بكرى ابوبكر شكيتك للخلقك

بكرى ابوبكر شكيتك للخلقك


06-28-2004, 10:44 AM


  » http://sudaneseonline.com/cgi-bin/sdb/2bb.cgi?seq=msg&board=415&msg=1193432132&rn=0

Post: #1
Title: بكرى ابوبكر شكيتك للخلقك
Author: Siham Elmugammar
Date: 06-28-2004, 10:44 AM

مجدى سيد قاسم الاخدرانى ابو وش صغير ..اللطيف على العود..الحنين على الصوت.. مجدى الضحوك ... اخو الاخوان... و المشوكوش المحترم الراقى..صديقنا و فردتنا.. لشد ما ألمنى رحيله عن الدنيا ام بناية قش...قبل الشوفه يا مجدى وياااااااااا حليلك يا ود أمى..و ياحليل شبابك و حليل بسمتك و حليل طلتك..
من حياة الجامعه الجميله كنت الاحظ ان لكل شخص شلته من جنسه و شله من الجنس الاخر وشله أخرى مختلطه...و ان كان ناشط سياسى فهناك شلته من اصحاب و جعته.... كنا محاطين بالطيبين و الطيبات من كل شكل و كل لون وبكل النكهات السودانيه الا special .... وامرقو النصيحه يا اخوانى/تى استمتعنا بالجامعه للطيش(ما انت يا سجيمان)... احيانا كثيره و تأثرا بالفكره التى تدعو للاستغفار بعد الضحك اقول يمكن يا جماعه نحن ما استغفرنا... كنا من اواخرالدفع التى تخرجت فى المستحليه ..لفظتنا كما النفس الاخير....لم نتوقف للوداع لم نذرف الدموع و نبكى على الايام الخوالى و لم ننتظر تبادل العناوين الدائمه...و على عجل ركضنا بعيدا خوفا من العدوى... ظننا ان الورم الخبيث الذى اصابها فى رحمها لن يلحق بنا...و جرينا جرينا شديد ...قلنا نندس وراء مكاتب الوظيفه ..الا اننا فى غمرة ركضنا لم ننتيه ان السرطان كالخطبوط له الاف الازرع ..و كالمهجوم تلفتنا فى كل الاتجاهات بحثا عن المخابىء.. ناس ربت الدقون وناس ادعت الجنون وناس اتملت بيها السجون... .. و تششتت بينا الدروب و انبهلت... واااااااااااااااااااااخ يا بلد
انا من شلة الاخدرانى مجدى سيد قاسم المختلطه..من البنيات ايناس خيرى السمينه الحسها دايما مقروش و قطره العيون ملازماها و بالمناسبه لا تخلو شنطة ايناس خيرى فىاى و قت من ابرة خياطه و لكم ان تسرحوا... وامانى حسن الحلفاويه اللذيذه رئيسه الشله الحنينه ذات الضحكه العاليه و الصديقات بنات الخدور صاحبات النكته الحاضره و الاصوات الرخيمه و دقاقات بنقز درجه اولى (ما بحبن ادللاليك) و من الوليدات الصادق صلاح يا تمرجى شايل السلاح تاح تاح تراح يا تمرجى (معليش اسمو طويل) منفلت اللسان اللذيذ عازف الاورغن....علاء جيولوجيا العفوى خفيف الدم ود امبده و لامبده قصه( مره واحده من حناكيش علوم و اقفه معاهو فى الجنكشن و هو مبهول يضحك فيها شى نكت شى قفشات المهم الحنكوشه ماتت من الضحك و بعدين سألتو انت يا علاء بيتكم وين؟ رد صادقا فى امبده ضحكت شديد و ما بين شهات ضحكها قالت ليهو ياخ انت مالك جنك هزار كده انا بسألك بالجد) عندما قابلته بعدها بساعات و جدته قاعد ممحن و اول ما شافنى قال بت المجمممممممممر الحقينى انا ما مورود....و امير احمد البشير الولد القصير كما كنا نغنى له...الغشانا كلنا و عرس اخت أمانى الجميله.
نجيلة المعمار...الميدان الشرقى كانت اوكارنا نلجاء الليها ليلا.. يحتوينا الطرب و زيدان الجميل...غنينا يا ابوالامجاد داوى نارى و التياعى و تمهل فى وداعى.... لكن انا عندى ليك سؤال مالك انت ما اتمهلت وبخلت نفسك ان تهب لنا بضع لحظات سراع...يا الله يا الله.... يا بنات الخدور شيلن ايناس انتى ما بتعرفى صفقى بس الصادق انت بكر ه جيب الاورغن... امير اصبر بعد شويه بنغنى الحقيبه...ويا علااااااء قديتنا بثنائى العاصمه..
اين منا ذلك الزمان الجميل..... فلك الرحمه يا ود سيد قاسم
بكرى ابوبكر شكيتك للخلقك كان تورت علينا الذكريات التى بتنا نهرب منها حتى لا يصيبنا صداع الشجن.... و اها قصد كده ح انزل الكلام ده فى بوست براهو بدل بوستك الاتملأ ده ...
Post: #2
Title: Re: بكرى ابوبكر شكيتك للخلقك
Author: ali othman
Date: 06-28-2004, 10:57 AM
Parent: #1

سهام المجمر لك تحياتي
هل انتي سهام من رابطة طلاب بحري ؟؟
Post: #3
Title: Re: بكرى ابوبكر شكيتك للخلقك
Author: Siham Elmugammar
Date: 06-28-2004, 12:50 PM
Parent: #2

HI
NO that is my sister Elham.
Post: #4
Title: Re: بكرى ابوبكر شكيتك للخلقك
Author: Siham Elmugammar
Date: 06-28-2004, 07:45 PM
Parent: #3

يا عثمان حامد ما تابع معانا ياخ!!!! هو اصلو الزول بيفكو كدى ساكت؟؟؟؟؟؟؟!
Post: #5
Title: Re: بكرى ابوبكر شكيتك للخلقك
Author: Abdel Aati
Date: 06-29-2004, 00:28 AM
Parent: #4

بوست جميل يا سهام وكتابة تقطع النفس (الواحد بيقراها دون توقف)؛ الحمد لله نهيتيها هنا
ويا استاذنا شوقي بدري لك منافسة خطيرة..

عادل
Post: #6
Title: Re: بكرى ابوبكر شكيتك للخلقك
Author: singawi
Date: 06-29-2004, 04:42 AM
Parent: #1

سهام

القومة ليك .. والبركة فيك
قلمك روعة .. وسردك صافي وممهد بدون شوائب أو دقداق
اتدفقي ما تكوني رقراق

تحياتي
Post: #7
Title: Re: بكرى ابوبكر شكيتك للخلقك
Author: بكرى ابوبكر
Date: 06-29-2004, 04:53 AM
Parent: #6

الجميلة بت المجمر
لك الشكر لهذه الكلمات و القلم المبدع الذى اضيفته للمنبر الحر و الذى ارجعنى الى الزمن الجميل 1988 للمرحوم مجدى و الصادق و طه جعفر و امير وعلاء و الكل و اسف لهذه الكلمات البسيطة فى حق هذا البوست الجميل لكن الزحمة حاصلة و الايام دى على سفر و اهديك هذة الاغنية انشاء الله تعجبك
<BGSOUND src="http://www.bayanit.com/upload/protected/til3at_algamra.wma" style="color:black;background-color:white">
Post: #8
Title: Re: بكرى ابوبكر شكيتك للخلقك
Author: سجيمان
Date: 06-29-2004, 05:17 AM
Parent: #1



Quote: ستمتعنا بالجامعه للطيش(ما انت يا سجيمان)...


شكرا يا سهام............. دائما بحتاج يذكروني اني الطيش.. عشان ما اتغا


بكري.. الغنية سمحة والله....ذكرتني سينماالسورة..وامتحان الشهادة...وشبطي الكعب العالي......

بكر ي تاني... في ناس عاوزين يسجلو وموسطني......... عليك الله ما تحرجهم.....وتحرجني....
Post: #9
Title: Re: بكرى ابوبكر شكيتك للخلقك
Author: مريم الطيب
Date: 06-29-2004, 07:15 AM
Parent: #8

سهام المجمر اللطيفة من حكاوي عثمان حامد...

ومن البوست الحميم ده...لك محبتي والترحاب.
Post: #10
Title: Re: بكرى ابوبكر شكيتك للخلقك
Author: TahaElham
Date: 06-29-2004, 07:53 AM
Parent: #9

العزيزة سهام المجمر مرحبتين حبابك الف والجابك يجيب ايناس والهام عثمان وبالطبع ناهد جبرالله ياعصام ... اتمني ان يطيب لك المقام هنا وحا تلقي ناس كتار من ناس الجامعة وناس حوش بكري .. وواصلي هذه التداعيات ..تحياتي لمجتبي وسلام من طه
الهام عبد الحالق
Post: #11
Title: Re: بكرى ابوبكر شكيتك للخلقك
Author: Siham Elmugammar
Date: 06-29-2004, 02:27 PM
Parent: #10

يا سجيمان
اها نان غنونة بكرى الذكرتك السينمات وشبطك العالى دى وينها؟ يبقالى بعد ما سمعتها اكلتها و الا شن نان انى ما لقيتها مالى؟ (الكلام دة بالشايقى)
Post: #12
Title: Re: بكرى ابوبكر شكيتك للخلقك
Author: Siham Elmugammar
Date: 06-30-2004, 05:49 AM
Parent: #11

الاخ عادل: ما حرام عليك انا مع عمنا شوقى بدرى؟؟؟؟؟؟؟؟؟؟؟
بالمناسبه او بدونها عندى سؤال: هل انت ود عبدالعاطى الاتهموه الكيزان ?198(معليش الزاكره خربانه) فى الفرع بقتل احد كوادرهم؟؟؟ اذا كنت هذا الشخص فلى معك حديث.........
Post: #13
Title: Re: بكرى ابوبكر شكيتك للخلقك
Author: الجندرية
Date: 06-30-2004, 06:27 AM
Parent: #1

سهام
شفتي نجيب كتابتك دي
على كتابة رقية وراق عن الفراعة
على كتابة ناس ديك الجن وشلته القديمة عن معهد الكليات
ونقعد نوووووووووووح
علي جيلنا الاتشظي دا
Post: #14
Title: Re: بكرى ابوبكر شكيتك للخلقك
Author: Siham Elmugammar
Date: 07-01-2004, 10:37 PM
Parent: #13

الاخ بكرى دعيت ليك للخلقك يهنيك و يطرح البركه فيك... الشكر كتير كتير على الغنيوه و يا و جعنا من قبض الريح....
Post: #15
Title: Re: بكرى ابوبكر شكيتك للخلقك
Author: nada ali
Date: 07-02-2004, 12:05 PM
Parent: #1

العزيزة سهام
كويس انك ظهرتى انا افتكرتك خفتى و اختفيتى
شكرا لقلمك المتدفق القا
وواصلى ياملكة السربعة (فى المليان)
Post: #16
Title: Re: بكرى ابوبكر شكيتك للخلقك
Author: Siham Elmugammar
Date: 07-06-2004, 01:25 AM
Parent: #15

انا حزينه حزينه حزينه .....يا ندى
اليوم سيصل جثمان امانى ما عارفه زاتو امشى كيف..... تعرفى قبل يومين من سفرها لماليزيا اللاعوده دى اتصلت بى طالبه حضورى لزيارتها و فعلا مشيت ليها تانى يوم قعدنا نتونس من الظهر طلعت منها المغرب......بالامس والدتها طلبت منى ان اتصير و ادعى ليها بس لانها فى ايامها الاخيره ما كان عندها طلب غير الناس تدعى ليها.. قالت لى يا سهام اعتبرى اليوم داك كان الوداع... تسألت اذا كان ممكن ان يتجرأ الوداع ان يودعها دون اخطارى......ملأتنى كعادتها ونسه وحكاوى ووصف بالادين..و انا فى منتهى متعة الحضره كصوفيه....تذكرت ايام القاهره شقة المعادى و اليوسف افندى..... اتسأل الان هل لنبشى ذكرى مجدى علاقه بفقدى امانى صديقتى الجميله الحنينه... اقول ليك حاجه يا ندى خلينى
Post: #17
Title: Re: بكرى ابوبكر شكيتك للخلقك
Author: Siham Elmugammar
Date: 07-06-2004, 01:27 AM
Parent: #15

هذا بوست الفقدان!!!!!!
Post: #18
Title: Re: بكرى ابوبكر شكيتك للخلقك
Author: esam gabralla
Date: 07-06-2004, 01:47 AM
Parent: #1

سهام
هل ستتوقف الاحزان يوما ما؟؟
جرح خالد لا زال يفعل فعله، لتاتى هذه الكارثه والفجيعه ... امانى بت حسن ومريم ... ماتت، يا لعبث الحياه..
تقفز لمقدمة الذاكره سنوات وجوه و ذكريات طفوله وصبا ونضج، ليس فقط لصلة القرابه و لا للجيره لاعوام وللصله التى لم تنقطع بل ايضا لامانى الانسانه لانها تستحق.
عفوا، ربما استطيع الكتابه لاحقا،ربما... لو استطعت التغلب على هذا الحزن المقيم والمزمن.
Post: #19
Title: Re: بكرى ابوبكر شكيتك للخلقك
Author: Siham Elmugammar
Date: 08-29-2004, 12:41 PM
Parent: #1

الحبيب ود جبرالله
مدينتك فى الشهور الاخيره صارت مدينة احزانى... و اخفتنى من وراء الكيبورد لفتره طويله... قبل و فاة صديقتى امانى السمحه توفى العم اللذيذ الطاهر المجمر و بعده ب 3 شهور قررت الحاق به زوجته و خالتى و قاموس الامثال الشايقيه..... شفت يا عصام القصه كيف صعبه هنا.... يا دوب راجعت الارشيف و رغم قدم البوست الا ان اشواقى لك و الرغبه فى سماع مواساتك دفعتى للكتابه ليك و خصوصا شكلك كده فاتح للاميل بتاعك... لك التحايا و الاشواق...
Post: #20
Title: Re: بكرى ابوبكر شكيتك للخلقك
Author: Siham Elmugammar
Date: 08-29-2004, 09:32 PM
Parent: #19

يا ود جبرالله يا اخوى و ينك؟؟؟؟
Post: #21
Title: Re: بكرى ابوبكر شكيتك للخلقك
Author: انا بنت النيل
Date: 09-02-2004, 11:37 AM
Parent: #20

العزيزة ..لشدة ما آلمتني بت كليتنا الجميلة رغم عدم المعرفة اللصيقة بها..رحمة الله عليها وربنا يخلي اولادها ويصبرك عزيزتي..

اها يابت المجر سمح كتر خيرك ..نكرتينا دحين ما درستي معانا لمن فترتي في رابطتنا الحبيبة ..ولا الثقافية العلمية كانت نمرة واحد ..وما بتتذكري الولد هشام الكان ناظرنا يوم داك وواقع فينا نهير وهرش ..واكتشفنا انه " شويفع" ساكت علا مفتح ..ووكيلك الله لي هسه مفتح فتيح ..ولي الليلة مخوفنا..
Post: #22
Title: Re: بكرى ابوبكر شكيتك للخلقك
Author: Aymen Tabir
Date: 09-02-2004, 01:35 PM
Parent: #1

dear siham
salamat
long .. long time i ve been looking for contact information with Hiam taha so phone number , email any thing will be wonderful ..
[email protected]
thanx
Post: #23
Title: Re: بكرى ابوبكر شكيتك للخلقك
Author: nour tawir
Date: 09-02-2004, 05:46 PM
Parent: #22

!AAAAAAAAAAAAAAAAAAAAAAAAKH
Post: #24
Title: Re: بكرى ابوبكر شكيتك للخلقك
Author: بكرى ابوبكر
Date: 09-02-2004, 05:48 PM
Parent: #23

الجميلة بت المجمر ازيك
Post: #25
Title: Re: بكرى ابوبكر شكيتك للخلقك
Author: خضر عطا المنان
Date: 09-04-2004, 10:09 AM
Parent: #24

العزيزة : يا شاكية عميد الدار لله : سهام

تحياتي لك وتقديري

ولو سمحتي لي عندي سؤال : هل والدك هو المرحوم : طه المجمر
الذي كان أحد اداريي وكالة السودان للانباء ( سونا ) ؟

خضر عطا المنان
Post: #26
Title: Re: بكرى ابوبكر شكيتك للخلقك
Author: Siham Elmugammar
Date: 09-04-2004, 12:17 PM
Parent: #25

بالحيل يا ود المنان انا بنت طه الجمر... اهلا بيك
Post: #27
Title: Re: بكرى ابوبكر شكيتك للخلقك
Author: Ehab Eltayeb
Date: 09-04-2004, 12:55 PM
Parent: #1

الأخت سهام المجمر :
لك التحايا.. والكلام بهذه اللغة الجميله.. واسلوب السهل الممتنع..

أضاف اليها رونقا.. وبهاء..
لك التحايا... وفي إنتظار إبداعاتك,,,
Post: #28
Title: Re: بكرى ابوبكر شكيتك للخلقك
Author: خضر عطا المنان
Date: 09-05-2004, 09:52 AM
Parent: #27


ســــــهــــام طه المجمر

طالما والدك هو الراحل العزيز طه المجمر .. فأِنت أختي يا سيدتي
فقد كان الرجل والدي بحق يوم كنت أعمل بوكالة السودان للأنباء .. ولا زلت أذكر كم كان يمازحني دوما خاصة وانني كنت يومها شاعرا صغيرا أنشر بعض ماأكتبه بالصحف والمجلات السودانية وأريها اياه فيعمل على تشجيعي تشجيعا ممزوجا بكثير من المزاح حيث كان طبعه هكذا معي منذ ان عرفته وافترقنا .. الى ان التقينا آخر مرة بمدينة العين بالامارت وكان يومها قد بلغ به المرض مبلغا..
بعدها لم أسمع عنه لبدء هجرتي باتجاه آخر من أركان هذه الدنيا التي تشردنا فيها وبكل اتجاه !!!!!!!!1

لذا أكرر الترحيب بك وسلامي لكل فرد من آل المجمر أينما كانوا..
ورحم الله طه المجمر فقد كان فلتة ادارية فريدة في بلادي يوم كان السودان الذي أعرفه ويعرفني .


خضر عطا المنان
Post: #29
Title: Re: بكرى ابوبكر شكيتك للخلقك
Author: sari_alail
Date: 09-05-2004, 11:18 AM
Parent: #1

سهام المجمر

العين 1996-2001


احمد يوسف ادريس

كيف د.عصام لسة في السودان ولا رجع العين
Post: #30
Title: Re: بكرى ابوبكر شكيتك للخلقك
Author: sari_alail
Date: 09-06-2004, 09:48 AM
Parent: #1

UP