الصفر العنيد ..غلب الدوا والطبيب..

غلب الدوا والطبيب!
* حضر التركية السابقة وعاصر اﻹنجليز،
وواكب حريق المك، وشاف سﻼطين
باشا، وزامل كتشنر والمستر كﻼرك
واللورد كرومر،وعايش لحظات رفع
العلم وثورة أكتوبر واستشهاد القرشي
والديمقراطيات الثﻼث!
* الصفر العنيد، قاتل مع قوة دفاع
السودان واتطوع مع سﻼح الهجانة،
وحضر اﻷزهري وعبود والنميري
والصادق وزروق..وما راضييروق!
* وحا يحضر استفتاء الوحدة أو
اﻻنفصال، وأكيد أكيد حا يصوت للوحدة..
مع الهﻼل!
* حتى اﻻنقﻼبات ما فاتها، خالد الكد
وهاشم العطا وحسن حسين ومحمد
نور سعد!
* وفي زمن اﻹنقاذ.. رفض أي إنقاذ!
* الصفر أقدم من الكسرة، وقاعد من
زمن الزمام أب رشمة!
* حضر زمن الكركار ودق الشلوفة
والرحط، وحضر زمن البوتكس
والسيلكون والكريمات والتاتو!
* الصفر متحكر من زمن البرش بي
قرش.. والدقة بﻼش!
* غنى مع زنقار..وكمل حقيبة الفن مع
كرومة وسرور وعوض شمبات..
والصفر ما فات!
* عاصر زمن أم بلينة السنوسي وعشة
الفﻼتية ومهلة العبادية، وغنى مع ريماز
ونانسي وشموس!
* حضر العبادي وود الرضي وود البنا
وود القرشي والسر قدور، وحضر زمن
جمال فرفور!
* كرومة لعب وفتر.. وسرور غنى وما
قصر.. والصفر لسه محكّر!
* حضر زمن اﻷنادي والدلوكة
والرايات.. وعاصر زمن الشريعة
والنظام العام!
* عايش من زمن الناس بتضبط
ساعاتها بالقطر.. وتركب المفتخر!
* حضر زمن اللحمة بالوقّة والعيش
بالملوة وجوز الحمام 3 فردات!
* وقدل في الطريق الشاقي الترام،
وباع واشترى بالمليم والفريني والشلن
والريال والطرادة، وحضر زمن اليورو
والدينار والدوﻻر الحار!
* اتعالج بحبوب السلفة في الشفخانة،
وحكمة الله لي هسة قاعد معانا!
* حلق الكاري والخنفس وشق شعرو
مع إبراهيم عوض، وحضر المارينز
والراستا، وأكل المديدة والباسطة!
* كتب عنه كوركين أسكندريان وأبو
آمنة حامد وعمر علي حسن.. وحضر
زمن دسوقي وشجرابي وعائس!
* وكتب عنه خالد عز الدين، وكان ما
أخاف الكضب أقول الصفر قاعد معانا
لي يوم الدين!
* عاصر الخديوي ونجيب والسادات
وعبد الناصر، وصاحب عرابي وعلي
ماهر!
* وحضر زمن هيﻼسيﻼسي وتمبلباي
وحسين هبري وجكوني عويدي وعيدي
أمين وموسفيني!
* وعاش مع الملك الحسن وشهد
خﻼفة ابنه في المغرب، وحضر زمن
الملك حسين وابنه الملك عبد الله،
وعاصر عهود الملك عبد العزيز، والملك
فيصل، والملك خالد، والملك فهد،
والملك عبد الله!
* وفي السودان عاصر زمن الناس
بتسمي خشم الموس والكجم وتور
القوز واللدر والدود وعشا البايتات!
* وحضر زمن مهند وهيثم ورامي!
* شاف سعدية الداية، ودكتورة خالدة
زاهر، وحضر دكتور لؤي كشف علي!
* وحضر زمن فاطنية، وأم ضيفان،
وعشوشة، والسُرة!
* حضر زمن نانسي وناريمان وسوسو!
* وحضر زمن بوكاسا.. ولعب الرمة
وحراسها!
* الصفر عايش من زمن الدوم بالطبق،
وقراصة النبق!
* وعاش في زمن البيتزا والﻼزانيا
والهوت دوغ والكرانشي بيرغر!
* الصفر اتعالج بالجردقة والمحريب
والقرض والحرجل، ومشى لي جبارة
الكسور بت بتي!
* واتعالج بالبنسلين والتتراسيكيلين
واﻹمبسلين والليزر!
* وحضر الضﻼم والدمبعلو والبعاتي
وحجا الحبوبات!
* الصفر حضر زمن الحمام الزاجل
والجواب والتلغراف!
* وقعد لي زمن زمن الموبايل والنت
والﻼب توب والياهوو والهوت ميل
والفيس بوك!
* الصفر حضر زمن الخوسة والسيف
والسفروق!
* حضر زمن الليزر والقنابل العنقودية
واﻷسلحة النووية!
* عاصر الحربين العالميتين، حضر
تشييد وسقوط حائط برلين، وشارك في
بناء سور الصين!
* وحضر زمن كتلة عدم اﻻنحياز وغنى
مع كابلي لي ناصر وجومو كنياتا
وسوكارنو ونهرو وتيتو!
* وشارك في حرب فيتنام، وتابع أزمة
خليج والخنازير، ومقتل كيندي، ونضال
جيفارا، وثورة كاسترو، وعاصر ثورة ماو
في الصين!
* حضر زمن ال######ة ﻻيكا، وصعود
اﻷمريكان للقمر، ووثق انفجار
تشيرنوبل وهيروشيما وناجازاكي!
* عاصر زمن الهمباتة، وغنى مع خلف
الله حمد )الكنداكة سيدي سيد اﻷراكة!(
* وركب مع طه الضرير وود ضحوية
في جمل واحد، وحضر زمن )بكرة
الهمر جاية!(
* الصفر قاعد من زمن القراية أم لوح،
وما بعيد يكون ركب في سفينة نوح!
* الصفر نده سيدي الحسن أب قبة
لبنية، وزار الشيخ حسن ود حسونة
طباب المجنونة!
* وعاش معانا عهود ندى القلعة
وستونة!
* هز مع الدلوكة والشتم، ورقص
التوتيستي، ولبس الشارلستون،
والساعة الرومر، والنضارة البيرسول،
وحضر زمن توب الزراق الجابوهو
النقادة، والقنجة، وأب قجيجة، ورسالة
لندن، وجكسا في خط ستة، وتحرمني
منك، وعاش لي زمن الكارينا والبودي!
* وقالوا صفر ) 2010داقي سيستم(
بالشكوى ضد التوانسة
* ومن وين وكيف لمتين.. يا شكوى
ضاعت وين
* يا صفر يا مرتاح، بين الدموع العين!
81 * سنة.. والصفر الثقيل ما راضي
يستقيل!
* الصفر الدولي أعرق من الطابية
المقابلة النيل، وأقدم من بوابة عبد
القيوم، وأشهر من دهليز صالح جبريل،
وأقدم من سبيل خلف الله!
* وجلده أتخن من سور سجن أم
درمان وسور دارالرياضة أم درمان!
* حضر زمن السحارة وزمن الدواليب!
* وحضر الديب فريزر والمشلعيب!
* مذنب هالي مشى وجا فيهو 3 مرات!
* الصفر قاعد من زمن دار الضلمة،
وقهوة جورج مشرقي، وسان جيمس،
والسينما المتجولة والعيادة المحولة!
* دخل سينما برمبل وكلوزيوم
والوطنية!
* ويا زوووول، ده حضر زمن عفراء
مول!
* الصفر مشى في سوق أم دفسو،
وسوق أم سويقا، وسوق خمسة
دقايق، واشترى من الملقة و)مليون
صنف!(
* وعمرو طال لغاية ما شاف المول
واﻷسواق الحرة والتجارة اﻹلكترونية!
* الصفر حضر زمن صفرجت وسكج
مكج والسيجة وأم الحفر وشليل وينو!
* ولعب بﻼي ستيشن وأتاري، مع أوﻻد
ديمبا باري!
* عاصر زمن الهيلمان والهينو والكندة
والهنتر وكومر الكشة..وركب اﻷمجاد
والركشة!!
* ركب الترماي واتحكر في باصات أبو
رجيلة، وحضر زمن بيع التمر بالكيلة!
* الصفر قاعد من زمن )الشدة( و
)تموت تخلي(، والهﻼل ما راضي يخلي!
* صفر معمر، لعب مع منزول وممي
وقاقا والدحيش وجكسا وباكمبا، وزامل
سيدا وسادومبا!
* المريخ فاز بكأس مانديﻼ.. والصفر
العالي ما اتدلى!
* الصفر شاف سيكافا، قال النجمة
قيافة!!
* وشاف كاس دبي، قال الله لي!!
* وشاف كاس الشارقة، قال النجمة
حارقة!
* الصفر شهد تهجير الفﻼشا، وقاعد من
التركية لي نيفاشا!
* حضر مجاعة سنة ستة وزمن بيع
الباسطة بالحتة!
* صفر الجن، الما راضي يحن!
* عاصر الخريجين اﻷوائل، ودرس في
كلية غردون، وعاصر بابكر قباني، وآدم
رجب، والطيب عبد الله، والسماني،
والبلولة الرجع تاني!
* وحضر زمن اﻷرباب وقرأعمود)بدون
حجاب!(
* الصفر والهﻼل أصحاب أصحاب!
* مش من حقو يقول: صفر.. وأفتخر؟
* يا صفر.. أرحم شوية.. وأهدي لي
لحظات هنية!
* خﻼصة الزبدة: كان شالوه ما بنشال..
وكان خلوه سكن الدار!
* آخر خبر: ده ما الرماد الكال حماد..
ده أقدم صفر دولي في التاريخ !
____________

كبد الحقيقة ..مزمل ابو القاسم
موضوع سابق ومتجدد ..