Post: #1
Title: استبيان عن ميثاق الفجر الجديد (مساعدة ياصبري طه)
Author: omer osman
Date: 01-09-2013, 08:55 AM
الأخ الفاضل صبري تحياتي
ياريت تصمم لينا الاستبيان ده بالطريقة ادناه
واكون لك من الشاكرين .......
1- راضي عن ميثاق الفجر الجديد وتري فيه الأمل والطريق لاحداث التغيير.
2- ساخط عليه وتعتبره تكتل عدائي يستهدف الدولة السودانية.
3- غير مهتم وتعتبره اجترار لمواثيق وتكتلات مجربة لم تحدث اى أثر لاحداث التغيير.
4- تري فيه جوانب إيجابية وأخري سلبية.
4- لم تحدد موقفك بعد.
|
Post: #2
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-09-2013, 08:57 AM
Parent: #1
هذا الاستبيان ونتائجه يفترض ان تكون مفيدة للجانبين الحكومة والمعارضة
لتصحيح المسار وإدراك ما يمكن إدراكه ........
|
Post: #3
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-09-2013, 09:04 AM
Parent: #2
Quote: هذا الاستبيان ونتائجه يفترض ان تكون مفيدة للجانبين الحكومة والمعارضة
لتصحيح المسار وإدراك ما يمكن إدراكه ........ |
طبعاً لو زول قال لي ياجنابو انت شنو ؟ حكومة وال معارضة ؟
بقول ليهو لالا ياااااخ لاهذا ولا ذاك أنا إتحادي 
|
Post: #4
Title: Re: استبيان عن ميثاق الفجر الجديد (مساعدة ياصبري طه)
Author: عوض أبو عيش
Date: 01-09-2013, 09:12 AM
Parent: #3
4- تري فيه جوانب إيجابية وأخري سلبية.
نمرة أربعة الأولى.. قبل تصميم الاستبيان... يا جنابو..
بس لو أدو الناس المسمين بـ (العرب) نظرة .. ولو بالعين البايزة..
في الوثيقة دي.. كان تكون الحاجات حلوة...
كثير من العنصرية.. كثير من التفكك.. كثير من الإنشائية الأحلامية الظ########ة...
والإيجابية الإنشائية الفي الوثيقة لو طبقتها أي حكومة.. تكون راشدة.. ولا تقل عن راشدية حكم عمر بن عبد العزيز..
بس في الزمن العلينا ده.. صعب...
|
Post: #5
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-09-2013, 09:18 AM
Parent: #4
Quote: - تري فيه جوانب إيجابية وأخري سلبية.
نمرة أربعة الأولى.. قبل تصميم الاستبيان... يا جنابو.. |
عوض ابوعيش اول مشارك حبابك ..
وشايفك جايب عيشك في البروفايل معاك 
لكن عودتك بعد تصميم الاستبيان برضو مطلوبة ومهمة
|
Post: #6
Title: Re: استبيان عن ميثاق الفجر الجديد (مساعدة ياصبري طه)
Author: Abdel Aati
Date: 01-09-2013, 10:14 AM
Parent: #5
سلام الاخ عمر
4-أري فيه جوانب إيجابية وأخري سلبية.
|
Post: #7
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-09-2013, 10:20 AM
Parent: #6
Quote: سلام الاخ عمر
4-أري فيه جوانب إيجابية وأخري سلبية. |
هلا استاذ عادل حبابك ...
كده صوتين لي الخيار (4) ....
وما عشان الدرب جابك ومن باب نرد ليك الزيارة
لكن بيناكم الاخير عن ميثاق الفجر الجديد فيهو كلام كويس جداً
واكثر ما اعجبني فيه الحتة بتاعة رفض العنف والحرب ...
|
Post: #8
Title: Re: استبيان عن ميثاق الفجر الجديد (مساعدة ياصبري طه)
Author: HAIDER ALZAIN
Date: 01-09-2013, 11:07 AM
Parent: #7
سلام يا جنابو
Quote: 4- تري فيه جوانب إيجابية وأخري سلبية.
|
من ناحية تانية
Quote: 4- تري فيه جوانب إيجابية وأخري سلبية.
4- لم تحدد موقفك بعد.
|
اربعة دي مالها مكررة بدينا الخج من هسع يا اتحادي...:):)
|
Post: #9
Title: Re: استبيان عن ميثاق الفجر الجديد (مساعدة ياصبري طه)
Author: صبري طه
Date: 01-09-2013, 11:34 AM
Parent: #8
ـــــــــ
|
Post: #11
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-09-2013, 11:50 AM
Parent: #9
| Quote: تفضّل أخونا جنابو عُمر .. ضع الكود الموجود داخل مستطيل كود بلغة html في مُشاركتك الرئيسية ... |
الف شكر ياصبري ياها المحرية فيك ...
الكود ما بظهر معاي زبط الشغل ده من عندك وخلينا نسوق البوست سوا
|
Post: #15
Title: Re: استبيان عن ميثاق الفجر الجديد (مساعدة ياصبري طه)
Author: tmbis
Date: 01-09-2013, 12:40 PM
Parent: #9
يا خليفـة ..
من الاشياء الغياظة جدا في تاريخ تشجيعي لي كرة القدم .. ما نقله اساسي عن لسان واحد من اخوانو مريخابي ..
بكرية مباراة الهلال والاهلي والتي جرتق فيها الهلال الاهلي المصري بتلاتة اهداف زي السم في المقبرة .. ظهر اساسي ليفطس الانتصار العظيم وقال انو اخوهو رسل ليهو رسالة وقاليهو انا زعلان منك لانك امس ما شجعته الاهلي المصري تشجيع شديد ..
هذا الاحباط من اساسي واخيه سيظل في وجداني الرياضي لفترة طويلة وساردها لهم كلما صبت مطـرة ..
المهم :
والله استبيانك انت وصبري دا ما لقيت فيهو كلمات وعبارات قوية كدا عشان ادوس فيها وتعبر عن شعوري .. تجاه ما يسمى بهذا الفجر الجديد وبكل ما فيه من عنصرية ومن ركاكـة .. لما تلقو ليكم عباراة ممتازة وقوية .. ادونا استبيان جديد .. والله اقعد احرسو ليكم لمن الفجر يطلع
|
Post: #16
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-09-2013, 01:39 PM
Parent: #15
| Quote: ظهر اساسي ليفطس الانتصار العظيم وقال انو اخوهو رسل ليهو رسالة وقاليهو انا زعلان منك لانك امس ما شجعته الاهلي المصري تشجيع شديد .. |
ههههههههههههههههههههههه
هههههههههههههههههههههههه
انت عارف ياتمبس اخو اساسي ده اجتمال كبير يكون
قام ليهو حبن عديييل كده من الزعل
| Quote: والله استبيانك انت وصبري دا ما لقيت فيهو كلمات وعبارات قوية كدا عشان ادوس فيها وتعبر عن شعوري . |
طيب بالمناسبة دي وبمناسبة (عدم الجدية في الاهمية) زي ما يقول التعلمجية
نحكي ليك القصة دي :
زماااان أيام ما كان المريخ مريخ وبنخش الكورة نقول يارب الليلة غالبين كم ؟
واحد من النوع البشجع سماعي ساكت بي ونسة الناس قرر يدخل الكورة المريخ ضد قورماهيا الكيني زولك بسمع بي حارس المريخ الاسطورة حامد بريمة ... المهم الكورة بدت ودقائق كده واحد مسلط من ناس قورماهيا فك ليهو صاروخ من نص الميدان وتووووف جوه الشبكة.
اهااااااا زولك طار من رأسه برج وبقي يكورك ليه ياحامد بريمة !! حرام عليك ياحامد بريمة !! ضيعتنا ياحامد بريمة !!
الزول الجنبه زهج منو :
يامعلم يا اخي ده ما حامد بريمة عليك الله ما تكرهنا الكورة زاتووو !!
ده ما حامد بريمة !!! طيب ده منو ؟؟؟؟؟؟؟؟
ده طيفور!!!
طيفور منو ياجماعة ؟
طيفور ده القون الاحتياطي ..
يعني ده ما حامد بريمة ؟
ااااي يا اخي ده ما حامد بريمة
صنننننننننننن !!!!!!!!!!!!!!!
معقول دي عملية تعمله ياحامد بريمة !! ماتجي الكورة !!!!!!!!
اها ياتمبس وكت ما لقيت حامد بريمة اقبل بي طيفور ياااااااااااخ
|
Post: #10
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-09-2013, 11:46 AM
Parent: #8
| Quote: اربعة دي مالها مكررة بدينا الخج من هسع يا اتحادي...:):) |
ههههههههههه
ياحيدر نحن ناس فاتحة ما بنحتاج للخج
|
Post: #12
Title: Re: استبيان عن ميثاق الفجر الجديد (مساعدة ياصبري طه)
Author: أحمد ابن عوف
Date: 01-09-2013, 11:53 AM
Parent: #10
جنابو
لم اقرأ البيان بعد، لكن مجرد الالتقاء في حد زاتو بس حاجة كويسة وكويسة جدا
تحياتي
_________
لا تفترض ان كل الناس قرو البيان، جيبو هنا في بوستك، وستعتبر ممن يساهمون في نشر "بدون مؤاخذة يعني ..... و خائن
وستكتب ان شاء الله مع الاشقياء بدلا عن الاشقاء
|
Post: #13
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-09-2013, 11:58 AM
Parent: #12
Quote: لا تفترض ان كل الناس قرو البيان، جيبو هنا في بوستك، وستعتبر ممن يساهمون في نشر "بدون مؤاخذة يعني ..... و خائن
وستكتب ان شاء الله مع الاشقياء بدلا عن الاشقاء |
هلا ياقريبي ......
الميثاق مبذول ومطروح في هذا المنبر منذ عدة ايام
ومن لم يطلع عليه من السهل جداً بقليل من البحث ان يجده
دايرين نخطو خطوة في اتجاه قياس الرأي عبر الاستبيان بدل الغلاط ساي
|
Post: #18
Title: Re: استبيان عن ميثاق الفجر الجديد (مساعدة ياصبري طه)
Author: عبدالله محمد أحمد
Date: 01-10-2013, 09:37 AM
Parent: #2
Quote: هذا الاستبيان ونتائجه يفترض ان تكون مفيدة للجانبين الحكومة والمعارضة
لتصحيح المسار وإدراك ما يمكن إدراكه |
الاخ عمر عثمان تحياتي
فكرة الاستبيان فكرة ممتازة و هي واحدة من الادوات القوية لقياس توجهات و قوة و ضعف اي عملية او نظام او برنامج. لكن من المهم جدا - كي تكون النتائج اقرب للواقع - من وضع منهجية لتفادي المعوقات الآتية:
لا يمكن لاحد الاجابة على الاستبيان اكثر من مرة
معظم الدين يهمهم الاستبيان في السودان او اغلبهم لا يتعامل مع الشبكة العنكبوتية
موقع سودانيز اونلاين في السودان محجوب، و لا يستطع دخوله الا من لهم دراية واسعة بتجاوز التهكير
اشياع و اتباع النظام و ابنائهم و اقاربهم اكثر من يمتلكون الحاسوبات و جميعهم يتعاملون مع التقنيات المعلوماتية الحديثة
للحكومة تيم اليكتروني مدرب على الخول على الكثير من المواقع خلسة، فلا بد من آلية توفر الحماية الكاملة للاستبيان.
على كل حال فكرة اتمنى لها النجاج و انا دائما مع القرار المدروس برواقة.
و دمت
|
Post: #19
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-10-2013, 10:49 AM
Parent: #18
هلا عبدالله تحياتي ...
| Quote: لا يمكن لاحد الاجابة على الاستبيان اكثر من مرة |
دي بفتيك فيها اخونا صبري شخصياً ماعندي معلومة عن مدي حماية الاستبيان.
Quote: معظم الدين يهمهم الاستبيان في السودان او اغلبهم لا يتعامل مع الشبكة العنكبوتية
موقع سودانيز اونلاين في السودان محجوب، و لا يستطع دخوله الا من لهم دراية واسعة بتجاوز التهكير |
صحيح لكن في كل الاحوال تصلح سودانيزاونلاين (كعينة) ممكن نطلع منها بمؤشرات مابطالة.
Quote: اشياع و اتباع النظام و ابنائهم و اقاربهم اكثر من يمتلكون الحاسوبات و جميعهم يتعاملون مع التقنيات المعلوماتية الحديثة
للحكومة تيم اليكتروني مدرب على الخول على الكثير من المواقع خلسة، فلا بد من آلية توفر الحماية الكاملة للاستبيان. |
وليه المعارضين احزاب وافراد ما يتحلوا بالجدية والمثابرة لمقاومة هذا الطوفان الالكتروني !!!
بدلاً عن الاستسلام !!!
|
Post: #14
Title: Re: استبيان عن ميثاق الفجر الجديد (مساعدة ياصبري طه)
Author: صبري طه
Date: 01-09-2013, 12:24 PM
Parent: #1
ميثاق الفجر الجديد هنا
|
Post: #17
Title: Re: استبيان عن ميثاق الفجر الجديد (مساعدة ياصبري طه)
Author: omer osman
Date: 01-10-2013, 07:25 AM
Parent: #14
|
Post: #20
Title: Re: استبيان عن ميثاق الفجر الجديد (مساعدة ياصبري طه)
Author: صبري طه
Date: 01-12-2013, 07:26 AM
Parent: #17
ما هو موقفك من ميثاق الفجر الجديد ؟
|
Post: #21
Title: Re: استبيان عن ميثاق الفجر الجديد (مساعدة ياصبري طه)
Author: Kabar
Date: 01-12-2013, 07:42 AM
Parent: #20
عمر..حبابك يا صديق
4. ترى فيه جوانب ايجابية و جوانب سلبية..
و من هنا نشكر ناس الفجر الجديد.. فقد كتبت من قبل (ست ثقوب في جدار الوثيقة)..و هي نقد لوثيقة البديل الديموقراطي..و الميثاق الأخير عالج اربع ثقوب كما شرحناها في نقدنا السابق (السنة الماضية)..!
و دمت..
كبر
|
Post: #22
Title: Re: استبيان عن ميثاق الفجر الجديد (مساعدة ياصبري طه)
Author: أحمد أبكر
Date: 01-12-2013, 10:04 AM
Parent: #21
أنا مع نمرة أربعة: فيها جوانب إيجابية ,اخرى سلبية
ومادام هذا البوست للتصويت فقط ، سوف أناقش تلك الجوانب في بوست منفصل
|
|