حليل الملكه و اخوها

زوج الملكة وظيفه بدون وصف وظيفي يذكر
و ملكتنا المقصوده هنا هي المرأة السودانيةالتي
تعمل و تعول زوجها الشديد اللضيض الراقد
في البيت قدام التلفزيون و راجيها ترجع
عشان تعمل الغداء و تغسل العده و تمسك اولادها
ويمشي هو القهوة (طبعا قهوة حبش)
وعلي وجه الخصوص عندنا هنا في الامارات

ولم اطلق عليه كلمة زوج لانها لا تنطبق عليه
فالزوج كما نعرف هو المسئول عن النفقات
وهو الصفه الوحيده التي تنطبق عليه
انه قاعد معاها بالحلال

و لي قدام شوية نجئ لي حكاية اخوان الملكات
الامراء التنابله

((الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِلْغَيْبِ بِمَا حَفِظَ اللَّهُ وَاللَّاتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ فَإِنْ أَطَعْنَكُمْ فَلَا تَبْغُوا عَلَيْهِنَّ سَبِيلًا إِنَّ اللَّهَ كَانَ عَلِيًّا كَبِيرًا)) النساء/34

يخبر تعالى أن الرِّجَال قَوَّامُونَ عَلَى النِّسَاءِ
أي: قوامون عليهن بإلزامهن بحقوق الله تعالى، من المحافظة على فرائضه وكفهن عن المفاسد، والرجال عليهم أن يلزموهن بذلك، وقوامون عليهن أيضا بالإنفاق عليهن، والكسوة والمسكن، ثم ذكر السبب الموجب لقيام الرجال على النساء فقال: ((بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنفَقُوا مِنْ أَمْوَالِهِمْ))
أي: بسبب فضل الرجال على النساء وإفضالهم عليهن، فتفضيل الرجال على النساء من وجوه متعددة: من كون الولايات مختصة بالرجال، والنبوة، والرسالة، واختصاصهم بكثير من العبادات كالجهاد والأعياد والجمع.


و برضو ده مش الموضوع
انا لا انظر الي الموضوع
من هذه الزاوية

من ناحية اجتماعية يعني الحليل ده
يقعد معاك في القهوة و بخشش من عرق
جبين حليلته
ويمكن يحلف يدفع ليك
ولكن الشهامة والكرم ديل
ينساهم في المحل المفروض
يعملهم فيه

Quote: المرأة السودانيةالتي تعمل و تعول زوجها الشديد اللضيض الراقد في البيت قدام التلفزيون و راجيها ترجع عشان تعمل الغداء و تغسل العده و تمسك اولادها ويمشي هو القهوة (طبعا قهوة حبش) وعلي وجه الخصوص عندنا هنا في الامارات

من ناس ديلا الله يحمينـا وينجينـا

اللهم اصرف عني من هو على شاكلتهـم وارحم من هن على عصمتهم

رانيا زولت الخير

Quote: اللهم اصرف عني من هو على شاكلتهـم وارحم من هن على عصمتهم

أمييييييييييييييييييييييين

يا كافي البلاء يا عثمان ما لقيت الا ذي ديل تضرب بيهم المثل
فى الامارات فى رجال كتااااااااااار عمرهم ما دخلو قهوة حبش ولا بيعرفوا دربها
الدرب بتاعهم الشغل البيت والبيت الشغل وبالكتير الجامع والجمعية

أنا عارف ..قول ليه عليك الله يا الزنجي

يا عمك
عيدك مبارك


طابح
انا معيد بره الدوله

Quote: أنا عارف ..قول ليه عليك الله يا الزنجي

اها انت عارف طبعا
عارف قول انت للزنجي

قهاوي الحبش دي المكان المفضل لناس الامير فليب

Quote: يا كافي البلاء يا عثمان ما لقيت الا ذي ديل تضرب بيهم المثل فى الامارات فى رجال كتااااااااااار عمرهم ما دخلو قهوة حبش ولا بيعرفوا دربها الدرب بتاعهم الشغل البيت والبيت الشغل وبالكتير الجامع والجمعية

اخونا محمد عبدالله الزنجي
لك الود والتحايا

ياخ والله عارف انه الرجال المسئولين هنا يكيلوا العين
و موضوع قهاوي الحبش ده مرتبط بنوع الامير فليب ديل
و مش الموضوع الاساسي
وطبعا جردل حليب طيب وطازج و محلي تقع فيه ذبابه واحده
ينتهي في المجاري
ناس الامير فليب ديل كتروا
وتايع معانا

بوست ذو صله

مابين ( رجل) بمواقفه النبيلة وآخر بشارب يعلو شفتيه ( فقط) !!

رغيم بالغتا

قبل فترة أمي كانت دايماً بتشتكي من إنو أبوي "مقل" إجتماعياً
بيمشي الشغل ويجي راجع البيت ينوم لما يكون فاضي بيمشي البحر يصطاد سمك
يوم لما كتّرت الشكوى:
أبوكم دا لا بيدخل لا بيمرق بس اليوم كلو الشغل البحر النوم
أخوي قال ليها علي عليك الله ما أحسن من القعاد في قهاوي الحبش
نططت عيونا وقالت ليهو:

لا كان كدي الينوم نومو



____________
رانيا وود البشرى سلامات ..

تيسير
كيفك وكل العام انت و الاسره الكريمه
بألف خير و عافيه

ابوك دايني عيزومه
ان شاء الله بعد العيد
اعزمه علي جبنة مدنكله

Quote: أخوي قال ليها علي عليك الله ما أحسن من القعاد في قهاوي الحبش

كلامو صاح يا تيسير , اصلو القهاوي دي غير البلاوي ما بتجيب شئ , البدخلهـا اما يطلع منها مفلس او مدمن (الادمان انواع)

تيسير مشتاقين كتير وكل عام وانت بخير وعافية

تحياتي للأب الفاضل عثمان

Quote: تحياتي للأب الفاضل عثمان

ود الرغيم

يا زول مالك بتفتح في جروح علي ناس ولا بنمشي قهاوي الحبش

ولامن نمشي بنمشي مؤدبين مع الاخوان ونرجع فيها شنو يعني

وتعالو تاني العاوز يعمل شيء بعملو وقهاوي الحبش ما كلها سيئه يا جماعه

في ناس محترمين وكويسين والما بخاف من ربه مافي شيء بيمنعوا

وينك ما بترد علي التلفون

تيسير

عافي منها (........ )

عباس يا سيد الناس

ياخ انا قهاوي الحبش ما موضوعي
وزيهم وزي اي موول و الناس احرار
موضوعي ناس قريعتي راحت

Quote: ولامن نمشي بنمشي مؤدبين مع الاخوان ونرجع فيها شنو يعني

خلاص بكره بمشي معاك كان ما عارف وين
تنكر مويه مشكور
حتي اسأل كمان هناي

وعيدك مبارك

نرجع لي موضعنا بعد التخريمه
بتاعت قهاوي الحبش و التي وردت عرضا
كمكان مفضل لحلائل المليكات

لاااااااااااا


كده موضوع البوست الأساسي راح لي .. الموضوع عن قهاوي الحبش ولا فليب ولا عطالة الرجال ولا شنو بالـ ( ضبطي) كده ياشباب

اختنا نادية
مبارك عليك العيد

Quote: كده موضوع البوست الأساسي راح لي .. الموضوع عن قهاوي الحبش ولا فليب ولا عطالة الرجال ولا شنو بالـ ( ضبطي) كده ياشباب

الموضوع عن الرجال ابن شنبات وقاعدين في البيوت و الزوجات في الشغل
وطبعا قاعدين ساكت في البيت يعني حتي ملابسه لا يغسلها فهمتي علي؟

وبعد حكاية قهاوي الحبش جات عرضا في الموضوع رغما عن ان الحبشيات الشغالات
في القهاوي عندهم رجال قاعدين في البيوت برضك مش حاله جديره بالاهتمام؟

الحالة الاولي

ابوظبي العام 2005

رجل في الخامسه والثلاثين
المستوي التعليمي جامعي


التقيت به في صلاة الظهر
يحمل مسبحه كبيرة الحبات ويليس طاقية خضراء
قال انه ينتظرني

ودار الحوار التالي

1- خير ان شاء الله
2- ياخ انا ساكن في البناية المقابله ليك و الخقيقه عرفت من الناطور انك قاعد تسفر كتير ومرات تعدي شهر كامل ماب تجي الشقه واولادك كذلك
1- طيب خير الكطلوب شنو عايزين تعملوا كروت سكر
2- لا والله انا قلت تسفيد من الشقه ومنكن تاجرها غرف وتكون عندك غرفه واحده ما دام اصلك ما قاعد طوالي
1- وتاني الناطور قاليك شنو
2- ياخ كدي تعال نشرب قهوة ونعرف علي الشياب


( ودخلنا قهوة الحبش ومولانا وقعلك سلام مع العاملات (والمعارف سلام الحبش يسال ياسر ابتفه)

واتذكرت شاعرنا :- القائل
شفتها وشافتني وبكيت
قالت لي اتفضل علي البيت
نفسي صغرت درت المبيت

المهم اتخارجت من القهوة والراجل ابوسبحه علي امل افكر في الموضوع وأرد عليه

و نشوف بعد العيد

والله حاجه تكسف!
يقعد في البيت بدون سبب؟؟
وما يفتش أي شغل؟؟

طيب مادام هي بتشتغل تجيب قروش وتشقي..
بتأكل وتشرب..
تنجب وتربي..
تنضف العيال وتعالجهم..
تنضف البيت وتغسل وتكوي وتساهر علي الأطفال..
تذاكر معاهم وتونسهم..

هو فايدته شنو؟؟


تلاقيه أسه من عينة الناس البيتظروا ديلك

!what a waste of space

*

Quote: هو فايدته شنو؟؟ تلاقيه أسه من عينة الناس البيتظروا ديلك !what a waste of space

اختنا الغاليه مني
لك التحيه
واحد فاضي وعديم احساس
بالمسئوليةيكون التنظير
بالنسبه له خط الدفاع الاول

وتابعي معنا

Quote: المهم اتخارجت من القهوة والراجل ابوسبحه علي امل افكر في الموضوع وأرد عليه و نشوف بعد العيد

في لقاء ثاني معه وضحت الحقائق التاليه

- الرجل مقيم بالامارات منذ اكثر من خمسة عشر عاما
- عمل لمدة عامين في وظيفة ثابته
- بعد ذلك استقدم زوجته وتولت مسئولية اعالة الاسرة
- تفرغ هو لاعماله و تنحصر في التجول علي القهاوي
كسمسار غرف مشاركه للبنات العاملات بالقهاوي وتوفر ملاجي
للخادمات الهاربات من كفلاهم و حسب قوله هذه المهنة لا
توفر له حق المواصلات واغلب خدماته يحتسبها لوجه الله
حسب قوله
- يحمل مؤهل جامعي
- مهنته الاخري التي لا يحب التحدث عنها و التي اشتهر بها
هي عمل كشوف المساعدات لكل من تعرض لمشكلة أو مصيبة
و لكن اصحابه وكما سمعت منهم في حضوره انه يحصل علي حقه
من ايرادات الكشف و دافع عن نفسه بأنه يتحمل كثير من المصاريف
في اللف علي الناس

النموذج الثاني

بطيخه



جاي

مؤهل جامعي
عمل لمدة سنتين

ونسبة لاهتماماته الاجتماعية المتزايده
لم يجد وقتا للعمل
فترك العمل
واعتمد علي شقيقته
في توفير السكن
وحق الاسكراتش

حاله فريده

وهذا البطيخه

يدعي المعارضه
ويتخصص في شتم الكيزان
ويذكر بمناسبه و بدون مناسبة
سرقتهم لموارد الوطن
وتزويرهم لغرادة الشعب

وبعد ان تكاثر عليه الحادبون
من اجل ايجاد عمل له
وتحت اصرارهم
اخذوا صور شهاداته
الي جهة ما
وجاء الرد من الواسطه
ما تودونا في دهية
الشهدات الدراسية مزوره
وتاني ما اشوف وشكم هنا

كيف ياخ الراجل ده كان شغال
بالشهادات دي
طيب امشو اسألوه ترك العمل ليه
مش طلع قرار بمعادلة الشهادات
فشل ليه يعادل شهادته

و تكتم الحادبون علي الخبر
وذاد نشاطه الاجتماعي
وطال لسانه اكثر



ونكتفي بهذين النموذجين
حتي لا يدخل الموضوع في خانه اخري
وقصدنا فقط تبيان ان الصورة هنا ليست زاهية الالوان