ضد الانسانية يا وزير الصحة .... توجد ماساة

ضد الانسانية يا وزير الصحة .... توجد ماساة


11-11-2012, 02:08 PM


  » http://sudaneseonline.com/cgi-bin/sdb/2bb.cgi?seq=msg&board=410&msg=1352639338&rn=0


Post: #1
Title: ضد الانسانية يا وزير الصحة .... توجد ماساة
Author: osama fadlalla
Date: 11-11-2012, 02:08 PM

ومازلنا نبدا يومنا بالاحزان,,,,,,

,,,عمود الفاتح جبرا اليوم....



الأستاذ الفاضل/ الفاتح جبرا
تحية وسلاماً.. وأشيد بعمودك المقروء
يبدو يا أستاذي العزيز أن الواقع لدينا قد فات حد الدهشة.. و لكن ما سأقصه عليك اليوم وسع نطاق الواقع المدهش في نظري.. وغير بعض موازنات الإنسانية التي أراها في ربوع بلادي.. ليقف التاجر لا الإنسان على حيثيات هذا الحدث.
زميلتي تعمل طبيبة في مستشفى أطفال (خاص).. في صالة الطوارئ كانت هنالك شابة مرافقه لأحد الأطفال المرضى.. تزايد عليها ضيق النفس.. وأعلنت عن نوبة أزمة جديدة في حياتها.. كان لها وافر الحظ في النجاة منها.. يمكن لأنها كانت في المكان المناسب.. واللي بعضهم شايف إنو ما مناسب.
قامت زميلتي مسرعة لنجدة تلك الشابة.. مستحضرة الواجب المهني والأخلاقي تجاه كل مريض.. بعيداً عن حسابات المادة.. وبروتوكولات التخصصية.. فكان لها نصيب أن تصبح سبباً في إحياء روح.. يمكن لأنها كانت الزول المناسب.. واللي بعضهم شايف إنو ما مناسب.
خرجت من منزلها لتبدأ يوم عمل عادي.. فكل الأيام تشبه بعضها.. تتغيّر الوجوه.. ولكن الشكوى وااحدة.. دا الروتين.. لاحظ لما يتكسر الروتين.. فهنالك احتمال ألا يتجبر المكسور.. وشكلو دكتورتنا كان لها في الروتين المكسور نصيب.. يمكن بس كانت الكسرة المناسبة في المكان غير المناسب..
هي لم تعلم حينما وقفت تقسم ألاّ يمنعها عن أداء واجبها المهني إلاّ «الشديد القوي».. إن تعريف الشديد القوي قد خُضع لمستحدثات تتماشى مع طلب السوق وعرف الرأسماليين.. فلم يعد الشديد البنعرفو ولا فضل القوي على حالو.. وبقى لا يمنعك من أداء واجبك إلا اللوائح و القوانين.. ويمكن هي قابلت اللوائح غير المناسبة..
عشان المناسِبات الفوق دي تقع لينا.. خلونا نرجع بالزمن لأوائل المحاضرات في كلية الطب.. البتتكلم عن إنو المريض فوق كل اعتبار.. واعتبار دي طبعاً في الجامعة لا تخضع للنسبية.. لانها محاضرة في قاعة لطلبة.. لكن لمن تبقى تطبيق عملي في مستشفى لأطباء.. هنا الاعتبار يتناسب مع خصوصية الزمان والمكان.. وعشان نفهم أكتر نعمل زووووم على جزء من المشهد البنتكلم عليو من قبيل.
- يا دكتورة انت ما ينفع تشتغلي معانا خلاص.. مدير المستشفى
- بشئ من الهجمة المبررة: ليه؟ الحصل شنو أنا ما فاهمة؟
- نحنا أخلينا طرفك وحتاخدي استحقاقاتك كلها ربنا يسهل ليك في مكان تاني.
- انا ما سألت عن استحقاقاتي.. أنا بسأل المشكلة شنو؟
- بصراحة كدا إنت أخليتي بسياسة المستشفى.
- الواحد لما يعلاج مريض بين الحياة والموت بكون اخلى بسياستكم!!
- خليكي (إسبيسيفك) يا دكتورة.. انت اي عالجتي عيانة لكن العيانة دي ما تبعنا.
الحالات الطارئة ما فيها تبعنا وما تبعنا!!
- أها دي اللخبتة البقول ليك عليها.. مريضة كبيرة تمشي تتعالج في مستشفى كبار.
- ما كان حتصل إنت عارف الأزمة براك!!
- عارف وأي حاجة لكن اللوائح لوائح.. انت اخدت من زمن الاطفال العيانين.
- كان أخليها تموت يعني!!
- يا دكتورة البكتل اليوم.. عيانينك أولى باهتمامك.
- والله انا ما قادرة أفهم!!
والله يا دكتورة وأنا كمان ما قادرة أفهم.. والقارئ العزيز ذاتو يمكن ما قادر يفهم.. لكن الحاجة المفهومة.. إنو الغلط ما منك الكنت في اللحظة ديك الطبيب المفروض يعاين بعين الواجب ما بعين اللوائح.. الغلط في ناس المستشفى الخاص دا.. البقو فاتحنها تجارة خالصة.. لا تشوبها شوائب الإنسانية.. واللاّ يمكن نحنا عايشين في الزمان غير المناسب!!
يا جماعة أنا ما بفهم في القانون.. لكن زول يتم (فصلو) كدا بالطريقة دي.. مش اسمو فصل تعسفي.. والدكتورة دي نقول ليها تستعوض ربها وتكوس شغل تاني.. ولا تشتكي وكدا.. أها دايرين النصيحة المناسبة!!
إبنتك الدكتورة (س)
الرد:
إبنتنا الدكتورة (س).. الحصل لزميلتك ده مش فصل تعسفي وبس ده عمل ضد الإنسانية.. المشكلة هو الزول يشتكي لمنو؟!
كسرة:
الله يكون في العون!!
كسرة ثابتة:
أخبار ملف خط هيثرو العند النائب العام شنو(ووو ووووو ووو)؟ - قريبا الاحتفال بالذكرى السنوية -.



Post: #2
Title: Re: ضد الانسانية يا وزير الصحة .... توجد ماساة
Author: باسط المكي
Date: 11-11-2012, 05:25 PM
Parent: #1

up

Post: #3
Title: Re: ضد الانسانية يا وزير الصحة .... توجد ماساة
Author: osama fadlalla
Date: 11-11-2012, 08:30 PM
Parent: #2

هلا باسط المكي

شفت الزمن ده بقى كعب قدر شنو
زمان اخبار ذي الناس بتدسها حتى لاتضيع المروءة بين الناس
لكن يبدو انه لم يبقى لدينا ما نخاف على ضياعه