رحبو معاى ... بهمام المجمر ... التحنيس مفتوح لمن يرغب

قبل سنه وشويه فرحت شديد لما عرفت انو همام المجمر انضم للبورد و يا فرحه ما تمت ...فاخوى الكبير انضم و سكت.. البعرفو همام رجاء مساعدتى فى اقناعه ان يدينا من الفى راسه حبه كان فكر كان ذكريات.... وبالمره انا اكبر كومى ذياده
هما م انا بفتكر دى انانيه منك تقرا لينا انا و هشام و ما نقرأ ليك .. ليه حقاره والا حقاره

رأيك القاعد فيهو ده..قوم منو...وقولو لينا

______________________________________________________
دحين دى سلامى على لسان عمتك الشفه

همام ياخي أسمع كلام أختك وقوم من جبل الفهم عشان تنور غيرك ،،

ياخي أنا أسجل هنا إعجابي الشديد بأبناء حاجة نعمات تلك المرأة الشامخة ،، ربنا إيديها العافية ..

وإن لم يزد لقائي بها عن ساعات إلا أنها كافية بأن أقف مع أختك في طابور التحنيس ،، كما أعتقد بأن شهادة ياسر

حامد لا ترد مجاملة ..

مع إحترامي لكم جميعاً ،،

آل المجمر طه
معاكم حتي استاذي المربي مصطفي المجمر
التحايا لكم جميعا

ALGARADABI


والله استاذك المربى ده كان لحق جاكم بى جاى ...
مافى زول بضاعته بتنفع..
تلقاك جوه بوستاته ... ما تمرق منها ...
تقرأ و تضحك بس.. حيل يفضل ليك عشان تعلق مافى...

_________________________________
انت عارف نحن لما نمشى نزوره بنكون بنضحك من ندخل لغاية ما نمرق
ادعو الله معى ان يديهو الصحه والعافيه
اصلو فضل عم وحيد ومشيحيد

الاخ عصام الدين حسين حسن
مرحب بيك كاول محنس و مرحب والله يديك العافيه
بالله جيب ياسر يحنس معانا(شايفاهو مسجل غياب).. قول ليهو عليك الله جنس الجلب الفى البورد ده ما داير همام

أضم صوتى و ارجو يا همام ان.. (تستعمل الكى بورد) بعد إدخال (الباسورد) اللى من المؤكد (ضيعتها)
الدوامين و زحمة الحياة و (البرد الشديد) .. حالة عامة (غالبا) و قدر لا فكاك منودائما
شوف ليك عذر تانى !!
لكم مودتى ..

يا عصام بمناسبة الحجه اسمع القصه دى

دروس فى السياسه....
همام انا لقيت فى مكتبتكم كتاب ما فهمت كلمه منو... ممكن تشرح لى ... شال الكتاب من ايدى عاين ليهو .. قال لى يلاكى بهناك ...و مشينا بهناك ... جيبى الكرسى ختيه مقابل باب الشارع من جوه... انا بجيك هسه غطس و جا شايل ليهو طبشير ... و بدأ يشرح ... انا أسأل و هو يجاوب... جات الحجه وقفت ورانا من غير ما ننتبه و اول ما عرفت روقه... ياولد ده شنو ده ..كمان ده الفضل ليك .. كمان عاوز تملا لى راس البت بكلامكم ده... يا بت هوى كفايه السياسين فى البيت ده عرفنا السجون للاولاد و قدرنا عليها ... سجون البنات دى كمان البقدر عليها منو... قوم على حيلك و طيرى من هنا... وانت هوى امسح الباب ده بسرعه... ياحجه مالك ده علم ؟؟؟ خلى البت تتنور... و بعدين قصة النشاط السياسى دى نشوفها قدام ... المهم حنك منى و حنك منو ... الحجه اخلت سبيلنا...
اغرب حاجه لما جا الجد ... كانت بتساعدنا و تغطى لينا من جماعة الرفض فى البيت و نمشى نقيف فى صينية المؤسسه لما راسنا يسخن... و كمان لما نجى راجعين البيت نلقاها عينى عينك فى الشارع ممرقه عصير الكركدى بالجرادل .. و خرطوش المويه ... شى البشرب و هى ماسكه الخرطوش .. وشى البغسل راسه و شى يتمخط من البمبان... بالنسبه ليها اعدام الشيخ محمود محمد طه .. الراجل الكبير ذى ده بيعدمو .. خلاص صبرها انتهى هنا...قامت مرقت جرادلها...

اسعد الريفى كنت متأكده من انك ح تجى تحنس معاى
خليك معاى بالله

ولك مودتنا و قصص وذكريات حنينه و لذيذه

ذرية بعضها من بعض
ناس علم وتجربة وخبرة
همام نحن محتاجين ليهو عشان يثرينا ويثقفنا فى المواصفات والمقاييس وضبط الجودةفلا يوجد شعب فى المعمورة عانى كما عانى الشعب السودانى من استيراد السلع الفاسدة مثال (لبن البودرة والاغدية بصفة عامة والادوات الكهربائية ولساتك السيارات والاسمنت الفاسد والعطور وحتى الكحل الذى يوضع فى العين والمبيدات والمخصبات وبروميد البوتاسيوم والقائمة تطول)!
لا اعتقد ان همام الخبير وهسة خبير اجنبى يبخل على هذا الشعب المغلوب على امره!
نتوقع من الاخ همام الاسهام فى هذا المنبر المقروء لفائدة الجميع!
فهلا تكرم حبيبنا همام المجمر
جنى

جنى الاخو

Quote: همام نحن محتاجين ليهو عشان يثرينا ويثقفنا فى المواصفات والمقاييس وضبط الجودة

نان ده براه يا جنى ؟؟!!! امنى ما تلومت..

كدى شويه كدى ادها دفره ذياده


________________________________________________________
جنى سلام و تحيه من ناس البيت كنا فى سيرتك و امبارح
و كانت قصتنا المفضله حاضره مالعاده
قلعتها و لا عفصتها

سهام المجمر تحياتي لكم جميعاً ،،

تخيلي أنا من مدينة مدني ،، جمعتني مع ياسر حامد الدوحة ،، فكان إختياري لخوة ياسر بمجرد مشاهدتي له

أول مرة ،، أسكن في جواي سيرتكم العطرة ،، وكان أن ترافقنا في إجازة للسودان ،، تصوري ناس عصام جبرالله

بإنتمائهم للمدينة كنت أنا ، قبل أن يملأني مزادكم ،، وظل منزلكم محوراً ،، فقد أحببت الحاجة نعمات لما شاهدته

فيهامن كل عناصر علم التربية ( القوة ـ العاطفة ـ الموضوعية ـ الفهم المتطور الذي فشل علماء السياسة في

ملامسته )

أحسست بإنتمائي لها أكثر حين ذاد عليها المرض في الفترة السابقة .. إنها أم بفهم فلها التجلة ،،

وموقفها في مقتل الأستاذ يعني الكثير ،، وأحي أمثالها ، وخاصة حاجة عشه والدة ياسر ..

همام سوف أزيد من درجة التحنيس ،، مع مودتي ..

سهام .. هشام (عارفك بتكون متاوق و دودتك .. من الدوحة لكليفلاند .. )
همام بصمته و سكونه الظاهرى .. دنيا من الحكاوى ( وصلنا لمرحلة الذكريات ) !!
عشرات بل مئات من الاحداث لم يكن شاهدا عليها .. بل كان محركا .. و فى أحيان كثيرة (وقودا)
همام .. رجل لا تأخذ منه غير (الصدق) و الجدية .. حتى حين يضحك ، كنا نرى ( شر البلية ما يضحك)
سخريته اللاذعة .. دائما يسبقها تفكير عميق..
موسوعى الاطلاع .. لا يفارقه الكتاب ..
اتمنى أن أراه هنا و فى كل مكان ..
إلا
السودان
لانه هناك
يحترق كل لحظة .. لان كل شئ له و لنا .. ما عاد هو

(كفاية و لا نزيد )...

مرحب كبيره بهمام المجمر..

مرحب بهمام

وكل المجامرة

سجيمان مرحب بمرحبتك

اها ناس بلدنا بقولولنا المجمراب

كده شوى كدى حنس معاى بى كليمك الذيذ داك

منى خوجلى لا عدمناك

اسعد الريفى و الله هو ما قلت

اسمع ده:

بعد تقديم طلب و مداولات اخيرا و افق الحاج (رحمه الله) ان يمنحنى الاذن بالسفر الى ابتسام فى النهود..فرحت و زغططت وبديت الاستعداد.. يابت راجيك قنقليز بالشطه بالدكوه و الدقه الف..ح ترشى الرمله مع هاله و تتجدعى ونسه... و تتصورى كبندريه و ... وانا فى غمرة التجهيز.. جانى همام ...كان وين ما بعرفو..شعرو منكوش و عيونو حمر من التعب.و مغبر.. العيون الحمر دى عارفاها اساسيه لما يكون الهلال لاعب... فهمام كبقية اولاد وبنات طه مرضانيين عديل كده بالهلال.. ناصية بيتنا كانت مكان التجمع و التجمع المضاد على حسب نتيجة المباره ..يعنى مشجعاتية الفريقين كانو بيجو بيلعبو المرسا ل جاكم برله برله برلليله جنب بيتنا... لكن اليوم داك ما كان فى كوره و اساسا الوقت ذااااتو ما كان وقت كوره... مسكنى من يدى و اليد التانيه ختاها على كتفى و قال لى و عينو فى عينى سهام اختى لو رفعتى رجلك من الخرطوم الايام دى نص عمرك بضيع و ح تندمى طول حياتك.. اسمع كلامى و افتحى للسفره دى... ده كلام شنو ده يا همام فى شنو؟؟؟ قال لى اقعدى بتعرفى...
ثقه كده لغيت السفر .. اها بعد ايام بقيت برجع مغبره و حالتى بالبلى ذيه و ذى الاف غيره ما كنت بشوف عيونهم المرهقه ببساطه لانهم ما كانو ساكنين معانا ....
وطالبنا براس نميرى بكل جديه .. صدقو!!!!!
شكرا يا حبيب فالذاكره سجلت شريط مهما اشغله و اعمل فيه تقديم و ترجيع و احيانا اخته فى الرف ما بنسهق

تعال يا همو اكتب

الف الف مرحب بصديق الزمن الجميل همام

بورود اسمك ، تذكرت اجمل ايام العمر فى قاهرة ذلك الزمان ، وتذكرت ايضا حياتنا الثره فى جيزة الصاروخ القاهر ، ومنيل شارع السراى ، مصر الجديده ، مدينه نصر ، وتذكرت ايضا بعض من الزملاء العزيزين.. علاء عبد الرحمن ،نبيل الحضرى ، مها زين العابدين ،بخيت الكامل ، الحاج المنصورى ، اين هؤلاء ياترى وهل من الممكن ان تجمعنابهم ايام طيبه مره اخرى ، واين انت الآن.. مره اخرى مرحبا والف مرحب

Quote: نان ده براه يا جنى ؟؟!!! امنى ما تلومت.. كدى شويه كدى ادها دفره ذياده

Quality control and conformity to standards
as appetizer
دى ما فاتحة شهية بس قلنا يكسر بيها عين الشيطان عشان تحترموا نفسكم وتسمعوا بس يا شطار
جنى

سلام يا شباب

عصام الدين
AlGARAdABI
اسعد الريفى
jini
منى خوجلى
سجيمان
كمال قسم الله
Mustafa Mahmoud

الوصيه فى الذمه...اتصل بى همام الان و هو بسلم عليكم واحدواحد و بشكركم واحد واحد..و قال ليكم كما توقع اسعد فعلا هو ضيع الباسوورد بتاعه...ونسبه لظروف كتيره... ح يشارك بكتابة مقالات.. يعنى حاره علينا مافى ردود وكلامات.. لكن الكحه و لا صمة الخشم..
ما بقدر اوصف ليكم المكالمه عشرينن دقيقه ..يعنى لقيت نفسى تانى قاعده فى الكرسى المواجه باب الشارع... المهم اتمنى ان يستطيع بكرى فى اقرب وقت ان يمرر الباسوورد لهمام حتى يوفى بوعده...

الشكر ليكم منى .. شدييييييييد لمكابرتكم لى فى بوست التحنيس ده.. واها جاب نتيجه...

همام الله يديك العافيه و يخليك لى ولبنياتك The best brother ever
_______________________________________
الاخ مصطفى محمود شكرا لمرورك و بوكيه الورد
همو بستاهل والله

كمااااااااااال قسم الله
لك التحيه
تحايا الف من مجتبى و بسلم عليك شديد

العزيزة سهام المجمر ..لك التحية
و للزميل هشام المجمر التحية ايضأ
و ترحيب متأخر بالاخ همام المجمر ..

همتك يا همام
ما تكسف سهام و هشام
اجبر الخاطر

الاخ محمدين
ترحب بيك العافيه

الاخ نصار

اهلا بيك
الله يكفينا شر الكسفه ترا رسلت لبكرى ونشوف لما يصلو الباسوورد

و شكرا ليكم الاتنين وانشألله نكابركم فى تحانيسكم

إضافة مهمة:
فى زمن الهوامش و الحواشى و بعيدا عن نظم القوافى
همام شئت أم ابيت
منذ تخرجنا من جامعة المعز الفاطمى
أنت ..
و رتل من الخريجين
كنتم
و بلا توقف
بداية النحت فى الصخر
و الكتابة على الحجر
و إثبات الذات .. بعيدا عن (الذوات)
و بعد عقد من الزمان
أتضح أن المسألة كانت ( كتابة على الهواء)
فأعطينا أنفسنا بفية الامل
و تفرقنا فى أرض الله الواسعة ...
و برضو (نتاوق) عليها ( سبورة الهواء) ..

تعرفي اول تعليق جا في راسي كان : همام كمان؟ لا بلاهى البورد ده سجلوهو باسمكم بعد كده ....

شفعت لكم ـ ايها العفافيض ـ تراحيب و تحانيس كمال قسم الله و عصام حسين و " من لف لفهم" .... جنى ده لافيها عدييييل

فلنرحب بهمام و هيام طه المجمر

____
بتاريخ 24 أبريل 2005

أختي سهام...

طبعا بحري طراوة..

وأكيد همام نسمة من نسمات بحري وحتى لو ترك بحري

والنمسة تهب وهي مضمخة بأترجة من بستان "المجمراب..."

عشان كده يعني بنشارك في حملة التحنيس ولو متأخرا

أصبح الصبح
و لا همام و لا هشام جاء ..
و لن ننتظر حتى المساء !!
سامع يا همام ..
عشان ما نبدأ الحكاية بقصيدة هجاء بعد كل التحنيس و التكليس الحايم فوق ده .. و أظنه اليوم ده ويك اند طرفكم .. و لا برضو المعايش جبارة ..
رغم إنو ( كل شاة معلقة من عرقوبها) ( حفظ الله عراقيبكم من التعليق)..
ودى و تحياتى

طبعا ما حبيت أتكلم عن سوفكليس و ارسطوطاليس و كرمنليس و الجماعة الختو الكديس فى الكيس !!

مرحب بهمام المجمر

عصام جبرالله الله يلف راسك ده؟؟؟ لك اشواق بلا حدود
ملاسى اذيك ... النصيحه اتلومو
كمال كرار ويييييينك ياراجل ؟؟؟ بحرى نسمه فى هجير

اسعدالريفى: ذى ما كتبت ليك فوق نحن فى انتظار بكرى يرسل الباسوورد لى همام
البوست بعد ده بقى تقديم طلب لبكرى ان يابكرى رسل الباسوورد

الفاتح ميرغنى و مرحب بيك انت كمان بى جاى

الأخت العزيزة سهام
افتكر كراس التحانيس أتملا

ان بحنس تحنيس مختلف

بالمكنة والخيط ..
وكدفدف ..
قدوم أحمر..
الكوارة الثقيلة .. البتكرها...
ونقة الصباح ..
وصارقيل شمبات ..
وجمعات الفسيخ ..
والسنارة ..
والتربيزة ودعمك ..
والشلباية الأنيقة..
ويحر الجبل
وخور السيلت ..
وحفرة أم دوم ..
وبحر أبيض ..
وبحر أزرق ..
والري المصري ..
وتحت الكبري ..
ولما الكهرباء تقطع ..
في الصيف داك..
واقتراحاتك بشراء ألواح التلج و.....
والغمران لحدي المغرب ..
أو
الماذدا موجودة..
والري قريب ..
وحسام المجمر جاهز
وجمال المجمر بدك الشغل
والخرطوم القديمة في سكتنا
والعدة جاهزة
أرح
مزرعة الفقس ..
وربط الصارقيل
عليك يكل ما في النيل الأبيض من قراقير
وكل بلطي النيل الأزرق
وكوارة بحر أبيض
وأب ريالة التافه
ترمي قلم في سودانيزأونلاين
ياسر حامد

كمان همام
ما كفايه هشام و سهام
عيني بارده علي وليدات وبنيات المجمر
ودابكدوك

سهام

تحياتي

Quote: رأيك القاعد فيهو ده..قوم منو...وقولو لينا

يمكن رايو دة مريح و ما داير يخليهو ..

غايتو أنا من جملة أهل التحنيس ..
تعال يا همام

Quote: كمان همام ما كفايه هشام و سهام عيني بارده علي وليدات وبنيات المجمر ودابكدوك

ودابكدوك يا دفعه

سؤال: نضمن كيف عينك باره اها امك بت عم ابوك؟؟؟

عينك ما تشوف شر
ليك العافيه

ياسر حااااااااااااااامد العريس

بركه يا خوى سيرة همام خلتك تقلع

لكن قبل لقيط صارقيلكم ده
بالله غرموا لى العود بتاعى اول


والله شوقتنى لى شوفت لمتكم صبحيه
وسناراتكم معلقه فى كتوفكم
و نشاط تجهيزاتكم
وحماس الوعد للجلب

دى ايام الله ذاد للعمر

عصام الدين

خالتى عشه دى كوم براهو
لكن ولدها الله عالم بى

ok
سهام المجمر ....
سلمي عليهو شديد...
لأنو عمو همام (والله مافي داعي لي عمو) لمن يجي الامارات أنا باكون في ماليزيا عشان الجامعة و كدا .... كلميهو قولي ليهو أحمد يوسف بقى زول جامعات وكلام بالشكل دا ... لكن في بلد كلها كيزان ... آخر مرة قابلتو كانت سنة2003 شهر 10 وأنا نازل ثانوية عامة ...
وللحديث بقية .....................
(التفاصيل في البروفايل)

يا سهام

سلام

انت الموضوع ده مالك فاتحاهو

اها النجيب ليك الكلام الجد

الراجل انا كلمتو اكتر من مرة

لكن واضح انو فى ناس فى المنبر هنا مطممين بطنو وبطن الله

الراجل عديل قال ما بقدر لانو شاعر بانو مافى فايدة

و راجع ليك

واحد من اتنين يا هشام؛
يا تقنعوهو انو بطنو ما تطم؛ يا يقنعكم انو بطنكم تطم!

الاخ ابو جهينه
هو فعلا قاعد فوق راى كنت اتمنى ان استطيع ان انقله هنا لكن خايفه ان يكون نقلى غير سليم
المهم نتمنى ان يتحصل على الباسوورد عشان يكتب مقالاته كما وعد

سارى الليل

اوع يكون عمو همام دى ح تجيب وراها عمتو سهام؟؟؟

وفى انتظار بقيه الحديث

هشام المجمر
بركه يا اخوى الجيت داخل باقى زمن ما شفتك

همام كلمنى بنقاشكم .. لكن المره دى قدرنا نصل ان يشارك بكتابة مقالات و نحن فى انتظاره
بعد حصوله على الباسوورد

ملاسى اذيك؟؟!!!!!!!!

الف مرحب به
ونتمنى له اقامة طيبة بيننا ...


عائلة كاملة بيننا ...


الله يزيدكم ويطول ايامكم ...

الاخ عاصم ابوبكر
سلام

اللهم امييييييييييين يا رب
وانت كمان يارب
شكرا لك على هذا الدعاء الطيب

يا ملاسى

سلام
منو القال ليك نحن بطنا ما طامة

بس جلدنا تقيل شوية و مساعدين نفسنا بشواويل القنقليز و الليمون

Quote: بس جلدنا تقيل شوية و مساعدين نفسنا بشواويل القنقليز و الليمون

يا هشام

الله فى!!!!!!!!

ارحب بهمام المجمر وكل من يساهم بكتابة مفيدة.
كيف ينطق اسم همام؟
بضم الهاء؟ بفتحها؟
بتشديد الميم الاولى؟

Quote: بس جلدنا تقيل شوية و مساعدين نفسنا بشواويل القنقليز و الليمون

انتو اقنعوهو بس يا هشام و الشواويل عليّ

Quote: ملاسى اذيك؟؟!!!!!!!!

تعرفي يا سهام .. اذيك حقتك دي مافي حل
غير يردو عليها ب: أهلاً و .. ثهلاً !!

Quote: الراجل عديل قال ما بقدر لانو شاعر بانو مافى فايدة

هشام ود عمى حاج طه
ياصديق همام يكتب عشان الشعب السودانى موش عشان الاعضاء البورد دا فى الحضور بكون الاعضاء 30 والزوار 890 واهم الزوار لانه ياتون للاطلاع اما الاعضاء الكرام ما عدا بعض الاستثناءات بكتوا للمناكفة او المجاملات او تشتيت كورة او استعراض عضلات اوعدم شغلة او فياقة! وبالرغم من ذلك البورد له اقلامه المسئولة والمسكونه بهموم اهله وله قراء فى القبل الاربعة
همام يكتب لتنوير هذا الشعب فى مجال علمه وخبرته واتمنى ان نقرا له فى المقاييس والمواصفات وضبط الجودة فى البلد الاهل بقوا يموتوا بالسرطان بصورة مرعبة!
يا همام عليك النبى عز النبى!
جنى

جنى

فوووووووووووق

Quote: يا يا همام عليك النبى عز النبى!

همام .. عليك الله ياخي اجبر بخاطر جني دا
و اكتب لينا حاجة عن ضبط الجودة.

(تحنيس سلام )
ليك ياهمام
وليك يا سهام ست النظام
لكما مودتى

مرحب ورحب ورحب
اليبقى لي داخل
مودتي سهاو وهمام

أها يا سهام يا أختي
قطعنا الإجازة الإجبارية مخسوس
علشان نحنس همام
غايتو بعد ده لو ما جاء
حسابنا معاك..
والله نبقى ليك أصعب من الأولاد


وإنت يا ملاسي، لو أصلك بتقدر تتبرع
بشواويل قونقليس.. ما رسلت لينا
مالك وإنت عارف مأساتنا مع هذا المدعو القونقليس


نهاية القول:
يا همام عليك الله تعال

الاخ عادل امين
سلام
والله سؤال صعب خلاس

اقول ليك حاجه بضم الهاء

سلمى الشيخ
اذيييييييييك وسلام الف
احمد العربى ترحب بيك عافيتك
غاده ياختى سلامة العوده...
يا همام انت عارف الحال مابقدر انا على ذى تهديدات غاده دى
بالله اول ما تستلم الباسوورد نزل مقالاتك
_________________________
دحين دى سلامى

Quote: الاخ عادل امين

انا اسمى عادل عثمان يا سهام النور!

يا عادل عثمان
بعرف اسمك ذى جوع بطنى...لكن الليله عيونى مطششه
جايه بعيد عنك من بيت بكا..
المهم العتبى لك حتى ترضى

السلام عليكم
ان شاالله يوم شكركم ما يجي
اشكركم جميعا
و أنا والله ما داير تحنيس
داير وقت و صبر علي الكتابة
بصراحة انا بعد الطباعة بالكي بورد ده الله اعلم تقروا لي كتير لكن ما حاخذلكم و إن شالله تلقوا تحت القبة فكي بعد كلام سهام ده

الأعزاء:

سهام- عصام الدين- القرضابي- مني خوجلي - سجيمان- كمال قسم الله - مصطفي محمود- محمدين - نصار -

عصام جبر الله - حسين ملاسي - كمال كرار - الفاتح ميرغني - نادر - أبو جهينة - ساري الليل - عاصم -

عادل عثمان - سلمي - أحمد العربي - غادة

لكم جميعا خالص شكرى و مودتي

أسعد - هشام - ياسر حامد- جني - جاييكم هسة دي

أسعد .. صديق الزمن الجميل و رفيق الدرب و السكن, أتابع

كتاباتك بانتظام.. كن بخير

هشام و ياسر حامد....... يا حليل الجلب

يا جني ياصديق .... كلامك صحيح.... الكتابة مسئولية كبيرة, و البورد صورة مصغرة لحالة

متعلمي السودان.

لا تزعجني مناكفاتهم و لا مهاتراتهم خلال مواضيعهم المختلفة, بل أجد في ذلك دليل صحة و عافية,

فالحوار أيا كان قد تنتج عنه معرفة.. و الجدل و الإختلاف ضروريان بل طبيعيان.

كلما كان الإختلاف عميقا و وجهات النظر متباينة- و إن صاحب ذلك في بعض الأحيان عنف لفظي- كلما

إقترب القارئ أكثر من معرفة كيفية تفكير المحاور و اسلوبه في إدارة صراعه

نعم كما ذكرت يكتب البعض فيما يفيد و فيما لا يفيد وللدهشة كل ذلك عندي

جيد, فالمهم أنهم يكتبون.

و في ذلك مفارقة لثقافة المشافهة البدوية التي تميز بهاالمشهد الثقافي

السوداني


و لي عودة

موضوع الأمراض المتعلقة بالبيئة و تدهورها في السودان تناوله هام جدا ( ياحليل ناس د. عيسي

عبد اللطيف و رفاقه الكرام بالجمعية السودانيه لحماية البيئة)


أما موضوع انتشار السرطان و المواد المسرطنة فكل المعلومات التى بحوزتي خارجة من خيمة نظرية

المؤامرة " و دي نظرية انا كنت مفارقها فراق الطريفى لجمله" لحد ما منعت طالبة ماجستير في علوم

البيئة من إجراء دراسة حول تأثير صناعة النفط في السودان علي البيئة.

"Effect of formation water disposal"

بواسطة أجهزة أمنية.

الكلام ده ما وقع لي وقلت والله ياخي نظرية المؤامرة دي ممكن يكون فيها وجاهة. رجعت تاني

للشائعات ...

دفن نظام نميري للنفايات المشعة....


سماح نظام الإنقاذ بدفن نفايات المجارى اليونانية " Sludge" بالسودان....


و قلت في نفسي و ما خفي كان أعظم

همام ود حاج طه
الله يجبرك بى خاطرك
ننتظر قلمك السيال وفكرك الثاقب
جنى

ألف مرحب بلأخ همام المجمر

أخيرآ ... وفى إنتظارك دومآ

شكرآ للأخت سهام المجمر

همااااااااااااااااااام انت يا يمه لا تفوت لا تموت و يخليك لى
تعلم انت جيدا قبل الاخرين
اننى كنت اثق تماما انك لن تخذلنى اى والله قد كنت على يقين
انك لن تفعل ... فهذا انت و عهدى بك...
الله يخليك...


الاخ رأفت مرحب بيك
نعم نحن فى انتظار همام وكمان هيام!!!!
اتمنى ان تكون ابنتك قد بلغت العافيه

رغم أنك سبقتنا هنا لكننا (نتجرأ) ونرحب بك يا همام.
سلام لهشام وسهام،

مودتي

يا صباح الخير ..الجميل البهى
المزدان بحضرتكم
حيث عصفت بنا الاشواق
و (أحدودقت) عيناى من الفرحة ( جاية من الحدقة)
و تحدودق عين الرجل فى العربية يعنى (تعمل زووم)
و بناء على حضوركم .. و تلبيتكم لكل رقاع الدعوة اعلاه و التحانيس التى أمتدت من سانت خوزيه الى سيدنى مرورا بمروى و شندى و بابنوسة..
لكم جميعا الود و الاشواق
و دمتم
و نترك المايكروفون الان للاخ همام:-

الاخ محمد المرتضى مرحب بيك

العزيز اسعد
يازول انا هنا خاته لى كل زول مكرفون قدامه!!!!!!!!!!

طيب انتو ما كويسين

اختكم دى جبتوها من وين؟

كيف الوردات يا همام....اكيد كبرن و زادت الالسن النسوية اللديحة حولك..

عصام جبرالله

Quote: اختكم دى جبتوها من وين؟

فعلاً أنه يستحق التحنيس ،،

فلنقف لهمام المجمر بإجلال ،، فله التجلة ...

مرحب بهمام طه المجمر

همام ليس فقط اخى الذى ولدته امى و الذى يكبرنى مباشرة بل هو صديق ممتاز و قارئ نهم و مستمع جيد
غير ذلك فهو شخص ذو عقل علمى وناقد وفى نفس الوقت شخص نافذ البصيرة شمولى النظرة
دائما نتحاور حول ما اكتب وفى بعض الاحيان تجده لا يجاملنى قط لو كان الموضوع لا يستحق او كان البوست ضعيفا

همام خبير فى امور البيئة و بالاخص تدوير النفايات وله من جليل الاعمال عندما كان موظفا فى بلدية العين قسم الصحة

اسكت هنا ليس لأن شهادتى مجروحة لانى عندما اتكلم عن همام اتكلم عن الرجل و الانسان دون تحيز بسبب رباط الاخوة
اسكت لادع مجالا لهمام ليعرفكم بنفسه وانا واثق انه قدها و قدود

طيب... ووين إلهام؟ وحسام؟

هشام متواجد باستمرار وله التحية ايضاً..

كيفك يا همام.. ومرحب "كرت"..

سهام: اثبتي بما لا يدع مجالاً للشك خطل مقولة "العلم في الكبر كالنقش في البحر"... كنت قايل الحكاية في الاول عدم مقدرة على انزال الصور والوشوش... بقيتي كمان تلوني الخط (على وزن تفكي الخط) وتكبريه وتبلديه "من بولد بالانجليزي"... واحتمال كبير تأيتلكيه!!

وكيف الاولاد...

فعلا همام قدها و قدود

سيف بشير

وسؤالك المقص ما ح ارد عليهو.. شكرا على الاطراء على علاته

الهام و حسام
امممممممممممممم


اهاكيف كلو!!!

Quote: امممممممممممممم

الوش الختيتيهو هنا دا ما بتاع اممممممممممممممم دي...

أحرف اتنين شفتهم في وشوش حالات الـ امممممممممممم هم خدر و تمبس (واقترح ألاّ تحاولي طلب مساعدة الاخير لزوم الحرج وكدا "من كتر السؤال")

الأخ العزيز بكرى... أشكرك جزيلا لإرسال ال password

أعزائي : رأفت - محمد المرتضي - جني - أسعد - سهام - عصام الدين حسن - هشام - سيف بشير.... فرحت لحرارة لقائكم بي .

عصام جبر الله !!!
"كيف الوردات يا همام....اكيد كبرن و زادت الالسن النسوية اللديحة حولك.. "

عزة مدني قالت ليك إنت عايز معاها مشاكل ولا شنو?!!!!!

مواصلة لكلامي البديتو امس ( غايتو لامن كتبتو كان عندنا يوم الإثنين)

بخصوص مشاكل البيئة

المهم في الحالة النحنا شايفنها دي, يعني تنصل الحكومة من كل واجباتها تجاه المواطنين , الحل

الوحيد إنو الناس تاخد زمام المبادرة لحماية نفسها( زي ناس الحلة في موسم الحرامية) أو زي جوليا

روبرت في فيلم

Erin Brocovick المأخوذ عن قصة حقيقية

من خلال جمعيات غير حكومية تضم مختصين في علوم البيئة و الجيولوجيا.

و دي الحتة البتفوت علي الناس المهتمين بقضايا البيئة دايمالأنو الجيولوجيين ممكن يعرفوا لو المشاكل المهددة

لصحة الإنسان ناتجة من البيئة الطبيعية (medical geology)

و كده يادار مادخلك شر.

أوعدكم أكتب مقالات تتناول الموضوع ده بكل جوانبه

العلمية و التشريعية

و تفعيل الرأي العام

و خلق الوعي البيئي

وكمان اكتب في موضوع الجودة و المواصفات (عشان حسين ملاسي ما يزعل)

اخى همام
و نحن نجتمع داخل هذا (المشهد)كنت اتمنى ان أجد (الدبيب) الذى لا شك يستمتع بالمتاوقة ..
و اليوم فى الرياض معى اخونا د. المعز الى اضفى على اياما بهجة و (ألقا)
تعرف استعمال الكلمات دى فى التعبير مسألة صعبة ..
زى حكاية تدوير النفايات
و حوسبة الماعارف ايه
.. ما فضل لينا الا نقول
و كان لوجودك بيننا أبلغ الأثر ..
اههه إيه رأيك !!!

لنشمر ساعدا
انها شهوة نفير
وضجة تضرج هدوء (الصمت) الارض...
أقرع طبول المحاصرة معنا
لنصحى الارض (بنت الكلبة) النائمة عن بؤسنا.


انتظرك وحتى تلك اللحظة تحياتى للاسرة الفاضلة


عبدالخالق الجمرى

Quote: تعرف استعمال الكلمات دى فى التعبير مسألة صعبة .. زى حكاية تدوير النفايات و حوسبة الماعارف ايه .. ما فضل لينا الا نقول

أسعد الريفى
الشئ بالشئ يذكر
كان دكتور قلندر محافظ للخرطوم واهتم بظاهرة الأغنام المنفلتة ووجه بتوقيع غرامات باهظة على أصحابها!
كتب احد الخبثاء مستخدما لغة دكتور جعفر بخيت مخرجا لسانه لقلندر:
ان تغنيمية الآحياء تمثل تناقضات التلبنة الغذائية الغير مرتبطة بتكنيكية التزريب المرحلى وبرسمة التعليف!
جنى

Quote: ان تغنيمية الآحياء تمثل تناقضات التلبنة الغذائية الغير مرتبطة بتكنيكية التزريب المرحلى وبرسمة التعليف!

الاخت سهام المجمر
اضم صوتى الى السادة والسيدات وادعوا
الاخ همام الى المشاركة التى نتطلع اليها
معك


بسال عن حسام المجمر

الف مرحب بهمام المجمر

هشام عرفناهو وسعدنا

سهام نقرا ليها وبختنا


همام

من ريحة الطيبين ننتظرو فى العين

سلام يا سهام و هشام


و مرحبا بهمام


و منتظرين هيام و عزام كمان


و جميع ال المجمر
و ناس المزاد




مي الاسيد

الف الف مرحبا بهمام
في انتظار الجديد والمفيد

سيف بشير: ما أول كنت بقلب فى الفكره(اممممممم) وبعدين قلت وجدتها..مالك المشكله شنو..

ebdelkhalig elgamri سلام ليك... والله نحن فى اشواق لاصوات الطبول القادمات. بس الله يمد العمر

mohmed said ahmed نحن ذاتنا بختنا..الله يديك العافيه

مى الاسيد سلام عليك ..المزاد؟؟؟ غايتو الاسيد دى ما بعرف فيهو اسيد غير ناس خالد الاسيد... انشألله انتى منهم!! فهم اخواناو اخواتنا و احبايبنا و قد المتنا احزانهم فى رباب (جميلة المزاد و وردتها النضره و التى زبلت فى غير موعدها) و من ثم امانى الهادئه و خشمها عندها...اللهم ارحمهن و توب عليهن و اسكنهن فسيح جناتك يارب...
مى الاسيد ادخلى لى جوه و اتوهطى ففى جراب همام الكتير نسأل الله ان يسعفه بالزمن...

يحيى بن عوف... سلام ليك و لى قرنق الخاته فى عينيك ... الزول مات و خلانا محسرين من بؤسنا و خلا وفاضنا من قياده قاعدين نجتر كالابقار هسه لو كان قرنق حى كان شالو الطاقه؟؟؟هسه كان كان قرنق حى كانو مررو قوانين سجمهم ديك؟؟؟؟هسه كان كان و كان...

اختنا العزيزة سهام المجمر

صباحاتك بالف خير
واهلا بكل اهلنا ال المجمــــر زينة المنبر سهام وهشام وهمام(بس شيلوا الحصن الحصين من العين علي قول حبوبتي بدوكم عين ناس البورد ديل وخصوصا الضلاميين)!
اهلا بيك اخونا همام وان شاء الله تطلع ليناجمرة اكتر من هشام وسهام!
مودتي واحترامي

هشام هبانى يعنى هسه انا اسلم عليك كيف؟؟؟؟
دخلتك علينا دى جابت معاها لفحه من نيران غضبك
لتذيدنا حماس

أهلا بة أملا متقدا و ضاءا بين أهلك و عشيرتك ، و نحن نعبر لك عن فرحتنا بقدوووومك فإطلالتك البهية هى التى تخلق فينا الأمل ، فمرحبا بك يا عزيزى ، و ننتظر مساهماتك النيرة .

و لك الود