وهمة الاتصالات

في برنامج مساء جديد علي النيل الازرق قبل قليل كان جزء من الحوار حول الموبايل وهوس الجميع باغتناء افضل انواع الجوالات رغم فقر الكثيرين الا ان الجوال " الصيحة" يعتبر لازمة اساسية لكل الشباب , كان المستضاف جمال حسن سعيد الشاعر والممثل المعروف , في خضم الحوار وردت معلومة تقال علي يقين من قبل احد الذين اجري معهم استطلاع ورددتها المذيعة المقدمة للبرنامج بكل ثقة في ان السودان في مجال الاتصالات افضل من الامارات بل افضل من امريكا , قبل سنوات ترددت نفس المعلومة التي يسوق لها السودانين انه في برنامج من سيربح المليون كان هناك سؤال حول افضل دولة في العالم في مجال الاتصالات وكانت الخيارات هي امريكا والامارات والسودان ودولة اخري , ويقول السودانين ان الاجابة الصحيحة هي السودان !! لا ادري عن دقة وصحة هذه المعلومة التي تردد كل حين ولكن بالرجوع الي محركات البحث وجدت الامر بخلاف ذلك :

وجاءت الدول العشر الأولى مرتبة كالتالي:

1 السويد 7.95

2 الولايات المتحدة 7.77

3 النرويج 7.74

4 الدنمارك 7.54

5 هولندا 7.52

6 فنلندا 7.26

7 استراليا 7.04

8 المملكة المتحدة 7.03

9 كندا 7.02

10 اليابان 6.73
http://www.aleqt.com/2010/02/11/article_348191.html

الإمارات في المرتبة الاولى عربيا والرابعة والعشرين عالمياً في ترتيب "التقرير العالمي حول تكنولوجيا المعلومات 2010-2011"
http://www.accemagazine.com/article.php?categ...yID=23&articleID=373
دي وهمة في شكل وهمة فكوها فينا وصدقوها

سلامات يا أساسي

ما قاعده افهم كتير في تكنلوجيا الاتصالات. لكن بحسب عيشتي في السودان و أمريكا. فممكن أقول ليك في السودان في وقت كانت فيه الاتصالات عبارة عن زيرو كبير. لكن اتبنت شبكة ( في وقتها كانت) من أحدث الشبكات. لانها اتبنت من لا شئ. احتمال في الوقت داك السودان كان عنده واحده من أحسن الشبكات.
في أمريكا شبكات التلفون موجوده و شغالة و في حالة تجديد متواصل. لكن بحكم المساحة ح تلاقي مناطق فيها آخر تكنلوجيا في الدنيا و مناطق لسه شغالة بتكنولوجيا ليها سنتين او اكتر.
الخلاصة، موضوع الاتصالات ده احتمال كان صح في غفلة من الزمن. الآن ؟ ما أظن.

سلامات يا اساسة ؛)
هي وقفت على كدة
لو قسناها بالبنتريشن ما ممكن يكون السودان افضل ولو قسناها بالتكنولوجيا برضو ما ممكن لانو الجيل التالت يادوب شملت مناطق برة الخرطوم والجيل الرابع يادوب السنة دي
من ناحية الاسعار بتاعة الاتصالات ممكن قياسا بالاقليم البيقع فيهو السودان تكون اسعار السودان احسن بس كمان في اسعار الانترنت لسة ،،
عموما وهمة على قولك

سلام يا أساسي

في الزمن الطلعت فيهو (الوهمة) دي كان ممكن بمقياس المساحة المغطاة واتساع الشبكة

بمعنى أن أي حتة في السودان كان فيها خدمة جوال وتتوفر فيها شبكة مقارنة بباقي الدول

كان السودان في بدايات الالفين بدا مشروع الاتصالات بتقنية FTTH وهي تقنية الالياف البصرية والخدمة هنا عبارة عن كيبل يقوم بتوصيل التلفون ومعة الانترنت والتلفزيون .....السؤال في المسابقة كانت الاجابة السودان ولكن المعلومة التي لايعرفها الكثيرين ان المقصود بالاحدث اي الاقصر عمرا وهكذا التقط هؤلاء القفاز واصبحوا بحكم عقدة النقص المتاصلة يروجون المعلومة الخطا.....هناك لستة كبيرة من هذة الانجازات الوهمية تتنتشر بسرعة ولكن الشيخ قوقل بالمرصاد لكل هذة الترهات ....

السيد اساسي .. سلامات

صحيح زمان السودان كان متقدم على دول كتيرة
في مجال الاتصالات بامتلاكه اطول كيبل
الياف ضوئية عابر للمياه الدولية والاقليمية
لكن الان لا ادري مدى تراجع في ظل لتطورات
والامكانات التي تتمتع بها الدول الاولى

بخصوص جورج وبرنامجه فصحيح ما
يردده الناس .. وكان المتسابق خليجي
واول محاولاته كان استبعاد السودان من
قائمة الخيارات .. وقد خسر وقال جورج
ان الاجابة الصحيحة هي السودان
‏
وبتجاربي في السفر خارج السودان
صراحة الاتصالات في السودان ارخص من
دول كتيرة جدا .. والخيارات متعددة
وكل شي متعلق بالاتصالات متاح في أي وقت
تخيل الشريحة في السوق العربي ب50 قرش
وفيها رصيد مجاني 2 جنيه!!

الموضوع تقريبا كما قالت سمارت له علاقة بتوقيت انشاء الشبكة و الجيل الأحدث - حينها - من الأجهزة المشغلة و الحديث عن الـ جي اس إم في الغالب
يعني زي الموبايلات وكل جهاز يعتبر أحدث من الجهاز القباله يعني ممكن واحد يادوب عرف الموبايل السنة دي واشترى جلاكسي اس ثري طبيعي حيكون شايل جهاز احدث من الزول الليه خرتمية سنة بستخدم آي فون 3 و عاجبه وما عايز يغيره
لكن لو اتكلمنا عن السيرفس ككل بدءا من نقل الصوت و البيانات و جودتها مرورا بعوامل مثل توفر و انقطاع الخدمة و التغطية و نوع الخدمات الإضافية و أهم من دا كله خدمة العميل فيستحيل يكون السودان هو الأحدث - أو الأفضل - وسط دول و شركات مثل اتصالات الإمارات و موبايلي

الأخ أساسي

تحياتي - يبدو أن المعايير التي نتبعها في قياس مدى تطور أو تأخر خدمةٍ ما هي مرتبطة بالبيئة المحلية الصرفة ولا نأخذ كافة العوامل الموضوعية . ولعلنا دوماً نتكئ على ما نرغب فقط.

بحيراوي