هام جدا : للمقيمين بالسعودية ولديهم النية لزيارة الامارات العربية

وخاصة لمن يريد الدخول عن طريق إمارة ابوظبي

سلام


أولاً الإقامة دي مثبتة على الجواز

ثانياً إنت بتسلم إقامتك للشركة أو المؤسسة البتعمل فيها قبل المغادرة

وإذا بقت بالإقامة طيب ما ينسقوا مع السعودية ويكون الدخول بدون تأشيرة خروج من السعودية (تأشيرة الخروج والعودة من الجوازات السعودية)


حاجات تدعو للتساؤل

؟؟

تحياتى ياباشمهندس

الموضوع بالصورة دى بتناقض مع قرار تسليم الاقامة الاصل للكفيل عند السفر خارج المملكة وتقريبا غير متاكد اذا ثبت انك ماخد اصل الاقامة معك اثناء السفر خارج المملكة عندها تخضع لعقوبة واللة اعلم.

بالعربي
اذا كانت لديك النية لزيارة الامارت العربية المتحدة فتأكد من حمل اقامتك الاصلية حيث انه ابتداءا من اول نوفمبر 2012 اصبحت السلطات لا تقبل صور الاقامات علما بان عدم حملك للاقامة الاصلية سيتسبب بمنعك من الدخول وترحيلك على اول رحلة ذاهبة الى السعودية
وان تكون الاقامة سارية لمدة لا تقل عن 3 شهور (دي عن تجربة شخصية )
كما ان الفيزا تعطى بناء على المهنة المذكورة في الاقامة وليس الجواز
اعتقد ان هذا القرار سيكون ساريا ايضا للذاهبين عن طريق البر حيث ان منفذ الغويفات يقع في نطاق إمارة ابوظبي
النجيضة : دبي اسهل واقل تعقيدا وموظفين اكثر كفاءة وواسرع انجازا

تحياتي عاصم و ومحمد
طبعا هناك بعض الشركات لا تسلم مكفوليها الوثيقتين معا (يعني يا اما الجواز او الاقامة)
ودي عقدة منشار ما ليها حل يعني مجهود فردي
عن نفسي شركتنا لا تتمسك بهذه الامور فجوازي لدي واقامتي لدي ولم يحصل ان سلمتهم اقامتي الا لتجديدها او الجواز الا لتأشيرة او تحديث بيانات

Quote: Must carry their original Igama (No Igama photo copies accepted)

م. محمد السألة دي ذكرتني ليك أستاذ عكود بتاع اللغة العربية لما نقوله من حنتوب لطيبة الذكر مدرسة .......................
قال أول ما نزل في الموقف خشى يفطر في مطعم حوالي الساعة 11
سأل الجرسون عندكم شنو ؟
قال ليه ـ عندنا فول كمونية ـ والكمونية أنتهت ـ نديك شنو ؟

طبعا هناك بعض الشركات لا تسلم مكفوليها الوثيقتين معا (يعني يا اما الجواز او الاقامة)
الأخ محمد ابراهيم
رغم أن بعض الشركات تتساهل في استلام الاقامة من مكفوليها الا ان ذلك يتعارض مع النظام ، فاذا وجدت الاقامة معك عند الخروج يعتبر ذلك مخالفة ، بالتالي فان شرط حمل الاقامة الاصلية يؤكد عدم معرفة مصدر القرار لذلك.

Quote: حنتوب لطيبة الذكر مدرسة .......................

يا اخ البصير عليك الله تم لينا إسم المدرسة دي لأنها إحتمال كبير تكون مدرستنا ......

سلامات يا محمد إبراهيم
ما هي المهن التي تخول لأصحابها الحصول علي تأشيرة دخول عند الوصول

تحياتي يا فيصل
المهن التي يسمح لها بالدخول بدون تاشيرة مسبقة تشمل كل المهن التي يعتقد ان صاحبها يحمل مؤهلا جامعيا مثل المهندسين والاطباء والمحاسبين والمحامين والمترجمين الصحفيين والاعلاميين* ومناديب المبيعات الخ الخ
كل المهن اعلاه تمنح التأشيرة في المطار (لك ولعائلتك لو كانت مقيمة معك في السعودية او احدى دول الخليج)
المهن الممنوعة من الدخول او التي تتطلب تأشيرة دخول مسبقة من السفارة او دعوة للزيارة
هي كل المهن التي تشير الى ان صاحبها قد يكون من اصحاب الدخول الدنيا (بصراحة ناسكم ديل يا فيصل ما عايزين زول مفلس هههه عاملين بدلكم الغالية دي )
مثلا عامل , سائق , كهربائي الخ الخ من الحرف

يا فيصل حسب قانونهم فإن المهن المسموحة فقط ثلاثة وهى دكتور مهندس محاسب ،، مطار أبوظبى
لا يتشددون على الأطلاق فى هذه المسالة ألا إذا كانت أقامتك عامل ،، لكن ناس أبوظبى ديل زى
بقية العرب أتجاه واحد ويقررون زى ناس السودان ساكت بدون اى دراسة على ما يبدو

ولكن يا جماعة الرك فى شركات الطيران عند اجراءات استخراج بطاقة الصعود للطائرة ،، فأنهم
يسألون عن المهنة وعندما تتعارض مع القانون طوالى يقولوا ليك سوووووووووورى .

فقط كنت أريد أن أسال ،، ماهو الفرق بين المهن الثلاثة والآتى:
محامى ،، مندوب مبيعات ،، مدير أى مدير ،، مراجع قانونى ،، قاضى ،، مدرس
صيدلى ،، مأمور مستودع ،، أمين صندوق ،، بإختصار أى مهنة غير عمالية ،، يا اخى
حتى مهنة عمالية فيها شنو يعنى لو منح تأشيرة دخول طالما لديه خروج وعودة وتزكرة
ذهاب وأياب ،، يعنى لو عامل ما أتفسح يعنى والله شنو يعنى ،، غايتو نحيى دولة سوريا
من دون الدول العربية كلها حيث يمكن الدخول فيها مهما كانت مهنتك وهذا هو المفروض
أن يسود لدى جميع الدول العربية إن كانوا حقا أمة واحدة .

مع التحية ،،

ماهر

باشمهندس سلام عليكم
الإشعار المرفق توقعته من سلطات إمارة أبو ظبي ، لكن - وبهذه الصيغة الرسمية - غريب أن يكون مصدره طيران الإتحاد !

الاخ محمد
النظام في السعوديه لا يسمح بحمل الاقامه و الجواز في وقت واحد ، عند حدوث ذلك داخل البلد فتلك مخالفه بسيطه بتتعالج اما في حاله وجود اقامه معك و انت خارج من البلد فتلك مصيبه لان الاحتمال الاقوي انك سوف تعطيها لمعتمر او زائر عشان اجي ابرطع في البلد و ده فيها مسائله قانونيه لانو المبرطع ده احتمال اعمل بيها عمله و ادخل صاحبها و كفيله في حيص بيص ، علي كل حال و تفاديا للمشاكل حسب القانون يتم سحب الاقامه عند استلام الجوار حتي لو للتجديد ناهيك عن السفر .


هذه المعلومات من واقع المهنه و العمل


الزبير

اقعوا الشارقة متساهلين وحنينين،
ناس أبوظبي ديل ياخ إلا تكون عندك ايفون حتى يقتنعوا بيك ويدخلوك.
انتو ما سمعتوا "أبوظبي دولة عربية "
سلامات يا هندسة

شكرا على المعلومة

دي على ما اعتقد خاصة بابوظبي بس، انا ماشي دبي بعد عشرة يوم، للضمان كده حقو الزول يشيل معاه اي حاجة

على العموم حمل الاقامة والجواز معا لا اعتقد بانها مشكلة كبيرة جدا في السعودية
المحك الحقيقي لو الاجنبي قرر مثلا لا يعود الى السعودية، الكفيل ما بقدر يشطبه من سجلات الدولة
لو اذن زاتو من غير اصل الاقامة، عشان كده اي كفيل بكون حريص وحريص جدا على الحصول عليها عند تسليم
الجواز للاجنبي، لكن لا فيها مخالفة ولا القانون بعاقب عليها

والآن منظمة التجارة الدولية ضاغطة السعودية وفي كلام بتكتب في الجرايد عديل كده على ان احتفاظ الكفيل
بجواز الاجنبي فيهو مخالفة لانظمة الدنيا وقريبا اي اجنبي ح يدوهو جوازه في ايده

تحياتي

سلام

Quote: دي على ما اعتقد خاصة بابوظبي بس، انا ماشي دبي بعد عشرة يوم، للضمان كده حقو الزول يشيل معاه اي حاجة

شيل معاك كرت الاقامة حتى ناس دبى بطلبوه

تحياتى

شكرا مهيرتنا

Quote: شيل معاك كرت الاقامة حتى ناس دبى بطلبوه تحياتى

بتأكد من ناس الاماراتية بكره

تحياتي

شكراً يا هندسة

لكت دوماً عند حضوري ترانزيت من الصين أو كوريا أو تايلاند يعطوني دخول برسم محدد لمدة 72 ساعة ولم يسالني يومأً مسئول الجوازات عن مهنتي أو إقامتي .

بحيراوي

Quote: الاخ محمد النظام في السعوديه لا يسمح بحمل الاقامه و الجواز في وقت واحد ، عند حدوث ذلك داخل البلد فتلك مخالفه بسيطه بتتعالج اما في حاله وجود اقامه معك و انت خارج من البلد فتلك مصيبه لان الاحتمال الاقوي انك سوف تعطيها لمعتمر او زائر عشان اجي ابرطع في البلد و ده فيها مسائله قانونيه لانو المبرطع ده احتمال اعمل بيها عمله و ادخل صاحبها و كفيله في حيص بيص ، علي كل حال و تفاديا للمشاكل حسب القانون يتم سحب الاقامه عند استلام الجوار حتي لو للتجديد ناهيك عن السفر . هذه المعلومات من واقع المهنه و العمل الزبير

تاني وين مع البصمة !!!!

يا هندسة لما كنا بنجى بالاماراتية وبنعمل كنيكشن فى دبى ويكون عندك حجز فى فندق حتى لو مهنتك عامل بدخلوك لكن هسع عملت لينا ملاوزة بيموضوع الاقامة دا لانى يوم الثلاثاء القادم خاتف رجلى لحدى دبى وجاى راجع باذن الله

اها هسع لازم نعتل الاقامة معانا يعنى ولا كيف؟؟؟