محمد الحلو بدأ يتحسن

آخر كاراكتيرين معبرين تماما وفيهما فكرة ..
كاراكتيراتو السابقة بصراحة كدا ليس فيها سوي الرسم الجميل ..
وحتي الرسم الجميل نفسو كان قاعد يخربو بالتعليقات والكابشن الضعيفة بل والساذجة جدا .
أتمني له التوفيق في هذا المضمار .
يتبع إن الله هون .

طلوح يا أيها المسكين، مشتاقين والله
كيفكم وانتم موعودون الموسم بابداعات سيدا وسيد أبوها وأمها
والله حاسدنكم عديل .. وشايف معدل الأعمار ارتفع عندكم زي الدولار اليومين دي !!
غايتو الله يصبرنا ويفرّج عليكم

Quote: محمد الحلو بدأ يتحسن

والله تحسن واحد ما شايفو ليهو !!
يا طلحة ياحي الشغلة دي موهبة يا انت موهوب أور نوط ..
زولك دا لم يطرأ عليه أي تحسن عندك مثلا كاريكاتير اليوم بتاع التور دا
ياخ فكرة استخدام الثور كرمز للقوة دي فكرة في منتهى البؤس والتواضع
التور في ثقافتنا مربوط بالهواجة والبلادة والكلام دا معروف حتى في ثقافة الطفل السوداني
ولو بتتذكر اهازيجنا الزمان "التور أب جاعورة شم الدم وقال حرّم الخ"
ومن شدة بلادتو وجبنو هو الذكر الوحيد الذي يسمح بوجود ذكور معه في نفس القطيع
و######## اقل مرفعين بجهجه ليك مربوطته ..
دا عن كاركاتير اليوم أما بتاع أمس والله ما متذكر تفاصيلو وأكيد لو كان كويس لكان ترك شيئ في الذاكرة !!
مشكلتنا في المنبر دا رسامي الكاركاتير كلهم عندهم مشاكل فمثلا صديقنا عمر دفع الله بتخيل لي بربط ليهو "سروال" في راسو حتى يرسم
كاريكاتيراتو كلها أو أغلبها من الصرة ولي تحت ....
وشايف كمان في واحد جديد بيوقع اسمو بالانجليزي غايتو دا مرض عديل
المهم يا زول بكري عاوز كدا ونحن طبعاً بتهمنا راحة الريس والعضو المصاب
خخخخخخخخخخخخ

كاريكانير اليوم في نظري يذم التحالف الجديد من حيث أراد له المدح !!

ذكرني بالتور في مستودع الخذف !! التحالف الجديد عبارة عن تور هائج متجه للسودان والذي هو بحق وحقيقة مستودع خذف .. والتور سيدمر مستودع الخذف تماما وهو في هيجانه ذاك ..!!

ذلك ما أستنبطته من الكاريكاتير أما إن اراد الرسام أيصال فكرة مغايرة أو عكس ما اعتقدته فعليه بإرفاق لائحة تفسيرية مع الكاريكاتير ..!!

وهبة وناذر السلام

Quote: محمد الحلو كما هو واضح دون أن يقصد صور الثورة بثور هائج ليهو قرنين كبيرين وأعتقد أنو دا ما ح يرضي ناس الثورة عكس ما أراد محمد الحلو .. لكن أنا كقاريء فقط الكاركاتير كان واضح جدا بالنسبة لي عكس كاراكاتيراتو السابقة عشان كدا قلتا محمد الحلو بدأ يتحسن .. لأنو فكرتو وصلت تماما .

الكلام دا كتبتو كمداخلة في بوست مجاور ..
المهم أنو الفكرة كانت واضحة جدا .. يعني أنا كقارىء مثلا ومع الجبهة الثورة ح أفهم أنو الحلو قاعد يشتم فيني وبالتالي
ح يكون عندي فيت باك والعكس لو كنت ضد الجبهة الثورية ح أفهم العكس وبرضو ح يكون عندي فيت باك وفي الحالتين
يكون الكاراكتير أدي غرضو وهو المطلوب .
طبعا أتفق معاكم تماما يا وهبة وناذر زي ما قلت في المقتبس الفوق دا أنو الحلو قصد المدح لكن خانو التعبير باعتبار أنو
ضد الحكومة ومع الجبهة لكن أنظر للكاركاتير من زاوية أنو الراجل دا ضد الجبهة الثورية دي .
عموما مازلت أعتقد أن الحلو ينقصو الكتير مع أنو بدأ يتحسن .
.....................................
يا وهبة صدقني حركة سيدا دي ح تكون لصالح الهلال وإتا في وأنا في .

لو استبدل التور بـ دب ضخم يصحو من غفوته لكان أفضل وأوضح ..!!

كلام سليم يا ناذر
لكن أنا نظرت للكاركاتير كزول ما عارف انتماء الحلو دا ..
وبرضو لو فرضنا أنو الحلو دا ضد الجبهة الثورية لوجدنا أنه قدم كاركاتير متميز .
.......................
إتا شنو يا ناذر مرة زعيم صفوة ومرة رشاشة مسكين ؟؟ ههههههه

أنا شايف أن الكراكتير بيتمثل حال الأحزاب المتنصلة
وعايز يقول أنهم متصورين الفجر الجديد عبارة عن تور هايج عايز يحطم مصالحهم فى الخرطوم.

والله ياطلحة وماليك علي حلفان
كنت ناوية أفرد خيط مخصوص عشان محمد الحلو
تشجييييع ليهو كدا
لكن اهو إنت نزلتو وانا وإنت مافي فرق بيناتنا
الزول بيستحق التشجيع
شغلو مرتب
الافكار والقفشة والذكاء ديل من عند الله
واللي عندو الموهبة دي يساعد مالو
ماشفتو مصطفى حسين واحمد رجب
أحلى أتنين قدموا حاجات حلوة
ودا مابينفي انه مرات محمد الحلو كاركاتيرو بيكون متكامل

الأخ طلحة عبدالله
سلام ...

البوست السابق جاب نتيجة !!!!
الراجل مجتهد ......
الرسومات مامفروض تكون كتيرة ومالي بيها الورقة كلها ..
رسومات رمزية وتعليق ذكي ....بي دي الفكرة بتصل للقارئ .
.
.
تحياتي

اذا تم تأويل الكاريكاتير على اكثر من وجه
فهذا دليل فشل في توصيل الفكرة.
وفي ظني ان الثنائية هي الحل.
زي ما قال مرسي الزناتي :انا المخ و انت العضلات.
فليستعن محمد الحلو بأحد البورداب الساخرين لتفريخ الأفكار .

بلة موسي السلام عليك
يا ريت ياخ لو فعلا الحلو قاصد المعني بتاعك دا كان يكون قمة الابداع ..

راوية السلام عليك
فعلا محمد الحلو يحتاج التشجيع لكن يحتاج قبل ذلك الإنتقاد وعليه أن لا يتحرج من ذلك

رضا السلام عليك
رسومات رمزية وتعليقات ذكية دا العملو الحلو في كاركاتير غول الأسعار في مواجهة ضعف الأجور والثور الهائج
الذي رمز به للجبهة الثورية وإن كان مقصدو في الأخير جاء عكس ما قصده .. عموما الزول ماشى كويس .

ناذر
سلام

شكـرا أما الفكرة الجاتنى، الترابى فى شكل فارس إسبانى، يلوح البيرق الأحمر للتور ليصرفـه عنه، وفى ذات الوقت يسدد له طعنـه بالرمـح على ظهـره..

يا طلحـة ..
انت محمد الحلو دا منو..؟ والله انا بقيت فعلا قاعد ساكت في البورد دا ما ناقش اي حاجة ..

ارجو الاجابة على السؤال :

تمبس طـه

Quote: يا طلحـة .. انت محمد الحلو دا منو..؟ والله انا بقيت فعلا قاعد ساكت في البورد دا ما ناقش اي حاجة ..

يا تامبا... عشان ما تكون واقف براك والهم...انا برضو معاك ماناقش الحلو ده منو.

يا طلحه.. ورينا وما تحرق لينا روحنا.

الاخ طلحة
- الكراكاتير فكرة موجزة ومختصرة تخلو من النص أحيانا
- كراكاتيرات الاخ محمد بها كثير من المباشرة وأحيانا أقحام الفكرة غصبن عنها
حيث لايوجد توازن بين المكتوب والمرسوم وكأن أحدها جهز لمواكبة الاخر
هذا مع كامل الود

الأخوة المرور تحياتي وشاكر ليكم تفضلكم بالتواجد هنا ...... ههههههههه
يا تامبا والشيخ محمد الحلو دا صاحب الكاركتير الفوق دا ...
الغريبة الزول دا مصر يحرجنا بعد ما قلنا بدأ يتحسن ...
غايتو بتبالغ عديل يا حلو ياخ .

سلام ابو الريش ..

Quote: ناذر سلام شكـرا أما الفكرة الجاتنى، الترابى فى شكل فارس إسبانى، يلوح البيرق الأحمر للتور ليصرفـه عنه، وفى ذات الوقت يسدد له طعنـه بالرمـح على ظهـره..

برضو قد يكون تفسير جديد .. وزي ما قال واحد فوق .. تعدد تفسيرات الكاريكاتير معناهو فشل الفكر أو فشل الرسالة المطلوبة ..

كاريكاتير الليلة فيهو خطأ املائي كاد أن يفسد الفكرة ..!!

أرجو من محمد الحلو الأنتباه مستقبلا للأخطاء الاملائية لأنو دي ما أول مرة ..!!

يا ناذر السلام عليك
ياخ والله لو بقت على غلطات الاملاء كان يكون نعيم عديل كدا ...
الزول دا غايتو بى كاركاتير الليلة والقبليهو والقبليهو خلاني أشك انو كاركتير غول الأسعار والبعديهو بتاع الجبهة الثورية ديل ما
من بنات أفكارو واللا حتي أولادا مع العلم انو الكاركتيرين ديل ( الغول والجبهة) بى سببن فتحت البوست دا وقلتا انو بدأ يتحسن لكن
الظاهر علي أنا اتسرعت شوية.
محمد الحلو دا زي ما قلتا ليك واتفقوا معاي كتيرين ناقصو كتير خالص عشان يبقي كاركتيرست عشان كدا أحسن
حاجة يعملا في الوقت الراهن دا أنو يبطل يرسم كاركاتيرات هنا لغاية ما يحسن مقدراتو بالاطلاع والتدريب
الشديد .. غير كدا ح يفضل في محلو دي كدا لفترة طويلة خالص واحتمال أصلو ما يتحرك منها.

...........
والله يا محمد الحلو خذلتني خذلان ما بعدو من خذلان .. الله يسامحك ياخ .

سلام طلحة ..

Quote: محمد الحلو دا زي ما قلتا ليك واتفقوا معاي كتيرين ناقصو كتير خالص عشان يبقي كاركتيرست عشان كدا أحسن حاجة يعملا في الوقت الراهن دا أنو يبطل يرسم كاركاتيرات هنا لغاية ما يحسن مقدراتو بالاطلاع والتدريب الشديد .. غير كدا ح يفضل في محلو دي كدا لفترة طويلة خالص واحتمال أصلو ما يتحرك منها.

كلامك قد يكون قاسي شوية رغم انو جا في صورة نقدية بحكم متابعتك ..

عن نفسي شخصيا زي ما واحد قال فوق بنصح باللجوء للثنائية الفنية ..

واحد يدي الفكرة ومحمد الحلو يرسم لحدي ما يتحسن تدريجيا ..!!