بكري أبو بكر و الكدايس و لبن المشلعيب

(يقال أن قطةً كانت تُحاول بلوغ إناء فيه حليباً رُفِع عنها و لمّا صعُب عليها أمر لحاقه و أصابها اليأس و الوهن قالت:
- و من قال أني أُريد حليباً)

حقيقة ترددتُ كثيراً قبل كتابة هذا البوست وهو رُبّما لقناعات شخصية تكوّنت لدي بالتقادم و أنا وسط خضم مواقع الحوارات السودانية السودانية على الإنترنت و مدّها و جذرها و تموُّجاتها و (حركاتها) و سكناتها في أن لا أغتاب أحداً كان يُشكِّل حضوراً و مشاراكات حُرم من كلاهما لأن يعود و بعدها لكل مقامٍ مقال و إن كُنتُ في بعض الحالات قد كسّرت قواعدي هذه لعدم إمكانية من أكتب فيه من أن يكون حضوراً هُنا يوما ، و حين فِشلت في إيصال صوتي من خلال موقع هو فيه و يديره ، و هُنالِك عدد من الأعضاء ههنا تحديداً كثيراً ما إغتابوني و و كالوا لي من الإساءات ما يُثقِل كاهِلهم هُم لا أنا و عُدت و يعلم الله ما تعرّضتُ لأحدهم حتى الآن وهم هنا الآن حضور إلا من نكأ الجراح بعد العودة (عمنا مرشح الرئاسة مثالاً).
تجربتي الشخصية مع المنتديات السودانية على قِلّتها هي انعدام الُحرِّيات و ديكتاتورِيّة صاحب الموقع و إدمانه لها هو و آدمِنه و مشرفيه.
إختلفت شخصياً مع بكري أبوبكر و كانت العلاقة ما بيننا لا تتعدّى حدود هذا المنبر ، ساورتني حوله الشكوك فيه و في أنّه مُسيّرٌ غير مُخيّر ، ظننته تبيعةً لا رأي له إلا ما يراه من يتبعهم ، و كان لي العذر ربما إذ أنه قد كوّن عنِّي فكرةً ما كان قد عرِفني حقيقةً قبلها ، ربما أن الفِكرة قد تبدّلت لدى كِلينا حالياً فقد التقينا و عرفت كم هو إنسان شهم و كريم و مُثقّف وواعي و أخو أخوان و غاية في البساطة التي لا تحتاج معها إلى وساطة للتعامل معه ووجدته حالياً و بعد طوال هذه الفترة رجلٌ يستحق التكريم من خلال عضوية منبره سودانيزأونلاين فكم كرّم و أسهم في تكريم كثيرين سواء بمشاركته الشخصية أو إتاحة منبره لعضوية تقوم بذلك لأجل آخرين داخل و خارج المنبر ، أعود مرة أخرى إلى مرحلة أيام خلافي معه و كتابتي فيه بوستاً واحداً في قرية مجاورة لم أزده ، فرّغتُ فيه كل شحنتي من غضب و حنق تجاهه و أغلقت الملف ولا يزال البوست موجوداً لا أُنكِره البتة و إن كنت أوقن بأنني جانبت فيه جادة الحق بعدما تعرّفت على الرجل و حقيقته.
بكري أبو بكر ربان سفينة ناجح جداً أقولها مِلء الفم رغم اختلاف المشارب و الإتجاهات ، أؤمن تماماً بسياسته في إدارة منبره ، يُعجبني جداً عدم تداخله مع الأعضاء إلا نادراً ، من حقه أن يستفيد تجارياً من موقعه بالصورة التي يراها بعد كل العناء و الرهق الذي صاحب و لا يزال يصاحب مسيرته مع الأون لاين و أعلم أنها لم تكن هينة ولا يسيرة .
بكري أبوبكر تهنئتي القلبية الصادقة بالنجاح المنقطع النظير لك و للأون لاين (شيخ المواقع السودانية) كما يُطلق عليه حالياً في السودان.
بكري أبوبكر إسمك مثبّتاً في عُدة قُرى مجاورة لا تصلح لأن يُطلق عليها منابر حوار سودانية بأية حال من الأحوال فهي تُدار وِفق أجِندة خاصة جداً لأصحابها و هو الحال المُختلِف هنا تماماً ، فأحدها تسيِّره إدارته لجانب النظام و يتم فيه تحذير الأعضاء من الكتابة ضد النظام رغم أن ذات الإدارة تكتب بأسماء وهمية تنهش لحم مُكوِّنات هذا النظام ما ظهر منها و ما بطن تُظهِره و تُعرِّيه في محاولة مريضة لتحريك سكون الموقع ، و قد تم الكشف عن ذلك في أكثر من مكان.
و في قرية أخرى مناوئة تماماً للنظام كذلكم نجد اسمك الكريم يهز صداه جنبات ذلك الموقع و من إدارته التي ما ذاع صيتها إلا هُنا ، و قد تم تخصيص أكثر من ثلاث بوستات مُثبّتة عنوانها هو إسمكم العلامة ، رغماً عن أنك تفعلُ العكس تماماً و تبتعد عن سِيرهم و مسيرتهم و ما شابها و ما يشوبها و لكن من يُعض اليد التي مُدت له يوماً !!!؟
و الغريب أن الحالتين المذكورتين بعاليه و المعروف عن إحداهن انتماءها الفظ للنظام و في حقيقته إرتماءاً لمصالح مالية بحتة و بحث عن شهرة مفقودة و مكانة غير مستحقّة ، و الأخرى التي يتجذّر فيها كره النظام لأبعاد الغالب فيها هو الإثني أكثر من غيره ، كلتاهما تجعلان من بكري أبو بكر عدواً مكروهاً غير مرضي عنه و مغضوب عليه.
و المفترض أن تُحِبّه إحداهُن و تكرهه الأخرى فهو إما في صف النظاملتُحِبّه تلك أو ضده لتعشقه الأخرى ، أي أنه مع توجهات هذه أو تِلك ، لكن أن تختلف عليه كلتاهما فالأمر يتعدى أمر السياسة و الحوار لأنفاق أخرى ولا شك.
ما نبّهني لهذا الأمر أخٌ كريم قال لي (إلحق) فأنت مُتهجّمٌ عليك من بعضهم و بحدة يُبشِّعون بك و باسمك و يُشبِعونك شتماً و إساءة فمررت عليهم (على غير العادة) و قرأت و ضحِكتُ عليهم و جال بخاطري ما أكتبه الآن في هذا البوست.
بكري أبو بكر يكفيك شرفاً أن سودانيز أون لاين تُلقِي بظلالها كثيفةً علي عُدة مواقع أنت و موقعك مادتهم الرئيسية التي يتناولون ، يكتبون في مواقعهم عن أيام خالية في الأون لاين (سيد الإسم) و يتحدّثون عن خلايا لهم فيه تارةً يدافعون عنها هُنالك و أحياناً يُشجِّعونها على التصدي لفلان و علان و بكري و قوانينه و في أخرى يُحرِّضونهم على التوقف أو غيره (يكاكو هِنا و يبيِّضوا هِناك) و أجمُل ما فيك سكوتك عنهم و كظمك غيظك إن كان لهم ثِقلاً يغيظ.

Quote: بكري أبو بكر ربان سفينة ناجح جداً أقولها مِلء الفم رغم اختلاف المشارب و الإتجاهات ، أؤمن تماماً بسياسته في إدارة منبره ، يُعجبني جداً عدم تداخله مع الأعضاء إلا نادراً ، من حقه أن يستفيد تجارياً من موقعه بالصورة التي يراها بعد كل العناء و الرهق الذي صاحب و لا يزال يصاحب مسيرته مع الأون لاين و أعلم أنها لم تكن هينة ولا يسيرة .

100%

Quote: Quote: بكري أبو بكر ربان سفينة ناجح جداً أقولها مِلء الفم رغم اختلاف المشارب و الإتجاهات ، أؤمن تماماً بسياسته في إدارة منبره ، يُعجبني جداً عدم تداخله مع الأعضاء إلا نادراً ، من حقه أن يستفيد تجارياً من موقعه بالصورة التي يراها بعد كل العناء و الرهق الذي صاحب و لا يزال يصاحب مسيرته مع الأون لاين و أعلم أنها لم تكن هينة ولا يسيرة .

بكري يستاهل نكسر ليهو قطب متجمد بحالو ياعمر

علاء يقول الحق وعن تجربة

حاول جرب منابر ثانية لتعرف مصداقية كلامو

الله يسامحنا على تحمل بكري لمصايبنا التي ينوء غيره على تحملها


الجفا ده عارفنو حقكم

Quote: بكري يستاهل نكسر ليهو قطب متجمد بحالو ياعمر علاء يقول الحق وعن تجربة حاول جرب منابر ثانية لتعرف مصداقية كلامو الله يسامحنا على تحمل بكري لمصايبنا التي ينوء غيره على تحملها الجفا ده عارفنو حقكم

الحبيب حيدر
يا صديق حبابك و إنت عارِف مرارة تجاربنا
و لكن نتاجها كان أنني أنا علاء الدين يوسف علي محمد
لا أكتب حالياً إلا في سودانيز أون لاين (سيد الإسم) و لا يوجد خيار لي غيره في المستقبل القريب
يعني يوم بكري يعمل لينا خُوّة فرتِق معناها نرتاح في عضمُنا دة من الإنترنت و القعاد الكثير فيهو و يبقى للشغل بس
ياخي بكري دة النجاشي ذااااااااااااتو حق النِت
الصفة دة حاولنا إلباسها لأحدهم بس طلعت أوسع مِنو
و لا يستحقها غير بكري

مشكور يا حيدر

التحية و الإحترام
لكم وللأخ الوقور بكرى أبوبكر

Quote: التحية و الإحترام لكم وللأخ الوقور بكرى أبوبكر

و ليك يا مكّاوي
مشكور

الحبيب علاء الدين

توقعت ترحيبك بى عضوا بالمنبر , لقيتك نازل تكسر فى الجليد لبكرى؟

اظنك عايز تعمل اعلان للمقررات الدراسية فى الموقع , اشتم رائحة صفقة قادمة ( وجه ضاحك )

لك الود

Quote: بكري يستاهل نكسر ليهو قطب متجمد بحالو ياعمر علاء يقول الحق وعن تجربة

بنهزر ياحيدر ونحن الجفا ده ماحقنا ....... في احنه من الشوايقة ؟


حمداً لله على سلامة قريبك ودفعتي بابكر ......

Quote: بنهزر ياحيدر ونحن الجفا ده ماحقنا ....... في احنه من الشوايقة ؟

عارفك والله

قاصد جفا العساكر?????

بعدين علاء ده زول وغد لايشكر بالساهل

غايتو كان عندو غرض تاني - زي ماقال مغرض اخر فوق - ياني المكاجرو هنا

Quote: بعدين علاء ده زول وغد لايشكر بالساهل غايتو كان عندو غرض تاني - زي ماقال مغرض اخر فوق - ياني المكاجرو هنا

حيدر أضحكتني والله
وغد عديييييييييييل كِدة
ما بشكِّر بالساهل دي في و حقيقة و أكره التملُّق و الرياء و المجاملة الفي الفاضي
لكن بكري جعل من نفسه قاعدة مستثناة عندي

لكن الغرض القالوا أخونا الكاشِف ود الرشيد دة واللهِ ما عندي ولا شِتِّين
يعني بوست خالي من الأغراض
بعدين إنت قايل أب صلعة داقس للدرجة دي
دة زول مفتِّح و ماااااااااااااا بِنغشّة بي أخوي و أخوك كدة
ياخي دة لو عُزاز شامي ذااااااااااااتة كانت محلِّي ما بدقس ليها
خليك علاء الدين الأرعن دة

Quote: بنهزر ياحيدر ونحن الجفا ده ماحقنا ....... في احنه من الشوايقة ؟ حمداً لله على سلامة قريبك ودفعتي بابكر ......

حبيبنا عُمر
تعرِف أنا ذاتي لو قالوا لي بتعرِف تكسِّر تلِج حا استغرب
لكن جد بكري يخلينا نحاول

Quote: الحبيب علاء الدين توقعت ترحيبك بى عضوا بالمنبر , لقيتك نازل تكسر فى الجليد لبكرى؟ اظنك عايز تعمل اعلان للمقررات الدراسية فى الموقع , اشتم رائحة صفقة قادمة ( وجه ضاحك ) لك الود

عفواً للجميع
للتجاز و الرد أولاً على المدعو إبراهيم الرشيد هذا
منذ متى و أنت عضواً بالموقع يا رجل!!!!؟
والله والله والله يعميني بوست ليك أو إسمك كان جا طاشي قدامي
ياخي والله ألف ألف ألف مرحب بيك
أعمِل ليك ساتِر و ألبس دروع أنت في سودانيز أون لاين يا حبيب

Quote: أعمِل ليك ساتِر و ألبس دروع أنت في سودانيز أون لاين يا حبيب

علاء ياحبيب

انا جديد لنج على المنبر وغايتو كان ما حلفت كنت انت العملت الساتر ولا قلت يافكيك

لك الود

Quote: تاريخ التسجيل: 22-04-2009 مجموع المشاركات: 37

37 مشاركة و تقول لي جديد

كدي أول حاجة نمشي الإرشيف و نشوف مشاركاتك
لأنو باقي هِنا في تصنيف شديد نشوفك إخترتة ياتو مُعسكر
في النص ماف
النص هِنا يعني مرمطة من الطرفين النقيضين
شتارة شديدة في البلد دي يا إبراهومة

Quote: بكري أبو بكر يكفيك شرفاً أن سودانيز أون لاين تُلقِي بظلالها كثيفةً علي عُدة مواقع أنت و موقعك مادتهم الرئيسية التي يتناولون ، يكتبون في مواقعهم عن أيام خالية في الأون لاين (سيد الإسم) و يتحدّثون عن خلايا لهم فيه تارةً يدافعون عنها هُنالك و أحياناً يُشجِّعونها على التصدي لفلان و علان و بكري و قوانينه و في أخرى يُحرِّضونهم على التوقف أو غيره (يكاكو هِنا و يبيِّضوا هِناك) و أجمُل ما فيك سكوتك عنهم و كظمك غيظك إن كان لهم ثِقلاً يغيظ.

كلام راجل في حق راجل

أحبكما

Quote: كلام راجل في حق راجل أحبكما

و لك حباً بطول نهر النيل يا بيلو
مشكور يا حبيبنا

علاء الدين انتا ذايق منى مالك؟؟؟

كم مرة ومليون مرة اتحكحك فيك وانت لابيك ولا عليك

المهم انا بعرفك واكلت معاك وجيتك فى بيتك

Quote: علاء الدين انتا ذايق منى مالك؟؟؟

مرتضى المر

إنتة بزوغو مِنّك ياخ
لكن بيتي ياتو
بتاع الكامب ولا قُندوا ولا مجمع ديفيكا سوسيتي ولا الدكن !!!!؟
مبروك البنية ياخ و تحياتنا لس جي

والله يا أب صلعة
عشان خاطر تلجنا المعدوم عِز السخانة دي و فارشنو ليك مع ندرة الكهرباء كمان
مفروض تجي تخت لي وردتك الما عِندك غيرة ديك و تشتِّت

تسلم يا علاء

بكري راجل اصيل وقلبه كبير,,,, ود قبايل


ما كسير تلج,,,, عن تجرية

ربنا يوفقه ويديه الصحة والعافية

وانت اصيل يا علاء,,,, تسلم

كتر خيرك يا علاء ..

شهادة مشهودة ...

Quote: مفروض تجي تخت لي وردتك الما عِندك غيرة ديك و تشتِّت

ورد بس ياعلاء?

وباسويردين هدية ..

تجيب بيهم اثنين عكاليت شغالين في مصنع تلج

واحد يدردق والتاني يدشدش سااااكت





بالجد عمك إتلوم معانا

بكري زول ناجح يا علاء وبذل جهدا خرافيا ليصنع هذه السفينة وليُبقيها مبحرة في محيط متلاطم الأمواج كما ترى،
يكفي أن بسبب هذا الموقع تمت كفالة ايتام وعولج نفر كثير بالتبرعات وتواصل خلق انقطع عن أحباب ردحا من الزمان،
يكفي هذا الموقع أن عرفنا بأناس ما كنا لنعرفهم لولاه وأنه يطلعنا على مدار الساعة على أنباء السودان والعالم وما
يبدعه أهلنا في الدياسبورا من القطب إلى القطب.
هذا بعض مما أنجزه بكري وسهام أهل السوء تنتاشه بين الفينة والأخرى جاهدة لتخريب هذا الصرح.
له الله،
ولك يا علاء الثناء.

Quote: بكري زول ناجح يا علاء وبذل جهدا خرافيا ليصنع هذه السفينة وليُبقيها مبحرة في محيط متلاطم الأمواج كما ترى، يكفي أن بسبب هذا الموقع تمت كفالة ايتام وعولج نفر كثير بالتبرعات وتواصل خلق انقطع عن أحباب ردحا من الزمان، يكفي هذا الموقع أن عرفنا بأناس ما كنا لنعرفهم لولاه وأنه يطلعنا على مدار الساعة على أنباء السودان والعالم وما يبدعه أهلنا في الدياسبورا من القطب إلى القطب.

أخي محمد المرتضى
الرجل الذي يجنح دوماً إلى السِلمْ و ينادي بالتي هي أحسن
مشكور على الإضافة الأنيقة في حق ربان السفينة و هو قيض من فيض كما أعلم اللهم زده و بارِك
و دة يمكن سبب الحسد و العين لذلك لابد من إيجاد رِتينزة أون لاين أو فكي إلكتروني يدفِّق لينا محاية في الأون دة تولِّع نار تُقّابة تُضيء لمن يرغب في جادة الطريق و يتفحّم من يود خرابا من ذات النار
تسلم يا حبيب

Quote: ورد بس ياعلاء? وباسويردين هدية ..

حيدر يا صديق
إنت بتهظر يا معلِّم !!!؟
ياخ أب صلعة دة باسويردي دة ذااااااااااتو بكون عندو فيهو راي


والله هو أخو أخوان و حبّوب و ضكران
مافي كلام
لكن تعرِف أخوك زول في حالوا في الحاجات دي
أصلو ما حصل رشّحتة لي زول كدة إلا أجي ألقى ترشيح و أقوم بالتثنية
الزول الوحيد الرشحتو و دخل المنبر هو عمر الفاروغ
يعني الفاروغ دة إحدى حسناتي إن كان مُحسناً و إحدى سيئاتي إن كان مُسيئاً
اللهم فإن كان مُحسناً فزده إحساناً و إن كان مسيئاً إنشاء الله بكري يغتِّس حجر باسويردو

مشكور يا ود الباوقة يا حبيب
و الليلة يوم كِسّير التلِج العالمي يا بكري
أبسِط يا عم

Quote: تسلم يا علاء بكري راجل اصيل وقلبه كبير,,,, ود قبايل ما كسير تلج,,,, عن تجرية ربنا يوفقه ويديه الصحة والعافية وانت اصيل يا علاء,,,, تسلم

أبو السيوف مرحبتين بيك ياخ
نحن الفروع و إنتو الشجرة الأصل
متابع مداخلاتك بالذات في البوستات المشلّخة
مشكور يا راقي
بكري حقيقة يستحِق التكريم

الحبيب علاء الدين( ما حقت الانصار )

الموضوع جاب ليــه فى نظرى التزامات ادبية تجاه بكرى ابوبكر :


هــل انا / انت / نحن ...مدينون للاخ بكرى ابو بكر ؟


على المستوى الشخصى انا مدين لــه بالكثير الذى لا يعلمه هو نفســـه .

الاخرين ما عارف ..

العزيز بدر الدين إسحق
تحياتي
كل الناس الهِنا أو معظمهم لبكري أفضال عليهم
أنا شخصياً إستفدتة كتير جداً من بكري و من المنبر و العضوية فوائد لا تثحصى و لا تُعد
و بما إني صاحب أكبر عدد بوستات و مداخلات محذوفة أو من هذا الوسط و كذلك ممن حققوا رقماً قياسياً في عدد مرات الفصل و الإيقاف فكلامي عن بكري لا يمكن يكون مجرد مجاملات خرقاء بل هي حقيقة الأمر
داك كلو كوم و بكري كإنسان و مدير للموقع دة كوم تاني
تسلم يا بدر الدين

السخانة عندكم كيف



علاء ماكـ طيب

Quote: السخانة عندكم كيف علاء ماكـ طيب

طييييييييييييب نحمد الله يا أحمد عبد الله
السخانة كانت ألف مع الكهرابء القاطعة طواااااااااااالي دي
هسي بعد لملمة تلِج الخرطوم و المُدن المجاورة و تكسيروا في هذا الوبست بقت ألفين
حبابك

قبل اربع او خمس سنوات اتصلت على رقم للباشمهندس وجدته بالمنبر طالبا العضوية
وكان موقفا غريبا احكيه لك لاحقا.. تحياتي عبرك له وللعزيز تامبا.

تشكر يا علاء على البوست

Quote: قبل اربع او خمس سنوات اتصلت على رقم للباشمهندس وجدته بالمنبر طالبا العضوية وكان موقفا غريبا احكيه لك لاحقا.. تحياتي عبرك له وللعزيز تامبا. تشكر يا علاء على البوست

أولاً شكراً يا حبيب لإلتفاتتك الرايعة لصورة العزيز تامبا و تحيتك له
لكم نفتقده
ثانياً
سنكون بانتظار ا تود أن تقُص علينا من ذكريات مع أب صلعة

و الحقيقة دواعي فتح هذا البوست هو الهجمات الغريبة من بعض الجهات و تناولها للمنبر و أعضائه كمادة رئيسية تُسيير مواقعه تلك لكأنما هي سيارات و الأون لاين هو وقودها ، أو قد يجوز لنا تسميتها بصدى الملاعب ، إذ كل ما يحدث هُنا يُثار هُناك و يُقتلُ بحثاً و نقاشاً و آراء شاذة و غريبة رغم وجود بعض الأصوات العاقلة.
لكنه في حد ذاته هو النجاح لبكري ليس إلا
و طالما أنهم يتحدثون عنك دوماً معناه أنك تعني لهم الكثير الكثير
و طالما أنك لا تتحدث عنهم البتة فهذا يعني أنهم صفراً كبيراً ليس إلا

مشكور يا عبد الله عثمان على المرور و في الإنتظار

المهندس/علاء الدين

تحياتي؛؛؛

اسمع التلج ده جبتو من وين ؛مع الكهرباء القاطعة دي؟

حقيقة بكري يستاهل التلج والله؛

اتعلمت من منبرو حاجات كتيرة ؛تقنطر الكورة بس ماتتشات ضفاري.

مشيت علي الحفرة ديكـ ولقيت تلاتة بوستات معلقة فوق زي سواق البنطون؛

كان عندهم عشم انو بكري يرجعهم ؛لكن أظن العشم اتقطع

عشان كده فكّوا آخرهم طوالي.



سير سير يابكري.


لومحتاج بدّال عجلة كلمني.

Quote: مشيت علي الحفرة ديكـ ولقيت تلاتة بوستات معلقة فوق زي سواق البنطون؛ كان عندهم عشم انو بكري يرجعهم ؛لكن أظن العشم اتقطع عشان كده فكّوا آخرهم طوالي.

مرحبتين دكتور بشير
المصيبة النت كلو بقى حُفر
لكن الحفرة ذاتة تفرِق لمن يسويها مُهندس ولمن يسويها زول بنّة ساي
فرِق ياخ فرِق
قلتة لي التلِج دة بارِد ولا لأ
باقي أخوك جديد لنج في الدنيا دي و ماااااااااااا زولة
لكن أب صلعة بستاهل

واحد من أوغاد الأمارات إتصل علينا مُشكِّكاً في صدق نوايانا من هذا البوست الجليدي و إنو أخوكم عندو غرض
ياخ والله حرام عليكم
يعني نحن ما بتجي حاجة زي دي مننا ولا كيف!!؟
اللذيذة قال لي ياخ بكري لحدي هسي بكون مخلوع من التِكِسِّر المتلّج العملتو ليهو فرش متاع دة
لكن بقول ليهو إنت زول حاقد ساي
وحات ود الصايم اللميض إنت زول حاقِد

Quote: واحد من أوغاد الأمارات إتصل علينا مُشكِّكاً في صدق نوايانا

ود البشرى .. ياخي خلي عمايلكـ المهببـة دي
زمة بقرش ما عندكـ

يا علاء
تصفق للبطل , وتعلق صورة الخيانة ؟!


( موسيقى تصويرية من فلم : سرتانا لا يرحم )

Quote: يا علاء تصفق للبطل , وتعلق صورة الخيانة ؟!

يا فلان
ياخ إنت بتحضر آكشن شكلك و أنا زول زييي أفلام هندية و كدة
يأني البتل بيتلأ في النهاية أخوهو شقيقو للخاين
إرِفتة يا فردة

Quote: ( موسيقى تصويرية من فلم : سرتانا لا يرحم )

قرقرقرقرقرقرقرقرقرقر

Quote: ود البشرى .. ياخي خلي عمايلكـ المهببـة دي زمة بقرش ما عندكـ

هو صحيح وغد
بس ما هو والله
دة أوغد شوية

الاخ علاء

Quote: بكري أبو بكر ربان سفينة ناجح جداً أقولها مِلء الفم رغم اختلاف المشارب و الإتجاهات ، أؤمن تماماً بسياسته في إدارة منبره ، يُعجبني جداً عدم تداخله مع الأعضاء إلا نادراً ، من حقه أن يستفيد تجارياً من موقعه بالصورة التي يراها بعد كل العناء و الرهق الذي صاحب و لا يزال يصاحب مسيرته مع الأون لاين و أعلم أنها لم تكن هينة ولا يسيرة .

شكرا ليك

Quote: شكرا ليك

و ليك إنت كمان يا أستاذنا
يا شيقوق
بكري برضو محظوظ بكتاباتكم وعضويتكم

بكري برضو محظوظ بكتاباتكم وعضويتكم

والله يا علاء المنبر العام ده خرب طبعنا عديل كده . الواحد صار لو جاهو ضيف ساى يتمنى يطلع منو متين .

Quote: الواحد صار لو جاهو ضيف ساى يتمنى يطلع منو متين .

و الأسخف لو قاعد في المكتب و معاك ناس لي شغل و إنت بالك مع المنبر
عين مع الضيوف و عين في الشاشة و غايتو
في السعودية قبل كم سنة مديري المباشر رفع فيني شكوى بسبب هذا المنبر للرئيس (الشيخ)
و كان مكتوب في الشكوى حرفياً (يتصفح موقعاً إسمه سودانيز أون لاين باستمرار مما يضر بالعمل)
بعد أيام بكري ركّبني التونسية ، صاحبنا إتكيف كيف ما عادي لمن عِرِف

و هسسسسسسسسسسسي لو كنت شغال لي تحت زول كان رفدوني زمااااااااااااااان

عمر الفاروق , وليس الفاروغ ,

أفرغت الإسم من معناه.

أفرغ الله ما بجوفك من شتارة.

صدقت ..
يكفيه أنه متجاوز للكثير من عيوب الشخصية السودانية ..
كثيرا ما تفكرت في شخصيته رغم أنني لم ألتقيه حتى الساعة ..
واعجبت بطريقته في الإدارة ..
وتمنيت لو كنا نملك الكثيرين من أمثاله في إدارات مرافق أخرى هامة في الدولة .

Quote: عمر الفاروق , وليس الفاروغ , أفرغت الإسم من معناه. أفرغ الله ما بجوفك من شتارة.

مشكووووووووووووور يا تابعي العزيز
لكن راجع ما بيني و صديقي الفاروغ
بتعرف القاف بقت غين ليه

Quote: صدقت .. كثيرا ما تفكرت في شخصيته رغم أنني لم ألتقيه حتى الساعة .. واعجبت بطريقته في الإدارة ..

مشكور يا حبيبنا الملك
و حين تلتقيه ستعلم كم هو إنسان

يا أخوانا الفي السودان تحديداً
أي زول حاسي بي سخانة يجينا في القطب المُتجمِّد دة يصيف معانا

Quote: بتاع الكامب ولا قُندوا ولا مجمع ديفيكا سوسيتي ولا الدكن !!!!؟ مبروك البنية ياخ و تحياتنا لس جي

بتاع الكامب طبعا ومعاك طارق (ساسواد) على مااعتقد....

والله يبارك فيك وعقبالك

Quote: بتاع الكامب طبعا ومعاك طارق (ساسواد) على مااعتقد.... والله يبارك فيك وعقبالك

أيام والله فيك يا بونا
الآن ساسواد بالسودان يستقر فيه منذ أكثر من ثلاث أو أربع سنوات
مشكور يا المُر

Quote: أيام والله فيك يا بونا الآن ساسواد بالسودان يستقر فيه منذ أكثر من ثلاث أو أربع سنوات مشكور يا المُر

ياااخى بلغو سلامى الكتيرالقدر هنود (بونا)...

مرة شوفتك فى التلفزيونبتشرح فى الكمبيوتر اها عاد زين فرحت

اصلى بحب الناس البجو فى التلفزيونات والجرائد والسينمات

القطب الجنوبي ذاتو

Quote: القطب الجنوبي ذاتو

وليد
التلِج تكسِّر!!!؟

لو موافق جيب تلاجتك و تعال

تلاجة البيت ما تلاجتك كويس

Quote: تلاجة البيت ما تلاجتك كويس

هاهاهاهاهاهاهاهاهاهاهاها

Quote: مرة شوفتك فى التلفزيونبتشرح فى الكمبيوتر اها عاد زين فرحت اصلى بحب الناس البجو فى التلفزيونات والجرائد والسينمات

في ياتو قناة يا المُر
باقي هن كتاااااااار و فيهن شيء متلفز و شيء مُذاع (وش جضومو منتفخة)

أصلو في أحد مواقع حُسّاد بكري أبو بكر واحدة هيليفيتة ظنّت أن بظهورها مكعورة مرة في الفضائية يعني إنها بقت زولة و كِدة
و كاتبة في ماخورها إنو حبيبنا بكري غار من المجروس الجابوهو في الفضائية السودانية قام مشى النيل الأزرق
و الغريبة لا بكري قال جابوني
لا أنا قلتة جابوني
ديلك ناس فيهم نقص مُتجذِّر

الحبيب علاء

غايتو مابقدر اقول حاجة بعد جرسة امبارح جبت لى طورية وطالع

اكسر جبل الجليد بتاع اخونا عمر ولو فى جبل تانى ورينى دربه

لك الود والمحبة انت وبكرى قبالك .

Quote: الحبيب علاء غايتو مابقدر اقول حاجة بعد جرسة امبارح جبت لى طورية وطالع اكسر جبل الجليد بتاع اخونا عمر ولو فى جبل تانى ورينى دربه لك الود والمحبة انت وبكرى قبالك .

هيييييييييييييع آآآالفحل


كسِّر يا حبيبنا ولا يهِمّك
كِسِّير من يملِك لمن يستحِق
شفتة بكري دة زول رايع كيف

شكرا علاء

بكري رجل مجتهد وأستطاع أن يكون مهنياً بجدارة

أعتقد أن سر نجاح بكري يكمن في عدم التداخل في النقاش داخل المواضيع

Quote: شكرا علاء بكري رجل مجتهد وأستطاع أن يكون مهنياً بجدارة أعتقد أن سر نجاح بكري يكمن في عدم التداخل في النقاش داخل المواضيع

مرحبتين يا جعفر و شاكرين للإافة الجميلة في حق الرجل
و دة الما قِدروا عليهو التانين لذلك فشلوا
و فشلوا فشلاً ذريعاً

عـــلاء الدين ســـــــلامات

Quote: و الحقيقة دواعي فتح هذا البوست هو الهجمات الغريبة من بعض الجهات و تناولها للمنبر و أعضائه كمادة رئيسية تُسيير مواقعه تلك لكأنما هي سيارات و الأون لاين هو وقودها ، أو قد يجوز لنا تسميتها بصدى الملاعب ، إذ كل ما يحدث هُنا يُثار هُناك و يُقتلُ بحثاً و نقاشاً و آراء شاذة و غريبة رغم وجود بعض الأصوات العاقلة.

لـــو راجعـــت بوستات التحليل التى تلت هجمـــة الهكـــر الأولــى تجــد الكثير المثير ... فقد تمّ إستغلالها للترويج لتلك الديار


وهاااااك يا إقتباسات لبوستات ومواضــــيع ... لكن أظن الموضوع " إتنقش".


شكـــراً لك فقد عــبّرت عن رأى الكثيرين مــــنّا.

العزيز أبو بكر مرحبتين

Quote: لـــو راجعـــت بوستات التحليل التى تلت هجمـــة الهكـــر الأولــى تجــد الكثير المثير ... فقد تمّ إستغلالها للترويج لتلك الديار وهاااااك يا إقتباسات لبوستات ومواضــــيع ... لكن أظن الموضوع " إتنقش".

بس صدِّقني
مرمي الله مااااااااااا بِترفِع

Quote: شكـــراً لك فقد عــبّرت عن رأى الكثيرين مــــنّا.

يعني ما براي بِتاع تلِج

مشكور يا الحبيب