Post: #1
Title: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-08-2011, 08:22 AM
Parent: #0
نقلا عن bbc
بحث علمي: جلود الضفادع قد تشفي من 70 مرضا من بينها السرطان
حصل فريق من العلماء في جامعة كوينز في بلفاست على جائزة عن بحث علمي كشف عن أن جلود الضفادع يمكن أن تكون علاجا لأكثر من 70 مرضا رئيسيا.
البروتين الذي يفرزه جلد الضفدع يمكن أن يمنع نمو الأوعية الدموية
|
Post: #2
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-08-2011, 08:24 AM
Parent: #1
وتلقى فريق الباحثين جائزتهم في حفل توزيع جوائز الابتكار الطبي في المستقبل في لندن يوم الاثنين الماضي ويعتبر هذا الفريق الوحيد من ايرلندا الشمالية الذي يحصل على جائزة.
وقد تمكن فريق البحث الذي يقوده البروفيسور كريس شو الباحث في بجامعة كوينز كلية الصيدلة من تحديد اثنين من البروتينات يمكن أن تنظم كيفية نمو الأوعية الدموية.
واكتشف العلماء أن بروتين أحد أنواع الضفادع ويسمى " ضفدع القرد الشمعي" يمكن أن يمنع نمو الأوعية الدموية ويمكن أن تستخدم لقتل الأورام السرطانية.
وقال البروفيسور شو إن معظم الأمراض السرطانية تنمو حتى حد معين ثم تحتاج إلى الأوعية الدموية التي تمدها بالأوكسجين مما يساعد على انتشار الورم.
وأوضح " منع الأوعية الدموية من النمو سيحد من انتشار الورم السرطاني ونموه وبالتالي القضاء عليه".
وأضاف "نجاح البحث سيحول السرطان من تصنيفه مرض عضال إلى مرض مزمن يمكن الشفاء منه".
كما اكتشف فريق العلماء أن الضفدع العملاق من نوع "فايربيليد" ينتج بروتينا يحفز نمو الأوعية الدموية ويمكن أن يساعد المرضى على التعافي من الإصابات والعمليات الجراحية بسرعة أكبر.
وقال البروفيسور شو " هذا البروتين قادر على علاج مجموعة من الأمراض وبعض الحالات التي تتطلب تعافي الأوعية الدموية بصورة سريعة، مثل التئام الجروح وزرع الأعضاء، والقرح الناتجة عن مرض السكري، والأضرار الناجمة عن السكتات الدماغية أو أمراض القلب".
وفقا للبروفيسور، فإن العلماء وشركات الأدوية في مختلف أنحاء العالم، على الرغم من انفاقها ما بين 4 إلى 5 مليارات دولار على الأبحاث إلا أنهم لم يتوصلوا حتى الآن إلى دواء التي يمكن أن يتحكم ويراقب نمو الأوعية الدموية.
وأضاف شو "إن الهدف من عملنا في جامعة كوينز هو اطلاق طاقات الطبيعة وهناك مثل على ذلك وهو الافرازات التي تم العثور عليها من في جلود الضفادع لتخفيف معاناة البشر.
وقال أيضا " نحن مقتنعون تماما بأن الطبيعة تحمل حلولا لكثير من مشاكلنا الحقيقية ونحن بحاجة فقط لطرح الأسئلة الصحيحة للعثورعليها".
|
Post: #3
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-08-2011, 08:29 AM
Parent: #2
Quote:
جلود الضفادع قد تشفي من 70 مرضا من بينها السرطان!!
|
ما شاء الله.. هذا من الجلود فقط!!!!
ومال أكلها كووولها يكون ايش؟
شفت يا منجي كيف كان أخوك بيحبك قبل الاكتشاف ده!!
|
Post: #4
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-08-2011, 08:43 AM
Parent: #3
في ماليزيا, سنغافورة , اندونيسيا... تباع فريش في الآسواق!!
بعد التقرير العلمي ده.. حيكون في زيادة في الطلب والاسعار...
والناس يجونا من السودان بي شهية وجبة من الضفادع!!
|
Post: #5
Title: Re: جلود الضفادع قد تشفي من 70 مرضا من بينها السرطان!!
Author: هجو الأقرع
Date: 06-08-2011, 09:29 AM
Parent: #4
سلام من الاعماق يا صفوة ، تعرف كيلو اللحم السودانى فى الدوحة فوق ال30 ريال ، وبعيد عنك انت عارف مشاكل اللحمة الحمراء ، يعنى الواحد يضرب للجماعة فى السودان يرسلو لينا ( شرموط) ضفادع ، خاصة و اننا على اعتاب رمضان .
تانى ما فى زول يقول مثل نقيق الضفادع الصوت عالى و المصدر ######## و حقير .
لكن فتت القعوى بتكون كاربه ، مش كده .
تحياتى يا غالى.
عشان المصلحة الطبية لابد من ان تؤكل طازة .
|
Post: #6
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-08-2011, 12:47 PM
Quote: سلام من الاعماق يا صفوة ، تعرف كيلو اللحم السودانى فى الدوحة فوق ال30 ريال ، وبعيد عنك انت عارف مشاكل اللحمة الحمراء ، يعنى الواحد يضرب للجماعة فى السودان يرسلو لينا ( شرموط) ضفادع ، خاصة و اننا على اعتاب رمضان .
تانى ما فى زول يقول مثل نقيق الضفادع الصوت عالى و المصدر ######## و حقير .
لكن فتت القعوى بتكون كاربه ، مش كده .
تحياتى يا غالى.
عشان المصلحة الطبية لابد من ان تؤكل طازة . |
العزيز الصفوي/ هجو الاقرع
سلام
قبل ساعتين كنت بفكر في موضوع الضفادع خاصة وعندنا ميعة قريبة من بيتنا في الجزيرة أبا لم يجدوا لها ناجع من زمن الانجليز..
المياه تتجمع بسرعة والتصريف بطئ بطول الخريف والشتاء.. وهاك يا ناموس, قواقع, سمك وضفادع من الحجم العائلي.. من قبيل المغرب
تبدأ في عزف موسيقى شجية اعضاءها أكثر ألف عازف بمختلف الأعمار.. والغريب فيها تغطس في الطين أيام الجفاف لحين عودة الخريف..
وكبار القوم يعرف يحلل النوتات الموسيقية ويعرفوا اذا كان العزف لاستقبال المطر في نفس الليلة أم لا..
هذه ثروة عذبتنا عشرات السنين.. بكرة يجوا الجماعة يقولوا ليك ثروة قومية والحنك بتاع قلع الميعة التاريخية بضفادعها..
البرازيل من انتاج البن ستتهيأ لانتاج ملايين الضفادع بحوض الامازون, وبالتالي تكون الدولة الاولي في العالم..
لكن الجودة عندنا لأن ضفادعنا لها جلود متمرسة على الرطوبة والجفاف.. واللحم الصافي ممكن يصل لكليوجرام من كل ضفدعة..
وبعد شوية يكون عندنا شرموط ضفادع وكجيك ضفادع!! وملوحة ضفادع...
ياخوي هجو... قطر دي صغيرة كدا شوف لي معاها الامارات عشان انتاجنا بيكون بكميات تجارية.. خاصة ونحن بدينا نستقدم خبراء فرنسيين لرعاية هذه الثروة..
وسنعمل على تجهيز كميات طازة.. ومعلبات اضافة للضفادع المجففة..
تحياتي
|
Post: #7
Title: Re: جلود الضفادع قد تشفي من 70 مرضا من بينها السرطان!!
Author: عمر موسي منجي
Date: 06-08-2011, 03:08 PM
Parent: #6
العزيز عبد العزيز سلامات
Quote: ما شاء الله.. هذا من الجلود فقط!!!!
ومال أكلها كووولها يكون ايش؟
|
انبسط يا عم " اهو وقعت ليك في جرح "
ان شاء الله تعمل منها " مرارة نية" و ما تنسي " الكوارع "
Quote:
شفت يا منجي كيف كان أخوك بيحبك قبل الاكتشاف ده!!
|
يا سلام عليك يا ود عيسي و القلوب شواهد ولكن نسال الله ان يعافينا و ما نحتاج " للبلاوي " دي كلها
ود عيسي متأكد انك ما شغال مع الجماعة ديل؟؟؟؟؟
تجياتي يا عزيز
|
Post: #8
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-08-2011, 03:48 PM
Parent: #7
Quote: h انبسط يا عم " اهو وقعت ليك في جرح "
ان شاء الله تعمل منها " مرارة نية" و ما تنسي " الكوارع "
|
عزيزي/ عمر منجي
سلام
الخبر والكشف الخطير ده أفرحني شديد بالجد وقلت ده أحسن فرصة لاقناعك بأكل السي فوود!!
المرارة والكوارع وملحقاتهما لا تحلو بدونك..
لكن المشاوي فيها حاجة ما تخلص!!
Quote:
ا سلام عليك يا ود عيسي و القلوب شواهد ولكن نسال الله ان يعافينا و ما نحتاج " للبلاوي " دي كلها
ود عيسي متأكد انك ما شغال مع الجماعة ديل؟؟؟؟؟
|
يا حبيب نتمنى السلامة وربنا يحمينا من أمراض العصر ما ظهر منها وما بطن..
بس لتلافي الاشياء دي
وعشان كلام الوقاية خير من العلاج..
يبقى نحن نعقلها ونتوكل في رحاب الضفادع..
ما شغال معاهم بس بتعاون معاهم في الخير..
تحياتي
احلى شئ جيت بدري المرة دي!!
|
Post: #9
Title: Re: جلود الضفادع قد تشفي من 70 مرضا من بينها السرطان!!
Author: عمر موسي منجي
Date: 06-08-2011, 06:13 PM
Parent: #8
ود عيسي سلامات
Quote: وقلت ده أحسن فرصة لاقناعك بأكل السي فوود!!
|
يا زول ما زلت في ضلالك " القديم " قلنا ليك مية مرة البتاع ده ماااا سي فووود
سميه ما شئت لكن سي فوود "لاااا" و لا اقول ليك سميه " خيران فووود "
Quote: احلى شئ جيت بدري المرة دي!!
|
سامحني ان كنت قد تأخرت عليك في بعض الاحيان
و لكني ساعي هذه الايام للعودة الطوعية الي ارض الآباء و الاجداد
بعد غربة 24 عاما " و العيال كبرت " و لا بد للسودان و ان طالت الغربة
دعواتك ربنا يسهل الامور و يطيب المقام و ينعدل حال السودان ....
تحياتي
أتمني ان تكون عندك زيارة للسودان في هذا الصيف
لاني عازمك في منزل الوالد بالكلاكلة التريعة" عزومة جادة"
و بالمناسبة المنزل فيهو مزرعتين داخلي و خارجي و "دونكي"
و الضفادع تكفي لاطعام جميع أعضاء "سودانيز"
بس "عدة" الطبيخ منك
|
Post: #10
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-09-2011, 05:51 AM
Parent: #9
Quote:
يا زول ما زلت في ضلالك " القديم " قلنا ليك مية مرة البتاع ده ماااا سي فووود
سميه ما شئت لكن سي فوود "لاااا" و لا اقول ليك سميه " خيران فووود " |
عزيزي/ عمر منجي
يا حبيب ده عنده بر وبحر!!
يعني خاطف لونين..
بعدين كلمة خيران دي يسمعها سيد الحوش والبوست يلحق أمات طه..
ياخي الضفدع يطلع لك من تحت الطين تلقاه ناير يرقش.. شئ راقي!!
Quote: سامحني ان كنت قد تأخرت عليك في بعض الاحيان
و لكني ساعي هذه الايام للعودة الطوعية الي ارض الآباء و الاجداد
بعد غربة 24 عاما " و العيال كبرت " و لا بد للسودان و ان طالت الغربة
دعواتك ربنا يسهل الامور و يطيب المقام و ينعدل حال السودان ....
|
انت لم تتأخر لأنك على دراية أن الأطعمة الدسمة لا تتحمل الحفظ لفترات طويلة..
دي كانت اشارة لبوست التصميم..
عودة ساي كدا ليش!! لازم تكون في كشكرة..
ولو العودة الطوعية دي حلوة شديد..
24 سنة دي برددت قلبي شوية بي تلاتة سنوات!!
والحمدلله لقيتك سينيير غربة!!
لكن العيال عندهم حق العودة قبل مرور عقد زمان برة..
وحتى تكون صلتهم الوجدانية بالتراب أقوى!
وان شاء الله خطوة عديلة..
وربنا ييسر لك أمر السفر
ومن قبلها ربنا يصلح حال الوطن
ويرد غربته قبل بنيه..
يا شيخ الكرم الأصيل
انت في الكلاكلة يعني في طريقي رايح جاي من الجزيرة ابا..
وحتكون نقطة التفتيش الجديدة..
طالع من أمدرمان حنفطر عندكم..
جاي من أبا نوقّت للغداء..
ولما تكمل ضفادعكم سنمدكم بعتاقي النيل الابيض!! ومن بينها بلطيات وكبجن و..و
العدة من سنغافورة ان شاء الله
مودتي
|
Post: #11
Title: Re: جلود الضفادع قد تشفي من 70 مرضا من بينها السرطان!!
Author: هجو الأقرع
Date: 06-09-2011, 06:11 AM
Parent: #10
Quote: قبل ساعتين كنت بفكر في موضوع الضفادع خاصة وعندنا ميعة قريبة من بيتنا في الجزيرة أبا لم يجدوا لها ناجع من زمن الانجليز..
المياه تتجمع بسرعة والتصريف بطئ بطول الخريف والشتاء.. وهاك يا ناموس, قواقع, سمك وضفادع من الحجم العائلي.. من قبيل المغرب
تبدأ في عزف موسيقى شجية اعضاءها أكثر ألف عازف بمختلف الأعمار.. والغريب فيها تغطس في الطين أيام الجفاف لحين عودة الخريف..
وكبار القوم يعرف يحلل النوتات الموسيقية ويعرفوا اذا كان العزف لاستقبال المطر في نفس الليلة أم لا..
هذه ثروة عذبتنا عشرات السنين.. بكرة يجوا الجماعة يقولوا ليك ثروة قومية والحنك بتاع قلع الميعة التاريخية بضفادعها |
الاخ العزيز ، عبدالعزيزعيسى ، سلام من الله ورحمة ، شوف هذه الثروة القومية بما انك بعيد و لم و لن يكن لك رقم قومى ، فقول لك خلف الله لك بابرك و اخير .
اما ان يكونوا ناس الحكومة حضروا ماليزوا و عملوا لكم رقم قومى فمبروك و تستاهل ، بس عليك الله ما تنساك اخوانك خاصة اخى فايز القاضى و اميرة بت الشيخ . لان الاخوة فى المريخ اقوى من صلة الدم .
|
Post: #12
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-09-2011, 08:14 AM
Parent: #11
Quote: الاخ العزيز ، عبدالعزيزعيسى ، سلام من الله ورحمة ، شوف هذه الثروة القومية بما انك بعيد و لم و لن يكن لك رقم قومى ،
فقول لك خلف الله لك بابرك و اخير .
اما ان يكونوا ناس الحكومة حضروا ماليزوا و عملوا لكم رقم قومى فمبروك و تستاهل ،
بس عليك الله ما تنساك اخوانك خاصة اخى فايز القاضى و اميرة بت الشيخ . لان الاخوة فى المريخ اقوى من صلة الدم . |
الاخ العزيز هجــو
سلام
ياخوي ميعتنا ملك بوضع اليد من 1933م وناس البيت والاهل لا زالوا هناك يدفعون دمهم ضريبة والملاريا قدرا وتجاهل الحكومة ابتلاءا..
الرقم القومي لما يعم الاربعين مليون منهم عشرة برة, لها ألف فرج..
وكلام الورق والبدع الجديدة دي لا تغير في الاصول شئ ياخوي!!
فايز القاضي سيصله نصيبه اسبوعيا بانتظام.. وبت الشيخ ليها اعتبار خاص عشان تعمل لينا طريقة لتمويل الفندق بكميات تجارية..
والزعيم هارون دياب بيساعد كتير في حكاية المعسكرات وكاس العالم على الابواب!!
الصفوة لهم صنف درجة أولى..
مودتي
|
Post: #13
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-09-2011, 05:45 PM
Parent: #12
Tomato Frog
ضفدعة الطماطم!! النوع ده ما عندنا الا نعمل ليهو توطين لو طلع جلده فيهو فايدة
|
Post: #14
Title: Re: جلود الضفادع قد تشفي من 70 مرضا من بينها السرطان!!
Author: هجو الأقرع
Date: 06-09-2011, 06:12 PM
Parent: #12
يا عبدالعزيز يا خوى الكيزان ديل جماعتى و انا بعرفهم اكثر منك ، اضمن حاجة تسجل هذه الثروة القومية باسم احدى الشركات الامريكيه .
قال 1933 يا اخى ديل فلسوا بالتجار كلهم ، خليك انت العايش فى اخر الدنيا. ما عندك مشكلة 85 فى المائة و لا يهمك بعمل ليك واسطة .
|
Post: #15
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-09-2011, 06:34 PM
Parent: #14
Quote: يا عبدالعزيز يا خوى الكيزان ديل جماعتى و انا بعرفهم اكثر منك ، اضمن حاجة تسجل هذه الثروة القومية باسم احدى الشركات الامريكيه .
قال 1933 يا اخى ديل فلسوا بالتجار كلهم ، خليك انت العايش فى اخر الدنيا. ما عندك مشكلة 85 فى المائة و لا يهمك بعمل ليك واسطة . |
العزيز/ هجو
بترول وخموهو..
دهب وكاوشوه...
شركات.. نصب واحتيال وفساد...
تعرف ياخوي الحيكومة دي لو كان ماسكنها الفيلة لكان شبعت من زمان وتركوا بواقي للبشر..
...
الحاجات الفوق دي كلها ما كفتهم يجوا للضفادع كمان!!!
لو كدا الـ 85% دي ما بطالة
ونقول ربح البيع أبا عمر!!
تحياتي
|
Post: #16
Title: Re: جلود الضفادع قد تشفي من 70 مرضا من بينها السرطان!!
Author: هجو الأقرع
Date: 06-09-2011, 07:17 PM
Parent: #15
خلاص يا عبدالعزيز ياخوى تم الاتفاق ، سوف نرسل لك وفدا من خلايانا النائمة معكم ، و ثق العقد و ارسل على DHL شوفت انا عاوز اخدمك كيف ، و ال15 فى المائة بعد الضرائب و الزكاة و ناس المحليات مبروكة عليك ، اصلا الحاجات دى دوما تؤخذ من المالك الاصلى حتى يزداد فقرا. اللهم بارك لنا فى الرزق الذى اتانا ونحن كنا عنه غافلون.
|
Post: #17
Title: Re: جلود الضفادع قد تشفي من 70 مرضا من بينها السرطان!!
Author: Fawzi Babiker
Date: 06-09-2011, 10:56 PM
Parent: #16
الاخ عبدالعزيز
لك التحية وضيوفك الكرام.
رغم مداخلات الجماعة السمحين الفوق ديل كلهم خلينى اكون
محامى الشيطان للحظات.
طيب لو وافقنا انو البروتينات دى ممكن تعالج امراض الشرايين
والسرطان حتصل الجسم كيف.
لو عن طريق الفم (أكل عادى) بتكون راحت فيها.
عن طريق الحقن ستؤثر على الجسم كلو يعنى ممكن تزيد
احتمال السرطان فى حالات وممكن تزيد امراض الشرايين
فى حالات اخرى.
لو بالمعالجة الجينية الموضعية خلينا اول نشوف نتائج
مفرحة للخلايا الجزعية.
بعد ده كلو ان شاء الله ربنا يحفظنا وما يجعل شفانا فى
لحم القعوى.
لكم ودى
|
Post: #18
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-10-2011, 04:47 AM
Parent: #17
Quote: رغم مداخلات الجماعة السمحين الفوق ديل كلهم خلينى اكون
محامى الشيطان للحظات.
طيب لو وافقنا انو البروتينات دى ممكن تعالج امراض الشرايين
والسرطان حتصل الجسم كيف.
لو عن طريق الفم (أكل عادى) بتكون راحت فيها.
عن طريق الحقن ستؤثر على الجسم كلو يعنى ممكن تزيد
احتمال السرطان فى حالات وممكن تزيد امراض الشرايين
فى حالات اخرى.
لو بالمعالجة الجينية الموضعية خلينا اول نشوف نتائج
مفرحة للخلايا الجزعية.
بعد ده كلو ان شاء الله ربنا يحفظنا وما يجعل شفانا فى
لحم القعوى. |
الاخ العزيز/ فوزي بابكر
سلام وهلا بيك
ياخوي أجيك بالباب كدا..
الطريق الواصل واليسير هو الاكل..
في يناير 1990م دخلت سوق الحوت بطرابلس الغرب لاول مرة, وكان ذهني وعلى حسب الاسم انه سوق للسمك بانواعه المختلفة ..
لكني وجدت أشياء لا حصر لها..
أنواع وأشكال لمخلوقات غريبة جدا ومختلفة الالوان..
أشياء لم أراها في عالم البحار..
وكثير منها حيا ويتحرك.. شئ اخطبوط, نجم البحر, سرطان, وأشياء كدا لاول مرة أشوفها ولم أتحمل وأصبر على رؤيتها..
في خارج السوق سألت رفيقي: هل المخلوقات الغريبة دي في ناس بتشتريها عشان تأكلها؟
وكنت لم أفكر فيها أكثر من انها طعام للحيوانات المنزلية..
وعرفت أنها أغلى من كافة الاسماك!!
قلت: سبحان الله.. ولم ادري اني سوف أكون احد آكليها بعد ثلاث سنوات بالضبط من ذلك التاريخ!!
هذه الضفادع من شكلها وهي حية يرتجف منها الفؤاد..
لكن عندما تطهى وتخرج على السفرة بشكل شهي تنسى اسمها..
شكل ولون الجلد الخارجي فقط هو المنفر..
ولو رجعت لدرس تشريح الضفدعة في المتوسطة (لا ادري ما زال في المنهج)
بعد شق البطن ننسى انها ضفدعة ونتعامل مع مكوناتها مثلها مثل اي حيوان يؤكل..
نسأل الله أن يكفينا شر الامراض..
وان يكون أكلها هو من شاكلة التكيف والكيف..
لك من الشكر أجزله على المداخلة الرائعة
تحياتي
|
Post: #19
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-10-2011, 04:54 AM
Parent: #18
Quote: خلاص يا عبدالعزيز ياخوى تم الاتفاق ، سوف نرسل لك وفدا من خلايانا النائمة معكم ، و ثق العقد و ارسل على DHL شوفت انا عاوز اخدمك كيف ،
و ال15 فى المائة بعد الضرائب و الزكاة و ناس المحليات مبروكة عليك ، اصلا الحاجات دى دوما تؤخذ من المالك الاصلى حتى يزداد فقرا.
اللهم بارك لنا فى الرزق الذى اتانا ونحن كنا عنه غافلون. |
عزيزي الاقرع
حياك الله
توثيق عقود
وتكاليف مراسلات..
زكاة
ضرائب
وبعدين فيها نفايات
وزاد المجاهد
وجنيه كاوقلي!!
و..و...و
يعني بالعربي كدا الزول ممكن يخسر من جيبه عندما يريد أن يبيع!!
ذكرتني ببدايات عهد نميري.. مصادرات وتأميم!! وكانت افضل لان المالك بشيل عمته ويتخارج!!
افضل شئ انه الواحد ينكر صلته بحقه وينكره عديل..
بيع الدنيا ما زي بيع الآخرة
ياحي يا دائم..
مودتي
|
Post: #20
Title: Re: جلود الضفادع قد تشفي من 70 مرضا من بينها السرطان!!
Author: عمر موسي منجي
Date: 06-10-2011, 06:33 AM
Parent: #19
الاخ فوزي سلامات
و شكرا ليك كتيير انك عرفت ترد علي ود عيسي
عامل لينا وجع راس بالبلاوي البياكلها دي
و لكني لا اظنه سيرعوي لانه أصبح " مدمن"
و محتاج لي "rehab" عدييييل كده و لا أظن ان حاله سينعدل
Hopeless Case
أخوي ود عيسي سلامات
موعدنا الكلاكلة ان شاء الله في الصيف "أليس الصيف بقريب"
و ان شاء الله تاكل" قراصة" لامن تنسي الضفادع و الاستثمار فيها
تحياتي لك و الاخ هجو
|
Post: #21
Title: Re: جلود الضفادع قد تشفي من 70 مرضا من بينها السرطان!!
Author: Abdlaziz Eisa
Date: 06-10-2011, 02:22 PM
Parent: #20
Quote:
الاخ فوزي سلامات
و شكرا ليك كتيير انك عرفت ترد علي ود عيسي
عامل لينا وجع راس بالبلاوي البياكلها دي
و لكني لا اظنه سيرعوي لانه أصبح " مدمن"
و محتاج لي "rehab" عدييييل كده و لا أظن ان حاله سينعدل
Hopeless Case
أخوي ود عيسي سلامات
موعدنا الكلاكلة ان شاء الله في الصيف "أليس الصيف بقريب"
و ان شاء الله تاكل" قراصة" لامن تنسي الضفادع و الاستثمار فيها
تحياتي لك و الاخ هجو
|
العزيز/ عمر منجي
سلام
بالله شوفها.. بًنّيّـة مشوية!!
أو جنب الطوة متكيّة
ياخوي أن رد الكلام وطق الحنك ده ما بينفع..
نحن لنا بيان بالعمل....
يعني لما تجيك الضفدعة محمرة كدا وجنبها شوية بصل وليمون!!
عاد تاني في كلام.. في قولان!!
ياخوي الرهابليشن ده للناس الطاشة وما عارفة قيمة الخير الوفير جنبها!!
في واحد أخونا هنا كان غائب عن الخير ده زيك كدا.. في مرة جهبزنا السي فوود " كراب وقواقع"
ما تركنا اي شئ يدل عليها..
صاحبنا جالس معنا بعد أن سأل وقال اللحم ده بتاع شنو؟
مافي زول رد أو اشتغل بيهو..
قلنا ليهو الاكل ده كلو حلال أنت دخّل يدك وضوق وبعدها اتكلم..
لقمة لقمتين... والحكاية ماشة والكل عامل رايح..
في آخر الفلم سأل تاني..
قلنا ليهو يا زول.. البتغير شنو بعد أكلت معنا واتكفيت..
وما صدق لما قلنا ليه دي الاشياء الكنت بتقول عليها (عواليق ومصايب)!! تعال شوف آثارها قبل الطبخ..
صاحبنا قال: والله أنا كنت مضيّع نفسي ساي!!
وانا لو سمحت لي أجيبها معاي جاهزة وبعدها لنا كلام..
تحياتي
|
|