( راس السنــــة ) قصيـــدة لهاشـم صديــق

راس السّنه
شعر: هاشم صديق

راس السنه
زي كل عام
حتِلم عقاربك يا زمان
ونقول حروف نفس الأماني
وتجري في لسانّا التهاني
زي كلُ عام
نفس الكلام .
..............
دقت طبول السّاعة
وانسدل الضلام
فرقع صَدَى القُبَل
المرنّحَه بالنبيذ
واتمنو زي كل السنين
للدنيا والأرض السلام
وبراي بكيت
يا بسَات شفايفي
من الأسى
ومصلوب قليبي
من الصيَام
وفي صحّة العام الجديد
شربت كاسين من وَهَم
وهربت من نَقَحِي الجروح
بي خاطري
لي وسط الزحام.
..............
راس السنه
أشتل على الحَجَر الوَرِد
واخدع أناملك يا بَرِد
بي غُنية عن ريداً بِجي
واسرح مع العام الجديد
مستني للخِضر النبي.
يَبكي الأسف
من وهمي ويرتج الجدار
ويمشي الملح بي دَمعي
للزمن البوار
وأهبط من الزمن الجميل
متدلي في بير الغُبار
واعزف على الوتر الجريح
شجن المعَارف
ووحّة الريح في المدار
...............
راس السنه
ويبدا الزمن نفس الزمن
زايف لـَزِج
يعتِب جواد الرِحله
في شوك الصخور
ويتهدّ حيل عصب السرِج
واسمع صدى العام القديم
مترامي في الزمن الجديد:
- الحب مجرح بالكذب
نهر الصدِق جف ونِضِب
عِشْق السَلام شجن الحرِب
الحق كَسَف
مات الشَرَف
والسيف رجف
..........
آخر السنة
ضاعت حروف كلمة فَرِض
وغابت شِمس معنى العَرِض
لو يغسل الدمع الأرِض
لو يغسل الدمع الأرِض.

دقت طبول السّاعة
وانسدل الضلام
فرقع صَدَى القُبَل
المرنّحَه بالنبيذ
واتمنو زي كل السنين
للدنيا والأرض السلام

Quote: .......... آخر السنة ضاعت حروف كلمة فَرِض وغابت شِمس معنى العَرِض لو يغسل الدمع الأرِض لو يغسل الدمع الأرِض.

يسلم شاعرنا هاشم صديق

ود قباني - كل عام وانت وعولك بالف خير

مولانا شيقوق ...

الله يجعل ايامك كلها فرح و سعادة ...

كل عام و انت ومن حواليك كلهم تمام ...

له من التحايا اجزلها