رسالة الي والي الخرطوم عبد الرحمن ( الجقر)!!

خاطرة في مؤازرة البريئة ماكينة اللحام المتهمة بحريق ( اليرموك)
ـــــــــــــــــــــــــــــ


قدام الخلوق عكم المكرفون اتنحنح منتفخ الجضوم عبد الرحمن الجقر
وايدو علي المكرفون والتانية علي الكرش الناطة من فوق السدر
لولح فقرتو التريانة بمال الحرام وناسي يوم الحساب ولفيخ القبر
عجل الانادي المدوعل بالمشق تفل المرايس وتفل تمر عرقي التمر
ما اتلفت للكضب وبقوة عين كضاب المية بالكضب انفجر
قال للخلوق: مكنة اللحام يا اخوانا هي المجرم والله هي سبب الضرر
ومنها قد جاتنا البلاوي بعد ما طار من جوفها الشرر
قال مكنة لحام قال.... ان شاء الله بالتلحم لهاتك علي جعبتك وجعبة عمر
وتقرن كـــلاب السلطة ده فوق ده وتنقرنو يا كــلاب لي اخر العمر
واليرموك قال... ان شا الله يرموكم بصاروخ من فوق القمر
وتخفسوا الارض لا يلم فيكم حدي لا كديس لا كــلب لا صقر
مالها مكنة اللحام المسيكينة يا تيس الله الجايب المرض و الفقر
حديدة مسيكينة لا بتعرف الكلام ولابتفك الحرف الواو الضكر
دحين يا الجقر تكون طلعت مسيرة ضدكم وهتفت قدام القصر
اوتكون في تنظيم مكنات لحام تحت الارض شايل يسار فكر
او تكون في تنظيم مكنات لحام رافعة في الدنيا رايات كفر
قال مكنة لحام قال تيس الله العفــن مقطوع الضكر
حرامي الحرامية يا تفل الرجال لاذمة لا اخلاق تنذكر
ترابنا بعتوهو بالتمن الرخيس للحبشي والمصري الزفر
واسرائيل داقاكم دق العيش بالليل والضهر ومرات عصر
وجنوبنا ضيعتوهو في عفن الخيانات والبيع القذر
وطلعتوا دين الشعب السمح بشعارات الكضب الختر
اياهو الكضب الببيع دين الله في السهلة ومليان دجل مليان مكر
يا كتالين الكتلة وين تمشوا بحق المظاليم والمولي ما بخلي ظالم يفر
ودعوة المظاليم تباريكم لجهنم حيث الشرر الغلاد متل القصر
وعذاب الله في الدنيا راجيكم راقد هبطرش قبال يوم الحشر
طيارات تحرق عربات تحرق وسرطان سريع بشيل العمر
واما عذاب القبر ويوم الحشر ده شيتا هاااااااانقـــــــــدر
اطروا الموت يا رمم الرمم واتذكروا الراجيكم هناك في جوف القبر
لا بحلكم دولار ولا القصور المنهوبة من عرق النور وحاجة الصبر
ولا بتحلكم الرتب الكبار ولا كـــلاب السلطة المطلوقة تنهش في البشر
الله في.. ودعوة المظلوم مجابة والظالم يا ويلو من داك الجمر
الله في والبخاف الله عمرو ما بندم وما بيغشاهو شر
والببيع دين الله يا ويلو من سعال القبر ويوم الحشر
واسمعوا يا انتن مخاليق الله يا حثالات يا غجر
الشعب راجيكم للحساب الصعب ان طال العمر او قصر
وكل مظلوم حقو برجع والكاتل بنجيبوا حتى لودخل الجحر
وحتلقونا في انتظاركم شعب واعي شعب هاطل زي مطر
شعب ما ببيع كرامتو وتارك يا صفية يا شريفة ما بروح هدر
وترابك يا حلايب والله عايد حتي لو رفض القدر
حتلقونا في انتظاركم نحن يانا نحن زي سيف العشر
ان قمتوا انكسر وان قعدتوا انحشــــــــــر

سلام ياعمده

ابننا الحبيب خضر

كيفنك يا زول ووليداتك وبقيراتك وغنيماتك

واصل كفاحك

صورة للمتهمة البريئة ( مكنة اللحام)

.

.

.

.

.

.