عاجل جدا بخصوص قوش .. والانقــلاب والمعتقلين

افادني مصدري السري الخاص جدا والمقرب جدا .. من داخل الحدث قبل قليل :

Quote: افادني مصدري السري الخاص جدا والمقرب جدا .. من داخل الحدث قبل قليل :

الزول الظلامى ده زول يصدقوا مافى
( شيشة ) ود الصائم بقت تغلت عليه
امبارح اظنو تقل فيها...
لوووووووووووووول،،،

Quote: امبارح اظنو تقل فيها...

وانت الصادق .. ونسبة لما نعانية هذه الايامات من شح في الموارد (المعسلية) وكل المعسل البنشرب فوقو مضروب .. بالرغم من جو الرياض المستفز جدا هذه الايام خاصة هذا الصباح .. فقد نفحني الصديق ود الصايم بما هو مقدار حجرين او تلاتة حجار بعد التقشف (سفري). فقد قرضته واحد بالليل لحدت الآن راسي تقيل .. وصحيت الصباح لقيت ليك الجو دا فقامت شنـو ..؟ ربطت .. جيت المكتب اول حاجة طلبتها قهوة ..
بعدما ضربته القهوة .. قلت انا بقيت خفيف واللا شنـو ..؟ حجر قاعد من امبارح بالليل .. دا اصلو حجر نار ..؟
المهم من مصلحة الجميع تصديق الرواية لان صديقي ضمن الذين رضعوا العمل الاستخباراتي على اصوله .. فهو جيد التحليل والتوقع .. والرصد والتابعة .

الفين سلام يا تمبس
اوع بس تقول لي تم اطلاق سراح الراجل اياه ؟؟؟
تبقى شينة والله فى حقهم ...

Quote: اوع بس تقول لي تم اطلاق سراح الراجل اياه ؟؟؟

قرشو يا عمدة اخبارك وكيفنك ..
والله الناس ديل متوقعة منهم اي حاجة .. زي الثعلب ممكن يبيض وممكن يلدي ..

إفادة مصدري اثق فيها بشكل قاطع .. فقد كان أن اخبرني قبل ثلاثة ايام من وقوع الحدث بأن هناك صنة تشبة صنة ما قبل الانقلاب ..
وكنت قد اتصلت به ابان ما تم تناقله هنا من أخبار عن انقلاب وشيك .. وذلك من بعض الذين ياتون بالاخبار السريعة جدا وعاجلة واعجل من عاجلة ..
مصدري أو صديق دراستي غير انه يتحلى بقدر كامل من الذكاء .. والمعرفة والحس الاستخباراتي والأمني مجتمعين ..
فإنـه
يمتاز ايضا بإمكانية استدراج اي من كان في سبيل استخراج معلومة ولو صغيرة ..
بقى أن اوضح لكم ان صديقي من ضمن الذين تم تدريبهم على ايدي الخبراء الروس في الاتحاد السوفيتي ابان فترة مايو .. حيث انه كان من ضمن الذين التحقو بجهاز امن الدولة .
اذن
صديقي وإن كان يكبرني سنا فهو في مقام صديقي الذي نتمازح معا ونخرج في رحلات صيد السمك نسبة لما يمتاز به من صبر ومهنة صيد السمك تحتاج للمزيد من الصبر .. والمعرفة ..

خليك من قوش! ايه رايك لو نعمل إنقلابه! :) مش انا برضو صحبك؟، ونجيب معانا داش!

Quote: مش انا برضو صحبك؟، ونجيب معانا داش!

والله يا بوشكاش اصلو ما عندك مشكلة .. انا غايتو جاهز ..
لكن بالنسبة لي داش .. ما مضمون
ياخ داش قاعد يتكلم وهو نائم مرات كتيرة بقوم انا مخلوع بي صوتو اللقاهو ليك بهضرب .. الصباح اقوليهو يازول مالك بتتكلم وانت نايم .. يقولي اصلو ما كنت بتكلم ..
المهم
داش ما بنفع معانا .. خشمو خفيف .. بقوم يفت ليك اي حاجة قبال ساعة الصفر بي اسبوعين
ولا محتاج انو يعصروهو بتاعين الاستخبارات .. براهو بمشي ليهم ..

الطوربيد تمبس

شكراً على فضح النظام

وأخبارك من جوة بيت الكلاوي

رشهم بطيارة الرش

ورش الموج دا أوّل واحد, غواصة معادية عايزة طوربيد نووي

مصدري او صديقي .. بالرغم من فارق السن الكبير بيننا والذي يمكن ان يلاحظه البعض من خلال سردي .. لحقبه ماضية تتعلق بفترة مايو الظافرة .. إلا انه عاد ليزاملني الدراسة .. دراسة الموسيقى وآلة الجيتار على وجه التحديد .. فقد درسنا آلة الجيتار لفترة طويلة وهي اسباب معرفتي له وحكاويه عن ثورة مايو وعن فترة الشيوعيين ابان التفافهم حول الرئيس القائد جعفر محمد نميري عليه رحمة الله ..
وحكى لي بعض ما يتعلق بقصر الضيافة ..
وبعض ما يتعلق بي انقلاب حسن حسين ..
وبعض ما يتعلق بي انقلاب (المرتزقـة) الذي يزعم البعض انه حركة وطنية ..
والكثير المثير عن الساعات الأخيرة التي اعقبت انقلاب .. ثورة الانقاذ الوطني .. حيث انه كان من ضمن فرق الاعتقالات تبع الاستخبارات العسكرية ..

Quote: انقلاب .. ثورة الانقاذ الوطني

ههههه

الحته دي ذكرتني حلاق الجامعة لما يقول لسوء حسن حظي ...

خفف من الهباب ده شوية .

Quote: الحته دي ذكرتني حلاق الجامعة لما يقول لسوء حسن حظي ...

Quote: خفف من الهباب ده شوية .

.. هو نحن كان بنضرب الهباب دا .. نوعيتكم دي بتجي تكتب ليها حرف وتعلق في بوستاتنـا ..؟
لكن التقول شنو؟؟ دا الله ودي حكمتـو ..

Quote: شكراً على فضح النظام وأخبارك من جوة بيت الكلاوي رشهم بطيارة الرش

الطوربيد فرانكلي .. نعم سنقوم بتمليك الحقائق كاملة في سبق صحفي من داخل موضع الحدث ومن جانب شخص متابع

تمبس يا رمادي

Quote: بقى أن اوضح لكم ان صديقي من ضمن الذين تم تدريبهم على ايدي الخبراء الروس في الاتحاد السوفيتي ابان فترة مايو

حرام عليك انا مشيت الاتحاد السوفيتي ابان مايو ؟؟؟؟ مالك داير تكبرنا

Quote: حرام عليك انا مشيت الاتحاد السوفيتي ابان مايو ؟؟؟؟ مالك داير تكبرنا

كان مشيت ابان مايو القاليك منو ما كبير يا جمال ..؟
احتمال تكون مشيت شايلنك شيل .. يا ما ناقش .. لكن واله في واحدين هنا دافنين دقن .. ديل يكونو كانو قاعدين يمشو الاتحاد السوفيتي يجيبو تجارة شنطـة ..

يوم الأربعاء 21 /11 أو لو شئنا الدقة .. الساعات الأولى من صباح الخميس 22/11
وجدت مكالمة مفقودة من صديقي بعد أن فشلت نغمة الهاتف المحمول من ايقاظي من نومـه عميقة .. كانت المكالمة وقتها في وقت معقول يسمح بتجاذب الحديث لكن بعد ان استيقظت كانت الساعات الأولى من الصباح لا تسمح بأن اقوم باتصال ردا على المكالمة المفقودة .
صباح الخميس كالعادة هو وقت الراحة الاسبوعية من دوام عملي الذي يمتد حتى الأربعاء ..
استيقظت مبكرا وقمت بقضاء بعض الامور وعدت البيت وواصلت النومة .. عندما استيقظت بدأت في تحريك مؤشر التلفزيون عن طريق الريموت وعادة يستقر في القنوات الرياضية ، او القنوات الكوميدية بعيدا عن القنوات الاخبارية لكراهيتي المفرطة لها .. وتركيزي ايضا على القنوات الخفيفة ذات الفائدة ..
استقر المؤشر حيث المؤتمر الصحفي لوزير الثقافة .. وعندها رجعت بالذاكرة لاتصال صديقي والذي كنت اعتزم الرد عليه حيث انه لا يستقبل المكالمات الفترة الصباحية من كل خميس وذلك بناء على مزاجيه خاصة يبدأها بالقهوة ينهيها .. بزيارة للصيد على ضفاف النيل بشكل راتب ويومي .. إلا ان يوم الخميس له قدسيته بالنسبة له .. كما للجمعة ايضا طقوس خاصة يمارسهـا من ضمنها انه لا يمنحك (سفــه) من حقته العتيقة مهما بلغ بك الأمر من مبلغ حتى وإن ادى ذلك إلى موتك .. وهي حكمة يعلمها وحده
كسرت وقار التزامي بجدولته الخميسيه .. وذلك طلبا للمعرفة .. وسبر اغوار الانقلاب المزعوم ..
رن الهاتف حتى انقطع نفسه من الرنين ..
ررررن بصورة متواصلة حتى انقطع للمرة الثانية ..

نفهم شنو نحن ....؟؟؟؟

نكبشر و ل نصبر شويه ...؟؟؟؟؟

Quote: كسرت وقار التزامي بجدولته الخميسيه .. وذلك طلبا للمعرفة .. وسبر اغوار الانقلاب المزعوم ..

الواد يعني عازز يعمل فيها ماعندو خبرية،،

ياخ الشيوعين ، ألد أعداء النظام عندهم خبر من أسبوعين !!

ياحليلك ياعمر محمد الطيب !!

نظام فتة ،،
أمنجية فتة ،،
ومعسل مضروب ،،


(عمك كبشور دا أعصابه باظت .... كب البلي في مداخلة واحدة) ههههههههههه

Quote: الواد يعني عازز يعمل فيها ماعندو خبرية،، ياخ الشيوعين ، ألد أعداء النظام عندهم خبر من أسبوعين !!

يا بوخالد .. في اوهام هنا دا لو ختيناها ليهم بالواضح كدا .. بقولو ليك دي حركات منك ساكت انت ما عارف حاجة ..
زي الروسي الاسمو معاوية دا .. جا شايل ليهو كلمة وعايز يعمل فيها حريف .. وحسع دي كان قبلته عليهو بوريهو ليك الحلاقـة البعرفه وما فايته اضانو .. تحلق ليهو وتعمل ليهو قطعية وتشيل ليهو حتة من اضانو ..
يظهر انو الواحد لما يطول من الحتة دي .. الروس ديل بعملو ليك فيها اسياد بلد يقعدو ويقومو على كيفم ..

Quote: نظام فتة ،، أمنجية فتة ،، ومعسل مضروب ،،

والله المعسل المضروب هو سبب البلاوي .. الواحد بقى لو شما ليهو ريحة كوشـة تقوم بيهو العربية
..
والله كبشور من قبيل يكون شغال كلكات .. يكون كبشر البوست دا وكل البوستات الجمبو ..

Quote: نكبشر و ل نصبر شويه ...؟؟؟؟؟

انت يعني كورتك فكت بقيت شغال توصف بس ..؟
يعنمي الحس الامني حقك راح شمار في مرقـه ..؟
كبشر ياخ .. حل شفتني جبت لي خبر ماسورة ..؟ حسع انا من قبيل التلفون دا ما سكت ..
مستعجل واللا عندك اي مشوار امشي بي وشك .. عايز تقعد اقعد عايز تكبشر كبشر .. ما تشغلنا عليك الله ..
البشوف رجفتك دي .. يقول مشارك في الانقلاب

كب الرندوق


كامل


.......ده الخلانا نكره المسلسلات ظاتوووووووو

Quote: كب الرندوق كامل .......ده الخلانا نكره المسلسلات ظاتوووووووو

هههه .. يا ود العطا ياخ ما تشيل الصبر ياخ

ررررررن الهاتف وقبل ان ينقطع للمرة الثالثة على التوالي .. انفتح الخط .. وكان ما جاني من الناحية المقابلة صوت حشرجـة .. تشبه تلك الحشرجات التي تصدر من جوال به خلل ما او عيب ، بعد قليل تم قطع الاتصال لكأنما تم ذلك عمدا ..
كررت المحاولة مرة أخرى رغبة مني فك شفرة الصوت والحشرجات .. كان هناك وضوح اكتر من الجهة المقابلة اتتني مجموعة من الاصوات لكأنما هناك فرندة كبيرة .. او (هنقر) وهناك اصوات تذهب وتأتي بشكل جماعي واحيانا فرادي ..
لا وجود لصوت سيارات بالجوار
لا صوت يوحي بوجود حياة في تلك الجهة المقابلة حوالين مصدر الصوت غير اصوات متقطعة تأتيك من بعيد وتذهب في طلاسم وعبارات متفرقة ..
استمر الصوت والحشرجات مسافة وانقطع من جديد ..
لكن هذه المرة قبل اعادتي للاتصال قدرت ان استنتج ان الطرف الاخر .. ينوي ايصال معلومة ما لي .. انه في منطقة لا يستطيع فيها التعامل مع الهاتف المحمول على الاقل هذه اللحظـة ..
أو انه في منطقة يحظر فيها استخدام المحمول
أو انه يخفي جهازه المحمول داخل اي منطقة ما في جسمه .. لكنه يستطع الضغط على زر الاستقبال ولا يستطع التحدث .. لكأنما ينوي توصيل رسالة ما أو اقوم بتجميع الاصوات التي ربما توحي إلى شئ ما ..
لكن في كل الاحوال .. الاصوات لم تكن إلا عبارة عن طلاسم واصوات كأنه صادرة من داخل بئر عميف أو جب أو غرفة محكمة الاقفال

Quote: لا صوت يوحي بوجود حياة في تلك الجهة المقابلة حوالين مصدر الصوت غير اصوات متقطعة تأتيك من بعيد وتذهب في طلاسم وعبارات متفرقة .. استمر الصوت والحشرجات مسافة وانقطع من جديد ..

خلاااااص يا تاج السر الملك ..

Quote: خلاااااص يا تاج السر الملك ..

هذا شرف لا يدانيه شرف إلا شرف والاسد

المتابع لحالة الانقلابات العسكرية في السودان ..
أو في حقبة الانقاذ .. يجد ان معظم التحركات كان تتم ليلا ، وفي ليلة الخميس .. حتى يساعد ذلك على خلو الطرقات من المارة تحسبا لقيام ارتداد على الانقلاب او التعامل معه بعنف كما حدث في معظم الانقلابات المعلنة ... تصحيحيه كانت ام غير ذلك .
الكثير من الانقلابات المعلنة او غيرها .. تم احباطها قبل ساعة الصفر بسويعات قليلة .. نتاج انشقاقات من الداخل او سوء تنظيم او (جبـن) أحدهم ..
ترجع بي الذاكرة هنا إلى محاولة العميد عوض الكريم النقر وهو احد ابناء الموردة الشهامة .. وهو ابن الراحل عمر النقـر والذي كان يمتهن مهنة صيد السمك عليه رحمة الله والمغفرة ..
تم احباط المحاولة قبل ساعات قليلة وذلك بعد بلاغ من أحد الذين اوكلت لهم تنفيذ مهمة محددة ..
هناك ايضا المظلي ياسر أحد ابناء الموردة وقد تمت الوشاية بهم قبل ساعة الصفر وتم اعتقالهم ..
العقيد سعد بحــر .. وانقلابه وهو احد ابناء حي الموردة او بانت ..
الشاهد في الأمر ان معظم هذه الانقلابات العسكرية او المحاولات .. اشترك بها من ابناء حي الموردة العريق .. فحي الموردة من الاحياء العريقة بضباطها العظام ..
معظم من جلست معهم من الذين قاموا بالمحاولات .. وتم الافراج عنهم مدنيين كانوا ام عسكريين أو من حكى لي عنهم صديقي موضوع البوست .. كانوا جميعهم يأكدون لي حقيقة واحدة او كانوا جميعهم قد اجمعوا على ان كل المحاولات التي شاركوا فيها كانت سلمية إلى حد بيعد لا تركن إلى استخدام القوة .. ولا العنف .

احكي تفاصيل التفاصيل ظاتو ...الماعندو صبر يمشي يجيب تلج ويجي..!!

قاعد راجيك... أخدت ليك إجازه عدييييييييييييييل..!!

الشي شنو اولاد الموردة ديل ما شاركوا ليهم في انقلاب ناجح هههههه

النجيضة
العندو انقلاب عايزو ينجح يبعد عن اولاد الموردة

Quote: الشي شنو اولاد الموردة ديل ما شاركوا ليهم في انقلاب ناجح هههههه النجيضة العندو انقلاب عايزو ينجح يبعد عن اولاد الموردة

ههههههه
ابدا والله يا باش ..
اديك ميزة ..
اولاد الموردة قلبم حار .. وشفوت جدا .. وبالمناسبة امورهم كلها في المحاولات الفشلت دي كلها كانت ظابطـة ..
بس مشكلتم بكون في واحد ( كاويك ) مقشوط في النص كدا زي ناس الروسي معاوية الارباب دا .. يقولو ماشين يعملو انقلاب يقوليهم انا ماشي معاكم .. قايلم ماشين يجيبو هدوم العيد ..
بعدما الشغلانة تسخن ، يقعد يتراقص ليك ويبيع القصة .. ويجو يرهبوهو ليك الشفوت بتاعين الاستخبارات العسكرية والشرطة العسكرية في السجن الحربي .. والله يكب العندو ومرات يحير ليك اسامة انور عكاشة زاتو .. في السيناريو والاخراج ..

Quote: احكي تفاصيل التفاصيل ظاتو ...الماعندو صبر يمشي يجيب تلج ويجي..!! قاعد راجيك... أخدت ليك إجازه عدييييييييييييييل..!!

مش عليك الله يا عمي الشيخ ؟؟
ذكرتني النكته بتاعت المساجين .. اللاعبين حريق ..
قاليهو الفورة كم ..؟
قاليهو قوول الفورة الف إنت لاحق شنـو ..؟

تحدثني الوالدة بأنه ابان انقلاب هاشم العطا كنت جنين بداخلها ..
وعندها كان الوالد عليه رحمة الله والمغفرة من ضمن المفقودين او طالة فترة غيابه عن المنزل فقد كانوا وقتها في فرق التفتيش ضمن القوات المسلحة .. اخبرتني انني كنت احدث ربكـة شديدة في محاولات للخروج السريع . ولما كانت والدتي من ضمن الذين رافقوا الراحل والدي في كل مشاوير حياته العسكرية والتي قضى معظمها بالجنوب .. كانت تخاف عليه بالقريظة الزوجية كأب لابنائها وزوج لها ، ورفيق حياتها .. فاخبرتني انها لا قت ما لاقت من تعب ومن رهق .. وهي في اللايامات الاخيرة من الحمل وذلك ما ادى إلى ان تكون ولادتي بصورة متعثرة فقدت على اثرها .. التؤام المرافق لي وهي انثى .. (تمبسه) فكم كنت اتمنى ان تكون موجودة .. حتى تتفرق للجانب الآخـر وتخلي لي بقيت الفارات ناس معاوية وإلخ ..
..
كانت حركتي وانا جنين عبارة عن تفاعلي مع دوي الرصاص ، حيث كنا بحكم وجودنا بالموردة والقرب من الاذاعـة كان هناك الدوي العالي للرصاص ..
وعن دوي الرصاص ما ذالت عالقة بذاكرتي ذكرى دوي أول طلقـة لمحاولة فاشلة قبل انقلاب الانقاذ بي ايام ..
وما ذلت ايضا اذكر أول طلقـة صحيت على اثرها من النوم في الساعات الأولى من انقلاب الانقاذ تلك الطلقة التي ابتدرت بها الجبهة الاسلامية نظامها والذي اعقبته بالمزيد من الدموم .. والتصفيات والتي كانت تتم بشكل مرتب إلا أن صوت الطلقة كأنما يخترقني الان .. وكانت المسافة قريبة حيث انها من السلاح الطبي .. ويقال انها اطلقت عن طريق الخطأ ويقال انها اطلقت في أحد الضباط بعد أن رفض التسليم ..
بعد هذه الطلقة والصباح في ساعاته الأولى بعد صلاة الفجر .. امتلى خور ابوعنجة بالبشر وكانت ترى الدبابات على كبري ابريش الفاصل بين مدرسة المؤتمر الثانوية وبين عوضية سمك عشان ما تقولو حرمتكم من ايتها حاجة ..
الشاهد في الأمر .. أو ما حببت ان اوصله من معلومة أن معظم المحاولات الانقلابية كانت تتم بشكل سلمي .. من داخل النظام غير ان معظمها يتم التعامل معه بشكل دموي في المعتقلات .. او قبل الوصول إلى المعتقلات ..
...
الطريف في الأمر .. انه في نفس يوم انقلاب الانقاذ وبعد ان بدأت الحقائق تتكشف كل دقيقة بعد الأخرى .. كان الموردة شبه مطوقـة من كل الجهات .. وكانت كالعادة هناك لازمة ثابتة وهي أن تأتي كمية من الجنود بكامل عتادها العسكري مدججة بالسلاح واللبس الحربي كانت تأتي في اي محاولة انقلابية لتسيطر على (الرشيد أب أحمد ) وهو من ابناء الموردة ومن امهر فنئي الصوت في الاذاعـة السودانية .. فكان في المقام الأول يضمنون (الرشيد اب احمد) قبل ان يضمنو الرئيس المفترض يقوم بإذاعة البيان الافتتاحي
أقول ان الطريف في الأمـر أن الفرقة التي كلفت بمداهلمة الرشيد اب أحمد بمنزله حتى تضمن جانب الاذاعـة .. كان من ضمن افرادهـا القلع عبد الحفيظ .. مدججا بكامل سلاحـه .. وزيه الحربي الكامل .. مما حدى ببعض الاخوان ان صاح .. دا انقلاب واللا كتمــــة ..؟

Quote: الشاهد في الأمر ان معظم هذه الانقلابات العسكرية او المحاولات .. اشترك بها من ابناء حي الموردة العريق ..

غايتو على قول الأرموطي الرسالة وصلت
وياموردة الشاف إزالة بيوتك ماكضب ...!!!
او بالميّت كدة هبوط فريقك للدرجة الثالثة بقرار جمهوري
أو ترحيل السمكـ قسرياً لجبل أولياء او بيتش بري
أو ربما توزيع خور أبوعنجة كقطع سكنية ...
غايتو أدعو ربنا ما يلم فيكم مستشار رئيس متهور ...:)

Quote: غايتو أدعو ربنا ما يلم فيكم مستشار رئيس متهور ...:)

وووين الكلام دا يا مولانــا ..؟
والله حسع دي في تلاتة من الشفوت ديل كانو عاملين جلا عديل لي ناس الاستخبارات بعدما رجعوهم بالقوة من الجنوب .. اتنين في القوات الخاصة وواحد في سلاح المدفعية .. شباب زي الورد كانو .. كان كل واحد فيهم طابي سلاحو في جيبو البقرب ليهو بفتح فيهو نار طوالي ... يا زول عز النهار نسمع الجبخانة مدورة والجماعة جاريين ، بالليل شديد الجبخانة مدورة .. وناس ابراهيم شمس الدين الله يرحمو كل دقيقة والتانية عاملين مشاريع تحنيس وزيارات تطييب خواطر .. معظم الشباب النضر دا للاسف هاجروا خارج السودان من تلقاء نفسهم وتركوا حسرة كبيرة جدا لاهاليهم ومعارفم ..
..
مجلس قيادة ثورة مايو معظمم كانو الموردة دي بالنسبة ليهم منطقة مقفولة حتى من بقى منهم على قيد الحياة كانو ما بفارقو الموردة ومطاعم (السمك) بالموردة .. ماف واحد كان بتعرض ليهم ..

Quote: لكن في كل الاحوال .. الاصوات لم تكن إلا عبارة عن طلاسم واصوات كأنه صادرة من داخل بئر عميف أو جب أو غرفة محكمة الاقفال

انتظرت مسافة كفيلة بأن تعيد لي الكم الهائل من التوتر خاصة وان الطرف الآخر لم يقم بالاتصال وهذا رجع بي للذاكرة انه كيف حكى لي عن تجريد المعتقلين في لحظاتهم الاولى حتى من كل ما هو ملتصق بالجسم يحسون فيه خطر على حياتهم .. إذن فإن التفتيش عالي الدقة بمكان ، يمكن ان ينفذ إلى داخل الجلد .. وركنت لهذا بعد ان تنامت في خاطرى فكرة ان صديقي ولطلالما انه من الكوادر المدربة جدا ربما قادته قريحته الامنية إلى المشاركة في المحاولة .. خاصة وانه بعيد كل البعد عن مسرح الاحداث منذ فترة طويلة .. ونسبة لما يمتا به من خبرة ومن تجارب ومن حس عسكري وامني .. زاد شكوكي انه تم اعتقال بعض المدنيين ... وبعض المعاشيين .. وقطع لي الشك باليقين انه ناغم عن الوضع بكل ما فيه .. وانه لا يتحدث كثيرا عن الأمور العسكرية حتى وان اجبرته .. لكن يمكن ان يثرثر في الاوضاع العامة بشكل عام .. وزاد ذلك انه من ضمن الكوادر التي خدمت ضمن الاجهزة الامنية لفترة طويلة .. ابان فترة صلاح قوش .. وتوليه للمنصب الأمني ..

حاولت محاولة اخيرة بان قمت بالاتصال بعد ان ارسلت رسالة انتظرت مسافة حتى يتم الرد .. الذي لم يأتيني وقتها
اتصلت هذه المرة .. وكانت دهشتي الكبيرة بان الهاتف مغلق ولا يمكن الوصول إليه حاليا تلك الرسالة المزعجة التي ترفع من حدة التوتر في مثل هذه الحالات التي لا تحمل اي احتمالات للتفكير غير التفكير الذي ينتابك الان .. الآن
تحولت من هاتف صديقي إلى هاتف صديقنا المشترك والذي يلم بكل التفاصيل الخاصة بصديقي واين اماكن تواجده بصفة مستمرة بالثانية والدقيقة .. لدهشتي الكبيرة وجدت أن هاتفه ايضا خارج الخدمة ..
اتصل أحد اصدقائي من داخل السعودية وتجاذبنا اطراف الحديث عن المحاولة وجدت ان معلوماته فقيرة جدا ..
اخبرني صديقي انه لديه اقاربه المقربين من صلاح قوووش وفي اشد حالات القلق عليهم إلا انه استبعد فكرة ان يقوم بالاتصال بهم حيث اخبره احدهم ربما تكون المكالمات الداخليه والخارجية مراغبة ـ وهذا ما جعلني اعدل عن فكرة البحث عن اي رقم آخر حتى ولو كان من الاصحاب ليدلوني عن مكان صديقي وشدة ما جعلني في حالة من التفكير السريعة انه قمت بعدة اتصالات وظهر رقمي على الهاتف الخاص بصديقي ..
وهذا من ناحية امنية ربما يضر بي إذا كان صديقي من ضمن الذين تم اعتقالهم ضمن الجهات التي قامت بالمحاولة ..
وزاد من توتري ان صديقي من ضمن المتمابعين للبورد وكثيرا ما يضحك على الكثير من البوستات التي يصفها بأنها فارغة ومقدودة تلك الجملة الظريفة التي لا تفارقه عندما يحس بجدوى اللا شئ ..
وللمعلومية فإن الكثير من الاخبار التي تكتب هنا على شكل عاجل .. وسبق صحفي اجد نجيضتها عند صديقي بكامل تفاصيلها والتي اغلبها يكون مضروبا ـ أو انه في طور التكوين .. إلى حين أن يصل من مصدر صاحب الخبر يكون قد تم التأليف له وتم سكب كمية كبيرة من المياه الغازية على الخبر وتمت بربحته من كل الجهات ليتماشى مع فقه سودانيزاونلاين .. التي يمكن ان تشتل فيها ما راق لك ان تشتل ..
دون ان يرمش لك جفن ولا طرف ..
فالطالما انت فلان الفرتكاني .. إذن انت مصدقا وصدوقا وطوربيدا .. .. تأتي بالحدث من جووووه ..

كويس

ياخ قوم لف
غلطانين نحن الادينا بتنا لي فارة زيك

Quote: ويقال انها اطلقت عن طريق الخطأ ويقال انها اطلقت في أحد الضباط بعد أن رفض التسليم .

إختلاف العلمـاء رحمــة!



بالمناسبـة سـرد موردى جميل ( بخصوص قوش والإنقلاب والمعتقلين.. ) واتمنى ان تكون كتاباتك مستقبلا غير مقيـدة بالأحداث..

عارف الفرق بين الشقى والسعيـد هو ان الشقى دائما ينتظر شئ... والسعيـد يعيش اللحظـة الحاضـرة.. اللهم اجعلنا من السعـداء.

Quote: عارف الفرق بين الشقى والسعيـد هو ان الشقى دائما ينتظر شئ... والسعيـد يعيش اللحظـة الحاضـرة.. اللهم اجعلنا من السعـداء.

شكرا يا ابو الريش على الاطراء الموردابي ..
اللهم اجعلنا من السعداء في الدارين ..
بالنسبة للكتابات .. اهو الواحد بيحتكم لي المزاج في لحظات محددة .. لما يكون في مزاجية كتابة ..
ربنا يعدل المزاج

Quote: بس مشكلتم بكون في واحد ( كاويك ) مقشوط في النص كدا زي ناس الروسي معاوية الارباب دا

ههههههه

كاويك دي جبتها من وين يا شقي ؟.

أراك لم تأت على ذكر ولدنا عادل بانقا في معرض حديثك عن المحاولات الإنقلابية الفاشلة .

Quote: بالقريظة الزوجية

يا ناس علم النفس والإجتماع هاكم مبحث جديد تسلل إليكم من بين دخان المعسل بنكهة القراقير .

Quote: تحدثني الوالدة بأنه ابان انقلاب هاشم العطا كنت جنين بداخلها

يا زول إنت متأكد إنك كنت بالداخل ؟

غايتو من شلاقتك دي واضح إنك كنت حمل خارج القريظة .

Quote: يا زول إنت متأكد إنك كنت بالداخل ؟ غايتو من شلاقتك دي واضح إنك كنت حمل خارج القريظة .

في مساحة محددة اتحرك فيها .. عشان ما تسمع ما لايرضيك .. ليك فترة كايسو معاي والكايسو بتلقاهـو ..
اكان قعدته ليك بجرك من اضانك .. وبجيك البورد دا .. هنا دا بي اشكال مختلفـة جدا لمن تستغرب ليها ..

Quote: كويس

انا برضو قلته كدا زمان يا ابو الزفت
..

Quote: غلطانين نحن الادينا بتنا لي فارة زيك

..
حسن اخلاقك عشان ارسل ليك الزيـت ..
لقيت ليك زيت كويس .. لي راسي الحفيان دا .. لكن والله بي الفاظك دي يسمك
خلي عندك اخلاق ياخ ..

انت يا تمبا عملت نايم
ولا غطست حجر مصدرك؟؟!!

Quote: اكان قعدته ليك بجرك من اضانك

هههههه

بالله جر ليك نفس عميق كده من الشيشة وفكر في خاتمة لهذه القصة المهلهلة , أنا وغيري من قراءك - تعيسي الحظ - في الإنتظار.

تمببببس

سلام وكلام

ياحبيب عليك الله ركز لينا في التمانيات
واحذر تشتيت الكورة وسيبك من المتردية والنطيحة وما أكل السبع
ولا ضقل بيهن في النهاية زي ما عايز
الموضوع دا المعلومات فيهو شحيحة ومطباتو بتعوق المساعدات
أها قووووول

تحياتي

Quote: بالقريظة

يا النبي نوح

الغريزة يا معلم
الغرائز يا مغرزة

Quote: صديقي وإن كان يكبرني سنا فهو في مقام صديقي الذي نتمازح معا ونخرج في رحلات صيد السمك نسبة لما يمتاز به من صبر ومهنة صيد السمك تحتاج للمزيد من الصبر .. والمعرفة ..

بتحاحي ليك في شي بس هو شنو ما عارف

زمن طويل والله