Post: #1
Title: أم الراجــــــــل
Author: osman righeem
Date: 07-13-2010, 08:42 PM
Parent: #0
الموضوع يخص المتزوجون و من في نيتهم الزواج
يعني الزوجات B2 و الازواج B2
سواء كانت أم الراجل متعاها الله بالصحة والعافية أم التحقت بالرفيق الاعلي
وأم الراجل في ثقافة الازواج هي ما نبحث عنه
ماهي فكرة الزوجات عن حقوق و واجبات أم الراجل
و ماهي فكرة الازواج عن واجبات الزوجة تجاه أم الراجل و حقوقها لدي أم الراجل
|
Post: #2
Title: Re: أم الراجــــــــل
Author: osman righeem
Date: 07-13-2010, 08:48 PM
Parent: #1
هل هنالك انواع من الغتاته المتبادلة بين أم الراجل و حرمه
و ماهي مناطق النفوذ المتفق عليها و كيف تتم تسوية التعديات
وفي حالة أن يكون الراجل ساكن مع اهل زوجته كيف تكون وضعية أمه و مكانتها علي اساس انه البيت ما بيت ولدها ...................
وعندما يكون ساكن في بيت ابوه أو بيت الورثة
وعندما يكون في بيتو الملك أو مستأجر
|
Post: #3
Title: Re: أم الراجــــــــل
Author: ALGARADABI
Date: 07-14-2010, 05:08 AM
Parent: #2
أنا خشيت لأني قريت العنوان راجل المرا
|
Post: #4
Title: Re: أم الراجــــــــل
Author: osman righeem
Date: 07-14-2010, 11:22 AM
Parent: #3
| Quote: أنا خشيت لأني قريت العنوان راجل المرا |
اها وبعد دشيت ولقيتو ما راجل المرا
قطعت الكرج ليه؟
واللا اخير اضعف الايمان
|
Post: #5
Title: Re: أم الراجــــــــل
Author: مازن فيصل هلال
Date: 07-14-2010, 12:40 PM
Parent: #4
العم عثمان -دخلت للتحية و كدة
شرفتونا انت والاخوة الاعزاء في العرس شرف الله قدركم
عموما العرس السوداني كمية من المعتقدات و الالامور المعقدة لدرجة الواحد قررررررب كان يرجع خلف
عاطر التحايا
مانوبيا
|
Post: #7
Title: Re: أم الراجــــــــل
Author: osman righeem
Date: 07-14-2010, 02:19 PM
Parent: #5
Quote: العم عثمان -دخلت للتحية و كدة
شرفتونا انت والاخوة الاعزاء في العرس شرف الله قدركم
عموما العرس السوداني كمية من المعتقدات و الالامور المعقدة لدرجة الواحد قررررررب كان يرجع خلف
عاطر التحايا
مانوبيا |
عريسنا الزينة
متين فضيت للنت
يا زول تاني مافي خلف بس تلف الصينية لمن تفتر تقعد وتقوم تلف تاني
مبروووووك ياخ وربنا يسعدكم
|
Post: #6
Title: Re: أم الراجــــــــل
Author: osman righeem
Date: 07-14-2010, 01:31 PM
Parent: #4
في رأي و حسب تجربتي (الثره) اي إمرة من طرف الراجل
خالة عمة أخت بت خالة بت عم عندها درجة من درجات أم الراجل
واذكر حديث لخالتي (رحمها الله ) ذات صباح وهي تسأل مرة ود اختها
صحي بقوا يدقوهم ؟؟؟؟
فبانت الدهشة علي المسكينة وهي دائما تعمل حساب شديد لمفاجاءات الطريق
و هي تستوضح الامر منن ديل ؟
فأجابت خالتي بتأكيد ... أمات الرجال !!!!! و سردت واقعة حدثت قبل ايام
في منطقة مجاورة. جلدت فيها ام الراجل جلده مشهودة و سارت بها الركبان..
|
Post: #8
Title: Re: أم الراجــــــــل
Author: osman righeem
Date: 07-14-2010, 07:37 PM
Parent: #6
الحاجة أم فتحي عندها اربع أولاد متزوجون
ولكن عندها كم تاشر مرة ولد
فتحي + مرتين + 4 بنات = 6
مجد الدين + مرة + بنت = 2
عوض الله + مرتين + 8بنات = 10
حسب النبي + مرة = 1
اها حنقيف مع كله مجموعة ومواقفها مع الراجل و و امه العكس
|
Post: #9
Title: Re: أم الراجــــــــل
Author: osman righeem
Date: 07-15-2010, 03:26 PM
Parent: #8
اها سعاد زوجة فتحي الاولي بنت خالتو المرحومة زبيدة
وسعاد من عمرها حوالي العشر سنوات طرش اضانة حكاية سعاد مرة فتحي
و لكن وفاة والدتها وهي بنت اثني عشر ربيعا جعل لقب بنت المرحومة يسيطر علي الساحة وخاصة انها كانت وحيدة امها ولكن تمر بعض اللحظات ويعود لقب سعاد مرة فتحي للسيطرة علي الموقف .. وتم الزواج المرتب
كان الموقف بالنسبة لها محدد و واضح جدا الحاجة أم فتحي خالتها و مربيتها و في نفس الوقت ام الراجل ... ولذلك مناطق تقاطع المصالح و مناطق النفوذ تكون سعاد هي الخسرانة فيها و خاصة أن اهل الراجل هم اهلها وخاصة بعد زواج ابوها و استمرار حياته مع عائلة اخري .....
|
Post: #10
Title: Re: أم الراجــــــــل
Author: osman righeem
Date: 07-15-2010, 04:13 PM
Parent: #9
استمر العام الاول عادي كما يحدث في أي زواج مرتب عائلي و ليس هنالك اشياء جديدة يكتشفها الاطراف حيث انهم تعايشوا في نفس الفريق أو الحوش قبل الزواج ....
و كانت الحاجة أم فتحي كثيرة التلميح و الانزعاج لعدم حمل سعاد مع تعلق فتحي الواضح بها
ولقد ازعج أم فتحي كثيرا يوم وجدت فتحي يقطع لسعاد في اظافرها و قيل انه اغمي عليها .... واتهمت بنت اختها انها ترسل حواء التكرونية للفقراء و اصدرت فرمانا يمنع حاجة حواء بتاعت المررو من دخول البيت .... كانت معركة شرسة دارت في صمت و هي اول مواجهة عنيفة بين سعاد وخالتها أم الراجل و انتصرت فيها أم الراجل و لكن الدبلوماسية الجندرية لم تدخل فتحي في هذا الصراع و لكنه اكتشف هزيمة سعاد يوم قالته ليلا انت ما عايز تبني بيت
ولكنه لم يستطيع ان يقول لها انه لن يستطيع ان يفرز ناروا بدون عيال و مشي الكلام مراعيا شعورها
|
Post: #11
Title: Re: أم الراجــــــــل
Author: Sana Khalid
Date: 07-15-2010, 05:23 PM
رغيم الأب..
شايفة مرا واحدة هوبت بجاي مافي..
النسوان ديل القاطع قلبن قدر دا شنو؟ الراجل و لا أمو؟
التوقيع..
سناء قلب الأسد
|
Post: #12
Title: Re: أم الراجــــــــل
Author: Nasruddin Al Basheer
Date: 07-15-2010, 05:42 PM
Parent: #11
مرور على سبيل التحية وبث لواعج الاشتياق وألم الفراق
ولو لقيت طريقة وعمر زيادة حأجيك صادي فالموضوع مررررررة حلو..
|
Post: #16
Title: Re: أم الراجــــــــل
Author: osman righeem
Date: 07-16-2010, 07:32 AM
Parent: #12
Quote: مرور على سبيل التحية وبث لواعج الاشتياق وألم الفراق
ولو لقيت طريقة وعمر زيادة حأجيك صادي فالموضوع مررررررة حلو.. |
كيفك يا عمك
ولقيت تلفونك بعد صلاة الصبح قلت اكيد في زلابية
منتظرين مرورك
ولك الود
|
Post: #13
Title: Re: أم الراجــــــــل
Author: osman righeem
Date: 07-15-2010, 05:54 PM
Parent: #11
Quote: رغيم الأب..
شايفة مرا واحدة هوبت بجاي مافي..
النسوان ديل القاطع قلبن قدر دا شنو؟ الراجل و لا أمو؟
التوقيع..
سناء قلب الأسد |
سلام يا دكتورة
عايني من موضوع البياخة بتاع الاخ بشير المشهور بي تيسير عووضة
و طلعت فيهو خواف من باب مقولة حنين للبلد الماب يخاف من مرتو ما راجل
اها قلنا نشوف الماب تخاف من أم راجلها نقول عليها شنو
زمان في بلدنا كانو بيقولو علي أم الراجل وخالتو صانعات المستحيل فاعلات المعجزة
غايتو
قلب الاسد ده مش ريتشارد
|
Post: #14
Title: Re: أم الراجــــــــل
Author: ALGARADABI
Date: 07-15-2010, 09:41 PM
Parent: #13
Quote: اها وبعد دشيت ولقيتو ما راجل المرا
قطعت الكرج ليه؟
واللا اخير اضعف الايمان |
البي البولد ده ما فهمتو
لكن لو كان المقصود عدم النعليق فانا لم أعش التجربة
أقصد تجربة الكجار الازلي بين المرا و أهل الراجل
وقد تكون دي ميزة من ميزات الغربة القليلة (فرز العيشة عبر البحار)
تمشي الاجازة - ده لو مشيت - تكونو محمولين على أكف الراحة
ولما الشوق يفتر، تكون الاجازة كملت
وين فتحية شامي؟؟
|
Post: #15
Title: Re: أم الراجــــــــل
Author: محمد البشرى الخضر
Date: 07-15-2010, 11:09 PM
Parent: #14
يا عمك
بوست آمن ولا في ألغام قدام؟
|
Post: #17
Title: Re: أم الراجــــــــل
Author: osman righeem
Date: 07-16-2010, 09:53 AM
Parent: #14
Quote: وقد تكون دي ميزة من ميزات الغربة القليلة (فرز العيشة عبر البحار)
|
يا عمر اتصلح معانا ياخ
قلنا تكنكلي اي حرمة من طرفك فيها شئ من أم الراجل
يعني خالتك , اختك , عمتك
الناس البيجو مرور أو يكسروا ظرف أو يدخلوا مستشفي
وكلك نظر
|
Post: #18
Title: Re: أم الراجــــــــل
Author: osman righeem
Date: 07-16-2010, 02:28 PM
Parent: #17
Quote: يا عمك
بوست آمن ولا في ألغام قدام؟ |
يا عمك في النية مافي حاجة
لكن الناس ظروف
غايتو من باب الاحتياط تعال ماخد ساتر
|
Post: #19
Title: Re: أم الراجــــــــل
Author: osman righeem
Date: 07-19-2010, 05:22 PM
Parent: #18
غايتو نواصل
|
Post: #20
Title: Re: أم الراجــــــــل
Author: osman righeem
Date: 07-21-2010, 05:59 AM
Parent: #19
كان فتحي يشعر بأن السيدة الوالدة تحمل سعاد كثير من المسئوليات و تتعمد في بعض الأحيان مضايقتها بموضوع عدم الجنا في حضوره الي جاء يوم و قابلته الوالده خارج المنزل و بدون مقدمات
- يا ولدي زبيدة اختي الله يرحمها قعدت خمس سنين لامن ولدت سعاد دي ما خلت لها بنية و لا فقير و من يومها الولدتها مرضانة ما قالت حي العافي
- يا حاجة مناسبتو شنو نحن يا دوب تمينا سنة
- نان مالو يا ولدي قالوا في شئ اسمو الوراثي كدي امشو الدكتور و الله ياها بنيتي زيك واحد ودايري السمح ليكم الاتنين
|
Post: #21
Title: Re: أم الراجــــــــل
Author: osman righeem
Date: 07-26-2010, 05:39 PM
Parent: #20
لم تمضي ايام وحتي بدات الحاجة ام فتحي تتكلم علنا عن ضرورة زواج فتحي و تدخل الحاج ابو فتحي مشترطا ان يبني فتحي مسكن للزوجة الجديدة في الحوش المقابل واعتبر موقفع هذا اشد انواع التضامن مع سعاد .... ولقد كان توزج فتحي أو الصحيح انه الحاجه أم فتحي نفذت مخططها بدقة واحكام و انتقام
بعد سنة من الزواج و عندما كانت الزوجة الجديدة حامل في شهرها الرابع و لدت سعاد ولدها الاول
|
Post: #22
Title: Re: أم الراجــــــــل
Author: osman righeem
Date: 07-28-2010, 06:47 AM
Parent: #21
سعاد ولدت وجابت ولد
الحاجة أم فتحي صاحبت مشروع الزوجة التانية عشان موضوع انه سعاد تلدي ده مستحيل
كان موقفها يحنن الكافر و لسان حالها يقول و لتسقط البيارة ولتبقي الحفيفة
اول بوكس اخدته ام فتحي من بنت اختها و زوجة ولدها البكر هي انه سعاد رفضت بشده
انه خالتها أم الراجل تقوم بواجب نفاستها و هي في مقام امها .....................
وعندما قدمت الحاجة أم فتحي كورية مديدة الحلبه الي سعاد ... عاينت لها سعاد بحرقة
وزادت علي ذلك قائله مديدتك دي اتمسحبيها
|
Post: #23
Title: Re: أم الراجــــــــل
Author: هويدا شرف الدين
Date: 07-29-2010, 07:00 AM
Parent: #22
سلامات موضوع مهم جدا وحساس
أم الراجل دائما بتشوف ولدها دا لسه صغير ، وانا الزوجه دي سرقتو واستولت عليهو ، عشان كدا لازم الناس من البدايه يكونو واضحين وكل زول يعرف البيهو والعليهو ايا كان نوع السكن منفردين ولا مع الاسره المهم كل زول يعرف حدودو وبعد داك يبقي الإحترام متبادل ، وانا عايشت كثير من المشاكل الخاصه بي امهات الرجال ، بس عندي زميلي ظريف امو ساكنها معاهو في البيت حكي لي أنه يعرف تماما أن وامه تتعمد مضايقة زوجته ، ودائما عند عودته من الشغل تبدا الشكوي فحدثني بأنه يقول لزوجته بأنك الاصغر والاحسن عشاني ما تزعليها ويقول لي امو انتي الخير والبركه وهي تعبانه مع الشفع كوني احسن وكدا ممشي حالو
|
Post: #24
Title: Re: أم الراجــــــــل
Author: osman righeem
Date: 08-01-2010, 04:13 AM
Parent: #23
Quote: سلامات موضوع مهم جدا وحساس
أم الراجل دائما بتشوف ولدها دا لسه صغير ، وانا الزوجه دي سرقتو واستولت عليهو ، عشان كدا لازم الناس من البدايه يكونو واضحين وكل زول يعرف البيهو والعليهو ايا كان نوع السكن منفردين ولا مع الاسره المهم كل زول يعرف حدودو وبعد داك يبقي الإحترام متبادل ، وانا عايشت كثير من المشاكل الخاصه بي امهات الرجال ، بس عندي زميلي ظريف امو ساكنها معاهو في البيت حكي لي أنه يعرف تماما أن وامه تتعمد مضايقة زوجته ، ودائما عند عودته من الشغل تبدا الشكوي فحدثني بأنه يقول لزوجته بأنك الاصغر والاحسن عشاني ما تزعليها ويقول لي امو انتي الخير والبركه وهي تعبانه مع الشفع كوني احسن وكدا ممشي حالو |
شكرا استاذة هويدا
وغالبا ما يكون الرجل الضحية
و من خلال موقفه وتفهمة بتمشي
الامور اذا كان الصراع في حدوده
المعقولة و لا تستخدم فيه اسلحة
الدمار الشامل
|
|