طرائف تواجه المغتربين السودانيين في مؤسسات السودان

كل الغائبين عن البلد يعرفون مآل حاله وتردي أوضاعه

وعلى الرغم من ذلك، يعودون إليه بين الفينة والأخرى، شوق ليس إلا

.....................

وبالتأكيد كل مغترب، زينا كدى، قاعد تلاقيهو محن ومصائب في فترة الإجازة أو ما شابه


هذا البوست نافذة لي أي واحد مغترب واجه مثل هذه المواقف


أنا واقعة على واحدة جديدة كرت

كلما الواحد يتذكر البلد عويناتو يرقرقن، ويفكر في الرجعة وقبل ما يتخذ القرار، تجيهو حادثة تأكد إنو
(جربوكس) السودان بقى فيهو ترس الخلف بس، ومدردك مااااشي مافي البقرعو.
بالأمس (الغريب) وليس القريب، بدأ أحد أقربائي جزاه الله خيراً، في مهمة توثيق قسيمة زواج، والأمر
في نظري سيكون عادي لن يواجه فيهو أي مشكلة سوى صرف الزمن (ده باعتبار المواصلات والزحمة
وفطور الموظفين وكده). وبحسب خارطة الطريق المرسومة، يبدأ التوثيق بختم مجمع المحاكم التابع
للمحلية، وبالفعل ذهب إلى هناك ووقف أمام الموظف المسئول، وقدم معاملته، نظر إليها الموظف
وقالو،،،، وين الزول دا؟ الزول ياتو؟ الزول الفي القسيمة دا؟ قصدك فلان؟ آي؟ ...... الراجل دا
في الأمارات ورسل لي الورقة دي عشان أوثقا وأرجعا ليهو عشان شكلو عندو بيها موضوع هناك. ....
موظف الجن دا قال شنو...... (بس لازم يجينا بي نفسو)... معقولة بس!!! ولدنا طبعاً بعد سمع الكلام
دا طلع بدون ما يقول أي حاجة (طبعاً لو شاكلو ممكن تاني يكاجرو، مش دي سايدة في السودان)،
المهم ضرب لي تلفون مستغرب، طلبت منو أن يعود له مرة أخرى ويحاول إيجاد مخرج آخر،
وبالفعل وجد المخرج التاني رد الموظف... (ياخوي ما توجع راسنا من الصباح.... أنا ممكن أقبل منو
توكيل بي إسمك خليهو يعملو ويرسلو أو يركب الطيارة هنا غير كدي ما تجيني). برضو دورنا نقة
تاني، خلصنا إلى أن نتصل بالمأزون، وضربنا للمأزون، وطبعاً عشان تعرف تلفون المأذون، دي
براها كانت معمعة لي ساعات وصرف تلفونات وبطيل شغلة،،، ولمينا في ماذون السناحي،،،، هو
برضو راسو إتملا في القصة وقال يدوهو الموظف في بالتلفون،،،،،، يا أخي الدفتر أصلا 3 نسخ،
نسخة موجود عندك في الدفاتر الموجودة في الأرفف الوراك دي، مأرشفة بالشهر والمناطق أمشي
جيب الدفتر وطلع النسخة حا تلقاها متطابقة مع الجابا الزول دا وأنهي ليهو الموضوع.... النتيجة
الموظف سمعلك زولي ألحان ونغمات جديدة،،،،،،، قالو كيييييييف تجب لي المأزول في التلفون
إنتو دايرين تورونا شغلنا ولا شنو، أطلع بره.... سمح طلعنا برة. بعد ما جاني بالقصة طلبت
منو يضرب لي ويديني ليهو أتكلم معاهو، وفكرت في التوكيل وبالفعل طلعت من المكتب ولغيت
يوم شغل ودورت في طريقي للقنصلية في دبي. في الطريق قريبي ضرب لي قال الناس ديل طلعو
الفطور خلهن يرجعو بس، هنا أنا في الزحمة لحدي ما وصلت القنصلية ووقفت وتكلت المقعد
ورخمت،،، يوم باين من أولو بدأ ملخبط لازم ننوم، بعد ساعة ونص فطور رجعو وزولي ضرب
لي يضحك قال لي، الزول دا بعد جاء مشيت ليهو في المكتب قال لي أمشي ياخينا أدفع وجيب
ورقتك البقت لينا شوكة حوت دي. بالله عليكم يا جماعة دا منطق موظفين دا، الموظف دا معناها
ما عارف أي حاجة عن الوظيفة الختوهو فيها دي، يعني أنا أمشي أشيل جوازي وآخد إجازة
10 يوم على الأقل (عشان مع القصة دي بتجي قلل تانية) وأحجز واركب الطيارة وأنزل
في المطار وأمشي للموظف دا وأقيف قدامو وأقولو أنا سيد الورقة الجات للتوثيق وهو يرد يقو
جيب بطاقتك حتى بعد داك يمشي يجيب الدفتر من الرف ويختم، دا منطق شنو دا؟؟؟؟


..................

تخريمة: آخر سفرة لي جيت في المطار مغادر وسلمت الجواز والتذكرة للموظفة بتاعة الخطوط... مسكت الجواز وقالت لي إنت جيت متين؟؟؟

الغريب إنو لمن سألنا من مديرو عشان نحتج، قالو الزول

بتاع التوثيقات دا ما عندو إي وجيعاً تشكوهو ليهو

تراهو يعني بالواضح ما تابع لي أي إدارة في المجمع دا

ونصحونا نصيحة سمحة خلاس ....... قالوا أمشو حاولوهو تاني!!!!

.

جلال سلامات بوست سيمتد الي كثير من الصفحات والطرائف
كنت انا وولدي في اجازة في القاهرة وفكرت اختف رجلي للخرطوم انا وولدي نقضي اسبوع ونرجع مشيت السفارة السودانية اطلب تاشيرة دخول للسودان جوازي هولندي وجواز ولدي امريكي وعمره 6سنوات الضابط عاين لي كده وقال لي مابندي امريكان تاشيرة المعاملة باالمثل واداني فيها محاضرة وبعد اخذ ورد وانو طفل وماشي يشوف حبوبته غير رايه ودفعني 250 دولار للجوازين وبدون ايصالات.
بلد ماسة امفكو وموظفيين خلقوا ليعذبو المواطن لا لخدمته

Quote: كلما الواحد يتذكر البلد عويناتو يرقرقن، ويفكر في الرجعة وقبل ما يتخذ القرار، تجيهو حادثة تأكد إنو (جربوكس) السودان بقى فيهو ترس الخلف بس، ومدردك مااااشي مافي البقرعو. بالأمس (الغريب) وليس القريب، بدأ أحد أقربائي جزاه الله خيراً، في مهمة توثيق قسيمة زواج، والأمر في نظري سيكون عادي لن يواجه فيهو أي مشكلة سوى صرف الزمن (ده باعتبار المواصلات والزحمة وفطور الموظفين وكده). وبحسب خارطة الطريق المرسومة، يبدأ التوثيق بختم مجمع المحاكم التابع للمحلية، وبالفعل ذهب إلى هناك ووقف أمام الموظف المسئول، وقدم معاملته، نظر إليها الموظف وقالو،،،، وين الزول دا؟ الزول ياتو؟ الزول الفي القسيمة دا؟ قصدك فلان؟ آي؟ ...... الراجل دا في الأمارات ورسل لي الورقة دي عشان أوثقا وأرجعا ليهو عشان شكلو عندو بيها موضوع هناك. .... موظف الجن دا قال شنو...... (بس لازم يجينا بي نفسو)... معقولة بس!!! ولدنا طبعاً بعد سمع الكلام دا طلع بدون ما يقول أي حاجة (طبعاً لو شاكلو ممكن تاني يكاجرو، مش دي سايدة في السودان)، المهم ضرب لي تلفون مستغرب، طلبت منو أن يعود له مرة أخرى ويحاول إيجاد مخرج آخر، وبالفعل وجد المخرج التاني رد الموظف... (ياخوي ما توجع راسنا من الصباح.... أنا ممكن أقبل منو توكيل بي إسمك خليهو يعملو ويرسلو أو يركب الطيارة هنا غير كدي ما تجيني). برضو دورنا نقة تاني، خلصنا إلى أن نتصل بالمأزون، وضربنا للمأزون، وطبعاً عشان تعرف تلفون المأذون، دي براها كانت معمعة لي ساعات وصرف تلفونات وبطيل شغلة،،، ولمينا في ماذون السناحي،،،، هو برضو راسو إتملا في القصة وقال يدوهو الموظف في بالتلفون،،،،،، يا أخي الدفتر أصلا 3 نسخ، نسخة موجود عندك في الدفاتر الموجودة في الأرفف الوراك دي، مأرشفة بالشهر والمناطق أمشي جيب الدفتر وطلع النسخة حا تلقاها متطابقة مع الجابا الزول دا وأنهي ليهو الموضوع.... النتيجة الموظف سمعلك زولي ألحان ونغمات جديدة،،،،،،، قالو كيييييييف تجب لي المأزول في التلفون إنتو دايرين تورونا شغلنا ولا شنو، أطلع بره.... سمح طلعنا برة. بعد ما جاني بالقصة طلبت منو يضرب لي ويديني ليهو أتكلم معاهو، وفكرت في التوكيل وبالفعل طلعت من المكتب ولغيت يوم شغل ودورت في طريقي للقنصلية في دبي. في الطريق قريبي ضرب لي قال الناس ديل طلعو الفطور خلهن يرجعو بس، هنا أنا في الزحمة لحدي ما وصلت القنصلية ووقفت وتكلت المقعد ورخمت،،، يوم باين من أولو بدأ ملخبط لازم ننوم، بعد ساعة ونص فطور رجعو وزولي ضرب لي يضحك قال لي، الزول دا بعد جاء مشيت ليهو في المكتب قال لي أمشي ياخينا أدفع وجيب ورقتك البقت لينا شوكة حوت دي. بالله عليكم يا جماعة دا منطق موظفين دا، الموظف دا معناها ما عارف أي حاجة عن الوظيفة الختوهو فيها دي، يعني أنا أمشي أشيل جوازي وآخد إجازة 10 يوم على الأقل (عشان مع القصة دي بتجي قلل تانية) وأحجز واركب الطيارة وأنزل في المطار وأمشي للموظف دا وأقيف قدامو وأقولو أنا سيد الورقة الجات للتوثيق وهو يرد يقو جيب بطاقتك حتى بعد داك يمشي يجيب الدفتر من الرف ويختم، دا منطق شنو دا؟؟؟؟

فى( سودان اليوم) تصرف الموظف طبيعى ولا يثير الدهشه - كما أنه لم يقصد حضورك حرفياً بل

قصد حضورك مالياً - لكن زولك عكليته عمل ما فاهم - وأخيراً الموظف زهج منو ومشاهو

عشان يشوف البعده -- يمكن يفهم ويدخل يده فى جيبوا

ياخ نشفتوا ريق الموظف ( إن شاءالله أصلوا ما يتبل)

مشيت اطلع الرقم الوطني سألوني وين شهادة الميلاد قلت ليهم ضاعت قالوا لازم تمشي تطلع بدل فاقد وتجي مشيت لناس شهادات الميلاد قلت ليهم أنا مولود يوم كدة شهر كدة سنه كدة في المستشفي الفلاني وشهادتي ضاعت عاوز بدل فاقد قالو لي لازم في اي معامله تجيب شهادة الرقم الوطني

Quote: مشيت اطلع الرقم الوطني سألوني وين شهادة الميلاد قلت ليهم ضاعت قالوا لازم تمشي تطلع بدل فاقد وتجي مشيت لناس شهادات الميلاد قلت ليهم أنا مولود يوم كدة شهر كدة سنه كدة في المستشفي الفلاني وشهادتي ضاعت عاوز بدل فاقد قالو لي لازم في اي معامله تجيب شهادة الرقم الوطني

دي يا الزبير ملتني ضحك من الصباح غلوتية راسة عديل

بس ما وريتنا الحصل شنو بعد داك؟؟

Quote: ياخ نشفتوا ريق الموظف

أسامة ياخوي موظف زي دا ريقو شبعاااان ورايق

Quote: جوازي هولندي وجواز ولدي امريكي وعمره 6سنوات الضابط عاين لي كده وقال لي مابندي امريكان تاشيرة المعاملة باالمثل واداني فيها محاضرة

حافظ سلام

مش كويس ما احتقلوكن؟


ودي وشكراً للمرور

Up here

جلال يا اخوى
امسك فى كلام جانبو اسامة الكرور ده قوى

زولك ده غلطان وستين غلطان كمان
ولاحظ المعاملة ما خلصت الا بعد الزول ده مشى فطر وجا

زولك ده لو كان غمت ليهو عشراية فى نص القسيمة يمكن كان عزمو معاهو فى الفطور بتاعو ده بعد يخلص ليهو امورو ، بإعتبار نعزمك بى حقك وكده

تانى بالله لمن تكون عندك حاجة زى دى ، وصى زولك البترسلو ـ لو مشى محل قبل الفطور لازم يغمت عشان ينتهى سريع
ولو مشى بعد الفطور يكون شايل معاهو صبارة شاى يخليها ليهو ويتخارج


السودان ظريف بس داير المصاريف

دمت رايق

Quote: جلال يا اخوى امسك فى كلام جانبو اسامة الكرور ده قوى

كلام أسامة يا هيثم الناس كلها مدورابيهو لكن زولي مستبعد الشغلانة ضنيتو



تحياتي

Quote: دي يا الزبير ملتني ضحك من الصباح غلوتية راسة عديل بس ما وريتنا الحصل شنو بعد داك؟؟

والله يا جلال يا اخوي أنا زاتي لمن قالو لي كدة قعدت اضحك لغاية الراجل استغرب سألني مالك يا زول حكيت لية الحكاية أتفهم وقام بنفسة جاب لي استمارة مليتا مشي بنفسة صدقها وجاب لي الشهادة

تحياتي

صوره مختلفه

من الحاجات الجميله برضو ولازم الاشاده بيها...ذهبت مره لقسم الأراضي بإمتداد الدرجه التالته...سلمت على الموظف وقلت ليهو عاوز أطلع شهادة بحث من أجل التأكد ...اداني فورم مطلوب فيهو بيانات القطعه ..وبياناتي وبطاقتي .قال لي اتفضل أجلس..بعد شويه ناداني وقال لي أمشي ادفع الرسوم هناك ..بكل سهوله ..إنتظرت بعد داك حوالي 20 دقيقه ...نادى موظف آخر بإسمي...استلمت الشهاده بكل سهوله وانا غير مصدق ..كنت عامل حسابي إن اليوم كلو يضيع في الموضوع ده..

الحاجه الوحيده المزعجه هو وجود بعض سماسره الأراضي ..عايز تبيع ؟؟يجب على إدارة القسم التخلص من هؤلاء..

لهم التحيه ولكم أيضا

Quote: ن الحاجات الجميله برضو ولازم الاشاده بيها...ذهبت مره لقسم الأراضي بإمتداد الدرجه التالته...سلمت على الموظف وقلت ليهو عاوز أطلع شهادة بحث من أجل التأكد ...اداني فورم مطلوب فيهو بيانات القطعه ..وبياناتي وبطاقتي .قال لي اتفضل أجلس..بعد شويه ناداني وقال لي أمشي ادفع الرسوم هناك ..بكل سهوله ..إنتظرت بعد داك حوالي 20 دقيقه ...نادى موظف آخر بإسمي...استلمت الشهاده بكل سهوله وانا غير مصدق ..كنت عامل حسابي إن اليوم كلو يضيع في الموضوع ده..

حقيقة يادكتور في مواقف إيجابية موجودة في عدد من دواووين الحكومة ودا طبعاً ، حسب رايي الشخصي، سببو الإدارة

لأن تنظيم العمل وفرض ضوابط محددة على الموظفين، مصدرها الإدارة ومدى قدرتها على تمرير القرارات


لك التحية يا دكتور الصادق

Quote: حكيت لية الحكاية أتفهم وقام بنفسة جاب لي استمارة مليتا مشي بنفسة صدقها وجاب لي الشهادة

بركة الإتفهم الموضوع غير كدي المشكلة مابتتحلا أصو والمفروض تكون لافي بدون ترخيص لليلة


هسي يعني رخصة المدور معاك تب؟