علماء النبات والمختصين افتونا في هذه الحالة (توجد صور)

هذه النبتة او الشجرة في منزلنا وقد لاحظت اختي الكبيرة الاختلاف الواضح بين
لون وشكل اوراق هذا الغصن (داخل الدائرة الحمراء) عن باقي اغصان نفس النبتة !!!

في الوهلة الأولي ظننا ان هذا الغصن ينبت من نبتة اخري مجاورة والتف حول هذه النبتة
لكن بتتبعه تجده ينبت من ذات النبتة ذات الاوراق المختلفة

منظر عام للنبتة ...

لاحظ للاختلاف الكبير في شكل الاوراق ...

للمشاركة من خارج المنبر الايميل [email protected]

شوفوا ليكم شيخ يقرأ ليكم في البيت ....

يا جنابو

البوست دا يبدو إنه بدر الدين أحمد موسى ما شافوا لسه

لكن بالرغم من إنه هو عالم حيوان (أقصده تخصصه في الإنتاج الحيواني طبعاً) عشان ما يجي واحد يقرارها بطريقة تانية

لكن بيفتي ليك في الحالة دي

وأنا بعمل ليهو فرشة بتاعت إستفزاز عشان يجي طاير

يمكن تكون حالة مرضية مثل نقض في اي عنصر مثل النتروجين أو الزنك أو غيره

والنقص بيكون بالنسبة للأوراق اللي لونها باهت أو فيها كرفسة كدا

وفي إنتظار بدر الدين أحمد موسى

Quote: البوست دا يبدو إنه بدر الدين أحمد موسى ما شافوا لسه لكن بالرغم من إنه هو عالم حيوان (أقصده تخصصه في الإنتاج الحيواني طبعاً) عشان ما يجي واحد يقرارها بطريقة تانية لكن بيفتي ليك في الحالة دي

ياريت ياعصام لو تلكزو لينا يمكن نقدر نفهم منو الحاصل شنو بالضبط

Quote: يمكن تكون حالة مرضية مثل نقض في اي عنصر مثل النتروجين أو الزنك أو غيره والنقص بيكون بالنسبة للأوراق اللي لونها باهت أو فيها كرفسة كدا

الاوراق اللونه باهت وفيهو شوية اصفر دي اصل النبتة يعني اصلها شكلها كده
ما اصفرار مرضي

Quote: شوفوا ليكم شيخ يقرأ ليكم في البيت ....

شجرة مسكونة وال شنو
ياااااخ يمكن تحته بترول وال عرق دهب

كده شوف يا عمر أوعى تكون الشجرة دي - مع موضة تفتيح البشرة ومفاجأة الجيران - تكون شربت ليها حاجة كمان!

Quote: كده شوف يا عمر أوعى تكون الشجرة دي - مع موضة تفتيح البشرة ومفاجأة الجيران - تكون شربت ليها حاجة كمان!

هههههههههههههههه ههههههههههههههه
عندي اخوي اختصاصي جلدية نخليهو يشوفه وال شنو

جنابو
سلامات
النبته أصلاً كانت مريخية
بعدين دخل عليها ( هلال - هيثم ) قام غير ليكم شكل المريخ
ـــــــــــــــ
بطل السطلة فى الحديقة


***
خبير زراعي

يا جنابو

الشجرة دي زي ما قال عاصم تعاني من نقص في الزنك والماغنيسيوم ودا ظاهر من بياض أطراف الأوراق

الحتة الإنت شايفة مختلفة دي بتكون برعم حديث في قمة الشجرة أو برعم طرفي حديث لذلك لا تزال محتفظة بشيء من الحيوية

ولأنو دائما الجديد شديد وبلقى عناية بتكون مستأثرة بجزء كبير من العناصر الغذائية على قلتها الموجودة .


احتمال ثاني ممكن تكون الشجرة مصابة بمرض فطري لم يصل إلى هذا الجزء



اسرع حل تمشي ناس المؤسسات الزراعية وتجيب مركب ورقي بحتوي على عناصر غذذائية شاملة وترشو بمرشة على الأوراق

Quote: الشجرة دي زي ما قال عاصم تعاني من نقص في الزنك والماغنيسيوم ودا ظاهر من بياض أطراف الأوراق الحتة الإنت شايفة مختلفة دي بتكون برعم حديث في قمة الشجرة أو برعم طرفي حديث لذلك لا تزال محتفظة بشيء من الحيوية ولأنو دائما الجديد شديد وبلقى عناية بتكون مستأثرة بجزء كبير من العناصر الغذائية على قلتها الموجودة . احتمال ثاني ممكن تكون الشجرة مصابة بمرض فطري لم يصل إلى هذا الجزء

المشكلة ياحمد زي ماقلت لعصام فوق الشكل الشايفنو زي مرضان ده
هو شكل الاوراق الطبيعي الاخضر بتاعه باهت وفيها شوية اصفر باهت برضو
لانها من يومه شكلها كده والاغرب من كده انو الغصن المختلف واحد فقط من بين
كل اغصان النبتة الكثيرة دي !!!!!!

Quote: بطل السطلة فى الحديقة

ههههههههههههههههههه
يامعروف يااااخ انا اصلي دبيب وال شنو اسطل تحت شجرة قصيرة قدر دي

أنا غايتو شايف إنكم مفروض ترحلو من البيت ده

Quote: أنا غايتو شايف إنكم مفروض ترحلو من البيت ده

هههههههههههههههه ...
عشرة عمر ياخالد ياااخ بالضبط في 2013 دي تمينا 40 سنة
نقوم نرحل بي سبب صفقة وال غصن مشاتر

الموضوع ده خطير يا جنابو ..
اقترح تكوين لجنة من البورداب لمعيانة وفحص الشجرة وتكوين لجنة فرعية مهمتها قطع الصفق وارساله الي ادراة وقاية النباتات علي ان تنبثق منها لجنيتين واحده لتجهيز الحاجات والتانيه بقيادة الاخ ذو اليد علي ان لا تتجاوز رسوم الاشتراك 20 جنيه بالجديد ..
الموضوع خطير يا جماعة ومفروض الناس تتكاتف وما نخلي اخونا عمر براهو في مواجهة هذه الصفقة الشريرة ..
بالمناسبة : أين الاخ انور التكينة في هذا السقط ؟

ـــــــــــــــــــــــــــــــــــ
جنابو شكلي كده حا اجيب كمرتي واجي اتغدي معاك وافهم الموضوع برواقه ..

Quote: الموضوع خطير يا جماعة ومفروض الناس تتكاتف وما نخلي اخونا عمر براهو في مواجهة هذه الصفقة الشريرة ..

يا فيصل يااااااااخ انت الوحيد الفيهم وحاسس بي وبخطورة الموقف !!!!
وغايتو اذا اللجان دي فيها لجنة حتسافر بره للاطلاع على تجارب الدول المتقدمة
في هذا المجال الرجاء ختني عضو فيها ومعاي اخوي وهبة اصلو طول ماسافر

Quote: وغايتو اذا اللجان دي فيها لجنة حتسافر بره للاطلاع على تجارب الدول المتقدمة في هذا المجال الرجاء ختني عضو فيها ومعاي اخوي وهبة اصلو طول ماسافر

والله ياخ انا شايف انه ندرس الموضوع بكل جوانبه .. ممكن لجنة من بورداب هولندا تفتي لينا في امكانية الاتصال بمعاهد البحوث والجامعات في هذا الامر ..
اقترح نسند الموضوع علي الحيطه وننتظر ..
والله لا يضيع اجر من احسن عملا ..



ــــــــــــــــــــ
* ده كلو ممكن نتوصل ليه بعد مباحثات ما بعد الغداء وكده ..

عالم بتاعين مظاهر كيف
يعني عاوز تورينا انو بيتكم فيهو شجر وكده اها عرفنا !!
ما اي شجرة مافيها صفقة بتشبه التانية
وبالمناسبة دي حنضمك معانا في مشروع لكل خريف زهرة
ايه رايك ؟؟
سالت شيخ قال لي الصفقة دي قامت يالليل ولا النهار ؟؟
جاوب

Quote: عالم بتاعين مظاهر كيف يعني عاوز تورينا انو بيتكم فيهو شجر وكده اها عرفنا !! ما اي شجرة مافيها صفقة بتشبه التانية

هههههههههههههههه هههههههههههههههه
بيتنا فيهو شجر وانا قريت في دار الحنان كمان اها المافي شنو

Quote: وبالمناسبة دي حنضمك معانا في مشروع لكل خريف زهرة ايه رايك ؟؟

طوالي ......

Quote: سالت شيخ قال لي الصفقة دي قامت يالليل ولا النهار ؟؟

قول ليهو دي قامت سداري ههههههه لا بالليل لا بالنهار
اها جاوب ياشيخ هههههههههههه

بكره الشجرة دى حتقول ليك هذه كانت اخطائي

Quote: بكره الشجرة دى حتقول ليك هذه كانت اخطائي

ههههههههههه
إعترافات شجرة

Quote: الحتة الإنت شايفة مختلفة دي بتكون برعم حديث في قمة الشجرة أو برعم طرفي حديث لذلك لا تزال محتفظة بشيء من الحيوية

سلام يا جنابو
دا اقرب كلام للصحة وازيد أن الصفقات الداخلية المخضرة دي غير ان انباتها جديد فهي محتمية بالصفقات الخارجية الكبيرة التي اثرت عليها عوامل الشمس
و الضوء .


*
سفيان نابري
مزارع بالفطرة
و حالياً متوجه مشروع زراعي
جديد غرب أم درمان .
(طامح ابقى زي ود عاشميق بتاع عثمان موسى.



ـــــــــــــــــــــــــــ
بالمناسبة خليك جادي في موضوع
الماتش داك و الملاعب كتيرة نأجر
و نغلبكم و نشرب الببسي .
بس صراحة أنا بحب الماتش بتاع
البجي فيهم قون اول يقلعوا فنايلهم .

Quote: وازيد أن الصفقات الداخلية المخضرة دي غير ان انباتها جديد فهي محتمية بالصفقات الخارجية الكبيرة التي اثرت عليها عوامل الشمس و الضوء .

دعنا نراقب النبتة كم يوم ونشوف ياسفيان هل في تغييرات ح تحصل ام لا ........

Quote: بالمناسبة خليك جادي في موضوع الماتش داك و الملاعب كتيرة نأجر و نغلبكم و نشرب الببسي .

تغلبونا بنضرب تلاتة تسعات ونقول ليهم افتحوا للناس ديل بلاغ تعدي على موظف عام ههههههههه

سلام يا جنابو

زمان لمن جاء استاذ يشرح لينا قصة الجينات وفصائل الدم وبلاوي مندل ديك
حكى لينا قصة من القضاء البريطاني، قال الراجل ولده الكبير ما شاء الله، طول بعرض
وصحة تمام التمام ووسيم .. المهم، ولده التاني طلع زول مخستك وضعيفوني ومرضان السنة كلها على العليهو
شين شديد، قام رفع قضية على المرا بتهمة الخيانة وانو السجمان دا ما ولدو، هاك يا تحاليل
شيك ختك ، النتيجة طلعت، صحيح الموضوع فيهو خيانة، لكن السجمان هو الطلع ولده من صلبو
والتاني لا.

انا مع الرأي البقول، الحتة الانت شايفه غريبة دي، هي الحته السليمة في الشجيرة، والباقي
مرضان من يومو بس انت ما جايب خبر

هذا والله اعلم

الغداء بتين؟؟

Quote: انا مع الرأي البقول، الحتة الانت شايفه غريبة دي، هي الحته السليمة في الشجيرة، والباقي مرضان من يومو بس انت ما جايب خبر

لو جانا زول من المختصين ممكن من الصور يعرف اسم الشجرة وهل ده شكلها الطبيعي ام لا !!
اما بخصوص الغداء البيت بيتك ياقريبي حبابك عشرة بلا كشرة .....

الأخ عمر
يبدو لى من الصور صفق النبته طبيعى، ويبدو أن السبب هو أختلاف أعمار الأوراق .. لاحظت فى إحد الصور أن الفرع الذى يحمل الأوراق الخضراء هو فى الأصل (خلفة) من فرع تم قطعه .. وهذه الحالة تلاحظها فى شجرة النيم حينما يتم تجذيبها .. تنموا الأوراق بكثافة وأخضرار شديد، لأن المواد الغذائية التى كانت تذهب إلى الأفرع والأورق تكون متراكمة أثناء فترة القطع حتى تنمو أوراق جديده ويدفع النبات بتلك العصارة الى الأوراق الجديدة. وفى هذه الحالة حتى لا تكون الأوراق مختلفة وتغير من شكل النبات فى الزينة، تقوم تعمل قص لكل أفرع النبات فى زمن واحد حتى تنمو أوراق متجانسة فى أعمارها ومن ثم ألوانها.


بريمة

يا جنابو .. شوف مُحسن خالد :)



احتمال تلقى عندو النجيضة ...

Quote: يبدو لى من الصور صفق النبته طبيعى، ويبدو أن السبب هو أختلاف أعمار الأوراق .. لاحظت فى إحد الصور أن الفرع الذى يحمل الأوراق الخضراء هو فى الأصل (خلفة) من فرع تم قطعه .. وهذه الحالة تلاحظها فى شجرة النيم حينما يتم تجذيبها .. تنموا الأوراق بكثافة وأخضرار شديد، لأن المواد الغذائية التى كانت تذهب إلى الأفرع والأورق تكون متراكمة أثناء فترة القطع حتى تنمو أوراق جديده ويدفع النبات بتلك العصارة الى الأوراق الجديدة. وفى هذه الحالة حتى لا تكون الأوراق مختلفة وتغير من شكل النبات فى الزينة، تقوم تعمل قص لكل أفرع النبات فى زمن واحد حتى تنمو أوراق متجانسة فى أعمارها ومن ثم ألوانها.

ده كلام منطقي ومتماسك يابريمة بس صراحة ما عارف هل انت مختص في المجال
ام خبرة حياة وملاحظة ؟ في كل الاحوال الف شكر على الافادة

هذا النبات مهجّن
والجزء الشديد الخضار
ورث الجينات باعت النبات الاصل
يعني رجع للجدوده

Quote: هذا النبات مهجّن والجزء الشديد الخضار ورث الجينات باعت النبات الاصل يعني رجع للجدوده

فيصل

هكرفي

كل إناء بما فيه ينضح

يا فيصل يا مجرابي

Quote: هذا النبات مهجّن والجزء الشديد الخضار ورث الجينات باعت النبات الاصل يعني رجع للجدوده

برضو وجهة نظر معقولة يافيصل ........
الف شكر ....

الأخ عمر
سلام ..

Quote: ده كلام منطقي ومتماسك يابريمة بس صراحة ما عارف هل انت مختص في المجال ام خبرة حياة وملاحظة ؟ في كل الاحوال الف شكر على الافادة

زراعى ومزارع، الأثنين مع بعض .. لكن الخبرة قديمة وربما تكون الأستشارة هنا غير دقيقة تماماً .. لكن على العموم أنت لا تحتاج أن تذهب لناس الأرشاد، لأن الحالة واضحة ليس حالة مرضية بالنسبة للفرع ..

الأخ فيصل،

كلامك أن الفرع ورث صفات جدو غير دقيق، ويكون صحيح فى حالة واحدة لو الأخ عمر عمل تعقيل للنبات بنات أخر.

بريمة

Quote: كلامك أن الفرع ورث صفات جدو غير دقيق، ويكون صحيح فى حالة واحدة لو الأخ عمر عمل تعقيل للنبات بنات أخر.

ابداً ماحصل زول هبشه مافي ..
شكرا بريمة للاضافة مرة اخري ....

Quote: ويكون صحيح فى حالة واحدة لو الأخ عمر عمل تعقيل للنبات بنات أخر.

انا اقصد هيك يا بريمة بس كلمة تعقيل ما لميت فيها.

ياجنابو ناس البساتين هم القامو بالتعقيل

هسي كان جبتة لينا صورة لي بتاع الفول الجنبكم داك موش احسن من البتسوي فيهو دة
غلطانين نحن الاديناك بتنا

Quote: هسي كان جبتة لينا صورة لي بتاع الفول الجنبكم داك موش احسن من البتسوي فيهو دة غلطانين نحن الاديناك بتنا

هههههههههههه
اخوك ماشايقي !!! والشايقي امره بين اثنتين (العسكرية والطورية)
اها العسكرية جربناها دايرين نجرب الطورية

يا جنابو بيتكم لو قريب من مقر المؤتمر الوطني
يبقى أكيد الصفقات الظهرت دي من (الخلايا النايمة)
واحتمال يكون ده شغل الفكي أبو جداداة

واحتمال برضو بطن الشجرة (بطرانة)
انت ياخ مالك انتا :)

Quote: ابداً ماحصل زول هبشه مافي ..

يا جنابو الزمن دا تضمن روحك بس
الشجرة دي يومها كلوّ (برة) هههههههه

Quote: يا جنابو الزمن دا تضمن روحك بس الشجرة دي يومها كلوّ (برة) هههههههه

ود البشري إزيك

مافي شجرةً ما هباها الريح

Quote: سالت شيخ قال لي الصفقة دي قامت يالليل ولا النهار ؟؟

بمناسبة شيخ حبيبنا السني دا
قال ليك و احد بلدياتنا سافر الحج وجاء راجع بعد كم يوم كدا
مشى سأل شيخ فقيه قائل :- يا شيخنا انا مشيت الحج و عملته كل الشعائر بس نسيت
ازور قبر المصطفي صلى الله عليه و سلم ... اها حجي دا صاح ولا بـاطـل ؟
الشيخ قال ليهو :- يعلم الله بـاطـل أنت دا ما حجك .



ــــــــــــــــــــــــــــ
حاسي بنفسي زي ذو اليد
في البوست حق صاج السمك .

سفيان
سلام ..

Quote: سفيان نابري مزارع بالفطرة و حالياً متوجه مشروع زراعي جديد غرب أم درمان .

سفيان يا أخ ، هل هذا هو المشروع الذى يقع على بعد 60 كلم غرب أم درمان .. أدينا تفاصيل عن نجاح المشروع لو سمحت.

بريمة

Quote: يا جنابو الزمن دا تضمن روحك بس الشجرة دي يومها كلوّ (برة) هههههههه

ههههههههههه
الشجرة جوه الحوش ياودالبشرى لكن زي ماقالوا بكون في خلايا نايمة هههههه

Quote: يا جنابو بيتكم لو قريب من مقر المؤتمر الوطني يبقى أكيد الصفقات الظهرت دي من (الخلايا النايمة) واحتمال يكون ده شغل الفكي أبو جداداة واحتمال برضو بطن الشجرة (بطرانة) انت ياخ مالك انتا :)

ههههههههههههههههههههه
والله يامحمد هو من ناحية قريب فقريب جداً ما اكتر من 350 متر
وكان جات على الشجرة هينة الخوف تجي على البيت زاتووووو

وهذه مشاركة وردتني عبر الايميل من الأخ صلاح الحسين له التحية والشكر

Dear Omar,
With respect to all what u write.
Beraima almost got it when he wrote about leaf age.
It is genetics. Genes are expressed differently over time
(age) in organisms ( u dont change ur DNA to pass to adulthood).
So its a case of young and old leaves.
Ur beautiful shrub is not the only example.
Regards.

وفيها تامين على كلام الاخ بريمة .......

الاستاذ عمر
لست متخصصا في علم النبات
لكن الظاهر أن ما في الصورة هو نبات طفيلي والنبات الطفيلي يمكن أن يخترق الساق أو الجذور لنبات آخر وينمو عليها
المصدر
ويكيبيديا
http://ar.wikipedia.org/wiki/%D9%86%D8%A8%D8%...81%D9%8A%D9%84%D9%8A

الاخ عمر عثمان

تحياتي
و الشكر للاخ عاصم فقيري الذي توسم في خير و اكثر من ذلك وصفني ب"عالم حيوان" هههههههههههه
كويس يا عاصم فقيري بجي الخريف و بلقى فيك فرصة و بتسدا

يا عمر عثمان زي ما قال بريمة و قبله حمد و هما زميلاي في كلية الزراعة
الاصل في الشجيرة دي انه الوان اوراقها يكون مختلف و اسمها العلمي
كوديم فاريقاتم Codiaem variegatum و فاريقاتم جاية من فاريتي variety و هي التنوع
يعني زي ما انت قلت الشجيرة, ما مريضة و انما هي اصلا مختلفة الوان الاوراق. و دا طبعا الكلام القالوهو حمد و بريمة بس كلام حمد عن نقص الماغنسيوم ما صحيح يبدو انه الاقرونومي (تخصص انتاج المحاصيل Agronomy) نسى حمد الهورتكلشر (علم البساتين Horticulture) هههههههه
طيب ليه الورق التاني اخضر كله مما جعلك تشك ان هناك مشكلة?
مافي مشكلة خالص يا عمر, و زي ما قال بريمة الحكاية كلها ان الورق الجديد هو نبت جديد و مع الزمن حا تختلف الالوان في الورق كما هو طبيعي
دي صورة من قوقل لنفس الشجيرة تقريبا و سترى ان الاوراق خضراء مثلما رأيت في شجيرتك



وهذا اللنك لمجموعة من نباتات الفاريقاتم
https://www.google.com/search?q=variegatum+codiaeum&h...sAQ&biw=1463&bih=685

Quote: الاخ عمر عثمان تحياتي و الشكر للاخ عاصم فقيري الذي توسم في خير و اكثر من ذلك وصفني ب"عالم حيوان" هههههههههههه كويس يا عاصم فقيري بجي الخريف و بلقى فيك فرصة و بتسدا يا عمر عثمان زي ما قال بريمة و قبله حمد و هما زميلاي في كلية الزراعة الاصل في الشجيرة دي انه الوان اوراقها يكون مختلف و اسمها العلمي كوديم فاريقاتم Codiaem variegatum و فاريقاتم جاية من فاريتي variety و هي التنوع يعني زي ما انت قلت الشجيرة, ما مريضة و انما هي اصلا مختلفة الوان الاوراق. و دا طبعا الكلام القالوهو حمد و بريمة بس كلام حمد عن نقص الماغنسيوم ما صحيح يبدو انه الاقرونومي (تخصص انتاج المحاصيل Agronomy) نسى حمد الهورتكلشر (علم البساتين Horticulture) هههههههه طيب ليه الورق التاني اخضر كله مما جعلك تشك ان هناك مشكلة? مافي مشكلة خالص يا عمر, و زي ما قال بريمة الحكاية كلها ان الورق الجديد هو نبت جديد و مع الزمن حا تختلف الالوان في الورق كما هو طبيعي دي صورة من قوقل لنفس الشجيرة تقريبا و سترى ان الاوراق خضراء مثلما رأيت في شجيرتك

كلام علمي ومرتب في قالب بسيط يفهم من غير المختصين ..
الف شكر يابدرالدين يااااااخ على الافادة والتوضيح ..
والحمد لله اطمانينا على شجرتنا ياودالبشرى وودالصايم
هذه نعمة من نعم سودانيزاونلاين التنوع وتعدد التخصصات والخبرات
لذا وجب الشكر لمن جعل هذا ممكناً .......... اخونا بكري ابوبكر
واقفل المحضر بساعته وفي تاريخه مع قرارنا باخلاء سبيل الشجرة بالبراءة

سلام ..تشخيص الاوارق صغيرة صحيح واحتمال عدم وصول اشعة الشمس له برضو سبب, عامة عند هذه النباتات تذداد خضرة اوراقها فىحالة انعدام الضوء الكافى وخاصة عندما تكون نبات زينة داخل البيوت.

Quote: سلام ..تشخيص الاوارق صغيرة صحيح واحتمال عدم وصول اشعة الشمس له برضو سبب, عامة عند هذه النباتات تذداد خضرة اوراقها فىحالة انعدام الضوء الكافى وخاصة عندما تكون نبات زينة داخل البيوت.

يا أخوانا عشان يكون حساب ما كوار


وبرضو بستنجد ببدر الدين أحمد موسى هنا

الضوء الواصل للمجموع الخضري لمن يكون قليل هو في حد ذاته سبب لنقس النتروجين

لأنه الضوء هو السمؤول عن التمثيل الغذائي

فيكون المرض نقص النتروجين مش قلة أشعة الشمس والتي هي سبب في نقص النتروجين

عاصم فقيري
تحياتي

في النبتة موضوع البوست يا عاصم, لا توجد اي مشكلة. و لا يوجد اي سبب للبحث عن اي سبب او تشخيص فطبيعة الكوديوم فاريقاتم انه اوراقه تكون مبرقعة لكن النمو الحديث قد يكون اخضر لانه حديث في السن new growth, زي لما يكون في الانسان شعر الواحد يكون اسود في الصغر و مع زيادة السن و العمر يتحول الشعر لابيض.
ما في علاقة مباشرة بين كمية الضو و كمية النايتروجين. فالضو يأتي من الشمس او اي مصدر و النبات يمتص النايتروجين من التربة و عملية الامتصاص ما اظنها مربوطة بالضو و تحكمها الخاصية الشعرية. لكن كمية الضوء ممكن تؤثر في مدى الاستفادة من النايتروجين الممتص في النبات و تمثيله لصناعة البروتينات و بالتالي النمو.
لكن في حاجتين
عندما يكون ضوء الشمس كثير على النبات (الحالة التي تسر النبات) تكون الاوراق اقل خضرة, و في حالات الضوء الخافت يكون لون الاوراق غامق نسبيا, و تحكم الحكاية دي نوعية الكلوروفيل و خاصة كلوروفيل "b" فتركيزه اعلى في نباتات الظل, و لذلك تكون اوراقها اكثر خضرة و النباتات التي تعيش تحت ضوء الشمس المباشر تكثر فيها انواع اخرى من الكلوروفيل.
اما نقص المواد الغذائية في النبات مثل النايتروجين و الماغنسيوم فيحدث ما يعرف بالكلوروسيس chlorosis و يكون لون النبات اصفر شاحب حتي لو كان الضوء متوفر.
في حالة قلة الضوء يحدث ما يعرف بالاتيوليشن etiolation و فيها يعجز النبات عن صناعة الكلوروفيل و يكون لونه اصفر شاحب او ابيض لان الصبغة الموجودة فيه تكون صبغة الكراتنويدCaroteniods (زي الموجودة في الجزر).





-------
برضو ما بحلك يا عاصم انا لابد ليك لابد ليك ههههههه
التخصص يا عاصم في كلية الزراعة بس في سنة خامسة, لكن من سنة اولى لغاية سنة رابعة درسنا كل انواع الزراعة من بساتين و انتاج محاصيل و انتاج حيواني و علم نبات و علم حيوان و اقتصاد زراعي و كيمياء و تربة و وقاية نباتات و ميكنة زراعية, عشان كدا الزراعي بكون جاك اوف اول تريدس!





--

ممكن عصفورة تجيب بذرة وتختها في نبتة تانية
لاحظنا الحاجة دي في حنتوب وإحنا صغار
العصافير بتجيب نباتات وكمان مضرة لشجر الجوافة والليمون