فى ربيع الحب كنا....

Post: #1
Title: فى ربيع الحب كنا....
Author: Siham Elmugammar
Date: 08-19-2007, 06:53 PM
Parent: #0

فى ربيع الحب كنا نتناجى ونغنى
نتناجى و نناجى الطير من غصن لغصن
ثم ضاع الامس منى و انطوت فى القلب حسره

غريب امرها معى .. فكلما احس بحالة من الحزن ... الشوق لشخص اولمكان... الحنين للحظات مضت
اجدنى ادندن بها... تجتاحنى و انا لا احفظ منها سوى مقطعها الذى ذكرت .. ولحنها البخش جو العضم
عايزاها بصوت صاحبها الاصلى ...فهل من مجيب؟؟؟!!!!!

فالحزن فى السودان وا لشوق للاحباب اصبح حاله يوميه و هذه الاغنيه هى عصاى التى اتكىء عليها و اهش بها على قلبى ..تأتينى فى موجه من بحرها الدائم داخلى... الغريب فى الامر انى لاادرى لما هى بالذات ... و نحن غنانا مليان باغانى الحزن والاهات... شكلى كده عاوزه تنويم مغنطيسى لأعرف سر ارتباطها باحزانى...و حالات الجلا عندى..

Post: #2
Title: Re: فى ربيع الحب كنا....
Author: Muna Khugali
Date: 08-19-2007, 07:17 PM
Parent: #1

انتي وين يا سهام..

علشان أرسل ليك شوق كتير..

Post: #3
Title: Re: فى ربيع الحب كنا....
Author: Siham Elmugammar
Date: 08-19-2007, 07:24 PM
Parent: #2

انا قاعده يا بت خوجلى فى الحالةالبتجيب الاغنية دى يدندن بيها راسى قبل لسانى!!!!

عارفة يا منى ياختى حالتنا فى البلد دى تخلى سيدخليفة يمرق من قبره يغنيها و يرجع تانى

لك منى يا عزيزه قلدة شوق (بكرفتها)

Post: #4
Title: Re: فى ربيع الحب كنا....
Author: filan
Date: 08-19-2007, 09:04 PM
Parent: #3

في ربيع الحب

فى ربيع الحب كنا نتساقى ونغنى
نتناجى ونناجى الطير من غصن لغصن
ثم ضاع الأمس منى
وانطوت بالقلب حسرة

اننا طيفان فى حلم سماوى سرينا
واعتصرنا نشوة العمر ولكن ما ارتوينا
انه الحب فلا تسأل ولا تعتب علينا
كانت الجنة مأوانا فضاعت من يدينا
ثم ضاع الامس منى
وانطوت بالقلب حسرة
أطلقت روحى من الأشجان ما كان سجينا
أنا ذوبت فؤادى لك لحنا وأنينا
فارحم العود اذا غنوا به لحنا حزينا
ثم ضاع الامس منى
وانطوت بالقلب حسرة
ليس لى غير إبتساماتك من زاد وخمر
بسمة منك تشع النور فى ظلمات دهرى
وتعيد الماء والأزهار فى صحراء عمرى
ثم ضاع الامس منى
وانطوت بالقلب حسرة

Post: #5
Title: Re: فى ربيع الحب كنا....
Author: محمد المرتضى حامد
Date: 08-19-2007, 09:25 PM
Parent: #4

Quote: هذه الاغنيه هى عصاى التى اتكىء عليها و اهش بها على قلبى

ولي فيها مآرب لاتنتهي حتى في اللحد.

سلام يا سهام

Post: #6
Title: Re: فى ربيع الحب كنا....
Author: Siham Elmugammar
Date: 08-19-2007, 09:38 PM
Parent: #4

يا filan و الله والله والله قد ابكيتنى طربا.. حزنا و حنينا

و لكنى تعسة الحظ الظاهر فى مشكلة فى اللينك فالاغنية المسوعة غير مكتملة.. رجاء رجاء رجاء اعد ارسالها مع امكانية الحفظ
وورينى بلدك ويييييين يا ود امى كان بره السودان عشان ارسل ليك ألحلو مر لى رمضان واكان بقيت جو السودان انشوف دبارتى شنو

لكن منى تحيه و شكر بلاحدود لقد انقذت البورد و اهله ياخى من خطتى فى رفع هذا البوست لغاية ما اللم فى الاغنية

Post: #7
Title: Re: فى ربيع الحب كنا....
Author: Sabri Elshareef
Date: 08-21-2007, 01:41 AM
Parent: #1

بت المجمر البتشبه الدهب المجمر

اخت هشام المجمر شكرا للراحة النفسية نحتاج لاتكاءة

لكي نجي راجعين لللت والعجن

ويا ريت الدنيا تصبح ربيع

ويعود فيها الغايب وبعيد

Post: #8
Title: Re: فى ربيع الحب كنا....
Author: Siham Elmugammar
Date: 08-22-2007, 04:28 PM

محمد المرتضى هى لنا فيها مأرب بلا حدود فعلا.. شكرا لمرورك .. بالله عليك توقف معى و تمعن الكلمات و تحسس اللحن و تمتع..

ود الشريف متى يعود الغايب؟؟؟

قبل يومين وردنى اتصال من واحد من اخوانى الفاتونا ذى ما فات الجميع
اها حسيت فى تغيير فى صوته قعدت الليل كلو اهرى و انكت فى راسى مالو..برى برى عليم الله حاسى.. و داس منى...يا عليم السر ود امى عاد كيفنو؟؟ اها الطاحونه تدور و تدور ..ياخ ما قال ليك مافى حاجة بس ارهاق.. سجم خشمى ارهاق شنو البخلى صوته كدى..برى برى

اهابجاى القلب يلهج بالدعاء لعله يكون بخير ويصب لعناته على من كانو السبب ...انشألله يشتت لحمهم و شحمهم كانو شتتونا و فرقونا..

اها فى جنس الحاله دى filan يزوغ من غير ما يتم جميله ويورينى الغنية مقطوعة مالها؟؟؟

Post: #9
Title: Re: فى ربيع الحب كنا....
Author: Mohamed Omar Salem
Date: 08-22-2007, 05:02 PM
Parent: #1

ياالله للذوق الرفيع و الله كلمات "تنسى الوقار و تشفى القلب المعنى". هل ممكن إرسال الاغنيه لكى اقدر احفظها...؟

كامل الود و التحايا

Post: #10
Title: Re: فى ربيع الحب كنا....
Author: Siham Elmugammar
Date: 08-22-2007, 05:22 PM
Parent: #9

mohamed Omar Salem

الظاهر القصة ح تطول!!! لكن ايد معاى لغاية ما ما يجيبوها لينا سالمة تامة مع لينكها
اها قلت شنو... ايدك معاى؟؟

Post: #11
Title: Re: فى ربيع الحب كنا....
Author: filan
Date: 08-22-2007, 08:17 PM
Parent: #10

Quote: يا filan و الله والله والله قد ابكيتنى طربا.. حزنا و حنينا

دا من الكمان !! فقوس الكمان كمدخل الغار , لابد ان يحني المطرب صوته , حتى يلامس أرض الشجن ...
و يحجب عن الجوه ضوء البسمات المشرقة , الممتده خضره و شموس ..... لحين بس !

Quote: و لكنى تعسة الحظ الظاهر فى مشكلة فى اللينك فالاغنية المسوعة غير مكتملة

حظك باسم وفاري ريشو زهواً كالطاؤوس , و لكنها ( شفقتي ) , فما صدقت زول طلب الأغنية دي , فلففتها بحجر , و رميتك بها , و كلي ظن بأني ساتخلص من انينها و نسيت أن اتأكد بأنها مـُكتملة و لن ترجعها لي جاذبية إصغائك لآخـــر مقطع .

Quote: وورينى بلدك ويييييين يا ود امى كان بره السودان عشان ارسل ليك ألحلو مر لى رمضان واكان بقيت جو السودان انشوف دبارتى شنو

الحلو مـُر ما بناباهو ,, إلا الفيكم عرفناها
Save @ PC

و هاكي رابط الحفظ كمان ... كان يجيب ليهو قراصة .. بــرووب .

* تم تعديل الرابط فوق وكملنا ليكم الاغنية .

يمسيكم بالخير .

Post: #12
Title: Re: فى ربيع الحب كنا....
Author: Mohamed Omar Salem
Date: 08-23-2007, 01:14 AM
Parent: #10

سهام سلامات

شوفى اخوك إيدوا لاحقه كيف..! الرجاء إيقاف الصوت فى التسجيل الأول:

Post: #13
Title: Re: فى ربيع الحب كنا....
Author: Siham Elmugammar
Date: 08-26-2007, 07:12 AM
Parent: #12

الوافر ضراعه filan
فعلا انه الكمان اذا غنى لحنا شجيا
سيد خليفه ذاتو ما قصر.. نسأل الله ان يوسع له فى قبره مد البصر... كما وسع لنا دفقه مسامات ارواحنا

الله لا وراك الفى بطونا!!!!!!

Post: #14
Title: Re: فى ربيع الحب كنا....
Author: Siham Elmugammar
Date: 08-26-2007, 07:17 AM
Parent: #13

Mohamed Omer Salem
Quote: شوفى اخوك إيدوا لاحقه كيف

اها ايدك الاحقه دى على لينا بيها الصوت

و الله خجلت من فلان