لحى الله الحيًان من أونلاين وفورآول ..

"السمت الجاهلى للعنوان مقصود لمقاربة هذا المشهد الغريب
وحتى أن الخط الكوفى لو كان حاضراً لحضر
هذا إن جازت عليه الجاهلية ولكن !"

هل كان حسن موسي يحاول موقفا عبثيا ما ؟!
لست أدرى ولكن
"لو لم يكن لأي شيء معنى، لكان ذلك صحيحا" *

سعدت جدا برؤية "تصاوير كما يسمونها" لحسن موسي فى العام 2010 ..
فهو رسام مهول بحسب جهلى بتفاصيل هذه الأشياء ..
ولقد خلفت "تصاويره اثراً ما فى نفسي, وأعنى أثراً قوياً فى حقيقة الامر,
فما زلت اتشيأ وبصورة غامضة تلك التصاوير كلما اصابنى شيئاً من الحنين ومثله من تلك المكابدات الإنسانية الهيٍنة
هذا وإلى جانب ذلك تتبعت بعض كتاباته فى موقعه المعروف "سودان فورآول" ..
ولعله ليس صاحب المكان وإن بدا لى ذلك بالفعل من جراء الصلف السلطوى فى الكتابة ..
بيد انه صلفا محمودا على اية حال, لا دبابة فيه او مسدس والحمدلله ..

هذا عن الرسام حسن موسي وحتى ندوة أقامها بنويورك, ندوة خارج المعاقل الإسفيرية للسلطة الموسوية
تتبعت شيئا منها من خلال فيديو لأخينا الهجام ..
ومناقشة جيدة للزميل السنارى خالفته فيها كما أذكر فى مسالة ما و ..
وإنتهى الأمر ..
ببساطة شديدة إنتهى الأمر ..
واعنى امر تلك الندوة ..
ندوة أقيمت فى نيويورك وفى أمر هذا الوطن الذى ننتمى إليه أهوالاً وفظائع كثيرة ..
فى ناس بتموت عديل كده و بالمجان وناس بتنهب وناس بتهاجر وعييييييك و ..
تماما كما يشير عزيزي بشاشا لقارئه العزيز بدوره ..
ببساطة إنتهى أمر تلك الندوة ولم ينتهى كما يترائي الآن ..
يبدو ان فرصة إعادة إنعاشها فى الصدور من جديد كانت مؤاتية ..
ويبدو ان احدهم يحب ركوب الموجات ..
وهكذا اصبحت الندوة مادة للتداول الأسفيرى العنيف وحتى إنحسارها الطبيعى جدا ..
والذى - وبدوره- لو لم يصادف موسماً نزقاً جدا من مواسم سودانيزاونزلاين ..
لتاهت سيرة حسن وندوته ورسوماته كثيرا ..
قبل ان يقيض الله لها رزقا تسعى به من جديد فى مستقبل الندوات عابرة القارات تلك

يتبع ..

تغنى فيروز فى دبكة تلامس القلوب:
كان الزمان وكان فى دكانه بالفى ..
وبنيات وصبيان نجى نلعب ع المى ..
يبقى حنا السكران , قاعد خلف الدكان
يغنى وتحزن بنت الجيران .
.
والدبكة كما تقول الويكيبيديا جزاها الله عنا خيرا
Stamping of the feet
وللدبكة "رأس" يقودها وبيده المنديل او المسبحة يشير بها ..
وفى خطواته تسعى "المرجلة"
(وهذه إضافة منى للويكيبيديا جزانى الله عنها خيرا ان شاء الله)

وللمرجلة هذه مفردة تقابلها فى عاميتنا السودانية وهى "الرجالة"
وهى لفظة موغلة فى معانى كثيرات ..
وجميعها تكاد تكون حميدة الا عند تكريسها للذكورية عندما يكون مقامها مقابلاً للوعى ..
والأخيرة هى ما دغدغ بها حسن موسي ديار اونلاين عمداً ..
حين تواترت نحوه الإشارات التى حملها الإسفير وذاك "الونس" الممارس جهراً..
ليحجل فردا احدا فى دارة الرقيص على انغام " الوسيم القلبو رادو" ..
وعلى إمتداد منبرين ..
وعلى كثير من الاوجاع الوطنية الكبيرة ..
وماله لا يحجل ؟!
ففى نهاية الامر لن يقال الا : لم يكن يرسم وعيًه بالاشياء, بل يرسم وعى الآخر!
وما زالت الدبكة مستمرة ..
و"الراس" يلوح بمنديله و .. يحجل

* عبارة قالها البير كامو ..
وهو الذى قال فيما يكتب انه كان يحب العدالة جداً ولكنه يفضل إنقاذ والدته اولاً ..
يبدو ان تشبيه هذا المشهد بالعبثى إجحاف كبير بالعبثية وأخلاقها ..

ذو العقل يشقى في النعيم بعقله
وأخو الجهالة بالشقاوة ينعم
لا يخدعنك من عدو دمعه
وارحم شبابك من عدو ترحم
لا يسلم الشرف الرفيع من الأذى
حتى يراق على جوانبه الدم
والظلم من شيم النفوس فأن تجد
ذا عفة فلعلة لا يظلم
ومن البلية عذل من لا يرعوي
عن غيه وخطاب من لا يفهم
ومن العداوة ما ينالك نفعه
ومن الصداقة ما يضر ويؤلم
.
.
المتنبي في إحدى تجلياته..
والتحية سابقه.

ويبدو المتنبى حاضر كما قلت يا محمد الملك

"لحَى الله ذي الدّنْيا مُناخاً لراكبٍ .. فكُلُّ بَعيدِ الهَمّ فيهَا مُعَذَّبُ"

ليته التحف قليلاً من العبثية ليحجل بدوره ..
فقد كان -رحمه الله- بعيد الهم ..
أو ذلك هو ما فى حدود وعيه على أية حال !!..


أو لعله لم يكن وسيما يا محمد !..
ما نقعد نتمنى على الرجل عبثية لا صالح له فيها ساكت !! ..

فيما يختص ب "العومنة"

وفيما يختص هذه مما يختص به زميلنا معاوية الصائم ..
وعرفت مؤخراً أنه أخطأ فى حق الزميل العزيز ود البشري وكما يحلو لى الخطأ فى الكتابة ..
لم أهتدى لما حدث رغم المحاولات المتأخرة ولاكن .. يبدو أن الخطا كان عظيماً

وأما "العومنة" اعلاه .. فلا أجد لها سنداً عدا الفجاءة التى باغتتنى ..
وللفجاءة هذه قصص كثيرة ..
اطرفها ما ذكر عن "تبارك" عن جريدة حائطية فى إحدى المحن السودانية كتبت ما مفادة أنها تصدر فجأة ..
الأمر الذى أضحكنى كثيراً ..
والله صحى !!

فى سنوات التيه الوطنى ..
شق المثقفون السودانيون –فى أغلب احوالهم- لذواتهم طريقاً مختلفاً عن تراكيب المجتمع السودانى ..
ذلك ان "النفس الطويل" لصراع التغيير الحقيقى ما كان متوافراً ..
والتغيير الحقيقي والذى يتحرك من الواقع الإجتماعى بدا عسيراً وصعب المنال ..
فكان هذا بالإضافة لشيء من الزيف فى النوازع المادية سبباً لإرتقاء سلالم سهلة ..
تبدأ من عتب المطارات وحتى عتبات هذا الإسفير الفارهة..
مجداً لذواتهم العليا ..
وتكريساً للألوهة الصغيرة التى تحجل فى صدورهم إزاء الناس ..
ناسهم ولحمهم ودمهم ..
تركوهم وقالوا عليهم عامة ..
عامة يا لويس العاشر عشر !!

تلك هى العومنة ...

Quote: عامة يا لويس العاشر عشر !! تلك هى العومنة ...

-------

لولا وجود عوام .. لما كان لـ(صفوة) معنى اساساً
وبي السيرورة وقوانين الديالكتيك العوام ديل زاتم الح ينسفوا اي (وجود) لصفوة ما

وشوف عنين العالم التحتاني نهض تاني ..هيلاهوب .. وهد عمايد الفوقاني

وهكذا

تعرف يا قيقراوى !..

الواحد لمن يعمل تفاكيرو العمومية فى الحاصل ده وكأنو يبعثها فى الجحيم..
والله صحى !!!

هل هذه نخبة الشعب السودانى المعقود على نواصيها التغيير ؟!
تسمع الاسامى تقول بس ياهم ..
تدخل تلقاهم راسمين كدايس مفنوسة للشمار!!

لويس العاشر عشر الليلة افلس عديييل كدا!


























-------

الخوف انو يكون مصدق انو الهبالة العملا مع ملاسي مضحكة!؟

تعرف يا صديقى !
دائرة ردود الأفعال دى دائرة لئيمة جدا ..
وسيخسرها حسن موسي بجدارة !!!

سلام
أسمحو لينا بوجهة نظر ... رسوميه أولآ

نوبودي إز بيرفكت يا كسر الله .. نو بودي!








-----

وهكذا

عصام جبرالله حبابك عشر ..

وقد يكون ذلك بفعل (الزرًة) .. لا أعلم بالتحديد والله يا صديقى ..
الشاهد فى الامر ملاحظة الهوة السحيقة التى تباعد مابين النخب السودانية والمجموع الكبير للشعب السودانى, ولعلها هوة قديمة كان من شأن هذه الثورة التواصلية ان تجسرها ولكن, يبدو -وبصورة مدهشة جدا- ان السادة النخبة يحاولون تكريسها أكثر.. وهنا يكون السؤال: لمصلحة من ؟!
لمصلحة الديمقراطية ؟!!
وهل تكون فاعلية المنبر الديمقراطى فى تكريس "صوالينية" النخبة ؟!
ليتواصلوا فيما بينهم بصورة أفقية ومن بعد ذلك لا يكون التواصل مع العامة الا بالتجليات ..
ده يا عصام طقس ربوبى بإمتياز ..
فأى ديمقراطية تلك التى يتنزلون إليها بالتجلى على جموع العامة؟!..
دى فكرة خيالية يااخى !!
السودان ده بلد عجيب جدا و.. مسكين
والله صحى !!

قيقراوى يا نديدي فى البال المشترك والمزاج ..

وأنا أكتب لعصام الرد أعلاه قفزت أنت لبالى والله ..
أنت وسناء خالد وشيراز و ..

تذكر يا فتح الرحمن الاثر الكبير جدا لعاطف خيرى فى الناس أواسط التسعينيات ؟!
وكذلك الصادق وعثمان وتاج السر و غيرهم ؟!
جعلوا الشعر يمشي بين الناس ..
يخالطهم فى ونساتهم وخلطاتهم وحتى أركانهم السياسية ..
كان جدارا شاهقا جدا إزاء السخف الإعلامى للانقاذ ..
إستعصم به الناس نحو تأكيد أن الشخصية السودانية أجمل من ذاك العته الرسمى الممارس ..
والشعر بدوره تجلى للمعانى فى الناس يا صاحبى ..
بيد أنه كان إنسانياً جداً..
كان تكريسا للانسنة مقابل الغيهب السياسي نحو السماء ..
هذا ويطالب بمزيد من الطين كمان!!..
وفوقها عزومة, شفت كيف !!
"وأنزل مسافة تهبشك غنوة وأناولك كاس"

نحتفى جدا بالإبداع إذ يمشي بيننا يا قيقراوى ..

الله يخلي زلابيا الجسر الهوة البينا وبينك
لي يومين مصاقر بوستك دا وعاكف علي طلاسمه وانتهيت الي اني لم اؤتى من علم العوام الا قليلا
الي ان هيأ الله لنا من لدنا قيقا يورينا انك ضمن فريق الهتيفة زيك وزينا لا كما طاف بخيالي في انك صفوة فريق المحترفين






ما شايف اي مُبر ر لمنع اشتراك منبر الصفوة عنك الا بت اللذينا الشعيرية ما بتدي حريف

محمد المشرف تحية وسلام و احترام

-----------

أساسي ... اعترف انك كنت بتجي الطيش في المدرسة ..او بتاع بخرات تديك دفرة ما قبل الطيش :-)

أساسي ..
كيفك وكيف كيفك آ صديق ..

وسآتيك بأخبار كنت أنت فى تفاصيلها ..
فأمهلنى ريثما أعود ..

رشا سلام ..
رفقاً باخينا أساسي فإنه غضوب ..
هسع يفتح ليك بوست مع الاربعين مداخلة بى صفحة هذه الأيام..
عشرة صفحات ما بتحلك !!
والله صحى

طيب جميل ننتظر ما هو آت من سير واخبار بس سالتك كان تشفرها لي بالسمت الجاهلي والدبكة انت عارف اخوك براااحة في الوكيبيديا دا لو كتبتها صاح اصل النصيبة دي
وبرضو من باب سد زرائع شماتة ابلة رشا فينا

والله يا محمد انا فهمي اسوأ من فهم برناردشو اساسي .. و بعجبني عاطف خيري .. مع اني بقعد في القصيدة اسبوع .. و بسمع اغاني حبشية و تركية و بستمتع اوي اوي .. رغم انو لغتي التانية فرنسي زي قيقا بلدياتي ^__^ (طبعا الوش دا كيتن فيهو)

------------
اساسي 14 سنة خدمة في ثانوي .. و غالبك تفهم ود المشرف ^____^؟

يا اساسي
محمد المشرف هنا و هناك و هذا أمر لا علاقة له بصفوة او عوام إن هي الا منابر منبرناها للناس لعلهم يتذكرون.
لكل منبر منها قوانينه و ادارته و ثوابته و استايله و قراءه و محبيه و هلمجرا.

كنت سأكتب عن فاعلية المنبر فى مخاطبة حاجات الناس يا أساسي ..
والديمقراطية حاجة ملحة جدا فى إعتقادى ..
مع أخذ الفاعلية صوبها ك independent variable ما بين الاونلاين والفورآول ..
او حاجة قريبه من كده ..
مع ملاحظة انو ممكن يكون فى زول فاعل جدا فى حراك ما لكن ما عن طريق منبرو ..
نتحدث عن فاعلية المنابر ..
وخصوصا تلك التى يجب أن تحق "شيل الإسم"* ..
فالديمقراطية ليست ديباجه والسلام ..

..
لا تعليق على رؤيتك لما يجب أن تكون عليها طريقة كتابتى ولاكن..
نجتهد قدر ما نقدر على توصيل الفكرة ..
مرة توصل ومرات تجلى منك واقفه ..



* غايتو نحن والحمدلله حقينا الإسم تمام.. واعنى " المنبر العام"

صباحاتك بيض يا مشرف
تابع الرسم بالكلمات .... فالبلاغة لغة هي الوصول لاشباع الفضول ..
ولنا عودة بإذن الله

أستاذنا محمد مصطفى ..
د. سيف النصر ..

تحياتى وتقديري لكما وشاكر المرور الجميل ..

وصحيح ما قلت يا سيف ..
لكل منبر قوانينه ولوائحة وحتى أهدافه..
ومنبر فورآول قد يتميز بالرؤية الواضحة فى مسالةإعلاء القيم الديمقراطية وبحث تفاصيلها نحو المجتمع السودانى .. ودلالة الإسم تشير لذلك, وذلك إلزام لو يعلمون عظيم ..

لالا عليك الله ارطنا بالعربي البتعرفو مداخلتك الوعدتني بيها وربنا يعين المجسرين علينا
ليس لي رؤية حول ما يجب ان تكون عليه حاجاتك
بس كمان رأفة بالديالكتيك


-------
يا دكتور سيف النصر ... الخ علي قول دينا بيرفكت
يبدو ان هجرتك لدنيا تصيبها مثلها وهجرتك لمنبر صفوة تناجيها ابعداك عن استيعاب اشواق العوام وشفراتهم
هههههه
نو بودي از بيرفكت

رشا يا قريبتك

نو صم دان لا ميم كلاس

انا و المشرف ... والله صحي!














----------

مش قلتي سغافتي لو فغانسي؟

صراحة دي المتذكر ا من الكتاب.. الا عمك قوقل ليهو قول:

Nous sommes allés à la même classe

أى ديالكتيك ؟!!
و .. أرطنا دى من رطانة مثلاً يا أساسي ؟!
حسناً..

Quote: ليس لي رؤية حول ما يجب ان تكون عليه حاجاتك

Quote: بس سالتك كان تشفرها لي بالسمت الجاهلي والدبكة

يا عزيزي "ليست مجاملة"
تصدق وتآمن إنو مافى الجبة الا زول مغترب مسكين ساى بشارك فى الكتابة فى منبر سودانى ..
لا كاتب بالأجر ولا متعاقد مع بكرى ابوبكر انو أمتع ليه جمهور منبرو حسب الطلب ولا حاجه..
وأقول ليك كلام ..
وعد الكتابة نحو أحدهم تفاعل ايجابى ليس الا ..
لاسيما وفى هذه الحالة وددت لو لم يستصحب الناس عداوات كنت أتمناها عابرة بعبور بوستاتها شمار فى مرقة هذا الاسفير ..


هذا هو البوست ..
قل فيه ما شئت يا أستاذى الفاضل ..
غير مفهوم, مطلمس, سخيف, جيد, ممتاز ..أخطا فى كذا, خاطيء من قولة تيت ..
وثبت رأيك إن شاء الله بى اكبر خط يوفره بكرى ..
أعتقد انو الخط بتاع بتاع السفرجل المليونير عبدالمطلب عباس الفحل أغنى زول فى المنبر وتانى اكتر زول بمشى الدوحة والحج داك ..
وفى كل الاحوال سأكون سعيدا بمشاركاتك ..

تحياتى يا عزيزي العزيز ..

البوست ده لم يبلغ الحلم ذاتو ..
وشكلو ما زال طفلا يحبو ..
ف ..
فى كلام عن المنبر ده لسه ما اتقال ..

كما وأدين بإعتذار لحسن موسي ..
فالرجل كتب ما يفيد حالة من اللاإكتراث وربما التأفف ب"الاستحسان" الذى لاقاه هنا ..
لاسيما ذاك المتعلق بالوسامة ومتعلقاتها ..

الفلم ده لسه مدور؟ ياخى قصة الذوات المتضخمه دى - بي سبب و بدونه - عاوزه مباصره , ذات حسن العليا هينه , هو في الآخر عاقل و بيباصر حاله و عارف حدوده و بيتراجع زى ما حاصل و إن كان بالدس ... ما بيناتنا,

المشكله الجد في الذوات المنفوخه و قافله درب مفاهمات مهمه جدآ جدآ ذات صله مباشره بالحاصل و الحيحصل لى قدام... و المؤسف انها من شباب و شابات بيتكلمو دومآ عن عيوب "الكبار و القدام و الديناصورات" و ضمن ما يذكروا هو تضخم ذوات هؤلاء ... بوعى أو دون وعى منهم يكرروا في نفس المأساه ....

عصام جبرالله ..
كيفك وكيف كيفك با صديق ..

الفلم ده طويل جدا يا عصام ..
ولدى سبب قوى جدا للاستمرار فى كتابة انطباعى حول مسألتين أساسيتين ..

أ- إدمان الحالة النخبوية ..
ب- انهزام المنبر بتاعنا ده ازاء ..

1- مدمنى الحالة النخبوية
2- محاولات تحويلو لى صحافة رخيصة

المشكلة انو زمن الكتابة ممحوق ..
ولكنها برسم الانجاز لو ربك هون ..

لا أعلم عيبا يذكر للعصافير ..
حتى أن تاج السر جعفر إذ أراد وصفا جميلا لاصدقائه رماهم بالنوق العصافير ..
كما وحاقت بلينين البدائيه إذ قال ..

Quote: أي و الله ، غاب عن خاطري هذا الإحتمال اللينيني البدائي الذي ربما كان السبب في أن بعض المتأدبين تعودوا على توصيف "منبر الحوار الديموقراطي" في سودان الجميع بـ " منبر الصفوة " و غير ذلك من " أسماء العصافير " [ و السلاحف ] لمجرد أننا لا نقبل الهرجلة و المجمجة و لعب القعونج..

هكذا وفى جملة واحدة تلاحقت أكتاف الكعوج بالعصافير ب .. لينين
وطفقت أسأل عن دنيا خالية الهرجلة والمجمجة و الكعوج !!
فطلبتنى عصفورا بباريس !!

غايتو سبحان الله !!!
ما أشتر القلم وما يسطرون ..

Quote: الجماعة الطيبين ألصقوا بنا "وصمة" الصفوة المنعزلة داخل برجها العاجي [ إنتو البرج الببنوه بالعاج دا عاوز ليهو كم فيل ؟]

الولد شِفِت لمن خلى مجموعة الدكاترة والرسامين وذوى المناصب الثقافية يآآآمنوا ؟!
وباغت الفيل فى صرتو ذاتها !!

هسع ده كلام موضوعى ؟!

بيد أن ما أوجعنى هذا السقوط ..

Quote: و فيهم من طاب له المقام بهناك، في تشاشات" أبوجهل"، يعلـّم العوام حرفية الثورة في هيصة نضالية سعيدة، و منهم من قضى نحبه شهيدا مزمنا بين المنابر، ومنهم من ينتظر و ما بد ّلوا تبديلا.

محمد حيدر المشرف :

Quote: ف .. فى كلام عن المنبر ده لسه ما اتقال ..

أنتظر ، بشغف ، مابعد هذه الفأفأة
ولحين أن تنقال
أسجل :
1- بتعجبني كتابتك جدآ لأنها دائمآ بتحمل فكرة وعائها لغة نضيدة
2- أتمنى أن تكتب فيما بعد عن الدبكة بعمق وقاربها برقصات أخر على ذات النسق ، مع إني أقر بفرادتها
3- مايهمني من المواقع التفاعل السريع ، غض النظر عن مآلآت هذا التفاعل ، أعلم أنه مرات بيتحول إلى عك و كع
( النقطة دي تعليق بشأن المقاربة/ المقارنة بين أونلاين وفورأول )
4- صديقي وأستاذي القاص الأديب عثمان حامد سليمان يحرضني على أن إهتم بكتابة كتب
وأنا بدوري أحرضك ، كتابتك مهمة وملهمة وقلمك سلس ، والكتابة هنا بتضيع هباءآ منثورا
أو كما قلت انت : شمار في مرقة
كتابك سوف يبقى ، كما يمكن أن تقتات منه مستقبلآ

للاقتباس مباشرة ..

Quote: و رغم أننا شرحنا لهم مرارا و تكرارا أنو" منبر الحوار الديموقراطي" دا زي عربيتنا الماشين بيها للبلد الإسمها "ديموقراطية "، و الناس البنشيلهم معانا ممكن يتفاهموا معانا في افضل السبل للوصول لمقصدنا، و لو وحلنا يساعدونا بالصاجات ، و لو عندهم خرائط مفيدة ما بطال معانا، لكن بس ما يقولوا لينا " بما إنو المنبر دا إسمو" منبر الحوار الديموقراطي" فأنا عاوز اتولى مسئولية الفرملة، و فلان صاحبي داك بيعرف للتعاشيق حقوا تخلوه يعشـّق ليكم و فلنكان داك بعرف للمجمجة وكمان في " الطفل المعجزة" القالوا حريف في الحوار عاوز يجيب ناس نافع و عمر البشير يركبوا معانا ونتحاور شوية و كدا، مش انتوا قلتوا دا منبر الحوار الديموقراطي؟!" و غير ذلك من ترهات إتحاد الشباب المتورم الذي حثل في منبر" الخور " العام و اتخذ من مناكفتنا صنعة يرفه بها عن عشائر نافخي الكير أونلاين الذين محقتهم الدياسبورا بنت الغول الإسلامي و العنقاء النصرانية فاستقروا في سوق ابوجهل يتسقطون الشمارات و القوالات و الشكلات. .

اولا بالتبادى العربية دى سواقها منو ؟!
وليه عربيتكم ؟!
ما نركب بص !!..
البص مالو ؟!
يشيلنا كلنا قدم التذكرة ..

الكلام ده مهم جدا عشان نتجاوز قلة ادب الكماسرة واحساسهم العالى بى ذاتهم ..

تانيا ..
الاتجار بالاطار الديمقراطى الممكن وحصرو فى إمكان دخول الاراذل من الناس فيه كالكيزان تجارة فاقدة للنزاهة ..
لأن الاختلاف معيارى حول ال threshold
وهذا اختلاف يوجب الاحترام و النفس الديمقراطى بالميت كده ..

أسمح زول
و أمسح زول

نعم بالتفاضل ..
وكلاهما سمحا ومسيخ ..

الفكرة ليست الاشخاص ولا يحزنون..
الفكرة أن أعلن موقفى فى الضد ممن أقف فى الضد مما يكون ..
سواء كان غنيا كحسن او فقيرا كحسين ..

أعتذر عن إستدعائي السخيف جدا لسيرة الاخ حسين ملاسي ..
أعتذر بصدق وأسي عميق ..
أن أختلف مع اتجاه محدد فى الكتابة شيء ..
وأن أفرض إختلافى فى غير موضعه شيئا آخر ..


أعتذر بشدة ..

قال أبوساندرا ..

Quote: مايهمني من المواقع التفاعل السريع ، غض النظر عن مآلآت هذا التفاعل ، أعلم أنه مرات بيتحول إلى عك و كع ( النقطة دي تعليق بشأن المقاربة/ المقارنة بين أونلاين وفورأول )

تعرف يا صديقى! ..
رهانى كبير على هذه المواقع التفاعلية ..
وعلى هذا الموقع بالتحديد ..
وصحيح جدا كونه مساحة لممارسة أقل قليل الواجب الوطنى ..
وفى حالتى شخصيا يكاد يكون المساحة الوحيدة الا قليلا ..
وفى ذلك مذمة فاخرة كما تعلم..
ولكنها الحقيقة فى نهاية الامر ..

المهم ..
هذه المساحة ..
هذا الضرع الضئيل الذى نرضع فيه جميعنا ..
من المهم جدا أن نسعى به نحو كماله ..
نحو منبر سيثمر شيئا طيبا ..
"عبيرا ضد تلك الرائحة" كما قال الرضى

العك!

كن على ثقة يا صديقى أنك وباقترابك من العك ..
تكون أقرب ما يكون للناس ..

فليكن ولكن ..
نصارعه بالوعى ..
وتلك هى المسألة ..
ذلك خير من البحث عن العملة المعدنية الضائعة فى شارعٍ اقل ضوضاءً من الذى فقدت فيه !!..

تحياتى

Quote: صديقي وأستاذي القاص الأديب عثمان حامد سليمان يحرضني على أن إهتم بكتابة كتب وأنا بدوري أحرضك ، كتابتك مهمة وملهمة وقلمك سلس ، والكتابة هنا بتضيع هباءآ منثورا أو كما قلت انت : شمار في مرقة

عنك أقول ..
ان ذلك يليق بك كثيراً ..
فأكتب يا صديقى ..

عنى ..
لست كفؤا لذلك ..
فقط ..
أتمنى أن أتم تلك الرواية ..
وحصل فيها شغل كويس ..
بل وترجمت للانجليزية .. تصور !!
محتاجة مراجعة كثيفة و .. مراجعات أخرى

ليتنى أتمها يا عبدالرحمن ..
وأبقى زول عندو رواية
يا للهول !!

Quote: صديقي وأستاذي القاص الأديب عثمان حامد سليمان يحرضني على أن إهتم بكتابة كتب وأنا بدوري أحرضك ، كتابتك مهمة وملهمة وقلمك سلس ، والكتابة هنا بتضيع هباءآ منثورا أو كما قلت انت : شمار في مرقة

عنك أقول ..
ان ذلك يليق بك كثيراً ..
فأكتب يا صديقى ..

عنى ..
لست كفؤا لذلك ..
فقط ..
أتمنى أن أتم تلك الرواية ..
وحصل فيها شغل كويس ..
بل وترجمت للانجليزية .. تصور !!
محتاجة مراجعة كثيفة و .. مراجعات أخرى

ليتنى أتمها يا عبدالرحمن ..