السوداني ده بعمل في اليوم 50 ألف دولار من تجارة شجرة الميلاد

وحالتو زولك مرفود من السنة الثالثة
في كلية الزراعة الخرطوم .
اليومين دي سوق الشجرة نار وزولك منشار ياكل طالع نازل .
..

تحياتي ومودتي
Good for him
وقديما قالت العرب (رب ضارة نافعة)
وجاء في سورة البقره قوله سبحانه وتعالي {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}
سبحانه تعظم شأنه مقسم الارزاق

سلامات عزيزنا محمد المجذوب
أها وكت درب منبر بكري جابك بي جاي
النقص عليك طرف قصة صاحبنا المهاجر العنيد عشميق .
يا ود المجذوب زولك عشميق في كتاب كفاحو تحولت كلمات بعض الأغنيات .
زي في أغنية خال فاطمة ( عشميق حبل الوجج أنا أخويا مقلام الحجج )
( تحول البيت الي ( عشميق حبل الوجج أنا أخويا مقلام الشجر )
يا ود مجذوب حرفنة عشميق علي اليهود في موسم تجارة شجر الميلاد
فاتت حرفنة روجي ميلا علي الانجليز . تعال شوف .

قايلنو مجنون وكت كان بيتكلم عن الفكرة
وعن الدخول في شغل مع وأحد من البنجمينات الكبار وعن تسهيلات الشحن
واليد العاملة وعن زراعة شجرة الميلاد في حوض نهر الأورينكو في أمريكا الجنوبية .
..
يوم سألتو : عليك الله يا عشميق لو ما رفدوك كان هسع كان تكون وين ؟؟؟؟؟؟؟؟
قال : كان يا الصالح العام يا المقابر

عثمان موسى
تحياتي
كتابتك دايما تزرع فيني أمل بان هنالك فرصة سواء في الدهب او شجرة الميلاد

شكرا ليك كتير

العزيز عمار
سلامات
يا عمار أخوي زولك
كان جنو وجن تجيب سيرة العودة للدراسة
أي كلمة عنها كان يقوليك ياخ جامعة جورج ميسون في عينك .
وقوم لف بلا بروكلن كولج بلا شرك فار .
يازول لو جيت أمريكا دي بس تدعك مع البنجمينات ديل .
عشميق في بدايتو للهجرة في سنة 1996 يازول دعك زينا من عتالة مخازن الجينز لي ال parking لي دكاكين الدسكاونت .
بس الليلة زولك هيع .
عمار أخوي الدهب والعطش أنساو أقع تجارة الشجر .

عقمان موسى يا حبيب
مالك عليهو الزول يقومو الوهابية يطلعو ليهو غملو دة حرام
خليها مستورة

عزيزنا د / عبدالله
سلامات
لا لا زولك ما تخاف عليه .
عشميق عكليت ومدردح وحريف في اللعب يا عبدالله .
اليومين دي هو شغال قطع تقيل في غاباتو بتاعت متشجن . سنة في متشجن وسنة في ثاوث كارولاينا .
زولك يا عبدالله دخل خدمات وحربشات وأسعار جديدة في تجارة الشجرة .
وأنت عارف الشجرة دي في هادي البلاد أهم من خروف الضحية في المكنية ههههههها .
صاحبك عشميق كان بتونس معاي يا عبدالله في العيد الفات عن وزير مالية بلدنا .
وزي عاداتو قال كلام مضحك كتير عن وزير مالية بلدنا . قال الوزير في حديثو في البرلمان قال عندو استراتيجية عن الحد من الفقر .
سنة يا الاستراتيجية ؟

مكسبو للعشرة ألف دولار
في شغلو في عيد ال valentin;s day كانت هي السبب في مسكو لطريق
تجارة مواسم الأعياد الأمريكية .
وعيد الفالنتاين حسب كلام عشميق هو عيد الحب والرومانسية يحتفلوا فيه الناس ويتبادلوا
الورود الحمراء والتهاني . وقال : فالنتاين هو قسيس عاش في القرن التالت عشر .
مكسبو من بيع الورود الحمراء في عيد الفالنتاين كان هو السبب الجرجرو لدخول حلبة عراك البنجمينات وعالم تجارة الشجر .
ومن ديك وفد سرحة .
أكيد الطريق كان ملكلك و شايك بس بعد ما لاك الصبر القصة بهلت . وهاك شوف

على سبيل التحية والمتابعة. بقرأ اليومين ديل في كتاب كولون ولسون "فن الرواية". وأعجبتني هذه العبارة التي تذكرتها بينما أقرأ بوستك هنا "إن الحياة تمنح عددا لا يحصى من الإمكانات لامرىء يتمتّع بالخيال والعبقرية". والتحية موصولة له عبرك. ولكل مَن يكتشف طرقا أخرى أكثر فاعلية للحياة.

حباب كاتبنا الكبير عبدالحميد
الكاتب المبدع البنحب كتابتو وطريقة تفكيرو .
يديك العافية ياخ
ومشكور كتير علي مرورك علي سوق عشميق .
عشميق يا عبدالحميد بعد نجاحو ده كلو لا هسع زعلان من رفدو من الكلية .
قال : هم عارفين الدخول لجامعة الخرطوم وبي ظروف عيال الريف مو ساهل . شنو الصواب في فصل الطالب بدون
درأسة السبب ؟
قال : مافي أجمل من أيام الكلية وجك لبن الداخلية .
علي كل حال صاحبك عشميق العنيد مواصل نجاحو في الابتكارات الجديدة في سوق الشجر بدون ما يلتفت لكلام الناس .
هي نفس طريقة كاتبك العجيب كولن ولسون في الانتاج بدون الاهتمام لهجوم النقاد .
..
لك والأسرة الكريمة السلام

عندنا صاحب رابط نفسو من سنة حفروا البحر
في غاز أستيشن ( محطة وقود )
صاحبنا سألتو عن صاحبو عشميق
زولك فتح ضحك : ها ههها ها وقرقر قر . زولك قرقر نوع القرقرة البتخلع حتي المشردين
المابجيبو خبر لا لي فالنتاين لا لي فالن عجور .
وبعد ما قرقر ومسح دموع فرحتو بي نجاح عشميق .
قال عشميق طيب عشميق يستاهل :
والخمسين ألف دولار في اليوم شوية عليه زولنا عندو مستقبل حدادي مدادي زولنا متفتح .
يازول نحن بس في محطتنا دي لاحدي ما الواحد يبول جاز .

فتح الله عليك يا عثمان موسي
هذه المواضيع التي تفتح باب الامل للشباب تفرحني .. وهي ادعي لان يقراها الناس من شعبنا
فنحن شعب يجيد (لواكة) الصبر .. ويحمل الاسيه ..

عاشميق مقلام الشجر لم يخرج بعيدا عما يعرف ويحب .. فباع الورد في عيد الفلانتاين ربما
بطريقة مبتكرة .. ولابد انه طور شيئا في شجرة الميلاد ايضا لتبيع اسرع واكثر .. وهو مزارع
بتكوينه وثقافته ..

واحد زراعي عراقي عاش فتره في السودان وجاء يعمل بالسعوديه .. اقنع الشركه التي يعمل بها
ان تشاركة في زراعة جزء من ارضها بالسمسم .. واحضر سودانيين لحصاده .. وربح من بيعه
لشركات الزيوت والاعلاف ما نقله الي طبقة اصحاب الملايين وذهب باحثا عن ملايين اخري
في بلاد الله الاخري

لك التحيه
عمر علي حسن

عزيزنا الخال عمر
سلامات
كان سمح البلد الكبير ما عارف الناس ديل أتسببوا في شرملتو ليه .
الشبه كان شديد يا خال بين أمريكا والسودان القديم ولو ظل البلد بلد وأحد كان في يوم من الأيام
حيكون بلد محترم .
عشميق يا خال مرق من بلدو حردان تشرد تشريد السنين وفي يوم ما كان عندو حق ساندوتش ال turkey وفي أمريكا دي قمة الروحان وقمة التضهب .
بس زولك محبتو للورود الحمراء وعلاقة الورود الحمراء بالخدود وذكرياتو القديمة بزميلة الكلية هي هي المرقتو من الروحان وهي الجابتو درب الفالنتاين .
دخل سوق الفالنتاين وهو المزارع الحبوب حبيب الطورية والواسوق والناس الحلوين . يعني محبتو لحاجاتو اكتر من محبتو للخمسين البتدخل جيبو أفري دي أفري دي .
عليك الله تعال شوف جهجهتو للجماعة فطاحلة سوق الشجر كانت كيف .
عشميق صعب يا خال . عشميق قطعو مر .

عندنا صور عشميق القديمة والجديدة .
صورتو في كافتيريا كلية الزراعة شمبات
صورتو في حفلة وردي العجيبة في الكلية 1981 في شمبات
صورتو في رحلة الكلية للشلال .
صورتو في مطعم فلافل في مانهاتن .
صورتو وهو يبيع في الورود .
صورتو وهو يدفس في الدولار

Quote: عليك الله تعال شوف جهجهتو للجماعة فطاحلة سوق الشجر كانت كيف .

معاك

عمر علي حسن

خمسة وخميسة. قول ما شاء الله يا عثمان ما تكج الراجل

وبعدين عشان الناس ما تفتكر الزول دا كل ماتطلع شمس بعمل القروش دي علي مدار السنة. الشغلة دي موسمية زي موسم الخرفان في عيد الضحية. شدرو دا سوقوا حار من نص ديسمبر ولمدة 10 يومبس يعني يوم 26 عشرين إلا يسويهو زريبة

( الدريم كم ترو يا أستذ عمر )
وزولك نجح وكسح البنجمينات . زولنا يا عمر طريقة قطعو وفنون تزيينو زي
ما قلتليك مختلفة عن الشيئ التقليدي الفي السوق يعني ما بكلفت الشغل من أجل المرابح السريعة .
والنفعو شديد زولك وزع كتلوج فنان توزيعو للكتلوج بهل عليه الدنيا والعالمين . يعني دقش التسويق الالكتروني
تصلك الصورة
تختار الشجرة وتدفع الفلوس بالتلفون شجرتك تجيك في باب بيتك .

عزيزنا أسامة
سلامات

البلد دي يا أسامة فيها 350 مليون نسمة وبلد كلها أعياد .
وزولك برضو زارع في جورجيا أتلانتا قرع ( نبات اليقطين )
القرع يبيعو في موسم عيدالهالوين وعيد القديسين والعيد ده بكون نهاية شهر 10 من كل سنة .
وبرضو زولك قطع مسافة في قصص تعليب مربة ال Strawberry وصدقني يا أسامة زولنا ده بي طريقتو دي ما بعيد
بعد كم سنة يكون التالت في ترتيب أغنياء العالم في أمريكا يا أسامة بعد ما تنط المليون العاشر تاني لو دقشك قطر ما حتقيف .

تخيل كيف يكون الحال لو عشميق أكمل الكلية في بلدو .

نعم الدريم كم ترو .
وعشميق فتحت معاو . فتحت
مزرعة قرع جورجيا ومزرعة ورود جاكسون فيل وشجر ميلاد ميتشجن وثاوث كارولاينا .
ومشروع تعليب مربة الاستروبري . و تعال شوف الاستشارات زولنا أصبح مستشار كبير ومعروف للمهتمين بالزراعة وللباحثين
عن كونكشنات الصادر للدول العربية .

عشميق مقلام الشجر
سوداني وأحد من دفقة المهاجرين الطلعت :
عشميق لم يجد المساحة لا في الكلية الحبيبة لا في البلد السمح .
فتملطع وتشرد ما بين بروكلن وديترويت ليتمدد ويتمدد ( ويقيف زمبارة )

Quote: صورتو وهو يدفس في الدولار

دي حا تكون صورة الغلاف طبعاً ... عشميق دا تركتر أصلو زارع في كل ولايات أمريكا!!

ما عاوز ليهو وكيل في بريطانيا؟؟ عشان عاوزين نلحق السوق يا أستاذ عثمان ...

تحياتي

سلام يا عثمان موضوع شيق ذكرنى بصاحبنا داك يفتل فى الحبال ما خلى شيتن إسمو عشميق وفجأتنلى طلع فوق الكفر يا أخى ده يستاهل يعملو ليهو تمثال من العجوة عشان الناس تاكلو فى الأعياد ويتبركو بيهو.. تهانينا واعجابنا له ويعيش عشميق حبل الوجج (دة نوبى يا مرسى؟) مقلام الشجر

عثمان يا قريبي

قصة عشميق بتشبه قصة محمود، محمود يا عثمان بستحمي بموية البطيخ وكرعينو لو دخل بيهن مصنع فازليين ما يتعالجو من الضريسه وشوك الكتر، يا عثمان محمود نجح ونجح وبرد الجو وبقي كبير ، كبير شديد وبقي جوه، ومحروس وما بخلوه ينضم مع الناس قال شنو خايفين عليهو، محمود يا عثمان شهرو زي جلغمية مليون.
.

محمود يا عثمان ماقاعد يتكلم عن الماضي شديد ، مرات بيتذكر لامن ابوه كان عيان وشالوه باللوري السفنجة وقالو يودوه يا دنقلا يا الفاشر. محمود ما قاعد يعد القروش في ناس بتعد ليهو، هو زاتو يا عثمان ما بيعرف شكل القروش

عثمان يا قريبي

قصة عشميق بتشبه قصة محمود، محمود يا عثمان بستحمي بموية البطيخ وكرعينو لو دخل بيهن مصنع فازليين ما يتعالجو من الضريسه وشوك الكتر، يا عثمان محمود نجح ونجح وبرد الجو وبقي كبير ، كبير شديد وبقي جوه، ومحروس وما بخلوه ينضم مع الناس قال شنو خايفين عليهو، محمود يا عثمان شهرو زي جلغمية مليون.
.

محمود يا عثمان ماقاعد يتكلم عن الماضي شديد ، مرات بيتذكر لامن ابوه كان عيان وشالوه باللوري السفنجة وقالو يودوه يا دنقلا يا الفاشر. محمود ما قاعد يعد القروش في ناس بتعد ليهو، هو زاتو يا عثمان ما بيعرف شكل القروش

عزيزنا ود هارون
السلام جملة
وكيل في بريطانيا ؟
ياخ بريطانيا دي هي السر زاتو .
أعرفها يا ود هارون جحر جحر وزنقة زنقة فيها فرص .
وبعدين يا أخوي منك الشرق والغرب جبدة مش زي بلدنا الموكرة بين المحيطات دي .
علي كل حال زولك عشميق نايم في عسل الاستروبري .
تحياتي

عزيزنا منان
سلامات
وأريتك تكون طيب يا أخوي ؟
الكويس شديد يا منان زولك عشميق قام تاني بعد 18 سنة كمل الجامعة .
زولك دخل جامعة ( كورنيل ) كلية الزراعة في نيويورك ودي جامعة مشهورة وقوية في علوم الزراعة .
ويوم جات كيريسبينا أغيليراء تغني في حفلة الجامعة زولك تذكر حفلة وردي تذكر الحزن القديم وتذكر حبيباتو زمن الليمون البارد زمن كان الزمن
لسع فيه شوية لمعة وقليل همبريب .
عشميق يا منان الليلة رأكب همر النوع الطويل أبو 36 بوري .
..
تحياتي

Quote: عشميق يا منان الليلة رأكب همر النوع الطويل أبو 36 بوري . ..

ده في منه في السودان ؟
اللهم بارك له وزده من فضلك واعط كل مجتهد نصيبا يحفز غيره علي الاجتهاد .. خاصة السودانيين

عمر علي حسن

السنوسي ود عمنا العزيز
سلامات
أي . عشميق بشبه كتيريين من المهاجرين
كتيرين من النجحوا العرفوا شكل القروش وشكل العدالة وشكل الطريق .
عشميق في بلاد المنافسة الشريفة و الفرص كفكف تي شيرتو و فرفر عضلاتو وفتح عيونو ومخو .
حتشوف صورتو وهو في بداياتو مجكن في جدول مشروع ديترويت .
وحتشوف صورتو في حفلة أغيليراء بتاعت تخريجو من جامعة كورنيل وهو شالع بي كوكولا ومحدر طاقيتو ماركة N Y .
عشميق شبه التعاريف يا السنوسي أخوي
شبه كتيرين من دفقة الحردانين الفاتو . تحياتي

مرحبتين عزيزنا عمر
نعم يا عمر ربنا يباركلو وهو اليومين دي
مالاقي وكت ياكل فيه ساندوتش . لخمة الفاكس والتلفونات والدليفري
ومتابعة القطع والتخزين غايتو بس ربك يسهل عليه . القصة صعبة وكل زول داير شدرتو هسع دي .
..
سلامات يا عزيز

سنة 2000 فاتت سريع
بتذكر حديث عشميق في داك اليوم زي ما بتذكر فطور امبارح .
بتذكر حديثو عن تجربتو في ال 4 سنوات الفاتت من جيتو من السودان في سنة 1996 لي سنة 2000 .
هو عمل شنو .
واليهود واللبنانين بعملوا في شنو .
هم أحسن مننا في اللغة ولا في المعرفة ؟
كلنا مهاجرين وكلنا عيال 9 . بتذكر حليفتو وكلامو

ماعارف السبب شنو بس شايف
عشميق مكتر كتير في صورو الفي مشروعو بتاع نهر الاورينكو .
عشميق كاتب في صورة من الصور ( نهر الاورينكو الحبيب ينبع من مرتفعات جنوب فنزويلا )
..
بين 99 وسنة 2000 عشميق طموحاتو أجبرتو يمشي يدخل كورسات اللغة الاسبانية المكثفة في مكسيكو سيتي .
سألتو عن ضياع 6 شهور في الكلام الخارم بارم . بس ردو لي كان كارب .
قال : يا عثمان اللغة الاسبانية الليلة هي لغة العمل لغة الانتاج
المكاسيك هم القوة المنتجة الوحيدة في البلد . تعليم الاسبانية بيعني نجاحك في هادي البلاد وفي دي مافي كلام .

( البعجك في عشميق . الزول مرتب حالو كويس للموت والحياة )

صورة جمعتو في مناسية في ولأية
ميناسوتا مع شلة من دفعتو في كلية الزراعة جامعة الخرطوم .

اليوم السبت شايف عشميق عامل تنزيلات عامة
ONE DAY SALE في كل الولايات . يعني الدخل اليوم حينط من الخمسين ألف
لي المليون .
أي زول الليلة يعاين للسعر طوالي بدفع ولو ما بقدر يشيل شجرتو الدليفري أميديتلي بعد ما تترك عنوانك وتلفونك .
وكمان عشميق عامل الدليفري FREE .
الله معاك يا حبل الوجج ويا مقلام الشجر

واليوم برضو المليون نطاو
عشميق اكتسح سوق الشجر الأمريكي وتفكيرو مصبوب في السوق الكندي الكبير .

صورة جديدة لعشميق في يوم 12/ 9 / 2012
للتحضير لعيد الميلاد .
عشميق رجل سوداني نادر يستحق التكريم والتقدير والأحترام

كلو FRESH CUT مع أرخص الأسعار
وأفضل الخدمات . شركة عشميق السوداني بتعمل ال DELIVERY مجان لي الله
وكان كانت الشجرة كبيرة . شركة عشميق السوداني بتقوم بي عمل ال SET.UP برضو مجان .
والسعر حسب الحجم بتفاوت بين ال 275 دولار لي ال 45 دولار .

وكل عام والعالم أجمل

صورة لعشميق يمسك المنجل وتمساحية القش علي ظهر حمارو الحمامي
الصورة من صورو النادرة في سنة 1976 وهو في في ديك الأيامات في الدامر الثانوية .
...
تحتها صورة عشميق مع الجميلة أليشا 20 سنة في ديك الأيام .
كانت تدرس علوم السكرتارية في جامعة نيويورك
أليشا بت فلاحين من بوسطن ساعدت وشجعت عشميق
للخوض في بحر الشجر بعد ما قابلتو وهو بيبع ورد الفالنتاين .
أليشا اليوم تمتلك شركة ضخمة في الصين للترجمة والمعاملات التجارية .

عشميق منزل في عدد صحيفة وأشنطن بوست البارح
ضربتو الأخيرة LAST DAYS OF AMAZING DEALS .
عشميق بيدفع ألف دولار يومي للأعلان في الصحف + ألفين يومي لقنوات التلفزيون .
..
ربنا يبارك يا عشميق يا بطل

نشاطر الأمة الأمريكية الأحزان

قصة كفاح..سردك ممتع كما عودتنا يا عثمان..قصة كفاح تعطي مزيد من الأمل للشباب..عشميق سوداني مبدع وجد مناخ لابداعه افتقده في الوطن.

عثمان.. متابعين يا جميل.

ماشاء الله تبارك الله , مره سمعتا بواحد كان بدخل مبالغ كبيرة لمن كان كاس العالم فى المانيا
و هو ببيع ميداليات و هدايا بسعر واحد يورو و عمل مبلغ كبير جدا فى فترة وجيزة ..... بس مره احده

اسمع عشميق ده ما فى منو ستاتي؟

عزيزنا الحاج حمد
ود بحري الطراوة
سلامات
عشميق نجح يا الحاج . نظام الدفع المقدم بي ال CREDIT CARD سهل
للكثيرين . وتاني كمان سرعة ال SHIPPING من الباب للباب ساعدت .
يعني في البلد دي لو عندك رأس المال وعملت حسابك أكيد القصة حتدفق عليك .
في السودان ياحاج حمد كرتونة حلو مر رمضان من الزيداب للخرطوم تصلك في 3 شهور .
تحياتي

عزيزنا ياسر
سلامات
يا ياسر ياخ مشاريع زولنا تجي نص مساحة المانيا .
تخيل زول يقدر يكتسح سوق 50 ولأية .
تحياتي

Quote: في السودان ياحاج حمد كرتونة حلو مر رمضان من الزيداب للخرطوم تصلك في 3 شهور .

و ما تنسى يا عثمان ح تصل مقدودة بالجنبة و الحلو مر ظاهر تحت الجريدة المغطياهو...

كلامك صاح يا حاج حمد
التجارة في بلد أقتصادو مقدود زي السودان صعبة .
ياخ مافي شيء بيصلك في مواعيدو . السماد يصل بعد الحصاد والحصاد يتم
بعد ما يكون زمن الاحتياج للمحصول فات .
بلد سيا ستو تحيرك .
عشميق تمدد ونجح في المكان المريح وكثيرين كان ممكن يمشوا في طريق عشميق
لك التحية

صورة قديمة تجمع عشميق مع حاكم نيويورك جولياني و عدد من المتطوعين
لمساعدة المشردين .
وصورة ثانية تجمع عشميق مع لاعبة الشطرنج الروسية مارتي نافيرتيلوف الصورة في جامعة البني نيويورك .
عشميق زول عندو مقدرة عجيبة في التوفيق بين حياتو العملية وأهتماماتو الثقافية والرياضية و الأجتماعية .

عشميق السوداني يشارك ولأية كنيتكت الأحزان

أيام 22/ و23 /12
ملجات شجر عشميق حتظل مفتوحة وفي جميع
الولايات ليل نهار .
وكل عام والعالم أجمل

عشميق يلملم فرافيرو ومناشيرو ويسافر
في رحلة عمل الي دولة قطر