لقائي مع معاوية عبيد الصائم

الأخ العزيز / محمد البشرى الخضر
لك التجلة والإعزاز وكل العام وأنت بخير
في أول أيام العيد وبعد رمي الجمرات ، وكنت وقتها متعبا حيث قطعت المسافة من عرفات الى منى على الإقدام ، وفي طريقي إلى مكة كنت أبحث عن مكاتب البنك الإسلامي لشراء إيصال الهدي والذي بموجبه أوكلت البنك للذبح نيابة عني ، وللصدفة الغريبة ، ودونما سبب وجيه ، تركت المكتب الأول وذهبت للمكتب الذي يليه وعند الشباك وجدت بعض الموظفين السودانيين فخاطبني أحدهم قائلا : اتفضل بالباب واعتذرت ولكنه أصرّ على ذلك ، فدخلت المكتب وسلم علي بحميمية وبادرني قائلا: انت احمد القرشي؟ فاندهشت فقال لي أنه معاوية عبيد الصائم وأنه علم بحضوري إلى الحج ببوست ابتدره الاخ الاستاذ الطيب شيقوق ومن خلال صورتي في البروفايل تعرف على ، ثم قال لي معاوية ، والذي لم أتداخل معه من قبل في أي بوست ولا تربطني به أي معرفة سابقة ( كنت أتمنى أن أجد معك هنا الأخ محمد البشرى الخضر لأعتذر له وأطلب منه السماح في هذا المكان الطاهر وفي هذه الأيام المباركة )، فعجبت للأمر لأنني ما كنت أعرف عن الذي جرى بينه ومحمد البشرى الخضر وأضاف : إنني أخطأت في حق محمد البشرى الخضر وكتبت كلاما غير صحيح في لحظة غضب ، فقلت له لماذا لا تكتب بوست اعتذار لمحمد البشرى فوافق بحماس لايشوبه كذب أو مجاملة ، ففرحت أن إنسانا قد أخطأ وراجع نفسه وأقر بما اقترفه من خطأ وله النية الصادقة في الإعتذار ، فاتصلت لتوي بالاخ الصديق محمد المرتضى حامد لعلمي بعلاقة جميلة تجمعه بمحمد البشرى وطلب مني معاوية أن يتحدث مع الأخ محمد المرتضى من هاتفه الشخصي وبكرم وأريحية وكان له ما أراد وتحدث طويلا مع مرتضى وتحادثا في الواقعة .
كانت تلك أول مرة ألتقي فيها معاوية عبيد ولقد أكرمني كثيرا ، وجلست معه لفترة طويلة في مكتبه وهو ومن معه من السودانيين الذين يؤتمنون على ملايين الريالات كل يوم ويقدمون خدماتهم للحجيج بل إن أحد أبنائه كان متطوعا في خدمة الحجيج، ولقد استأذنت منه للذهاب للتقصير والتحلل لكنه أصر أن أحلق عند باب مكتبه فاشترى مقصا وطلب من أحد الليبيبن الذين حضروا لدفع الهدي أن يحلق لي وبالفعل تركت رأسي لليبي لم أعرف ماذا فعل برأسي الى أن قابلني سوداني وأنا في طريقي إلى الحرم ليضحك كثيرا وقال لي من حلق لك ، فقلت له ليبي فقال لي فعلا دي حلاقة ثوار وياهو راسك أصبح مصراته ، ولم أعرف فداحة الأمر إلى أن ذهبت إلى السكن وطلب مني زملائي أن أسرع إلى الحلاق لتصحيح هذه الفوضي وبالفعل ضحك الحلاق المصري كثيرا من هذه الحلاقة وأزال بقية الشعر ( صلعة) ولم يأخذ مني سوى 25 ريالا عِوضا عن 30 ريالا رفقا بحالي ، ومن هنا أقول أن معاوية عبيد الصائم أراد الاعتذار بصدق وصفاء نية أشهد الله عليها مثلما حاول خدمتي عن طريق الليبي ولكن بوست الإعتذار إنتهى إلى حال يطابق حال رأسي فمعاوية اهتم بحلاقتي ولم يهتم بالتفاصيل وهنا أجد وجه الشبه بين حلاقتي واعتذاره لك أخي ودالبشرى.
التقيت بالأخ معاوية مرتين بعد ذلك في أيام التشريق وعرَّفني بالأخ إبراهيم النعمة وعرفت أن بمعيتهم الاخ قيقراوي الذي لم التقيه ، وهو يعمل في نفس منطقة الجمرات ، ولا أنسى أن أشكرهم على إكرامهم لي وأصدقائي.
من أطرف ما لحظت هو أن الكثير من الحجاج يطلبون الفتوى من معاوية وإبراهيم النعمة ومن يعملون معهم ، وفي بعض الأحيان يفتون ويقوموا بتحويل (الحالات المتعسرة) إلى مكتب الفتوى ، ضحكت كثيرا حين قام أحد الإخوة المصريين بدفع ثمن الهدي لأحد الموظفين السودانيين الذين يعملون تحت إشراف معاوية وبادر بسؤاله بعد الدفع: حاتدبحو الخروف؟ فأجاب زولنا الزهجان: لا حانطهِّروا..
هذه شهادة مني وددت الإدلاء بها والله وحده يعلم ما بالصدور وأسأله سبحانه أن يهدئ النفوس ويطهر القلوب وصادق إحترامي لك أخي ودالبشرى وشكري يا معاوية لكل ما قمت به تجاهي ( بما في ذلك الحلاقة
الليبية) والشكر أجزله لصديقي الأخ الحبيب بكري أبوكر الذي جمع بين كل أولئك الناس مما مكن لشخص كمعاوية أن يتعرف علي بين 4 مليون حاج ولأنقل هذه الرسالة لودالبشرى الذي أثق أنه يصفح
كشأن الكبار.

دكتور القرشى

لك التحيه والتقدير

وتقبل الله حجك

Quote: الأخ العزيز / محمد البشرى الخضر لك التجلة والإعزاز وكل العام وأنت بخير في أول أيام العيد وبعد رمي الجمرات ، وكنت وقتها متعبا حيث قطعت المسافة من عرفات الى منى على الإقدام ، وفي طريقي إلى مكة كنت أبحث عن مكاتب البنك الإسلامي لشراء إيصال الهدي والذي بموجبه أوكلت البنك للذبح نيابة عني ، وللصدفة الغريبة ، ودونما سبب وجيه ، تركت المكتب الأول وذهبت للمكتب الذي يليه وعند الشباك وجدت بعض الموظفين السودانيين فخاطبني أحدهم قائلا : اتفضل بالباب واعتذرت ولكنه أصرّ على ذلك ، فدخلت المكتب وسلم علي بحميمية وبادرني قائلا: انت احمد القرشي؟ فاندهشت فقال لي أنه معاوية عبيد الصائم وأنه علم بحضوري إلى الحج ببوست ابتدره الاخ الاستاذ الطيب شيقوق ومن خلال صورتي في البروفايل تعرف على ، ثم قال لي معاوية ، والذي لم أتداخل معه من قبل في أي بوست ولا تربطني به أي معرفة سابقة ( كنت أتمنى أن أجد معك هنا الأخ محمد البشرى الخضر لأعتذر له وأطلب منه السماح في هذا المكان الطاهر وفي هذه الأيام المباركة )، فعجبت للأمر لأنني ما كنت أعرف عن الذي جرى بينه ومحمد البشرى الخضر وأضاف : إنني أخطأت في حق محمد البشرى الخضر وكتبت كلاما غير صحيح في لحظة غضب ، فقلت له لماذا لا تكتب بوست اعتذار لمحمد البشرى فوافق بحماس لايشوبه كذب أو مجاملة ، ففرحت أن إنسانا قد أخطأ وراجع نفسه وأقر بما اقترفه من خطأ وله النية الصادقة في الإعتذار ، فاتصلت لتوي بالاخ الصديق محمد المرتضى حامد لعلمي بعلاقة جميلة تجمعه بمحمد البشرى وطلب مني معاوية أن يتحدث مع الأخ محمد المرتضى من هاتفه الشخصي وبكرم وأريحية وكان له ما أراد وتحدث طويلا مع مرتضى وتحادثا في الواقعة . كانت تلك أول مرة ألتقي فيها معاوية عبيد ولقد أكرمني كثيرا ، وجلست معه لفترة طويلة في مكتبه وهو ومن معه من السودانيين الذين يؤتمنون على ملايين الريالات كل يوم ويقدمون خدماتهم للحجيج بل إن أحد أبنائه كان متطوعا في خدمة الحجيج، ولقد استأذنت منه للذهاب للتقصير والتحلل لكنه أصر أن أحلق عند باب مكتبه فاشترى مقصا وطلب من أحد الليبيبن الذين حضروا لدفع الهدي أن يحلق لي وبالفعل تركت رأسي لليبي لم أعرف ماذا فعل برأسي الى أن قابلني سوداني وأنا في طريقي إلى الحرم ليضحك كثيرا وقال لي من حلق لك ، فقلت له ليبي فقال لي فعلا دي حلاقة ثوار وياهو راسك أصبح مصراته ، ولم أعرف فداحة الأمر إلى أن ذهبت إلى السكن وطلب مني زملائي أن أسرع إلى الحلاق لتصحيح هذه الفوضي وبالفعل ضحك الحلاق المصري كثيرا من هذه الحلاقة وأزال بقية الشعر ( صلعة) ولم يأخذ مني سوى 25 ريالا عِوضا عن 30 ريالا رفقا بحالي ، ومن هنا أقول أن معاوية عبيد الصائم أراد الاعتذار بصدق وصفاء نية أشهد الله عليها مثلما حاول خدمتي عن طريق الليبي ولكن بوست الإعتذار إنتهى إلى حال يطابق حال رأسي فمعاوية اهتم بحلاقتي ولم يهتم بالتفاصيل وهنا أجد وجه الشبه بين حلاقتي واعتذاره لك أخي ودالبشرى. التقيت بالأخ معاوية مرتين بعد ذلك في أيام التشريق وعرَّفني بالأخ إبراهيم النعمة وعرفت أن بمعيتهم الاخ قيقراوي الذي لم التقيه ، وهو يعمل في نفس منطقة الجمرات ، ولا أنسى أن أشكرهم على إكرامهم لي وأصدقائي. من أطرف ما لحظت هو أن الكثير من الحجاج يطلبون الفتوى من معاوية وإبراهيم النعمة ومن يعملون معهم ، وفي بعض الأحيان يفتون ويقوموا بتحويل (الحالات المتعسرة) إلى مكتب الفتوى ، ضحكت كثيرا حين قام أحد الإخوة المصريين بدفع ثمن الهدي لأحد الموظفين السودانيين الذين يعملون تحت إشراف معاوية وبادر بسؤاله بعد الدفع: حاتدبحو الخروف؟ فأجاب زولنا الزهجان: لا حانطهِّروا.. هذه شهادة مني وددت الإدلاء بها والله وحده يعلم ما بالصدور وأسأله سبحانه أن يهدئ النفوس ويطهر القلوب وصادق إحترامي لك أخي ودالبشرى وشكري يا معاوية لكل ما قمت به تجاهي ( بما في ذلك الحلاقة الليبية) والشكر أجزله لصديقي الأخ الحبيب بكري أبوكر الذي جمع بين كل أولئك الناس مما مكن لشخص كمعاوية أن يتعرف علي بين 4 مليون حاج ولأنقل هذه الرسالة لودالبشرى الذي أثق أنه يصفح كشأن الكبار.

شكرا جميلا يادكتور

حجا مبرورا وسعيا مشكورا

اوفيت وكفيت

شكرا جزيلا يا دكتور و حجا مباركا مبرورا و سعيا مشكورا بإذن الله
وربنا يتقبل منكم صالح الأعمال

الاخ الدكتور احمد القرشي

حجا مبرورا وسعيا مشكورا وذنبا مغفورا باذن الله


نسأله تعالى ان يتقبل منكم


وكل عام وانت بالف خير وخير

Quote: من أطرف ما لحظت هو أن الكثير من الحجاج يطلبون الفتوى من معاوية وإبراهيم النعمة

ديل مع كل فتوى يلزمهم هدي


وربما اعادة الحج كاملا

والله اعلم

تقبل الله حجكم اخي القرشي

كل عام وانتم بخير

ونسال الله بربار الهداية

وبقية مرافقيه من بني علمان

تقبل الله منك ومن كل من توجه لاداء شعيرة الحج بصفاء نيئة وروح
طاهرة لا تعرف غير مرضاة الله هدفاً


تخريمة

Quote: ديل مع كل فتوى يلزمهم هدي وربما اعادة الحج كاملا والله اعلم

اها يا ود الباوقة زي المشاترة دي هي البتفرغ البوستات من محتواها
والمقام مقام جودية
ومصالحة
ونفس طيب ومرتاح
وبال وهيييييييييييييييط
فبلاش ياخ تلخبط الحاجات
وتجرجر البوست
لشطر لك فيه حلب
خلي البوست يمشي عسى ولعل يكون مردوده خيراً
ولا الحتة دي بتزعلك كتييييييييييييير


وتحيييييييييييييييييييييييية

Quote: اها يا ود الباوقة زي المشاترة دي هي البتفرغ البوستات من محتواها والمقام مقام جودية ومصالحة ونفس طيب ومرتاح

ابوروضة

اليومين ديل اتلحتني كدا ان شاء الله خير


يا اخ الله يشهد المسالة لاتعدو كونها هظار ومزح

لا اكثر ولا اقل

مع التحية

دكتور أحمد القرشي : حجاً مبروراً وسعياً مشكوراً وتقبل الله صالح الأعمال ...والصلح خير ما دام اعترف وأقربالخطأ سواء صراحة أو ضمناً او من خلال هذه الرسالة الغنية والكافية لتحلية بحر المالح .. والأمر سينقضي أمره إن شاء الله والأيام كفيلة بالنسيان ...فإن كان ضرب اللسان اشد من وقع السنان إلا العشم في عظام النفوس أن تبقى عظيمة وتتسامى عن الخطأ

احمد القرشى ......حجاً مبروراً يا دكتور
شكراً جزيلاً ولا نزيد ،
لان صاحب هذا البوست لمعرفتى به وان لم نلتقى لم يكتبه الا ليبتغى مرضاة الله فالايغال فيه
يجب ان يكون بحجم ولطف صاحبه وبقدر نبل مقصده فى الاصلاح اما اهل الغرض و المرض
فسوف نذهب اليهم فى مكانهم و فى البوستات التى يفترعونها وفى نفوسهم شى من حتات كتااااااااار
و ليست حتى واحدة ..
محمد البشرى والله العظيم والذى نفسى بيده لا اعرف معاوية الصايم الا من خلال هذا المنبر
ولم التقيه طوال عمرى شأنه شأنك وشأن كثير من الاخوان بما فيهم دكتور احمد القرشى نفسه
والذين اتوق الى ان التقيهم وانت واحد من الذين نسمع عنهم طيب كثيراً من كثير من شهادات
الاخوان ولكن حتى ردك فى هذا البوست لم يعجبنى، وشىء واحد اؤمن به ان كتابات البعض هنا
لا تشبههم و لاتمثلهم والى الان انا محتار فى الشيزوفرنك الذى يعترى بعض الاخوان والاخوات هنا عندما
يختبون خلف كى بورد ويبقى الود،،،

الحاج ود القرشي تقبّل الله حجكم و(هديكم) :)... وفي البوست أوقفتني أمور ..
.منها ان معاوية عبيد وفي مكان لا يُقبل الشك في طهارته أقرّ بما هو مطلوب منه
انا لم أتابع البوست المشابه لحلاقه الليبي وإنما سمعت به فقط من حافظ أنقابو في لمة بورداب
وعلمت أن ود البشرى رفض الإعتذار ليس لأانه ليس كبيراً حاشا لله له ولنا أصحابه لاننا سنكون صغارا لو كان و صغيرا
ولكنه رفض بحسب ما علمت من انه لا يبحث عن إعتذار ولكن يبحث عن حقيقة
أعتقد ان في هذا الحديث الذي دار بين الحاج ود القرشي ومعاوية فيه من الإقرار الكافي من معاوية عبيد بخطأه
وأردفه بإعتذار وإن كنت مازلت أتمنى ان يكون هذا الكلام من معاوية عبيد وليس نقلا عنه
ومعاوية انا أعرفه جيّداً لا يخشى في الحق لومة لائم وشخص لم يخشى السلطات في عهد نميري لا اظنه يخشى مواجهة موقفه
معاوية صديقي وأقول له أخطأت وخطأك يتطلب شجاعة المثول امام نفسك وتأريخك وأهلك وأصدقائك وأعدائك لتقول بصوت عالي وفخور
محمد البشرى خضر لقد أخطأت في حقك وأطلب منك ومن أسرتك واصدقائك السماح
هذا ما هو مطلوب منك دون حتى إنتظار قبول من هم مطلوب منهم قبول الاعتذار ان يبقلوه
ولو تيقنت أنهم لن يقبلوه فعليك القيام بماهو مطلوب منك اخلاقياً ... أخلاقياً يامعاوية فما نحن إلا تربية مجتمع يقدّس الاخلاق
ودالقرشي شكرا لك ولكن نتمنى حضور معاوية عبيد بنفسه ولنفسه ليس أكثر هنا في هذا البوست او في بوست منفصل حيثما أراد


تخريمة :
يا حجاج كلام ودالباوقة ده ما تدوه الارض :)

بوست عن الطوربيد فى صدر المنبر العام


الله يرفع مراتبك يا ولدى


حجا مبرورا وسعيا مشكورا ربنا يتقبل منك صاحب البوست

سلامات يا أحمد القرشي

ألف مبروك الحج ..وحجا مبرورا وذنبا مغفورا ..

شكرا جزيلا على البوست

شكرا جزيلا لود البشري لمداخلته أعلاه ..

اتمنى من كل المتداخلين أن لايحرفوا هذا البوست عن غرضه..

وتحياتي لكم جميعا واتمنى أن تسود روح الاعتذار والاعتراف بالخطأ وقبول الاعتذار ....

تقبل الله منك يا دكتور
حج مبرور يا حبيب

حجا مبرورا وذنبا مغفورا
العيب دائما في الكيبورد
ياما ناس جميليين رسمنا ليهم صورة وحشه
كلماتك صادقة وجميله
تدي احساس راقي لتوصيل معني رائع
ربنا اطيب النفوس ابعد لحظات الغضب
نتمني ان يكون المفترع اخر القصة
مع خالص التقدير

شكراً الحاج أحمد القرشي
شكراً محمد البشرى
شكراً معاوية عبيد الصائم

نتمنى ان نكون كما نحن دائماً

صديقى الجميل من الزمن الجميل
حج مبروك و انشاء الله تكون دعيت لينا دعوة كاربة على الهكر بتاع موقف شندى
ولا يفونى ان اشكر الاستاذ محمد المرتضى لتنبيهى لهذا البوست الهام و مساعيه و مساعيكم للمصالحه بين اعضاء المنبر
وشكرا لكم و يا ها دى المحرية فيكم

Quote: مساعيه و مساعيكم للمصالحه بين اعضاء المنبر

بكري..
ووووين اراضيك؟؟ اوبس..اقصد مساعيك؟؟
بكري اديني ادارة المنبر دا يوم وااااااحد
اول زول اشيلو انتا..

ـــــــــــــ
مبروك الحج احمد القرشي وعقبالي يا رب..

الحاج ود القرشي
حجا مبرورا وسعيا مشكورا
هذا البوست برائحة الأراضي المقدسة سوف ينهي الأشكال بإذن الله
محادثتكم مع المرتضى اعتقد انها كبيرة كبر المرسل والمتلقي
ود الصائم انا تعرفت عليه هنا وعلمت أنه من أقاربي ونسائبي وكفى لذا كنت في كل مداخله ناصرا له وهو ظالما برده عن ظلم الأخيار.
ود البشرى أيضا تعرفت عليه هنا وكبر في نظري أيضا بعد أن علمت بعلاقته مع صديقي الشفيف العفيف ود المرتضى والذي عشت معه أحلى الليالي وأمرها
كيف لايكون كبيرا من صاحب أمثال المستشار بل وتعاركنا هنا انا والمستشار في احدى كريمات ود البشرى للظفر بنسابتها.

اتوقع ان يواصل الكبار كبرهم
وتحييتي صادقة لكم فردا فردا يامن تداخلتم في سبيل الأصلاح ويامن تعملون في صمت وهمة لرأب الصدع
وكل عام والجميع بخير

ود الشيخ
نائب رئيس بورداب ابها

(طبعا هم اتننين فقط الرئيس والنائب)

Quote: لا تشبههم و لاتمثلهم والى الان انا محتار فى الشيزوفرنك الذى يعترى بعض الاخوان والاخوات هنا عندما

يا صديق الموج
يا صديق والله كتبت حاجات كتيرة ومسحتها لأنو العاوز أوصلوا ليك محتاج كتير كلمات والبوست ما بيسمح لكن بقول ليك أنا كنت بدافع عن نفسي يا صديق وكل الناس كان دا دافعها ، اصحاب محمد البشري وانا منهم عاوزين نعرف الراجل دة هل فعلا كدا عشان نعرف نتحاسب معاه ولا ود الصائم كذاب عشان نستريح وألما اصحاب ود البشري خايفين بكرة ود الصائم يجئ ينجر لية قصة من راسو ويلصقها عليهم وتبقي ليهم مسبة تسير بأخبارها الركبان وفي واحدين تانيين أصابهم قبل كدة رشاش معاوية عبيد الصائم ولقوها فرصة يوقفوا الزول دة عند حدة كل . اها احنا كل واحد فينا منطلق من أسبابو ولكن هدفنا واحد إيقاف هذا الافاك عند حدة بل ويحاسب فعائشة رضي الله عنها لم تقبل اعتذار بل تم اقامة الحد علي من اتهموها واقسم لك بكل مقدس ان ذلك سوف يحدث عاجلا ام اجلا
أنا ما بيهمني ان كان ود الصائم معارض او طوربيد إو قيامة قايمه لأنني لا آري فية ذرة معارضه لأنو ما بيميز بين الخاص والعام ودة بخلية يفقد مصداقيته وهسي اي خبر يجيبه تاني ان بقي عندو وش يقعد مع الرجال في المنبر دة بنجية طايرين ونقول ليه. الكذاب اهو ...... الكذاب اهو
ما عهدتك يا صديق تجمل وتجمع وهنا يوجد ظالم ومظلوم فلماذا انت بجانب الظالم والجاني هل بسبب ما يجمعكم من معارضة للحكومة وهل تعتقد وانت الخبير الذي عركتك الحياة ان بالخوض في أعراض الناس ستسقط الحكومة وحتي وان سقطت هل تريدون سقوط للحكومة ملوث بأعراض الناس
يا صديق أبعد جميل علاقتك بمعاوية وعدائك لمحمد البشري واحكم فيما شجر بينهم وانا ونيابة عن محمد البشري سنقبل ما تراة
يا صديق أتخيل صاحبك عبد الرؤوف اتصل علي وقال لي أبعد أختنا عن اصدقائك الهلافيت الزي محمد البشري ديل لأنو في واحد طوربيد اسمه معاوية عبيد الصائم قال انو بيشحد نسوان اصحابو يكون موقفي أنا شنو واودي وشي وين
يا صديق يا صديق والله ما عارف اقول ليك شنو

ولا تزعل يا محمد عبد الماجد الصائم أصلوا الضغط لمن يرتفع ما بنقدر نميز بين القرمبع والهمر

حد يصحي عمگ الزبير ويقول ليهو أفــرز!!!

اركز يا زول
ما سمعت بي (شرف البورض)




















-------

حننتني يا حمودي

اخي الحاج دكتور القرشي

الف مبروك وحجا مبرورا وسعيا مشكورا

حجيت نعم يا احمد اخوى ونتمنى ان يتقبل الله مناسكك وتنمحي جميع ذنوبك وينعم الله عليك بالمزيد من نعمائه، غير اني لما تصفحت هذا البوست وعلمت ما دار بينك والاخ معاوية عبيد الصائم ، لا سيما الكلام الطيب من قلب طيب و متسامح ، ايقنت ان الله قد سخرها لك صدفة ليكرمك بحجتين حجة الفرض وحجة ترسيخ مفهوم التسامح بين الاخوة الاعضاء في المنبر العام - نحمد الله ان مازال في منبرنا هذا وميض من الخير قد يعيد الينا الاقلام التي هجرته بسبب ما تحدث فيه من اسقاطات لا تليق بمقاماتهم لا اسريا ولا مهنيا ولا اجتماعيا بل ولا اخلاقيا حتى .

لما رأيت كلمات التسامح والصفح والمحبة من ود الصائم - يا حاج احمد اخوي - أحسست بعظمة تتملكني واعتزاز بصداقتك - كلنا نخطئ نعم ، كلنا نذنب نعم ، كلنا يحتاج إلى مغفرة نعم غير ان الذي يبقى في النهاية بكل تأكيد هو التسامح .

التحية عبرك لاخوتي معاوية وود البشرى ونتمنى ان يظل منبرنا هذا مساحة للتواصل الطيب عبر الكلام الطيب والاخلاق الطيبة وان ينأى جميعنا عن دق عطر منشم بين اخواننا واخواتنا .


حاشية:

عندما كنت اعمل محاميا بالسودان واكون في مهمة خارج المدينة الكائن فيها مكتبي كنت لا اسأل عن الفنادق وانما اين يسكن اى من الزملاء المحامين للذهاب لمنزله وقضاء ليلتي معه لمجرد انه زميل مهنه وبس .

الحاصل الان ومن شدة حبي لاعضاء وعضوات سودانيز اونلاين لا اعتقد سيأتي اليوم الذي اسأل فيه عن فندق لاني وبكل بساطة وبكل فرحة وسعادة سأذهب لمنزل اقرب زميل بوردابي لقضاء ليلتي معه لان ثمة امور كثيرة مشتركة للتحدث بشانها . الشكر لك انت اخي الباشمهندس بكري ابو بكر فانت الذى هيأ لنا اسباب هذا التواصل والتعارف وهذا الذي ننعم به من ألفه ومحبة وتسامح

انا ما متابع وما عارف حجم الخطأ
وماعارف الحقيقة التي يرومها ودالبشرى
واعرف انه يستحقها

اقتراح:
أن يسعى معاوية لمعرفة رقم تلفون ود البشرى ويتصل ويقوم بالواجب
وأعرف أن ودالبشرى لن يقصر
ثم يعود لنا معاوية ببوست اعتذار هنا يلبي فيه كل مطالب ود البشرى

ومن ناحية أخرى
- حجآ مبرورآ وذنبآ مغفورآ للحاج ود القرشي
- معاوية لاتكتب وانت هايج

حجاً مبروراً وسعياً مشكوراً

وربنا يتقبل يا دكتور ...

وشكراً على السرد الجميل الذي جعلني اتراقص طرباً .... يا صديقي العزيز الكلمة الحلوة كالموسيقي ..

وكل سنة وإنت وأخونا معاوية بألف خير

تحياتي

مبروك الحج يا حاج أحمد..

وعقبال ما نحج كلنا..




ربنا يعدل الحال والنفوس تصفي..

ود الشيخ

Quote: (طبعا هم اتننين فقط الرئيس والنائب)

الله يجازيك ضحكتني وذكرتني عندما كنت نقيبا لمحامي مدينة السوكى - الحقيقة نحن المحامين كنا اثنين فقط بالسوكي وانا كنت النقيب وزميلي الخاتم يوسف - احييه من هذا المنبر - كان يمثل الجمعية العامة - لما اتفاصح معاهو بقول لي ما تطول لسانك على ، هسه بسحب صوت الثقة منك وبخليك ماشي على عجل الحديد

Quote: لله يجازيك ضحكتني وذكرتني عندما كنت نقيبا لمحامي مدينة السوكى - الحقيقة نحن المحامين كنا اثنين فقط بالسوكي وانا كنت النقيب وزميلي الخاتم يوسف - احييه من هذا المنبر - كان يمثل الجمعية العامة - لما اتفاصح معاهو بقول لي ما تطول لسانك على ، هسه بسحب صوت الثقة منك وبخليك ماشي على عجل الحديد

نعمل شنو يا سعادة المستشار قدرى ما حاولنا نغزر نفسنا باتنين تلاتة شيخنا بكرى ما أدانا نظرة
ياخي احتمال تفضل على الرئيس ود احيمر عبد الله بس لأني موعود بان اكون من بورداب الرياض عنقريب.
تحية لكم وللأسرة وان شاء الله العيد القادم معاكم في "الخوير"+

---------------------------------------------------------
+ طبعا في ناس حايفهمو" الخوير" دي غلت

Quote: مدينة السوكى

عاد دي نعدها ليك مدينة كيفن و هي فيها محاميين اتنين بس يا ود شيقوق، غايتو الا كسر رقبة .
حجا مبرورا يا دكتور ود القرشي بس ما تكون اخدت ليك فتوى من المذكورين.
و ربنا يهدي النفوس و يتجه الناس في المنبر و السودان لما فيه مصلحة البلاد و العباد.

بوست جميل يا دكتور .. وربنا يتقبل منا ومنك صالح الأعمال ..
حج مبرور وسعي مشكور ..

Quote: ثم قال لي معاوية ، والذي لم أتداخل معه من قبل في أي بوست ولا تربطني به أي معرفة سابقة ( كنت أتمنى أن أجد معك هنا الأخ محمد البشرى الخضر لأعتذر له وأطلب منه السماح في هذا المكان الطاهر وفي هذه الأيام المباركة )، فعجبت للأمر لأنني ما كنت أعرف عن الذي جرى بينه ومحمد البشرى الخضر وأضاف : إنني أخطأت في حق محمد البشرى الخضر وكتبت كلاما غير صحيح في لحظة غضب ، فقلت له لماذا لا تكتب بوست اعتذار لمحمد البشرى فوافق بحماس لايشوبه كذب أو مجاملة ، ففرحت أن إنسانا قد أخطأ وراجع نفسه وأقر بما اقترفه من خطأ وله النية الصادقة في الإعتذار ، فاتصلت لتوي بالاخ الصديق محمد المرتضى حامد لعلمي بعلاقة جميلة تجمعه بمحمد البشرى وطلب مني معاوية أن يتحدث مع الأخ محمد المرتضى من هاتفه الشخصي وبكرم وأريحية وكان له ما أراد وتحدث طويلا مع مرتضى وتحادثا في الواقعة .

شكراً دكتور أحمد القرشي وحجاً مبروراً وذنباً مغفوراً وتقبل الله
معاوية عبيد الصائم إلتقيت به في مدينة جدة أول أمري ، وهو إنسان يتمتع بصفات جميلة للغاية ، أحزنني للغاية ما حدث منه تجاه صديقنا الآخر محمد البشري
وللأمانة الموضوع ده أثار فيني ما أثار من حزن ، فكيف لمعاوية الذي أعرف أن يسلك مثل هذه الدروب التي هو في غنيً عنها بكل تأكيد .
إعتذار معاوية وعلي الرغم من إنه يجد من التثمين إلا أنه سيكون كمجرد أداء واجب ثقيل مالم يعيد معاوية النظر في هذه الحاجة الاسمها الأسافير دي . ودي
تجربة وليس أمام معاوية فرصة سوي إغتنامها ومن ثم ليعود لهذه الملاعب أكثر صدقاً مع نفسه قبل الآخرين .
حقاً أتمني يا معاوية أن تستكمل واجب النقد الذي قدمته لنفسك كتابة ـ بإنتهاج ذات الواجب مسلكاً وحضوراً في ساحات الأسافير وكلي ثقة يا معاوية في ذلك
فمن يعترف بخطئه بكل تأكيد يستحق أن نمنحه فرص الحياة كلها .

شكراً دكتور احمد

دكتور احمد تقبل الله وجعله حجاً مبروراً وذنباً مغفورا وجزاكم بما وعد .. ووعده الحق

اما بعد

Quote: وعرفت أن بمعيتهم الاخ قيقراوي الذي لم التقيه

قالوا ليك كدي!؟
سمح تب ..
هم المعاي .. اها الحج الجاي الا كان يتطوعوا شواطين للرجم ساي غايتو!

ياخي ياريت لو عرفنا .. كنا حجينا لمضاربكم
ما لينا حظ


















--------

بمناسبة الحظ دي يا ود الباوقة الربراب، اما اتاك حديث سيدي البرعي:
ضحوا ضحاياهم وسال دماؤها .. وانا المتيم قد نحرتُ فؤادي

ما بتعرف الفرق بين الهدي والفدية .. وجاي تربرب ساي وتفتي في الدين كمان!؟
تعال للعلمانيين ديل يعلموك امور دينك كان كدي
المافي شنو هو!؟ :)

حجا مبرورا وسعيا مشكورا الدكتور احمد...... والله يكبرك يا لكبرتنا.... لانى كنت اعتقد اننا لسا ما بقينالو... اعنى الحج

حكى لى اخى ان احد بلدياتنا كا ن على فراش الموت......وكان من حوله يسالونه ان يردد الشهادة فكان رده ... انا ما بقيتلها يا رجالى....

احسب ان معاويه اخطا فى حق اخينا ود اليشرى ......وعليه الاعتذار....ولكن الاخوه الحلاقين من الاخوه الليبيين ما خلوهو


تحياتى

Quote: ولا يفونى ان اشكر الاستاذ محمد المرتضى لتنبيهى لهذا البوست الهام و مساعيه و مساعيكم للمصالحه بين اعضاء المنبر وشكرا لكم و يا ها دى المحرية فيكم

اوفيتك وكفيت ياريس ... وانت ياها المحريه فيك

والحقيقه هى ليس من رأى كمن سمع

والتحيه للانسان الجمبل مرجع الحقيبه

والفن والجمال

الدكتور احمد القرشى

سلامات د. أحمد القرشي وذنب مغفور بإذن الله

يا شباب أمس معاوية جا وكتب بكل وضوح في بوست الاعتذار إنو تهمته لود البشرى ما عندها أي أساس من الصحة
الاعتراف دا مهم يبقى في المنبر عشان الأرشيف لقدام ما تفضل فيه التهمة براها
البوست دلوقت أنا ما لاقيه، هل سحب؟
وليه سحب؟


ــــــــــــــــــــــــــــ

Quote: وهو يعمل في نفس منطقة الجمرات

ممممممم!!
الجنى دا نجيض نجاضة!
بيع الحجارة مربح عشان ما عنده تكاليف إنتاج تذكر

أردناها من معاوية في منبر بكري إعتذار وإقرار، وأراد لها الله أن تكون في أطهر البُقع،
وعلي يد رجل قد إغتسل من ذنوبه ولم يبقى من درنها شئ. رجل نكن له الإحترام والتقدير،
وإن قال صدقناه، لكن الله سبحانه وتعالى اراد له أن يقول وهو في قمّة الطهارة حتي يكون
ذلك دليل وآضح علي أنّ معاوية يعتذر وهو في غاية الندم إعتذار من بات يتقلب علي
مِهاد الألم كأنما ساورته ضئيلة من الرقش في أنيابها السُم ناقع. الله سبحانه وتعالى أراد
لهذا الرجل الطاهر أن يقول في تلك البقاع الطاهرة حتي يظهر لنا أنّ مقام محمد البشرى
هو مقام أولياء الله الصالحين، فهنيئاً لك أخي محمد البشرى، وأرجو أن تعفو وتصفح
حتي ترتقي إلي درج العافين عن الذنب.
هذا إعتذار قد إختار له الله سبحانه وتعالى أطهر المواطن، وهياء له أطهر الرجال، وأشهد
عليه أحبّ الناس إلي نفوسنا الآ وهو الأخ محمد المرتضى، هذا الرجل الذي يرتضيه ويألفه
الجميع.
هكذا تمّ الإعتذار والذي أرجو أن يكون مقبولاً لدي جميع الأطراف.
جزاك الله خيراً أخي أحمد، وأسأل الله أن يكون حجك مبروراً وسعيك مشكوراً.
جزاك الله خيراً أخي معاوية في رجوعك إلي الحق، وتشميرك لخدمة حُجاج بيت الله الحرآم.
قال الشاعر:
من يفعل الخير لا يعدم جوآزيه
لا يذهب العُرف بين الله والناس.



طلب:
يا حاج أحمد عليك الله في الحجة الجاية شوف لينا
موضوع محمد الصايم دا...

Quote: يا صديق الموج يا صديق والله كتبت حاجات كتيرة ومسحتها لأنو العاوز أوصلوا ليك محتاج كتير كلمات والبوست ما بيسمح لكن بقول ليك أنا كنت بدافع عن نفسي يا صديق وكل الناس كان دا دافعها ، اصحاب محمد البشري وانا منهم عاوزين نعرف الراجل دة هل فعلا كدا عشان نعرف نتحاسب معاه ولا ود الصائم كذاب عشان نستريح وألما اصحاب ود البشري خايفين بكرة ود الصائم يجئ ينجر لية قصة من راسو ويلصقها عليهم وتبقي ليهم مسبة تسير بأخبارها الركبان وفي واحدين تانيين أصابهم قبل كدة رشاش معاوية عبيد الصائم ولقوها فرصة يوقفوا الزول دة عند حدة كل . اها احنا كل واحد فينا منطلق من أسبابو ولكن هدفنا واحد إيقاف هذا الافاك عند حدة بل ويحاسب فعائشة رضي الله عنها لم تقبل اعتذار بل تم اقامة الحد علي من اتهموها واقسم لك بكل مقدس ان ذلك سوف يحدث عاجلا ام اجلا أنا ما بيهمني ان كان ود الصائم معارض او طوربيد إو قيامة قايمه لأنني لا آري فية ذرة معارضه لأنو ما بيميز بين الخاص والعام ودة بخلية يفقد مصداقيته وهسي اي خبر يجيبه تاني ان بقي عندو وش يقعد مع الرجال في المنبر دة بنجية طايرين ونقول ليه. الكذاب اهو ...... الكذاب اهو ما عهدتك يا صديق تجمل وتجمع وهنا يوجد ظالم ومظلوم فلماذا انت بجانب الظالم والجاني هل بسبب ما يجمعكم من معارضة للحكومة وهل تعتقد وانت الخبير الذي عركتك الحياة ان بالخوض في أعراض الناس ستسقط الحكومة وحتي وان سقطت هل تريدون سقوط للحكومة ملوث بأعراض الناس يا صديق أبعد جميل علاقتك بمعاوية وعدائك لمحمد البشري واحكم فيما شجر بينهم وانا ونيابة عن محمد البشري سنقبل ما تراة يا صديق أتخيل صاحبك عبد الرؤوف اتصل علي وقال لي أبعد أختنا عن اصدقائك الهلافيت الزي محمد البشري ديل لأنو في واحد طوربيد اسمه معاوية عبيد الصائم قال انو بيشحد نسوان اصحابو يكون موقفي أنا شنو واودي وشي وين يا صديق يا صديق والله ما عارف اقول ليك شنو ولا تزعل يا محمد عبد الماجد الصائم أصلوا الضغط لمن يرتفع ما بنقدر نميز بين القرمبع والهمر

ابلع يازبير واتخارج بسترتك

قال الله عز وجل:

(وَلْيَعْفُوا وَلْيَصْفَحُوا أَلا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ) .


(وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللَّهُ يُحِبُّ الْمُحْسِنِينَ ).



ويقول صلى الله عليه وسلم

" ما نقصت صدقة من مال، وما زاد الله عبداً بعفو إلا عزاً، وما تواضع أحد لله إلا رفعه الله " رواه مسلم .




اللهم أحسن عاقبتنا في الأمور كلها، وأجرنا من خزي الدنيا وعذاب الآخرة




.

حجة مبروكة وسلامات حارة يا دكتور

ولابد من تلفون طويل في دي اليومين تحياتي لك والشباب

Quote: الى أن قابلني سوداني وأنا في طريقي إلى الحرم ليضحك كثيرا وقال لي من حلق لك ، فقلت له ليبي فقال لي فعلا دي حلاقة ثوار وياهو راسك أصبح مصراته

مبروك الحجة يا دكتور أحمد وربنا يتقبلها منك ويغفر بيها ذنوبك ويوفقك بيها في دنياك..
بعدين الحلاقة دي عاوزين نشوفها بدون أي سمكرات عشان نشوف كان بتناسب الصلع وكدا..

ألف مبروك مرة تانية..

سلامات الجميع وكل عام وانتم بخير ... مبرووك الحجة يا د.احمد وشكرا علي السلوك المحترم ..

خالص الاحترام اخوي محمد البشري خضر والعفو عند المقدرة .. .. شكرا معاوية عبيد ومنك نتعلم ادب الاعتذار ...

ده كلام قريتو وعجبني ... يقول الإمام ابن القيم : (يا ابن ادم .. إن بينك وبين الله خطايا وذنوب لايعلمها الا هو , وإنك تحب أن يغفرها لك الله , فإذا أحببت أن يغفرها لك فاغفر أنت لعباده , وأن وأحببت أن يعفوها عنك فاعف أنت عن عباده , فأنما الجزاء من جنس العمل ... تعفو هنا يعفو هناك , تنتقم هنا ينتقم هناك تطالب بالحق هنا يطالب بالحق هناك).

Quote: ثم قال لي معاوية ، والذي لم أتداخل معه من قبل في أي بوست ولا تربطني به أي معرفة سابقة ( كنت أتمنى أن أجد معك هنا الأخ محمد البشرى الخضر لأعتذر له وأطلب منه السماح في هذا المكان الطاهر وفي هذه الأيام المباركة )، فعجبت للأمر لأنني ما كنت أعرف عن الذي جرى بينه ومحمد البشرى الخضر وأضاف : إنني أخطأت في حق محمد البشرى الخضر وكتبت كلاما غير صحيح في لحظة غضب ، فقلت له لماذا لا تكتب بوست اعتذار لمحمد البشرى فوافق بحماس لايشوبه كذب أو مجاملة ، ففرحت أن إنسانا قد أخطأ وراجع نفسه وأقر بما اقترفه من خطأ وله النية الصادقة في الإعتذار ، فاتصلت لتوي بالاخ الصديق محمد المرتضى حامد لعلمي بعلاقة جميلة تجمعه بمحمد البشرى وطلب مني معاوية أن يتحدث مع الأخ محمد المرتضى من هاتفه الشخصي وبكرم وأريحية وكان له ما أراد وتحدث طويلا مع مرتضى وتحادثا في الواقعة .

للحقيقة لا اعرف معاوية ولا ود البشري

لكن اعرف د.ود القرشى و ود المرتضى

و ده(بالنسبة لى على الاقل) اعتراف من معاوية بما ارتكبة فى حق ود البشرى و تبرئة له

(إستنادا لثقتى فى مصداقية ود القرشى و ود المرتضى)

بقى ان نترك لهما تكملة الباقى و بنفس بارد و هداوة و ما نحاول وليع النيران من تانى


...... ود القرشي .... حجة مقبولة انشاء الله

Quote: الزول ده ليه شايفه تقييييله انو يقول لود البشري هنا في المنبر ده وقدام الناس انو كذب وبيعتذر ذي ما بهتو في المنبر ده وقدام الناس .. قصه انو قال لي فلان ولي علان انو غلطان وانو..وانو دي طق حنك وخرينه منو ساي ...قادننا طوربيد وطوشيت ما تخليك رجل وتعال قول انك غلطان وكذاب....وللضمان كده يا طورشيت الجماهير دي هنا كلها ناقشه انك مكناكي وكذاب لانك ماحصل بهت زول في المنبر ده واثبتها ....F.T.S

*** ياخي قل خيرا أو خيرا !!!
وحدة المسافة بيني وبين الطرفين تمنعني من التعليق عليك بأكثر من ذلك فدم بخير .

Quote: وحدة المسافة بيني وبين الطرفين تمنعني من التعليق عليك بأكثر من ذلك فدم بخير .

والله يا جنابو وحدة المسافة دي كان مفروض تعمل بي انصر اخالك ظالما او مظلوما
وتقول بي خشم الباب لمعاوية با تعال قول انا بهت ود البشري
اما بالنسبة لدي ود البشري كان قبل كلام اسف و معليش بيكون في احتمال انه كلام معاوية فيهو انه
وبعدين حسابنا مع ود البشري ننصره يجب حقو .......... او تاني ما يعمل كده ( في حالة قبول اسف )

الحاج احمد القرشي تقبل الله منكم وكل عام وانت وكل الاهل واحباب طبيبن
علمت من اخونا عادل عبدالعزيز بلمتكم وكم تمنيت ان اكون معكم
بالنسبة لموضوع البوست وزي ما طلبت مباشرة من معاوية الاعتذار طلبنا منه ذلك كتاباً وقد فعل
ومن حق ودالبشري القبول او الرفض مع العشم الكبير في التسامح

القرشي تسلم كتير يا انسان و دائما منكم لا نجد الا الريح الطيب
------------
ومعاوية مطالب باعتذار تاني في حقك من حلاقة الليبي او الاحسن طلب اعتزال مبكر ههه

لست متابع للمنبر منذ فتره و لكن دخلت ووجدت ما وجدت
بغض النظر عن نضال معاويه و لا معارضتو ولا بطيخو
لأنو المعارضه مسئوليه و مصداقيه وا وا كلام فارغ كتير جدا ممكن نقول عنو صفحتين هنا
عشان نتجاوز الحته دى
نفترض إنو معاويه رب المارضه و ود البشري رب الكيزان
المهم و الخلاصه
معاويه إتهم ودالبشري بي إنو بيشحد زوجات اصحابو
و ده كلام واضح ما داير ليهو شرح و أى شافع بيفهمو
ود البشري طالب بالإعتذار أو بالإثبات و ده حقو و شئ طبيعي جدددا
أصحاب ود البشري البيدخل بيوتم فى الغربه
و إحتمال يكون نسوانم بيعرفو زوجة ودالبشرى و قد يكون جمع بينهم برنامج إجتماعي سابق
ككل السودانيين و تبادلوا الزيارات و المبيت و زيارات الأولاد و البنات و شافو نسوان بعض عادي
طالبوا بمعرفة حقيقة ود البشري أو كذب معاويه لأنو طرف السوط وصل نسوانم و بناتم و إحتمال اولادم كمان

من الآخر

معاويه لما قال الكلام ده ما قالوا زول نيابه عنو
يعني ما جا زول هنا قال قابلته معاويه فى الشارع ولا معاويه قال لي
ود البشري بيشحد نسوان اصحابو
جا براهو هنا و كتبو
المطلوب
معاويه زي ما كتب براهو بكامل حريتو و أهليتو
المفروض يجي يكتب هنا ايضا واحد من الإتنين
يا يقول و الله ياخ أنا ثابت علي موقفي و يا جماعه ود البشري ده أعملو حسابكم منو وا وا وا
يا يقول أنا غلطان وودالبشري زول كويس و أنا قلته الكلام ده من راسي

أو ممكن يقول كخيار تالت عشان يمرق روحو
إنو كان مهكر ولا كان طاشم و هو بيكتب أو أو أو


أنا ما بعرف ود البشري ولا إتداخلته معاهو قبل كده
و لكني أعرف معاويه معرفه إسفيريه و اعده من اصدقاء الاسافير
لذلك أنصره ظالما أو مظلوما

إنتهي

Quote: لست متابع للمنبر منذ فتره و لكن دخلت ووجدت ما وجدت بغض النظر عن نضال معاويه و لا معارضتو ولا بطيخو لأنو المعارضه مسئوليه و مصداقيه وا وا كلام فارغ كتير جدا ممكن نقول عنو صفحتين هنا عشان نتجاوز الحته دى نفترض إنو معاويه رب المارضه و ود البشري رب الكيزان المهم و الخلاصه معاويه إتهم ودالبشري بي إنو بيشحد زوجات اصحابو و ده كلام واضح ما داير ليهو شرح و أى شافع بيفهمو ود البشري طالب بالإعتذار أو بالإثبات و ده حقو و شئ طبيعي جدددا أصحاب ود البشري البيدخل بيوتم فى الغربه و إحتمال يكون نسوانم بيعرفو زوجة ودالبشرى و قد يكون جمع بينهم برنامج إجتماعي سابق ككل السودانيين و تبادلوا الزيارات و المبيت و زيارات الأولاد و البنات و شافو نسوان بعض عادي طالبوا بمعرفة حقيقة ود البشري أو كذب معاويه لأنو طرف السوط وصل نسوانم و بناتم و إحتمال اولادم كمان من الآخر معاويه لما قال الكلام ده ما قالوا زول نيابه عنو يعني ما جا زول هنا قال قابلته معاويه فى الشارع ولا معاويه قال لي ود البشري بيشحد نسوان اصحابو جا براهو هنا و كتبو المطلوب معاويه زي ما كتب براهو بكامل حريتو و أهليتو المفروض يجي يكتب هنا ايضا واحد من الإتنين يا يقول و الله ياخ أنا ثابت علي موقفي و يا جماعه ود البشري ده أعملو حسابكم منو وا وا وا يا يقول أنا غلطان وودالبشري زول كويس و أنا قلته الكلام ده من راسي أو ممكن يقول كخيار تالت عشان يمرق روحو إنو كان مهكر ولا كان طاشم و هو بيكتب أو أو أو أنا ما بعرف ود البشري ولا إتداخلته معاهو قبل كده و لكني أعرف معاويه معرفه إسفيريه و اعده من اصدقاء الاسافير لذلك أنصره ظالما أو مظلوما

الأخ ناصر
كل عام وانت بخير
الموضوع وفي اكثر من بوست تم قتله بحثا وكتابة وتلفوناتا
ومعاوية بعضمة كي بورده قال "الكلام دا لا اساس له من الصحة"
وقال في البقاع الطاهرة:
"الكلام دا غلط مني وانا بعتذر منه واتمنى ان يكون ود البشرى هنا لأعتذر له في هذا المكانالطاهر"
الآن الكرة في ملعب ود ا لبشرى المتضرر الأول والأخير من اتهامات معاوية الباطلة

Quote: ابلع يازبير واتخارج بسترتك

إحنا مستورين يا خضر روح انت استر نفسك مع ابو حسين عامل ليك فرش متاع واذا عامل فيها غمران او احد المشاهدين الأعزاء ما عندة فكرة عن الموضوع حا أديم نبذة لتعرفوا كيف تلم المصائب المصابينا وان الطيور علي أشكالها تقع فالمدعو خضر الطيب قام عام 2006 م بالسطو ( اي قام بسرقه ) علي مقال طوله خمسون مترا اي والله خمسين متر ، واحد قعد يذاكر ويعيد ويصيغ ويرجع للقاموس عشان يخرج درر يجئ أخونا ( أخونا شنو نحن لا نتشرف ) بضغطتين كي بور الأولي يعمل بيها كوبي اها تصدقوا التانية عمل بيها شنو عمل بيها بيست هنا كأن الكسرة من عواسته اها الجماعه قعدوا يشبكو فوقة ويقولوا لية سلمت يدينك يا الغضنفر وهو يهز راسه متبسما ويدة تشيل وتخبط في صدرة دليل حبوره وامتنانه لهذا الشكر الذي يهطل علية ولم ينبت ببنت شفه ليقول للناس ديل يا جماعه هوي دة ما حقي أنا نقلته فقط ،
اها أنا قلت الكلام دة لييييييية عشان اقول انو خضر الطيب ليس سوي مجرد حرامي ولكنه كالذي يناصرة عيونه قوية ما بيعترف بالخطأ لكن معاوية برضو أحسن منو عشان لمن أصحابو ضغطوا علية جا هنا وقال يا صحاب محمد البشري عيدكم مبارك وعاوز يقفل الملف بكلمتين العبط ديل كانوا عفص لية سوسيوة في حوش بيتنا بالغلط
خلونا في خضر الطيب يا خضر الجماعه راجينك في الرابط دة

******* ســـرقــة مُبالغ فيها لكن لقيتك خطير *******

تقبل الله منك صالح الأعمال أخونا دكتور أحمد القرشي

ABUHUSSEIN

Quote: تقبل الله منك صالح الأعمال أخونا دكتور أحمد القرشي

أسألك بالله...و"خسمتك" بالنبي ما تجيب لينا الكابشر إياه...عارفك إيدك بتكون ماكلاك بالحيل...

دا من ناحية ،، ومن ناحية أخرى أثق في أن حصافتك لن تخذلك في الحفاظ على روح البوست الجميلة

التي خطها بمنتهى الجمال صاحب البوست سيدي الحاج ود القرشي...نسأله الله أن يفيض علينا من بركاته .


نقطة سطر جديد:

يا دكتور...
لن ألومك...لن أحمل عليك ...لن أتوقف من لعن البلاكبيري بتاعي...لن أسامح نفسي...
حبيب "ألبي" مولاي محمد المرتضى حامد أبلغني أنك سألت عن رقمي..وعرفت إنه أعطاك إياه...عاد يطرشني ما سمعت منك رنة..
لكن كنت أتوقع على الأقل رسالة مفادها إننا بخير وطريناكم بالخير في بقاع الخير..

تخريجة:
يشهد الله إننا نحبك حباً كثيراً...حتى أنا والأولاد كنا قد أعددنا العدة لاستقبالك بدارنا المتواضعة وتركنا أجزاءً مختارة بعناية

من فقيدنا الخروف لنقوم بعمل الشواء اللازم على ساحل البحر ثم نحتسي ما تيسر من مشروب "قارب الشر" Shar Boat

ولعلمنا بالمشقة البالغة التي ينالها حجاج بيت الله الحرام ،، "مسامحك يا حبيبي"..

ولكني لن أسامح نفسي...ودا آخر كلام..

..

.

Quote: الأخ العزيز / محمد البشرى الخضر لك التجلة والإعزاز وكل العام وأنت بخير في أول أيام العيد وبعد رمي الجمرات ، وكنت وقتها متعبا حيث قطعت المسافة من عرفات الى منى على الإقدام ، وفي طريقي إلى مكة كنت أبحث عن مكاتب البنك الإسلامي لشراء إيصال الهدي والذي بموجبه أوكلت البنك للذبح نيابة عني ، وللصدفة الغريبة ، ودونما سبب وجيه ، تركت المكتب الأول وذهبت للمكتب الذي يليه وعند الشباك وجدت بعض الموظفين السودانيين فخاطبني أحدهم قائلا : اتفضل بالباب واعتذرت ولكنه أصرّ على ذلك ، فدخلت المكتب وسلم علي بحميمية وبادرني قائلا: انت احمد القرشي؟ فاندهشت فقال لي أنه معاوية عبيد الصائم وأنه علم بحضوري إلى الحج ببوست ابتدره الاخ الاستاذ الطيب شيقوق ومن خلال صورتي في البروفايل تعرف على ، ثم قال لي معاوية ، والذي لم أتداخل معه من قبل في أي بوست ولا تربطني به أي معرفة سابقة ( كنت أتمنى أن أجد معك هنا الأخ محمد البشرى الخضر لأعتذر له وأطلب منه السماح في هذا المكان الطاهر وفي هذه الأيام المباركة )، فعجبت للأمر لأنني ما كنت أعرف عن الذي جرى بينه ومحمد البشرى الخضر وأضاف : إنني أخطأت في حق محمد البشرى الخضر وكتبت كلاما غير صحيح في لحظة غضب ، فقلت له لماذا لا تكتب بوست اعتذار لمحمد البشرى فوافق بحماس لايشوبه كذب أو مجاملة ، ففرحت أن إنسانا قد أخطأ وراجع نفسه وأقر بما اقترفه من خطأ وله النية الصادقة في الإعتذار ، فاتصلت لتوي بالاخ الصديق محمد المرتضى حامد لعلمي بعلاقة جميلة تجمعه بمحمد البشرى وطلب مني معاوية أن يتحدث مع الأخ محمد المرتضى من هاتفه الشخصي وبكرم وأريحية وكان له ما أراد وتحدث طويلا مع مرتضى وتحادثا في الواقعة . كانت تلك أول مرة ألتقي فيها معاوية عبيد ولقد أكرمني كثيرا ، وجلست معه لفترة طويلة في مكتبه وهو ومن معه من السودانيين الذين يؤتمنون على ملايين الريالات كل يوم ويقدمون خدماتهم للحجيج بل إن أحد أبنائه كان متطوعا في خدمة الحجيج،

صاحب البوست وضيوفه
تحية طيبة وتقبل الله حجك وغفر لك
وبعيدا عن موضوع البوست يحق لي ان ارفع صوتي
ويستمر النضال
ماشين في السكة نمد
عاش كفاح الطبقة العاملة
،،،،،،،،،،،،،،،،،،،،،،،،،،
وقد شهدنا كيف تسقط المبادئ

Quote: وفي طريقي إلى مكة كنت أبحث عن مكاتب البنك الإسلامي لشراء إيصال الهدي والذي بموجبه أوكلت البنك للذبح نيابة عني ، وللصدفة الغريبة ، ودونما سبب وجيه ، تركت المكتب الأول وذهبت للمكتب الذي يليه وعند الشباك وجدت بعض الموظفين السودانيين فخاطبني أحدهم قائلا : اتفضل بالباب واعتذرت ولكنه أصرّ على ذلك ، فدخلت المكتب وسلم علي بحميمية وبادرني قائلا: انت احمد القرشي؟ فاندهشت فقال لي أنه معاوية عبيد الصائم

يا جماعة ما قلنا هذه بنوك طفيلية وتقوم على مص دماء العمال .
اين كفاح الطبقة العاملة.
موظف في بنك إسلامي وشـيوعي ؟؟؟
هذه ما تركب إطلاقا .
وبعدين يا أخي كتب ما كتب عن ود البشرى وهو في حالة غضب ( نمشيها ) فماذا عن د. نجاة وكل الأعراض التى خاض فيها معاوية وبتصفيق من بني الأحمر ( برضهم زعلانين ) ؟؟؟
معاوية كل مداخلاته خوض في الأعراض فهل يعقل أنه (غضبان على طول ) وطول عمرو ما ضاق الفرح ؟؟؟
وكيف نعرف كتاباته الغضبية من كتاباته الفرحية .
يا أخي الغضبان يحل مشكلته ام يخوض في أعراض الناس ؟؟؟
عذر أقبح من الذنب !!!!
أتمنى انن يعتذر معاوية عن كل الذين خاض فيهم وان يمهر ذلك بتقرير طبي يثبت أنه كان في وضع غير طبيعي عند الكتابة ، كما يحق لنا ان نعامل كل كتاباته بأنها من مصادر غير موثوقة إلى ان يثبت غير ذلك .
تحياتي

Quote: الموضوع وفي اكثر من بوست تم قتله بحثا وكتابة وتلفوناتا ومعاوية بعضمة كي بورده قال "الكلام دا لا اساس له من الصحة"

محمد الشيخ اسعد الله صباحك وكل عام وانت بخير
في حاجة اسمها the ordinary course of the business ودة معناة ببساطة الصياغ الطبيعي للأحداث والطبيعي يا محمد الشيخ انو معاوية زعل من محمد البشري وعاوز يشتمه اها الطبيعي يقول ليه شنو أنا اقول ليك يقول لية يا ح م ا ر يا ح ي وا ن يا كل ب يا معفن اي حاجة من ديل لكن يقول القالة دة معناة انو عندو معلومة قالوها لية او رسلوها لية بطريقة او اخري يعني الكلام دة متداول بين اكثر من طرف ويمكن كمان السودانيين بيتونسوا بيه في جلساتهم الخاصة وأنها صدر حديث المجالس واحنا المعنيين بالأمر ما جايبين خبر يعني بالعربي سمعتنا تلاك واحنا اخر من يعلم اها لمن فاق معاوية وعاوز يلم الموضوع عمل شنو ، جا هنا وقال ببساطة يا محمد البشري واصحابو كل عام وانتم بخير ، اي والله بس كدة كأنو عفص رجلك في المواصلات بالغلط ولمن ضغطوا علية زيادة الناس جا قال ( لا اساس له من الصحة ) كيف ما لية اساس وانا اول خطابي دة قلت ليك السياق الطبيعي للأشياء ما بتتفق وحكاية لا اساس له دي لأنو الموضوع فية اساس
شفت لية انا حكاية لا اساس له دي ما مخارجة معاي
لك ودي

Quote: ABUHUSSEIN Quote: تقبل الله منك صالح الأعمال أخونا دكتور أحمد القرشي أسألك بالله...و"خسمتك" بالنبي ما تجيب لينا الكابشر إياه...عارفك إيدك بتكون ماكلاك بالحيل... دا من ناحية ،، ومن ناحية أخرى أثق في أن حصافتك لن تخذلك في الحفاظ على روح البوست الجميلة التي خطها بمنتهى الجمال صاحب البوست سيدي الحاج ود القرشي...نسأله الله أن يفيض علينا من بركاته .

قبل ما تخسمني أنا إحتراماً للدكتور ماسك يدي رغم أن البوست أصبح مرتع لمن هم على شاكلة الكذاب..

محمود ياجميل

Quote: "قارب الشر" Shar Boat

دى بالغتا فيها ياصديق

متعه غير عاديه ياحبيب

د. أحمد القرشي ..
حجاً مبروراً وذباً مغفوراً إنشاء الله ...

Quote: الآن الكرة في ملعب ود ا لبشرى المتضرر الأول والأخير من اتهامات معاوية الباطلة

في البوست الذي أسماه معاوية (إعتذار)، قال ود البشرى إن إقرار معاوية بالخطأ والإعتراف بالكذب يكفيه .... ثم تحفظ على مسألة قبول الإعتذار. لذا يخيل لي إنو ود البشرى قام بما في استطاعته وما في طاقته، ولا يستطيع أي شخص إجباره على قبول الإعتذار ......... إذاً، ما دام إكتفى ود البشرى بإقرار معاوية، أقترح أن نترك الأمر عند هذا الحد ولا يكلف الله نفساً إلاّ وسعها.

إحترامي،،

Quote: والله يا جنابو وحدة المسافة دي كان مفروض تعمل بي انصر اخالك ظالما او مظلوما وتقول بي خشم الباب لمعاوية با تعال قول انا بهت ود البشري اما بالنسبة لدي ود البشري كان قبل كلام اسف و معليش بيكون في احتمال انه كلام معاوية فيهو انه وبعدين حسابنا مع ود البشري ننصره يجب حقو .......... او تاني ما يعمل كده ( في حالة قبول اسف )

*** لكل مقام مقال يا سنجك
وقد قلتها لمعاوية بالباب عديييل فى السعودية،
ولغاية قبل اسبوعين بالتلفون وهناك تفاصيل كثيرة ،
ولكن البوسـت اتفتح كمبادرة حميدة للصلح لم أشأ الخوض فى التفاصيل
عبر البوست فهي من صميم عمل الشيطان . هذا بالاضافة الى أننى لم أتداخل
أبدا فى كافة البوستات ذات العلاقة بين الطرفين ولا البوساتات المشابهة - كمبدأ -

*** ود البشرى معاه ألف حق فخطأ معاوية بين ولا خلاف ومن الطبيعي
أن أقف الى جانبه بغض النظر عن العلاقة الشخصية والاحترام ومن المتسبب هو
أم معاوية أم طرف ثالث .

*** ومعاوية أخطا مرتين مرة بالقدح في حق محمد والاخرى بأن يأتي هذا
الخطأ من شخص أكن له من الاحترام و التقدير قدرا يعرفه هو . وهاهو يصرح بالاعتذار .

*** وأعتقد بعد ذلك ان رجاحة عقل ود البشرى وفطنته لن تمكنان -الفجور فى الخصومة- اليه سبيلا .

Quote: "قارب الشر" Shar Boat

*** يا استاذ

دى بي كم Card أقصد Cup..........لوووول

Quote: *** لكل مقام مقال يا سنجك وقد قلتها لمعاوية بالباب عديييل فى السعودية، ولغاية قبل اسبوعين بالتلفون وهناك تفاصيل كثيرة ، ولكن البوسـت اتفتح كمبادرة حميدة للصلح لم أشأ الخوض فى التفاصيل عبر البوست فهي من صميم عمل الشيطان . هذا بالاضافة الى أننى لم أتداخل أبدا فى كافة البوستات ذات العلاقة بين الطرفين ولا البوساتات المشابهة - كمبدأ - *** ود البشرى معاه ألف حق فخطأ معاوية بين ولا خلاف ومن الطبيعي أن أقف الى جانبه بغض النظر عن العلاقة الشخصية والاحترام ومن المتسبب هو أم معاوية أم طرف ثالث . *** ومعاوية أخطا مرتين مرة بالقدح في حق محمد والاخرى بأن يأتي هذا الخطأ من شخص أكن له من الاحترام و التقدير قدرا يعرفه هو . وهاهو يصرح بالاعتذار . *** وأعتقد بعد ذلك ان رجاحة عقل ود البشرى وفطنته لن تمكنان -الفجور فى الخصومة- اليه سبيلا .

طيب ما كان من الاول .......... تسلم

Quote: يا جماعة ما قلنا هذه بنوك طفيلية وتقوم على مص دماء العمال .

يا شيخنا ما بالغت في دي!؟

هل تعلم انو البنك الاسلامي المقصود دا هو (البنك الاسلامي للتنمية)؟
وهل عرفت عن اياديه البيضاء على السودان وكل العالم الاسلامي (بحكم انو بنك دولي اسلامي)
وهل سمعت بمشروع المملكة للإفادة من لحوم الاضاحي، والخير البتقدمو للدول الاسلامية المحتاجة!؟

انت بالذات كنت اتمنى الا تخوض فيما لا تعرف!!















--------

طلعوا البنك الاسلامي من صراعتكم السياسية الهايفة دي
وداك معاوية ليكم اللحم والعضم ذاتو .. ما اظن يجوز شرعا توزيعه

ولا شايف الشيوعيين ليهم ذنب هنا في الصراع البائس دا

وقديمن قيل بحق:
شيوعي مجاور خيراً من الف كوز متعاور!

Quote: ** ياخي قل خيرا أو خيرا !!! وحدة المسافة بيني وبين الطرفين تمنعني من التعليق عليك بأكثر من ذلك فدم بخير .

يا الطيب عثمان يوسف
يا ريت ياخي كان تعلق علي بأكثر من ذلك ...النصيحه دي اولي بيها صاحبك الماحصل قال كلمه واحده خير
يعني ابداً ربنا ما جاد عليك بي ولو كلمه واحده تنصحوا بيها لقول الخير ..جاي تنصحني انا !!

Quote: هل تعلم انو البنك الاسلامي المقصود دا هو (البنك الاسلامي للتنمية)؟ وهل عرفت عن اياديه البيضاء على السودان وكل العالم الاسلامي (بحكم انو بنك دولي اسلامي) وهل سمعت بمشروع المملكة للإفادة من لحوم الاضاحي، والخير البتقدمو للدول الاسلامية المحتاجة!؟ انت بالذات كنت اتمنى الا تخوض فيما لا تعرف!!

قيقاسلام وعيدك مبارك
أعرف كل ذلك جيدا وأكثر !!!
هذا ليس ما إعتقد ، بل هو كلام الرفاق عن البنوك الإسلامية والإقتصاد الإسلامي والبلاد الإسلامية .
وغريبة إنك ما فكيت الشفرة .
كنت مفروض ألونها بالأحمر ، لكن معليش !!!

Quote: ولا شايف الشيوعيين ليهم ذنب هنا في الصراع البائس دا

_________________________________
الجماعة باعو معاوية ولا شنو يا قيقا

بعيداً عن موضوع البوست

حتة البنك الإسلامي

يا أخوانا البنك الإسلامي دا معاوية ليس موظفاً فيه

ولكن هذه وظائف موسمية لجمع الهدى والأضاحي

تحت إشراف مسؤول من البنك الإسلامي

يعني الموضوع دا بيعرفوها ناس جدة كلهم

فخليكم في موضوع البوست الذي يحمل إعترافاً صريحاً من معاوية بأنه قال كلاماً ليس له أساس من الصحة (بالمجرد كلام قال وقيل)

ودي الحتة المهمة

_____________________

لكن برضو الكلام دا كان ممكن يجي يقولوا معاوية بنفسه ما بحتاج لواسطة

النجيضة معاوية اخطأ في حق ود البشرى وماعرف يتخارج من الورطة دي إلا بعد ان ضاق عليه الخناق بسبب عناده طبعا لانه كان بيعتبر ده نوع من النضال
حكاية انو قابل فلان واتصل على فلان عشان يوريهو انو هو فعلا غلطان وعاوز يعتذر وووالخ ابدا لن تقلل من حجم الضرر الذي الحقه بمن بهتهم بما ليس فيهم (المنبر هو مكان النزاع وليس خارجه)
النقة الكثير دي في شنو ماعارف
وصدق من قال الشيطان يكمن في التفاصيل ...

Quote: هذا ليس ما إعتقد ، بل هو كلام الرفاق عن البنوك الإسلامية والإقتصاد الإسلامي والبلاد الإسلامية .

لعلمك المكتب الذى يعمل فيه معاوية

لتحصيل رسوم الاضاحى للبنك الاسلامى

مكاتب شركة الراجحى

وبعد يعنى لو معاوية اشتغل فى بنك

اسلامى ؟

انتو كدولة اسلامية بتشيلو قروض

من صين الشيوعية

شيخ محمد كل عام وانتم بخير

Quote: هذا ليس ما إعتقد ، بل هو كلام الرفاق عن البنوك الإسلامية والإقتصاد الإسلامي والبلاد الإسلامية .

وماهو قول الرفاق في الاقتصاد الاسلامي، ؤ وين قالوهو
عديت 11 سنة رفيقاً من ضمن الرفاق ديل، وما سمعت ولا قريت شيء بتكلم عن الربا .. وقالوها باللفظة دي تحديداً بالله!؟
بالغوا كلو كلو وشذوا


















-------

ثم شنو حكاية الرفاق الباعوا ول اشتروا معاوية البتسأل منها دي
زول جا اتشاتر وبهت الناس، ما دخل اي مجموعة ينتمي اليها اجتماعية ول سياسية او حتى عرقية او جهوية باخطاءه الشخصية؟
كل شاة معلقة من عرقوبها .. ول ما ياهو الحساب الفردي!؟
كلٌ سيلاقيه فرداً
انتو كلو شغلكم (جماعة) ول كيف؟
يا اخوي هوي كل زول ياكل نارو
وانت دا ذاتك اتحمل نتيجة كلامك الساي اعلاه
وبطلوا صيد في المياه العكرة ... الملا جمال الدين السيلفي (بتاع سلفيا) اصلو ما خاتي عليكم كلو كلو

دكتور أحمد القرشى حجاً مبروراً و سعياً مشكوراً.

Quote: وبطلوا صيد في المياه العكرة ... الملا جمال الدين السيلفي (بتاع سلفيا) اصلو ما خاتي عليكم كلو كلو

خلاص جيت يا "الكديباوي"*

أهــا.. المرة الفاتت شرحنا، تاني ما تجي تقول لي دي معناها شنو
_______________________
* كديباوي على وزن سيلفاوي لغة و(احتمال) مضموناً

التحية لك أخى د/ودالقرشى..وربنا يتقبل حجتك......

والتحية لكل المتداخلين.

متابع كل مادار بين ألأخ/معاوية عبيد الصائم وألأخ/ودالبشرى وشى مؤسف حقاً أن يحدث مثل هذا فى المنبر الذى كان من باب أولى أن يوطتد العلاقات ألأجتماعية ويزيد من الوعى الثقافى ويكون لنا واحة تلاقى تفرد لمواهبنا مساحة للنشر ومتعة لنا فى القراءة

هناك من يحمل نوايا حسنة لأصلاح ذات البين وهناك من يستمتع بمايدور لأن فى إنهزام خصمة إرضاء للذات.

كما قال أخونا ودالقرشى بأن ألأخ/ودالصائم أعترف بخطأه فى ودالبشرى الذى نعرفه هنا بحسن الخلق ويريد ألأعتذار له ,فعلى ودالصائم أن يعتذر لودالبشرى فى هذا المنبر الذى أخطاْ فيه عليه..

فتح البوستات والمداخلات فى ضرر ودالبشرى ,ستظل تذكر إتهام ودالصائم له وتضر بسمعته أكثر رغم أننا واثقين منه إلا كل الناس لاتعرف ودالبشرى ..يجب أن نراعى بأن القراء متغيرين وأن من لايعرف لآن يعرف غداً ....أرجو ملاحظة ذلك.

نسأل الله أن يصلح ذت البين .ويصفى النوايا ويديم المودة وألأخاء بين ألناس.

تقديرى وإحترامى للجميع.

أولا اعتذر لعدم مقدرتي على الرد في الفترة الماضية

وذلك نسبة لوعكة صحية ألمت بي منذ حضوري من الحج

وما زلت متأثرا بها حتى الان حيث لم أبرح مسقط حتى هذه اللحظة ولم أذهب الي مكان عملي وسكني الذي يبعد مسافة 250 كيلو من مسقط

حيث أصر أصدقلئي على بقائي معهم حتى اتعافى تماما

الشكر اجزله لكل المتداخلين ولكل من بارك لي الحج وعقبال الجميع في العام القادم

زيارة هذه الأماكن المقدسة

وأدعو الله ان يسود التسلمح والود في هذا المنبر

وان ننأى بانفسنا عن الإساءات والتجريح والخوض في الأعراض وأن نترفع عن الصغائر

وان نطرح وجهة نظرنا بهدوء ومنطق وموضوعية لنرفع من قيمة وادب الحوار في هذا المنبر

ولتسود روح الإعتذار حينما نخطئ وأن نعترف بالخطأ ونصدق بأن الصفح والعفو ليس عارا كما قال الأحنف

فقيمة هذا المنبر فيما يطرح فيه من مواضيع ، فنحن من نرفع من مكانته او نحط منها بكتاباتنا وإحترامنا لأنفسنا والآخرين

أشكرك عزيزي محمد البشرى خضر فاني أراك من أهل التسامح والعفو والكرم

والشكر لك عزيزي معاوية لثقتك بي لحمل هذه الشهادة

وارى ان البوست قد ادى رسالته ، واتمنى من الإخوة المتداخلين ان يقولوا خيرا في هذا الموضوع

ولكم جميعا الشكرا اجزله مرة اخرى وادعو الله ان يحفظكم من كل شر وان يديم المودة والمحبة والمعروف بين الجميع

ولكم كل الود والاخترام

Quote: يا الطيب عثمان يوسف يا ريت ياخي كان تعلق علي بأكثر من ذلك ...النصيحه دي اولي بيها صاحبك الماحصل قال كلمه واحده خير يعني ابداً ربنا ما جاد عليك بي ولو كلمه واحده تنصحوا بيها لقول الخير ..جاي تنصحني انا !!

*** يا قاسم محمد

إن لم تجد فى كلامي ما يفيد فلك منى الاعتذار قدر ما يكفيك .

اولاً يا دكتور مبروك الحجة ومقبولة إنشاء الله

وربنا يعافيك من المرض وتعود الى عملك ومسقط راسك بالسلامة

مشكور كثير على هذا البوست وربنا يعمر القلوب بالمحبة

وكويس أنك شفت معاوية عينك عينك وحسيت كم هذا المعاوية طفل مشاغب جداً
وفوق ذلك انسان لذيذ ولطيف

والذي يعرف معاوية يعرف أن ماكتبته بيدك هنا لم يكن كلام معاوية فقط
ولكن احساسك بصدق ومصادقية معاوية في الاعتذار

ولو لا أن ود البشرى بستجق التقدير والاحترام
انا متأكد أن معاوية كانضرب الطناش من الموضوع من زمان
..........
وصدقني يا ود البشرى لو التقيت معاوية سوف تنسى كل ماسببه لك من الم وستحبه مثل أخيك وأكثر