كيف تدير راتبك .. نظريات مجربة وتحليلات..

كيف؟

تبقى حاوي


بعد السلام والتحية طبعا

Quote: تبقى حاوي

تحية عمار حاوي زاتها امكن مابتنفع

وتبقي المنصرفات غولا فاغرا فاه، يلتهم دنانيرك وسنتاتك، مثل البسكوت المذاب في حليب

واذا كان راتبك بسيطا او كثيرا ؛آخره نار البقالات والصيدليات والبنوك......

صراحة الراتب بيكمل في العشرة ايام الاولي من الشهر واحيانا في نفس يوم استلامه......

سمعت عن طريقة لادارة الراتب ،اعجبتني كثيرا وهي:

10-70-20 شرحها :

%20 تذهب لسداد الديون: اقساط سيارة -بطاقات -واخرى

%70 للمنصرفات - ايجار منزل - - علاج - ملابس الخ

%10 توفير اجباري......

هل تصلح هذه القاعدة

-----------
تستلم الراتب وتتذكر ود المقبول في عم عبد الرحيم ( الماهية اوف عيشة هاك وكف)10-70-20

صابر كل عام وانت بخير
ظاهر انت تقيس المرتبات خارج السودان لان هناك بند مصروفات يوحي بذلك ( بطاقات ) ولهذا يمكن ان تنجح مثل هذة التقسيمية 20 - 70 - 10 لكن في السودان يستحيل حسب ما كنت عايشة من واقع أنا غايتو كنت بسلم الماهية كاملة لبتاع الدكان الجنبنا اي والله ومرات كانت ما بتكفي بتاع الدكان بس ودة قصاد شنو حاجات فارغة يا رحمة الله بالله خمسة سجارات برنحي ، يا رحمة الله بالله قزازتين ببسي ، يا رحمة الله بالله علبة تبدو او جركانه زيت او علبه صلصة تلقي الحساب اخر الشهر اكبر من الماهية
دة غير بند الايجار والبنزين والعيش والخضار والحمد لله العلاج كان مكفول ، غايتو القدر يصبر في السودان سنه سبعه وتسعين مفروض يدوه وسام الإنجاز والإعجاز
في السعودية ممكن توفر اكثر من نصف راتبك ودة ناتج لعدم وجود مغريات ترفيهية او تسويقية مثل الامارات مثلا ( مهرجانات التسوق واغراءاتها المعروفة ) بالاضافة ألي رخص تكاليف الإعاشة مقارنه بدول الخليج الأخري
أنا اعرف في السودان موظفين كتار من يوم خمستاشر بيوقفوا يشتروا أدوية مثل أدوية الضغط او السكري لضيق ذات اليد. ( اي والله اكثر من نص الشهر ما بيبلعوا الحبوب رغم الخطورة وهم عارفين كدة لكن يقولوا ليك نعمل شنو )
تقول لي يوفروا 10٪
يمكن الوضع تغير بعد التامين الطبي دة واتمنى ذلك

باصابر ، حبوبة واحد من الصحاب القدام ،
بعد ما جاء نميري وجماعتو وكاوشو على البره والجوه
فى زمن التأميم والمصادرة وشالو حق ولدها ، كانت تقول :
يا أولادي بعد ده اللقى لقا والمالقا اليركب .....
معذرة ياصابر ، حبوبه خرفانه مرفوع منها القلم
ولم تتزوج حتى بلوغها الثمانين ، وكلامها تحته وجع كلام ..

الاستاذ محمد مختار لا تهمل كلام الحبوبات كله حكم ومواعظ بس بالسليقة وبدون رتوش

فهي صادقة حينما قالت

Quote: صابر ، حبوبة واحد من الصحاب القدام ، بعد ما جاء نميري وجماعتو وكاوشو على البره والجوه فى زمن التأميم والمصادرة وشالو حق ولدها ، كانت تقول : يا أولادي بعد ده اللقى لقا والمالقا اليركب ..... معذرة ياصابر ، حبوبه خرفانه مرفوع منها القلم ولم تتزوج حتى بلوغها الثمانين ، وكلامها تحته وجع كلام ..

كل سنة وانت بخير الزبير

رسمت واقع لراتب يحتاج كبار مستشاري العالم لإدارته

واذكر نكتة الخواجة العمل دراسة في السودان عن كيف يعيشوا بالراتب

وأجمعوا علي أن الراتب لا يكفي حتي نصف الشهر وباقي الشهر الله كريم

قال الخواجة السودانيين لو ما بساعدهم واحد أسمو الله كريم كان انتهوا

الزبير لو كان وضعك بهذه الطريقة

Quote: من واقع أنا غايتو كنت بسلم الماهية كاملة لبتاع الدكان الجنبنا اي والله ومرات كانت ما بتكفي بتاع الدكان بس ودة قصاد شنو حاجات فارغة يا رحمة الله بالله خمسة سجارات برنحي ، يا رحمة الله بالله قزازتين ببسي ، يا رحمة الله بالله علبة تبدو او جركانه زيت او علبه صلصة تلقي الحساب اخر الشهر اكبر من الماهية

الله يعينك واحسن تفتش ليك شغله خاصه ولو سمسمار

Quote: الله يعينك واحسن تفتش ليك شغله خاصه ولو سمسمار

يا صابر انت قايلني ما اشتغلت سمسار
كنت اعمل موظفا محترما في احد البنوك بل كانت تعتبر وظيفة قيادية من الدرجة فوق المتوسطة
وزوجتي كانت teaching assistant في جامعه الخرطوم
تعرف بصل المكتب الساعه ثمانية الصبح لغاية اثنين ظهر امشي أجيب البت من الروضه واجيب أمها وأوديهم البيت وارجع الخرطوم شغال part timer مع صديق في شارع الحرية لغاية خمسة او سته مساء حسب العمل وبعد داك برجع البيت أستحم وامشي النادي عشان زبائن السمسرة بيجوني هناك عارف كنت بسمسر في شنو كنت بأجر شقق شي مفروش وشي بدون فرش وكان عندي شغل موسمي يعني مرة مرة كدة بيجي كنت بستري أثاث بيوت الدبلوماسيين المغادرين وعاوزين يبيعوا عفشهم قبل ما يسافروا وكان عندي سمعه كويسة في المحال دة لأنو كان عندي طريقة اشتري وادفع واصر اخلي العفش في مكانو لغاية بعد الراجل يسافر وكانوا لمن يعرفوا انو حا اخلي ليهم العفش لغاية يوم السفر او بعدة بيوم كانوا ما بيحاججو معاي كتير في السعر وكنت بكسب كويس والحمد لله
دة طبعا غير يوم الإجازة الأسبوعية من بعد صلاة الجمعه في دلالة الصحافة
يا اخوي والله الذي لا آلة الا هو كان البيجي يا قدر الرايح يا اقل منه
شي إيجار
شي بنزين
شي خضار ولحمة وعيش
شي مجاملات اجتماعية ومساعدة الاسرة الممتدة
وشي ملابس
شي رمضان وعيد رمضان وعيد الضحية
يا زول اقول ليك حاجة مرة في شارع الحرية / قصاد المنطقة الصناعية وانا ماشي برجولي وافكر في العيشه فجاءة كدة لقيت ليك نفسي في نص الظلط والعربات والله لي يوم الليلة والكلام دة سنه سبعه وتسعين ما عارف الوداني نص الشارع شنو

عن الراتب ، والماهية ، وظروفها حكاياتها طويلة
ووجعها كبير لمن يدورون في فلكها ،
حكى أحدهم وقال : من الله خلقني والى يومنا هذا ( بتدين )
وعايش على كده ، ذات مره إتصلت به صديق عدة مرات ، لا
يرفع السماعة ولا يقول ، هالو .. ويظل صامت ، قال ،
الى أن عملت له من تليفون أعرف أنه لا يخاف منه
قلت له لماذا لا ترد ، قال كثرة الديانه يأخى محمد
وياريت لو عفو لي زي ما عملت إنت ، قال له : أنا
حقي شوية ، لكن الجماعة حقهم كثير ..! قال
ديل حقهم كثير وأنا مابخاف منهم لأنهم شبعانين
لكن بخاف من الزيكم المقطعين ، قلت له شكراً
طيب ، كدى طمني إنت عايش كيف ، قال بصرف أربعة
والبنك بخصم مني ثلاثة وإيجار الشقة ألف درهم ،
قلت .. طيب تاكل شنو ، قال لى باكل صاحب الشقة

محمد مختار والله اضحكتني (هههههههههههههها)

Quote: حكى أحدهم وقال : من الله خلقني والى يومنا هذا ( بتدين ) وعايش على كده ، ذات مره إتصلت به صديق عدة مرات ، لا يرفع السماعة ولا يقول ، هالو .. ويظل صامت ، قال ، الى أن عملت له من تليفون أعرف أنه لا يخاف منه قلت له لماذا لا ترد ، قال كثرة الديانه يأخى محمد وياريت لو عفو لي زي ما عملت إنت ، قال له : أنا حقي شوية ، لكن الجماعة حقهم كثير ..! قال ديل حقهم كثير وأنا مابخاف منهم لأنهم شبعانين لكن بخاف من الزيكم المقطعين ، قلت له شكراً طيب ، كدى طمني إنت عايش كيف ، قال بصرف أربعة والبنك بخصم مني ثلاثة وإيجار الشقة ألف درهم ، قلت .. طيب تاكل شنو ، قال لى باكل صاحب الشقة

دا تقسيم جديد للماهية
%75 ديون
%25 ايجار
والباقي مجازفات البنك الدولي ما يعرف يحلها

الزبير انت محتاج متخصص ادارة راتب وادارة دخل عام

طيب كيف الحال للناس البتعيش علي ماهية فقط وهي جنيهات

وانت بمصادر الدخل التالية

Quote: كنت اعمل موظفا محترما في احد البنوك بل كانت تعتبر وظيفة قيادية من الدرجة فوق المتوسطة وزوجتي كانت teaching assistant في جامعه الخرطوم تعرف بصل المكتب الساعه ثمانية الصبح لغاية اثنين ظهر امشي أجيب البت من الروضه واجيب أمها وأوديهم البيت وارجع الخرطوم شغال part timer مع صديق في شارع الحرية لغاية خمسة او سته مساء حسب العمل وبعد داك برجع البيت أستحم وامشي النادي عشان زبائن السمسرة بيجوني هناك عارف كنت بسمسر في شنو كنت بأجر شقق شي مفروش وشي بدون فرش وكان عندي شغل موسمي يعني مرة مرة كدة بيجي كنت بستري أثاث بيوت الدبلوماسيين المغادرين وعاوزين يبيعوا عفشهم قبل ما يسافروا وكان عندي سمعه كويسة في المحال دة لأنو كان عندي طريقة اشتري وادفع واصر اخلي العفش في مكانو لغاية بعد الراجل يسافر وكانوا لمن يعرفوا انو حا اخلي ليهم العفش لغاية يوم السفر او بعدة بيوم كانوا ما بيحاججو معاي كتير في السعر وكنت بكسب كويس والحمد لله دة طبعا غير يوم الإجازة الأسبوعية من بعد صلاة الجمعه في دلالة الصحافة يا اخوي والله الذي لا آلة الا هو كان البيجي يا قدر الرايح يا اقل منه

اذا ما الحل ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

صابر .. سلام ..
إنت من زمن ( كيف تدير راتبك ) ...!!؟؟
ياأخي عدل عنوان البوست ( كيف تديرين الراتب )
مافى راجل بدير له راتب ، الإدارة عند الإدارة
( الحكومة المركزية ) ..
ولولا هذه الحيكومة لوجدت الرجال كلهم فى حتتين
سجن أم درمان أو سجن كوبر، وتلقاهم يداروا فضيحتهم
ويقولوا ليك إعتقال سياسي ..!وكلهم يقبضوهم بعد
منتصف الليل راجعين بيوتهم ..!!

فى واحد عمنا كبير عندو بقالة تعبانه ، ناس الضرايب كرهوه
عيشتو ...، دفاتر وإيصالات ما ليها حد ..!! عمك الدنقلاوي
كل يوم عامل شكله مودنو النقطة المهم إتفق معاهم أنو
ماعندو قروش كلو كلو وبعطيهم شوية عرديب وبسكويت وعدس وقنقليس
يبيعوه ... ، وقال ده البفدرو عليه الله .. الجماعة وافقو وبقو
يجيبو كرتونه ويشيلو البشيلوه ، .. بعد مدة
جوه ، قالو له البضاعة دى بقت ما بتنباع ..!! ، الدنقلاوي
قال ليهم قولوا عاع .. واستهدو بالله ..أصبرو شوية ..
مشى البيت لمه الشفع الفى الزقاق والعند الجيران والتحت
العنقريب وأمهم وشحنهم فى بوكسى وجابهم ، وقال لى جماعة
الضرايب .. طيب أها .. البضاعة دى كيف ..

دي اسهل طريقة لادارة الماهية محمدمختار

Quote: مافى راجل بدير له راتب ، الإدارة عند الإدارة ( الحكومة المركزية ) ..

وقصة عمك دي

Quote: عمنا كبير عندو بقالة تعبانه ، ناس الضرايب كرهوه عيشتو ...، دفاتر وإيصالات ما ليها حد ..!!

السودانيين اتفننوا في كيفية الزوقان من الضرائب

ولديهم فنون وحيل، اكبر مدراء الضرائب لا يستطيع ان يكشفها

بس عمك خطير

طريقة 4-3-3هي من أفضل الطرق


خليها لله يا عمو صابر


انت لو قلت تحسبها عمرها ما بتلفق معاك