مجلس إدارة وجماهير نادي المريخ يهنئ البشير بالشفاء (صورة) !!

كنت ماشي اصور السمبك الكانو خاتنو فوق مأذنة المسجد بدل الهلال
لقيتهم شالوه وختو هلال جواه نجمة وفوق ليه نجمة
بلا فاجاتني اللافتة العترّصة دي
المجلس يهنئ بي جازو عايز يمرق شيك التسجيلات
الجماهير مالهن عليها؟؟

سدنة؟؟

بالغوا يا راوية
فارس الحوبة, ولو كان المرض بنشال كنا شلناه ولو كان رجال كنا مش عارف ايه

Quote: كنت ماشي اصور السمبك الكانو خاتنو فوق مأذنة المسجد بدل الهلال

انت البحومك شنو فى بيوت الاشباح دى ؟

ود البُشرى .. شوف المحنة دي ...

Quote: دكتور مصطفى عثمان اسماعيل رئيسا لنادى المريخ خلفا للوالى افادت مصادر مقربه فى المؤتمر الوطنى بترشيح الدكتور مصطفى عثمان اسماعيل لرئاسة نادى المريخ خلفا للدكتور جمال الوالى بعد ان تاكد رحيله والجدير بالذكر ان د مصطفى كان ناشط فى مجال الصداقة الشعبية وكان وزيرا للخارجية والان وزيرا للاستثمار ويعد من الشخصيات ذات القبول الجماهيرى فى اوساط الرياضيين بصفة عامة وجماهير المريخ بصفة خاصة لاسيما وان رئاسة المريخ لا تتعارض مع عمله فى وزارة الاستثمار ويعتبر ادارى من الطراز الفريد ودبلوماسى حقق نجاح كبير فى الدبلوماسية الشعبية والرسميه ورئاستة للمريخ يعتبر عودته للدبلوماسيه الشعبية من خلال كرة القدم . المصدر

هل نتوقّع خطاب لمصطفى إسماعيل فيما بعد يقول فيه: قبل ما نجي للمريخ .. النادي كان زي الشحادين

هى بقت على المريخ العظيم بس !
ما ياهو الناس هنا و هناك و فى السودان
حايمه و بتلوك فى الكلمه دى ( عاجل
الشفاء ) و بتضبح فى التيران بشفاء
المجرم ( عمر البشير ) البحلحل فى مشاكل
الملاكم ( البرير ) و ( هيثم قاروره ) ...
و مبروك عليكم العنصرى ( الطيب مصطفى )
بس مغستكم فى المريخ يا صفراب ...
الما بتلحقو جدعو ...
التحية لنادى المريخ العظيم و جماهيره الوفيه ...
و التهنئة ببطولة كأس السودان عبرك يا ود البشرى ...
.........
مع خالص تضامنى مع ثورة ( ذات البرطوش )

ابتعدنا عن المريخ منذ أول يوم صار فيه ماهل أبو جنة رئيسا

والله يا عصام انا غايظاني قصة السمبك دي من زمان وكل مرة اقول امش اصوره بنسى الدورة ربك يسرها لكن لقيتهم شالوه وجابوا الهلال

مصطفى عثمان يا صبري !!! لا لا ما معقول
الزول دا علاقتو بالرياضة و المريخ شنو؟

يا عبد الماجد يا دكتور روق الله يرضى عليك
القصة ما هلال مريخ لكن سيطرة المؤتمر الوطني الواضحة على الرياضة و الأندية لأغراض ما معروفة شنو
والقصة دي باينة في المريخ كأوضح ما يكون
يعني يمشي الوالي يرشحوا ليكم الفاتح عز الدين و السعيد عثمان والهادي بشرى و يمكن مصطفى عثمان معقول بس
وين رموز النادي و اللصيقين بيه من زمان
هم ما يدفعوا دفعهم بس و يخلوا الناس تجيب من ابناء النادي
واها ايه رايك الناس هنا بتقول عديل كدا الهلال خسر ليكم كاس السودان بتعليمات من المؤتمر الوطني و الموردة و اهلي مدني خسرو لهلال كادقلي بتعليمات من الوالي
طبعا دا لا يعدو ان يكون كلام ساي لكن لقى البيئة الصالحة لينمو بسبب تدخلات المؤتمر الوطني ورغبته في السيطرة على الرياضة

فعلا يا صلاح شعيب المسألة دي ما جديدة بل من زمن ماهل ابوجنة و يمكن قبل كدا
لكن مع استقالة الوالي و الاسماء التي طرحت لخلافته وضحت الحكاية اكثر

تدخل السياسة فى الرياضة هو احد اسباب انحطاط نتائج السودان الخارجية
خروج المنتخب القومي والاولمبي من التصفيات الافريقية
خروج أهلي شندي ثم الهلال والمريخ من البطولة الافريقيه
تبعهم بالامس فريق الخرطوم 3 من البطولة العربية بعد خسارته من الاسماعيلي المصري 5 / صفر

Quote: القصة ما هلال مريخ لكن سيطرة المؤتمر الوطني الواضحة على الرياضة و الأندية لأغراض ما معروفة شنو

أتفق معك فى هذى ...

Quote: والقصة دي باينة في المريخ كأوضح ما يكون

ففى هذه يكفى أن الفريق ( عبدالرحمن سر الختم !) أوما يسمى
بوالى ( ولاية الجزيرة ! ) وقتها ! و الذى كان فى نفس الوقت رئيس نادى
الهلال و ما زال هو سفير النظام و المبشر بطغيانه !
بل كان أحد الصحفيين وقتها من ( الزُرُق ! ) يطبل للفريق !
الركن ! بأنه ( الوالى الحقيقى
سلطة و سطوةً و حكومةً ! ) !!!!!!!
على العكس من الأستاذ جمال الوالى الشخص المدنى الذى ليست له سلطات
مدنيه او دستوريه فقط ( إسم أبيه الوالى ! ) و أنتخب
رئيسا لأحد أعرق الأندية سودانيةً كانت أم أفريقية ,
قدم لناديه ما لم يقدمه أىٌ من سبقه من رؤساء ,
بصرف النظر عن ولائه السياسى الذى ربما يتفق معه فيه الكثيرين
من أهل ( الشمال ) بما فيهم الرشاشة ( عمر حسن أحمد البشير )
و خاله العنصرى ( الطيب مصطفى ! ) و كغيره من أبناء الوسط
و الشمال النيلى !!!
معروف أن نادى و أستاد الهلال الحالى بناه اللواء ( طلعت فريد ! )
أحد زبانية الحكم العسكرى الدكتاتورى الأول الذى أطاحت به ثورة أكتوبر
المجيدة ! فهل عيرهم البعض به ؟ مع أن الحاج ( عبدالرحمن حسن الشاذلى الملقب شاخور ! )
رئيس نادى المريخ وقتها هم أول من ذاقوا الأمرين من ويلات نظام عبود ؟؟؟؟
..........
معليش يا ابو حتوت كان صبيناك !!!
سلامى ليك و لحتوت و أم حتوت و أخت حتوت !!!
و إنشاء الله المره الجايه مش إبيعوا ليك ( خروفه ! )
إنشاء الله إغشوك ( بالنعجه أم بيض ! )
ياخ ضحكتنى فى البوست بتاع ( الخروفه ! ) داك ( لمّن غِمِرتا ! )
تحياتى ...
عبدالماجد

Quote: مصطفى عثمان يا صبري !!! لا لا ما معقول الزول دا علاقتو بالرياضة و المريخ شنو؟

زمان كنا بنقود مظاهرات انتصار المريخ على الهلال حتى داخليات البركس بصحبة الصديق الحاج بابكر ونهتف" ودعبد الخير سروالو اتشرط"

صديقنا يوسف كان بسألنا عن المباراة كانت بين منو ومنو؟والنتيجة كم؟

اها يا ود البشرى بقدرة قادر أصبح صاحبنا "يوسف" رئيسا لنادي الهلال شخصيا!!!!!!

سلام يا ود البشرى

والله السغالة والمناكفات عندك ليها طعم خاص

عذبتنا ياخي ههههه.

والله يا زنجي لو الدولة اكتفت بدعم الأندية بدون اغراض سياسية و خلت القرارات الفنية و الإدارية للمختصين واهل الدراية كان احسن
لكن تقول شنو بس فهمهم من التدخل و الدعم اغراض اخرى

كلامك سليم يا دكتور عبد الماجد وحتى الهلال لم يسلم من تدخل المؤتمر الوطني ودا بدعم الفكرة, انو السيطرة و التدخل في ادارات اندية القمة دي استراتيجية للمؤتمر الوطني وليست صدفة
بالنسبة لجمال الوالي يا دكتور انت ادرى , يعني عايز تقول لي صرف قرابة المية ست وعشرين مليار - الرقم دا من مجالس السودان ههههههههههه - من جيبه
يادكتور راعي الضان في الخلا يعلم انها اموال المؤتمر الوطني و النكلمك كمان ونزيدك من حكاوي السودان هههههههههههه قالوا حركة الاستقالة دي بعملها كل سنة ضغط على المؤتمر عشان يطلع المصاريف بمعنى عايزني امسكه ليكم بحبحوا المسائل وكدا
اها الدورة دي مع الدولار الطاير السما و العائد الـ nill - Nill دي جمجرة مني ساكت - قالوا نافع قال ليه عايز تستقيل في ستين عايز تقعد اقعد قروش السنة دي مافي فصاحبك ما صدق وقال بركة الجات منك يا بيت الله ههههههههه

كدي خلينا من مناكفة هلال مريخ انت عبد الماجد دا أحد جماهير المريخ هل راضي عن اللافتة البتتحدث بإسمك دي ؟

يا ود الشيخ تولي يوسف لرئاسة مجلس التسيير برضو احد آثار اصابع المؤتمر الوطني

يا ود احمد يا عمدة البوست دا خليط من المناكفة و السخط على المؤتمر الوطني وسيطرته على الاندية, بأمانة كدا اللافتة استفزتني
زيها ولافتات اتحاد عمال الوزارة الفلانية و الهيئة النقابية للمصلحة العلانية تلك اللافتات التي تخرج تحت بند صرف ميزانية مضروب نصها كاداء للواجب و ابراء ذمة
أندية مثل الهلال و المريخ هي كيانات جامعة وطيلة اعمارها لم تعرف السياسة كعامل يجمع أو يفرّق بين اعضائها و جماهيرها
لكنه كأي مجال آخر في البلد إمّا أن يسيطروا عليه أو يدمّروه

ود البشرى

سلامات ياخي

بالله خلينا من الجماعه ديل وشوف لينا الخبر ده صحيح ول لا....انو "صلاح ادريس" جايي مره تانيه رئيس للهلال.

ودي وتقديري.

هلا الشيخ...
وين يرجع صلاح ادريس, البرير دا ماسك فيها اكتر من المؤتمر الوطني ما ماسك الحكومة
الارباب قنع من الهلال وبدا يـ(هلل) في أهلي شندي

المقتبس ادناه ورد في عمود الصحفي المريخي حسن محجوب

Quote: * وهناك أمر في غاية الأهمية لابد من اختيار شخصية من الوزن الثقيل لتحل محل الوالي بعد رحيله على غرار الدكتور مصطفى عثمان إسماعيل أو عبد الباسط سبدرات أو الفريق الهادي بشرى شاخور.

الرابط
تخيّل.. الأسماء التي طرحها كبديل لرجل الأعمال الملياردير لتقوم مقامه لا علاقة لها بالمال و الأعمال و هم رسميا عبارة عن موظفين ولا يجمع بينهم سوى انتماؤهم للمؤتمر الوطني
يعني باختصار كدا الفكرة مطلوب قروش المؤتمر الوطني غض النظر عن (المسنجر)