الفنجري ابو جيبين (قصة من الريف)

هناك في احدي حلال وادي الملك شخص عوض، لا احد يعرف من اين جاء عوض، بعضهم قال ان عوض اتي مع السيل وهو ممسكا عود شجرة اراك،وبعضهم قال ان ناس حاج الصديق واولاده (نكتوهوه) من حفره اثناء التنقيب عن العطرون قريبا من العوينات ووادي النخيل، واشار البعض بانه جاء مارق مع الدلو وهو لابس قرقاب وحجاب مربوط في ضراعو يده اليمين.

كان لعوض القاب كثيرة، اشهرها الفنجري، والحق لذلك اللقب اضافة من متعلقات سديريته والعراقي لقب الفنجري ابو جيبين.

يقال ان الفنجري كان كمساري لحاج الصديق وصار سواقا للوري السفنجة وبعدها للوري التيمس، وقبل ذلك كان كمسنجي وحداد ولاعب ضالة وتاجر بنقو

يقول عبدالرحيم; ان الفنجري اشهر لاعب ضالة في نواحي وادي الملك، وكانت خنافر يدينو مزلطات من اثر (البحت) في حفر الضالة

راه مرة حاج الشريف وهو يلعب بعيدان الضالة مثل قرد الطلح وسمعه (يقنت) ويقول لعباس خصمه في اللعبة؛ اطعنو . . . اطعنو . ، . اطعنو في دبرو هنا، وابتسم حاج الشريف حتي بانت سنونو الصفر، كان الحاج يكره عباس ويسمية بحرامي النعيز.

كان عباس يسرق المعيز والتيوس وحداد الحلة ويشرب بيها المريسة.

لعبة الضالة تعلم الناس الكسل وتجلب الكثير من المشاكل بين المتخاصمين كما يقول الفقير اسحاق.

يقول حميدان الظرماتي وهو يغرز (المخرز) داخل شق نعال حاج الصديق: ان الفنجري هو اول من ادخل البنقو في فرقان وحلال وادي الملك ويردف قائلا: الله اكبر عليهو سبع مرات ويبصق في اتجاه شماله محاولا ضبط كتلة التمباك المبتله داخل فمه.

كان الفنجري ينتعل حذاء يسميه الناس تموت تخلي، وهذا (التموت تخليهو) من اكثر الاحذية ملائمة لتلك البيئة القاسية ويقوم حميدان بصناعة تلك الانواع من الاحذية وهو يتكون من سيور اللستك الجواني لعجلات العربات مع القليل من مسامير (النقله)، وتتطلب صناعته القليل من المهاره والكثير من القوة والحرفنه ويحذر حميدان الظرماتي قائلا: اثناء القطع ممكن تف تقطع اصبعك.

وللفنجري مركوب مصنوع من جلد البقر وله ارضية مصنوعة من (الربل) وكان دائما ما يرتدي المركوب مع السديرية وعراقي الساكوبيس والسروال ابو تكه والطاقية الحمراء يوم التلاتاء يوم السوق الاسبوعي القريب من منطقة ابوقسي. وكان دائما ما يتفشخر قدام ستات المريسة وبائعات اللبن والكمسنجية ودكان حاج الصديق ان تلك النعال المصنوع وطياتها من الربل لا تحتاج الي اي (رقعة) من اي ظرماتي.

يقول عباس ان الفنجري بيغلبو في الضالة لانو بيلعبو معاه شواطين وان الفنجري بيلعب الضاله وهو (نجس) ويقول ان الفنجري تغيان علي الفاضي، ويصفه بان للفنجري (جلحات) ممتده الي عنقرتو.

لم يري اي انسان من سكان قري وحلال وادي الملك ان الفنجري ابوجيبين يصلي او يدعو الي الفضيلة، واتهمته حلوم بائعة اللبن بسرقة (كربو) الجداد المعلق في صفحة لوري التيمس الذي يقوده، وشهد عبدالجليل ابوعاشه علي تلك الجريمة وقال ان الفنجري اثناء قيادته التيمس دقش بيهم القوز وغرست لساتك العربية في رمال القوز وصاح بالركاب ان ينزلوا ويرمو (الصاج) واثناء الركوب راي عبدالجليل ان الفنجري اخرج سكينو من ضراعو وقام بقطع (كربو) الجداد وراي رجلا يركب حمار اخذ الكربو واندس بين رمال القوز، وفي عصر ذلك اليوم راي عبدالجليل ذلك الرجل مع الفنجري في بيت الانداية وهو ( يغمت) ليهو حاجة في يدو.

اثناء الانتخابات راي حاج الصديق رجل يسال من الفنجري، كان ذلك الرجل يلبس لبسة (اشتراكية) وعندو (دقن).

اختفي الفنجري من القرية فترة من الوقت وراه عزالدين في البندر مع الرجل ابودقن، وعند صلاة المغرب جاء الصديق ليخبر الجميع ان اسبيرات التيمس وعمرة المكنة في دكانه في السوق قد تمت سرقتها وانه يتهم الفنجري ومعه الرجل ابو دقن بسرقتها. قال الفقير اسحاق وهو يرفع السبحة من (التبروقة) انه راي في منامه رجال يحملون شنط (تمكنا) يطاردون ستات الشاي علي نواحي ابوقسي ويطالبون بالاتاوة ومعهم الفنجري، تحوقل الجميع وتحسبنو، صاح حميدان وهو يؤمي بسبحة اللالوب قائلا: الزويل ده من ما جا مارق مع الدلو انا عرفتو بملا الدنيا فقر.
واردف عبدالمعروف متسائلا، اتو اناس الزول ابو جلحات ده ماكو عارفينو ما عندو امان، اتا ياحاج الصديق كريت الكفوة من عرقوبا وجبتها لصرة الحلة.

الي حين ميسرة
قبل الارشفة

شكرا الاديب الجميل استاذنا السنوسي بدر
هل تعلم بان اسم الفنجري يطلق في الرّيف علي الكرماء والحكماء والطيبين فقط او سمحين النَّافلة وشخصي الضعيف جال في بوادي الغرب من
وادي الملك الي حدود السودان وليبييا وتشاد معلما رحلت مع الظاعنين لم اجد شخصا يسمي الفنجري بهذه الصفات التي ذكرتها
ربيعي الفنجري الفارقتو عيل بي الزيني
أوكت جابو خبرو النَّوم غرز من عيني
قرارة العبوس عندك طبيعةً شيني
شلتي الرَّاجل البفدوهو بي زوليني
حتي نجد في الرّيف اذا مدحنا احدا نقول (فلان دي فنجري بلحيل)
واحيانا نجد بعض البدو يسمون جمالهم (المؤصّلة) بالفنجري
وكذلك اسم ابو جيبين يطلق علي الكرماء فقط او الذي يعطي بيمينه ولم تعلم شماله و في كل بادية الكبابيش لم يطلق الا علي ثلاثة رجال فقط وهم ملء هذه الكلمة
اولهم الناظر الراحل الشيخ التوم علي التوم 1938--------1946 وقد كان مشهور بكرمه وكل الكبابيش في وقت الدَّرت وفي ميقات إتجاه قوافلهم (السَّافورة) الي الجنوب لجلب الذُرة (عيش الدُّخن) يعرجون علي فرقانه لإستلام الريالات المجيدية لشراء الذرة
اري إنّك لم تتوفق في إختيار الأسماء للقصة لأن الأسمين (الفنجري وابو جيبين) مقدسان في البادية والريف
لك محبتي

عزيزنا الحبيب عبيد الطيب سلام ومحبة.

فعلا كلامك صحيح ان الفنجري لقب يطلق للناس المقامهم عالي، ولا يستحقونه مثل ناس عوض، ودي واحدة من مفارقات القصة اعلاه، طبعا لا يفوتك عليك السرد التاريخي للقصة وطبيعة بروز الاسم، المفارقات هنا تبدو جلية بحيث ان يصبح اللقب المناسب للشخص غير المناسب، مثل يا شيخ فلان ويا شيخ علان او الاسم ذات نفسو زي نافع وهو غير نافع.





القصة طويله ياريت نلقي وكت نكتبها، هي موجودة في الذاكرة، وبنكتبها من غير تحسينات لغوية،







بعدين يالطيب اخوي، لقب اديب ده ما كتير علي، كدي بتخليني احس ب(التغا) وان تغيت ما خايله علي باقي ناحنا اولاد رواعية وعقاب تربالة.




دمت بخير

اختفاء الفنجري اثار كثير من الدهشة وسط حلال وقري وادي الملك، ولكن القريبين من الفنجري يعرفون ان الرجل حتما سيظهر يوما ما، عباس حرامي النعيز اكتر المترقبين الي عودة الرجل.

عباس كان يضمر شرا مستطيرا للفنجري ويقول الناس ان الفنجري طعنو (بالبربندي) في سوق التلاتاء عندما كذبه في احدي تجلياته وهو يقول انه سافر مصر ولقي النسوان ببولن واقفات!! ودخل معه في نقاش حاد عند اعتراضة ان المراة لا يمكن تبول واقفة وذهب الي ابعد من ذلك حيث اتهم الرجل بالخرط والنجر وانه لم يذهب الي مصر كلو كلو وان بعرفو من ما سلوه من النقره.

سمعت حلوم ان الرجال البيطاردو النساء ستات الشاي هم تنظيم سياسي وهم الذين خططوا لسرقة دكان حاج الطيب وكسر مخزن عبدالسيد، وامم عزالدين قائلا بان رجل عنده دقن ويلبس لبسه اشتراكية عرض عليه (كيله) و(ملوة) للبيع ولكنه رفض الشراء بحجة انهن يكونن مسروقات واستدل علي ذلك با(الوسم) المحكوك.

اخرج حميدان (حقة) التنمباك من جيبه وارجع السبحة التي علقت باصبعه الصغير وتحدث الي ولد حاج الصديق قائلا: الزول اب راس لسه ما ظهر اومأ الزين براسه وهز كتفيه بالنفي، دنكل الظرماتي حميدان السفه وجبد شلوفته التحتانية بكف يده ممسكا الدردمة بين اصبعية وناول الجنا نعال ابيه بيده الاخري.

حميدان الظرماتي رجل مسكين له عراقي واحد وسروال وطاقية وعمة صغيرة متسخة يلبسها اثناء السوق وعند الذهاب الي المجاملات في الافراح وكان لا يغيب عن اي مجاملة في تلك النواحي يدفع في (الكشف) ويصر ان لا يظهر اسمه ويضطر عثمان ولد حاج الصديق ان يقيد اسمه تحت مسمي فاعل خير.

شاهد بعض الناس الفنجري في البندر ويقول بعضهم انهم شاهدوه ومعه الرجل ابودقن يمسكون خراطيش المياه السوداء ويضربون بعض الصبية في شارع المدارس بحي الثورة وقال اخر انه شاهده وهو يركب بوكس بدون نمر ومعه بعض الرجال ونساء مسترجلات يقتحمون ميز الطلاب بشمبات. وعندم ساله عبدالمنعم عند مقابلته في السوق العربي الخرطوم القريب من ميدان جاكسون، نكر التهمة الموجه اليه وقال انه لا يعرف اي رجل عنده دقن ولما ساله عن الشنطة التي يحملها تنحنح الرجل وتململ وانصرف بحجة انه مستعجل، يقول الناس ان عبدالمنعم لم يرجع الي وادي الملك منذ تلك المقابله، ويقول الفقير اسحاق انه راي في المنام رجال يلبسون نظارات ويضربون عبد المنعم وراي ايضا (شاهد) قبر مجدوع في مقابر احمد شرفي يحمل اسم عبدالمنعم وعبارة البقاء لله وحده وعبارة الامريكان ليكم تدربنا.

الي حين ميسرة

متابعين يا دكتور ..

السنوسي بدر

انا حاجز لووووووج في البوست الطاعم دا
وتاني حاجة جاي اسلم عليك
وثالث حاجة جاي اقول ليك ياخ غشامتك الامبارح ديك
مع صاحبي احمد ابن عوف ما عجبتني منك والله
احمد ابن عوف دا زول محترم وعفيف اللسان ... والله صحي
فشنو بطل غشامة ياخ

احترامي وودي الذي تعلم

عزيزنا وحبيبنا ود البشاري، الرجل الذي علمنا الكمبيوتر وجخانينو ، تحايا وبركة.

البوست قالو بطعيموه الحبان المتداخلين، هاكم رسن البوسن قودوه وبركوه في النقعة، ونحنا نبرك جمبو، ونتسامر،



اخونا ابنعوف مافي شك انو رجل ليهو مقامو، والمزاح في خسم البوست داك ما فارق الكي بورد وصقعة اصابعينا، ومننا لود ابنعوف اعتذار ومعاها بوسة راس لو حس باي شئ ما ياهو.




الغشامة يا ولد ابوي ما بتتخلي رضعونا ليها مع لبن البل الا بنحاول (نأطرها) عشان تتوافق مع اسس البلوماسية وحقوق الانسان شايف كيف!!!

Quote: قال الفقير اسحاق وهو يرفع السبحة من (التبروقة) انه راي في منامه رجال يحملون شنط (تمكنا) يطاردون ستات الشاي علي نواحي ابوقسي ويطالبون بالاتاوة ومعهم الفنجري،

السنوسي يا حبيب سلام
ياخ روعه المزهجني الشغل الجميل وقت اتقطع بشحتف الروح
مدرسة بجد نقعد في الواطه نتعلم
شكرا ليك يا حبيب

حبيبنا واخونا دكتور المشرف، تحايا ومحبة، مبروكين نحنا ياخي بطلتك البهية، وعجبني ياخي نجاحك، وعرفت انك في قطر وبصدد تعريفك باخ عزيز علينا عملنا سويا وهو بروفيسور من ماليزيا وهو عميد شئون الابحاث والدراسات العليا بكلية الصيدلة وهو رجل خلوق عملت نائبا له في احدي جامعات دولة عربية، يمكن تتعاون معاه اذا لديك الرغبة في مؤتمرات وابحاث.

حبيبنا وعزنا عباس ود ابونا اشريف الدسيس، الوجية اللي بخت البسمة في شفاة اصحاب الاسافير، من خلال قصصه الواقعية.


تعرف يا عباس قالوا الشيوخ بتلدا زنوبا، فدحين يا عباس انا واتا ده ذنوب الاشراف ديل ههههههههه.

اتا ده يا عباس يوم بتسبب لك في فصل زول من ناس المكاتب الحاضنين الكمبيوتر، يمين مرات في ناس تكون جوه مكاتبها تلقاها تضحك لامن دموعها (يجرن) من قصصك العجيبة ديك.


قيل عافية وارقد مطامن

Quote: حبيبنا وعزنا عباس ود ابونا اشريف الدسيس، الوجية اللي بخت البسمة في شفاة اصحاب الاسافير، من خلال قصصه الواقعية. تعرف يا عباس قالوا الشيوخ بتلدا زنوبا، فدحين يا عباس انا واتا ده ذنوب الاشراف ديل ههههههههه. اتا ده يا عباس يوم بتسبب لك في فصل زول من ناس المكاتب الحاضنين الكمبيوتر، يمين مرات في ناس تكون جوه مكاتبها تلقاها تضحك لامن دموعها (يجرن) من قصصك العجيبة ديك. قيل عافية وارقد مطامن

يا دكتور ما اخرب ليك المفترع الجميل وقت جات سيرة اهلنا ....
الله استر ما إنط لينا واحد من ناس الجهوية كما قال حبيبنا ابوالقاسم محمد
الشريف زين العابدين الله ارحمو جاء من ابرخم لي مدني ماشي الحج معاهو الحيران الناس في المجلس تتنوس جوه انا متوهط مع الحيران بره اسمع في القصص ومرات نمت مدحه واحد من الحيران شغال للشريف مدير مالي ،حسابات الزراعة الالية كلها عندو ومن المحبوبيبن الساعة مشت لي تسعة الوقت اتاخر وجبة العشا لسع بطنو قرصتو كل مره اسألني الاكل بجي متين اديتو اقتراح كان عندو قروش اجيب ليهو بلح من الدكان زولك نجيض رفض اديني القروش نطه لي فوق يلا نمشي سواء.
في الدكان الراجل طلع الجزلان بالله الطرادات بي جنبه والخمسينات بي اللفه والجنيهات في قعر الجزلان .
من كب البلح في جيبو انطلق قدامي تقول فاكنو بي نبلة عيني ليهو إقرقش وجدع في المصاص ... زعلته لما رقبتي اتنفخت ولا بلحه حقت المشوار ما إديني ليها.
رجعنا البيت الراجل ماسك اسرار واموال الشريف المبارة الكثيرة خلتو مفتح شوية في نظر بقية الحيران، واحد من الحيران قاعد جمب الباب اهبش في البلاط بي يدو :
سألو ها فلان انت الداهي ده بطوطو كيف ((يقصد البلط))؟؟؟؟
قالو ما بطوطو كان للغسيل بغسلو قبلو .
حدر لي بي طرف عينو قوم يا ود الشريف امشي بيتكم جوة جيب لي شاي ((قلته في سري داير اقرقش البلح وشرب في الشاي علي حسابي)) .
قلته ليهو بجيب ليك الشاي لو عرفته لي اللمبة الفي الحيطه دي بتنور كيف ((لمبة النايلون بتاعت الكهرباء)) ؟؟؟؟؟؟
زولك بالله تقول صبت فيهو مطره عامل لي فيها مخرمة ومقددة قال ما بطوطو بغسلو قبلو كرم كرم اقرش في البلح.
قدر ما إحاول ازوغ مني ارجع للسؤال...... خشينا في الرشاوي دخل يدو في جيبو ملاها بلح كبيتا في جيب جلابيتي تاني ارجع للسؤال واحد من الجماعه شافو مزنوق حاول افك الزنقه ....
ها فلان ما الداهية المشوحطه في الحيطة إن ختت حجارة البطارية بتكون زي الرتينه الا بكبو ليها الجاز بي وين مع رقته باقي لي الصندوق فيهو قدر المسنوده عليهو الشريف إن بقا مارق لي بره بطلع في يد الكرسي وبشوف ليك قد الجاز وين.....
الزول نفضه ليك جيبو كلو من البلح الجماعه قعدو اتغالطو ((بتولع بي كدي لا ما بتولع بي كدي)) الصوت ارتفع بدون ما نشعر .
الشريف كورك لي اخوي يا ولد اخوك العباس وينو ؟؟؟؟
قال ليهو قاعد مع الحيران بره.
لا اله الا الله واشهد ان محمد رسول الله الناس تكورك وتلعلع انا قلته المطموس ده بكون معاهم اصلو غير المصائب ما عندو حاجة ما اكون ساق فلان ده بره البيت لا حولة ولا قوة الا بالله.

يا دكتور اعفي لي شوفتا سيرة ذنوب الاشراف اهلك قلته اتحفك بي واحده ما اكون شوهته ليك المفترع الجميل بتاعك بخطرفاتي ...واصل ومتابعين

عند زواج ابنة الشيخ الصديق اجتمع خلق كثير، جاء وفد من غرب افريقيا يلبس زعيمهم جلابية مزركشه وطاقية تلتصق بها عيدان ومعهم نقاره، وعند النقعة اجتمع وفود من رجال الطرق الصوفية وهم يضربون النوبه ويتميلونو ومعهم حميدان الظرماتي، يقول الناس ان حميدان (غرق) وتيبست قدماه من الذكروفتحو خشمو بالسكين عشان يسقوهو الموية وهو يردد الله الله الله.في الميدان الغربي للفريق بالقرب من لوري وهناك اجتمع نفر مع عباس حرامي (النعيز) حول مجموعة من النسوة يدقن في (الدلوكه) وينشد علي ود اللبيح شعرا قائلا:

ألبل والبنات ما منهن توبات
ومقادير الزمان مامنهن حوبات
والببارى الهرف ﻻ‌بد من الوقعات
والبياكل طعيمات المشرك مات
واخلف ساقك فوق تيس الخﻼ‌ ابو دومات
وابعد من ساحة الفريق ونياق اليتيم ساهﻼ‌ت


وينظر اليه عباس بضيق ويبصق خلفة متخلصا من بقايا التمباك المتناثر حول لسانه ، عباس يعرف ود اللبيح رجل فارس وزعيم (همباته) سابق
في وسط الفريق تكونت دائرة ضخمه وتعالت صوت النسوة بالزغاريد والصياح وهن يمسكن بالبخور وفروع النخيل ومن وراٶهن العريس في حلته البهية ممسكا بسوط (عنجاوي) طويل صمم باحكام ويتخلل مقبضة سلك نحاس ملفوف بعناية وقطعة من الحرير الصافي و (رشرش) من جلد الغنم المضفور بعناية حول المكبسو ومن علي البعد اندفع رجل من الحلال المجاورة نحو العريس وهو يمتطي ظهر جمل عنافي ويصيح منشدا:
الفرح العميم غمر البلد ﻻ‌ حدودة
بي جية الزعيم ضي الليالي السودة
ودحماد ولدنا البرقع المقدودة
ﻻ‌ فاي للبضيق فارس خيول وبقودة
__________________

Quote: يا دكتور اعفي لي شوفتا سيرة ذنوب اﻻ‌شراف اهلك قلته اتحفك بي واحده ما اكون شوهته ليك المفترع الجميل بتاعك بخطرفاتي ...واصل ومتابعين

خد راحتك يالحبيب والبوست بوست عطرو زي ما انت داير،

اهلنا الاشراف يالحبيب قصصهم كتيرة وما تناثرهم في اصقاع الكون الا دليل محبة وعظم مكانة ومسئولية.كتير يا عباس مرات بحس بعظم المسئولية دي وبحس اني ما قادر اتحملها، وبهرب منها وادسا جوة الحاجات التانية. عارفك برضو حاسي بالحته دي

سلام يا د السنوسى بدر

شكرا لهذا السرد الرائع

واتمنى ان تتم ارشفته

تحياتى

يا سسسسسسسسسلاااام يا السنوسى ييييييياااااخ
وتانى يا سسسسسلام تانية مزمجرة بلهفة وشوق لمتابعة مدارات الفنجرى الضاجة بالدهشة عبر هذا السرد الممتع حد الاسكار بمريسة موغلة فى التخمير

ومتعة يعلم الله ويعلم ايضا شيخى شكر الله

--------------
الى بص الارشفة طوالى عليك الله ودى البوست ده
وخلينا نجلس القرفصاء تانى وتانى فى حضرة الفنجرى المسخوت معشوق الرياح

وسنتابع

عزيزنا وحبيبنا الخلوق محمد مهاجر، ياخي والله نحن الاسعد بطلتك البهية، تحايا ومحبة.




سننقل البوست للربع القادم، ولكن ظروف العمل وتواجدنا ربما تنتهي بانهاء مهلة اعياد الميلاد، وسنعود بعدها لحالة البيات والغياب القصرية عن هذا المنبر الذي يجمعنا بالحبان الزيكم بدواعي طبيعة العمل القاسية التي تاخذني الي مجاهيل افرقيا وغابات الامزون.



سعيد بحضورك هنا.

so interesting,
. i enjoy reading it.waiting for more.
thanks for sharing.

ياه ه ه ه الباش زاتو هنا، ياخي حبابك يا هندسه ياخي، تحيا قدر (المرك) يشيلوه اربعة من كمبو جبرونا ويجيبوه لعندك.


حبابك يا كيكي، جيب الثيودلايت ختو هنا واوزنو بنقطة الموية تحت. وخلينا نتابع معاك الفنجري ابو بعراية اقصد اب جيبين دا.

ومعاك نخشو هناك جوة خرتوية الحكاوي وننفض الغبار من اولئك (البعر) ونختهم في محلهم ياخ. الفنجري كل مؤهلاتو انو يبقي كوز خنافرينو المزلطات وحجابو الرابطو في ضراعو.


معا لتعرية البعر وما التصق بهم من اسماءنا السمحة.


خليك قريب وارقد مطامن

عزيزتنا واختي الصغيرة روزمين، هسي في زمتك انا لو بعرف انجليزي قدر ده كان جدعوني ناس معهد اللبحات في حجارافريقيا ونصايب الامزون.
سعيد بطلتك هنا، وفرحان بيها،

ومعاك وكل الاهل الهنا نتابع نصايب الريف هناك في تلك البكانات.

عند العصر في ذلك اليوم البهيج، تجمع خلق كثير، تقدم يعقوب وهو (ينتر) في الناس، تقدم الي داخل الحلقة وكشف ضهرو للعنجاوي وبرك في الارض ، ختف مسعود الصوت من منصور الجريبان وقشط يعقوب صرررر في (نايطو) اليمين وعقبو بالتاني والتالت وفر طارت قشره جلدو ولزما السروال المربوط ب(الحقو)، زغردت النساء وتجمعنا حول يعقوب وجات اختو الرقيقة ومسحت الجرح بالرماد المخلوط بعقاب العطرون المحروق.

وفجاة دخل الفنجري الدائرة وسط ذهول الجميع وتناول ود اللبيح سوط (القربعوية) من فضل المولي ورفع ضراعو لفوق حتي بانت السكين وايضا بان (المنقاش) المدروع في (جفير) السكين، ومحط الفنجري.

يقول بابكر ان الفنجري رجلينو برجفن لامن يهوب ناحيتو العنجاوي، ويردف قائلا ان الفجري عندو (الدهن) في نوايطو من اكل ناس البندر، ود البيح مغبون من سرقة عمرة المكنة حقت ناس حاج الصديق وكسرة الدكان، وطبقو للفنجري تلاتة سيطان متتالية وزقلو زي (جنا) العنز في الصقيعه، وتختراهو كاشحا التراب في وجه بقدوم المركوب، يقول فضل المولي ان رجال يلبسون لبسات اشتراكية عندهم دقون وتبدو عليهم اثار النعمة والسحسحة اتو مع الفنجري ، يرجفو وراي ايضا اثار (ليان) في بنطلون احدهم عندما راوا ود اللبيح بيمحط في الفنجري.

عند الصباح جاء رجال ال شجرة اللالوب ومعهم خرتوية ملانه (تنمباك) وجلسوا للعب الضاله، جمع عباس العيدان من الحفر وهم بتنظيفها من بقايا العجات المتناثر من جوانبها، عباس حريف ضالة وبيشرب المريسة وياكل احيانا (المشك) وهو عقاب المريسة بعد الصفاية، ويشتمه بعض الاعراب ان ذلك يجعله في مرتبة الحيونات، لان الحمير فقط من تاكل المشك.


عند الفريق تجشأ الفنجري بصوت عالي وسمعه البصير فضل المولي وعرف ان الرجل (مفهوق)، وعلاج الفهق هو القندال، ويعرف بان يرفع الرجل من اسفل الحنك، ويدخل جوز اصبعين الي سقف الحلق حتي يطرش احدهم و(يستريظ).

ههههههههههههههه الســـنوســـي بدر والله متعه ما بعدها متعة ياخ
والله العظيم كلماتك الموغلة في المحلية دي طولته ما سمعتها
لدرجة غلبني أقتبس شنو وأخلي شنو؟
وما دام المقام مقام حكي النحكي ليك هذه القصة دي وطبعاً ذكرتني ليها
كلمة (نايطو) دي

Quote: ختف مسعود الصوت من منصور الجريبان وقشط يعقوب صرررر في (نايطو)

قبل كم سنة كدا وقبل ما أجي السعودية دي كنا ننوي زيارة أحد الاصدقاء
لتقديم التهنئة بمناسبة ختان انجاله وأنت عارف طقوس الختان كيف
حنه وجرتق ونقارة وحكامات وما الى ذلك وولد الطهور يا زول ولد كلالي كبير
المهم مرقنا وركبنا باظ (بص) البيكاسو الطويل داك أنا ومعاي مجموعة من الاصدقاء
نصنا ركب في المقدمة والنص التاني ركب في الخلف وكنت ضمن الناس القدام
المهم وبعد ما ركبنا وتحرك البص لمحطتين كدا سمعنا ليك شمطه كبيرة خلاص في مؤخرة البص
في البداية ما اشتغلنا بيها لأنها كانت بين الكمساري وأحد الركاب بسبب التذاكر
والزول البشاكل في الكمساري دا كان بعيّر جنس (مُـعيار) وبصوت عالي
في اللحظة دي قلت لصاحبي القاعد جنبي : والله الزول البعيّر دا محل وين بقاري من غشامتو دي
أما في الجزء الأمامي من البص كان في واحد يتطاول ويتلحط يمين وشمال
عشان يشوف الشكلة التي في الخلف ويبدو أن أحد المتشاكلين قريب له
ولكن طبعا المسافة بعيدة وما بقدر يلحق صاحبو دا عشان يحمصو
المهم وقت اتضايق شديد قام كورك لصاحبو دا بصوت عالي جداً
يا محمد .. يا محمد ... الجنقاي اطعنو نايطو وما تخسّـــر خشمك معاهو
التذاكر (ديلاهنه) معاي هنا ... الله ولد البقس ههههههههههه
والله يا السنوسي وقت الزول دا كمّل كلامو أنا مته من الضحك وبعاين لصاحبي
وقلت ليهو : أنا ما قلت ليك ياخ!

متابعين الربع دا والربع الجاي كمان والبعدو كمان

السنوسي ازيك ياخ وفنجريك الكارثة !
مشتاقين والله

--
ممكن استغل الفنجري واسلم علي المشرف
وينك يا راجل


تحياتي لحاضريك في الخيط

يا سلام يا هيثم طه ياخ، يمن نفتش ليك زي ناس التنقيب، يا زول نحنا مشتاقين لك بالاكتر، ومشتاقين لكتاباتك الرصينة،

خليك قريب قبل الاة وارقد شواف

في المساء انسحب الفنجري يجر كيعانو الي النقعة القريبة من القنطور، وسمع بعض الرعيان ان الرجل ابو دقن يوسوس للفنجري اضانو، وكان يقول له جمل لم يفهمها الرعيان، وكان من ضمنها انهم اتو لتثبيت اركان المشروع الحضاري وانهم بصدد جمع اموال تحت مسمي دمغة الجريح، اندهش احد الرعاة وحلف بجملة الايمان ان الفنجري لسانو بقي (اغلف)، وفجأة وقع عظم او فك راس (تيس) و(قد) عين الرجل ابو دقن ، وجفل ناحية شجرة الكتر وارتطم بها وسقط تحتها وهو يصرخ باعلي صوته كانو ضاربو (جان). هرع الصبية الذين كانوا يلعبون لعبة (شليل وينو) ناحية مكان ارتطام العظم وهم يرددون شليل وينو اكلو الدودو،.

الجنا عثمان ود حاج فضل المولي (تغيان) ومابيلعب مع العيال ويذكر انهم في البندر بيلعبو ام (الصلص) ولعبه اسمها (كمبلت) والجوع كتلها.

طبعا يا امين والله ما بتصدق ياخي انا طولت طوله جد، لكن اردات دي ما بتتنسي وخصوصا اذا كنت تسكن في بيئة ناس ما بيتكلمو لغتنا ولهجتنا. بتكون محفوظه هناك، طبعا يا امين التعدد والتميز الثقافي وطريقة انسجامه في السودان لا يوجد لها مثيل، الله يجازي الذين يريدون ان يختونا كيمان كيمان ديل ياخ.

شكرا الاديب الجميل دكتورالسنوسي
متابعين الحكي الطَّاعم وما تنسي كمان قوات الباش بزوق الملت وادي الملك القالها فرقة في القصة اي والله ناس الهبو هبو لا ام ولا أبو وفصَّاص التنادل الداير يبقا نخل عيل يا عشاي زي ما قلت حرقتني اللَّسامي الخربوها والله ما خلولنا شئ سمح ولا صفحة نرقد عليها
لك محبتي ولضيوفك الجميلين

حبيبنا عبيد ود ابوي الطيب يا زول شن حالك ولعلك طيب والعقاب.


يا عبيد قلبت علينا المواجع من دخلت ام شينينه الانطلقت في الوادي، جردوا الرواعية من السعية، وهلكوا الضرع. اه اه اه يا عبيد اخوي.دي دايرالها بوست براها،




الكمبيور البكتبو بياكل الحروف و(بيحرن) زي الحمار المكادي، بياكلن زي اكل السخيل للامباز، فالسموحة ان الحروف اتجاوكت في بعضياتها.

Quote: التعدد والتميز الثقافي وطريقة انسجامه في السودان لا يوجد لها مثيل، الله يجازي الذين يريدون ان يختونا كيمان كيمان ديل ياخ.

سلآمات يا ود بدر.

يا زول علي اليمين إنت الفنجرة كملتها تب. عجبتني تفينتك دي
وحكيك الطاعم دا، واقولك، نضميك دا ست أنا فرزتو مع إني
ماني زول صعيد، زول سافل.

سو آ السنوسي أخوي سو، والله طربان
حد الطرب. يديك العافية...

الاخ السنوسى بدر
ابداع ادبى رائع
اتحفنا بالمزيد
وفى الانتظار

..................................................

عزيزنا وحبيبنا ود المدير، حبابك الف

زارتنا البركة، خش . . .خش يا ود المدير ادخل لجوة، وحباب ناس السافل

البل سفلت وعنت دار الريح
وجات بالعرضي وطلعت لمصر تصريح


حبابك الف والله

الاستاذ السنوسي
كتابة جزلة و عالية المقام ،السرد منساب و رقراق كجدول ماء
اعجبتني المزواجة الحلال بين العامية و الفصحي
كانت قراءة ممتعة
سأمر عليها من جديد لكتابة تعليق آخر
و نرجو منك الاستمرار فانت مبدع


طه جعفر

شكرا عصمت الشريف، شكرا طه جعفر





استاذنا طه جعفر سعيد بحضورك واعجابك لما نكتب رغم الحروف المجوبكة البياكل بعضها جهاز الكمبيوتر، وساكون اسعد عندما تخضع هذا النص الي القراء الفاحصة التي تتميز بها.

واتمني ان تزور هذا الرابط


دكــــــــتور خليل ابراهيم وحــكاية الفقير ابو بعرايه ...

معلم

انقل انقل .. للربع الجديد

العزيز وليد المبارك، ياخي تحياتنا ياشفت، هو في معلم اكتر منك ياخ.

انت المعلمة ذاتها،



تذكر ام الصلص وفلفلت وكمبلت والجوع كتلها، والجكو واللين، بتعرف تخت (كاوه) جمب اللين،



هههههه والله يا وليد انا ما عارف متذكر الحاجات دي كيف!!!!؟؟

كل عام والجميع بخير.


نفرح بان عمرنا ينقص عام.


الي حين ميسرة

حاج الصديق لم تعجبه زيارات الفنجري ومعاه الرجال اصحاب الدقون لان اand#1654;لئك الرجال كانو (ذائقي) الابصار، يقول الجنا ابراهيم انه راي الرجل ابودقن ينظر الي البنات (الواردات) من البير بنظرات غريبه وفيها نوع من (الجوع). تدث الحاج الصديق الي بعض الرجال عن كيفية تاديب هand#1654;لاء الرجال دون الاخلال بقيم اهل البلاد في معاملة الضيوف غير المرغوب فيهم

يقول الزين ود النظيف ان راي احد اand#1654;لئك الرجال (يتحكحك) في الصلاة ويدخل يده في في مناطق حساسه ثم يعاود و(ينكرش) مرة اخري واردف بان اولئك الرجال (مرضانين) وان الاand#1654;بئة التي تجتاح الارياف يكون سببها اولئك الرجال الذين يدعون ويقولون انهم اتوا لتثبيت اركان المشروع الحضاري.

يا سلااااااام يا دكتور
استمتعت حد الثماله لقصه الفقير ابو بعرايه وحينها كنت خارج الحوش ولم استطيع ان اعبر لك عن ذلك الاعجاب
كتاباتك الطاعمه تذكرنا بشيخنا الطيب صالح عليه من الله الرحمه والمغفره
ها انت ذا تنسج لنا اليوم قصه جديده من حلالنا وبوادينا
متابعين معاك بكل الحب
واصل بدون فواصل

مرحب بيك يا سامي وحبابك الف وسعيد شوفتك هنا وسعيد باعجابك للكتابات البنكتبها هنا وهي عبارة عن سكب اني بدون تعديل غالبها بيكون وليد لحظة طقطقت الكي بورد.

حبابك الف.



خارج النص

عندي اخوي الاصغر شبهك الخالق الناطق، لامن شفت الصورة قلت الزول ده جاء هنا متين

انه لفخر لى ان اشبه باحد الاشراف تحياتى لك وله يا دكتور
ومصنقرين فى واطاه حوش البكرى منتظرين قولك السمح

مرات الواحد عايز يشكر زول بس الكلمات بتخونو
يا دكترة سلام وشكر علي الجمال البتنشر فيهو دا
ايام معركة الكول حبيت اشكرك واعزمك عصيدة بملاح مرس
الا مالقينا فجة ليكم اهو جات الفرصة وقعدنا معاكم في درا واحد
ونقول شكرا يا دكتور ووفقك الله

العزيز الفاضل اخي عثمان الشريف مرحب بيك في الحوش الكبير، وحبابك الف


اخي الكريم لا احتاج للشكر في عمل اعتبره من مكونات ثقافتنا الغذائية، فالكول والكجيك والملوحة وملاح المرس والعصيده هي موروثات وثقافات انسانية رغم محاولات تنميطها والنيل منها، ودفاعي عنها وعن انسان الهامش هو حق طبيعي وتكريم لانسان تلكم المناطق.





عزومتك لملاح المرس ياخي عجل بيها انحنا ريقنا نشف وبطنا اتطوطوت من اكل اليابوسه والبطاطس المقلية.



لك التحية والمحبة الصادقة.

فووووووووق
عشان الفنجري ابو جبين ود الريف اكاااال الدمعة بالرغيف
شافكم غنجتوا بملاح المرس

هلا يا بشاري، وحبابك مع الفنجري الافنجري وما عندو حتي جيب زاتووو

يالبشاري ياخي ملاح المرس بالكسره الناشفة او القنغو حاجة ما ما تخلص

احكي ليك قصة بمكناسبة القنغو لو بتعرف القنغو

كان في عمك شايب في الخمسينات من عمرو وجلس يتدعي مابين العصر والمغرب وماسك سبحتو الكلام ده هتاك علي الضهاري فوق، اها عمنا ده اظنو داير ليهو شاي، وسمع ليك صوت كركبة في جوة الخيمة وصوت الحلل والبرام وصوت حاجة (بتنقي) في الغنقو الموجود في قعر البرمة بتاعة العصيدة، اها عمك بدا ينادي علي ام عيالو يا ام فلان؟ لكن ما في رد والشئ الجوة البيت ده يصن شوية عند سماع صوت المنادة وتاني يعاود في كد القنغو من البرمة وعمنا اتضايق جدا ومشي علي الخيمة وعند الباب لاقوة (التقل) الكان جوه وعمك افتكرو زول اسود وجا لزوجتو واشتبك ليك مع الشنمبازي في الباب ، صراع عنيف لحدي ما الغبار قام وعمك طلع سكينو وطعن التقل عدة طعنات بعدما التقل بدوره خربشو ليك خربشة جد وجرحو، الناس جات جارية بعد انقشع الغبار لقو النصيبة حيوان سالوا عمك ده شنو قال بحسبا امباي جا للمره





خلص،