البورداب من أبناء كسلا مرحبا بكم ..

البورداب من أبناء كسلا مرحبا بكم ..


01-23-2013, 05:02 AM


  » http://sudaneseonline.com/cgi-bin/sdb/2bb.cgi?seq=msg&board=420&msg=1358913753&rn=8


Post: #1
Title: البورداب من أبناء كسلا مرحبا بكم ..
Author: عبد المنعم ابراهيم الحاج
Date: 01-23-2013, 05:02 AM
Parent: #0

الذين جمعتنا بهم تلك المدينة الغارقة في تفاصيلها كسلا الواقعية.. وتلك المدينة الإفتراضية ( كسلا الجمال)
والذين تقاطعت بنا أراضي المنفى والغربة...

مرحبا بكم .. ولكم التحية ..

Post: #2
Title: Re: البورداب من أبناء كسلا مرحبا بكم ..
Author: عبد الله كسلا
Date: 01-23-2013, 05:32 AM
Parent: #1

أهلين ومرحبتين حبابك يا إبراهيم ..

ومرحب بالبورداب من أبناء مدينتنا الجميلة ..

preview2.jpg Hosting at Sudaneseonline.com
كسلا الجميلة

Post: #3
Title: Re: البورداب من أبناء كسلا مرحبا بكم ..
Author: haroon diyab
Date: 01-23-2013, 05:46 AM
Parent: #2

سلامات يا ابراهيم

ويمين بوستيك الجاب عبد الله كسلا

يستحق الاحتفاء به .

مشتاقين ياعبد الله وللاسرة الكريمة .

بالجنبة :

مالي لا اري الهدهد وخاله... مش قال كسلاوي

Post: #4
Title: Re: البورداب من أبناء كسلا مرحبا بكم ..
Author: عبد الله كسلا
Date: 01-23-2013, 06:17 AM
Parent: #3

أهلين حبابك يا ود دياب ... يا صفوة الصفوة ..

يا إبن ثغرنا الباسم ... ومسقط رأسي .. بورتسودان الرائعة ..

مشتاقين والله ..

والتحايا عبرك لكل أفراد الأسرة الكريمة ..

ثم لكل بورداب الدوحة الرائعين ...

Post: #5
Title: Re: البورداب من أبناء كسلا مرحبا بكم ..
Author: مهدي صلاح
Date: 01-23-2013, 06:45 AM
Parent: #4

التحية لكسلا وللبورداب من ابنائها
انا (ضنقالي ) وجمعتني ظروف السكن في فترة دراستي بالسودان بمجموعة طيبة من ابناء كسلا من عدة احياء في كسلا زي بانت وحي العمال والمربعات والسواقي

Post: #6
Title: Re: البورداب من أبناء كسلا مرحبا بكم ..
Author: طارق حرسي
Date: 01-23-2013, 07:28 AM
Parent: #5

حبابك

عبدالمنعم ابراهيم

مشكور علي الترحيب يا حبيب

و لك كل الشكر والتقدير

مودتي

Post: #7
Title: Re: البورداب من أبناء كسلا مرحبا بكم ..
Author: عبد المنعم ابراهيم الحاج
Date: 01-23-2013, 07:44 AM
Parent: #6

عبد الله كسلا ، لك التحية

طبعا بقيت سينير في البورد ، ومفترض تأخد المشيخة من صديق رحمة .. كاقدم بوردابي أو تولوس .. أيهما اقدم هههههه..
لكن لو جينا للجد جد المشخة تكون نصيب الجنرال أحمد طه ، او العمدة شحوتاي ..
بور سودان وكسلا الرابط بينهما الشهور الرطبة الحارة في الثغر.. والشهور المعفرتة في أم تقاق..

هارون دياب كدا كدا إستحقيت الإنتماء لمدينة كسلا .. وحمدلاك سلامة
وخلينا في البداية نرحب بالقادمين الجدد ..
إنصاف ابراهيم
طارق حرسي
درديري كباشي
مروان محمود
أشرف الرحال
محمد رحمة النور
دا القدرت التقطه على عجالة ..
والترحيب الحار المابندار برجعة الحبشي.. (محمد الحسن سليمان)

هههه
وقيل ود القاضي في صومعته الجديدة ..
لكم التحية .

ولسة القادم احلى..

Post: #8
Title: Re: البورداب من أبناء كسلا مرحبا بكم ..
Author: حسن مهدي
Date: 01-23-2013, 08:05 AM
Parent: #7

مرحبتين حبابك منعم ابراهيم
شكرا لحفاوة الترحيب .. والشكر للباشمهندس بكري الذي هيأ لنا هذا التلاقي
مودتي

Post: #9
Title: Re: البورداب من أبناء كسلا مرحبا بكم ..
Author: عبد المنعم ابراهيم الحاج
Date: 01-23-2013, 09:11 AM

مهدي صلاح العزيز لك التحية ، مجتمع كسلا مجتمع حتى آخر عهدنا به لا يعرف أي تصنيف أو اي انتماء وكل الذين
أعرفهم يندر ان تتعرف على شخص بصفته غير صفته الكسلاوية .. فأنت إذن من مدينة كسلا طالما عشت تفاصيلها
وتعرفت على أسرارها الداخلية ، وتدوزن ايقاعك فترة من الزمان بإيقاعها ، وحين تورد هذه الأحياء يعني ان هنالك
سيرة عطرة ترك بصماتها في كل ركن منها لك التحية وكل الود...


وأهو ظهر واحد لنج .. حسن مهدي .. الف مرحبا بك ونتمنى أن يطيب بك المقام هنا كإنسان فاعل
عرفتك كسلا في تجلياتها الإسفيرية ، ومن هنا نود أن نحي الصديق فائز الطاهر عبد الكريم صاحب بوابة كسلا
الذي يختم جوازات المرور لكل داخل أوخارج من المدينة... الصمود في حوش بكري يتوقف على درجة تحمل
الفرد ، فما تكون مثل كمال سويكت ود. سامي الذين خندقوا بالفيس أو المنتديات الفئوية ..
أو الأمين عثمان صديق الذي يشق البورد مرة في العام كشقته لنهر القاش بالليل ..÷÷÷
لك التحية.

Post: #10
Title: Re: البورداب من أبناء كسلا مرحبا بكم ..
Author: أشرف الرحال
Date: 01-23-2013, 09:40 AM
Parent: #9

يا سلام عليك يا منعم يا سلام

تفرد بوست عريض العنوان للوريفاب الجدد في هذا الوطن الحداد المداد

حقيقة دخلت وبقيت اعيان في الوجوه واتحسس الخطى يمكن الاقي مرحب من اهل الطيبة ديمة فلم يخب ظني وها انت تفرد مساحات الترحاب وليس بجديد لمن شرب من توتيل واستنشق السواقي اكسجينا وتطهر مغتسلا من القاش ... شكرا ليك يا منعم وان كنا في السابق نتابع القامات من بلادي من مقاعد المتفرجين وها نحن الان في الميدان ونسأل الله ان نفيد ونستفيد

اهداء خاص ليك يا منعم


مودتي


الرحـــال

Post: #12
Title: Re: البورداب من أبناء كسلا مرحبا بكم ..
Author: نورالدين الفحل
Date: 01-23-2013, 10:13 AM
Parent: #10

ومرحبا بك ( ياعكد ) وانت تفرد المساحات بالصخب والاحتفاء لكل مايمت الى كسلا ام تقاق واهلها الطيبين
وهكذا انت دوما صاحب مفردة مختزلة من الاحاسيس الصادقة وحرف يصور مايكتنف الواقع والهم الكسلاوى الممتد
ويمتد ضل شجرة بت بخيت ليظلل تخوم كسلا الجمال ومشارف بوابتها عند تقاطع ريبا وهنا ايضا فى سودانيز الحوش الوسيع
وتعضيدا لمكنونات هذا الخيط يمتد ترحيبنا لكل كسلاوى قاطن بهذة الديار ولنا فى قدمائهم اسوة وفى جديدهم امتداد لكل ماهو جميل ومعبر
لاننسى الكثيرين من نجوم كسلا معيتنا ومن يطرزون بحروفهم خيوط من الود والحب فى هذا العالم الاسفيرى المتعاظم جمهورية سودانيز اون لاين
زهير الزناتى.. انصاف عبدالعزيز.. عبدالمتعال محمد الحسن.. محمد الشابك.. واخرون ربما ماسقطوا من ثقوب الزاكرة الخربة تحياتى لك ولكل مايرمز الى كسلا جال بخاطرى منظر الجبل والغمام الذى يكسوة وتوتيل التى ثملنا منها وترنحنا مابين العودة والغياب لك الود والحب ودفق القاش وعبير السواقى ودبايوا وايتانينا ومرحبا.

Post: #17
Title: Re: البورداب من أبناء كسلا مرحبا بكم ..
Author: فايزودالقاضي
Date: 01-23-2013, 12:11 PM
Parent: #10

حبيبنا منعم ..سلامات وليك وحشة والله ..
ومرة تانية نرحب ببورداب كسلا ..الاضافة الكبيرة لنا في هذا المنبر الوطن ...


Quote: حقيقة دخلت وبقيت اعيان في الوجوه واتحسس الخطى يمكن الاقي مرحب من اهل الطيبة ديمة فلم يخب ظني وها انت تفرد مساحات الترحاب


يارشاشة ياقريبي ..سلامات .. رغم غيابي الطويل من المنبر الا اني اخترت العودة عبر باب ترحابكم .زلكن نعمل شنو لكبار السن لمن نظرهم يضعف ....تحياتي ونورت البورد ياعزيزي ..

التحية لكل البورداب الجدد... ويامرحب ببورداب جدة بيننا



تحياتي

Post: #11
Title: Re: البورداب من أبناء كسلا مرحبا بكم ..
Author: ادم شحوتاي
Date: 01-23-2013, 09:42 AM
Parent: #9

يا منعم كل عام أنت والاسرة بالف خير
مرحب بالعودة والترحيب بالاشقاء
البركة في شوفت حروفك ياأنيق الحرف وسيدو


صدقني يا منعم كسلا محتاجه لابنائها

Post: #13
Title: Re: البورداب من أبناء كسلا مرحبا بكم ..
Author: نور الدين عثمان
Date: 01-23-2013, 10:18 AM
Parent: #11

اهلا بكل اهل كسلا وضيوفهم ....

ومرحبتين بامنا كسلا الوريفة ..

Post: #14
Title: Re: البورداب من أبناء كسلا مرحبا بكم ..
Author: درديري كباشي
Date: 01-23-2013, 10:18 AM
Parent: #11

حبابك الشاعر الرقيق الرفيق والصديق

عبد المنعم ابراهيم الحاج

نحن من نتشرف بدخول دوحة ظلتكم

ونفتخر بمدينة انجبتكم

تحكي سواقيها طيب اهلها

كما تحكي جبالها صمودها

ويقول لها القاش في كل عام

قومي واحيي من جديد





يوجد سر عجيب في كسلا حتى اسمها بحروفه الاربعة تجده تسلل بين حروف اسمك واصبح مكملا لها

اذكر وانا طالب بجامعة الجزيرة بود مدني اذا سمعت احد ينادي ( يا كسلا ) في وسط السوق التفت وظنيته يناديني .. وهكذا في الخرطوم وفي السعودية وفي كل مكان ذهبت اليه

نترك للاجيال القادمة اكتشاف سر هذا السحر العجيب لانه والله غلبنا

Post: #15
Title: Re: البورداب من أبناء كسلا مرحبا بكم ..
Author: اسامه سعيد
Date: 01-23-2013, 11:02 AM
Parent: #14

اولاد كسلا سلامات
شكرا عبدالمنعم لهذه النافذه الحلوه
محمد مطر بصوته الشجي والفيديو المصاحب رجعني الي زمن جميل
وانا اكتب الان من اقاصي بعيده البروده تحيطها من كل جانب تذكرت الميرغنيه الشرقيه عندما طالعت اسم درديري كباشي اخو فكري
والاهليه المتوسطه زهير الزناتي وانصاف عبدالعزيز ابوالنجا بنت حلتي التي يحيط بها سوق النسوان وجامع متولي وفندق افريقيا وساقيه سيدي الحسن ويتوسطه حامد سيد الجبنه في برندات عمنا عبدالله كابو هذا الموقع مكان ميلادي ومرتع صباي وكسلا الثانويه الامين عثمان صديق وبقيه العقد الفريد وكاسلا كاسلا انا قلبي سافرا

Post: #16
Title: Re: البورداب من أبناء كسلا مرحبا بكم ..
Author: Sidig Rahama Elnour
Date: 01-23-2013, 11:50 AM
Parent: #15

العزيز عبدالمنعم العكد

تحية طيبة ومشتاقين

مرحباً بك وبضيوفنا أهل كسلا ... أناسٌ من زمن القوافي ومن تعاريج المرأفي وبعض صوح في خميلة الجميز حين يُسقى من النبع الكسلاوي العذب.

أشرف وايمن ودرديري ومحمد رحمة وحسن مهدي وإنصاف وطارق حرسي وعبدالمتعال وأخرون لم تعرفهم بعد دفعةٌ كسلاوية كاملة الدسم تضيف الى النشيد الدوذنة والإيقاع.

حللتم أهلاً ونزلتم سهلاً وبكم يزدان المكان.

ولكم تحياتي وتقديري

Post: #18
Title: Re: البورداب من أبناء كسلا مرحبا بكم ..
Author: سليمان القرشي
Date: 01-23-2013, 12:33 PM
Parent: #16

احبابي اهل كسلا
المدينة البكر هل لي بالجنسية
الفخرية فاني واشهد الله احب
كسلا بكل تفاصيلها واعشق
توتيل وشربت من ماءه
العذب حتي اعود مرات ومرات
فعناك مقوله ان من يشرب
من توتيل لابد وان طال الزمن
سيعود مرة اخري
سلمتم اخوتي

Post: #19
Title: Re: البورداب من أبناء كسلا مرحبا بكم ..
Author: عبدالله احيمر
Date: 01-23-2013, 01:37 PM
Parent: #18

Quote: صدقني يا منعم كسلا محتاجه لابنائها



عبد المنعـم لك الســلام


و نرحــب معــك بابناء كســلا ( ام تقاق ) الجـدد

وكيف حال كســــلا و اهــلها على حســـكم

و التحيــة للقـدامى


Post: #20
Title: Re: البورداب من أبناء كسلا مرحبا بكم ..
Author: زهير الزناتي
Date: 01-23-2013, 02:19 PM
Parent: #19

يا سلام يا منعم علي البوست الجميل .. الذي شرق بنا وغرب ... مراحب بكل القادمين الجدد ... فهم كلهم أخوة وأصدقاء ... لا نحدد أسماء فلهم نفس المعزة والحب ...
بس المريخابي ده الاداهو باسويرد منو ... وهو عارف نفسه ... احسن ليهو يرفع يده ...

وشكراً علي الغناء الطاعم ... وتحياتي للسناير العمدة وكسلا ... وفخور أن أكون من مدينتكم ... وفي معيتكم هنا ...

Post: #21
Title: Re: البورداب من أبناء كسلا مرحبا بكم ..
Author: يسرى معتصم
Date: 01-23-2013, 02:40 PM
Parent: #20

حللتم أهلاً ونزلتم سهلاً

ولكم تحياتي وتقديري


------------------------
قريبى الصفوة ودالقاضى مشتاقييييييييييين
















.

Post: #24
Title: Re: البورداب من أبناء كسلا مرحبا بكم ..
Author: انصاف ابراهيم عبدالعزيز
Date: 01-23-2013, 04:07 PM
Parent: #20

ومرحبا بك ( ياعكد ) وانت تفرد المساحات بالصخب والاحتفاء لكل مايمت الى كسلا ام تقاق واهلها الطيبين
وهكذا انت دوما صاحب مفردة مختزلة من الاحاسيس الصادقة وحرف يصور مايكتنف الواقع والهم الكسلاوى الممتد
ويمتد ضل شجرة بت بخيت ليظلل تخوم كسلا الجمال ومشارف بوابتها عند تقاطع ريبا وهنا ايضا فى سودانيز الحوش الوسيع
وتعضيدا لمكنونات هذا الخيط يمتد ترحيبنا لكل كسلاوى قاطن بهذة الديار ولنا فى قدمائهم اسوة وفى جديدهم امتداد لكل ماهو جميل ومعبر
لاننسى الكثيرين من نجوم كسلا معيتنا ومن يطرزون بحروفهم خيوط من الود والحب فى هذا العالم الاسفيرى المتعاظم جمهورية سودانيز اون لاين
زهير الزناتى.. انصاف عبدالعزيز.. عبدالمتعال محمد الحسن.. محمد الشابك.. واخرون ربما ماسقطوا من ثقوب الزاكرة الخربة تحياتى لك ولكل مايرمز الى كسلا جال بخاطرى منظر الجبل والغمام الذى يكسوة وتوتيل التى ثملنا منها وترنحنا مابين العودة والغياب لك الود والحب ودفق القاش وعبير السواقى ودبايوا وايتانينا ومرحبا.
.........................................................................................................................
الف مرحب بيك نورالدين الفحل ومرحب بكل ابناء كسلا الوريفة القدامى والجدد

Post: #31
Title: Re: البورداب من أبناء كسلا مرحبا بكم ..
Author: عبد المنعم ابراهيم الحاج
Date: 01-25-2013, 12:36 PM
Parent: #20

Quote:
اهداء خاص ليك يا منعم



وهو إهداء مشاع للجميع ، درة شباب كسلا ويا ست جمال وحنان ..نعيش على الذكرى وتشجينا بالألحان .. نبي المدينة وخليفة سيدنا داؤود..
ود مطر شكرا يا أشرف رمضان .. هدية كانت في الصميم ..خاصة والمشاهد الشجية تحفز الذاكرة .. حيث كسلا لم تتغيير كثيرا مازالت في
بعض بهائها المتحفي.. ومازال القاش يمد عروقها بالحياة وترابها بالتجدد .. ومازال الجبل مسردبا كحارس أزلي .. وتوتيل في عطائها الشحيح
ما انفكت تقدم جرعة الحنين .. وإنسانها في بساطته واصطباره يأخذ من الحياة "ماتعطيه على استحياء " .. والسواقي يطبق عليها الصمت
من بعد النواعير .. لك التحية .. ومرحبا بك قلما جريئا كإضافة مهمة في سودانيز ..

Post: #22
Title: Re: البورداب من أبناء كسلا مرحبا بكم ..
Author: حسن مهدي
Date: 01-23-2013, 03:03 PM
Parent: #1


Post: #23
Title: Re: البورداب من أبناء كسلا مرحبا بكم ..
Author: انصاف ابراهيم عبدالعزيز
Date: 01-23-2013, 03:58 PM
Parent: #22

اهلا وحبابك منعم ابراهيم
شكرا لحفاوة الترحيب .......... واهلا بكل ابناء الوريفة كسلا ..
اسامة سعيد حبابك والف مرحب بيك ود حلتنا

Post: #25
Title: Re: البورداب من أبناء كسلا مرحبا بكم ..
Author: هنادى عثمان
Date: 01-23-2013, 05:19 PM
Parent: #23

تحايا ومراحب لصاحب البوست والمتداخلين
والالاف المراحب لاهل التاكا وتوتيل ومكرام
كسلا الحبيبة في خاطرتي اينما ذهبت حيث مولدي ونشاتي
ونقول ليها....

مهما رحلنا بعيد
اقدارنا ما في الايد
والذكريات ياقلبي
تحفظ جميل الريد

ونقول ليها برضو اجمل ما كتبو الحلنقي....

ما بنسي فيك يا كسلا
ايام قضيتا سعيد
انا لي فيك حبيب
كيفين اسيبو وحيد
مهما الزمن لو طال
وانا لو رحلت بعيد
باكر بجيبني الشوق
ويسوقني ليك الريد
بين السواقي هناك
ضل النخيل الرامي
وقت الغروب والساقيه
تسقي الخضار النامي
كم غادة جات تتمايل
ملكت ربيع ايامي
شوفت الحنان بعيونا
كم حركت الهامي
يا كسلا يا مخضرة
كم عشت فيك حنان
كم شوفت فيك عيون
شايله الصبا الريان
كم شفتا فيك جمال
داعب خيال فنان
مها الزمن لو طال
او جار علي زمان
باكر بعود يا كسلا
ونتلاقي بالاحضان

Post: #26
Title: Re: البورداب من أبناء كسلا مرحبا بكم ..
Author: تولوس
Date: 01-23-2013, 06:27 PM
Parent: #25

بوست جميل ومليان حنية

اجمل تحية للحضور الكريم في هذا البوست والاضافة الجديد ة للمنبر درديري وحرسي وحسن مهدي وكل ابناء كسلا


يا منعم لن تعبر عن شوقنا ليك ! . ياخ ادينا نظرة ...والسياسة تطير ....تحياتي لسمية والعيال

Post: #27
Title: Re: البورداب من أبناء كسلا مرحبا بكم ..
Author: عبد المنعم ابراهيم الحاج
Date: 01-23-2013, 07:47 PM
Parent: #26

Quote: هلا وسهلا بيك (يا العكد) عبد المنعم


يا سلام يا أهلنا ..بالجد الواحد ممتلئ بكم الآن الي حد الإفاضة.. ودعونا نرفع تحية هذا الأخ العزيز والشقيق
ابراهيم عبد اللطيف الحاج ابن عمي .. وابن الشيخ ابوسوميت الذي تحكي عنه رواية أويتلا .. الشخصية المحورية
بكل غموضها ..
والتحية لكم يا أبناء مديني ولي عودة في غاية تفاعلها ..

Post: #28
Title: Re: البورداب من أبناء كسلا مرحبا بكم ..
Author: اسامة محمد ابوبكر
Date: 01-24-2013, 02:18 AM
Parent: #27

وتلك التي هام الفؤاد بحبها هي كسلا المولد والمنشأ والمرتع واحلام الصبا
والام الغربة واوجاعها في البعد عنها تلك الام الرؤوم كسلا جنة الاشراق فلك كل الود
اخي لفتح هذا البورد الترحيبي واول مشاركة لي في هذا المنتدي عبر بوابة كسلا التي
فتحتها فشكراً لك و لكل الشباب

Post: #29
Title: Re: البورداب من أبناء كسلا مرحبا بكم ..
Author: اسامة محمد ابوبكر
Date: 01-24-2013, 02:19 AM
Parent: #27

مكرر

Post: #30
Title: Re: البورداب من أبناء كسلا مرحبا بكم ..
Author: Emad Khairy
Date: 01-24-2013, 06:58 AM
Parent: #29

كسلا ’,’’هي الغيمة
والنسمة وعيون الطير الخداري .

لست من ابناء كسلا ولكننى ربما اعشقها اكتر من اهلها

سكانك اطايب عامرين بالأماني
ألحانك تملك نشوة و أغاني

ويسعدنى ان اكون بين مبدعيها ,,

والبورت ما بعيده عن كسلا ,,