المشْتَهِـِنَّك

للشاعر الأستاذ/ السر عثمان الطيب

يا المشتهِنَّك وفي غيابـك بالنا بيك ضُمَّة انشغــل
النوم وراك يبقالنا شر .. فارق عيونَّـا ، خلاص رحل
**
ضايقين متين ترجع تعود .. نسأل ، متين قطرك يصل
حارسين شويفعنا البجيب لينا البشارة يجيب أمــل
يجري ويناهد من بعيد .. شايِلُّو شنطة ، وبي عَجَـل
يفرح يقول .. خلّيتو جايي وراي يسـالم في الأهـل
**
والساعة ديك عاد البلد تنجارا قاصداك يا السَّمِـح
الناس توسوس لي بعض .. يي داك وصل .. واللهِ صِحْ
حتى اللِّي كان محزون وباكي الليلة عاد هشَّ وفِـرِح
في يوم رجوعك يا حِبَيِّب روحنــا تب يبـرا الجَّرِح
**
الساقي بعد العنكبوت الفوق حِطيبا خلاص بنــى
بعد الكآبة ومسحـة الحـزن العليها مهيـمـنـة
مرقت تلاقيك زي عروس متعطِّرة ومتزيِّنــــة
**
جدولــنا من بعد اليباس الكان موجِّع تقْـنَـتُـو
بعد السنيــن العاشــا في بُعدك بيكتـم أنَّتـو
بعد العذاب الفي غيابـــك كان يزيــد لي محنتو
بلقاك فِرِح .. جاك زي عريس يادوب جديد بي حِنَّتو
**
القمري من بعد الألم والحسرة والنـوح والجــراح
بعد الدموع السايلة دايماً وعمرو في كفكيفــا راح
في يوم رجوعك جفنو من بعد السهـر دابو استـراح
فوق السبيط زوزا ورقص .. طربان يزغـرد للصباح
رسَّل غنيواتاً حُنان .. في روعة صفَّق بالجنــــاح
**
أوتار طنابيرنا الأبت يا حِــبِّـي في غيبتــك ترن
حلفت محال ما تجيب نغم .. يفرِح قلوبنا ويســعِدِن
عادت هي متل ايام زمان تشرح نفوسنا وتبهِجِــن

لمن اتصل بي هاتفيا ولم يترك غير صداه الطيب. اقل أن لديه أشعارا وليش لديه إشتراك في الموقع. أرجو أن تعبر من هنا مرة أخرى... هذا بريدي الإلكتروني أرسل لي ما لديك وأنا مستعد لنشر كل جميل:
[email protected]

عوض الله أحمد الطيب
الرياض