من وحى ترحيب ساميه قسم... بس ما عارفه اسميهو شنو!!!!!!!!

بحرى....85 الدنيا صباح الهواء جميل و عليل لازلت مجدوعه فى الحوش على سريرى كل مره احشر نفسى فى النص البارد منه.. فما احب السرير البارد و نومة الصباح الى نفسى..اتذكر نشيد الوالد الصباحى يا بتى ما تقومى شوفى ليك شغله النوم ده يجى وقت تنومى فيه جوه عينك و ما تصحى منه باختيارك... بقية النشيد: يا حاج ياخ انا بحب همبريب الصباح يمر بين اصابعينى و اواصل تعسيلتى... النص البارد سخن اتقلبت على البرد(بكسرالباء و الراء) .... احس بالاوجاع فى كل مكان من جسمى... احاول ان اتمطى لاقصى حد لعلى اخفف من النتحى فيوم الامس كان حافلا.
صينيه شارع المعونه الناس من حولى و حد بصرى .. جموع لم ارى مثلها من قبل..الاجساد ممتده جنوبا لشمبات شمالا للدناقلات شرقا للمزادات و غربا حتى امدرمان و غاب الافق فى كل اتجاه... فكرت ربما هذا تمرين ليوم الحشر.. الناس.. المصير.. الظلام الدامس.. زفير الغضب نيران..الهدير يجتاح الارواح لن ترتاح يا سفاح...لن تحكمنا حكومة الجوع.. لن تحكمنا حكومة العسكر.. خاين خاين يا نميرى.. فوق فوق سودانا فوق ... الجموع ملتهبه ... كوامر الاحتياطى المركزى اتت مترجرجه... العساكر مدججين بالسلاح والكرابيج و البمبان... الجو اشتعل دخان و الكرابيج اشتغلت اشكال والوان... زوجة خالى كانت بجانبى لم اجدها... فالناس تجرى فى كل اتجاه.. وكان الملتوف.. (اتارى) اولاد الشعبيه مسلحين انفسهم بالملتوف.. شكيتهم على الله كان هجمونى.. وجدت نفسى اجرى من الملتوف فالخوف من الجديد شديد.. المهم لم استطيع ان اتبين اى طريق من الدخان الحارق و الدموع وفجاءه شخص ما (كمشنى) بزراعين كالحديد احسست فيهم الغضب.. فكرت خلاص انا اتقبضت.. و سرحت فى كل السناريوهات المحتمله..جهاز الامن و كلابه التعذيب باشكاله و الوانه وهل سأحتمل التجربه و الا ح افت نصه والايمكن افته كله قلت لنفسى اها الليله ده يوم الجد وجاك فماذا انتى فاعله؟؟... حاولت التملص من تلك القبضه فاذا بصوت اعرفه تماما.. يا بت اقعدى ساى و الله الليله ما اخليك.. الله الله الله كان اخير لى ناس الاحتياطى المركزى .. عرفت انى فى طريقى للبيت.. هناك و جدت الحاج و اقف فى الشارع وفاتح خرطوش المويه و الناس من حوله جماعات تغسل فى وجوهها و الحجه مطلعه ليها جردلين كركدى التقول الناس جايه من دافنه.. سمعتها بتتكلم معاهو دى مالها؟ الازمه و الا شنو؟.. عليك الله اجرى جوه جيب البخاخ.أتاها الرد ساخنا ما بجيب انا مش قلت البنات ديل عندهم ازمه مافى و احده فيهم تطلع.. و الله الليله المرقه من كرابيج العساكر ما يمرقها من سيطان النيمه دى.. بس كدى امشى اجيب الباقيات و اجى...التقول نحن فاضيين ليهن....... المظاهرات استمرت حتى الساعه الواحده صباحا ما بين كر و فر.. وانا فى انتظار العلقه نمت من التعب فكان هذا فرارى العظيم دون ان ادرى...
اصحى اصحى فى مارشات عسكريه..قفزت من على السرير بسرعه غير معتاده فى ذلك البيت.. جعلت الحاج رحمه الله يهز راسه تهكما. الحاصل شنو؟ المارشات العسكريه سلت روحنا... سوار الدهب يعلن انتصارنا على العسكر. الفرح غطى الشوارع المظاهرات خرجت من كل بيت حتى ود الجيران الخواف طلع ..فالفرح جواد.. جوبنا بحرى كلهاعلى الارجل لم نحس بالتعب وكان و قوفنا فى وسط كبرى بحرى له طعم غريب و هناك اكتشفت انى بجلابية النوم حمدت الله على انى اكره الغطاء بالبطاطين و بتغطى بالتياب مهما كان الجو.. وهناك ايضا غيرت الجموع اتجاهها من ناحية جامعة الخرطوم للتوجه لسجن كوبر و المشاركه فى اطلاق المعتقلين السياسيين... العيون فوق تنظر للمحمولين اعناقا...للسماء..للام لو لفضاءات الحريه القادمه.. لم نكن ندرى اننا ننظر لخيبة املنا و ضياع جهدنا... فهنالك من داخل كوبر انطلق اول خنجر نحو الجمع متمثلا فى الدكتور الجزولى دفع الله.. و توالت خيبات الامل...... سوار الدهب.. المجلس الانتقالى ..قانون الانتخابات التأمر على دوائر القوى الحديثه ليأتى الصادق المهدى و ما ادراك ما الصادق المهدى ...و بدأ معه العد التنازلى فى ايام اليقراطيه الوليده.. المسكينه ما لحقت تتهنأ... الصادق وا كبتى لحقها الذينين كما يقول اهلنا الدهمشيه (كبتى: بكسر الكاف و الياء).. وتوالت توالت توالت الفجائع و المغايص......تحالف الجبهه و الامه مظاهرات السكر و فوق فوق سودانا فوق وانطلق الرصاص فى ظل الديقراطيه و الصادق المهدى و ما ادراك ما الصادق المهدى. لا ادرى لماذا فى كل مظاهره اجد يدين جاهزه تكمشنى وتسلنى من وسط البمبان؟؟؟ لكن هذه المره لم تكن مقرونه بأى تلويح بفرع نيمه...فالتحيه لكم ايها الاصدقاء وين ما وداكم الزمان.
بحرى89 الدنيا صباح الحر خانق .. الهواء اتسرق ...لازلت ارزح من حمى الملاريا و التيفويد الدربات شغاله... مارشات عسكريه تأتى من بعيد و انا و اقعه لى فى بير.. ظننت اننى اهذى من الحمى....ياجماعة الله الازعاج شنو؟؟؟ ردوا على مافى حاجه بس الظاهر جماعة الليل وصلوا.... يا خساره يا خساره جات جات الجبهه جات.. و جات جات الجبهه جات..
تمر الايام و تمر و تمر بالمر و المر و يجى النميرى باستقبال رسمى يقدل فوق السجاد الاحمر بعد ما قدل بدماء الشهداء... وعاد عاد مشيرنا عاد.. وعاد عاد مشيرنا عاد.... و كان طعم الفجيعه فى افواهنا كالحنظل...و اااااخ يا وطن.......اخ اخ اااااااااااااااااااااااااخ

سهام
تحية واحترام

يامّونة شن بتشوفى
يا عيونى شن بتشوفى
سنتن والعيش بالقبضة
قلبك شاباى للنبضة
جونى العشامة لقونى
جهادية ماكلة كتوفى

مرحبا بالاستاذة سهام
نزلت اهلا وحللت سهلا

عادل

سامية

شفتي الربات الوصفتيها في بحري
دي كلها انا كنت في نصها من قولة تيت لحدي المشي لسجن كوبر

لكن نسوي شنو تعبنا كلو اتلحس وجاء النميري معززا مكرماً

الصديقة بت المجمر,
الله يجازيك, والله حيرتيني, بهذه القدرة الفائقة, والمبدعة علي الحكي والسرد, أنها حقيقة-بالنسبة لي- اول مرة أكتشف فيها, تعددك هذا, وحساسيتك الإبداعية الواضحة, هذا-طبعاً- فوق الغناء الكورالي الذي عرفتك به سابقاً أيام الجامعة.
شكراً علي الحكي الجميل والمختلف.
عثمان

العزيز عثمان حامد
طبعا انا بخاف منك من زمان لانك من ناس.. المسطح , المحايثه, المفهوم,الافهوم,التماهى, الابستمولجى الكلام الكبار العصى على امثالى.....و الله انا بكتب ليك و قدامى صحن بوش مبالغه عشان كده سؤال سريع : دحين انت جادى فى كلامك الفوق ده؟؟؟؟؟؟؟ لو القصه ما مجامله كلمنى عشان بعد ما اضرب البوش ده اذغرد زغرودة شبع...

العزيزة بت المجمر,
سلام
زغردي طوالي ولاخوف عليك.....
عثمان