Post: #1
Title: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 12:43 PM
Parent: #0
الجهل مصيبة لكن الزول كان سعل بتعلم قبل يومين تلاتة فتحت المنبر العام كف جاتني رسالة قريتا كويس وفي اللنقليزي يعني ما بطال بمشي حالي لمن شفت الرسالة اتعولقت معاي وما فهمت حاجة وهنالك خيارين كانسل و اوكي فجخت كاسل اكسلا البلا اللخمها تقولي كدي يا صفحة المنبر تدور تدور وما تفتح الا بعد آخد لي حومة واجي راجع في اللول قلت كدا ذاتو كويس المنبر الليام دي عوك عوك وعجاجتو واقفة تكل الحاجة الكويسة أئ موقع تاني شغال كويس علا المنبر العام أها قمت طلعت رقم اللمين البشاري من الايفون حقي هههههههه الكضب حرام التربة لقدام ..... هو الفرق بين الايفون والنوكياب شنو ؟ المهم باختصار اللمين دا لو ما روحو طويلة ما قايل روحي بلاقيكن وبكتب النضمي دا حمالتك علي مسكتو ليك لحدي آذان الضهر اذن وقال ماش الصلاة باقي ناس الجنوب بصلو متأخرين كتر خيرو امسكك جيب كدايا من كدايا وكدايا من كدايا لحدي ما كف المنبر العام بقى اقلب زي اللبقة الكانت مقفولة وفتحت شكرا اللمين ان جعلت ذلك ممكنا ودا صوت شكر اولا ثم انه أئ واحد عندو مشكلة إقع اللمين البشاري زول هدي ورضي وروحو طويلة
|
Post: #2
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 12:45 PM
Parent: #1
بعد اذنك يا اللمين اكتب رقمك للحجاج ديل ؟
|
Post: #3
Title: Re: العندو مشكلة فنية تكنولوجية إقع اللمين البشاري
Author: الامين موسى البشاري
Date: 11-13-2012, 12:50 PM
Parent: #2
Quote: بعد اذنك يا اللمين اكتب رقمك للحجاج ديل ؟ |
مبرووووووووك يا زول خشيت الشبكة تاني منتظرين بوست حمارة منو كدا ما عارف هههههههههههههههه .. ..
__ التلفون في البروفايل ... والله صحي
|
Post: #4
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 12:54 PM
Parent: #3
Quote: مبرووووووووك يا زول خشيت الشبكة تاني منتظرين بوست حمارة منو كدا ما عارف هههههههههههههههه |
علي الليمان والرحمن شكرتك شكر اصلك ما تتخيلو ياخي انا من امس ادور زي الكنكيج في الضوران المويتو عكرانة ههههههههه
حمارة ابو حميرة انتظرا اسع بجيك بي دحيشتا الزرقا
|
Post: #5
Title: Re: العندو مشكلة فنية تكنولوجية إقع اللمين البشاري
Author: saif massad ali
Date: 11-13-2012, 12:58 PM
Parent: #1
عبدالله ود البوش
اللمين ده مو عميكة ساكت الزول مريخابي الله مرق لاب توبك منو كان غطس حجرك
تاني ماتقبل عليهو
انا قبضت يدي في قلبي قلت الليلة الزول ده عملها في ود اهلي
|
Post: #6
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 01:09 PM
Parent: #5
Quote: اللمين ده مو عميكة ساكت الزول مريخابي الله مرق لاب توبك منو كان غطس حجرك
|
ود عمي عوج الدرب عوافي يا زول وعلك طيب يا زول اللمين دا زول كلس خلاس لكن كان يكون اكلس لو بقى هلالابي وانصاري لابتوب شنو يا سيف اخوي .... انا لسع في حاو وهش وديسك توب ..... لكن قريب دا بطلق لي لابتوب من عبدالمطلب زول الدوحة جرورة ساهي كان الله هون .... لكن النصيحة التبعبص باللصبع دا في الابتوب احرق الروح والله كان ما غمت الماوس دا ولكزت الشاشة لكز اصلي ما بتكيف لكن لابد من التلكنج ومسيارة العصر الحديث قال لابتوب قال .... اصلو انا ود الهد ات يا سيف ماك جاي عمرة ؟ ضروري نشوفك ياخي
|
Post: #8
Title: Re: العندو مشكلة فنية تكنولوجية إقع اللمين البشاري
Author: saif massad ali
Date: 11-13-2012, 01:12 PM
Parent: #6
ود البوش
ابشر بالخير عندي عقد مع شركة جديدة لو تم ان شاء الله شهر 12 معاكم تب
وشغلي يبقي الخليج المانيا باذن الله
|
Post: #10
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 01:24 PM
Parent: #8
Quote: ابشر بالخير عندي عقد مع شركة جديدة لو تم ان شاء الله شهر 12 معاكم تب |
فعلا دي بشارة ممتازة ولو احتجت أئ مساعدة الايميل علي البروفايل ولبعدين انا من اسع القائم باعمالكم في منطقة الخليج والله كان كدي غنية وقابلتك يا ود البوش تجارة الخليج المانيا زي باص سرحان العتامنة معيجنة الحصاحيصا مدني وبالعكس
|
Post: #7
Title: Re: العندو مشكلة فنية تكنولوجية إقع اللمين البشاري
Author: Abureesh
Date: 11-13-2012, 01:11 PM
Parent: #5
عبدالله ود البوش سلام
مشكلة فنيـة.. خلى البشارى يشرح لينا الكلام الكتبته فوق دا بالعربى..
وشكرا
|
Post: #9
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 01:19 PM
Parent: #7
Quote: مشكلة فنيـة.. خلى البشارى يشرح لينا الكلام الكتبته فوق دا بالعربى..
|
اووووووو اخونا محمد عثمان أبوريش ياخي مشتاقين الشئ مرقتني عجمي كلو كلو .... ولبعدين دي ما مشكلة فنية دي مشكلة الناطقين بغير لغة ناس وحاتي شمها ههههههههه
|
Post: #11
Title: Re: العندو مشكلة فنية تكنولوجية إقع اللمين البشاري
Author: aydaroos
Date: 11-13-2012, 01:36 PM
Parent: #9
Quote: كتر خيرو امسكك جيب كدايا من كدايا وكدايا من كدايا لحدي ما كف المنبر العام بقى اقلب زي اللبقة الكانت مقفولة وفتحت
|
مزاوجة الطين،الجروف،البلد مع التكنلوجيا والإنترنت .. ما بقدر عليها إلا ودالبوش مشتاقين آزول .. كل سنواتك خير ومحبة .. توصل لي الاهل والحبان
__________________________ أشرح ماتحته خط :) الناس مي كلها من الريف
|
Post: #12
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 02:23 PM
Parent: #11
عيدروس سلاااااام يا زول وعوافي علكم طيبين وجركم ملان عجين دي طوالي بذكرني الدقاقين ازيكم نعلكم طيبين في حيكم والدَرَبُكَة تسوي حكاً بَو
Quote: أشرح ماتحته خط :) الناس مي كلها من الريف |
يكون في علمك بوستاتي ما بخشا الا الريفيون ريافة جد عشان كدي ما تشيل هم للشرح والشرح ذاتو بخسي الحديس . . شكرا عيدروس مع تحياتي واحترامي وتقديري ومرورك دائما يسعدني
|
Post: #13
Title: Re: العندو مشكلة فنية تكنولوجية إقع اللمين البشاري
Author: aydaroos
Date: 11-13-2012, 02:49 PM
Quote: علكم طيبين وجركم ملان عجين |
حليلو الجَر وحليلو العجين :)
|
Post: #14
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 03:02 PM
Parent: #13
Quote: حليلو الجَر وحليلو العجين :) |
تعرف يا عيدروس في الحر الصناية البتدخل القمرية في الراكوبة كنا شغالين مونة في ايام الاجازة عشان نطلع حق الردة والقميص والنعلات تموت تخلي ديك البعملوها بالبلاستيق ياخي اها وعالم الرياضة شغال يعني اليومية قربت تكمل لانو بعد عالم الرياضة مع دقة الساعة تلاتة بنجدع قدح المونة فنننننننن في الوكت دا جانا زول قال عطشان ادوني موية يا جنيات قمت مشيت علي حافظة الموية باقي الناس الشغالين في بيتن الضانقيل ناس غنيانين وعندهم حافظة موية حمرا كبيرة خاتنها لينا ملانة موية مشيت جبت الموية للزول اكان القاهو ليك يفج في البعر من موية البرميل حق الطين واشرب ياعمي الموية دي كعبة انا جبت ليك موية حلوة اتلفت علي بعد ان شبع موية بدغلوبا واترع ها جنا ها ان خبرتك بالموية الحلوة قال عجين قال
|
Post: #15
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 03:11 PM
Parent: #14
نرجع لموضوع الجبنة حقت اومو الازرق اللهو اللمين ود البشاري في ناس كتار هنا ما بعرفو التيسة بت ابليسة في التكنولجيا الحديسة ( طلع بيت شعر صدفة ) والله كان كدي الشعر دا ساهل خلاس اها زي ديل لابدين ساهي وابعبصو جاي جاي مرات تجي ومرات تطفش منهم خاصة صديق الموج انا احسن منو والعجب العجيب خالد المحرب لا حولاااااااااا اخير انا الليلة عرفت الفرق بين الانترنت اكسبلورر والفيرفوكس يعني الثعلب الناري وايضا كذلك اذكر في هذا المقام الحاج طارق نقد ولايوفتني ان اذكر ادريس وزير الري الناس ديل كلهن طجم بس حقو الواحد فيهم اتلح البشاري دا كل يوم اتعلم ليهو ان شاء الله ايقوناية واحدة واقتباسية اخير ليهو من اخرب كمبيوترات الناس ساهي ولبعدين ابقى في حاو وعر وجر وكر ولا شنو كلامي دا ؟
|
Post: #16
Title: Re: العندو مشكلة فنية تكنولوجية إقع اللمين البشاري
Author: aydaroos
Date: 11-13-2012, 03:33 PM
Parent: #15
Quote: تعرف يا عيدروس في الحر الصناية البتدخل القمرية في الراكوبة كنا شغالين مونة في ايام الاجازة عشان نطلع حق الردة والقميص والنعلات تموت تخلي ديك البعملوها بالبلاستيق ياخي اها وعالم الرياضة شغال يعني اليومية قربت تكمل لانو بعد عالم الرياضة مع دقة الساعة تلاتة بنجدع قدح المونة فنننننننن في الوكت دا جانا زول قال عطشان ادوني موية يا جنيات قمت مشيت علي حافظة الموية باقي الناس الشغالين في بيتن الضانقيل ناس غنيانين وعندهم حافظة موية حمرا كبيرة خاتنها لينا ملانة موية مشيت جبت الموية للزول اكان القاهو ليك يفج في البعر من موية البرميل حق الطين واشرب ياعمي الموية دي كعبة انا جبت ليك موية حلوة اتلفت علي بعد ان شبع موية بدغلوبا واترع ها جنا ها ان خبرتك بالموية الحلوة قال عجين قال |
هاهاهاها ... آييي إتا شن خبرك بالموية ... حقتو دي (روا وشبع)
|
Post: #17
Title: Re: العندو مشكلة فنية تكنولوجية إقع اللمين البشاري
Author: aydaroos
Date: 11-13-2012, 03:34 PM
Parent: #16
Quote: نرجع لموضوع الجبنة حقت اومو |
هاهاهاها
|
Post: #18
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 03:50 PM
Parent: #17
Quote: : نرجع لموضوع الجبنة حقت اومو
هاهاهاها |
والله كان كدي يا عيدروس ات قديم قدم الكسرة الدبلوبة وملاح اللوبا واللقمة قدر الطوبة خاسةً لو كانت بريدة الشهادة والعمل الطيب واكيد بطبيعة الحال بتعرف الترمة وموية البرمة بالله ات في البركس من زمن ناس اومو الازرق واللباس المقدود هههههههههههههههههههههه كنت قايلك بلبل غريد اقوم القاك دفعة وحت كمان ممكن تكون من ستينات القرن الماضي صحي موية الترعة بتشبع عشان فيها الحُتْرُب قال بعر قال
|
Post: #21
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 03:53 PM
Parent: #18
يا زول هوي انا شايل اهلي ضهريتي كَرَبَتْ . . ود الجعيص كان مشغل النسوان ضهرية الشمش غابت داير اغشهن قاليهن حظكن يا البخات غيمت ليكن ههههههههههههههههههههه
|
Post: #22
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-13-2012, 03:56 PM
Parent: #21
Quote: حظكن يا البخات غيمت ليكن |
عشان ما اكون بهت ود الجعيص ما قال ليهن حظكن قاليهن بختكن
|
Post: #19
Title: Re: العندو مشكلة فنية تكنولوجية إقع اللمين البشاري
Author: حمزه بابكر الكوبي
Date: 11-13-2012, 03:51 PM
Parent: #17
علشان كده لك مده غاتس .......اتاريك بره العولمه سلام ومحبة
|
Post: #24
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-14-2012, 07:14 AM
Parent: #19
حمزة الكوبي صديقي الصدوق ياخي مشتاقين عديل كدا لعلك طيب والعيال
Quote: اتاريك بره العولمه |
والله يا حمزة انا من عيالي فاتو السودان اتبشتنت ياخي التلفزيون دا في تلتلة زمان كنت أئ حاجة هاك يا جنا صلح لي التلفون قومي يا بت شغلي لي التلفزيون دا اها بقيت ابعبص في الفاضي زي الاعمى ......... لكن ابشر قريب دا بمش اقعد معاهم وارتاح من اللولوة دي تسلم يا الحبيب
|
Post: #20
Title: Re: العندو مشكلة فنية تكنولوجية إقع اللمين البشاري
Author: عادل الباهي عبدالرازق
Date: 11-13-2012, 03:52 PM
Parent: #17
حبيبنا ود البوش
عساكم بخير
والله ود البشاري بيكوي في الفكك مشكلتوا مريخابي وأنا جني وجن مريخابي يعمل فيني جميلة ![](http://www.sudaneseonline.com/db/attention/010_Smile.gif)
لك التحايا الزاكيات وعبرك للعزيز ود البشاري
Quote: ابشر بالخير عندي عقد مع شركة جديدة لو تم ان شاء الله شهر 12 معاكم تب
وشغلي يبقي الخليج المانيا باذن الله |
سيف كلوش توقع عقد مع شركة بدون ماتشاورني؟ مش أنا كفيلك هنا ؟ أها أنا رافض يلا خم صر
|
Post: #23
Title: Re: العندو مشكلة فنية تكنولوجية إقع اللمين البشاري
Author: aydaroos
Date: 11-13-2012, 10:00 PM
Parent: #20
Quote: بالله ات في البركس من زمن ناس اومو الازرق واللباس المقدود هههههههههههههههههههههه كنت قايلك بلبل غريد اقوم القاك دفعة وحت كمان ممكن تكون من ستينات القرن الماضي |
قديم حامد وشاكر ربي ... أكان ما قراية المجان شفتا ليك ود تربال ببقى مهندس؟!!! حضرنا أركان عمر أومو .. وحضرنازمن أكان عندك ريـال إنت والبلومة تخشوا النيل الأزرق وكان مفلس ،تدخل لوج من سقف داخلية النشر :)
سلام لكل من دخل في كرنقك دا ..
|
Post: #26
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-14-2012, 10:50 AM
Parent: #23
الكتحااااااااااابل حليل الكرنق والبيت الدردر والقروانة والميضة وعود الجوز حليل زمن البريد والريد الشديد والمابتريح بكارينا ما إبارينا حليل زمن الحفلة ام رتينة ونهايتها يا حمامة مع السلامة
|
Post: #25
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 11-14-2012, 10:44 AM
Parent: #20
ود اخوي الكلس ود الباهي سلام وعوافي يا نسيب الغجر
Quote: والله ود البشاري بيكوي في الفكك مشكلتوا مريخابي وأنا جني وجن مريخابي يعمل فيني جميلة |
ات ما سمعت الصادق المهدي قال شنو للانصار في الانتخابات قال اكلو توركن وادوا زولكن اها نحن المريخاب ديل بشيل فايدتم ونغلبم . . عاين جاي سيف دا ود عمي لزم بعد ما اجينا هنا بنخليهو ارجع ليكم بعكاز مضبب وسكين في الضراع وطاقية حمرة عشان تاني ما تقول ليهو طالعني الخلا
|
Post: #27
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 12-03-2012, 01:36 PM
Parent: #25
الامين البشاري عوووووووووووووووك ألْحَق يا لحاق بعيد يا عجل الحديد ههههههههههه لي التعكسا علي قمت اتفولح جبت ضقلا اتلولح داير اتفلفس واسوي لي برنامج اصغر الصور ياريتي ما سويتي والصور اصغرا البلا اللخمها داون لود داون لود والكاسبر حقي اشيل واحذر فيا يا زول اعمل حسابك ولا شغال بيهو الشغلة ما فضل ليهو الكاسبر دا الا اقول لي خلاص نزلني هنا الزول مو عميكة اشيل وادون لود لحدي ما رمد سفري وقال لي اها خم وصر لا احرى لا ادرى علا اشوف الشاشة مسودة سواد الرماد الكال حماد وائ حاجة افتحها يا الله ويا امين تفتح حتى برنامج الكتابة الاسمو الورد العفين دا اتعزز علي وعامل فيها حردان سجم امك آ الخزين . . اها يا اللمين اخوي كيفن الدبارة وكيفن الشورة
|
Post: #28
Title: Re: العندو مشكلة فنية تكنولوجية إقع اللمين البشاري
Author: عصام مدنى
Date: 12-03-2012, 02:02 PM
Parent: #27
ود البشاري
ود البوش
كيفنكم يا أحباب
أنا عندي أستفسار عن طريقة وضع أغنيه بي مشغل ريل بلير في المشاركه
|
Post: #29
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 12-03-2012, 02:49 PM
Parent: #28
عصام مدنى حبابك والله اتفضل اقعد لحدي ما سيد المحل اجي عوووووووووووووك الامين البشاري خليني انا تعال للضيف دا وريهو الرادي دا بشغليهو كيف تعال ليهو هنا ما تقوم توصف ليهو محل تاني . . تحياتي عصام مدني والامين البشاري
|
Post: #30
Title: Re: العندو مشكلة فنية تكنولوجية إقع اللمين البشاري
Author: الامين موسى البشاري
Date: 12-03-2012, 03:25 PM
Parent: #28
Quote: ود البشاري
ود البوش
كيفنكم يا أحباب
أنا عندي أستفسار عن طريقة وضع أغنيه بي مشغل ريل بلير في المشاركه |
حاضرين يا عصام مدني وبجيك راجع
بس نرجع البيت من الدوام دا وبعدها ربنا راح يحلو إن شاء الله
|
Post: #31
Title: Re: العندو مشكلة فنية تكنولوجية إقع اللمين البشاري
Author: ناذر محمد الخليفة
Date: 12-03-2012, 03:53 PM
Parent: #30
شكرا يا ود البوش وبدور اسعل الأمين ..
اللاب توب ليهو فترة أكون شغال فيهو يقوم فجأة أحس بقى تقيل ويقوم كدي يعمل ريستارت بعد ما تجيني شاشة لبنية فيها كلام كتير بالأبيض مكتوب في اخرة dumbing physicsl memory أو حاجة بالشكل دا ..
فتشت في قوقل لقيت انو البتاعة دي أسمها شاشة الموت أو الشاشة الزرقاء .. بس الناس اختلفت في تشخيص المشكلة .. ناس قالوا بتكون الذاكرة ضربت وناس قالو دا مؤشر لي نهاية الهارد ديسك وناس تانين قالوا دي مروحة البروسيسر ضربت .. وناس فرمطوا الوندوس ونزلوا وندوس جديد وبرضو المشكلة مستمرة ..
أنا هسي بكتب ليك وشاعر الجهاز بقى تقيل وامكن بعد شوية يقفل ويفتح تاني ..
أها دي حلها القاطع شنو ؟!!
تسلم ..
|
Post: #32
Title: Re: العندو مشكلة فنية تكنولوجية إقع اللمين البشاري
Author: الامين موسى البشاري
Date: 12-03-2012, 05:05 PM
Parent: #31
Quote: أنا هسي بكتب ليك وشاعر الجهاز بقى تقيل وامكن بعد شوية يقفل ويفتح تاني ..
أها دي حلها القاطع شنو ؟!!
|
ناذر ود الخليفة
سلام يا صاحب ... والكلام الفوق دا كلو كلام فارغ (مع كامل الاحترام) لا ميموري خربان ولا هارديسك ولا ينجروا ليك كلام ساي من راسهم المشكلة ببساطة هي مشكلة تعارض احد تعاريف (drivers) الاجهزة وعدم اجتيازه لاختبار مايكروسوفت ودا احتمال اول وهو المرجح عندي 100000000000%
Quote: Physical memory dump error is mainly caused due to incompatible system drivers, registry errors and virus infection. Fix physical memory dump error immediately to secure your PC. To know more: http://www.physxloaderdllfix.com/
|
او احتمال الاصابة بفايرس ودي ما أظنها أو احتمال وجود خطأ في الريجستري ودي برضو انا مستبعدها ههههههههههه عارف المشكلة دي قبل كم سنة أكلت بيها قروش السعوديين جت والله صحي ( )
يلا الحل: 1. شوف ليك زول شاطر يراجع تعاريف الاجهزة (drivers) كرت الصوت ،كرت الشاشة ، كرت الشبكة ... الخ الخ (كل التعاريف يا ناذر) والمشكلة دي ظهرت تحديداً مع بداية ظهور الويندوز أكس بي لازم كل تعاريف الأجهزة لازم تجتاز اختبار مايكروسوفت 2. فرمت جهازك ونزل التعارف الاصلية للأجهزة والمجتازة لاختبار مايكروسوفت
يعني مشكلة Software بالدرجة الأولــي نظام التشغيل عندك شنو win XP , windows7?
يتم دفع الفاتورة على رقم الحساب دا 1010000000000000000001
تحياتي
____ سبب التعديل: اضافة كلمة (drivers)
|
Post: #33
Title: Re: العندو مشكلة فنية تكنولوجية إقع اللمين البشاري
Author: ناذر محمد الخليفة
Date: 12-03-2012, 07:24 PM
Parent: #32
شكرا يا البشاري ونشوف واحدة واحدة :
Quote: المشكلة ببساطة هي مشكلة تعارض احد تعاريف (drivers) الاجهزة وعدم اجتيازه لاختبار مايكروسوفت ودا احتمال اول وهو المرجح عندي 100000000000%
|
انا بستعمل وندوس سفن اصلي جاي مع اللاب توب وكل درابفراتو اصلية لكن كلامك دا ذكرني حاجة مهمة جدا جدا ..
المشكلة دي حصلت لي تحدبدا لما جيت انزل صور من ذاكرة الكميرا في الموبايل إكتشفت انو الميموري كارت ما معرف !! صدف واحد أخونا وحبينا من اسياد الشي زاتا جاني المكتب طرحت ليهو المشكلة وهبش في الجهاز وفعلا لقى إنو الميموري كارت ما معرف وعرفو لي من النيت !!! دا التعريف الوحيد النزل من النيت وتقريبا المشكة دي حصلت بعد داك طوالي ..!
والله يا البشاري غنت زول ما ساهل .. فجاة كدة بديت اقتنع انو دي سبب المشكلة ..
ملاحظة تانية .. الجهاز بقى بطي جدا والصوت ما واضح وفيهو قطيع شديد .. الغريبة لمن افصل النيت وأعمل ريستارت للجهاز الصوت بيرجع طبيعي !!
Quote: ههههههههههه عارف المشكلة دي قبل كم سنة أكلت بيها قروش السعوديين جت والله صحي |
ههههههههههه إنشالله بس تكون شبعت وقنعت عشان قريشاتي ديل أنا حريص عليهن ..!
Quote: يلا الحل: 1. شوف ليك زول شاطر يراجع تعاريف الاجهزة (drivers) كرت الصوت ،كرت الشاشة ، كرت الشبكة ... الخ الخ (كل التعاريف يا ناذر) والمشكلة دي ظهرت تحديداً مع بداية ظهور الويندوز أكس بي لازم كل تعاريف الأجهزة لازم تجتاز اختبار مايكروسوفت 2. فرمت جهازك ونزل التعارف الاصلية للأجهزة والمجتازة لاختبار مايكروسوفت
|
مع إني واثق تماما غنو تعاريفي مية المية لكن حا اعمل بي نصيحتك بس بعد ما أمشي هسي أمسح تعريف الميموري كارد .. عندي احساس غنها سبب المشكلة ..
Quote: يتم دفع الفاتورة على رقم الحساب دا 1010000000000000000001 |
اوع يكون دا نفس الرقم الحولوا ليك فيهو السعوديين هههههههه
|
Post: #34
Title: Re: العندو مشكلة فنية تكنولوجية إقع اللمين البشاري
Author: الامين موسى البشاري
Date: 12-03-2012, 08:34 PM
Parent: #33
ناذر الخليفة يا صاحب ازيك
غايتو لقيتك زول بتاع ملح بشششكل ![](http://www.sudaneseonline.com/db/attention/200_4e.gif) صدقني هي مشكلة تعارض تعاريف فقط (drivers) غير متوفقة مع اختبارات مايكروسوفت لتوافق الأجهزة أظنك عارف طبعاً أجهزة اللابتوب العندنا كلها ما أصلية 100% والمشكلة مش في الويندوز أصلي ولا لا المشكلة في الأجهزة نفسها المكونة للجهاز حقك هل هي متوافقة ولا لا بالمناسبة جهازك شنو؟ في كثير من الأحيان يقول لنا نظام التشغيل ويندوز أن الجهاز غير متوافق أو غير مجتاز لاختبارات التوافق ونحن طبعاً بدون ما نفكر بنضغط موافق (ok) وبعدين المشكلة بتحصل زي ما انت شايف
جرب وقول لينا عووووووووووووك
تحياتي
|
Post: #35
Title: Re: العندو مشكلة فنية تكنولوجية إقع اللمين البشاري
Author: الامين موسى البشاري
Date: 12-03-2012, 09:30 PM
Parent: #28
Quote: أنا عندي أستفسار عن طريقة وضع أغنيه بي مشغل ريل بلير في المشاركه |
سلام تاني يا عصام
الحكاية دي زمان كانت ساهلة واليومين دي بكري موقف رفع الاغاني وعشان تطلع من الحتة لازم ترفع الاغنية في مركز تحميل خارجي بعضها يتطلب التسجيل وبعضها لا يطلب تسجيل وهنا مثال لمركز رفع ملفات http://www.m5zn.com/ تضغط تصفح وتختار الاغنية الانت عايز ترفعها بعد اكتمال عملية الرفع تقوم بنسخ الرابط وتظلل الجزء المظلل باللون الاحمر في الصورة التحت دي وتقوم تلصق الرابط بتاع الاغنية محل الجزء الملون بالون الاحمر
![song1.jpg Hosting at Sudaneseonline.com](http://www.sudaneseonline.com/uploadpic11/oct/song1.jpg)
وأما الكود نفسه سوف تجده هنا
وعشان اسهل ليك دا الرابط المفروض الصقه محل الجزء الملون بالاحمر
http://k003.kiwi6.com/hotlink/q9kjwhxdq4/asal...fsak_-_reemaz_-_.mp3
|
Post: #36
Title: Re: العندو مشكلة فنية تكنولوجية إقع اللمين البشاري
Author: محمد عمر الفكي
Date: 12-04-2012, 06:27 AM
Parent: #35
Quote: العندو مشكلة فنية تكنولوجية إقع اللمين البشاري |
عطاء من لايملك لمن لايستحق ![](http://www.sudaneseonline.com/db/attention/010_Smile.gif) تحياتنا للجوز
|
Post: #38
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 12-04-2012, 12:58 PM
Parent: #36
Quote: عطاء من لايملك لمن لايستحق |
وكت العبارة دي عاجباك للدرجة دي ما كان تسويها عنوان بوست بدل ما تروح ليك شمار في مرقتنا دي ساهي . . محمد عمر الفكي مشتاقين ياخي من ديك وعييييييييك ؟
|
Post: #39
Title: Re: العندو مشكلة فنية تكنولوجية إقع اللمين البشاري
Author: الامين موسى البشاري
Date: 12-04-2012, 01:06 PM
Parent: #38
Quote: وكت العبارة دي عاجباك للدرجة دي ما كان تسويها عنوان بوست بدل ما تروح ليك شمار في مرقتنا دي ساهي |
والله يا ود البوش بجاي عبارتو دي فاتت ليهو فســـوة مدنقر ![](http://www.sudaneseonline.com/db/attention/200_4e.gif) ![](http://www.sudaneseonline.com/db/attention/200_4e.gif) ![](http://www.sudaneseonline.com/db/attention/200_4e.gif) .. ..
__ فســـوة المدنقر: لا بتسمع ليها صوت ولا ريحتها بتنشــم
|
Post: #41
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 12-04-2012, 01:21 PM
Parent: #39
قلنا إقع البشاري فنيا وليس عصام الحضري في ضربات الجزاء معديها ليكم ظراط حلبا وكوفك اجيب من جوة ماتحرف مسار البوست وتتهرب بالفسو واللباس المقدود . . عاين جاي الوش الضاحك كان البدردق ولا المابدردق في الثعلب النار دا بتجي كيف سجيت فيها ابت كلو كلو في اللزرق داك عارفها اخت الماوس وبروبرتي وكوبي واضف صورة وبست واوكي وزاد وجدي لكن في المعولق الاسمو فيرفوكس دا غلتني كلو كلو عليك الله بعملوها كيف ؟
|
Post: #37
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 12-04-2012, 12:44 PM
Parent: #35
والله يا الامين البشاري اصلك ما قصرت وحاشاك التقصير حرم مع اني مافاهم التيسة بت ابليسة لكن شكلو ناذر الخليفة انبسط منك واكل ليهو سندوتش طحنية ههههههههههههههههههههه . . برضو عصام مدني اديتو النجيضة طب . . لكن انا بجيك بالسلك عدييييييييييييييل والله كان اطعم ليك خشمك بالحكاية الحقيقية دي عندنا واحد هنا في السعودية الامراض النفسية دي اشترى فيزا لود اخوهو وفي نفس الوكت معرس بتو اها الجنا مما جنا انقنق .... دي بلد دي ..... دي بلد اقعدوا فيها دي انا الجابني هنا شنو ........ ورروك وراااااارووووووك دقا نهائي وفرتق وقالت كدي العيشة قابلتو ليك زمان ما كان صبي ساهي ود البقز بعد انزرد قام برااااااااااحة اتصل علي عمو وقال ليهو جيب لي فيزا . . . .
ههههههههههههههههههههه عمو قاليهو شنو ؟ . . . . هههههههههههههههههههههههه
علي بالطلاق كان خراك جاني بالسلك دا تاني ما برسل ليك فيزا
|
Post: #40
Title: Re: العندو مشكلة فنية تكنولوجية إقع اللمين البشاري
Author: محمد عمر الفكي
Date: 12-04-2012, 01:19 PM
Parent: #37
Quote: والله يا ود البوش بجاي عبارتو دي فاتت ليهو فســـوة مدنقر فســـوة المدنقر: لا بتسمع ليها صوت ولا ريحتها بتنشــم |
بس عشان تاني يا ود البوش تصدق كلامي ، شوف المستوى كيفنو![](http://www.sudaneseonline.com/db/attention/010_Smile.gif) ياخي صدقني عاذرك مدام دا البيصلح ليك كمبيوترك
ود البشاري حاشية الشرح ما عندك لكن ![](http://www.sudaneseonline.com/db/attention/010_Smile.gif) تصليحك لجهاز ود البوش ينطبق عليه القول رب رمية من غير رام
|
Post: #42
Title: Re: العندو مشكلة فنية تكنولوجية إقع اللمين البشاري
Author: عبدالله ود البوش
Date: 12-04-2012, 01:31 PM
Parent: #40
Quote: ياخي صدقني عاذرك مدام دا البيصلح ليك كمبيوترك |
الرخيص برخصتو اشبعك فسو ههههههههههههههههههههه هو اصلو بصلح كمبيوترات ولا سواق كارو حصان ههههههههه . . ود عمر ما تحرشني علي صاحبي
|
|