لماذا يغيب (الفحص الطبي) عن ترتيبات زواج السوداني؟!.،،،.للنقاش

Post: #1
Title: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: walid taha
Date: 12-05-2012, 08:11 AM

قلما يضع السوداني "فحص ما قبل الزواج" فى قائمة الترتيبات التى تسبق هذا الإرتباط المقدس ، ويُعزى ذلك – حسب إعتقادي – الى ان السوداني بالفطرة "متوكل" بالتالى لا يرى من داعى الى ذلك ،ولا من ضرورة لأن يسرى به الى الطرف الآخر !

متى تُحدثنا أنفسنا بأهمية هذا الشئ ؟!

Post: #2
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: محمد الامين محمد
Date: 12-05-2012, 08:30 AM
Parent: #1

بجيك راجع احكي ليك

Post: #4
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: walid taha
Date: 12-05-2012, 08:55 AM
Parent: #2

[QUOTE]بجيك راجع احكي ليك

ما تغيب يا محمد

Post: #3
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: دينا خالد
Date: 12-05-2012, 08:43 AM
Parent: #1

يا وليد مالك مصعبها كدا ؟
هى ترتيبات الزواج السودانى ناقصة ؟ الفيها مكفيها
وفى شعار فى السودان مرفوع .. الشباب مستفيدين منو
اسمو : خليها مستورة ... لووووووب
بعدين هم متعبين روحهم لييه .. انهاء الزواج فى السودان اسرع
واقل كلفة ومجهود من ( الفحص الطبى)
يعنى لو لقيت فى الشريك اى اخطاء طبية .. الاسهل من الكشف الطبى
انك تفكوا عكس الهواء ...
الجماعة البمشوا الكشف الطبى ديل عندهم زواج كاثوليييكى ..
دا رسن بله ...
تانى فرفرة مافى اى زول بقبل عليه وهو يعلم انه مقبل على مؤبد
تبذل قصارى الجهد فى التكيف والترويض والمواءمة
اها يا ليد مافى حل غير انو الزواج يبقا كلو كاثوليكى
عشان اى زول يمسك الدرب مننننننن الترتيبات القاتها دى
لكن ما دام الفكرة بتاعت يفتح الله ويستر الله دى هى الاصل ...
فتعال شوف الخمج ....
زول يكون عنده عشرة شفع يفتح الباب ويمرق
يقول طلقتها .... ########ه هايصة ....

ـتــــــــــــــــــــــــــــــــــــــ
والله السودانى دا لو غابت عنه فكرة الزواج من اصلو
بكون احسن .... فلتدخل القوات الاجنبية ,, قبعات خضراء
زرقاء ,,, المهم يكون كاثوليكى

Post: #5
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: محمد أبوالعزائم أبوالريش
Date: 12-05-2012, 09:08 AM
Parent: #3

فحص طبي للزواج؟
يا راجل ..... الناس ما لاقيين فحص طبي للملاريا.

Post: #6
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: walid taha
Date: 12-05-2012, 09:14 AM
Parent: #3

دينا إزى الحال

حدثنا أحدهم بأن "أبو البت" جاء من بلاد العم سام الى الخرطوم لإكمال مراسم زواج كريمته ممن إرتضته زوجا لها ، فكانت أول كلماته :"عملت الفحص يا ولدي ؟" فما كان من العريس -إنتقاما لما حاق بكرامته- إلا وأن فارق فراق الطريفي لجمله

Quote: لووووووب

Post: #7
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: Osama Mohammed
Date: 12-05-2012, 10:55 AM
Parent: #6

مرة كدة قلتا الكلام ده طلعوني شيوعي وكافر وما مؤمن بالقضاء و القدر وعامل فيها خواجة (شيوعي وكافر وما مؤمن بالقضاء والقدر برضو )
لو قلت الفحص ده يعملوه عند فكي ولا اي شيخ بوافقو ما مشكلة.

Post: #8
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: محمد زكريا
Date: 12-05-2012, 11:12 AM
Parent: #7

الزمن ده الطرفين بقو يخافو من النتيجة السلبية المتوقعة
عشان كده بيقولو اعقلها وتوكل او اعقليهو وتوكلى

ولو ان الفحص اصبح الطبى مهم خصوصاً فى الزمن ده مع احصائيات امراض الايدز المتظايد واضرار الكريمات وادوية التسمين

خلونا جادين واقترح تانى الداير يتزوج يمشى يفحص بعدين يتقدم كذلك هى
ولو كله طلع تمام يبقى المهر هو نتيجة الفحص

Post: #9
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: الرفاعي عبدالعاطي حجر
Date: 12-05-2012, 11:36 AM
Parent: #8

موضوع مهم

لا خستكه فيه

برغم كل الظرووووووووووووف مهم جداً.

وممكن لو في دولة مسؤوله يكون الامر الزامي ومجاني .

وآه من لووووووووووووووووووووووووووووووو

...................................................................حجر.

Post: #10
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: walid taha
Date: 12-06-2012, 07:25 AM
Parent: #1

لماذا لا يكون من ضمن الوثائق المتعلقة بعقد القران " الفحص الطبي" ؟

Post: #11
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: أشرف البنا
Date: 12-06-2012, 08:02 AM
Parent: #10

سلامات يا وليد ...
شكراً على فتح هذا الموضوع و ليت سودانيز أون لاين تتبنى حملة مشتركة مع المنظمات المجتمعية لتثبيت فحص ما قبل الزواج كشرط من شروط توثيق عقد القران ...
الدين لا يتعارض مع هذا الأمر لمن جادل بذلك فقد أصبح الفحص اجبارياً حتى في السعودية ....
الناس اليوم يدفعون عشرون مليون جنيه لتأجير القاعة التي يقام بها الحفل فهل يضيرهم أن يدفعوا مبلغ لا يمثل جزء من المائة لعمل فحص ما قبل الزواج ...
رغم أن الفحص يمكن أن يقود إلى قرارات مصيرية تجنب الطرفين قرارات مؤلمة مثل الطلاق أو الإصابة بالأمراض المنقولة جنسياً مثل التهاب الكبد الوبائي ب و ج أو السيلان و الزهري و الإيدز ...
أو مؤشر لوجود احتمالات العقم الأولي ..
مودتي ....

Post: #12
Title: Re: لماذا يغيب (الفحص الطبي) عن ترتيبات زواج السوداني؟!.،،،.للنقاش
Author: walid taha
Date: 12-08-2012, 11:32 AM
Parent: #1

توعية الماذون الشرعي بضرورة هذا الفحص ووجوب إبرازه فى موعدعقد القران ، حبذا لو كان شرطاً