حديث أفضال التمبربيديك

أفضال التمبربيديك

مررت في طريقي قبل عدد من الأيام، بطريق قلما أطرقه خلال جكتي الأمريكية السرمدية، وتشاء محاسن الصدف والأقدار أن يقع في ذلك الطريق، محل للأثاث المنزلي، يعمل فيه صديق، لم يقدر لي أن ألتقيه لزمن طويل ، فقلت لنفسي وشاهدي حداء (أحرموني ولا تحرموني، سنة الإسلام السلام)، أن أعرج عليه وأسلم، لا بأس، خير وبركة ففي الوقت متسع لبعض مطايبة وتراحم، بضع سويعات قبل أن يصحو غول المعايش من نومته.
قلت أفاجئه، نفرح معاً نشعل ضوءاً في قتامة الجو والحياة، نمد الإيد ونتسالم، و(نلبع) ظهور بعضنا بعضاً، كما نفعل دائماً حسب مقتضيات التحية السودانية، والتي يسميها أخوتنا اليمانيون (نفض لي وانفض ليك)، قلت نتذاكر ونعيد الكان، و للأشياء نسبغ عليها لمعانها الذي أفل، يدعوني إلى كوب شاي أو قهوة، فأتدلل (والله ملان لي هني)، فيحلف بالطلاق، فأعز حلفه كاذباً (والله مابطال، إنشا الله يكون عندك نعناع بس).
دخلت المحل الضخيم الفخيم، امشي أفسح طريقاً لنفسي وسط أرتال المراتب، والأسرة المصفوفة بعناية وتنسيق، الطنافس والتكايا والمرايا، وكل اسباب الراحة، والتي ذكرتني بالنكتة السمجة التي تحكي على لسان العربان، عن كسل أهل السودان، حيث استاجر صاحب محل للسراير، مجموعة من العمال السودانيين، وما عليهم عمل شئ، غير التسطح والنوم على السراير، فيراهم الزبائن، فيصدقون بأنها مريحة ويشترون منها، فما كان من احد العمال إلا سؤال صاحب المحل (أها وقت الراحة متين).
دخلت المحل وكلي شوق لملاقاة عزو، فوجدته جالس في مكتبه الذي يشبه خندقاً متحركاً، والهاتف في يده، مرتب الهندام، مصفف الشعر، يهتز في مكانه وهو جالس، إهتزازة الأكابر، إبتسم من على البعد، أنهى الحديث، وقام متثاقلاً، أقل سرعة مما توقعت، قابلني وابتسامة بائع محترف متشكك تعلو شفتيه، إلتقينا في منتصف الطريق، تقالدنا علي سطح السجادة الشيرازية المزيفة، من صنع بلاد التايوان، نفض لي، أنفض ليك، عملاق أدركت منتصف عموده الفقري بعد لأي، وادرك هامتي، فربت عليها. مشتاقين، بالأكتر، إتفضل، جلست، قلب بين يديه قلماً وأزاح أوراقاً لم تكن أمامه تماماً، ولكنها على كلٍ حركة، طاف بعينيه في مناحي المخزن العظيم، فكأنما به يدعوني سراً إلى التأمل في ملكه، إستجبت لتنويمه المغنطيسي دون وعي، أجلت بصري في المكان، مراتب مرصوصة بعضها فوق بعض، وأسرة نوم عريضة، تستوعب الزوج وزوجه وخمسة من العيال، مخدات ومفارش وطرز من السند والهند وبلاد الساموراي، وسائد للإتكاء وأثاث عربي بلا قوائم منبطح على الأرض، وعثماني من زمان سليمان القانوني، ورقمي من هذا الزمان، يعمل بالأزرار.
عدت من جولتي البصرية، والتي شملت حتى السقف وثرياته، ليته رآها الذي غني (والنجف ضوا في المديرية)، كدت أبدأ حديثي السوداني المعروف المبتدأ (أها كيف بلاي، جديدك شنو؟)، فعاجلني بحديث السوق المعروف المنشأ (أها رايك شنو بلاي)، أجبته بإجابة سودانية- تركية، تسد الطريق أمام أي محاولة في الإسترسال، تعلمتها واتقنتها مؤخراً: تمام. عاد بِكَرّة لا تأبه بتمامي .. جيت في وقتك، اليومين دي تخفيضات خمسة وعشرين في المية. أحسست بالمؤامرة، فرقعته بتمام مرة ثانية تحت الفك، فما اهتز له جفن، فعاد يقول: عندك مثلاً أوضة النوم دي، كانت بالف وميتين، أها أسي لغاية خمسمية دولار بديك ليها، أجبته دون وعي ، جميل ماشاء الله، ثم استدركت أغير دفة الحديث، احوالك شنو إنت يا عزو؟، قلت أدفع عن نفسي الشر، لم يأبه بسؤالي، فبادرني بسؤال من عينة (هل تعلم)
إنت يا التاج سمعت بمراتب التمبربيديك؟؟
ثم جلس ينصت إلي عيني، وحتى لا اوصف بالجهالة، قلت بسرعة: سمعت بيها. شع ضياء الإنشراح على وجهه، فسرد على مسامعي، كلما يتوجب على المرء معرفته عن تكنولوجيا التمبربيدك، ثم اختتم الحديث بقوله:
ارفع ليك باربعمية؟.
أدركتني الحيرة فلم يَجُد على عقلي بإجابة، سارع فحكى لي قصة الزبون الذي كان يعاني من آلام رقبة حادة، حتى اهتدى إلي تكنولوجيا التمبربيديك، في المحل ده زااااتو، فاشتري مخدة تمبربيديك، فزالت عنه الآلام في الليلة الاولى وضحاها، تلكم التي عجز الطب بكل تقدمه وتخصصاته، عن مداواتها لعقد من الزمان، ثم سكت يحدق في وجهي، وانا اغضي الطرف دلالاً وحياءً، لم يسترح لخواطري ففاجأني مرة ثانية، بكلمة سودانية لها مغزاها ومعناها ... أها؟. وددت للبحر أن ينشق، فيقوم الفرعون بطرح كل المراتب في لجته حين تنفلق، وأن يطبق عليها الموج المرتد في جوفه، وانفد انا هاربا بجلدي، تائهاً في صحراء سيناء، حتي يعود هارون واخوه موسي، لينقذاني من عبادة العجل الذهبي.
رفعت رأسي واستجمعت ما تبقي لي من شجاعة وعزم، نظرته في بؤبؤ عينيه، وقلت، يا عزو يا اخوي، أنا اوضة النوم بدور بيها شنو، العندي كان عندك ليها زبون تعال شيلا، شوف ليك ياخي زباين من العرسان الجداد، داخلين الليق ده بلياقة عالية، وعايزين يهدفو، نحنا ياخوي ناس نوم (كرويته) ساي، ووجع الرقبة والضهرديل، ياهو التايلنول ده، وزيت السمسم، أها بلاي إنت كيف؟
رأيت بام عيني كلماتي وهي تتساقط عن أذنيه، مثل زجاج محطم، تساقط على الارض ولها دوي، وقف واعتدل في وقفته، فكأنما حديثي كله، نوع من المساومة، أو مناورة من مناورات البيع والشراء، فأخرج طلاقه من (عِبّهِ)، أشهره في وجهي سلاحاً ماضياً
علي الطلاق يا ابو السرة، بالتلتمية ولا تفتح خشمك!.
دعوت الله وأنا أتاهب للهرب، بأن يجعل زيارتي لعزو، في ميزان حسناتي بحسب نواياي، اتجهت إلى باب الخروج، فناولني (بيزنيس كارده) في وثوق من يعلم بأنني راجع إليه، ثم لاحقني بقوله .. فكر في الموضوع ده، السيل ده حدو بكرة الساعة اتنين، و بالمناسبة عندنا مراتب (سليب باي نمبر)، وبنحول عملة السودان .... وعندنا تمباك وعسل نحل......... صحت اتخلص منه بكلمة سودانية، تحسن النساء إستخدامها بحذق، دون أن يعنينها
حاضر.
مثلها بالتمام مثل كلمة (ايون).
وأنا افتح باب سيارتي، طوق نجاتي، سمعت صياحه للمرة الأخيرة، يائساً متحشرجاً:
تعال طيب شيل من السراير الصيفية (البتتطبق دي) للعيال، بديك بناينتي ناين الحبة !
في البيت حيث يجتمع البني كجة، يواجهك سؤال طبيعي يقابل كل داخل من رحلة يومه، أها الليلة مشيت وين؟
أجبت مشييت لعزو
ضحكوا ملياً وصاحو بصوت واحد
أها ما اشتريت التمبربيديك.

والله يا تاج ليك وحشة وللعيال
و للجلسة في دأك المعمل الجامع الفخيم .
ياخ ماك خابر يا التاج ؟
ياخ والله العظيم يا التاج جبنا تمبربيدك تكافح سرطان البنكرياس .
وكمان بطلة ولأية فرجينيا في التنس دفعت 10 ألف دولار في تمبربدكاية وأحدة .
ويا التاج الزولة بعد عشرة يوم رسلت لينا جواب شكر . قالت نامت نوم صحي نامت نوم عافية .
كلام الجواب يا التاج ذكرني عنقريب عمك ود جبر الدار سيد الطاحونة .
..
صاد ليك للتمبر بدك
وداير أحكي ليك قصة قبض الجماعة القاموا بتقليد التمبربيدك في الصين وعن قوة الشركة السويدية الأمريكة .
تحياتي

سلام ياعثمان
وكل سنه ونت طيب واشواق
نسمع بخبرك مرة هنا ومرة دبي مافهمنا حاجة
اها ادينا من خبر التمبر. ده لانو الجماعه كانو دايرين
يبيعو لي النوع الصيني

لو ما جيتك يا التاج لا تشتري
ولو مستعجل مستعجل يازول التامبو الأصلية
من الرقدة بتتعرف وبعدين عندها شهادة من جونز هوبكنز .
والتامبو المضروبة يا التاج زي الرأقد حدريب في ضهر الجدول .
ودي جد محاربة و صعب تدخل لا أمريكا لا السويد .

لينا قريب للسنة بنحاول ندفع حق تمبربيدك واحدة وماقادرين
عزو دا كان أسعارو دي لي هسة شغالة بنجي نشيل واحدة بكرة دي

كل سنة وإنت طيب ووليداتك وكلكم بخير

التاج سلامات..

والله تجيب التمبربيديك وتقول ليهم التعسّم دا لسة ما فات

يقولوا ليك ياخي دا شكلوا اسليب ابنيا لازم تشتري اللجام بمكنته لانو في نقص في الاكسجين

طالما في دولار لافي الله اعلم الحلول الما عندها مشاكل دي تنتهي :))

راوية ازيك ومشتاقين.

أهلييين حسين
إحنا تمامين وعافية
بالنسبة لي الاسليب ابنيا
أنا غايتو آمنت بي مشاكلها وفتشت الحلول
وعملت عملية في مصر ....ثلاثية الابعاد
إرتحت بعدها

لكن هسة عاوزة التمبر
وهسة قاعدة اقسط فيها

تاج يا ملك ..... يسعد صباحك وانت تتحفنا كل يوم بعجائب البنى كجه فى بلاد اليانكى
لى قدام

تاج الفنان
هكذا انت تكتب الممتع والساخر الكاشف
نشوف روحنا والاصدقاء والغرباء
وسايرعموم البنى كجة
جعفر عباس
تحدث عنك بتقدير واعجاب
وقال افضل من استمتع بكتاباته الساخرة
تاج السر

تمبر يدين منو بالضبط؟


_
نوباتيا .. فكـ الشفرة يا معلم!
البني كجة دي ما يمسكو بينا زمن ساي!!

مرتبة براند نيم بتاع مرتبة Tempur-Pedic
بس حاسب ماتلخبت بينها وبين الـ ميموري فوم وبتاعة الاسليبينق نمبر
كل حاجة براها

باللاي!!
سجم خشم البني كجة!!
بقيتو تشترو المراتب بالتقسيط؟



يا معلم .. هنا تشتري المرتبة من البطحاء بـ 50 ريـال
تتقلب فيها تلاتة شهور وتسلما (البلدية) تالف تماما!!
وتااااني تمشي تشتري مرتبة جديدة بـ 50 ريـال .. المافي شنو!!

تقول لي تمبرا وفيفادول!!!

هه ههههه يا حمودى اتسق ياخى .... اتسق قال البطحه قال ...
التمبربديك دى حاجه كدى زى عنقريب القد المهتور داك تنسدح فيهو تلقى جسمك خش جواهو
ده تعريف للمرتبه التى شغلت العالم حسب روايه البروف طارق جبرين ....

محمد سيد أحمد سلام وتحايا بمناسبة العام الجديد
شكري للاستاذ جعفر عباس الكاتب المثقف السوداني الفذ، وانحني
إجلالا له لما قاله عني في عدد من الحوارات التلفزيونية، وأعتبر إشارته إلى بكل هذا الحب والتقدير، شرف اتزيا به
أقابله بمثله و اضعافه، وهو وشهادة ووشاح يطوق عنقي، ياريت نحصل الحوار في يوتيوب أو اي مكان آخر

ولك تحديداً شكري العميق على متابعاتكم لما اكتب غهو عنا ولنا جميعاً

Quote: وداير أحكي ليك قصة قبض الجماعة القاموا بتقليد التمبربيدك في الصين وعن قوة الشركة السويدية الأمريكة . تحياتي

ماجيت صاد يا عثمان قبل ما نتمقلب

سلام يا سامي


نحن البني كجة ايها الانسان
لك شكري على المتابعة والتعليق

حسين توباتيا العزيز
والله مشتاقين بلبيع ضهرا


والله نظقت الحكمة وفتها بهناك، ياخي الادوية دي بعد يوكدوها يجو يطلعوها بيش
المشكلة انو عزو زاتو بنوم في مرتبة اب يايات ديك لكن الظاهر في كوميشن و اليومين دي

الاقتصاد فيهو كساد... ياخي بتجينا متين؟ كريسمسين مرو من حفلة ووتر قيت
تحياتي لك ومعزتي الدائمة

سلام يا راوية


طلعت كيف رحلتك لماتريس لاند؟؟

يا راوية سلام



عثمان موسى ماهن ده، بديك ديل في ماتريس لاند
منها بالمرة تدي اسكايلاين غشوة ههههه

سياحة في اعماقنا

المراتب عندنا حدها اسليب هاي ام يايات ..

ووجع الضهر حسب الظروف والتجاعيد وعوامل التعريه...

رأوية يا بتنا سلامات
5816 Seminary Rd
Falls Church Va 22o41
ده العنوان في أيام أنا بكون موجود في العنوان ده
ودي يا رأوية هي أكبر شركة
في عموم أمريكا . 38 سنة في الشغلة
كان جيتي يازولة الشركة تقوم ليك حفيانة .
بعدين لا تسمعي كلام أخونا ود الصايم ده .
50 ريال ؟
ياخ برش من سوق تمبول ما بي 50 ريال .
بعدين مرتبة الخمسين حقت ود الصايم دي حتقومك عندك شلل أطفال وهمهمة في الكلام
يا ود الصايم يا أخوي We Sell Better Mattress For Less .
سلام للجميع

سلام يا شوقي

وجع الضهر برضو انواع في بتاع القنقوسة داك
وده بتجيبو عوامل تعريه اشتهر بها السودان منها العنقريب
المهتوك وقعاد الضلله وحقن الكاموكوين اما الوجع الاعلي فهو متصل
بالفلايت اجارك الله ولذلك حديث علمي مطول
لك تحياتي

هسي يا عثمان موسي. استيف جوبس ده مات بصمة خشمو بسرطان البنكرياس
زول واحد ما يكلمو بالمرتبه دي ؟

هسي الايباد. فور وفايف والايفون سيكس البعملن من؟

والله يا عثمان موسي شايفك ظبطت اعلانك بمزاج
ياريت انا وبكري نستلم البيمينت عينيا ( مرتبة ولا مخدة تمبربيديك)
بختو الايراني غايتو. هههه

ود الصايم جاييك

والله العظيم يا التاج تب ما قصدي اعلان . هههها
بارك الله فيها شركة التامبربيدك ونحن جداد في نيويورك علمتنا فنون ال Sales
ودفعت لينا حق ال Spring Training
وبارك الله في الايرانيين برضو علمونا السرحة بي السجاد الايراني في جخانين ال5 بورو .
التامبو يا حاج التاج عجيبة .
هسع يجيك عمك ود الصايم يقوليك سوق البطحاء .
ود الصايم يا التاج ببني في يبت في السودان . غايتو لو أعتمد علي تمبربيدك البطحاء دي
لمان بيتو يتم ويرحل فيه ضهرو حيكون عمل حرف C من رقاد تامبو البطحاء

غايتو تاجو يغرّد .. والشكر لعثمان تبربيديكـ!!




تعرف يا عثمان
الاسليب هاي عندنا ياهو الهاي إت سلف!
لكن برضو تقوم الصباح زي الداقينكـ عديل!

القصة هنا يا خوي ما دايرة ليها مرتبة
دايرة راحة بال .. ودي وين مع الكفيل!!

تزوغ من الكفيل يجيكـ إيجار البيت!
تزوغ من الإيجار يجيكـ تجديد الإقامة!
تزوغ من الاتنين ديل استمارة العربية تنتهي!!


الحمد لله الرخصة عملوها 10 سنين!!

والله العظيم يا ود الصايم أي باكستاني
قابلتو في البلد دي لقيتو كرهان اليوم الجابو هنا .
فيهم كثيرين أشتغلوا في السعودية وعندهم حبة لغة عربية مشرتمه كدي جايبنها من
وين ما تعرف .
بس في العموم هم ناس طيبين ومهضومين .
وتموت بالضحك لمان الوأحد منهم يقوليك ( أمريكا أيجارات ) ( سعودية توفيرات )
والله يا ود الصايم كويس يكون الزول عندو كفيل . معناتو في أشغال و معناتو في هلل .
ومو كعب الزول ببدل مرتبة البطحاء كل شوية .
غايتو شوف لينا ناصية ومخزن نجرب سوق المراتب أم خمسين دي يجوز كلام الباكستان ديل عن التوفيرات
يطلع صاح .
وسنة سنتين تقلب الناصية تامبو وتعمل فيها حضرمي أمريكي . هههههها

ود الصايم سلام

Quote: الاسليب هاي عندنا ياهو الهاي إت سلف! لكن برضو تقوم الصباح زي الداقينكـ عديل! القصة هنا يا خوي ما دايرة ليها مرتبة دايرة راحة بال .. ودي وين مع الكفيل!! تزوغ من الكفيل يجيكـ إيجار البيت! تزوغ من الإيجار يجيكـ تجديد الإقامة! تزوغ من الاتنين ديل استمارة العربية تنتهي!! الحمد لله الرخصة عملوها 10 سنين!!

إنتو دحين مت بتفرشو في الواطة؟؟
بعدين الواحد لو داير يشتغل كفيل يمشي يدرس شنو؟؟ ههه

السلام والاحترام للملك
هذه المرة جعلتنا ننتظر كثيرا يا حبيب .

سلام يا طلحة


بنجي بنلقى الترافيك شديدة والمستجدات
نلقى فرقة مرة مرة والله المستعان

كيفك انت؟؟

Quote: كيفك انت؟؟

بعد فوز منتخبنا الوطني بلقب خليجي 21 بالمنامة واقتراب الزعيم العيناوي ( فريق العين) من لقب دوري
المحترفين وربما كأس رئيس الدولة وكأس اتصالات للمحترفين فالحال يا ملك في نعمة وزيادة لكن دا كلو ما منع مني
دبرسة وحزن عميق بعد موت الحوت رحمه الله .. غير أن ( التمبربيديك) أعاد لي الكثير من التوازن .
كتير خيرك يا ملك ياخ .

والله يا طلحة جبت سيرة الحوت
نحنا طبعا ناس دياسبورا ممعنة في الدسبرة، أنا بتذكر بداياتو وانا اشد الرحال
حفلات أعراس، و شباب بحري، وكان في اول محاولاته يبحث عن صوته
وزواجه بحنان بلوبلو، والمناخ العام عقد جلادي، وقوانين سبتمبري، ويبدو لى انه كان
مع بلوبلو بيمثلو ثورة ما، ضد القيم المفروضة، ووجهه حزين دائما حتى لو ابتسم، وصوته
فيه قرار لا تتوقعه يخرج من داخل هذا الرجل الضئيل، اها الدياسبورا دي لمن حصلت
فاتنا الكثير ، سمع الشرايط ده، ليس كمن راى، ويبدو لى ان المياه التي مضت تحت الجسر
من الصعب حصرها، و كلها شقوة صبت في حياة محمود، التي يغلفها الحزن أصلاً.
كنت أتمنى لو أننا تركنا أنانيتنا، واهتممنا به، عندما كان يتهالك امام اعيننا، و تصرخ عيناه، النجدة النجدة.

يا ود الصايم

Quote: الاسليب هاي عندنا ياهو الهاي إت سلف! لكن برضو تقوم الصباح زي الداقينكـ عديل!

اها دي بتعمل شنو اصلا
أو المفروض تعمل شنو؟

الزول اتسق ولا لسة يا سامي؟

Quote: وددت للبحر أن ينشق، فيقوم الفرعون بطرح كل المراتب في لجته حين تنفلق، وأن يطبق عليها الموج المرتد في جوفه، وانفد انا هاربا بجلدي، تائهاً في صحراء سيناء، حتي يعود هارون واخوه موسي، لينقذاني من عبادة العجل الذهبي.

ده شنو يا التاج؟
إنا لله
يا خي قدر ما حاولت أصف هذه الكتابة غلبني
دي ما كتابة ياخي
ده سحر أسود عديل

مشتاقين ياخي

دكتور عزان

تحياتي وامنياتي لك بالخير في العام الجديد
سعيد بمرورك واسعد اكثر لو صدقت الرؤيا بانك في البالتمور

ولا ازال في انتظار موسي وهارون هههه
هذا السحر الاسود له سنسميليته وارد الصعيد
لك محبتي

اها يا عثمان التلفون طلع ما شغال

Quote: تقالدنا علي سطح السجادة الشيرازية المزيفة، من صنع بلاد التايوان، نفض لي، أنفض ليك، عملاق أدركت منتصف عموده الفقري بعد لأي، وادرك هامتي، فربت عليها. مشتاقين، بالأكتر، إتفضل، جلست، قلب بين يديه قلماً وأزاح أوراقاً لم تكن أمامه تماماً، ولكنها على كلٍ حركة، طاف بعينيه في مناحي المخزن العظيم، فكأنما به يدعوني سراً إلى التأمل في ملكه

صاحبي معاكم طالبني جيَة ومجهِز الدعوة بس أنا أقول حاضر :)
المهم برنامجي فيهو زيارتكـ كان ربنا سهَل
بس خايف من ( توصيفكـ ده )
غايتو بقعد مكتِف واعاين ليكـ جوَه عيونكـ وما أديكـ أيِ فرصة وصف يرسخ في ذهنكـ الوصَاف ده
هههههههههههههههههههه
ياخي متعة السنين والله
خاصة الجاء من الصباح داخل مكتبو وشو يلعن قفاهو من قهر الدنيا الزايلة دي

يا عمران سلامات ياخ

والله خبر جيتك ده من أعظم المفاجآت، ومرحب بيك مقدما و بزيارتك
غايتو قصة ضيف دي بتنفعك بعمل ما شايف، حتى تتم العدة، وبعدين ادعما بريالين تلاتة
البني كجة بجاي حرقانين، وبناخد ليك الصور جنب البيت الابيض، وحدائق مايو، بس ربنا
يوصلك بالسلامة، وعندي باقي ديون عند ناس ود الصايم

والموج لمها وجيبا هههه
تحياتب