سيف الجامعة يحي عموم البورداب ويعتذر

اخيرا عادت الروح الى وريقاتي وردت الي باسوردي لله درك يا بكري والشكر موصول الى الرائع بحر والسلام يتعداه الى عمر رجب والصديق الرائع الموصلي والشاعر الفذ الشقيق الكتيابي وصاحبة الحرف النابض سوما والمتوهجة تماضر وكل من لبى الدعوة الكريمة التي تبناها الاخ بحر وعلى الرغم من الهنات التي صاحبت الموضوع الا ان اول الغيث قطر وساخصص ساعة كل يوم للقاء الاحبة في البورد وتوقعوا مني مساهمات متصلةومتنوعة في شان الفن والثقافة في بلادي ومعكم دوما لنبني معا الغد المامول بكثير من العمل وقليل من الكلام الا فيما يفيد لقد سودنا الكثير من الصفحات بالحديث عن مشاكلنا فتعالوا نتحدث عن الحلول فلن يسامحنا اطفالنا ان تركنا لهم وطنا ممزقا لايتفق اهله على موضع شروق الشمس اخوتي ان صوتي ملك لكم انتم جموع الشعب السوداني على اختلاف سحناته اعراقه اديانه احزابه طوائفه قبائله فاعينوني ان اكون كذلك صوتا من اجل التوحد والتآخي بين شعوب وطننا القارة صوتا معبرا عن احلام الغبش في الحياة الكريمة العدالة المساواة هذه المبادئ القديمة فينا الراسخة صوتا للجمال المطلق في بلادي وضد القبح المطلق صوتا ضد الحرب ومع السلام ضد الظلم ايا كان مصدره مع العدل ايا كان محققه صوتا لايسعى لمنصب صوتا يشتري حبكم بدمه صوتا من اجل الحرية والديقراطية بايدي سودانية وليست صناعة امريكية صوتا ضد العزل السياسي وصوتا ضد التعالي على الماضي ومع استشراف المستقبل من اجل وطن يسع كل الناس
وطن حدادي مدادي وما بنبنيهو فرادي ولا بالضجة في الرادي ولا الخطب الحماسية لك التحية مني محجوب شريف
اخوتي لكم حبي وسامحوني في طولة الغيبة عليكم
ابو اشرقت

يا دفعة يا صديق يا مناضل يا صنديد
بك نرفع هاماتنا وننحنى لك، فانت انت لم تتغير ولم تتبدل..
تعيش التــوحــد الكــامل مذ عرفتك على مدرجات قاعة مندور المهدى ونحن صبية غر الميامين...
تلك ايام يا صديقى جميلة.. ومشى كل فى طريقه، وتشرد من تشرد ومات كمدا من مات...
والتقينا على ميلاد وفى حضرة اشـــرقت وشاركنا فيصل محمد صالح الحبيب افراحه.. وراح كل منا حال سبيله، ممنيا النفس بوطن حر يلم شملنا مرة اخرى... ولكن...
..التقينا فى هذا الظل الوارف وانا فى غاية السعادة لوجودك المبهــر معنا.. والف الف مرحى يا ابا اشـــرقت..

اخوك
عبدالالــه زمـــراوى

صديقي زمراوي شكرا لحضورك الوفي في هذا الثلث الاخير من ليل المملكة وهكذا نحن وتلك هي ايامنا نتلاقى كالرمال الآسيوية كاناشيد الجيوش المغربية لك الحب حاضرا وغايبا جيلي عبد الرحمن نتمنى ان نلتقى في الوطن المالك زمام امره واحي عبرك صديقي فيصل محمد صالح وزملاءه القدامى والجدد في صحيفة الخرطوم واخبار العرب حيث استقر به المقام وحيوا معي الصغيرة اشرقت وهي تستقبل عامها الخامس في الشتات لك حبي زمراوي وحتما نعود

ابواشرقت

اهلا بى سيف الغنا المسلول ،

سيف

اهلا بيك صديق واخ لى لم تلده امى


وبيننا حسن الظن والذكرى الطيبة العبقة والايام الشوارد،


اهلا،
وبس حكاية اخصص ساعة للبورد دى بالغت فيها، فى زول بقدر يخصص ساعة واحدة بس للبورد، كدى خش لى جوة وبتشوف بى عيونك

فيك الرجا...ما بتخذلنا

مراحب

ياصديقة كل زول يا وفية وياندية لك السلام بعدد الغمام سلامي بعد تحنيني وعدد حبات الرمل في بلادي واي صوت راجيهو صوتك واي شريانك وريدي الزمن قاسي الملامح وانت نوارة قصيدي احييك واحيي من لمانا واحتضنا ذلك الولد النيل وعاشت سمية خالد والحفلة الفي شكلهتم وعاشت الحارة السادسة حرة مستقلة برغم اتساع الثورات وتعددها قد قرات ايضا اسمي عواطف وبكيت وصدقت حين قلت ان ساعة ليست كافية لتصفح هذا المنتدى العظيم والتواصل مع كل الناس احييك في الوطن الافتراضي الفسيح وحبي (للوافرزدوت كوم) وبالله عليك ياتماضر اكتر زول متشائم كان بامكانه رسم هذا الشتات قبل حدوثه
وان عدتم عدنا
ابواشرقت

مليار سلام لسيف الجامعة
معا يدا واحدة من اجل سودان جديد ينعم بالحرية والديمقراطية والسلام

مليارين محبة لك ياسوداني وتعال معاي نشد كتف الغنا الميل ونتخيل ونحلم بالفطور في تركاكا والغداء في حلفاشكرا كثيرا
ابو اشرقت

اشرقت يا ابو اشرقت .. وضاءت الانوار كل ساحاتنا ..فهنيئا لنا باشراقتك واطلالتك ايها المبدع حد الارواء ..
الاخ الصديق سيف الانسان الفنان .. حين تكتب تطرب الكلمات وترقص الحروف وتتقلقل كلماتك لدواخلنا بمعانيها النبيلة .. وتسعدنا كسعادتنا حين نسمعك تشدو باعذب الالحان ..
التحية لك وانت تحمل فى دواخلك هموم الوطن ..التحية لك ومرحبا بعودتك ومبروووووووووك عليك والف حمد الله على سلامة الباسوورد
التحية عبرك للشاعر . الانسان كتيابى
ومرحب حبابكم

ما غنى اغنية الا واجادها
صوتك الدافئ الحنون لازمنا في الشتات فكان
يغذينا بالامل
وياتينا بالجميل المتفرد
دمت لمعجبيك ولاشرقت

قرجة لك التحية ياسليل الميامين لك حبي وتقديري وشكرا على الاشادة التي اتمنى ان استحقهاويعلم الله وحده كم اسعدني وجودي بينكم
ابو اشرقت

العزيزة سوما المعطاءة التي تفيض شاعرية من اين لي بكلمات تعبر عن اعزازي واعتزازي بك وانت تنتضين سيف الكلمة الصادقة المعبرة الخارجة من القلب والداخلةالى القلب بلا استئذان لقد ظفرت يا سوما بحب الجميع وتقديرهم في كل المنتديات التي ولجتها وان صوتك الشعري الذي يزينه عفاف الفتاة السودانية لابد سيحث اثرا مميزا في خارطة الوجدان السوداني وازف للاحباب البورداب خبرا مفاده انني بالفعل اعكف على تلحين بعض شعرك الرائع وليس من باب التشجيع او المجاملة وكنه احساس صادق بالمحتوي والجرس الموسيقي النابض الذي تحمله كلماتكك والى الامام اختي العزيزة وعمة اشرقت
ابو اشرقت

صدق ياكتيابي رديت على الناس كلهم ونسيت ارد عليك
المرة الجاية تعيش وتاخد غيرها طبعا اهلنا في بانقا المحطة والكتياب خارج هذه اللعبة الالكترونيةواريح ليهم تماما البعد عن موضوع العولمة ده اصلا خصوصا مع حكاية الاستنساخ اللي ماشة في العالم وموضوع الرائيليين ده لو مشى الكتياب حتقوم الحرب العالمية الثالثة من هناك فاحسن ليك ولي ماتجيب ليهم حكاية الماسنجردي لاهم ولا اهل العوض لانه المسعلة دي بتدخلنا في مشاكل نحن في غنا عنها يازول ونحنا ذاتنا راجعين هناك و انا مقرر اجدع الموبايل ده زاتو خصوصا عشان حكاية المسكولات دي والبنت اللميضة البتجي تقول ان رصيدك صفر ومافي داعي للفضايح اصلا اهلنا لو عرفوا انه رصيدي صفر المسالة دي حا ترضيهم؟
ابو اشرقت

الأخ الفنان الكبير سيف أبو أشرقت
طبعا أنا لاني دفعة ولا فنان ولا زميل ولا صديق
إلا أني من أهل العوض
نحب غناك ونستمتع به
طبعا حالفنا الحظ واستمعنا لك في أيام عيد الفطر وكانت عيديتنا وعيدية كل ما لم تكن له عيدية في ذلك العيد السعيد

أها ، بدور أسعلك ، ياخ دامك غنيت ذلك الغنا الجميل ، ليه سمحت لحسين خوجلي واللي معاه (مع احترامنا لهم جميعا) يشاركوك الغنا والمعروف أن لا تشابه بل هناك تنافر صوتي يسبب الصمم وعمى البصر والبصيرة بين صوتك وتلك الأصوات
سووا لينا وجع روح
نحييك ونسعد بوجودك

اهل العوض لكم الحب ويظل صوتكم صادقا وصادحا وواضحا والشكر بالآلاف لي يوم الوقاف والمسعلة التي اثرتوها ليس كل مايعرف يقال وخلو الطابق مستور لانه المسعلة دي بتزعل ناس الشرفة وعموم الحلاوين ودمتم
ابو اشرقت

عذبتا انتى كطفولتى

الفنان الانسان المثقفة سيف
كان انت زعلان انا ما بزعل وكان انت فرحان انا بيك اكتر
عزيزى مرحب بى قلمك المصادم والمثقف
وعمنا نخطو خطوة بى السودان






ما بين زمن متمنيهو وزمن ذادنى منك اسية

كيمو ايها العزيز لك حبي وشكري على تحية الرقيقة ومعا يدا بيد الى الامام مافي التوقف من سلام
ابو اشرقت

مرحب يا أبو السيوف
والله ما حتستمتع بالتبجيل الفارغ والكلام الملمع بقدما حتلقى شدة فى المناقشة لأنو الساحة الابداعية الغنائية ليها زمن فاضية والسبب أنت وجيلك .. وحنناقشك نقاش شديد بس خلى صبرك وافر .. انا كتبت الكلام دا لأنى شعرت بأنك رجل ممكن الناس تتحاور معاه بدون تكلف ؟ ولا أنا غلطان

نرحب بالأستاذ الكبير سيف الجامعة الذى أمتعنا حقا بسهرة رأس السنة فى التلفزيون السودانى ومرحبا بك فى المنبر الحر بين أهلك وأحبابك وعشيرتك

فحللت أهلا ونزلت سهلا

مراحب سيف
رحبنا اولاً ونرحب الآن وفي كل وقت
اسعدتنا طلت في تلفزيون السودان وهنا
وهنيئاً لنا ..

مراحب سيف
رحبنا اولاً ونرحب الآن وفي كل وقت
اسعدتنا طلت في تلفزيون السودان وهنا
وهنيئاً لنا ..

لعزيزة الجندرية اشكرك على ترحيبك الحار والمتكرر بي والذي يدل على صفاء نفسك وكرم ونبل معدنك وانا هنا من اجلكم جميعا
ابو اشرقت

شكرا سيدي الرئيس على ترحيبك الحار بي من زمن طويل وانا اتوق للتواصل مع اهلي وعشيرتي عبر منبر واسع للحوار المثمر وها قد وفرتم لي هذه الفرصة الثمينة وهذا شرف لي في المفام الاول ان التقي بهذا النفر الجميل من ابناء وبنات السودان الوطن الواحد ماقد كان وما سيكون
ابو اشرقت

الاخ ود العجمي لك حبي واحييك على صراحتك واحييك على غيرتك المشروعة على الوجدان ولا اعقي نفسي وزملائي من المسئولية في صدد ما آل اليه حال الساحة الفنية واخالك لو تابعت نشاطي الفني حسب المتاح لي من امكانيات ومنابر ستجد انني كتبت حول هذا الموضوع وساحيلك الى لقاءات صحفية اجريت معي وتحدثت فيها عن دور اتحاد الفنانين وانعدام التواصل بين الاجيال وتحدثت عن الاهتمام بالشباب الواعد وقد قمت باعطاء العديد من الاعمال لعدد من المطربين الشباب ولكن واضح تماما ان شركات الانتاج الفني تلعب دورا خطيرا في مسالة تدني الذوق الفني هذه بزعمها خطا ان الجمهور عاوز كدة والازمة يا صديقي ضخمة وتشترك فيها جهات عديدة والدولة ايضا تسهم كذلك بتضييق الفرص امام المبدعين الحقيقيين وتقليص نسبة البث الاذاعي والتلفزيوني بل وبمسح الكثير من المواد الفنية القيمة هل تعلم ان سيف الجامعة بعد 25عاما من الغناء لايوجد له اغنية واحدة مسجلة في تلفزيون السودان بشكل رسمي ماعدا طبل العز ضرب يالسرة قومي خلاص والتي تم الاستعانة في تسجيلها صوتا من الاذاعة ولا تظهر فيها صورتي والاغنية من اشعار سيد احمد الحردلو وتم تسجيلها للاذاعة عام 86والاغنية على جمالها ولكن هناك انتاج ضخم لسيف الجامعة خارج الاجهزة انا ملتزم تجاه جمهوري سنويا بعدد واحد كاسيت على الاقل ولكن ماذا افعل فيما هو خارج حدود سيطرتي وامكانياتي انا ابحث دوما عن النص الجيد الجديد والحته واغنيه في المنابر المتاحةوكذلك جربت الانتاج والتوزيع وهذا قدر الفنان السوداني في غياب المؤسسية والتخصص وتنظيم المهن الموسيقية وهذا واقع لابد ان تتضافر جهودنا جميعا من اجل تغييره ولك الحب فلنفتح كوة للامل
ابو اشرقت

مرحب بالسيف ونبدأ من أخر مرة شوفناك فيها مع حسين خوجلي. والله أنا لسه ما فاهم حاجة . البلمكم مع خوجلي شنو?!!

وبالمناسبة كانت اكر من رايعة

شكرا على تحيتك الرائعة والذي يجمعني بحسين خوجلي علاقة امدرمانية قديمةويجمعنا معه اهتمامه بالشعر والادب والفن وهو يحترم اختلافنا معه ولقدكان وفيا لصداقته معنا في كل سنوات المد والجذر وهو على فكرة يعترف باخطاء التجربةونحمد له هذا المسلك ونختلف معه في اطار الاحترام المتبادل ودمتم
ابو اشرقت

اخي سيف دخلت الي البورد كما يدخل صوتك الجميل الي القلوب
هاشا باشا كاريج نسمات الشمال
فمرحبا بك

الاخ الفنان و المبدع سيف الجامعة
مرحب بيك ونورت بيتك و مطرحك و الشكر للحبيب بحر

احبتي البورداب لكم الحب كله وحياة اشرقت ووالله العظيم لقد ابكيتموني بترحيبكم الحار بي فانتم لا تعلمون حجم العزلة التي تلف قلب الفنان في ليل الشتاء القارس لقد بدد حضوركم الفادح -استعير هذا التعبير عن نصفي الغائب عميري-احزاني فلم يبق منها شيءوارتايت ان ارد على ترحيبكم عبر الرائع بكرى صدقوني انا اكتب ودموعي تبلل الكيبورد امامي وسارد بالتفصيل على كل واحد منكم تباعا واعلموا انني بينكم ملكا مشاعا وعقلا مفتوحا للحوار الجاد البناء ومرحبا بنقدكم لتجربتي المتواضعةوليكن هذا مفتتح لقاءاتنا نقد التجربة والحديث عن سلبياتها وتاكدوا ان لا منطقة في حياتي الفنية غير قابلة للنقد ولتكن هذه محطتنا الاولى من اجل الارتقاء بما نقدم لشعبنا الذي يدفع لنا راتبنا اليومي حبا وكرامة
وشرف انتماء
احبكم جميعا
ابو اشرقت

استاذي واخي وحبيبي احييك وانت تجد وسط مشاغلك الكثيرة وقتا للتواصل تغمر فيه احبابك بدفئ مشاعرك اخي ابو هديل لك الحب حتى تكتفي وبنا الشوق ولوعة الفراق وبعد الشقة واتمن لو يختفي المحيط الاطلسي لاجيك سيرا على الاقدام
ابو اشرقت

الحبيب الوفي سيف بادن الله نتقابل
ومشتاقين كتير لشوفتك ويخلي ليك اشرقت ويخليك ليها ولينا وابقي عشره علي روحك

أيوة خليك كدة ـ وابقى عشرة علي باسووردك ( على طريقة أصدقاء الخيمة ) وعلى الريس بكري ورضا وود الجيلي أن يطرزوا هذه اللوحة من صوتك العجيب وألحانك المغردة ـ
مرحبا بك وما تنقطع بحجة المشاغل ـ إنت لسه يا دوب عندك واحدة ـ ماشايف أستاذالجيل الموصلي ـ متواصل كيف ؟ ـ رغم أعضاء الفرقة ـ الله يخليهم ـ أنا سعيد جدا بعودتك ـ عشان لما يكون موبايلك مغلق ( كالعادة ) يكون الماسنجر مفتوح ـ شفت
الزمن كيف ـ ناس من الكتياب وودبانقا يقولوا موبايل وماسنجر !!ـ
بالله هسه اهلنا لو سمعونا يقولو شنو ؟

الاستاذ
سيف لك الود
كما عطرت سماواتنا القاهرية بالنغم الحلو والمشاركات الدائمة فى كل ما هو وطنى
ها انت اليوم تعلن عودتك بقوة لاخذ مكانك الشاغر
لتواصل ابداعك من هنا ايضا مواصلة لرسالة الفنان الملتزم
مزيد من الابداع

لك الود والحب اجزله وشكرا على كل اللحظات السعيدة العزيزة التي جمعتنا وحتما نعود وغدا نعود
ابو اشرقت

استاذنا الرائع سيف الجامعة
على فكرة يااستاذ عجبنى ردك لما سئلت عن السودان الذى تحلم به
فكان ردك جميل ورائع ويدل على مدى روحك الجميلة
يديك العافية ياسيف

ــــــــــــــــــــــــ
أنا بلدى بلد الخير والطيبة

شكرا كثيرا يابدري واحي ذكاءك اللماح وانت تقرا بين السطور وفوقها وتحتها والوطن الذي احلم به يحلم به معي كل اهلي الطيبين الذين في بعض الاحيان يجهلون 99%من اسماء اعضاء الحكومة وهم الذين يحلمون بوطن يسع كل الناس وزولا تريدو وتشتهي ما يقلوا ليك ماتمشي لى لا في السجن لا مختفي ويا محمد احمد تطمئن
ابو اشرقت

تسلم يا سيف وتسلم مشاعرك النبيله يا اصيل
والله ضحكتنى يا استاذ كتيابى .على فكرة استاذ سيف ناوى يعمل فينا مقلب خلى بالك اهو انا كلمتك ههه
سلام يا بدرى ما كلمتك فراشتى ما بقت تطير زى فراشتك لوول
لكن والله لى هسه ما عارفة الطيرها لى منو ..كتر الف خيره غايتو ربنا يديه العافية ما فيش حد احسن من حد وكل سنة وانتو طيبين عذرا استاذ سيف على المداخلة دى مع الاخ بدرى
ولكم التحية

بسم الله
لا حوله؟؟؟؟؟
سيف؟؟؟؟؟؟؟؟؟؟؟؟
مبالغه؟؟؟؟؟؟؟؟؟؟؟؟؟؟؟؟؟
ما بصدق؟؟؟؟؟؟؟؟؟؟؟؟؟؟؟؟
المعادى؟؟؟؟؟؟؟؟؟؟؟؟؟
وين الدوحه؟؟؟
لا ابوظبى ؟؟؟؟؟؟؟؟؟؟؟
الشارقه؟؟؟؟؟؟؟؟؟؟؟؟؟
لا كضاب ؟ الله ؟؟؟
جد؟؟؟ ايوه ؟؟؟؟ظ
عليك الله سلم عليهو؟؟؟؟
وقول ليهو
انور ود بتول بغريك السلام
وقال ليك من ايام مصر
انا مصطرم ليك شديد؟؟؟؟؟
طبعا دى غير مصطرم الجعيلى....؟؟؟؟؟
ابدا اخوك انور الجلاد؟؟؟
عبد الرحمن

الولد الذي يحكي صوته عصافير الغابة الولد ذو الشحنة الابداعية الباهظة الثمن الولد المتمرد الخارج على النص الموسيقي في جمال مطلق انور الهمباتي سارق القلوب عليك الله ازيك انت وين ارجع
ابو اشرقت

اهلا بيك سيف الحامعة ولا زلت كما عهدناك بكامل الالق وبصوتك الشجي المتميز .ولا زلت عند وعدي لك باعطائي اثنين من الاعمال واحد سمعته والاخر ان شاء الله قريب مع كل الحب والتقدير المايسترو

العزيز المايسترو في انتظار اللحن الثاني على نار ولك التحية من قبل ومن بعد ويديك العافية
ابو اشرقت

يديك العافية ياسيف وشكرا ليك كتير

العزيزة سوما ليك الف تحية
والله بعد ماكنت عايز اسألك من فراشتك دى طارت بتين وكيف
تانى قلت اسكت واطلع لكن انا خايف الطير ليك فراشتك دا يقصقص جنحين فراشتى ياسوما لووووووووووووول

ــــــــــــــــــــ
أنا بلدى بلد الخير والطيبة

سلام يا بدرى فى دار سيف ..كيفكم يا جماعة
تعرف يا بدرى يا خوى ده اظنو الاستنساخ البقولوه ده. استنسخوا لى جنحين لى فراشتى من جنحين فراشتك لووووول ..عشان كده يا خوى ما تخاف على جنحين فراشتك ..ان شاء الله ديمة مرفرفه ..الكلام انا الاستنساخ ده ما اظنو يمشى لى قدام ..خايفة بكرة اجى القاها ركت بلا طيران لووول
يديك العافية

سوما وبدري ازيكم دي اظرف حاجة والله انتو الاتنين قاعدين في البيت عندي وبتناقشوا في موضوعات خاصة وانا ماناقش حاجة وبعمل ليكم في الشاي باللقيمات اولا الفراش يكون كيف فراش لو ماطار؟ نحن اولاد القرى نعرف الفرق تماما بين الفراش وابو الدقيق وانت ياسوما لانك شاعرة ماخدة مقلب والفراش العندك غالبا مايكون ابو الدقيق لان ابو الدقيق يطير ليلا فقط والفراش ينام ليلا ويطير في الصباح الباكر ويقيل مثله ومثل البشر ويطير مرة اخرى عند الاصيل حتى مغيب الشمس اما ابو الدقيق لانه عنده مشاكل نفسية خاصة بشكله ودايما مشوكش فحالات الانتحار مرتفعة جدا في صفوف هذه الفئة والله اعلم انتهت محاضرة اليوم عشان انت وبدري تاني ما تفتحوا مواضيع بدون ما ترجعوا لي خصوصا فيما يتعلق بالفراش او ابو الدقيق لاني انا المستشار القانوني بتاعهم
ابو اشرقت

سيف لووووووووووووووووووووووووووول
والله ما قادره ارد عليك هسه من الضحك ..لكن لنا عودة لووووووووووول

لووووووووووووووووول يااستاذ والله لكن الشاى جميل
اها ياسوما الطير ابو الدقيق بتاعك خلى يقلبو ليك فراش
لكن الغريبة ياسوما هو لما طيرها ليك طيرها ليك عكس اتجاه فراشتى
ياربى الحكمة شنو وبعدين بينى وبينك صاحب البيت دا ادانا الشاى واكرمنا بعد دا حيطردنا يااختى
لوووووووووووووووووووول

ـــــــــــــــــــــ
أنا بلدى بلد الخير والطيبة

عزيزنا وعزيز دنيا
الاستاذ سيف الجامعة
لا اله الا الله
استعير هذا التعبير من مبدعنا
يحى فضل الله
عارف الواحد من قبيل بقراء فى ردودك
اكتشفت انك فنان فى الكتابه امكن اكتر
من الغناء وحتشكل خطورة على ناس القلم
حمد لسالمتك وسالمت البسورد
ومرحب بيك فى دارك

الاستاذ سيف
حبابك عشرة إضافه حقيقية إلى هذا الموقع
وليك وحشة يا رجل

والله ايام يا يحيى وين انت هل في القاهرة ام شتت زي صديقنا يحيى فضل الله المشتت ولو عندك وسيلة اتصل بيحيى فضل الله قول ليهو سيف بسال عليك انت وخطاب
اب اشرقت

ششكرا ياعثمان على ترحيبك الحار بي وانا هنا من اجل التواصل مع كل احبابي واحس انني وسط عشيرتي وهلي ومن هو في مثل حظي بكل هذا الدفء الانساني الذي احسه بينكم انت تعلم ياعثمان ان اهل الطبشيرة قوم كتابون وسبعة صنايع والبخت ضايع والى الملتقى ابدا
ابو اشرقت

الاستاذ الجميل سيف الجامع
اذدانت جنبات المنبر بحضورك
واستحت كلمتنا من الق حروفك
يديك الصحه والعافيه

ابو السيوف انشاء الله تعجبك الصورة الجديدة

العزيز اخو البنات وعشا الضيفان بكري شكرا جزيلا على الصورة الجديدة اولا لانها بنت اليوم والصورة السابقة عمرها عشرةسنوات بالتمام والكمال وانا اردت ان يقف الناس على اثر الزمن علي ومزيد من التواصل الحميم ثانيا لانها سودانية بالجلابية والطاقية وبتدي احساس وجود الانسان براحته داخل بيتكم العامر لك حبي مع كل ماوس كليك
ابو اشرقت

الحمد لله يا ابو اشرقت الصورة عجبتك

العزيز خواض لك التقير والحب وشكرا على ترحيبك ويلا نتواصل
ابواشرقت

صباحك زين يا ابو اشرقت ان شاء الله وصلوك الجماعه وتاني اتصلت بي تلفونك ورن رنه لما فتر الا تكون ناسيهو في بكان وانت في بكان اخر رسلتهم من عنواني بتاع ياهو ان بقيتا ما وصلن قل لي عشاناحاول بالتاني

ابو الفعل أشرقت
كل سنة وإنت بخير وحمداً لله على السلامة والف مرحب ومنتظرين الكثير الكثير ووصية ليك
الآمدرمانية

ام درمان ماعادت شجرة الهجليج محطا للطيور الموسمية
فالخريف عنها لاينقطع وفي صدرها رحابة تتسع لاطفال ياتون
ينسفون المحكمة بقضاتها ويصدرون على الموت حكما بالاعدام
لك التحية يا امدرمانية يا اصيلة وكل سنة وانت طيبة وشكرا على حضورك الرائع
ابو الفعل اشرقت فعل مضارع مجزوم وممنوع من الصرف للعلمية والعجمة وتاء الفعل
ابو اشرقت

وصلت وفرحتني بجمالها
يديك العافية
ابو اشرقت

ألف أهلا ومرحبابالناسك في محراب الفن و المتعبد في صومعة الأبداع بذلك الصوت الملائكي المعمد بالشوق و الحنين والذي لطالما أشجانا وأطربناوسرى بنامن أرض الغناء محلقا بنا في ملكوت الفن الجميل معرجا بنا الي عوالم الطرب الشفيف حيث لا حيث و عند لا عند.
جني

الحبيب jini
تقديري وكذلك حبي والفن هو حياتي ومن محبتكم خرج صادقا وصوتي جموع اصواتكم وزمان كان لي صديق يقول عني سيف ده فن عليهو شوية سيف لم اكن غي اكثر حالات اطمئناني على وصول رسالتي اليكم يامن احبكم ومن اجلكم اغني مثل هذه اللحظات التى اجد نفسى محاطا بحبكم وتجاوبكم واستعير كلمات صديقي هاشم صديق -من ياسي قايل الحب يجي ويلقاني يابس في الرصيف ميت مع الامل البموت
لكن خطاك زارن خطاي دقن وتر وادي السكوت
صدح الامل فيني وحيا وجلجل صباحك
في الشوارع والفيافي وفي البيوت
ابو اشرقت

مرحبتين حبابك الف وانت تفيض نغما وحبا لهذا الوطن
خالص الود وانت تزجى البورد وعدا وفعلا ولنكن جميعا
كتاب وفنانين ونقاد لدحر هذاالليل الذي طال

العزيز سيف ابو اشرقت
شفت كنت ظالم الناس ديل كيف ؟
....................

سيدي

اسمح لي ان استدرجك الي عناقي ..وارفع عقيرتي عاليا بهذه الاستغاثات لالتقف منك اطواقا للنجاة


اولا: ماذا فعل البلبل لكي يقوي علي العيش في صحراء لا غصن فيها ولا ماء

ثانيا : ما هي العبرة التي خلص اليها صقر الجديان في فترة عزوفه عن التحليق كما يجب لإمتلاء السماء بالبغاث

ثالثا : متي يتسني للزرزور العودة للتعشيش في سقفه المفضل و ممارسة هوايته في ايقاظ اطفال المدارس بلحن الصباح

رابعا : هل سمعت ما قاله الطاؤوس عندما استغرب المارة من احتفاظه بكبريائه رغم صيرورة ريشه الي لون واحد
...................

دمت سيدي
ولنا عودة
...
..
.

l

يامراحب بالفنان المناضل سيف الجامعه

احيك من علي البعد يافنان ياراقي كل غناويك احساس
ومعني والله ياحليل ايام القاهرة والجامعة العمالية
ودار حزب الامة والاتحادي , مع مؤدتي وتقديري

دقنه البجاوي

2

الباسوورد مالها
.....................

ما زلت في انتظار الاجوبة

ايها السائل عنا في مجالات الجمال
كلما جئناك كنا نجد المحبوب سال
يابحر===يابحر يايايايايا يابحر
مقطع من بواكير اغاني بعنوان هدأ البحر
لم اجد ردا يابحر عليك الا ان ابدا بهذا النص عرفاني لا يمكن التعبير عنه لان الكلمات تموت حين تقال ولكن دعني من الطاؤوس واتركني مع باقي الكائنات الاخرى لاني بعيد عن جمال الطاؤوس وخيلاه انا اقرب الى النواضع والبساطة وعلى اى انت فتحت بسخاء امامي نافذة للتواصل بددت وحدتي واذهبت الكثير من معاناتي وسامحني على التاخير ولك حبي
ابو اشرقت

والله كلام يادقنة البطل ياحليلك وحليل ايامك كلنا شوق لتلك الايام العامرة بالفعل في هذا الزمن الرمادي اين انت وكيف تسير الحياة راسلني انت وجميع احبابي على هذا الايميل[email protected]
ابو اشرقت

لاكين يازمراوي ولدك مهجج هجيج تاريخي واساسي جدا لك محبتي وعلى فكرة فيصل بسلم عليك
ابو اشرقت

رد عام لاحبابي و تنويه عن انتهاء هذه المادةالافتتاحية والتحول
الى بوست جديد بعنوان جديدبموضوع للمناقشة ذو اهمية قصوى ساقوم باصداره قريبا اشكركم جميعا على مااحطموني به من حب واخص بالشكر الاخ بحر والاخ عمر رجب والاستاذ الموصلى والاخ بكري ابو بكر والصديق عبد القادر الكتيابي لما بذلوه من جهد ليجعلوا من لقائي بكم ممكنا ولكم الشكر من قبل ومن بعد وختاما

حبايبي البورداب اهلا جوني
وانا ماقايل حلوين زي ديل بريدوني
ابو اشرقت

dear Seif
check your email
JINI

لاشكر على واجب يا ابواشرقت نحن فى الخدمة

dear Seif
check your email
JINI

استاذ سيف الجامعة
مع كل الود والاحترام اتسائل اى فيصل تعنى