Post: #1
Title: تعالو ننكفى على الماضى!!!!
Author: Siham Elmugammar
Date: 07-01-2009, 08:59 AM
Parent: #0
تعالو ننكفى على الماضى
تعالو نبكى ايامنا الضايعه وزمنا الفات و غناينا المات.. تعالو نقعد نخت ايدنا فوق جضمونا و نغز كوعنا فوق يد الكرسى و نقول يا حليل زمن الانجليز ... اللحمه كانت بتتباع بالوقيه.. و طلبة الداخليات كانو ما بعرفو اكل الطعميه.. وننسى انهم كانو منو و جو ليه؟؟ .. ونجى نقول يا حليل زمن الازهرى الرفع العلم و ننسى " لمن يهمه الامر"...و "تحرير لا تعمير"... تعالو كمان نقول يا حليل النميرى و زمنو ..وننسى قوانين سبتمبر و المعتقلات و التعذيب و المقابر الجماعيه واعدام الشيخ الجليل ...وتعالو نفول يا حليل انتفاضة ابريل وننسى المجلس الانتقالى والدكتور الكارثة وسوار الدهب و تعالو نقول يا حليل الديمقراطيه وننسى ..بشير..سليم..التايه و ننسى مظاهرات السكر وضرب الرصاص ...والصادق الممتاز
ونواصل انكفاء
|
Post: #2
Title: Re: تعالو ننكفى على الماضى!!!!
Author: Hussein Mallasi
Date: 07-01-2009, 09:03 AM
Parent: #1
| Quote: اللحمه كانت بتتباع بالوقيه |
قلبت الوقة لوقية فانقلب المعنى.
|
Post: #3
Title: Re: تعالو ننكفى على الماضى!!!!
Author: Sana Khalid
Date: 07-01-2009, 09:10 AM
Parent: #1
سهام المجمر
تحياتي ..
سمعت بقصة الممرضة الصَحت المريض و قالت ليهو ..
"مواعيد الحبة المنومة جات"؟!!
|
Post: #4
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 09:28 AM
Parent: #3
ملاسى سلامات و كده
انا سمعتها من حبوبتى عيشة بت باشاب وقية
اها كان عندكم وقة ما مشكلة المعنى فى محله
المهم جاى تنكفى معانا على الماضى و الا عندك شغلة تانية :)
|
Post: #5
Title: Re: تعالو ننكفى على الماضى!!!!
Author: Hussein Mallasi
Date: 07-01-2009, 10:12 AM
Parent: #4
| Quote: انا سمعتها من حبوبتى عيشة بت باشاب وقية |
العتب على السمع يا سهام .. لو الزمن المنكفيين
عليهو لحتمو بتتباع بالوقية تبقى حكايتكم حكاية.
______
نحن ناس حاضر و مستقبل ساااااكت.
|
Post: #6
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 10:27 AM
Parent: #5
| Quote: نحن ناس حاضر و مستقبل ساااااكت |
انا برضو قلت كده :)
|
Post: #7
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 10:33 AM
Parent: #6
تعالو نبكى و نندرق على ايام الدراسه .. الابتدائى و احتفالات اعياد الام و المعلم و الضفرتين و الشرايط البيض و تفتيش النظافه الشخصيه فى الطابور الصباحى و ننسى ضرب البسطونه و المسطره بالسيافى على ضهر كف اليد.. تعالو نندردق فى الثانوى العام و لبس البنى الغامق ...واليوم الثقافى الاسبوعى وبرامج الاذاعه المدرسيه الصباحيه وداخليات بنات الاقاليم فى مدرسة الريفى.. وننسى سخانة الفصول و استمرار الضرب فى عمر ممكن يطفش من الدراسه... تعالو ننكفى على الثانوى .. و نتذكر شفقتنا عشان نلبس اللبنى و نلف الطرحه الناصعة البياض حول الرقبه... نتحسر على مسابقات المدارس و الدوره المدرسيه .. و الدورات الرياضيه و قصص شارع المدارس ببحرى وننسى بدايات انهيار النظام التعليمى... كنتاج حتمى لتسلسل الانهيار السياسى و الاقتصادى من نميرى للانقاذ...
ونواصل انكفاء!!!
|
Post: #8
Title: Re: تعالو ننكفى على الماضى!!!!
Author: عاطف عمر
Date: 07-01-2009, 10:41 AM
Parent: #1
| Quote: ونجى نقول يا حليل زمن الازهرى الرفع العلم و ننسى " لمن يهمه الامر".. |
دي ( نكتيها ) من وين يا سهام ؟؟
ياخ دي من المسكوت عنه ( جداً ) في تاريخنا السياسي
إلى من يهمه الأمر
سلام
وبعدها يأتي القرار الذي لا معقب له
وهو قرار لا إستئناف فيه
لا كبير أمامه
فصلاً من الحزب أو ما دون ذلك
وفي الشكل هو قمة الزراية بالأشخاص
إستكثار أن يخاطب هذا الذي يعنيه الأمر باسمه الذي سجل به طائعاً مختاراً للحزب
وقمة المأساة أنه صادر من ( أبي الديمقراطية )
__________________
إن شاء الله طيبين ؟؟
|
Post: #9
Title: Re: تعالو ننكفى على الماضى!!!!
Author: Amira Elsheikh
Date: 07-01-2009, 10:52 AM
Parent: #8
سهام...سلاااام..
ننكفى اكتر من كدى كيفن??
قولى ننكفى
|
Post: #10
Title: Re: تعالو ننكفى على الماضى!!!!
Author: هشام المجمر
Date: 07-01-2009, 11:22 AM
Parent: #9
يا اميرة الشيخ
سلام
وحمد الله بالسلامة
يا سهام
كيفنك
اها نحنا نخلى الحقيبة نمشى وين
لازم كل مان نقعد للغنى نحقب و نحقب... وووو نحقب لغاية ما الحقيبة ذاتها تزهج
|
Post: #11
Title: Re: تعالو ننكفى على الماضى!!!!
Author: أبو ساندرا
Date: 07-01-2009, 11:38 AM
Parent: #10
هلا سهام
جيت انكفي معاك وأبكي :
- على مجد الكرة السودانية في عهدها الذهبي
وابطالنا النجوم جكسا وكمال عبدالوهاب والمحينة والطاهر حسيب
ثم أخذت تتدهور وتتدهور
حتى جانا عصر اللاعب المرتزق
مشاطيب افريقيا
|
Post: #12
Title: Re: تعالو ننكفى على الماضى!!!!
Author: حنين للبلد
Date: 07-01-2009, 04:41 PM
Parent: #11
سهام المجمر
معاكم...
|
Post: #13
Title: Re: تعالو ننكفى على الماضى!!!!
Author: سيف الدولة كامل
Date: 07-01-2009, 07:19 PM
Parent: #12
جيت ابكي علي التعليم
حليل زمن خريج الوسطي
بيشتغل محاسب وخريج
الثانوي باشكاتب
وحليل زمن بغنن البنات دايره
لي عريس شرطا يكون لبيس من
هيئة التدريس
|
Post: #14
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 07:48 PM
Parent: #13
سلام للشابات والشباب غض النظر عن وجود ... و... و ....وابوساندرا
لووووووووووووووووول
نبدا بيك يا عاطف (حسب التسلسل و الانكفاء)
حسى يا عاطف لو عاوزين نعمل حاجة زى مقاس الزيت عشان نقيس درجة الانكفاء عند الاشخاص دى نعملها كيف؟؟؟؟؟؟
قلت لى جبت "لمن يهمه الامر من وين"
افتكر ده سؤال انكفائى جدا عشان كده انا بديت بيك :)
صدق قريتها مره فى مقال لزول واضح انو منكفى جدا (لمن نجيب المقاس بنعرف درجتة)
كان يبكى و يتحسر على زمن رجال السياسة الجد و تحديد الازهرى
ثم جا على ذكر هذه العبارة التى كان يبدأ بها الازهرى بعض الخطابات
والتى تم التوافق على فهم واحد لكل من يصله خطاب يبدا بها
وهو (قضى الامر وو اتخذ القرار)
|
Post: #15
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 08:04 PM
Parent: #14
الاخت اميرة سلام الف
| Quote: ننكفى اكتر من كدى كيفن?? |
بعد ما اخترع مقياس ريختر للانكفاء على الماضى
ح اقدر اجاوب على سؤالك؟؟ لانو على حسب التوقعات كل زول عندو حد معين لو فاتو
ممكن يتفجر ... و نحن انفجارك ما بنحملو :)
الليلة وووب
يا هشام يا مجمر
الشوق شديد والله يسلمك
طبعا يا هشام انفصمت بالجو و الخضرة ... لكن فتنة السماء كانت اكبر من اوصفها
ياخ مبااااااالغة
اها قلت انزل الصور خفت من توقعات قرأء ادب الرحلات
يقول ده شنو الما بتعرف توصف دى (وش مسكين ما بعرف اعبر)
تحياتى للعصابة
|
Post: #16
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 08:41 PM
Parent: #15
ياا بو ساندرا
انا انكفيت على هلال تنقا ويور يور يا دكتور
و صميت خشمى و قعدت!!!!!
ابكى يا اخوى ابكى
الكورة بقت قروش
والعندو بيشترى !!!!!!!
الاخ سيف
قلت لى يغنن لبيس من هيئة التدريس؟؟؟؟
الظاهر عليك انكفائك طول شدييييييد :)
الزمن ده تقول مدرس ما بتونسو معاك
|
Post: #17
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 08:46 PM
Parent: #16
يا حنين ما قدرنا اتلاقينا وما شفت رسالتك الا بعد مار جعت الخرطوم
ووقتها انتى كنتى فارقتيها
الجايات اكتر من الرايحات
طالما قلتى لى معاكم
نواصل انكفاء
|
Post: #20
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 10:01 PM
Parent: #16
يا حنين ما قدرنا اتلاقينا وما شفت رسالتك الا بعد مار جعت الخرطوم
ووقتها انتى كنتى فارقتيها
الجايات اكتر من الرايحات
طالما قلتى لى معاكم
نواصل انكفاء
|
Post: #18
Title: Re: تعالو ننكفى على الماضى!!!!
Author: Kamal Karrar
Date: 07-01-2009, 08:57 PM
Parent: #15
جيت أنكفي ما لقيت لي ( كفَاية)...
حرارتي ارتفعت شوفوا لي طفاية
أنكفي كيف من غير فهم أو غاية
بَس عشان خاطركم بشوف لي تكَاية
------------
هادي أنكفاءة..يا بت المجمر..
|
Post: #19
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 10:00 PM
Parent: #18
و تعالو ننكفى شديد لمن نعصر قلبنا على الجامعات وايامها..
مع ناس جامعة الخرطوم نبكى النشاط و شجرة الجبهه واركان النقاش..
نبكى حفلات مصطفى سيداحمد و ابوعركى و السمندل.. نبكى المسرح الجامعى و التشاط الثقافى..
نبكى الدكاتره الكانو شنو ومنو ... وننسى بؤس المكتبات وزحمة المدرجات ...
.شخشة المكرفونات ...و ننسى العنف السياسى و السيخ و الجنازير...
|
Post: #21
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 10:39 PM
Parent: #19
Quote: جيت أنكفي ما لقيت لي ( كفَاية)...
حرارتي ارتفعت شوفوا لي طفاية
أنكفي كيف من غير فهم أو غاية
بَس عشان خاطركم بشوف لي تكَاية
------------
هادي أنكفاءة..يا بت المجمر.. |
يا كمال كرار
معقولة دى بس!!!!!
والله و ما طالبنى حليفة
الليله انا كنت ماشة افتح بوست اقول اين كمال كرار؟؟؟؟
مرحب بيك و بى انكفاءتك الشاعرية
و خليك منكفى.. اقصد خليك قريب
نواصل انكفاء
|
Post: #22
Title: Re: تعالو ننكفى على الماضى!!!!
Author: Amjed
Date: 07-01-2009, 11:26 PM
Parent: #18
انا ما معاكم في الموضوع دا
و معترض بي شدة
و باعتقد و بافتكر و باشوف زاتو
|
Post: #23
Title: Re: تعالو ننكفى على الماضى!!!!
Author: Siham Elmugammar
Date: 07-01-2009, 11:54 PM
Parent: #22
Quote: انا ما معاكم في الموضوع دا
و معترض بي شدة
و باعتقد و بافتكر و باشوف زاتو |
الى من يهمة الامر سلام
اعتراضك لا جدوى منه و ستنكفىء و لو بعد حين
سعادتنا
|
Post: #24
Title: Re: تعالو ننكفى على الماضى!!!!
Author: Hamid Elsawi
Date: 07-02-2009, 00:07 AM
Parent: #22
سهام براحة شوية علينا
انا قاعد
يومياً بسترجع الذكريات
و امسح دموعي في الامسيات
شوفي الناس اتفرقت كيف
رفاقي رفاقك هل تذكرين؟
من الامس روعته البقية..
و كيف عرفنا بأن انفعالاتنا
تستريح علي ضحكة زاهية
و كيف نذوب احزاننا في رؤي الاخرين
أين منا صدي الاخرين؟؟؟
و أين الحروف التي انطفأت في مهب الرياح؟؟
لعلك لا تذكرين...
هنا- ان نسيت - انتظرنا الصباح
نفضنا علي وجنتيه بقايا رماد..
و كان الدجي يتثاءب ملء العيون
التي اكتحلت بالسهاد
ملأنا سلال التفاكر ثرثرة واهية
و جئنا الي النور نغسل منه رؤي باكية
سرقنا النجوم ..... سرقنا النجوم التي
قطرت في اكف الرفاق السنا
أقمنا جسوراً من الفلب كيما نعاني
علي شاطيء الاخرين هموم الزمان ...
هناك كتبنا خواطرنا ....
و احترقنا .... هنا
انت انسانة و انا
(من قصيدة للشاعر المهندس مبارك ابراهيم (معمار الخرطوم))
Quote: و تعالو ننكفى شديد لمن نعصر قلبنا على الجامعات وايامها..
مع ناس جامعة الخرطوم نبكى النشاط و شجرة الجبهه واركان النقاش..
نبكى حفلات مصطفى سيداحمد و ابوعركى و السمندل.. نبكى المسرح الجامعى و التشاط الثقافى.. |
شكراً سهام علي نبش الماضي
و تأجيج الذكريات
تحياتي للجميع
|
Post: #25
Title: Re: تعالو ننكفى على الماضى!!!!
Author: Siham Elmugammar
Date: 07-02-2009, 00:38 AM
Parent: #24
الاخت سناء خالد
انتبهت انو الرد بتاعى على مداخلتك لم يظهر اعتقد
الارسال ما اكتمل ما عارفة اذا فى زول غيرى عانى خلال اليوم ده
من صعوبة الدخول للمنبر
على ما اذكر كتبت ليك:
( يا سناء انا شفت و عايشت ممرضة "قرصت" المريضة لانها كانت بتتألم... اتخيل لى قصتى ارهب من قصتك :):))
تسلمى يا سناء
بالله واصلى انكفاء معانا
|
Post: #26
Title: Re: تعالو ننكفى على الماضى!!!!
Author: أبو ساندرا
Date: 07-02-2009, 05:26 AM
Parent: #25
Quote: سلام للشابات والشباب غض النظر عن وجود ... و... و ....وابوساندرا
لووووووووووووووووول |
سهام يا عسل مصفى
الشباب قد وقر في العقل
وصدقه القلب
فلا تأخذي بشهادات تقدير العمر وتسنين السنين
فالمشاهدات هي الأبقى
وإن لم تتسنى لك المشاهدة للسف
فدونك عيون هشام الهمام
نقرك السلام
|
Post: #27
Title: Re: تعالو ننكفى على الماضى!!!!
Author: هواري نمر
Date: 07-02-2009, 07:50 AM
Parent: #26
الاخت سهام..
سلامان و كيفنك..عوافي؟؟
اها ننكفي اكتر من كده كيـــــــف؟؟
و الله انكفاءة شديدة......لما قلبنا هوبة...
غايتو....اها انكفاءة..او انكفاية...وتعدي
وشكرا...للتذكير بالانكفاءات الكبوة..
هواري
|
Post: #28
Title: Re: تعالو ننكفى على الماضى!!!!
Author: Siham Elmugammar
Date: 07-02-2009, 02:25 PM
Parent: #24
يا حامد الصاوى
Quote: سهام براحة شوية علينا
انا قاعد
يومياً بسترجع الذكريات
و امسح دموعي في الامسيات
|
لازم تبطل تسترجع ذكريات
عشان تبطل تذرف الدموع فى الامسيات
لازم تتذكر ايام المسرح
والبرفات.. ناس عبدالمنعم و ايناس خيرى
و محمد اسماعيل
لازم تتذكر رنين الضحكات فى قاعات المعمار
لازم تتذكر كيف كنا لذيذين صافين متونسين
وفى نفس الوقت جادين و حريصين و مؤمنين
بما نحمل من افكار ..
بجيك راجعة يا حامد اوريك واوصيك
حتى تكون صحيح الانكفاء
|
Post: #29
Title: Re: تعالو ننكفى على الماضى!!!!
Author: Hamid Elsawi
Date: 07-03-2009, 09:21 AM
Parent: #28
Quote: لازم تتذكر رنين الضحكات فى قاعات المعمار
لازم تتذكر كيف كنا لذيذين صافين متونسين
وفى نفس الوقت جادين و حريصين و مؤمنين
بما نحمل من افكار ..
|
|
Post: #30
Title: Re: تعالو ننكفى على الماضى!!!!
Author: Siham Elmugammar
Date: 07-04-2009, 01:06 PM
Parent: #29
Quote: غايتو....اها انكفاءة..او انكفاية...وتعدي
وشكرا...للتذكير بالانكفاءات الكبوة..
هواري |
سلام يا هوارى
الانكفاء صار جزء اساسى من يومنا
مالنا ما ننكفى على غابر ايامنا ما غيرنا انكفى ... لكن الفرق بين انكفأنا و انكفائهم امانه ما بعيد وبين..
نحن نعمل على ان ننكفى على ما يبهجنا و يسعدنا و يضوى لينا عتمة حاضر الدروب و يدفرنا لقدام ..
لكن هم بيبكو على شنو؟؟؟
_______________________________
لا شكر على واجب ياخ:)
|
Post: #31
Title: Re: تعالو ننكفى على الماضى!!!!
Author: حافظ حسن ابراهيم
Date: 07-04-2009, 02:07 PM
Parent: #30
يا سهام انا اتولدت منكفي ...اها قولي لي انكفي اكتر من كدا ابقي شنو
لكن نصيحة الما عندو ضهر ينكفي علي بطنو
|
Post: #33
Title: Re: تعالو ننكفى على الماضى!!!!
Author: Siham Elmugammar
Date: 07-04-2009, 08:09 PM
Parent: #31
(لكن نصيحة الما عندو ضهر ينكفي علي بطنو)
سلام يا حافظ
والله انا بنصح بالانكفاء على القدوم لانة يساعدك على ان تصم خشمك و تنكتم تماما
وللمنكفين المفاضلة بين النصيحتين ففى كل خير:)
|
Post: #32
Title: Re: تعالو ننكفى على الماضى!!!!
Author: رغيم عثمان رغيم الحسن
Date: 07-04-2009, 05:23 PM
Parent: #1
| Quote: و ننسى " لمن يهمه الامر"... |
سهام سلامات
بالعكس دى بالزات ما محتاجة تتنسى واى زول بفتخر بالزعيم بفتخر انو دايما كان بصدى للمواقف وبتخذ قرارات شجاعه جدا فى إطار صلاحباته كرئيس حزب
لانو الزعيم إطلاقا ما استخدما فى شأن بخص الدوله
والمعنى كان بكون اوفق لو اشرتى لى قضيه حل الحزب الشيوعى سنة 1967
| Quote: و تعالو نقول يا حليل الديمقراطيه وننسى ..بشير..سليم..التايه |
معليش ممكن تراجعى المعلومه دى انتى متأكدة انو اغتيال بشير وسليم والتايه حصلت فى الديمقراطيه الاخيره
لانو الحاجه العارفا انو الاحداث دى كانت فى بدايه التسعينات
ولو عندك معلومه تانيه اكون شاكر لو افدتينى بها
ولك تحيتى واحترامى
|
Post: #34
Title: Re: تعالو ننكفى على الماضى!!!!
Author: Siham Elmugammar
Date: 07-04-2009, 09:06 PM
Parent: #32
( و ننسى " لمن يهمه الامر"... )
سهام سلامات
بالعكس دى بالزات ما محتاجة تتنسى واى زول بفتخر بالزعيم بفتخر انو دايما كان بصدى للمواقف وبتخذ قرارات شجاعه جدا فى إطار صلاحباته كرئيس حزب
لانو الزعيم إطلاقا ما استخدما فى شأن بخص الدوله
والمعنى كان بكون اوفق لو اشرتى لى قضيه حل الحزب الشيوعى سنة 1967 )
الاخ رغيم سلام والف تحية
الكلام ليس متى ؟ الكلام المبدأ نفسة
يعنى يا رغيم يا اخوى الازهرى رحمه الله لو كان عايش كان ح يكون لى هسه فى رئاسة الحزب
ذيو و ذى اى من المكنكشين نقد..الترابى!!!..الحبر... مولانا.... الامام
كلامك صحيح اغتيال سليم بشير والتاية كان مع الانقاذ
شكرا ليك
لكن ما وريتنى موقفك من الانكفاء نفسه معانا والا مع الخيانة (امجد مثالا)؟؟
|
Post: #35
Title: Re: تعالو ننكفى على الماضى!!!!
Author: elsawi
Date: 07-07-2009, 07:05 PM
Parent: #34
لو دايرين تستحضروا الأيام الحلوة بنستحضر معاكم
لو دايرين تنكفوا، انكفوا براكم
انا غايتو عندي وجع ضهر!!
عليك الله يا سهام ملاسي ده اكفيهو لي لما ضهرو يطقطق و تقوم ليهو علامة كفيان تحت علامة الصلاة بتاعتو!!
|
|