سنة حلوة ياجميل

سنة حلوة يا جميل!

December 31, 2012



الفاتح جبرا

والعالم يستقبل عامه الجديد .. أبت (أمنا الحكومة) إلا أن تهدي المواطن (ميزانيتها) لهذا العام المقبل 2013 وهي تغني له كعادتها «سنة حلوة يا جميل!»

بالفعل هو مواطن (جميل) بل هو أجمل مواطن عرفته (الأوطان) منذ أن خلق الله الأرض وما عليها فهو أي المواطن من (جمالو) فهو لا يتعب نفسه بمعرفة إن كانت هنالك (ميزانية) من أصلو.. بل ويعتقد جازماً (من شدة سذاجته) أن الحكومة شغالة بدون (ميزانية) بل بدون (أقلام ودفاتر) وإنو المسألة ماشة ساااااكت.. فالمواطن (الجميل) يسأل نفسه في غباء يحسد عليه.. كيف يمكن لدولة أن تضع ميزانية وكل مسؤول فيها (مُجنِّب) ليهو (كوم قروش) وقاعد عليهو؟ شئ بالعملات المحلية وشئ بالعملات الأجنبية وشئ بالما عارف شنو؟ كيف يتم وضع ميزانية وهذه الأموال (الما معروفة) خارج الميزانية؟

بالطبع سؤال (المواطن الجميل ده) لا يمكن أن يرد عليه مسؤول (أياً كان) كما لا يمكن أن يرد عليه أي من نواب البرلمان الذين (صفقوا) من قبل عند زيادة أسعار (السكر والوقود) ! بالمناسبة من باب التغيير وكده المرة الجاية عاوزين نواب (يزغردوا)!

سنة حلوة يا جميل.. سنة حلوة يا مواطن.. فالموازنة العامة (أم تجنيب) يا مواطن تُشير إلى أن معدلات (النمو الاقتصادي) في ازدياد.. ليس بالضرورة أن يظهر لك ذلك على تفاصيل حياتك المعيشية.. وإن كنت تظن أنّ مُعدّلات النمو الاقتصادي من الضرورة أن تظهر على مستوى حياتك المعيشية فأنت لا محالة جاهل (وعاوز ليك درس عصر) ولا تفقه في قوانين الاقتصاد. فمعدلات النمو الاقتصادي (يا جميل) حسب قوانين (مندل) لا تظهر إلاّ بعد الجيل السادس على أقل تقدير، ومسألة إنو المسؤولين ديل (يوروك) ازدياد معدلات النمو المسألة دي الغرض منها إنك تكون في الصورة وتطمئن على إنو المسألة (ماشة كويس) وإنو (حفيدك) السادس عشر سوف تظهر عليه علامات الثراء (غير المفاجئ) إذا أمد الله في أيامك و(قرونك).

سنة حلوة يا جميل.. فقد فاقت المصروفات (كالعادة) إجمالي الإيرادات مما جعل هنالك عجزاً مليارياً سوف تقوم الحكومة (يا عيني) بسد هذا العجز.. طبعاً شئ استدانة وشئ قروض وشئ شنو ما عارف وأنت يا (جميل) قاعد متهني ومستريح ولا عليك والحكومة مشلهتة تستدين من هنا وتخش في (صناديق) من هناك وتتعب تعب السنين وترهق روحاً علشان تسد عجزك وعجز اللي خلفوك !!

سنة حلوة يا جميل.. فقد ركّزت الميزانية (كعادتها) في الصرف على الأمن والدفاع (بالنظر) على حساب الصحة والتعليم.. تعليم بتاع ايه؟ وصحة بتاعة ايه؟ أفرض إنك بقيت (عالم ذرات) وصحتك ذي (الحصان) شنو يعني لو ما كُنتَ (آمن)؟ ما لازم (أمنا الحكومة) تضمن ليك وتضمن (ليها) استتباب الأمن وتوفر ليك (آليات) الدفاع عنك يا جميل ضد أي (غزو خارجي) حتى لو يتطلب منا (أسبوعين) لمعرفة إن كان (بالطيارات) الطافية لمبة وللاّ (بالصواريخ) ماركة (أبو لمعة)!

سنة حلوة يا جميل.. فقد ضمنت لك الموازنة الجديدة بأن راتبك سوف ينفذ من يوم خمسة في الشهر بعد أن جاء فيها عدم وجود أية زيادة في مرتبات العاملين بالمؤسسات الحكومية.. يعني كل يوم الأسعار زائدة (وربع البصل حصل 30 ألفا) ومرتبك في (محلو).. نصيحتي ليكا (أربط الحزام).. معليش مفيش حتة يربطوهو فيها بس (إنتا أربط)!

سنة حلوة يا جميل.. والميزانية لا توجد فيها فرص (وظيفية).. معليش (أمنا الحكومة) عملت ليها ستمية ألف جامعة لكن (ما ختت بالا) من حكاية (التوظيف دي).. احتمال كانت مفتكرة المسألة (تثقيف) ساااكت.. معليش يا (جميل) صَرَفتَ دم قلبك في تعليم الأولاد و(بِعتَ) الوراك والقدامك لحدت ما اتخرجوا لكن ما مشكلة اشتري لكل واحد منهم (درداقة) وخليهو يخش السوق.. وللاّ أقول ليك بلاش عشان مافي ليهم طريقة.. (المحليات استولت على الدرداقات وكده)!

سنة حلوة يا جميل.. عموماً يا (جميل).. خليك متفائل.. أمنا الحكومة دي عارفة ربنا كويس.. وما بتعمل إلاّ بما يمليه عليها ضميرها، والناس العملوا الميزانية دي أكيد عارفين أكتر مني ومنك انو المسألة دي ح تصب في النهاية في مسألة ازدياد (معدلات النمو) والتي سوف (تصب) في النهاية في مصلحتك ومصلحة أحفاد أهل الخلفوك يا جميل !!

يا جميل حقو تحمد الله وتبوس إيدك وش وضهر علشان (حكومتك) حكومة (إسلامية) وبتعمل بما يرضي الله ورسوله.. هسه لو كانت (حاجة تانية) كان موقفك يكون شنووووووو؟ ياخ استهدي بالله وخليك متفائل.. وسنة حلوة يا جميل !!

كسرة:

لا بصحيح.. أموال التجنيب دي بره (الميزانية) وللاّ جوه (البنوك)؟

كسرة ثابتة:

أخبار ملف خط هيثرو العند النائب العام شنــ(12+1)ــــو؟