اسرة انتصار العقلى تتحدث عن ظروف اعتقالها ويدينون حديث نافع ( فيديو )

اعتقلت أنتصار العقلي من الحزب الناصري يوم الاثنين 7/1/13 من قبل جهاز الامن بتهمة التوقيع علي وثيقة الفجر الجديد برغم انها لم توقع وغادرت كمبالا قبل التوقيع , الاعتقال تم بليل ولم يتم ابلاغ اهلها الذين عرفوا بالصدفة عن طريق اسرة المعتقل جمال ادريس الذين شاهدوا انتصار معه في بوكس الامن
اسرة انتصار تحكي عن نشاتها وعن عملها الانساني في جمعية مبادرات انسانية التي تعني بسرطان الثدي ودورها في خدمة مجتمعها , اسرة انتصار منعت من اي اتصال بها قبل مرور 15 يوم وتتسال خالتها دا كلو عشان شنو !!

انتصار محمد العقلي

53 سنة

الحزب الوحدوي الناصري

الحالة الصحية : مصابة بأمراض في الكلى

تم اعتقالها يوم الاثنين الساعة التاسعة حيث اعترض جهاز الامن سيارتها

دون اخطار لذويها و عدم السماح لاسرتها برؤيتها و انكار وجودها لديه

ربنا يفك اسرك يا انتصار العقلي انت اشرف من كثيرين اشتهروا اكثر منك ولكن يصنع التغيير في السودان امثالك من العاملين بصمت.

Quote: الاستاذ بخاري الامين المنتحل لباس ورد زوجته نجلاء سيد احمد حرصا منه ليصنع لها ارشيفا في مجال حقوق الانسان. اها اولا كامل تضامننا مع انتصار العقلي اهي دي زوله مناضله حقيقيه عمرها ال 53 سنه ده بتكون قضت منه زي 30 سنه نضال! وشغاله بلا اضواء تعمل من اجل مرضي السرطان. التحيه لها ولرفاقها بالحزب الناصري. الا انتو يا (منتحلين) ما قلتوا لينا منو الصور الفيديو ده؟! وكيف انتو في كمبالا بتنشروا تسجيلات بتم في الخرطوم؟! طبعا حتعملوا ابطال وحتقولوا لا نحن حريصين على سلامتهم في الداخل!! وهنا نقول لكم قادر الله....طيب لما كنتوا انتو في الداخل وبتتشوبروا وتنشروا....باسمائكم....كنتوا محمين بمنو؟! وما تقولوا لينا ما كنا محمين و الدليل الصوتين ثلاثه ديلا في ظهر نجلاء؟! وحنقول لكم بالله؟! لا مصدنكم و الله...... المهم انا هنا بس عشان اقول لكم نحن صاحيح ومصحصحين ومقدرين لجهود كل ممن تتغولون على جهودهم وطامسين اسمائهم وبقيتوا انتو الابطال ربنا يفك اسرك يا انتصار العقلي انت اشرف من كثيرين اشتهروا اكثر منك ولكن يصنع التغيير في السودان امثالك من العاملين بصمت.

تراجى بكل هدوء لو انت بتعرفى حبة فى التكنلوجيا كان عرفتى انا كنت برفع الفيديوهات عبر قناتى فى اليوتيوب وهى http://www.youtube.com/user/naglaseed?feature=mhee

والقناة الاولى اتهكرت وعبر صراع قدرت احافظ عليها بعد حذف 400 مقطع والان لااستطيع الدخول عليها وهى http://www.youtube.com/user/dedelkezan1
وايضا لولاحظتى صوتى ظاهر فى كل التسجيلات المرفوعة على هذه القناتين وهم حوالى ثلاثه الف تسجيل
اما فيديو انتصار وبعض الفيديوهات التى اعيد نشرها تكون مرفوعة فى يوتيوب لايخصنى وغالبا يرسل لي اللنك من داخل السودان بهدف اعادة نشرها وطبعا لوهدفك تكشفى الجهات التى ترسل لى الفيديوهات
دا مستحيل عشان وانا داخل المعتقل لم اورط شخص اتمنني على سر تنظيمى او سر شخصى .

لو انت معتمدة على شمار صحبتك الدكتورة التى اخبرتك بانى ساقطة فى الشهادة السودانية دا كلام غير صحيح اتصلى بيها عشان تعمل ليك ابديت للمعلومات وقد ذكرت لي انها ماقالت ليك سقطت ثلاث مرات انت اضفتى العدد من عندك لانها هى اتصلت على وكانت خايفة على مكانتها وقالت لى انا فى اتصال مع تراجى قلت ليها انك ساقطة شهادة واعتمدت على هذا الحوار الذى دار بينى وبينها وهو بعد ان انتهت فعاليات ندوة اتحاد الشباب السودانى و كنت انا متحدثه بها وكان عنوان الندوة ظاهرة الزواج العرفى فى السودان وهى على حسب قولها انها اعجبت بمقدراتى فى التحدث وادارة الحوار وسالتنى هل درست علم اجتماع رديت عليها لا .

قالت لى هل درستى علم نفس قلت لها لا .... ولم تتكرم بسؤالي ماذا درستى لذا لم اخبرها انى درست محاسبة لاننى لا اقيس مقدرات الناس بشهاداتهم الجامعية ولا اعتبر ان واجبك تجاه شعبك ومقارعة نظام الحكم
بمستوى التعليم . عشان معجبة بالمثل ( البقول القلم مابزيل بلم ) .وبخارى اقدم منى فى المنبر وله مجالات نضاله ومقدراته عاليه فى سرد الاحداث والتحليل الاقتصادى وانا معجبه بمقدراته عشان كدا انا حبيتو واتزوجتو ومرات كتيرة بفرأ بوستاتو وبستمتع بيها هههههههه وانا لى محاولات خجوله على حسب مقدراتى البحاول اطورها باستمرار عشان اكون جديره بحبه واحترام الناس البتضيع زمنها فى متابعة بوستاتى المتواضعة جدا و ان استفيد من مساحات التواصل عبر النت لخدمة قضايا شعبى والمساهمة فى كرة الثلج التى كبرت لتغيير النظام بكل السبل المتاحة ....

ولى رجاء منك او من بكرى ابو بكر وهو ان تفتحى عشرات البوستات وتكيلى الاتهامات او الحقائق التى تظنيها صاح وان تنزعى عنى حتى شهادة الروضة وان اكون امنجية وحرامية شوفى لو رديت عليك بس ان تخربى بوستات مهمة فى نظرى قد تساعد فى اطلاق سراح او حماية معتقل من التعذيب او توحيد الناس حول توافق مرحلى لاسقاط النظام
لعمرى هذا يخدم النظام وجهاز الامن ولايضيرنى البته ..........وشكرا .

الحرية للشرفاء السجن للفاسديين ولتجار الدين.....
التحية لانتصار العقلى ولكل الشرفاءفى سجون النظام
اعتقال الشرفاء وارهابهم لن يطيل عمر النظام المتهالك

الأخت العزيزه نجلاء،

نحن نقدر مثابرتك وعطائك وإلتزامك وصدقك تجاه قضايا وطننا .

تحية لك، وتحية للمناضل بخارى .

تجية للمناضله الصامدة إنتصار أحمد العقلى وأسرتها الكريمه.

ليت زبانية الانقاذ يعلمون ان ماقدمته هذه السيدة وماتقدمه يتفوق ويتجاوز مؤسسات بحاها.

الاستاذة إنتصار أحمد العقلى لن يخيفها إعتقالكم ولن تكسرها سجونكم.

أطلقوا سراح الاستاذه إنتصار العقلى وفورا ايها البؤساء الجــبناء.

.

للمهندسة إنتصار العقلى التحية و التقدير و الإحترام. إنتصار من أقوى السياسيات السودانية و مثقفة و إنسانة وطنية لحد يصعب تخيله، و ناشطة حقوقية ترفع لها القبعات.

أطلقوا سراح إنتصار و رفيقاتها،
فمثلها ليس مكانها أقبية الإعتقال،
فهى رمز للكرامة و الإعتدال.

لأسرتها الكريمة و لخالتها المربية المجد و التقدير.

التحية والحرية للمناضله إنتصار أحمد العقلى
ولجميع المعتقلين /ات ..
الحرية للوطن ..
والتحية لك الحبيبة نجلاء سيد أحمد ..

تحية للخالة بتول وسلام وشوق وإحترام
وتحية للغالية أختي الباشمهندسة إنتصار في صمودها
فلا خوف عليها ولا دي أول مرة
إنتصار دي حكاية وشخصية غير عادية
بتلحق المحتاج وتغيث الملهوف وتطيب جراح العاجز وتبريها
هي نبية ........... عرفتها وعاشرتها وعشت معاها وأكلت ملحها وملاحها
في الكرم ماشفت في هذه الدنيا الوسيعة زيها
في العطف ماشفت حنيتها.... إنتصار كبرى سبعة بنات توفت عنهن أمهن وهن صغيرات
برغم وجود الاب وخالات تلاتة لكن إنتصار أشرفت إشراف دقيق وربت وتابعت الستة بنات
طلعت الدكتورة والمهندسة والمحاسبة
وزوجتهن وفرحت بيهن
ماعندها مستحيل في حياتها
على قدر ماتستعصي علينا مشكلة ببساطة وسهولة إنتصار كانت بتلقى الحلول
و بتسد في كل حاجة
وبتعرف الصغير قبل الكبير وتواصلهم وتودهم في حيها ..زملاء دراستها ..صديقاتها وزملاء حزبها

.

شكرا ياراويه،

ونعم .. هؤلاء لايعرفون ان فى هذا الوطن شرفاء وافياء يعرفوا قيمة الانسان ويبذلوا لأجله.

جليله خميس تطالب بالحرية لإنتصار العقلى - هذا هو السودان الجديد .

أطلقوا سراح المناضله إنتصار العقلى وتحية لأسرتها الكريمه.

.

شكرا يا أستاذة Rawia على كتابتك الشجاعة عن إنتصار.
إنتصار كريمة و متواضعة، و ذات سمو نادر الوجود، وفيها صفات كثيرة تجعلها أقرب للوجدان الإنسانى السليم.
تعرفت على المهندسة إنتصار فى مطلع تسعينات القرن الماضى. إنسانة شجاعة، و وطنية من حق الوطن تكريمها. إعتقالها هذا يمس كل وطنى شريف. أقول هذا و أنا لا أنتمى لحزبها و لا لفكرها، لكنها الحقيقة.

تزرف عيناى الدمع غزيرا لحال وطن تعتقل فيه النساء الشريفات زى إنتصار.
المجد ... المجد لك يا إنتصار، و العار... العار لكم يا منظومة الإنكسار.

مبروك إطلاق سراح الاستاذة جليلة خميس والحرية للاستاذة إنتصار العقلي

الحرية لانتصار العقلى
الحرية لكل شرفاء السةدان
الخزى والعار لحكومة الترهيب والتعذيب
الى مزابل التاريخ كــــــ ـلاب الامن وسلطة القهر،،،

والله انا ما مصدّق ولا متصوّر ولا فاهم انو اعتقال انتصار العقلي ممكن يستمر اكتر من يوم أو اتنين ليه ...

دايرين يوصلوا لى شنو من اعتقالها؟

يعني ما عارفين انها زولة واعية وعميقة في مواقفها وفاهمة تفاصيل اختلافاتها معاهم وين؟

ولاّ متصورين انو أي زول ممكن يخاف أو يتزحزح بى الإرهاب والتعذيب والإعتقال؟

ولاّ دي حملة تأديبية؟ ولاّ الفكرة شنو البتخلي جهاز أمني يعتقل شخص دايناميكي في المجتمع وشفاف ومتوافق مع مواقفو زي انتصار العقلي؟

إلاّ يكونوا دايرين يتعلموا منها "كيف تكون إنسان محترم"! ... ودي زاتها ما بتاخد يومين مع انتصار العقلي ...

لأنها زولة رسمية وممكن "تضاير" ليهم الجهاز دا في يوم واحد بس ...






















... المهم ....

أبعد كل هذا تبحثون عن الإجابة
عن سؤال الطيب صالح:
"من أين اتى هؤلاء؟"؟؟؟

تحيات

Quote: تحية للخالة بتول وسلام وشوق وإحترام وتحية للغالية أختي الباشمهندسة إنتصار في صمودها فلا خوف عليها ولا دي أول مرة إنتصار دي حكاية وشخصية غير عادية بتلحق المحتاج وتغيث الملهوف وتطيب جراح العاجز وتبريها هي نبية ........... عرفتها وعاشرتها وعشت معاها وأكلت ملحها وملاحها في الكرم ماشفت في هذه الدنيا الوسيعة زيها في العطف ماشفت حنيتها.... إنتصار كبرى سبعة بنات توفت عنهن أمهن وهن صغيرات برغم وجود الاب وخالات تلاتة لكن إنتصار أشرفت إشراف دقيق وربت وتابعت الستة بنات طلعت الدكتورة والمهندسة والمحاسبة وزوجتهن وفرحت بيهن ماعندها مستحيل في حياتها على قدر ماتستعصي علينا مشكلة ببساطة وسهولة إنتصار كانت بتلقى الحلول و بتسد في كل حاجة وبتعرف الصغير قبل الكبير وتواصلهم وتودهم في حيها ..زملاء دراستها ..صديقاتها وزملاء حزبها

مشكورة يا راوية كفيتى ووفيتى .....
والسجن ليس لأمثال انتصار العقلى السجن لتجار الدين والفاسدين...
الحرية للشرفاء/ والشريفات ......

.






.

الأخت العزيزة نجلاء
تحية طيبة

اللة يكون في عونك يا بلد

اللة ينصرك يا انتصار

ويكفيك شرهم
لا حولة ولا قوة الا بيك يا اللة

.