Post: #1
Title: طربقه!!!...نطيط كلام
Author: Siham Elmugammar
Date: 09-24-2007, 11:38 AM
Parent: #0
كل شىء يأتى اكثر من مره... الاحداث.. و حتى اللحظات...كم مره الواحد/ه فينا سرح/ت فى الشك ان ما يحدث امامه/ا قد حدث من قبل و هو/ى لات/يدرى متى و أين .. كيف يمكن لمشهد واحد ان يتكرر بهذا التفصيل...هل التارخ يعيد نفسه تماما ام نعيده نحن فى ذاكرتنا الفرديه ... نطوق لحظات بعينها لسبب ما.. ثم نعيد انتاجها مره اخرى لنعيش فى و هم الزمان و المكان..
_____________________________________
منو الغبى نحن و الا هم؟؟؟؟
زول يجينى هنا اقول لى هم منو؟؟؟ بكسرو
|
Post: #2
Title: Re: طربقه!!!...نطيط كلام
Author: قرشـــو
Date: 09-24-2007, 11:50 AM
Parent: #1
الاخت سهام
لك التحية والتقدير
Quote: كل شىء يأتى اكثر من مره... الاحداث.. و حتى اللحظات...كم مره الواحد/ه فينا سرح/ت فى الشك ان ما يحدث امامه/ا قد حدث من قبل و هو/ى لات/يدرى متى و أين .. كيف يمكن لمشهد واحد ان يتكرر بهذا التفصيل...هل التارخ يعيد نفسه تماما ام نعيده نحن فى ذاكرتنا الفرديه ... نطوق لحظات بعينها لسبب ما.. ثم نعيد انتاجها مره اخرى لنعيش فى و هم الزمان و المكان..
|
إن اخذت حديثك اعلاه بمعناه القريب وبصورة مطلقة دون توظيفه لهدف معين أو غرض معين فاننى اقول لك ان حديثك هذا صحيح 100% وهو يحدث للكثيرون ولذلك تفسير منطقى جدا رغم ان البعض لا يؤمن به ...
يقول العلماء ان ارواحنا أثناء نومنا تفارق اجسادنا وتطوف فى الدنيا هذه وهى تستطيع الانعتاق من حواجز المكان والزمان وتذهب بعيد جدا وترى ما لم نره بعد وتسمع مالم نسمعه بعد وقد يكون ذلك سابقا للزمان الحقيقى الذى نعيش فيه ولذا احيانا حينا نسمع كلام ما نكون فى شك أين سمعنا هذا الحديث والذى قد يطلق لأول مرة وقد نسافر لمنطقة جديدة علينا تماما ولكننا نكون فى شك اننا قد شاهدنا هذا المكان قبلا ...
التفسير هو ان ارواحنا شاهدت وسمعت ورأت ذلك قبل اجسادنا وحواسنا المعتادة ...
لك مودتى
|
Post: #3
Title: Re: طربقه!!!...نطيط كلام
Author: Siham Elmugammar
Date: 09-24-2007, 12:00 PM
Parent: #2
مطر فى سبتمبر فى السودان ...لا أمان حتى مع الطقس... قالو انو الطقس العالمى فى حالة تغير... يعنى ممكن بعد كم سنه كده طقس كندا يبقى طقس السودان و طقس السودان يمشى كندا !!!... طيب ناس السودان الفى كندا ماااا البفت عليهم حاره... طيب لو ده حصل ممكن الطقس السياسى يحصل عليهو نفس الشى!!!!
__________________________________________
هووووى يا ود عيشه بعد ده اجمع بى جاى
|
Post: #4
Title: Re: طربقه!!!...نطيط كلام
Author: Siham Elmugammar
Date: 09-24-2007, 12:10 PM
Parent: #3
يا قرشو مرحب بيك فى طربقتى
ارواحنا تحلق فى فضاءات لا يعلمها الا هو ..
كيف لارواحنا ان تحلق بعيدا عنا لتسمع وترى و تدرى قبلنا و لا تخبرنا
يالها من ارواح ....
__________________
خاينه؟!!!!
|
Post: #7
Title: Re: طربقه!!!...نطيط كلام
Author: Najlaa El Mahi
Date: 09-24-2007, 12:32 PM
Parent: #3
سهام ازيك شايفة رمضان عامل عمايله معاكى
اسمعى والله مرة حصل لى نفس الكلام ده بطريقة لما افزعتنى وجريت من المكان المهم سافرت لمكان ما داخل السودان وفى سوق تلك المدينة كان ذات المنظر حتى الاوجه الناس شكل السوق الطاحونة غبار الدقيق حتى الجو نفسه وكانى بهذا المكان من قبل جريت وجروا وراى الخواجات اللكانوا معاى وسالونى الحاصل شنو؟ وهو ساعتها حقيقى فقدت النطق المهم بعد ان هدأت فسروا لى الكلام ده زى تفسير اخونا قرشو الفوق ده وواحده قالت لى ده قدرك مكتوب هناك فى المدينة ديك وحتى اليوم انتظر ذلك القدر.
سهام هم منو؟
تعالى كسرينى لو تقدرى
نطيط كلام لذيذ يديك العافية اسمعى الاولاد كيف؟؟؟؟؟
اما حكاية الجو دى بالغتى فيها معقول فى يوم يكون مناخنا مناخ كندا ومناخ كندا يبقى مناخنا؟ الله يجازى محنك غلبك تعملى فطور رمضان الظاهر.
مودتى
نجلاء الماحى
|
Post: #5
Title: Re: طربقه!!!...نطيط كلام
Author: Adil Osman
Date: 09-24-2007, 12:12 PM
Parent: #1
|
Post: #6
Title: Re: طربقه!!!...نطيط كلام
Author: Siham Elmugammar
Date: 09-24-2007, 12:25 PM
Parent: #5
عادل اهلا بيك
من شوفتى للكاريكاتير بتاعك ده و انا اتوجست الشر
اضطريت اجوجل عشان اعرف شنوDEJA-AU
اهاجوجل عرفنى الفى بطنك...
|
Post: #8
Title: Re: طربقه!!!...نطيط كلام
Author: Siham Elmugammar
Date: 09-24-2007, 12:34 PM
Parent: #6
سياسى شنو ترا خلى الاجتماعى يتغير أول ...
وداد مرة ابراهيم خالى امها ماتت فى مدنى عزيتها بالتلفون زعلت!!!! يعنى شنو؟؟؟ أمشى مدنى
جات راحعه الخرطوم دربها عديل اشتكتنى للحكومه (أمى) يعنى كيفن بتك ما بتجى تعزينى فى أمى؟؟؟؟؟
ده كلام ده يعنى اخلى اولادى و شغلى و اطنطر مدنى .... التلفون ده مشكلته شنو؟؟
اللهم ارحم حجه مسكه و توب عليها و اسكنها فسيح جناتك
خت اليد فى الراس والا الدعا ده
ــــــــــــــــــــــــــــ
* المجتمع السودانى و تحويل الاحزان لإجراءات
وهــــــــــــــم
|
Post: #9
Title: Re: طربقه!!!...نطيط كلام
Author: ابو جهينة
Date: 09-24-2007, 12:51 PM
Parent: #6
سهام
كل سنة و إنت طيبة
سؤالك دة مهم و ما يتفوت ساكت
| Quote: كم مره الواحد/ه فينا سرح/ت فى الشك ان ما يحدث امامه/ا قد حدث من قبل و هو/ى لات/يدرى متى و أين .. كيف يمكن لمشهد واحد ان يتكرر بهذا التفصيل...هل التارخ يعيد نفسه تماما ام نعيده نحن فى ذاكرتنا الفرديه ... نطوق لحظات بعينها لسبب ما.. ثم نعيد انتاجها مره اخرى لنعيش فى و هم الزمان و المكان.. |
أحياناً .. أمر بظرف معين مع ناس معينين .. و أكون متأكد 100% من أنني قد مررت بهذا الموقف .. بل أحياناً أعرف ما سيقوله الواقف أمامي و كيف ستتصرف الواقفة أمامي .. يجعلني هذا الأمر أحياناً في ذهول و كأنني في حلم.
إليك بعض المنقول عن هذا الأمر :
Quote: تحدث كثيرا معنا الحادثة التالية : تشاهد موقفاً ما وتشعر بأنه سبق أن مر عليك بكافة تفاصيله وتبدأ في محاولات للتذكر الا انها تبوء بالفشل ..
تسمى هذه الظاهرة بالفرنسية ( ديجا فو ) وتعني ( شوهد من قبل ).
والتفسير العلمي لها هو أن الدم دائماً يصل الى الفص الايمن في المخ والفص الايسر في نفس اللحظة ولكن في هذه الحالة الذي يحدث بأن الدم يصل الى الفص الايمن قبل الايسر بجزء يسير من الثانية فيصبح المشهد الذي شاهدته للتو ذكرى بالنسبة للفص الايسر لأنه تأخر جزءاً من الثانية ..
فيراودك شعور بأنك سبق وأن شاهدت هذا الموقف من قبل. |
و رأى آخر :
Quote: المعلومات لا تمشي في الشرايين, فقط الدم يفعل ذلك, أما المعلومات فتسير في الأعصاب على هيئة اشارات كهربائية يترجمها المخ الى الصورة التي تراها أو تسمعها أو تعيها.
أما النظرية العلمية المفترضة لتفسير هذا الأمر فهي كالتالي: أن المخ عبارة عن مناطق وكل منطقة مسؤولة عن وظيفة مثال : الرؤية تكون في مؤخرة الرأس, السمع على الجوانب وهكذا .
وما يحدث أنك عندم ترى شيئا يترجمه الجزء الخاص بالرؤية visual center وهذه هي وظيفته ترجمة الاشارات الى صورة فقط أما فهم هذه الصورة استيعابها أو تذكرها اذا كانت مألوفة يكون في جزء اخر
و يسمى cognitive center
في هذه الظاهرة يحدث أن هناك في بعض الأحيان تأخر بين العمليتين وتمر برهة من الوقت تدخل
فيها الصورة الى مركز الذاكرة قبل ال cognitive center ثم تذهب الصورة اليه لاحقا فيظن المخ أنه راها من قبل
عندما نكون مجتمعين بين العائله.... الاصدقاء.. او حتى عندما نمشي في مكان عام نشعر بان هذا الموقف او المكان قد مر بنا من قبل..... نفس الكلام.... نفس المكان.... وحتى نفس الحديث!!! بعدها نبدأ باسترجاع الماضي والتذكر وطرح الاسئلة.... متى مر بنا هذا الموقف ربما ؟ في الحلم او قد تكررت نفس الاحداث..... ولا تبالي اذا قلت هذا الشيء امام الجميع لانك في حينها تكون متاكد بانك مررة بهذا الموقف من قبل!!!!
لماذا نشعر بهذا الشعور؟؟؟؟؟
يرجع ذلك بانك خلال تواجدك في هذا المكان اوالموقف تترجم الاحداث الى اشارات في الاعصاب فترسل الاعصاب هذه الاشارات الى مركز الذاكره القصيرة (short memory) ليتم حفظها هناك ولكن هي جزء من الثانيه , فقد ترسل الاعصاب نفس الاشارات الى مركز الذاكره الطويله
(long memory) بالخطئ فنشعر بان هذا الموقف قد مرنا بنا من قبل !!! وللعلم مركز الذاكرة الطويلة هي المكان الذي يحفظ فيه احداث قديمه يمكن استرجاعها مع الزمن |
دمت
|
Post: #10
Title: Re: طربقه!!!...نطيط كلام
Author: اسعد الريفى
Date: 09-24-2007, 12:53 PM
Parent: #1
Quote: إلا سبق لكم وشعرتم وانتم في موقف معين إن هذا الموقف يتكرر بمعني انه حدث قبل ذلك بنفس الصوت والشكل والإحساس ........... ولا تجد أي تفسير لذلك ؟
فالتفسير بسيط فعند خروج الروح الثانية ( الجسد الأثيري ) تقابل أشياء
كثيرة في أزمان كثيرة فمن الممكن أن تدخل المستقبل أو الماضي أو ما إلي ذلك ولاكن دون أدني وعي من جسدك و لذلك عندما تقابل بعض المواقف من المستقبل يظهر إلي الوعي من ألا وعي بجسدك لافتة كبيرة كتب عليها انك راءيت هذا الموقف سابقا .......!
لقد فسر بعض العلماء هذا الموقف علي أنة سبق في الإشارات ألمخيه بمعني إننا نعرف أن المخ عبارة عن فصين فص أيمن وفص أيسر فعند حدوث هذا الموقف يكون هناك تأخر في روئية الإشارات ولكني أختلف معهم إختلاف بسيط كما ذكرت وهذا الأختلاف ليس إلا دراسات حقيقية في تدريبات التحكم في الجسد الأثيري بمعني بسيط ..........
يمكن التحكم في الجسد الأثيري بالوصول ألي مرحلة النوم العميق ونحن واعيين لكل شيء وفي هذه الحالة يمكن أن تتحكم في خروج جسدك وفي هذا الصدد يوجد تدريبات كثيرة جدا ولاكن حزاري فهذه التدريبات لا تتم ألا في أشراف متخصصين ومنها تدريبات الإسقاط النجمي وتدريبات التحكم في الأشياء عن بعد وتدريبات التلبثه أو التخاطر وغيرها الكثير .
وعندما علمت السلطات السوفيتية بوجود مثل هذه الأشياء إستغلت بعض الرهبان من الشاولين ممن يشتهرون بالتشي كونغ وأجرت تجربة مهمة جدا وهي البحث عن ما يسمي بالأمواج الدماغية فكل إنسان كما ذكرت تخرج منه إنبعاسات إشعاعية سواء كانت من الشكرات أو من الجسد بصفه عامة وهنا يلزم علينا التطرق إلي معني كلمة الشكرات وهي كلمة هندية قديمة تعني مراكز الطاقة وهم سبع مراكز في الجسد وهم .
شكرا التاج :ـ لونها ابيض ذهبي ..... (المركز السابع )
مكانه في اعلي الرأس ( اليافوخ ) ، لونه ابيض ذهبي مائل إلي الفضة ويستقبل الطاقة السماوية .
شكرا العين الثالثة :ـ لونها بنفسجي ..... ( المركز السادس )
مكانه بين الحاجبين ، لونه بنفسجي ويتعلق بالبصيرة ويعتبر مركز التحكم في الطاقة الداخلية .
شكرا الحلق :ـ لونها ازرق ........ ( المركز الخامس )
مكانه عند الحنجرة ، لونه أزرق ويتعلق بالعلاقات مع الأخرين والتعبير عن النفس .
شكرا القلب :ـ لونها اخضر ........ ( المركز الرابع )
مكانه عند القلب ، لونه أخضر ويتعلق بحب الأخرين وحب الذات .
شكرا الضفيرة الشمسية:ـ لونها اصفر ........ ( المركز الثالث )
كانه عند ألسره ، لونه أصفر ويقوي الإرادة وهو مركز تكوين الطاقة الداخلية .
شكرا الجذر :ـ لونها برتقالي ...... ( المركز الثاني )
مكانه تحت ألسره بمقدار 10 سم تقريبا ويعتبر مستدوع المشاعر والعواطف المتعلقة بالماضي
شكرا القاعدة:ـ لونها احمر ....... ( المركز الأول )
مكانه بين الشرج والعضو التناسلي في العضلة البدينة لونه احمر ويستقبل الطاقة الأرضية .
والتجربة هي إنهم قاموا بحبس فردين من الرهبان احدهم في مختبر في روسيا والأخر في غواصة في المحيط الأطلنطي واعطو احدهم ورقة مكتوب فيها كلام بلغة لا يفهمها الشخص الثاني وطلبو منة إن ينقل هذا الكلام إلي الشخص الثاني وبالفعل كانت النتيجة مذهلة بكل المقاييس فالشخص الثاني موجود بغواصة داخل المحيط وغرفته مبطنة بمادة عازلة لكل الأمواج الفوق سمعية فما هذه القدرات الخارقة التي جعلت هذا الشخص يصل إلي فهم وكتابة ما قراه الشخص الأول ولا يوجد أي تفسير علمي لذلك.........! |
عجبنى الكلام
و عند البحث و التقصى وجدنا الامور عادية و بتحصل كتير..
|
Post: #11
Title: Re: طربقه!!!...نطيط كلام
Author: Siham Elmugammar
Date: 09-24-2007, 01:33 PM
Parent: #10
ابوجهينه ..اسعدالريفى (ود حلتنا الزماااان)
اذيكم و شكرا ليكم فى اضافة البعد العلمى لطربقتى
لكن اها كدى لاحقونى فى النطيط كان بتقدرو
اوع تمشو بعيد
اسعد راقب اسمك ح يكون مكتوب المهم طمنى انك بره السودان (اتذكرت ليك قصه حكيتها لنص السودان باقى احكيها هنا)
_______________________________
بالتلفزيونى " كونو معنا"
|
Post: #12
Title: Re: طربقه!!!...نطيط كلام
Author: Siham Elmugammar
Date: 09-24-2007, 01:36 PM
Parent: #11
نجلاء كسيرك هين الصعب يلمو فيك كيف؟؟؟؟؟
|
Post: #13
Title: Re: طربقه!!!...نطيط كلام
Author: Siham Elmugammar
Date: 09-24-2007, 01:38 PM
Parent: #12
كنت حرة نفسى اقرر متى اريد ان ارفع ضغطى و متى اريد ان احافظ عليهو normal لغاية ما فرض السيد المدير على الشخصى الضعيف القرأه اليوميه للجرائد
_________________________________________________
ندمت على صحبة مديرى و مجتبى!!!!!
|
Post: #14
Title: Re: طربقه!!!...نطيط كلام
Author: Siham Elmugammar
Date: 09-24-2007, 01:41 PM
Parent: #13
امى الله يديها العافيه مسميه اخوانى/تى القاعدين معاها فى البيت مضارب التنس قالت تجى تعمل اى حاجه يجيها واحد/ه منهم يقول ليها يا حجه لا ما انتى عيانه مافى داعى ... ما خلاص نحن بنمشى بدلك... ما اكلتى... ما شربتى ..ما بعرف شنو داك...المهم تتخارج من و احد يجيها التانى ..
اها لمن نجى نحن الساكنين بره المسكينه قالت بنلعبها زوجى
_________________________________
عثمان ميرغنى ...زهير السراج..
رشا عبدالكريم ...صلاح عووضه(وينو الايام) دى
مضارب التنس...
|
Post: #15
Title: Re: طربقه!!!...نطيط كلام
Author: saif basheer
Date: 09-24-2007, 02:02 PM
Parent: #14
الخرف المبكر!! يمكن...
رمضان كريم.. متأخرة شوية..
تحيات للجميع..
|
Post: #16
Title: Re: طربقه!!!...نطيط كلام
Author: سلمى الشيخ سلامة
Date: 09-24-2007, 04:07 PM
Parent: #15
قبال ما تكسرينى اقول ليك حاجة
بشوف الحاجات البتحصل قبل ما تحصل
مرة واقفة للمواصلات فى شارع الجميعاب
جا شاب ماشى فى طرف الشارع وفى حافلة كاسحة كسح
اها اقوم اشهق فى لحظة الشهقة تاخ الحافلة ضربت الزول كرو وقع
اها دى ما حالة غريبة؟وطربقة حدس ؟(الحدس حبيبى)
والعجب الاحلام
امى الله يرحما كانت بتقول لى لما احكى ليها حلم (اللهم اجعله خير)
لانى بشوف الحاجات زى ما بتحصل
قلت لنفسى براى يارب احلم اكون بيل غيتس امكن مشاكلى ومشاكل اصحابى تنحل
احححححححححححى كان بقيت الزول دا ما بختنا عديييل كدى
لك مودتى وخليك مطربقة الطربقة لذيذة مرات
|
Post: #17
Title: Re: طربقه!!!...نطيط كلام
Author: Ahmed musa
Date: 09-24-2007, 04:31 PM
Parent: #1
{سهام}
انا عندي حاجة قريبة لحاجة {سلمى الشيخ سلامة في الإخراج} دي ... الغريبة مرة قلت كدي أختبرها ... جه زول قبل كده أنا شفتو في زمن تاني .. قلت حيتلفت .. إتلفت .. قلت حيدقش الحجر .. دقش الحجر .. قلت حيسلم على البت .. سلم .. قلت البت حتبتسم بغنج .. إبتسمت بغنج .. خُفت .. الشاشة أتمسحت أهااا دي شنوا .. أرجعي لقوقل أسأليه شكلك علاقتك بيهوا كويسة .. الإحلام دي لا إله إلا الله !!!!!!!!!!! يمكن عشان قريت مسرح زي {سلمى الشيخ سلامة في الإخراج؟؟؟}
ــــــــــ
نجلاء أنا بوريك بكانها بس ما تخذليني تبقى خيانة بدون فايدة
|
Post: #18
Title: Re: طربقه!!!...نطيط كلام
Author: sanaa gaffer
Date: 09-24-2007, 05:01 PM
Parent: #1
| Quote: كل شىء يأتى اكثر من مره... الاحداث.. و حتى اللحظات...كم مره الواحد/ه فينا سرح/ت فى الشك ان ما يحدث امامه/ا قد حدث من قبل و هو/ى لات/يدرى متى و أين .. كيف يمكن لمشهد واحد ان يتكرر بهذا التفصيل...هل التارخ يعيد نفسه تماما ام نعيده نحن فى ذاكرتنا الفرديه ... نطوق لحظات بعينها لسبب ما.. ثم نعيد انتاجها مره اخرى لنعيش فى و هم الزمان و المكان.. |
اختنا سهام .. والجميع هنا ..
رمضان كريم ...وتصوموا ما تبقى منه وتفطروا على خير ...
اتتني لحظات كهذه فكتمتها في نفسي خوف اتهامي بالجنون ...
هسة كدة اطمنت ... يعني ما براي ...
بس كمان الحاجة الغريبة التانية اني مرات باحلم وانا صاحية ...
ما احلام يقظة ... حلم عديل .. باكون حاسة اني ما نايمة وفجاة بافتح عيوني وانا في تمام اليقظة ..
زي ما قال عادل امام ... حاجات غريبة يا جدع !!!!
|
Post: #19
Title: Re: طربقه!!!...نطيط كلام
Author: Ahmed musa
Date: 09-24-2007, 05:40 PM
Parent: #1
Quote: ما احلام يقظة ... حلم عديل .. باكون حاسة اني ما نايمة وفجاة بافتح عيوني وانا في تمام اليقظة ..
|
تُف تُف تُف
حوالينا ما علينا
{ولا يؤوده حفظهماوهو العلي العظيم}[/B)
(17 مرة)
|
Post: #20
Title: Re: طربقه!!!...نطيط كلام
Author: Najlaa El Mahi
Date: 09-24-2007, 06:28 PM
Parent: #19
سهام عن اذنك زحى لى من احمد موسى ده شوية شكله كده حا يعمل خيانات انا مدسية يا اخوى كعب الكعب سهام طربقى طربقتك ده كله ما بيحلك الاولاد زائد ابوهم ذائد مديرك فى الشغل وزائد رمضان وفطوره وضيوف مجتبى شدى حيلك خلى مضارب تنس هسع الجاب زهير السراج وعثمان ميرغنى لحدى عندك شنو؟ اها دى حالة شفتيها كانه شفتيها قبل كدة برضو مش؟
والله اتلومتى مع مرة خالك ابراهيم فى زول بعزى ليه زول فى التلفون اى ما تمشى مدنى وهى بعيدة؟
(شباشب مقلوبة كتير) نظام الشكلة انشاء الله تدور
حكمته بالغة ولا شنو ما بعرف
كدى جرى لينا ونسة مع بنتك وكدى النشوف طربقتها ولا طربقة امها؟
سهام مرة شفت اللهم اجعله خير واحد كبير كدة مات والناس بترقص شفتى ليك ناس بترقص فى بيت بكاء؟
اها لى يوم الليلة منتظرة البكاء البرقصوا فيه ده.
هم منو؟
نجلاء الماحى
|
Post: #21
Title: Re: طربقه!!!...نطيط كلام
Author: سجيمان
Date: 09-24-2007, 06:34 PM
Parent: #1
سهام...
" الله يكفينا شر الما نقدرا"
|
Post: #22
Title: Re: طربقه!!!...نطيط كلام
Author: jini
Date: 09-24-2007, 08:08 PM
Parent: #1
Quote: عثمان ميرغنى ...زهير السراج..
رشا عبدالكريم ...صلاح عووضه(وينو الايام) دى
مضارب التنس... |
ناس جاحدة بشكل!
ديل يا هم الله قدرك عليهم!ما نسيتى حاجة!
براية الحكومة البربطوها فى التربيزة زى مفرمة اللحمة!
بريتين والقلم فى خبر كان!
جنى
|
Post: #23
Title: Re: طربقه!!!...نطيط كلام
Author: Najlaa El Mahi
Date: 09-25-2007, 08:53 AM
Parent: #22
عاوزة اطربق شوية
فى ناس كدة ياخدهم الحماس لعمل حاجات وبعدين يجتمعوا ويتفرقوا ويجتمعوا تانى ويكونوا لجنة واللجنة تلد لجان تانية كتير وبعدين الموضوع يموت دة يقولوا عليه شنو يا سهام الناس دى كانت بتحلم بتكوين العديد من اللجان؟
ضربة شمس فى نهار رمضان حار
اللهم اجعله خير بعدين عن السامعين حلمت امبارح فى تجمع بتاع ناس كتيرة وقاعدين يهتفوا عاوزين جاتوه عاوزين جاتوه
الحكومة طلبت من كل الافران صناعة الجاتوه للشعب الجيعان وانا واقفة عاوزة اشيل لى قطعة جاتوه جانى زول كدة زى البعرفه وطلب منى عدم اكل الجاتوه لانه مسمم.
والله يا سهام الطربقة دى زاتها غلبتنا نطربق كيف والحاجات مطربقة فوق راسنا.
مضرب تنس قصدك مضرب تنس طاولة؟
كورة طايرة انشاء الله ما تتلحق
الحر حمام السباحة ارحم
اعوم واعوم لمن اصل بحر ابيض
ابيض ضميرك يا سهام
هم منو يا سهام؟ نظام تحدى (وش غياظ جدا)
نجلاء الماحى
|
Post: #24
Title: Re: طربقه!!!...نطيط كلام
Author: نجوان
Date: 09-25-2007, 09:01 AM
Parent: #23
زي الشفت البوست بتاعك ده قبل كده يا سهام..
|
Post: #25
Title: Re: طربقه!!!...نطيط كلام
Author: Siham Elmugammar
Date: 09-27-2007, 10:18 AM
Parent: #24
سلام يا جماعه صدقو الازمه طيرت لى طربقتى من راسى
هسه 3 ايام و انا فى حاله عجيبه
قووووم يا ولدى الصغير ال حتى فى المرض مبارينى اقع جنبى
اها ده السبب الخلانى لى كم يوم كدى ما شديت سراير حوشى ده
لكن بشوف ضيوفى ما قصرو شدو الملايات و اتضايفو كمان
و حرسونى لمن زهجو ... عشان كدى لقيت الداهى غاتس فى الصفحه الرابعه
عليكم امان الله الا مرقتو بالسيرش
اها كدى ردود سريعه بس عشان تجمعو تانى
امشى الدكتور واجيكم بالمهله
سلمى سلامه (صدقى لله كدى بريدك ذى الشفتك فى حياه اخرى)... سجمنا
احمد موسى و نجلاء البليله حرقتنى
سناء حعفر هس بسلم لكن جاياك اوريك الاحلام البجد
سجيمان انت بى جاى يعنى خلاص لقيت جلابيتك
سيف بشير .. رمضان كريم اها لسه عندك كلى؟!!!
هوووى يا جنى اوعك تجيب لى سيرة زولك ده بى جاى تقوم قدر الفينى تطش
نجوان يكون ما بعيد
البجمع منكم/ن يرفع لى البوست ده باقى مروه للسيرش ماعندى
______________________
طربقه ممــــــــــــــــــــــــــــــــــــتده
|
Post: #26
Title: Re: طربقه!!!...نطيط كلام
Author: saif basheer
Date: 09-27-2007, 01:46 PM
Parent: #25
| Quote: اها لسه عندك كلى؟!!! |
لسه ياها الواحدة الفضلت دي..
|
Post: #27
Title: Re: طربقه!!!...نطيط كلام
Author: Siham Elmugammar
Date: 09-28-2007, 11:30 AM
Parent: #26
سيف يا صديقى الكليه الفضلت ليك هى ذكرى لكوم الانسانيه داخلك عشت يا عزيز
|
Post: #28
Title: Re: طربقه!!!...نطيط كلام
Author: Siham Elmugammar
Date: 09-28-2007, 11:45 AM
Parent: #27
سلمى انتى امك بتقول ليك "اللهم اجعله خير"؟؟!! و الله انتى فى نعمه
انا أمى عديل كده دفرتنى و قالت لى يا بت هوى لا انتى لا اختك دى تانى زول يحكى لى حلمه مافى؟؟؟ قولو بسم الله وتفو على شمالكم
كنت بعد كل حلم بكون عاضه على كمى و اهزهز فى رجلينى يالله هوى ما يتحقق
مشيت قال جبت لى كتاب عن الاحلام ذاد لي الطين بله
بعد داك بقيت نجيضه دورت ليك دعا بعد كل صلاه و فى كل وقت عاد ي الا نام الا اكل الطعام تشيل من راسى ده لا داير احلم بخير لا بى شر ..
اها احمدالله و اكون من عباده الشاكرين الطفيشه الياها
الا اختى و صلت حد عجيب لقيت نفسى انا ذاتى فى يوم بقول ليها يابت هوى خلى احلامك عندك فى ابردينك دى و اوعك حسك عينك تضربى لى عشان تخوفينى
هو نحن ناقصين لمن نشوفو الهم قبل و قوعه
|
Post: #29
Title: Re: طربقه!!!...نطيط كلام
Author: Kamal Karrar
Date: 09-28-2007, 11:58 AM
Parent: #1
سهام أختي هوي,,,
خلي الطربقة وجيبي قروش الصندوق.. الصرفة الجاية زي ما قلت ليك حقة الجماعة..لأنو عشان دايرين يعملوا "أوبرايت" للبرندة.. عشان العرش.. دحين أنت باركت للحاجة عرس بت بتها؟؟ ولا آآآ خايفة من مرة خالك تقدم فيك شكوى للحكومة...أكان ما بتقدري تغشينا قروش الصندوق.. خلينا نرسل ليك الولد من الصباح.. او نكلم الصرّاف يخصم منك المعلوم..
داير أسألك يا سهام يا أختي.. انت مش..الليلة 16 رمضان.. أها يا ربي داير أقول شنو؟؟؟؟
أها أتذكرت تصومي وتفطري على خير...
شوفي جنس الطربقة دي... دخل العظم الله يتقبل .. قولي آمين
|
Post: #30
Title: Re: طربقه!!!...نطيط كلام
Author: Siham Elmugammar
Date: 09-28-2007, 12:19 PM
Parent: #29
كمال كرار رمضان كريم يا شاب اها عشان اوريك الجن المبتعرفه
كمان جابت ليها خم انت دحين انا ما رسلت ليك حق الصندوق مع المدام يوم لاقيتها فى نفاس نفيسه الما نفست الا بعد ما ولدت؟؟!!
والله ده كلام كدى شوفها يمكن اشترتلها توب جديد... كمان دايرين ترسلو لى الولد ... دحين ولدك ده ذاته بعد ما صوته اتغير داك انا ما لاقيتو فى عرس بت بت الحاجه ذاتو كمان عامل شعرو راستا و قاعد ينقز فى الداره مع بت عشمانه الشالت اول صرفه.. يعنى ترا أديتوهو الصرفه الاولى عشان مرقدين لبتها...؟؟ مالكم غبيانين من بتى و الله يوم الليله الفينا ده عرسانها و قافين صف بس كدى تخلص تاسع دى...
كما عرستها لى ود خالى عشان ارضى امه الما عزيتها فى امهاو كدى اشوف ولدك يجى ينقز بى عندنا .. كما لحقتو ليك نجلاء الماحى.. يوم لقيتها قاعده فى اللجنه الانبثقت من اللجنه العملتوها من اللجنه الالف لمناقشة كيفية جعل شخصى الضعيف يدفع قروش الخطه الشالتها مدامتك...اهااااااااااااااااا
قلت لى الليله يوم كم رمضان؟؟؟!!!!
|
Post: #31
Title: Re: طربقه!!!...نطيط كلام
Author: أشرف البنا
Date: 09-28-2007, 02:59 PM
Parent: #1
سهام المجمر...
عاطر التحايا مني و عبري من نوال
رمضان كريم...
Deja vu ظاهرة إنو الإنسان مرت به الأحداث دي قبل كدا ظاهرة لا زالت غامضة بيسموها باللغة الطبية Paramnesia و الله هي ممكن تحصل للزول الطبيعي ( دا لو كان في زول 100% طبيعي ) لكن بتحصل لناس البيعانو من الصرع ( أسأل العافية للجميع ) و في ظاهرة تانية بت عمها إسمها Jame vu لما الواحد فجأة يشعر إنو الحاجة الحاصلة قدامو دي ما حقيقية... لكن بيني و بينكم بظروف السودان الحسة دي لو في مية ظاهرة vu تاني ممكن برضو تكون طبيعية  ...
مع خالص التحايا
للتواصل مع نوال ( [email protected] )
|
Post: #32
Title: Re: طربقه!!!...نطيط كلام
Author: Mohd Mubarak
Date: 09-28-2007, 03:14 PM
Parent: #31
سهام المجمر
سلامتك ..
ورمضان كريم ...
|
Post: #33
Title: Re: طربقه!!!...نطيط كلام
Author: Siham Elmugammar
Date: 09-28-2007, 04:11 PM
Parent: #32
لا حولتنننننن طبعا يا د. أشرف انا بقرا السطر الاول قلت نوال دى منو لمن قريت الايميل حتى وقع لى و بقيت ما محتاجه لبتاع اللورى*
سلامى لك و عبرك لنوال بتنا بت بحرى الما خمج... سلام لناس بحرى الجديده بنات كلهن بلا فرز (طبعا ما قلت ناس اداب جامعة الخرطوم) عشان انا و نوال كنا فرد 100% ايام الثانوى اكتر من الجامعه...و لى معها ذكريات يا اشرف تتاقل لابالدهب... امانه يا اخوى ما كنا راس هوس و مشاغبات...نوال ...دلال...سهام وماجدولين ..امنه و امنه...( و البت الفى الكنبه الورا دييييك يا نوال)بالمناسبه ده على حسب ترتيب الكنب و انت بادى من ورا
كلمه فى سرك: اسأل نوال قول ليها انتو كنتو فى ياتو ليست (قائمه) و انا ما بزيد و انت شديد!!!!
بالمناسبه دى رجال البورد و على رأسهم هشام المجمر بدو ليهم قصه كده ..مدرسة شنو داك العملت شنو داك..وناسها المبعرفهم ليك ديل...والبوست يجر يجر جر الجن و يفرخ بوستات
التقول كانو بيجو اوائل الشهاده...ده كان ما كنا بنعصرهم!!!!!!
اقول ليك اغرب حاجه يا اشرف انو امبارح الغريبه دى انا كنت بحكى لبتى حكايتنا نحن اربعه طالبات مع مديرة المدرسه ذلك الزمان ست أمنه (اللدغه) المهم احسب دى من المصادفات العجيبه مع البوست ده.. وعندك اخوك ود شمبات القاعد تحت ده ماشه ارد عليهو بعد شويه امبارح دى اتذكرته ...مش غريبه و بتحصل كتير انك تتذكر حاجه او زول فجأتنلى تلقاهو حضور بشكل ما....
والواحد يقوم يقول الفرماله المعروفه "اريتنى لو اتذكرت لى مليون جنيه"
مع انو المليون جنيه بعدوها ما بتذكروها!!!!!!
اها انا هسه راحت على مليونين
______________________
بالمناسبه من لمدارس البنات!!!!!!
* لاقيت لى واحد بتاع لورى قبل فتره كاتب " وقع ليك و الا اوقعه ليك"
|
Post: #34
Title: Re: طربقه!!!...نطيط كلام
Author: Najlaa El Mahi
Date: 09-28-2007, 07:12 PM
Parent: #33
سهام اقول ليك وقعى على العريضة تقومى تمشى تطفشيها مرة واحدة من موقعها هسع ده يقولوا عليه شنو؟؟
رجعى لى العريضة انا فى عرضك عليك الله يا سهام بطلى الهزار الناشف دة
دى اخر حاجة كنت اتوقعها وكت بتقدرى تسحبى العرائض البتناشد فى حكومتنا الرشيدة انها تكون راشدة وتحكم بى القانون الكتبته بايدها والله انحنا ما طلبنا حاجة اكتر من كدة خلاص امشى كلميهم خليهم يحاسبوا الناس العملوا العملة الشينة دى فى حق امنا حواء وكلميهم بس هم يعملوا الحاجة دى من سكات ونحن ما حانحاول نضايقهم تانى.
وقع ليك ولا اوقعه ليك؟ وشوش عابسة ونظرة عين حمرا
بقيتى كيف؟ امانة عليك ترجعى لى العريضة تانى الا اطربق معاك جنس طربقة ما سمعتى بيها قبل كدة واخلى ليك البوست يفوت الكبار والقدره يلا سريع يا شاطرة عشان ما احرش ليك داليا بتك اتفقنا؟؟ حننينى عند الحنانة تتذكرى؟
نجلاء الماحى
|
Post: #35
Title: Re: طربقه!!!...نطيط كلام
Author: Siham Elmugammar
Date: 09-29-2007, 09:37 AM
Parent: #34
هووووى يا نجلاء شنو السلبطه العليكم دى
مره كمال كرار مزرزرنى فى قروش الخطه و كمان هسه جابت ليها سرقة عرائض
عاد النصيحه دى واسعه شديد
اسمعى يا ختى انوقعه ليك ..عريضتكم اصلها مسروقه مسروقه من قبل ما تمضوها و السارق انتى عارفاهو زى جوع بطنك مالك تعاينى فى الفيل و تطعنى فى ضل الطربقه؟؟!!
__________________________
صدقى لسه قاعده تتحنن
|
Post: #37
Title: Re: طربقه!!!...نطيط كلام
Author: Siham Elmugammar
Date: 09-29-2007, 11:45 AM
Parent: #35
رمضان دخل فى العضام
حبوبتى عيشه الله يرحمها ..كانت مره صلايه.. صوامه.. حجاجه (27) حجه كان هذا رصيدها ده غير الفكه( العمره) ما بتنعد
اعتقد انها كانت اول زول قال المقوله بتاعت "حليل رمضان باقى فيهو عشرتين و تسعه"
ود عمتى كان فاطر معاها حرد ليها الفطور كما الاجاويد كان حرد رمضان ذاتو
اها هسه بالجد حليل رمضان باقى ليهو عشره و تلاته
(الله يقدرنا عليهم)
انا مافى شى غايطنى الا لهفة الناس الما بقى عليهم الصيام على الصيام ذى بتى و بت عمتها (وهـــــــم)
الوالد الله يرحمه كان يمنع منعا بات انو الزول يصوم قبل يبقى عليهو وكان بيقول ده بيعلم الزول الكضب..رحمه الله اورثنا كراهية الكضب شديد..انا لما زول يكضب على و اكتشف ببقى لا بشوف لا بسمع
الكضب مفتاح الشر
|
Post: #40
Title: Re: طربقه!!!...نطيط كلام
Author: Siham Elmugammar
Date: 09-30-2007, 11:56 AM
Parent: #32
محمد المبارك!!!!!!!!!!!!
اهلا و سهلا
كيف ووين و كده؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!
ومبروك و متين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
|
Post: #43
Title: Re: طربقه!!!...نطيط كلام
Author: Mohd Mubarak
Date: 09-30-2007, 10:20 PM
Parent: #40
مشتاقين كتير ...
تصدقي كل الحاجات جات ورا بعض
من غير فواصل
بس كده أحسن ..
لأنو التفكير الكتير مرات كتيرة بكون مشكلة
وإحتمال كبير يكون سبب فشل مش نجاح
خصوصاً لو كان شكل الحاجات واضح
يبقى التأخير لزومو شنو ؟!..
عموماً .. الله يبارك فيك
وتسلمي يا غالية
|
Post: #36
Title: Re: طربقه!!!...نطيط كلام
Author: Kamal Karrar
Date: 09-29-2007, 11:44 AM
Parent: #1
سهام يديك العافية...
تعرفي لمن سيرة بحري دي تجي شعرة جلدي بتكلب.. اصلها مسقط الرأس..ولدت في الدناقلة شمال..ترعرت في المزاد شمال .. بنيت في شمبات .. ولمن اقطع الكبري ..أعد في الساعات عشان أرجع.. بيت جدي في حلة حمد.. يعني أكيد..أنتو على العين والرأس ..لأنكم من بحري..
بس مالك علي هشام المجمر وعلينا يا سهام.. يعني عشان بنعز بحري بنعز كل ما فيها من مدارس وحجر ومدر.. أها.. عشان كلامك ده حقو ندخلك لجنة التنادي لرد الجميل لبحري الثانوية.. صحيح ما جينا أوائل الشهادة.. ربما بعضنا كان.. لكن..يعني نحن بنحن للزمن الجميل...والشيء القدمتو لينا بحري الثانوية.. أها بعدين نقبل على بحري الريفية ولا الأميرية للبنات.. وبرضو نساهم في إعادة الروح ليهم لأنهم قدموا الكثير لأخواتنا ولزوجات البعض منا..أها كدي عرفتي إنو المدام برضو من بحري.. وكان كمان عايزين نعمل لجنة لدعم مدرسة الدايات كمان ما في مانع.. بس حيكون رئيسها الكابلي لأنو بيتو كان فاتح (دايجونال) من مدرسة الدايات
-----------------------
بحري طراوة
|
Post: #39
Title: Re: طربقه!!!...نطيط كلام
Author: Siham Elmugammar
Date: 09-30-2007, 08:48 AM
Parent: #36
العزيز كمال يا اخوى و مالك دورت فينى كدى لمن خوفتنى.. انت قايلنى طابور خامس و الا شنو (ناس امدرمان):
و الله انا بحرى زاتى ما برضى فيها و يا شباب بحرى يلا لى بحرى
و الله يا كمال كل ما اجى بشارع المدارس المغسه تشقنى
هو حكومة الجن دى فضلت فيها ريفيه و الا اميريه
ما زمان ودتهم الخور
عشان تطلع لينا بالسلم التعليمى بتاعها ده
فى زمتك يا كمال شفت ليك سلمما فيهو درجات
هسه السوهو فى النظام التعليمى فى السودان ده براهو ما جريمه ضد الانسانيه..
|
Post: #38
Title: Re: طربقه!!!...نطيط كلام
Author: أشرف البنا
Date: 09-29-2007, 08:48 PM
Parent: #1
سهام المجمر
سلام
بالله أنا الزمن دا كلو كنت قايل مرتي بت هادية و عاقلة ...
بالمناسبة حكت لي قصتكم مع المديرة خارج حصة ال Literature ... سلامك وصل ليها و هي منتظرة إيميل منك ...
مع خالص التحايا ..
|
Post: #41
Title: Re: طربقه!!!...نطيط كلام
Author: Siham Elmugammar
Date: 09-30-2007, 06:35 PM
Parent: #38
اشرف لسه ما كلو ما مرق؟؟؟ كدى قول ليها اها استاذ احمد جضوم عملنا فيهو شنو...غايتو الله يغفر لينا..والا سومه الجرثومه
صدق يا اشرف انا مرات بقول هييييييى اكيد ديل ما نحن
حليل معلمين زمان ..حليل زمنهم و حليل تعليمهم و حليلنا نحن ذاتنا
سلام بقدر سبيب الراس لنوال و حتى نتواصل
ااااى نوال الهاديه الرايقه؟؟!!!!!!!!!!!!!!
|
Post: #42
Title: Re: طربقه!!!...نطيط كلام
Author: jini
Date: 09-30-2007, 08:04 PM
Parent: #41
| Quote: حبوبتى عيشه الله يرحمها ..كانت مره صلايه.. صوامه.. حجاجه (27) حجه كان هذا رصيدها ده غير الفكه( العمره) ما بتنع |
27 حجة!
يغنى بتعمل لاندينق Landing سنويا لمدة 27 سنة ولو الكعبة فى كتدا كان سجلوها ليها بى اسمها موش يدوها الجواز الججازى بس!
تلقاها استخدمت وسائل النقل كلها حتى السباحة!
فى واحد سودانى فى المدين المنورة مجاور فى الروضة الشريفة الله يرحمه حج اربعين مرة كدارى وهو اعرج مسمينو ابورجيلة!
يا ربى يكون ابو رجيلة البص الاصفر داك!
جنى
|
Post: #44
Title: Re: طربقه!!!...نطيط كلام
Author: خدر
Date: 09-30-2007, 10:33 PM
Parent: #42
سهام
انت و ضيوفكـ طربقتكم لذيذه
متابع معاكم
|
Post: #45
Title: Re: طربقه!!!...نطيط كلام
Author: الملك
Date: 10-01-2007, 01:38 AM
Parent: #44
Quote: انت و ضيوفكـ طربقتكم لذيذه
متابع معاكم |
انا زى طارق
|
Post: #46
Title: Re: طربقه!!!...نطيط كلام
Author: Siham Elmugammar
Date: 10-01-2007, 07:53 AM
Parent: #45
| Quote: سهام مرة شفت اللهم اجعله خير واحد كبير كدة مات والناس بترقص شفتى ليك ناس بترقص فى بيت بكاء؟ |
أجى يا نجلاء ده سؤال شنو ليك؟؟؟؟
ده ما عرس الشهيد و البرقص ده ما حاكمك وحاكم ابو اهلك كمان .. مالك بتتغابى فيهو العرفه
|
Post: #47
Title: Re: طربقه!!!...نطيط كلام
Author: Siham Elmugammar
Date: 10-01-2007, 08:07 AM
Parent: #42
غايتو جنس حساده.. لكن بينى و بينك فعلا استخدمت كل وسائل المواصلات..
حبوبه عيشه دى يا جنى عنده قصص لذيذه بشكل ... طبعا نهائى من ولدونى لمن ماتت ما سمعتها جابت سيرة زول يعنى قطعت فيهو... وكانت الله يرحمها ما بتحب الشناف.. كنت و الهام لمن نطبخ لينا حاجه نجى شايلين الكمشه والا المفراكه يا حبوبه كدى عليك الله ضوقى ملحه تمام و الاداير شنو؟؟؟ نخطبها بالشايلنو فى طرف بطن يدها عشان نلطخ الضواقه... وهى لازم تقول ليك "احى احى يا يمه انشألله ده ملاح حسن ود ست نور اختى" تقوم تعرف ملاحك خطير... المهم يجو اصحابك اللسانهم طولهم يقولو ليك " ده ملاح يجوز به الوضوء" امانه ما شنافين..
الله يرحمها كانت كثيرة الدعا لنا و كتير من الخير ببركه دعاها
تعرف يا جنى مره صاحبك هشام مزنوق فى عشرة حريق قدر ما حاول يتم النزول ما قادر المهم قال و الله ده كلو من حبوبه عيشه دى داخل مارق شابكانى منو هشام؟ انت يا يابا تتعلى ما تتدلى...
|
Post: #48
Title: Re: طربقه!!!...نطيط كلام
Author: jini
Date: 10-01-2007, 08:17 AM
Parent: #47
سهام المجمر
ل,وووووووووووووووووووووووووووووووووووول
| Quote: تعرف يا جنى مره صاحبك هشام مزنوق فى عشرة حريق قدر ما حاول يتم النزول ما قادر المهم قال و الله ده كلو من حبوبه عيشه دى داخل مارق شابكانى منو هشام؟ انت يا يابا تتعلى ما تتدلى... |
بكو كمان جمال بروتين قاعد وراهو والله بى اسانسر ما يدلى!
وتانى لوووووووووووووووووووووووووووووووول
| Quote: ده ملاح يجوز به الوضوء" امانه ما شنافين.. |
ااكيد كلهم اتيمموا ما عدا جمال بروتين!
بى طريقتكم دى بتكتكلوا ليكم زول ضحكا!
جنى
|
Post: #49
Title: Re: طربقه!!!...نطيط كلام
Author: salma subhi
Date: 10-01-2007, 08:28 AM
Parent: #48
سهام كيفك
من بعد مقدمتك الحلوة دي أديك كلام
في ناس بتمل روحا ناسية
وفي ناس بتعمل روحا متناسية
وفي ناس بتعمل روحا ما ناسية
معاي....
كل الود
|
Post: #50
Title: Re: طربقه!!!...نطيط كلام
Author: Siham Elmugammar
Date: 10-01-2007, 10:04 AM
Parent: #49
الاعزاء خدر و الملك
الرسول عاد كان تقعدو فراجه
طربقو معانا
لووووووووووووووول ساى يا جنى
خل تعلم ان بروتين مركب طفايات فى خشمه و الكلام على زمة عاطف
قالو الاكل ملهلب الناس تكون ما قادره تشيل اللقمه بروتين بكون اكل عشره
سمحه العافيه
زولك من النقه جاهو سكرى
سلمى صبحى اهلا بيك فى حوش الطربقه
رايك شنو في ناس بتعمل ماشايفه لكن مشغله طرف عينه عشان يشوف
انك شايفه انها ما شايفه و الا ماشايفه انها ماشايفه
وانتى بتكونى شايفه انها شايفه و لكن عامله ماشايفه و عايزه تعرف انك عارفه انها شايفه و الا ما شايفه!!!!!!!!!!!!!
__________________________
و شوف يا زمن الغبا فى العرفه
|
Post: #51
Title: Re: طربقه!!!...نطيط كلام
Author: Nader Abu Kadouk
Date: 10-01-2007, 10:19 AM
Parent: #50
سهام المجمر
وينك يازوله ياسمحه
و رمضان كريم
ودابكدوك
|
Post: #53
Title: Re: طربقه!!!...نطيط كلام
Author: saif basheer
Date: 10-01-2007, 10:30 AM
Parent: #51
Quote: الرسول عاد كان تقعدو فراجه
|
مع إنو الكلام ما لي، لكن يبدو إنو المزاج عالي!!
|
Post: #54
Title: Re: طربقه!!!...نطيط كلام
Author: Siham Elmugammar
Date: 10-01-2007, 10:42 AM
Parent: #51
نادر يا دفعه ويييين الحى بيك؟؟؟!!!
هى هى هى (ده تكشم) بكسر التاء
و الله يازوله يا سمحه دى رفعت معنوياتى شدييييييييييد
بس انشألله ما تكون المقصوده سماحة روح و الكلام الفاضى ده
وتكون السماحه النشوفه عديييييييييييييييييل كده
غايتو دى فايدة يكون الزول ما شايفك
همام المجمر عندو قوله
قال اول ما تسمع الناس بتكلمو فى زوله و يقول والله طيبه خلاس
تعرف انها ما بتتقابل
|
Post: #56
Title: Re: طربقه!!!...نطيط كلام
Author: Nader Abu Kadouk
Date: 10-01-2007, 11:00 AM
Parent: #54
سهام
اليوم داك العزمتك إنت وندي في ليمون البزنس
إنت قلتي ح تردي العزومه
لكن ياختي من ديك و عيك
مشيتي ياختي بوشك
بوشك دي اسألي منها الروس ناس سيف
انا ماقلت سيف بشير
إنت عارفه اختي الكبيره وهي اصغر منك
قالت لي الله مايحضرنا خرفك
ودابكدوك
|
Post: #57
Title: Re: طربقه!!!...نطيط كلام
Author: Siham Elmugammar
Date: 10-01-2007, 11:22 AM
Parent: #56
ياخونى البوست ده انا ح اغير عنوانه بدل طربقه يبقى سلبطه
من كمال و قروش ختتو لنجلاء المالقت كشفها لنادر و ليمون البيزنس
غايتو يا نادر الشفقه تطير انت مالك ما عندك صبر كده
ما ترانى مستنيه لى كبايه تفضى !!!!!!!!!!
|
Post: #52
Title: Re: طربقه!!!...نطيط كلام
Author: Hussein Mallasi
Date: 10-01-2007, 10:25 AM
Parent: #50
Quote: تعرف يا جنى مره صاحبك هشام مزنوق فى عشرة حريق قدر
ما حاول يتم النزول ما قادر المهم قال و الله ده كلو من حبوبه عيشه
دى داخل مارق شابكانى منو هشام؟ انت يا يابا تتعلى ما تتدلى.... |
|
Post: #55
Title: Re: طربقه!!!...نطيط كلام
Author: Siham Elmugammar
Date: 10-01-2007, 10:46 AM
Parent: #52
ملاسى اذيك و رمضان كريم
سيف بشير
المزاج كان رايق انا قاعده اطربق جنس ده
|
Post: #58
Title: Re: طربقه!!!...نطيط كلام
Author: عبدالله داش
Date: 10-01-2007, 11:58 AM
Parent: #1
طربقـــــــــه
البوست دا عاجبنى ســـــــــاى
النصيحه عايز أطربق معاكم
بس ما ظنيت أكشكش فكة النضم
وتفلت زى سبحه تضوى فى ليل صوفيه
بس والله طربقتكم سمحه حيل
|
Post: #59
Title: Re: طربقه!!!...نطيط كلام
Author: jini
Date: 10-01-2007, 04:05 PM
Parent: #58
Quote: لووووووووووووووول ساى يا جنى
خل تعلم ان بروتين مركب طفايات فى خشمه و الكلام على زمة عاطف
قالو الاكل ملهلب الناس تكون ما قادره تشيل اللقمه بروتين بكون اكل عشره
سمحه العافيه
زولك من النقه جاهو سكرى
|
هو المشى للسكرى!
شوف عينى البياكلها الدود وهشام جنبى!
جمال بروتين بيبلع فى البيض المسلوق زى الاسبرو! ما فضل فى الصحن الا الوردة!
شغال فى صحن الشطة زى الختامة!
سمحة العافية
رعى الله تلك الايام والواحد كان يرفس من الضحك هسة الا يكلكلونا!
جنى
|
Post: #60
Title: Re: طربقه!!!...نطيط كلام
Author: Siham Elmugammar
Date: 10-01-2007, 09:56 PM
Parent: #59
عبدالله داش
امرق نفيستك وطربق طربيقك
رملتنا باااارده مرشوشه من عصريه
مشتهيه ليها جرة سبحه الفيه
و مدحه صوفيه
تعال انبرش بى جاى
كيف معاك
______ _________
جنى الاخو تتذكر
"عفصتها و لاااا قلعتها"
حكيتها لمليون كده لغاية هسه
فعلا رحم الله تلك الالايام
|
Post: #61
Title: Re: طربقه!!!...نطيط كلام
Author: Nader Abu Kadouk
Date: 10-02-2007, 04:57 AM
Parent: #60
بت المجمر
انا قايل روحي براي البقيت بهضرب
القصه الظاهر عامه
اهه عذالدين نبقه ود الإسكول قام سافر السودان
بعد خمستاشر سنه وشويه
اها قال قعد مع الشباب في الشارع
اها والكلام علي لسان الراوي جا كارو ماشي وراهو كلب ماشي
قال الكارو ماشي والكلب ماشي دي بلد عجيبه
ودابكدوك
|
Post: #62
Title: Re: طربقه!!!...نطيط كلام
Author: Siham Elmugammar
Date: 10-02-2007, 12:06 PM
Parent: #61
بلدنا بلاد اليس يا ابكدوك
صور مقلوبه فى كل مكان
انين الناس حولك يفقدك ملامح وجهك
حدثتنى صديقه لى انها كانت فى عياده دكتور جنبها مره كبيره كده تمتم فى كلام كل شويه براها
صحبتى افتكرت انها بتهضرب
ارخت سمعها لقناها بتردد "يالله استر الفقر بالصحه"
قالت لى اللحظه ديك اعتصرنى الم فظيع ما حسيت بيهو حتى فى وفاة اقرب زول لى
قلت ليها ده الم الاضطهاد و الظلم
الله يضوقه ليهم واحد واحد فى الدنيا قبل الاخره
|
Post: #63
Title: Re: طربقه!!!...نطيط كلام
Author: Siham Elmugammar
Date: 10-02-2007, 12:30 PM
Parent: #62
بالله ده هموم شنو دى من الصباح
لازلت ادعو الله ان يعيننى على تربية ابنائى
فتحت قبل فتره بوست عن الربايه الحااااره دى
قلت النخج الجمع المنفتح هنا علنا نستفيد
زول هببو مافى
قلت خلاص معناها دى معاناه فرديه
وكل زول ياكل ناره
الليله الصباح اكلتها ملهلبه
و بلعتها فى حنانى
|
Post: #64
Title: Re: طربقه!!!...نطيط كلام
Author: Siham Elmugammar
Date: 10-02-2007, 12:32 PM
Parent: #63
مستشفى احمد قاسم
يالله يالله يالله
يعنى عاوزين اقولو دى ريحة منظفات
ياخى حرام عليكم لو جاكم طفل عندو ازمه حاده
و الا حساسيه
يموت بسبب انو جا يتعالج
ياخ عليك الله بلا رحيتكم دى ما ياهو ده الحال
الناس اصلها بتجى المستشفى عشان تموت
بتذكر سنة 94 و انا حامل ببكرى العوير(العويره)
جاتنى ملاريا شديده
و حمى بس صاج سمك
الدنيا ليل .. مجتبى حلف ما يودينى مستشفى
قال لى انتى مجنونه فى زول بمشى المستشفى بالليل؟؟!!!!!!!
انتى عاوزه تنتحرى
|
Post: #65
Title: Re: طربقه!!!...نطيط كلام
Author: Siham Elmugammar
Date: 10-02-2007, 01:22 PM
Parent: #64
ده منظر شنو ده من الصباح
عربية السجون القميئه على يمينى فى كوبر القوات المسلحه
ايادى ضعيفه ..
تخرج من فتحات التهويه؟؟!!
هى دى فتحات تهويه لبنى ادمين و لا كتاكيت؟؟!!!!
لعن الله تسلط الانسان على بنى جنسه فى اى مكان
عيون تحاول ان تسرق نظرات
للنيل
كم قدرها هذه النظره ..كيف يحسون بها ... والى اى حد تكون ليهم ذاد
مادى فروعه و منتكى فى ايام لا حساب لها بمثل ما نحسب نحن الاحرار مجازا
احسست بالخجل منهم ... هل يحسون بأنى اتباها بشباكى الوسيع
والا هم يتحسرون ..شوفوها ماشه كيف عليك الله هسه دى كان داير تقيف فى نص الكبرى ده و تنزل ما بتعملها
بتعملها يا زول ... ما مافى زول طابلها من بره!!!!!
هونت على النزين حتى اتراجع عن مرمى نظرهم
من هم و ما بماذا اجرمو... يالله تكفينا هذا الشر و تفك اسرهم
يالله
|
Post: #68
Title: Re: طربقه!!!...نطيط كلام
Author: jini
Date: 10-02-2007, 03:24 PM
Parent: #65
Quote:
ده منظر شنو ده من الصباح
عربية السجون القميئه على يمينى فى كوبر القوات المسلحه
ايادى ضعيفه ..
تخرج من فتحات التهويه؟؟!!
هى دى فتحات تهويه لبنى ادمين و لا كتاكيت؟؟!!!!
لعن الله تسلط الانسان على بنى جنسه فى اى مكان
عيون تحاول ان تسرق نظرات
للنيل |
انتى ما سمعت عمر الدوش!
رمونى فى قعر السجن
انشاء الله ماتضوقوا السجن!
يعنى شى ما بتوصف وخاصة فى السودان!
ناس القانون بسموا عقوبة السجن العقوبة السالبة للحرية!
المساكين ما عارفنها فى السودان سالبة للادمية!
الغريبة النسوان فى السودان يقولوا ليك السجن حق الرجال!
جنس حقد!!
جنى
|
Post: #67
Title: Re: طربقه!!!...نطيط كلام
Author: jini
Date: 10-02-2007, 03:15 PM
Parent: #64
Quote: الدنيا ليل .. مجتبى حلف ما يودينى مستشفى
قال لى انتى مجنونه فى زول بمشى المستشفى بالليل؟؟!!!!!!!
انتى عاوزه تنتحرى |
الانتحار ود الناس!
الدكاترة البليل ديل تحت تحت سمعنا قالوا بياطرة!
جنى
|
Post: #66
Title: Re: طربقه!!!...نطيط كلام
Author: jini
Date: 10-02-2007, 03:13 PM
Parent: #62
Quote:
قلت ليها ده الم الاضطهاد و الظلم
الله يضوقه ليهم واحد واحد فى الدنيا قبل الاخره |
آدر يا مريم
المشكلة يضوقوا الاضطهاد وهم فى الحكم!
عشان يبقى علينا المثل
هى فى بير وقع فوقها فيل!
الزمان دا قالو الدعاء بقع بالقلبة!
عشان كدة من قصيرها ادعى بالقلبة!
لكن لو مضوا عليهو انا ما لى دخل!
كل شئ فى الحياة ممكن!
جنى
|
Post: #69
Title: Re: طربقه!!!...نطيط كلام
Author: Siham Elmugammar
Date: 10-04-2007, 07:27 AM
Parent: #66
جنى
اعيش حزن بلاحدود
على وفاة خال سها
الشاب الخلوق محمد ابو
حجيث مجلس البكا
شاب و ميته فجأه
اكيد ده اخر الزمان
لانه دى من علاماته
ميته مفجعه يا حنى
تحرق حشا الغريب
خلى اهله و احبابه
الان كل طربقتى طارت من راسى
و كلام انطط بيهو مافى
رحم الله محمد بقدر ما كان بشوش و باسم
وبقدر ما كان معطاء
وبقدر ما كان محب
اللهم اوسع فى قبره
وثبته بالقول الثابت فى الحياة الدنيا والاخره
|
Post: #70
Title: Re: طربقه!!!...نطيط كلام
Author: Nader Abu Kadouk
Date: 10-04-2007, 07:46 AM
Parent: #69
اللهم أنزل عليه شآبيب رحمتك وعزائم مغفرتك .
والسلامة من كل إثم والغنيمة من كل بروالفوز بالجنة والنجاة من النار.
اللهم أجمعنا به في جنتك .
إنا لله وانا اليه راجعون.
آللهم أرحمه وأسكنه فسيح جناتك.
آللهم باعد بينه وبين خطاياه كما باعدت بين المشرق والمغرب.
اللهم نقه من الخطايا والذنوب كما ينقى الثوب الأبيض من الدنس.
اللهم اغسله بالثلج والماء والبرد.
اللهم أبدله داراً خيراً من داره وأهلاً خيراً من أهله.
اللهم اجمعنا وإياه في مستقر رحمتك اللهم انا نسالك بأسمك الاعظم ان توسع مدخله.
اللهم آنس في القبر وحشته اللهم ثبته عند السؤال اللهم لقنه حجته.
اللهم باعد القبر عن جنباته.
اللهم اكفه فتنة القبر.
اللهم اكفه ضمة القبر.
اللهم اجعل قبره روضة من رياض الجنة ولا تجعله حفرة من حفر النار.
اللهم إن كان محسنًا فزد في إحسانه، وإن كان مسيئًا فتجاوز عن سيئاته.
اللهم ألحقه بالشهداء وحسن أولئك رفيقاً.
اللهم افتح عليه نافذة من الجنة ** واجعل قبره روضة من رياضهاآمين يا الله
ودابكدوك
|
Post: #71
Title: Re: طربقه!!!...نطيط كلام
Author: Siham Elmugammar
Date: 10-04-2007, 11:14 AM
Parent: #70
نادر دعاك اثلج صدرى
اسأل الله ان يثبتنا جميعا بالقول الثابت فى الحياة الدنيا و الاخره
عارف يا نادر ان شهدت فى وفاة محمد ده شى غريب
فقد تغير سلوك بعض النساء كم تغيرت اشياء كثر
و التغيير هنا ايجابى
ففى لحظة وصول الجثمان من المستشفى
ارتفع صوت امرأه احبها جدا فهى اخت كبيره و دافيه بالحنه
و هى التى احتضنتنى بقوه فى لحظة الانهيار
ارتفع صوتها تدعو جموع النساء بقراءه يس فى صوت واحد
وقد كان
لم اشهد من قبل ان يصمت العويل فى مثل هذا مصاب مفجع
قرأ الحافظات جمعيا يس و غير الحافظين استمعو بخشوع
و كيف لا و هم يودون ان ينزلو بها السكينه عليه وان تنزل بردا وسلاما على قلب امه الملتاعه خالتى هدى
رايتهم يردون الجميل لهاو هى التى تعمل على تحفيظهم القرأن فى المسجد القريب
ثم اتبعو يس بتبارك ثم الاخلاص
سكتت النساء و سكتت لاطمات الخدود
و جعلو محمد فى سكينه و الجمع من الرجال يقومون بتجهيزه لسفره الاخير
اللهم لا تصيبناو لاعزيز لدينا بمثل هذا المصاب
لاحوله و قوة الا بالله من حريق الجوف و العين تشوف
نودع محمد بأن لا الله الا الله و انا لله و انا اليه راجعون
نادر اكثر من دعائك
|
Post: #72
Title: Re: طربقه!!!...نطيط كلام
Author: jini
Date: 10-04-2007, 01:08 PM
Parent: #71
1999 اول مرة يتسلل الموت الى بيتنا مختطفا شقيق الاصغر وكانت فاجعة ما بعدها فاجعة وكانت هى اول مرة نتعرف فيها على المعنى الحقيقى لمفردات مثل الفجيعة والمصيبة والرزء والثكل والاسى
اضافة الى الاحساس بالفجيعة وقصر الجناح كنتا شديد الخوف على امى وابى من رد الفعل وهما فى هذه السن المتقدمة ان ينهارا بسبب هذه الفقد الفاجع وهو الاكثر برا بهما يكاد لا يفارقهما يغشاهما متفقدا
قبل ان يذهب الى اسرته!
ولكن بعظم المصيبة والرزء والابتلاء بنقص الانفس يكون افراغ الصبر ونزول الرحمة من المولى على الوالدين !
كنت يومها خارج السودان وعدت فى اليوم التالت لرحيل اخى فوجدت
والدى يتفانى فى الدعاء بالعفو وطلب الرحمة له لايكف عن الدعاء اطراف الليل وآناء النهار وامى تلح فى الدعاء له بالمغفرة وتعقبه بالدعاء لنفسها قائلة:
الشالوا من عينى يشيلو من قلبى!
وكنت انظر الى امى مرة وابى مرة والدموع لا تفارق عيونى بدون داعاء بل يحزنون فقط وانا اتامل فلاش باك رحلة اخى مع امى وابى من المهد والى اللحد وكيف استطاعا الصمود امام هذا الزلزال المدمر!
فايقنت ان لولا رحمة الله لقضى الوالدين لاول وفاة لاحد الابناءولصار الباقين ايتاما!
للفقيد الرحمة والمغفر ونسال الله ان يجعل الجنة متقلبه ومثواه وان يحسن عزاءكم وعزاء اسرت المكلومة
جنى
|
Post: #73
Title: Re: طربقه!!!...نطيط كلام
Author: Najlaa El Mahi
Date: 10-04-2007, 01:54 PM
Parent: #72
عليكم الله اطلعوا من جو الحزن ده اللهم يرحمه ويسكنه فسيح جناته اصلى مشبعة بالحزن على فراق نازك محجوب. غالبنى البعملوا المهم قلت اجى اطربق لقيت الصيوان منصوب ارجع ولا اقعد الملم فى حزنى ونتكوم كلنا نبكى؟ المهم كنت جايبة لى شمار معاى هسى بس حا اخت ليكم الرابط دة وبس انتوا اعملوا اللازم لانه فيه ما يمكن ان يجلى بعض الحزن.
الضريساء ثروة قومية / يا بخت أهلنا في القرى والبوادي
نجلاء الماحى
|
Post: #74
Title: Re: طربقه!!!...نطيط كلام
Author: Siham Elmugammar
Date: 10-06-2007, 07:51 AM
Parent: #73
جنى البركه فيكم و احسن الله عزاكم...لم نسمع بهذا الخبر... يعنى يطرشنا...احسن الله عزاكم.... الاعزاء لا يمكن ان ننساهم... تتذكر يا جنى ابتسام الضاحكه الفكهه اختنا و حبيبتنا (اخت جمال بروتين) هى ايضا توقيت فجأه بلا مقدمات او وداع... الان لها 9 سنوات تقريبا لا يمر يوم لا اذكرها فيه... بين مصدقه م مكذبه... اما ذكرى الوالد رحمة الله عليه فهذا شىء عجيب.... الايام دى فقط اجد نفسى اكثر من تكرا "اللهم ثبت الايمان"
ذى ما قالت نجلاء ..ده حال الدنيا و حقو نرفع الفراش ده و نرجع الى الله.. ولكن انى اعلم و انت تعلم ان سرداق العزاء منصوبه فى قلوبنا...لهم الرحمه جميعا و لنا الصبر
|
Post: #75
Title: Re: طربقه!!!...نطيط كلام
Author: Siham Elmugammar
Date: 10-06-2007, 08:40 AM
Parent: #74
نجلاء رفعنا الصيوان من الطربقه
ورجعنا عشان نبدأ بطربقتك
وينك هسه؟؟؟؟؟؟
Quote: المهم كنت جايبة لى شمار معاى هسى بس حا اخت ليكم الرابط دة وبس انتوا اعملوا اللازم لانه فيه ما يمكن ان يجلى بعض الحزن.
الضريساء ثروة قومية / يا بخت أهلنا في القرى والبوادي |
اااجى نجلاء الغبا الجاك شنو
هسه وينو الرابط ..ما لقينا اى رابط و الا رباط
الضريساء؟؟؟؟؟؟!!!
هسه لغاية من تجى راجعه تورينابقت ثروة قوميه كيف؟؟!!!!
بتكون خلاص بقت ثروه فرديه!!!
اها فى انتظار عودتك
|
Post: #76
Title: Re: طربقه!!!...نطيط كلام
Author: Siham Elmugammar
Date: 10-08-2007, 08:16 AM
Parent: #75
فى انتظار شمار نجلاء
عاوزه اسأل سؤال
الفكره شنو انو بتاع الحركه يقيف فى نص الشارع؟؟؟؟ و يأشر ليك عشان تمشى ؟؟؟؟
و يخليك فى مناتله عشان تتفاداهو
|
Post: #77
Title: Re: طربقه!!!...نطيط كلام
Author: Hussein Mallasi
Date: 10-08-2007, 10:10 AM
Parent: #76
نفس الفكرة البتخليهو يقيف في مداخل الكباري – و داخلها -
يصفر و يأشر للعربات المتحركة عشان تتتحرك!
|
Post: #82
Title: Re: طربقه!!!...نطيط كلام
Author: Siham Elmugammar
Date: 10-09-2007, 07:09 AM
Parent: #77
ملاسى
حقت الكبارى دى احر و احده فيهم العجب بتاعت كبرى بحرى
بتذكر فى الثمنينات اخو واحد صاحبنا شات ليهو واحد فيهم من الدنيا لانو كان واقف فى طرف الكبرى عز الليل و طبعا الكبرى غير مضاء و طبعا كان طفى نور العربيه عشان داخل الكبرى...
حقو نفتح بوست عن بدل الرسمى و ذهنية الابسها؟؟؟؟!!!!!!
_______________________________
بلد وهــــــــــــــــــم
|
Post: #78
Title: Re: طربقه!!!...نطيط كلام
Author: nada ali
Date: 10-08-2007, 11:42 AM
Parent: #1
العزيزة سهام
البركة فيكم
تحياتى
|
Post: #79
Title: Re: طربقه!!!...نطيط كلام
Author: Kamal Karrar
Date: 10-08-2007, 12:29 PM
Parent: #1
أختي سهام..
البركة فيكم في وفاة الشاب محمد أبو ..إن شاء الله ربنا يتقبله في عليين وفي منزل صدق مع الصديقين والشهداء وحسن أولئك رفيقا...
كم هذه الدنيا غريبة.. تصدقي يا سهام.. إمكن أكون سمعت بالخبر في لحظاته الأولى.. وكنت ضيفا على إبن عمي "أمجد كرار" المتزوج من إبنة خال المرحوم.. وهي الأخت/ مها أنور.. عندما أتصل الناعي من السودان يعلن الخبر..وكانت لحظات حزينة..حتى إبن عمي تردد كثيرا في أن ينقل الخبر لزوجته.. فقط ذلك اليوم عرفت العلاقة بين زوجة إبن عمي.. وزوجة الأخ/ هشام المجمر..
مرة أخرى نترحم على روح الشاب محمد "خال سهى" .. وأتقدم لكم ولعائلة المرحوم بأصدق المواساة.. وإنا لله وإنا إليه راجعون...ولا حول ولا قوة إلا بالله.
|
Post: #80
Title: Re: طربقه!!!...نطيط كلام
Author: Muna Khugali
Date: 10-09-2007, 01:02 AM
فوق ..علشان مايغطس ونقدر نقرا بمزاج..
كل سنه انتي وانتو طيبين..
|
Post: #83
Title: Re: طربقه!!!...نطيط كلام
Author: Siham Elmugammar
Date: 10-09-2007, 07:26 AM
ندى الله يبارك فيك يا حبيبه
صدقى ... اعلم تماما كم تحسين الم الرحيل المفاجىء
ربنا يثبت الايمان
و زى ما قال عمك بكرى والد محمد و دموعه تنساب مطر مالح
"يا اخوانا الله اراد و ما عندنا غير الصبر"
قد احسن الله عزاك فى نجوى الصغيره.. وربنا يجعل فيها السلوى لكل الاسره
فلنترك الاحزان جانبا
وتعالى طربـــــــــــقى معانا
كمال كرار
الله يبارك فيك
والله والله والله هو فقد مفجع و موجع بلا حدود
|
Post: #81
Title: Re: طربقه!!!...نطيط كلام
Author: عبدالله داش
Date: 10-09-2007, 01:22 AM
Parent: #1
فت طارت وضفّّرت شعراا جدايل طوال
وقفت على حييلا وعدم حيله
هى مالا درويشه ومغيبه فى السُكات
انا قلت ليها تعالى نمشى سواا
ضحكت وصنقرت فى حافة المشــوار
تهترش للصباح
...
..
.
غار الروح مســوكر
السُـكر اليشرق
لعابك بالمسيل إنشاء الله
( ليه ياااااخ ؟ )
ايواا كدا ...
ولو ما عاجبك فرتق جدايلا
وإنتظر البِجيك سدارى
أنا ما معاك أعدل مشيك
الله يعدلا علينا انشاء الله
آمين
طربقة ..
من طربقات الصفيح
الرافض لوضعه كبنبر بديل
|
Post: #84
Title: Re: طربقه!!!...نطيط كلام
Author: jini
Date: 10-09-2007, 08:28 AM
Parent: #81
Quote: فى انتظار شمار نجلاء
عاوزه اسأل سؤال
الفكره شنو انو بتاع الحركه يقيف فى نص الشارع؟؟؟؟ و يأشر ليك عشان تمشى ؟؟؟؟
و يخليك فى مناتله عشان تتفاداهو |
موش الممرضة عندنا بتصحى المريض من النوم عشان تديهو الحبة حقة المنوم!
يا حليل السودان يا ربى كمل ولا فيهو باقى!
آخر مرة قبل ستة سنوات! زرت واحد فى مستشفى ام درمان فى غرفة الانعاش ليه سموها غرفة انعاش فى كل الدنيا بسموها الرعاية المركزة او المكثفة اشمعنى عندنا اسمها انعاش!
يا ربى يكونوا قاصدين ان عاش تف لى فى وشى !
وفعلا اراجل مات وشبع موت!
جنى
|
Post: #85
Title: Re: طربقه!!!...نطيط كلام
Author: Siham Elmugammar
Date: 10-09-2007, 08:44 AM
Parent: #81
والله يا منى انا كنت ملوماك عشان ما زرتنينى و جاملتينى فى طربقتى
وقلت فى نفسى يا بت انا منى دى دحين ماقاااااعده تزوريها فى حيشانها الماهله
مالها ماجاتك ... حوشك ما بسعها والا ملاياتك ما عاجباها؟؟!!!!!
لكن ما قصرتى ترا جيتى
والبوست اكان لى حوله بجيب زوله
منى يا عزيزه
سيبك من طربقتى الفوق دي و كل سنه وانتى طيبه
وادينا لحظه طربقه من فضلك
|
Post: #87
Title: Re: طربقه!!!...نطيط كلام
Author: Siham Elmugammar
Date: 10-09-2007, 09:29 AM
Parent: #81
عبدالله دااااااش
ايوه كدى يا اخوى نورت الطربقه الله ينور عليك
الرسول طربق لينا تانى باقى
احتجاج الصفيح عجبنى بالحيل
الله ينور علينا جميعا
|
Post: #86
Title: Re: طربقه!!!...نطيط كلام
Author: Kamal Karrar
Date: 10-09-2007, 09:17 AM
Parent: #1
تعرفي يا سهام...
مشكلة مستشفى أحمد قاسم .. إنو بنوه على أنقاض سهلة سوق خرفان الضحية.. والعجاجة الدخلت فيه..ما بتمرق أكان رشوها بفنطاسين موية سعة 10000 جالون...أها أجارك الله..المستشفى زيو وزي أخوانه من مستشفيات "جبانة" وهايصة.. والمشكلة كمان إنو فاتح..على موقع "الجو" القديم.. قبل الحريق الشهير.. وناس بحري الأصليين عارفين الشيء ده تمااااااااام التمام.. لكن ده كلو كوم.. وشيلة الكرنتينة من جنب حلتكم كوم.. أنا بفتكر إنو شيل الكرنتينة من موقعها...اضر بالبيئة تماما.. وضررالشيلة ربما كان أبلغ من ضرر الإنبعاثات الحرارية على طبقة الأوزون.. وبعد ما كان بيت "المنفلوطية" يشرف على الكرنتينة من جهة الجنوب.. اصبح يواجه.. بقالة "الشونة".. وما أدراك ما "الشونة" وهي طليعة الحي الذي زحف بليل على المزادين..وسموه (سلبطة) حي المغتربين.. وما هو بحي المغتربين..وظهرت حاجات عجبية وبقالات بأسماء (الشانزلزيه).. وما عارف أيه.. يعني بيت "المنفلوطية" راح شمار في مرقة.. واناعارفهم جيرانكم.. وكانوا جيرانا في حي الدناقلة شمال "مسقط الرأس" التحية ليهم.. والتحية لناس "دبلوك" وناس "الأسيد" وناس "كٌلم" وناس "حسن عبدالرحمن" وناس "عوض حامد" .. أها ما حددت حلتكم القديمة بكل إحداثياتهاالسينية والصادية.. وقنطرتها...للأسراب المهاجمة.. تقولي لي "مستشفى أحمدقاسم".. يا حليل شفخانة "التربية".. وإدارة الحكيمباشا"عم الطاهر" والحكيمباشا "حسن مختار".. هسع ده كوم وغابة الأكشاك النبتت بليل في السهلة والميدان الفاصل بين المزادين شمال وجنوب..كوم.. وحرمت شفعنا من لعب الكرة والبلي وسكج بكج..ده كلو كوم وسينما الصافية الحصل ليها شنو؟؟ لحقت حلفايا.. والعرضة.. أنت في كده.. ولا قالوا.. عملوا تلتوار في شارع الشعبية بالنص.. وبقى الشارع بلوفار بحق وحقيقة.. أهي طربقة والسلام
|
Post: #88
Title: Re: طربقه!!!...نطيط كلام
Author: Siham Elmugammar
Date: 10-09-2007, 11:23 AM
Parent: #86
كمال كرار معليش ياخ كان عندى شكله مع بكرى ابوبكر بهناك
لكن امانه ما طربقه هلا هلا هلا دى الطربقه و الا بلاش
يازول انت بحرى دى شاربه عدييييل كده
امانه المغتربين دى ما واجعانى
ياخ ديل قطعوا الغابه (الكرنتينه)البين المزادين
عشان يعمرو غابات الاسمنت
بتذكر زمان نتلم مجموعه من بنات الجيران عشان نمشى نلقط التمربونه
والتمرهندى ...نخم حصادنا فى طرف فساتينا وجيوب جلاليبنا
نلقط و ندعو الله انو عم اسماعيل ما يحس بينا
مرات الله يستجيب و مرات يكون قدرنا المواجهه
يجيك عمى اسماعيل من هناك لابس الكاكى البدله و الرداء
البرنيطه المثبته باليستك الاسود و البسطونه تتقدمه
البتشوفه تضرب الكوراك
عم اسماعيل جااااااكم
تلقانا نتطاقش ذى الممسوسين
و نقوم جارين و هو ورانا
بالبسطونه
نصل نفسنا مقطوع
نقعد تحت نيمة بيتنا و الا نيمة عمك عبدالرحيم
و نبدأ نطلع الفضل من الحصاد
و نبدا نلوك ذى البقر
كم حزنا لوفاة عمنا اسماعيل
اعتقد انه مات حزنا على الكرنتينه
|
Post: #89
Title: Re: طربقه!!!...نطيط كلام
Author: Kamal Karrar
Date: 10-09-2007, 11:39 AM
Parent: #1
سهام.. شكلتك بقادي خابرها.. وسجلت فيها عكاز.. بس ما ختري!!!
الله يرحم عم إسماعيل.. مش كان لقبو "باجوري" ولا باجوري ده مساعدو..
يا أخي لمن أتكلم مع واحد من ناس بحري..روحي بتترد لي..
----------
بحري طراوة مش؟؟؟
|
Post: #91
Title: Re: طربقه!!!...نطيط كلام
Author: Siham Elmugammar
Date: 10-10-2007, 08:11 AM
Parent: #90
جنى قلت لى
| Quote: يا ربى يكونوا قاصدين ان عاش تف لى فى وشى |
مره كنت عيانه قمت مشيت مستشفى كان شغال فيها اخوك الصغيرونى محمدطه المهم بصفتى اخت الباشمهندس دخولونى "حتة" الانعاش
المشهد كان كالاتى
اربع سراير حديثه كدى و الحته الله يكفينا شر الكضب نضيفه
راجل ممدد فى واحد من السراير دى و كان فى شكل احهزه عرفت انو طالع من عمليه فى القلب
اها قصاااااااااااد الراجل طوالى و على بعد القل من متر من سريره فى تربيزه كدى قاعدين فيها الممرضين كان فى منهم تلاته... بيتكلو مع بعض فى كل شى مانهم قاعدين فى كافتيريا بعد شويه طلعو فطورهم و بدأ يتقاسمو من داير شنو...حينها ايقنت انها كافتريا و الراجل الراقد ديكور
|
Post: #92
Title: Re: طربقه!!!...نطيط كلام
Author: jini
Date: 10-10-2007, 08:56 AM
Parent: #91
Quote: مره كنت عيانه قمت مشيت مستشفى كان شغال فيها اخوك الصغيرونى محمدطه المهم بصفتى اخت الباشمهندس دخولونى "حتة" الانعاش
المشهد كان كالاتى
|
تحياتى لخى الصغير الباشمهندس الوجيه محمد (عزام9
العيال كبرت!
غايتوا العناية المركزة فى السودان مفروض يبنوهو جنب المقابر!
عشان يكون
من البيت لى مدرستو
شر البلية ما يضحك!
جنى
|
Post: #93
Title: Re: طربقه!!!...نطيط كلام
Author: Siham Elmugammar
Date: 10-10-2007, 11:59 AM
Parent: #92
| Quote: غايتوا العناية المركزة فى السودان مفروض يبنوهو جنب المقابر! |
لكن يا جنى السودانيين ما لازم يشمموا الميت عتبة بيتو!!!
يعنى حتى الجثمان البجى من بره ما بيندفن كمادخلوه بيتو اول
|
Post: #94
Title: Re: طربقه!!!...نطيط كلام
Author: Kamal Karrar
Date: 10-10-2007, 12:20 PM
Parent: #1
تعرفي يا سهام.. مسألة شمومة العتبة..دي ذاتها بدواعي الحاجة.. أنت قايلة شنو؟ لأنو ما عندنا مغاسل عامة للموتي تليق بكرامة الميت.. ولا حتى ثلاجات لحفظ الجثمان..محترمة زي ما في كل بلاد العالم.. إذا كان الطواريء ذاتها ما محترمة.. ولا حتى العيادات الخارجية.. ولا عنابر المحولة..معقول نتوقع ثلاجة أو مغسلة للموتي تليق بكرامة الإنسان!!!! لكن بس (ركْك) على ثلاجة ومغسلة زي ما شفنا في بلاد برة.. ثاني الميت أكان قالوا ليه نشممك عتبةبيتك إلا أكان (يتلب) من العنقريب.. يا زولة .. من الثلاجة وللجبانة..يكون ساااااقط.. ومستعد للحارة أم قايلة.. يا سهام..خليها على الله...غايتو حسن الختام.. هو المهم .. بعد داك يشمموك العتبة.. أو يشمموك (سوار دي باريس).. مش مهم.. المهم تكون حاسة الشم عرضة لأطيب أنواع الطيب في الحياة البرزخية.. يا ربي حسن الختام..
عندي طربقة كثيرة.. لكن إحتراما لحرمة الموت والموتي.. نأجلها..شوية
--------------------------
بحري طراوة حتى مقابرها جنب النيل!!!
|
Post: #97
Title: Re: طربقه!!!...نطيط كلام
Author: Siham Elmugammar
Date: 10-10-2007, 11:19 PM
Parent: #94
كمال
لو بقى عندنا مغسلة موتى تهز و ترز (اوعك تفتكرانها بعيده ما شايف ناس حسن الخاتمه -الله يثبت الايمان و العقل) نحن برضه ح نصر نغسل اهلنا و حبانا برااانا
بتذكر لما الوالد عليه الرحمه اتوفى فى ابوظبى و كانو جايبين الجثمان انا كنت حايمه بين اعمامى
عليك الله يا عمى الطاهر ابوى تجيبو بيتو
عمى محمد عثمان اااى عارفه اكرام الميت دفنه لكن عليك الله تجيبو البيت
كنت عارفه انو الصندوق ما ممكن يتفتح لكن بس كان كده انو ابوى ده لازم ادخل بيتو أول قبل السفر الا نهائى ده
_______________________
مقابر بحرى فيها كم عزيز؟؟!!!
|
Post: #95
Title: Re: طربقه!!!...نطيط كلام
Author: طارق جبريل
Date: 10-10-2007, 12:22 PM
Parent: #1
سهام كيفنك
جيت اطربق غلبني
|
Post: #96
Title: Re: طربقه!!!...نطيط كلام
Author: jini
Date: 10-10-2007, 02:03 PM
Parent: #95
| Quote: بحري طراوة حتى مقابرها جنب النيل!!! |
عشان كدة المصريين بضحكوا علينا!
ديل (السودانيين) يدفنوا الميتين قنب (جنب) النيل ويسكنوا الحاق (الحاج يوسف)!
ديل (السودانيين) عندهم شارع اسمو شارع الحرية بيودى السقانة (السجانة)!
ديل يا قدع (جدع) بسموا الكبريت أبووردة والريحة الصاروخ!
بين قوسين (جنى)
|
Post: #99
Title: Re: طربقه!!!...نطيط كلام
Author: Siham Elmugammar
Date: 10-10-2007, 11:28 PM
Parent: #96
انت يا جنى يا خوى
المصريين ديل مالهم و مالنا ندفن جنب النيل و الا فى الصحرا
كان بريدهم الحس مكوه حاره
|
Post: #98
Title: Re: طربقه!!!...نطيط كلام
Author: Siham Elmugammar
Date: 10-10-2007, 11:24 PM
Parent: #95
الصبى طارق جبريل
اقول ليك شنو؟؟!!!
انا فى حوشك غلبنى اقول ليك شى
عافينا ليك لله تعالى
اقرا طربقتنا ساااااااكت
بس تم ليناشحتافتك البهناك ديك
|
Post: #100
Title: Re: طربقه!!!...نطيط كلام
Author: Kamal Karrar
Date: 10-11-2007, 08:16 AM
Parent: #1
جني (بين مزدوجين)
سلامات..
أنت ما عارف أولاد بمبة ديل.. مغتاظين من مسألة النيل ماشي من الجنوب للشمال.. قدر شنو!! تعرف مرات بيقعدوا يتفلسفوا عليّ.. وأنا ردي ليهم ببيت عمر بن كلثوم..."ونشرب أن وردنا الماء صفوا** ويشرب غيرنا كدرا وطينا"... بيفصلوا عديل كده...
لكن تعرف لو أولاد بمبه عرفوا إنو "سجن كوبر" بيطل على النيل الأزرق.. حتكون حكاية!!! بس أنا طالب سهام أختي... إنها تقوم بحملة لنقل "سجن كوبر" من موقعه الحالي "لمنطقة جبال المرخيات... ونقل الدروة (بتاعة ضرب نار) من جبال المرخيات.. لمنطقة (حلايب).. عشان يكون التنشين صاح.. أها رأيك يا جني أخوي
-------------------
بحري طراوة
|
Post: #101
Title: Re: طربقه!!!...نطيط كلام
Author: Siham Elmugammar
Date: 10-11-2007, 08:34 AM
Parent: #100
| Quote: بس أنا طالب سهام أختي... إنها تقوم بحملة لنقل "سجن كوبر" من موقعه الحالي "لمنطقة جبال المرخيات... ونقل الدروة (بتاعة ضرب نار) من جبال المرخيات.. لمنطقة (حلايب).. عشان يكون التنشين صاح.. أها رأيك يا جني أخوي |
عاد دى نصيبة شنو يا كمال اكان انت اكان جنى قاعدييين مرطبين فى الخليج و انا اشتغل ليكم الشغل كله؟؟؟؟
والله دى طربقه جد هسه سجن كوبر كان نقلناه... احفاد احفاد احفادنا لما يقلبو الحكومه دى يدكو شنو؟؟؟
المسافه دحين ما بعيده عليهم لغاية المرخيات وهم مكدرين (ماشين كدارى) عشان يحررو المعتقلين السياسين ؟؟؟؟
بعدين ناس بحرى ديل يقعدو اتظاهرو فى صينية الماعونه 3 يوم و بعدين نجى نقول ليهم امشو المرخيات؟؟؟!!!!
قالو اعز من الولد ولد الولد
دحين انا ما بدور ليهم الشمس
و اكان على حلايب ...
انت قايل نفسك قوى عظمى عشان تنشىء قواعد عسكريه فى بلدا ما بلدك؟؟؟؟!!!!!!!!!
________________________________
اولاد بمبه ما بريدهم ما بريدهم
|
Post: #102
Title: Re: طربقه!!!...نطيط كلام
Author: jini
Date: 10-11-2007, 09:31 AM
Parent: #101
Quote: سلامات..
أنت ما عارف أولاد بمبة ديل.. مغتاظين من مسألة النيل ماشي من الجنوب للشمال.. قدر شنو!! تعرف مرات بيقعدوا يتفلسفوا عليّ.. وأنا ردي ليهم ببيت عمر بن كلثوم..."ونشرب أن وردنا الماء صفوا** ويشرب غيرنا كدرا وطينا"... بيفصلوا عديل كده...
|
انهار الدنيا دى كلها تقريبا الجريان حقها من الشمال الى الجنوب ماعدا النيل لان الله عارف المصريين كان كتلونا بالعطش عشان كدة خلى النيل من الجنوب للشمال!
والله اولاد بمبة يدوكم ليهو زى الصندلية بالقطارة!
تعرف المصرى تقوم وتقعد تقيف معاهو وقفة ابوهو الولدوا ما يقيفها!
آخرة النهاية يقول:
هو عملى آيه!
اتخيل انك ما عملت ليهو حاجة!
كان حيقول شنو!
| Quote: بس أنا طالب سهام أختي... إنها تقوم بحملة لنقل "سجن كوبر" من موقعه الحالي "لمنطقة جبال المرخيات... ونقل الدروة (بتاعة ضرب نار) من جبال المرخيات.. لمنطقة (حلايب).. عشان يكون التنشين صاح.. أها رأيك يا جني أخوي |
ديل حبايبنا اللى أخدوا حلايبنا!
انت داير تفلع نعال البشير ونافع!
جنى
|
Post: #104
Title: Re: طربقه!!!...نطيط كلام
Author: Siham Elmugammar
Date: 10-11-2007, 09:49 AM
Parent: #102
Quote: آخرة النهاية يقول:
هو عملى آيه!
اتخيل انك ما عملت ليهو حاجة!
كان حيقول شنو! |
الله لا سمعك الممكن يقولو!!!!!!
انت يا جنى شفت لون النيل عندهم؟؟؟؟؟
فى نهر لونه اسود
قال التلوث قال
ده وجه النيل حزين لمفارقته لنا
و لارضنا السمحه و لسانا النضيف
يكسوه السواد الما و غم
فهو مجبرا ولا بطل
______________________________
ما بريدهم مابريدهم مابريدهم
|
Post: #103
Title: Re: طربقه!!!...نطيط كلام
Author: Kamal Karrar
Date: 10-11-2007, 09:43 AM
Parent: #1
جني نقول الحمد لله على إحسانه...
دي سلامة كبيرة.. إنو نهر النيل بالذات يجري من الجنوب للشمال..
ربك لطيف بعباده...
واحد قال إنو أولاد بمبة ديل زي (الياي) لازم تفضل دايس عليه .. لأنو أول ما ترفع رجلك (الياي) بينط ليك في وشك!!
بس حكاية نقل الدروة.. دي مجردإجتهاد لينا أجر المحاولة
|
Post: #105
Title: Re: طربقه!!!...نطيط كلام
Author: jini
Date: 10-11-2007, 10:01 AM
Parent: #103
Quote:
انت يا جنى شفت لون النيل عندهم؟؟؟؟؟
فى نهر لونه اسود |
حبر!
طيب ما يصدروهو!
جنى
|
Post: #106
Title: Re: طربقه!!!...نطيط كلام
Author: Siham Elmugammar
Date: 10-11-2007, 12:16 PM
Parent: #105
كمال كرار ما تعمل طناش ورد على ..على ردى على اقتراحك
جنى
حبر؟؟!!!!! ياربى
لكن الحبر ريحتو ما كده
انت ركبت المترو الصباح؟؟؟؟؟؟؟؟؟؟؟؟؟
حكت لى اخت اختك عزه (زوجة اخوك همام)* :
لما كانت طالبه فى جامعة القاهره
المسكينة بتركب المواصلات من عين شمس للجيزه
قادر تتخيل المسافه و الزمن داك وسيلة المواصلات الاساسيه الاتوبيس المصرى الشهير
المهم مره فى الكرسى الجنبها راجل قالت لى ريحته فاقت حدود كل ما تعودت عليه فى سنين عيشتها فى مصر
الاتوبيس زحمه و الطريق طويل و لاحقه المحاضره يعنى مافى طريقه تنزل
الريحة لما سخنت معاها شديد و غلبها النفس ببساطه قعدت تبكى
الراجل شافه بتبكى قام سألها مالك فى ايه
فتحت خشمه جاتها الريحه الاضافيه
البكا اتحول لعويل بى نخجته
___________________________
رايك شنو فى صف الخوه الفوق ده
|
Post: #107
Title: Re: طربقه!!!...نطيط كلام
Author: jini
Date: 10-11-2007, 03:02 PM
Parent: #106
Quote: جنى
حبر؟؟!!!!! ياربى
لكن الحبر ريحتو ما كده
انت ركبت المترو الصباح؟؟؟؟؟؟؟؟؟؟؟؟؟
حكت لى اخت اختك عزه (زوجة اخوك همام)* :
لما كانت طالبه فى جامعة القاهره
المسكينة بتركب المواصلات من عين شمس للجيزه
قادر تتخيل المسافه و الزمن داك وسيلة المواصلات الاساسيه الاتوبيس المصرى الشهير
المهم مره فى الكرسى الجنبها راجل قالت لى ريحته فاقت حدود كل ما تعودت عليه فى سنين عيشتها فى مصر
الاتوبيس زحمه و الطريق طويل و لاحقه المحاضره يعنى مافى طريقه تنزل
الريحة لما سخنت معاها شديد و غلبها النفس ببساطه قعدت تبكى
الراجل شافه بتبكى قام سألها مالك فى ايه
فتحت خشمه جاتها الريحه الاضافيه
البكا اتحول لعويل بى نخجته
___________________________
رايك شنو فى صف الخوه الفوق ده |
طبعا المصريين مشهورين بالحاجات دى!
ويقولوا ليك اللى بنى مصر فى الأصل كان حلوانى!
اكيد الحلوانى زمان كان زبال!!
الزبالة بتكون فى مصر فى حرز امين فى الوزارة او فى المطار مابتصرفوا فيها!
اكيد قايلنها عهدة!
الغريبة تلقى اتنين مصريين بسلموا على بعض فى خدودهم!
واحد فيهم بكون فاطر فسيخ والتانى مش ابودود ومخلل طرشى والاتنين شاربين بيبسى والمعجون غاااااالى!
حديد لاقى حديد!
ويا قلبى لا تحزن!
جنى
|
Post: #108
Title: Re: طربقه!!!...نطيط كلام
Author: Siham Elmugammar
Date: 10-11-2007, 07:27 PM
Parent: #107
يالله تحفظ بلدنا
كل سنه وانتو طيبين من مطربقين و مطربقات
اها عليكم الله شفتو العيديه دى كيف؟؟؟!!!!!!!!!!!!
الحركه تجمد الشراكه مع المؤتمر الوطنى!!!!!!!
الله يكون فى عون البلاد من مقبلات الايام
|
Post: #109
Title: Re: طربقه!!!...نطيط كلام
Author: Kamal Karrar
Date: 10-13-2007, 11:57 AM
Parent: #1
سهام وجني وكل المطربقاتية في بوست سهام الظريفة..
كل سنة وأنتو وأولادكم وعوائلكم بألف خير وصحة وعافية
--------------------
والقابلة في بحري
بحري طراوة
|
Post: #110
Title: Re: طربقه!!!...نطيط كلام
Author: jini
Date: 10-13-2007, 12:08 PM
Parent: #109
سهام المجمر
وانت واسرتك الصغيرة والكبيرة فى امن وامان ورخاء
والله يحفظ ليكم الحلوين ويدمكما عليهم انت ومجتبى
ك.ك
وانت واحبابك والوطن بالف خير
جنى
|
Post: #111
Title: Re: طربقه!!!...نطيط كلام
Author: Siham Elmugammar
Date: 10-16-2007, 11:02 AM
Parent: #110
جنى و كمال كرار
كل سنه وانتو و اسركم بالف خير و طيبين و سعيدين
شايفاكم مرطبين تعيدو بالكيبورد
ونحن الشمس لافحانه ندقدق فى البيبان و نفتش فى الواطه لحتة فحمه
اكره الاحرائيه فى الزيارات و افراغ اللقاء من بهجتهو تحويله للمهم و صلنا
لاقونى جماعه فى العيدعند ناس ابوى قالو لى نحن ماشين عليك و ح نكتب ليك بالفحمه
عشان تعرفى اننا وصلنا!!!
اتغظت جدا وقلت ليهم العفو و العافيه لله و الرسول اعتبرو نفسكم وصلتو و مافى داعى تتعبو و تمشو تدقو ليكم باب بيت فاضى!!!!
شعب السودان وإجرائية العلاقات
|
Post: #112
Title: Re: طربقه!!!...نطيط كلام
Author: Kamal Karrar
Date: 10-16-2007, 12:11 PM
Parent: #1
شعب السودان وإجرائية العلاقات
سهام المجمر...
الفوق ده عنوان طربقة جديدة ولا شنو؟... بس يا سهام.. كلامك صحي وما صحي... يعني أنت برضو "بخربشة فحمة" أليكترونية نزعتي عفوية علاقات شعب السودان على الرغم مما أعتلاها من صدأ التصنع الدخيل..علينا.. إجرائيتهم دي.. أملتها عليهم قواعد إجتماعية معقدة... والعتب والزعل الكثير... في الفارغة والما بتسوى والتي يمكن أن تنسف العلاقة مهما كانت حميميتها نسفا.. ناس الفحمة ديل ساهلين وخطاطين... كعبين البيربطوا منديل (التشوز) في أوكرة الباب.. بعد أن يضمخ بكمية عرق اليدين ولغاويس ثانية مافي داعي لذكرها.. لوووووووووول.. ولا البيجو يقلبوا ليك مشاية باب المدخل.. ده كلو عشان يقولوا ليك جينا وما لقيناكم.. ويردفوها بسؤال زي ما لقيت منديل مربوط في الاوكرة؟؟ أو لقيت المشاية مقلوبة؟؟..أو البيضربو ويقولوا ليك .. والله جينا ولقينا العربية ما موجودة في الموقف.. قلنا أكيد الزول ده ما في.. طيب ما تضربوا قبل ما تتحركوا من الموقف.. دي بالذات حصلت لي يا سهام..وكمان في نوعية يضربوا ليك ويصحوك من النوم ويقولوا ليك أنت نائم ولا شنو؟؟.. وفي نوعية بتزعل منك وتقول ليك يا أخي أنت قافل (موبايلك).. نان أخليه يعوعي أنصاص الليالي..
بس والله سمحين.. يا سهام.. يمكن "الهاي تيك" تقلل من استخدام الفحم شوية وتجعل إجراءات العلاقات أكثر سفسطائية.. مع المسيجات.. والمس كولات.. ودي مبحث ثاني..
المهم.. أنت خايفة على خشم الباب.. يتشخبط بالفحم.. مش أحسن من الجماعة البيروموا السقاطة أوالترباس بتاع الحديد.. ويخشوا لأقصى مكان في البيت.. ويلقوه فاضي... ويشربوا ليهم موية من الزير (أيام الأزيار).. ويمرقوا ويخلوا الباب فاتح على مصراعيه.. ويلاقوك في حتة.. ويأكدوا ليكم زيارتم ويقولوا ليك كمان بالامارة ما لقينا الكوز جنب الزير.. وغرقنا بالكورية المختوتة في رأس النملية...
يعني إجراءات.. يا سهام لمن تحتاري.. والله الموضوع ده فيهو جنس طربقة.. أسكتي بس خليها ساكت..
أخليك شايف جارتك دي بتناغم ليك .. شكلها عايزة تقول ليك وين أنتو أمبارح.. كنت جايبا خالتي قالت عايزة تزورك.. وقلت بالمرة نطق الحنك.. لكن بيتكم فااااااضي.. كنتوا وين يا أختي؟؟؟ أها الشغلة جابت ليها شمار كمان!!!
|
Post: #113
Title: Re: طربقه!!!...نطيط كلام
Author: Siham Elmugammar
Date: 10-16-2007, 12:59 PM
Parent: #112
| Quote: إجرائيتهم دي.. أملتها عليهم قواعد إجتماعية معقدة... والعتب والزعل الكثير... في الفارغة والما بتسوى والتي يمكن أن تنسف العلاقة مهما كانت حميميتها نسفا |
ما هى دى المشكله يا كمال
يا ناس
خلو عندكم ثوابت و انطلقو منها
يعنى طالما انو مافى شوائب محدده حايمه فوق راس العلاقه
لما زول يقصر فى مناسبه
الناس تخت حسن النيه والا شنو؟؟؟!!!
اها رأيك شنو فى ناس الحركه المشو للريس لما عمل نايم
و على حسب صحيفة السودانى (و شوفى انا)انهم دقو الباب و استنو ومسااااااافه
لمن خجلة كدى مرقلهم راجل الجيران
قامو وصو ليهو
اتخيل لى كما زولك ده مرق الجماعه ديل ما كان لقو ليهم فحمه فى الحته ديك
________________________________________
لنا الله!!!!!!!!!
|
Post: #114
Title: Re: طربقه!!!...نطيط كلام
Author: Kamal Karrar
Date: 10-16-2007, 01:30 PM
Parent: #1
سهام..
حسن النية ده أنا غايتو ببصم بالعشرة ..إنو دائما غائب.. يعني الواحد اصلا ما بتخيل إنك ممكن تكون عندك أوقات كده غائص في داخلك ومنغمس في مشاكلك.. وخططك.. ويمكن ما تكون سمعت بخبر مفرح أو محزن.. وتجي متأخر..وإن كان جيتك بتكون أول ما سمعت.. وبرضو مجاملتك ما بتكون مقبولة.. بتذكر واحدة قريبتنا توفى والدها.. وواحد قريبها ظروفه لم تسمح له تعزيتها في نفس الوقت.. وشاءت الظروف أن يقابلها.. ورفع يديه للفاتحة.. فأبتدرته بمساخة الفاتحة في منو؟ ولمن جاوبها.. قالت ليهو.. أبوي مات زمان وشبع موت.. جاي هسع تقول لي الفاتحة...والراجل سمع متأخر.. وكان بعيد من البلد.. أها ده يقولوا عليه شنو!!!
يعني بعد الحادثة دي لم تعد هناك فاتحة او قافلة بين القريبين.. ده كلو لغياب حسن النية.. وتقدير ظروف الآخرين .. اليمكن يكونوا ما سمعوا بالفعل.. وحتى لو سمعوا يعني لازم.. نخت حسن النية.. قبل ما ننسف العلائق..
ما قلتي لي كعكم كيف؟؟؟
---------------
بحري طراوة
|
Post: #115
Title: Re: طربقه!!!...نطيط كلام
Author: jini
Date: 10-16-2007, 02:06 PM
Parent: #114
كل سنة وانتوا طيبين لمجتبى ولك وعيالك الحلوين ما يدومهم عين وجاهة المجمر اب حارساهم .
والله فكرتى وحليتها جذرى انا كل واحد يجى جنبي يقول لى يا بابا وينا صورتى انت بتحبها اكتر منى ومرات انت ما بتحبنى اقوم اخافا اغير الصورة ما يقول المرة الجاية انت بتكهرنى!
مرطب منو !
مكره لا بطل ناس العمرة ادونى ليك انفلونزا افيال!
الله لا يوريكم العيد بين الماوس والمخدة!
فى ام طرقا عراض دى هو كناية للدنيا لكن انا مسميهو للسعودية الشارع اسمهو الستين والاربعين والتمانين من رخست الأ سفلت نحن الشوارع عندنا زى الجدول!
اها فى ام طرقا عراض كان خليت نخرينك فى البيت ومشيت عمرة ولا مشوار ورجعت البيت تجى نزلة! يعنى زى الملوخية كان علقت جلابيتك فى الشماعة واكلت تجى تلقاها مجلبطة!
اهة لسة السودانيين يجوك فى البيت بدون مواعيد ولمن يلقوك ما فى يزعلوا ويقولوا لى بعضهم دا معقول يقعد فى البيت!!
وهم زى المداحين حايمين يا خ يمكن مشيت ليكم فى نفس الوقت الجيتو نى فيهم!
انتوا برضو أخير
هنا يجوك الساعة تلاتة صباحا ويقولوا ليك البلد دى فيها نوم!
ابالله شوفى الورم دا طيب الحرامى يجى متين لمن انتوا تجوا!
الساعة تلاتة صباحا!
شفتوا طربقة الحمى الما خمج!!
[
|
Post: #116
Title: Re: طربقه!!!...نطيط كلام
Author: jini
Date: 10-16-2007, 02:11 PM
Parent: #114
كل سنة وانتوا طيبين لمجتبى ولك وعيالك الحلوين ما يدومهم عين وجاهة المجمر اب حارساهم .
والله فكرتى وحليتها جذرى انا كل واحد يجى جنبي يقول لى يا بابا وينا صورتى انت بتحبها اكتر منى ومرات انت ما بتحبنى اقوم اخاف اغير الصورة ما يقول المرة الجاية انت بتكرهنى!
مرطب منو !مكره لا بطل ن العمرة ادونى ليك انفلونزا افيال!
الله لا يوريكم العيد قضيتو بين الماوس والمخدة!
فى ام طرقا عراض دى هو كناية للدنيا لكن انا مسميهو للسعودية الشارع اسمهو الستين والاربعين والتمانين من رخست الأ سفلت نحن الشوارع عندنا زى الجدول!
اها فى ام طرقا عراض كان خليت نخرينك فى البيت ومشيت عمرة ولا مشوار ورجعت البيت تجيك نزلة! يعنى زى الملوخية كان علقت جلابيتك فى الشماعة واكلت تجى تلقاها مجلبطة!
اهة لسة السودانيين يجوك فى البيت بدون مواعيد ولمن يلقوك ما فى يزعلوا ويقولوا لى بعضهم دا معقول يقعد فى البيت!!
وهم زى المداحين حايمين! يا خ يمكن مشيت ليكم فى نفس الوقت الجيتو نى فيهو
انتوا برضو أخير
هنا يجوك الساعة تلاتة صباحا ويقولوا ليك البلد دى فيها نوم!
ابالله شوفى الورم دا طيب الحرامى يجى متين لمن انتوا تجو الساعة تلاتة صباحا!
شفتوا طربقة الحمى الما خمج!!
[Quote: QUOTE]جنى و كمال كرار
كل سنه وانتو و اسركم بالف خير و طيبين و سعيدين
شايفاكم مرطبين تعيدو بالكيبورد
ونحن الشمس لافحانه ندقدق فى البيبان و نفتش فى الواطه لحتة فحمه
اكره الاحرائيه فى الزيارات و افراغ اللقاء من بهجتهو تحويله للمهم و صلنا
لاقونى جماعه فى العيدعند ناس ابوى قالو لى نحن ماشين عليك و ح نكتب ليك بالفحمه
عشان تعرفى اننا وصلنا!!!
اتغظت جدا وقلت ليهم العفو و العافيه لله و الرسول اعتبرو نفسكم وصلتو و مافى داعى تتعبو و تمشو تدقو ليكم باب بيت فاضى!!!!
شعب السودان وإجرائية العلاقات |
|
|
