها ونسى ولو لدقايق فهم الناس الحواليه حيكون فيه شنو
بالجد حيمر بتجربه حتفضل له ذكرى باقى عمره كل ما يتذكرها يبتسم ويضحك من جواه
انا فى الجامعه ما خليت لى شى كان نفسى فيه ما عملته
كنت فى فريق الطايره والسله وبجانب انى كنت كويسه فى دراستى
يوم التخرج جاتنى اولة الدفعه تقول لى انتى عارفه انا بحسدك
قولت ليها سجمى حالتك انت اولة الدفعه
قالت لى للاسف اى اولة الدفعه لكن ما حتذكر اى شى من حياتى الجامعيه غير الدراسه
لكن انتى استمتعتى بيها فعلا وعندك ذكريات فيها احلى
عشان كده ما بتهاون فى تنفيذ اى فكره ما حتضر غيرى وحتسعدنى
غايتو فى مره لو سمعتى فى زوله نطيت من الكبرى القديم البيدخل على امدرمان من الخرطوم حكون انا
ههههههههههههههههههههه
نفسى اجرب احساس الطيران والهبوط الاضطرارى فى المويه
:)))

انطلاقا من ايماننا الراسخ بأن اللبيب بالاشارة يفهم ، وبما ان رانية بنت محمد الشيخ قد اشارت بما لا يدعو للشك الى ان نفسها تتجوز
فعلية نسأل الله ان ينولها مرادها

ما اشرت لشى يا ايمن
وكان كنت فعلا لبيب ما كان كتبت ردك دا

يا رانية أنا غايتو كتير بنفذ الحاجة وبعد داك بعرف انها ما منطقية

أول ما انتهينا من الدفاع الشعبي وماشين الجامعة كانت عندي سخانة في القدمين

أختي الكبيرة قالت لي النجلبطن ليك بحنة ( الحنة زارعنها في حوشنا ) قلت ليه أبشري

قومي طوالي بعد العشاء اعجني ديك يا الحنة ومشينا بالنفاج بيت الجيران ، جابو الطربيزة

مددت ليك رجلي وقعدو يحننو فيهن ، قمن قلت لي أختي تم جميلك وحنني لي اليدين كمان

زولتك طوالي حننتهن بعد يومين مشين الجامعة برلوم كرت ، الناس كلها مفتكرني عريس

وأنا لا هسع ما عارف عملت كدا ليه.

الحكاية التانية

جيت الخرطوم في بداية سمستر وفي نفس اليوم الجيت فيه مشيت أبيت عند خالي

أها لقيت ليك عربية مسافرة البلد ، طوالي قلت ليهم أنا راجع معاكم

رجعت وصلت بعد منتصف الليل ، دخلت البيت نمت في الديوان والصباح

مشيت لناس البيت ، الجماعة اتهجموا،

امي من الدهشة جيت ليه قلت ليه ما عارف

وللآن ما عارف رجعت البلد ليه

حسين
طيب بعد عملتها ما حسيت بارتياح وسعاده؟؟
ولا بس مجرد تصرف فجئه قررت تعمله وما عارف سببه
فكرتنى بمره كنت ماشيه درس خصوصى فى اسكندريه
وراكبه المشروع
المشروع دا حاجه زى الهايس بالضبط
ومشكلتها بتقيف فى حته اسمها المندره
وانا ساكنه فى الحته البعديها اسمها المنتزه
بضطر انى انزل وامشى برجلينى لحد البيت مسافه حقت ربع ساعه ولا نص الا هبابات كده
اها فجئتا المشروع وقف ينزل زول قدام محطه القطر وكان فى قطر فى المحطه
اظن فى اللحظه دى مخى وقف بتاتا ومسكت شنطتى وتلبت من باب المشروع
وجريت قطعت الشارع ودخلت المحطه
والقطر بدى يتحرك
نطيت القضيب لان اتجاهى كان معاكس قدام القطر البيتحرك براحه
وجريت على الرصيف
الناس شافت الحركه حقتى وخصوصا الراكبين القطر وبقوا متاوقين وعايزين يعرفوا حصل ولا ما حصل
والقطر سرعته بقيت ازيد وانا جاريه عشان احصل الباب
كويس ان فى رجال نقشت حركتى الغبيه ووقفوا لى فى الباب
عرفونى ما حقيف وانى حنط
ومع النطه مسكونى عشان ما ادردق
فى لحظه دى بقى نططت عيونى كانى فجئه وعيت وكنت غمرانه
وجماعه يعاينوا لى عشره عشره
على اقرب كرسى ارتميت ورجولى بتررررررررررررررررررررجف وقلبى داير يمرق عديل بره
ولحسى انا ما عارفه اتهورت كده كيفين
لكن لصراحه ما شى اسعدنى
وبموت من الرعب كل ما اتذكر ان لو رجلى كان اتزلقت تحت القطر كان بقيت بسطرمه
:(((((((((((((

Quote: ما اشرت لشى يا ايمن وكان كنت فعلا لبيب ما كان كتبت ردك دا

حسى منو فينا اليزعل يا ايمن
لو قريت باقى الامنيات كان عرفت انى ما اشرت للقصدته انت بردك
وكان بفهمك يبقى امنيتى انى انط من فوق الكبرى انتحار واعراض سن اليأس
ولا انى اركب موتر اعراض استراجال
ولا رايك شنو
عموما ما تزعل نحنا بنتناقش
وورينا الحاجات النفسك تعملها وما منطقيه

Quote: فشنووووووووووووووو قولكم

أفحــــــــــط بالعربية

شكرا رانيه .....

الشكر ليك يا محمد
تخيل انا نفسى اركب موتر
:)))))))

نفسي اعضي عبد الرحيم محمد حسين في اضانه لمن يجيب دم

نفسي أبقى سنة تانية ابتدائي
يا الله

بالغته يا الصادق
دى حاجات فطيت بيها احلام زلوط
الامانى هنا من الممكن تحقيقها لو اجتهدت فيها
لكن دى كان اجتهدنا ليك كلنا ما حنقدر عليها
:))))))))))))))))))))))))))

مين دا يا درديرى
:)

اخت لى كرسى قدام باب بيتنا فى المنارة فى ام درمان واقرا جرايد اليوم الصباح
واتغدى الساعة 3 ظهر واتخارج على اقرب ميدان سنتر ليق اشوف ولاد الحلة بيلعبو كورة
وامشى بعد المغرب لنادى الحلة العب وست اوهارت او كنكان 14 وارجع البيت زى الساعة 10
اتعشى فول حار بزيت السمسم واشوف السهرة وشرطا تكون فرسان فى الميدان
اها كده كيف مش ده المستحيل زاتو

مستحيل ليه يا عادل
شكلك يا عشان مغترب
يا البيت باعوا
يا ميدان سنترليق بقى سوبرماركت
ونادى الحله بقيت صاله اعراس
وبالنسبه للفول والسمسم الانبوبه حقت الغاز خلصت ولا شنو
:)))))

سلام يا رانيا


أنا عايز أمش حفيان

عشان أحس بالأرض دي

لمدة شهر على الأقل


والله صحي

نفسي أحضر جلسة استماع لحمد عبد الغفار الذي كان يطربنا في شمبات.

عدم المنطق في هذه الأمنية أنها ستقتضي من حمد خروج وعودة،
ومنّي ثلاثة آلاف من الأميال وتذكرة سفر لاأملك قيمتها.

معذرة يا رانيا

يا محمد الطيب

إنشاء الله ياخ نتقابل

لو على التذكرة ساهلة

لكن أنا اعمل خروج وعودة كيف؟

جهجهت باكاتي

أنا بجتهد وبخت حرف "أ" بين محمد والطيب عشان أكمل الأسم لو ياهو تكون أنت هوتميل
وتكون بالغت هنا من 2009 وأنا ما جايب خبر؟

الصبح بينا الماسنجر هسة مارق أشوف لي عشاء ما منطقي

أمسك مايكرفون وأكون قااااااشرة ولابسة اللي ع الحبل وإكسسوار في إيدي للكوع
وأقول سيداتي سادتي والان نقدم لكم الفقرة القادمة

رويا
احييكى على الامنيه الجميله
انا نفسى فى يوم زفافى امسك المايك واغنى لعريسى غنيه من خلجاتى لمن مخاخيطه تطاقش
:))))))))))))))))

كويس الموضوع جمعكم ببعض
وعلى قول عادل الامام
تلقى بعد ان ظنا كل الظنىىىى ان لا تلقيا
:)))))))))))))))

يا محمد نشوف حل وسط
بما انكم الاتنين فى الخارج
اقرب حته بينكم بتوفر ليكم كتير وبتحقق المنى
:))))

يا حمد
امنيتك حيرتنى عددددددددديل
ما قادر تمشى حفيان ليه
؟؟؟؟؟؟؟؟؟؟؟؟؟؟؟؟؟

سلام يا رانيا

Quote: ما قادر تمشى حفيان ليه

كان مشيت حفيان بقولوا مجنون

بعدين المشي الأنا قاصدو ما داخل البيت بس لأنو أنا المشي في الفرش والسيراميك والبلاط ما بعجبني

أنا عايز أمشي حفيان عديل يعني أمشي الشغل، أمشي أزور ناس ، محل ما أمشي أكون حفيان قدمي دا يلامس التراب ما لي أي علاقة بجزم وشرابات وشباشب لمدة شهر الخ

كده فهمت الفوله يا حمد
لكن بالجد دى حتكون فلته لو عملتها
غايتو كان عزمت عليها افضل الاجواء الصيف
لان الشتى بيكون صعب
:))))))))))))

أسكن في الجليب.

بتعرفي الجليب يا رانيه؟

نفسى اطلع القمر واقعد فيهو يوم كامل اعمل لى حله سليقه

اديها كده يا محمد قرن ونص
وحفيد حفيد حفيد حفييييييييييييييييييييد حفييييييييييييييييد حفيييييييييييييييييييييييييييييييدك حيحقق ليك امنيتك
لكن الموشكل حيكون فى انعدام مكونات السليقه
قالوا الجماعه ممشينها كبسولات ساى

Quote: تقول لو كنت بعرف بطير هسع كان مشيت السودان حضرت المولد ورجعت

ي رانيا بمشى احضر مع درديرى المولد ويغشينى معاهو فى الرجعه ، الحله مامشكه بلقى لى خواجات قاعدين عندهم عدة

Quote: قالوا الجماعه ممشينها كبسولات ساى

خواجات وعده ما بتركب
اخير ليك المولد مع درديرى واغشونى معاكم بالمره
:)))

دى مشتقه من القليب يا دينق؟!؟!؟!؟!؟

ما ارد علي التلفون ولا اضرب لي زول تلاته يوم
وأظنك عارفه ما منطقيه ليه

عارف يا محمد ادم
دى افهم حاجه تتمناها وحتلقى نصف الشعب الارضى بيتمناها

غايتو امس قربت اعمل حاجه وكان بتكون ما منطقيه
انى انزل من العربيه
ادق الجماعه الفى الاستوب
المصريين يمسحوا العربيه
ولمن نهرتهم عملوا فينى حركه زبااااااااااله
والغاظنى اكتر مافى زول حتى ادخل من الحوالينى بنهره سسسسسسسسسسسساى

انا نفسي اخش الجنه و










رانيه سلامات

ودى ما منطقيه ليه
مافى شى بعيد من الله
كلنا بنتمنى ندخل الجنه ونرضى ربنا وبنسعى وبنجتهد برغم من فشلنا
برضو بنحاول
لان ربنا اوصانا ما نقنط من رحمته