تيسير عووضة - غالب و مغلوب - توضيح بالرسم و الصور

قامت زميلة البورد تيسير عووضة بنشر مسنجر خاص على العام يخص زميل البورد هشام آدم
كلٌ برر ما ساقه لاستفزاز الآخر بأنه ردة فعل
تم فتح عُدة بوستات ذات صلة بالموضوع آخرها للأخ العزيز ياسر طيفور رأى أن في صورة المسنجر بعض العيوب وله الحق في ذلك ، لي من هذا البوست مقصدين لا ثالث لهم
الأول توضيح أن الصورة صحيحة و قد تمت بالشكل التالي الذي نقله الأخ طيفور ، ربما لعدم تخصصية الزميلة تيسير عووضة:



حيث قامت بتظليل مسنجر الزميل هشام آدم من داخل صندوق بريدها و بعد التظليل ضغطت بالزر الأيمن للماوس و اختارت نسخ ثم ذهبت به كنص محاط بإطار (جدول) لا كصورة ، و دة من الكمبيوتر طبعاً ما منها و منه إلى الوورد كنص ، لأنو لو صورة كان عملت برنت سكرين أي تصوير للصفحة كاملة على الشاشة بواسطة زر البرنت سكرين أو أي برنامج صور متخصص في هذا الشأن و قد تمت الخطوات كما هو أدناه:

تظليل من المسنجر الداخلي






لصق في الوورد (لي يوم عوزة)




لمن يوم العوزة جا نقلوه بذات طريقة التظليل إلى برنامج الرسام و أيضاً كنص لا كصورة



و عند أي عملية تكبير أو تصغير للنص المنقول للرسام و الذي أصبح كصورة يحدث ما ترونه معلماً بالدائرة الحمراء


و التحت دة نفس المسنجر المظلل من مسنجري بس النسخة المعلّمة بالأحمر الفوق مشت الوورد بينما النسخة دي تم نقلها بواسطة برنامج صور لذلك جاءت سليمة مهما تم تكبيرها أو تصغيرها.



الفوق دة كلللللللللو المقصد الأول من البوست
أما المقصد الثاني فهو:

Quote: انا المحيرني شدييييييييييييد المسنجرات دي يا كافي البلا المنبر اتهكر جغلومية مرة والسيرفر اتمسح طفشطاشر مرة وبكري قفل المسنجر من الناس دشليون مرة البت تيسير دي لااامة المسنجر ده من 2007 وين ؟ غايتو يا تيسر حا ارسل ليك حاجات تلميها لي عندك شكلك لملااااااامة والنوع البيكون لحدي اسة داسة اول جواب غرامي من ود جيرانكم ارييتو ما انا :)

ودة إقتباس لعمر الفاروق وهو نفس ما دار بخلدي و أكدته تيسير عووضة هُنا بنفسهافي بوست الأخ ياسر طيفور:

Quote: محاولات ياسر طيفور اليائسة لإضعاف موقفي في كل مرة وفي بوستات سابقة لا تخفى على أحد ومحاولات تمييع قضيتي وإظهاري بمظهر المزورة أو الكاذبة أيضاً لن تخفى على أحد (الغرض مرض) لا شيء يجبرني على التلاعب في أشياء مثل هذه هذه الرسالة منقولة كما هي والله على ما أقول شهيد أحتفظ بالرسائل في word fileأي تغييرات صاحبت عملية الكوبي والبيست واردة صاحب الشأن نفسه إعترف بالرسالة كان بإمكانه مواصلة الإنكار مثلما أنكر قبل عرضها هذا كل ما يمكنني قوله في هذا الموضوع وسيتم تجاهل هذا البوست من جانبي غير مأسوفٍ عليه ..

نهاية المقصد الثاني في سؤال:

يا تيسير إيه الفرق بينك و بين من يسجِّلون المحادثات الهاتفية للطرف الآخر تتبُّعاً لسقطات القول و زلّات اللسان!!!؟
هل في فرق!!!؟

Quote: تيسير إيه الفرق بينك و بين من يسجِّلون المحادثات الهاتفية للطرف الآخر تتبُّعاً لسقطات القول و زلّات اللسان!!!؟

دي كتيرة منك..

دة سلوك شخصي بيخصها .ما من حق اي واحد يكون قيم عليها او علي تصرفاتها..
يعني من قلة الناس البيحفظو بوستات كاملة وصور..خليك من ايميل شخصي؟؟

اضف..
يعني انتا مش كان ممكن تعلق هناك في بوست ياسر او اي واحد من البوستات الكتار الاتفتحو؟؟؟
لكن عشان دة شئ بتحددو انتا المفروض انا ما اسألك...صح؟؟؟

(فهمتني؟؟)

Quote: دة سلوك شخصي بيخصها

سلوك شخصي في مكان عام!!!؟



فهمتيني؟

Quote: يا تيسير إيه الفرق بينك و بين من يسجِّلون المحادثات الهاتفية للطرف الآخر تتبُّعاً لسقطات القول و زلّات اللسان!!!؟ هل في فرق!!!؟

نعم هنالك فرق؛ لا نستلم المكالمات لنحتفظ بها؛
كما لا نستلم الخطاب لنحرقها عقب الاطلاع عليها.




______
لا أحتفظ بأي مكالمة و لكني
احتفظ برسائل من سنة كم و ستين.

Quote: يا تيسير إيه الفرق بينك و بين من يسجِّلون المحادثات الهاتفية للطرف الآخر تتبُّعاً لسقطات القول و زلّات اللسان!!!؟ هل في فرق!!!؟

نعم هنالك فرق؛ لا نستلم المكالمات لنحتفظ بها؛
كما لا نستلم الخطابات لنحرقها عقب الاطلاع عليها.


______
لا أحتفظ بأي مكالمة و لكني
احتفظ برسائل من سنة كم و ستين.

Quote: لا أحتفظ بأي مكالمة و لكني احتفظ برسائل من سنة كم و ستين.

و انت من سنة كم وستين بتراسل يا ملاسي ؟؟

Quote: احتفظ برسائل من سنة كم و ستين.

ممكن تعرِض لينا رسالة(خاصة) منهن على الملأ !؟




لو ممكن يبقى فعلاً مافي فرق

كلامك صحيح يا ملاسى

ولو رجعت لهاتفى النقال تجد رسائل من سنة

وكذلك صندوق البريد اللالكترونى الخاص بى ربما تجد كل الرسائل التى ارسلت لى

وهكذا المسنجر

يا علاء

سلام

من حق تيسير ان تحتفظ بما تشاء من الرسائل ما دام قد ارسلها لها المرسل

المكالمات التلفونية يعلم صاحبها انها 99% لا تسجل ولكن الرسائل يعلم صاحبها انها تبقى

و قد طلق قضاة زوجات لرسائل معيبة من ازواجهن تبيح الطلاق

فى الاشياء التى يعاقب عليها القانون او التى يتضرر منها المرسل اليه ليس هناك شئ اسمه زلة لسان أو ترصد لأن من ارسلت له الرسائل هو الضحية و أغلب الاحوال الضحية لا تطلب من منتهك حقوقها أن يقوم بهذا الانتهاك

لا تلوم الضحية يا علاء ولا تنتقص من حقوقها

Quote: من حق تيسير ان تحتفظ بما تشاء من الرسائل ما دام قد ارسلها لها المرسل

أخونا المجمر سلامات

للبوست مقصدان
الأول توضيح صحة الصورة
و الثاني الإعتراض على نشر الخاص على العام

لا على حق الآخرين في الإحتفاظ بالرسائل

في بداية البوست قلتا دة المقصد الثاني

Quote: نهاية المقصد الثاني في سؤال: يا تيسير إيه الفرق بينك و بين من يسجِّلون المحادثات الهاتفية للطرف الآخر تتبُّعاً لسقطات القول و زلّات اللسان!!!؟ هل في فرق!!!؟

ولي هشام المجمر قلتا دة المقصد الثاني..

Quote: و الثاني الإعتراض على نشر الخاص على العام

هسة علاقة المقصدين ديل بي بعض شنو؟؟

ولا هي مقاصد والسلام..

صحح انتا ..بعدين انا بصحصح

العلاقة بين الصحصحتين الفوق ديل زي العلاقة بين مقاصدك..

Quote: في بداية البوست قلتا دة المقصد الثاني نهاية المقصد الثاني في سؤال: ولي هشام المجمر قلتا دة المقصد الثاني..

لا و إنتي السادقة (بالمصري)

أنا قلت

Quote: نهاية المقصد الثاني في سؤال:

يعني في فرق بين المقصد و النهاية

و الغريبة نقلتيها بيدك

قلنا تصحصحي ما تصححي

Quote: سلوك شخصي في مكان عام!!!؟

ركز معاي..
انتا معترض علي الاحتفاظ بالايميل في تلك الفترة...
يعني سؤالك ليها باثر رجعي قبل سنتين..
يعني الكلام ما عندو علاقة بما يدور الان..
هسه انتا بتمسح الايميلات بتاعتك من الهوتميل اول باول؟؟
انا غايتو البتهمني بحاحي فيها ..
والما البتهمني بمسحا...
يمكن الرسالة كانت مهمة ليها عشان كدة احتفظت بيها..؟؟
يمكن مزاج؟؟

اضافة الشخص المعني هو البيقرر سلوكه الشخصي يعملو وين اذا ما كان فيه اي خدش للحياء..
اما اذا انتا شايف انو تسير خدشت الحياء العام بيقي دة شئ تاني
(فهمتا؟)

Quote: ركز معاي.. يعني الكلام ما عندو علاقة بما يدور الان..

صحصحي

الكام عندو مقصدين تم توضيحهم بالأعلى
لا علاقة لي بما يدور من تفاصيل خاصة بينهما لذلك افترعت لنفسي هذا البوست حتى لا أخوض مع من خاض في تفاصيل خاااااااااااااصة تم نشرها على العاااااااااااااامة
أنا مركِّز على النشر على العامة فقط



فهمتي!!؟

Quote: ممكن تعرِض لينا رسالة(خاصة) منهن على الملأ !؟

نيابة عن ملاسي..

يعرضا سااااي كدة وبدون اي سبب؟؟
اذا انجبر وطلعوا كذاب ولازم يثبت صدقو يمكن حيطلعا بعد تفكير طويل ما دام انها ما خادشة..
ثم ملاسي ما تيسير ..كل زول بيفكر باسلوب مختلف عشان كدة قلتا (يمكن)..

شفتا يا ملاسي تجي تقولي اتكلمتا بالنيابة عني ليه وتجي تحرجني..الا تلقاني قدامك بعد بكرة القريبة دي...
(لقيتوني كيف وانا شجاعة وبتكلم نيابة عن ملاسي..وانا بهنضب ملاسي؟؟)

Quote: يعرضا سااااي كدة وبدون اي سبب؟؟

سؤال وجيه
لكن مافي خيارات قبل النشر!!!؟
إرسالها له في مسنجرو أو إيميلو أو أو أو .....
ليه طوالي نتجه لأقصر الطرق

أنا بالبوست دة بثبت صحة الرسالة و لا أغمطها حق الإحتفاظ بها و المساومة إن دعت الحاجة
لكن النشر أمام الملأ يبقى آخر الحكي
ولا شنو!!!؟

ولا شنو!!!؟
لا ما شنو..

Quote: لكن مافي خيارات قبل النشر!!!؟ إرسالها له في مسنجرو أو إيميلو أو أو أو .....

انتا يا علاء قريت البوست؟؟

Quote: أنا بالبوست دة بثبت صحة الرسالة و لا أغمطها حق الإحتفاظ بها و المساومة إن دعت الحاجة لكن النشر أمام الملأ يبقى آخر الحكي

المساومة؟؟
اخير النشر قدام العالم بدل الوصول لاسلوب المساومة الانافي اعتباري اسلوب رخيص..
وبكرر انو الرسالة ما خادشة..هو نكر وبقا شكلها كذابة وقال ليها وريني بي رضاه..ومتاكدة لو كان فيها اي نوع من الخصوصية ما كان اتنشر..


علاء الدين يا اخوي...
حتبقي علينا قصة ناس البكاء استغفروا والجيران كفروا..
احسن لينا نستغفر الله ..

أختنا سارة

Quote: المساومة؟؟

عشان ما تمشي بعيد
لمن كتبت المساومة لم أقصد بها معناها الذي تقصدين

(الرخيص)

أقصد بها إنو في إيميلو يا فلان دي حقتك ولا ما حقتك ؟
لو حقتك يبقى لا تُنكِر و تُكابر

دي مساومتي البقصدها يا خيّة (خيّة من أخت)

شكرا علاء على ردك

Quote: و الثاني الإعتراض على نشر الخاص على العام

دعنى اختلف معك فى هذه النقطة

الذى يحدد ما هو عام أو خاص هو مستقبل الرسالة وليست الوسيلة التى ارسلت بها هذه الرسالة

يعنى ليس بسبب ان الرسالة ارسلت فى المسنجر تكون خاصة

يمكننى ان انشر هنا كل الرسائل التى ارسلت لى بالمسنجر دون أن اجد فى ذلك حرج والكل يتوقع ان مايرسل بالمسنجر بين الزملاء يجب أن يكون فى هذا الاطار

هكذا كانت تظن تيسير عووضة الى أن جاءتها من الرسائل التى حدد صاحبه سلفا انه لديه موقع خاص و يمكن أن يرسا ما هو خاص بواسطة المسنجر وهذا خطأه خو و ليس خطأ تيسير.

من حق تيسير التى ترى أن المسنجر كالمنبر يجب أن يستخدم للمراسلات العامة وليست الخاصة أن تنشر ما تراه تعدى على حقوقها دون أن يعترض احد.

لذلك يا علاء اعتراضك ليس فى محله لأنك لست الجهة التى استقبلت الرسالة و بالتالى لست الجهة التى تحدد ما هو خاص و ما هو عام.

Quote: و انت من سنة كم وستين بتراسل يا ملاسي ؟؟

من قبل ذلك .. و لكن من كم و ستين بدأت في الاحتفاظ ببعض الرسائل.

Quote: من قبل ذلك .. و لكن من كم و ستين بدأت في الاحتفاظ ببعض الرسائل.

وماجستير شنو طيب الليك؟
الاستاذية لازماك يا ملاسي
ياخي اديتني احساس بي حملة محمد علي باشا وكدا

Quote: لا تلوم الضحية يا علاء

الأخ: هشام المجمّر
ضحية ماذا؟

Quote: الأخ: هشام المجمّر ضحية ماذا؟

ضحية تجلياتك

Quote: الذى يحدد ما هو عام أو خاص هو مستقبل الرسالة وليست الوسيلة التى ارسلت بها هذه الرسالة يعنى ليس بسبب ان الرسالة ارسلت فى المسنجر تكون خاصة

معقولة بس يا هشام
يعني المسنجر عام!!!؟
لو كان عام كان فتحوهو بوابة كل واحد يدخل من بوابة التاني و يطلع للبعدها

Quote: هكذا كانت تظن تيسير عووضة

عندي أنا شخصياً الظنون دي علمها عند ربها

Quote: و بالتالى لست الجهة التى تحدد ما هو خاص و ما هو عام.

و لن أكون و لا أود
دي حددها بكري لمن سمّى لينا المنبر دة بالعام
و عمل آيكون مكتوب عليها مسنجر مافي زول يقدر يدخل منها غيري
يبقى هو اللي حدد ما هو عام من خاص

Quote: دعنى اختلف معك فى هذه النقطة

نختلف حتى نتفق
أو حتى يبقى الود

السؤال موجّه إلى الأخ هشام المجمّر

أساسي و ملاسي

عملوا لينا نظام الخيل تجقلِب

Quote: السؤال موجّه إلى الأخ هشام المجمّر

والاجابة موجَهة للاخوة قراء البوست

الأخ علاء الدين
تحياتي
أولا دعني أقدم لمشاركتي هذه بشيئين
اولهما ومن خلال متابعاتي للمنبر بصورة شبه دائمة أكاد أعتقد بأنك من القلائل الذين (في أغلب الأحيان) يقولون الحق ولا يخافون في قوله لومة لائم، وبإمكانك السباحة عكس التيار عند إعتقادك بأنك على حق وهذا ما أحترمه فيك
ثانيهما أنني آليت على نفسي عدم التداخل في بوستات الخلافات بين الأعضاء هنا، خاصة إنه في الأغلب يتعصب الأشخاص لآرائهم، حتى وإن إتضح خطأ ما يعتقدون، وبذلك قد تجد نفسك مجادلا تعيد وتكرر النقاش، مما يفقدك الإحترام لنفسك وإحترام الآخرين.
عموما عن موضوع الأخت تيسير عووضه، ويجب أن أوضح هنا بأنني لا أعرفها ولم أتداخل معها في أي موضوع من قبل، أرى أنها دُفعت دفعا لنشر الماسنجر (يمكنك العودة للبوست المعني) ولكنها برغم ذلك لم تقم بنشره على الملأ، بل طالبت أن تقوم بعرضه على شخصين ممن يرضى الناس شهادتهما، وعندما وافق على ذلك الأخ هشام آدم، أرسلته لأحد الشخصين والذي لم يتردد هو في عرضه على الناس وبالتالي أعتقد أن نقطتك الثانية في كون إعتبارها قد أخطأت بجلب الخاص للعام فإنها لم تفعل.
والأهم من ذلك فإن ما يحدد الخاص من العام هو المحتوى وطبيعة المراسلة، فإن كان الشخص المرسل إليه تربطك معه علاقة خاصة، وتسمح لك هذه العلاقة بكتابة ماهو خاص دون أن تخاف إطلاع الآخرون عليه، يكون الأمر خاصا لا يجوز عرضه على الآخرين. أما إن كان مع شخص لا تربطك معه سوى زمالة المنبر، فإن محتوى هكذا رسالة، يمكن أن يكون متاحاً للآخرين في حالة أن كان هناك خلاف (مثل ما نشب بين الزميلين هشام وتيسير) والنتيجة كانت أن وضح عرض الماسنجر صحة ما إدعته الأخت تيسير، وإعتراف الأخ هشام آدم، ثم إعتزاره وبالتالي أعتقد أن الأمر وصل لخاتمته، التي يتوجب على من يريد الخير أن يحترمه، ولايزيد النار أواراً وإستعارا.
ولك ودّي

الأخ الكريم كمال


أشكرك على ما قد جاء في أول مشاركتك

أما هذه النقطة يا سيدي:

Quote: عموما عن موضوع الأخت تيسير عووضه، ويجب أن أوضح هنا بأنني لا أعرفها ولم أتداخل معها في أي موضوع من قبل، أرى أنها دُفعت دفعا لنشر الماسنجر (يمكنك العودة للبوست المعني) ولكنها برغم ذلك لم تقم بنشره على الملأ، بل طالبت أن تقوم بعرضه على شخصين ممن يرضى الناس شهادتهما، وعندما وافق على ذلك الأخ هشام آدم، أرسلته لأحد الشخصين والذي لم يتردد هو في عرضه على الناس وبالتالي أعتقد أن نقطتك الثانية في كون إعتبارها قد أخطأت بجلب الخاص للعام فإنها لم تفعل.

الموضوع كلو كان ممكن ينتهي بإرساله إليه هو نفسه ليتذكر إن كانت ذاكرته قد أسقطت مثل هكذا حدث
يعني برجع لجزء من كلامي في البوست دة ذاتو :

Quote: لكن مافي خيارات قبل النشر!!!؟ إرسالها له في مسنجرو أو إيميلو أو أو أو ..... ليه طوالي نتجه لأقصر الطرق أنا بالبوست دة بثبت صحة الرسالة و لا أغمطها حق الإحتفاظ بها و المساومة إن دعت الحاجة لكن النشر أمام الملأ يبقى آخر الحكي ولا شنو!!!؟

و كلمة المساومة برضو وضحتها في النقطة دي:

Quote: أقصد بها إنو في إيميلو يا فلان دي حقتك ولا ما حقتك ؟ لو حقتك يبقى لا تُنكِر و تُكابر

أما ما ذكرته هنا

Quote: أعتقد أن الأمر وصل لخاتمته، التي يتوجب على من يريد الخير أن يحترمه، ولايزيد النار أواراً وإستعارا.

نعم وصل لخاتمته مع غبار عالق و أجوء مُلغّمة و صائدي مياه عكِرة و حمّالة حطب و زادوا النار أواراً و اشتعالاً و استعارا
و دة كان ممكن يتم بهدوء و ينتهي بهدوء
فتصل المعلومة للمرسل و يعتذر و لا يُنكِر

شكري و تقديري

سلامات يا علاء,,

يجب علينا عدم نتجاوز حقيقة أن من وضع الرسالة هنا لم تكن تيسير!!!!!


القصة كانت فى أيدى أعضاء عدول تم إختيارهم للتحكيم وقام أحدهم وهو أخينا حيدر بوضع الرسالة هنا وفضل الأخ كمال عدم إيرادها و فى كل خير!!!!!!


فرضية أن الرسالة حولها شكوك ينسفها إعتراف الأخ هشام آدم بها رغم نسيانه لها فى أول الكلام,,

تحياتى

الأخ الحبيب أيمن الطيب
تحياتي
والله يا سيدي لم أتجاوز هذه الحقيقة البتة و لم أغض الطرف عنها
و لكن..
إن لم يكن فيه إثقال عليك أرجو مراجعة مداخلتي التي تسبق مداخلتك ليتبين لك ما أرمي إليه
أن يتم إرسال الرسالة لصاحبها الذي أنكرها باديء ذي بدء
إن إستمرأ الأمر وجب نقلها للعام
لكن ما رأيته في الطرف الآخر و الذي رأيته أنت بعدم إنكاره لها إن كان ذلك قد تم معه مباشرة حتى لو كان بواسطة من أنزلها ههنا
أعتقد أنه كان سيسارع بإحقاق الحق في الخاص كما فعل بالعام

تحياتي يا عزيز

Quote: أعتقد أنه كان سيسارع بإحقاق الحق في الخاص كما فعل بالعام

و عشان ما تبقى علي حكاية:
تشتمني في سوق و تعتذر لي في زقاق!!!؟

كان سيتبع ذلك إعتذاره أمام العامة و في العام بأنه قد أرسل رسالة عادية و انتهى الموضوع

ملحوظة:
لا تربطني بالرجل أي علاقة غير المنبر و لم أتداخل معه قبل الآن (أو لا أذكر) فلا يوجد شيء خلف الأكمة يدفعنا للدفاع عنهأو التحامل عليه غير قول الحق الذي نراه.
كذلك زميلة البورد تيسير لا علاقة ولا توجد بيننا مداخلات تذكر فلا يوجد تحامل أو مجاملة.

علاء يا رايق ....

Quote: لكن النشر أمام الملأ يبقى آخر الحكي

ما ياهو جاء آخر الحكي .... يعني هو طلعها كذابة .. ما تدافع عن نفسها ولاّ كيف ؟ ولو عملت ذي ما أنت قلته ورسلت ليهو رسالته في الايميل ... وقلنا هو اقتنع .. طيب البقنع البقية الباقية من المتداخلين ديلااااك شنو إنها فعلاً صادقة ؟ وهل كان سيأتي هشام ويعترف امام الملآ بأنه فعلاً رسل ليها الرسالة الهي قالت عليها ؟

وبعدين من ناحية تاااني .. ياخي مشتاقين وقلنا ليك أجدعنا بي تلفونك ونحنا بنقوم بالواجب ياخي .. الشوق كلتنا وكده !!!!

Quote: ما ياهو جاء آخر الحكي .... يعني هو طلعها كذابة .. ما تدافع عن نفسها ولاّ كيف ؟

حبيبنا عماد
كيفك يا صديق
منو القال ليك دة كان آخر الحكي!!؟
آخر الحكي قلناهو إنو إستنفاذ جميع الفرص اللي ممكن تبرِّيء ذِمّة الراجل مما أنكره ، يعني كان الرسلت ليهم ديل لو هي ما عايزة تراسلو مباشرة هم يراسلوهو و يبعتو ليهو نسخة و بعدما يقراها و يقتنع إنها حقتو مجبور يجي يعتذر (مش عن الرسالة) عن إنكاره لها قاصداً أو غير قاصد.
و منو القال ما تدافع عن نفسها!!؟
لكن هل الدفاع عن النفس بكشف الحال و نشر الغسيل!!!؟
لا يا عماد لأ

Quote: وهل كان سيأتي هشام ويعترف امام الملآ بأنه فعلاً رسل ليها الرسالة الهي قالت عليها ؟

لو أرسلوها ليهو قبل ما تُنشر هِنا أعتقد إنو الرجل يمتلك من الشجاعة ما يُمكِّنه من مواجهة الأمر بصدق

Quote: وبعدين من ناحية تاااني .. ياخي مشتاقين وقلنا ليك أجدعنا بي تلفونك ونحنا بنقوم بالواجب ياخي .. الشوق كلتنا وكده !!!!

دي كان تكتِبة لي في المسنجر
شان تآمن

سلامات ياحبيب

عملا بالثقة التي "رماها فوقي وفوق كمال" الأخ هشام الذي بيني ويبنه تداخلات أكثر من تلك التي مع

الاخت تيسير قمت بإستلام ونشر الرسالة موضوع النقاش على وجه السرعة حتى لايخيَل لاحد أنني متواطئ مع

طرفا مافي الحقيقة وجدت مداخلة الاخت تيسير التي اكدت فيها ارسال الرسالة لبريدي بمجرد دخولي للبوست

مما دعاني للاسراع برفعها في البوست كما استلمتها

أشكر الاخ هشام على حسن ظنه

وتقبل الاخت تيسير لخياره دون ابدأ اي رأي

واسأل الله السلامة

زشكرا لمجهودك في معالجة هذا الاشكال

سـلام يا عـلاء، وأرجـو أن تسمح لي بمخاطبتك هنا لأول مرة،، فبالإضافة لما قاله الأخوين كمال وأيمن أعلاه عن ظروف نشر الأخت تيسير (أو من حولت له تيسير الرسالة بموافقة وطلب الأخ هشام) أرجو أن أضيف التالي؛ فأنت تقول لماذا لم ترسلها له تيسير في الخاص، وفي الوقت نفسه تفترض أن هشام عندما يتذكر سيعتذر لها في العام، ودا إفتراض لا أمتلك أنا ولا أنت أدلة عليه.. أولا أرجو أن أذكر أن تيسير فتحت البوست أصلا بسبب رسائل مسنجر أرسلت لها وتعرف أنت والجميع باقي الموضوع،، لكن بالنسبة لرسالة هشام، فهم كانوا (بتغالتو) قدّام الجميع في المنبر لا الخاص، وبالطريقة دي:
ـ إنتي مش ضربتي لي؟
ـ وإنت مش رسلت لي رقمك في المسنجر؟
ـ لا أبدا ما حصل، ولا أذكر أنو رسلت ليك مسنجر
ـ طيب رايك شنو أنزل المسنجر
ـ أيوة نزليهو
الخ الخ
أنا أقصد، أنه لا يجب علينا لوم تيسير لأنها في النهاية وافقت على الإحتكام بإرسال الرسالة للناس الطلبهم هشام، ولا ننس أنها برضو زعلانة من طريقة هشام في مخاطبتها، حتى لو كان ذلك عن سوء فهم، لأنها تقول أن هشام يترصدها، بينما قال هو في موضع آخر إنو كان فقط ممازحاً.. عليه أتمنى أن يتجاوز الجميع هذه النقطة ونتوجه إلى ما يفيد من النقاش والحوار في الشؤون العامة من سياسة وثقافة وقضايا المجتمع الخ الخ، تحياتي..

علاء الحمش

سلامات يا رجل

في منتدي عكس الريح القانون لا يبيح نشر الرسائل الخاصة في المنبر العام

يا ليت بكري ابوبكر يطبق هذا القانون هنا

أبو خليل
سلامات يا حبيب
حتى هنا القانون دة موجود لكن بكري لديه مرونة في القوانين بعض الأحيان

التحية لتييسير عووضة
والرماد للرماد

نستأذنكم يا شباب بالبداية من هنا

Quote: التحية لتييسير عووضة والرماد للرماد

الأخ عادل عبد العاطي
جملتك أعلاه حمّالة أوجه
أرجو أن تميط اللثام عن الوجه الذي تحمله حتى نستطيع الرد عليكم بما يتناسب!!!؟

علاء الدين يوسف ..


فعلاً نحل !
البوست دا فيهو العسل:

Quote: لي من هذا البوست مقصدين لا ثالث لهم الأول توضيح أن الصورة صحيحة

أشكرك على حياديتك وإيضاحك لصحة الرسالة
وأنا من هنا بطلب منك إعطائي دروس تقنية بدل الفضايح البقينا فيها دي
وأوعدك إنها تكون للأغراض السلمية بس



وفيهو اللسع:

Quote: نهاية المقصد الثاني في سؤال: يا تيسير إيه الفرق بينك و بين من يسجِّلون المحادثات الهاتفية للطرف الآخر تتبُّعاً لسقطات القول و زلّات اللسان!!!؟ هل في فرق!!!؟

الفرق يا علاء إنو البيسجلوا المكالمات مع سبق الإصرار والترصد
وبيبتزوا بيها الناس عمال على بطال وبينشروها أول بي أول
بيكون عندهم نية مسبقة لفعل ذلك
وبيستمتعوا وهم بيعملوا كدا ودا شيء غير أخلاقي
وما حصل أنا عملت حركة زي دي في حياتي
وبرضو دي أول مرة في حياتي أحتاج إني أنشر رسالة لكن الضرورات تبيح المحظورات
أنا فعلاً بحتفظ بالمراسلات البيني وبين الناس
من زمن كانت هارد كوبي لغاية ما العلم إتطور وبقت سوفت كوبي
ولكن أكيد ليس بسوء نية أو قصد
ودا شيء طبيعي ومتروك لرغبة الزول
وبدون ما ندخل في مواضيع تانية
لكن الكثير من الناس على مر الزمان بيحتفظوا بي رسائلهم
سواء كانت إجتماعية أو عاطفية أو حتى رسائل تحتوي على أسرار عسكرية
وبيجي يوم والرسائل دي بتتنشر كماهي وفي كتب كمان والناس كلها بتقراها
ولم يحدث أن تساءل أحد لماذا إحتفظ أصحاب هذه الرسائل بها
أو شكك في سوء نيتهم
وأنا لولا الإضطرار ما كنت حأعمل حاجة زي دي
وما تفتكر إني الآن مبسوطة (وإن أثبت نشر الرسالة صدقي)
لأنو ما حاجة جميلة إنك تعمل حاجة ما مقتنع بيها
بس زي ما قلت في البوست داك ضرر أخف من ضرر
أنا ختيت خيارين وقلت للناس أنتظر آرائكم
بصراحة فكرة إني أرسلو لي هشام في الأول دي ما خطرت لي في بالي
وأعتقد إنها كانت حل مناسب برضو ليه ما جيت طرحتها هناك؟ يمكن كنت أنفذها


الحاجة العايزة أقولها من خلال البوست دا إنو إحتفاظي بالرسائل أبداً ما كان بسوء نية
وفي نفس الوقت ما شايفة حاجة تمنع ذلك ..

تحياتي
وشكراً مرة أخرى يا علاء على إتاحة الفرصة

Quote: بصراحة فكرة إني أرسلو لي هشام في الأول دي ما خطرت لي في بالي وأعتقد إنها كانت حل مناسب برضو ليه ما جيت طرحتها هناك؟ يمكن كنت أنفذها

الحمد لله إنو ست اللحم و الراس إتفقت معاي في النهاية في رؤيتي للأمر من زواية أعتقد إنها حق (أعتقد)
و لأنو لو دة كان حصل كان عفاها من الحتة دي :

Quote: وما تفتكر إني الآن مبسوطة (وإن أثبت نشر الرسالة صدقي) لأنو ما حاجة جميلة إنك تعمل حاجة ما مقتنع بيها

تيسير عووضة
تأكدي إنو مافي أي تحامل ليك أو عليك في هذا البوست و أنا ما جيت داك لأسباب قلتها
فتشي أي بوست فيهو مشاكل بين أعضاء تحولت إلى شخصية كان لقيتيني فيها كان لقيتيني هناك
كنت بقرأ بامتعاض شديد و ما قادر أخش أقول لأنو الحتة ضيقة و ما بتدخِّلني
لكن جيت هنا لتوضيح الإلتباس حول صحة الرسالة ولقول ما بنفس يعقوب
و قلناهو
و شكراً ليك لتقبّله
مع خالص الود

Isa
تحياتي
مرحب بيك في أي وقت

Quote: وفي الوقت نفسه تفترض أن هشام عندما يتذكر سيعتذر لها في العام، ودا إفتراض لا أمتلك أنا ولا أنت أدلة عليه..

لا أعتقد أنه كان ليملك إلا أن يعترف
لأنه يمتلك من الجرأة ما يكفي حسبما يبدو من كتاباته
و لأنه إلى لحظة رفع الرسالة كان بإمكانه إنكارها إن أراد لأسباب عدة
سهولة تزوير الرسالة غاية في البساطة خاصة أنها منقولة كما شرحت في أعلى البوست كنص
فيمكن في حالة النص و بما أنها في ملف وورد أن نغير فيها كل الكلمات و الأسماء و الصور
ثانياً لأن المنبر إتهكر أكتر من مرة و المسنجر تم إغلاقه و فتحه و لمن فتح فتح من الزيرو
يعني كان في مليون وسيلة للإنكار إن أراد
فلماذا لا نُقدِّم حسن النوايا بدل من إفتراض السوء في الطرف الآخر
تيسير كان لها أن تتأنى
لأنو بسبب الموقف دة ناس كتااااااااااااار حتراجع نفسها مليون مرة قبل ما تراسل طرف آخر حتى عند الحاجة
يعني إذا كان ممكن الأمر يتم دون شوشرة
شوشرة في المنبر كلو و على ناس المنبر كلهم
شكراً للمداخلة

الأخ الحبيب حيدر
تعلم كم هي معزتك لدينا
لا شكر على واجب في ما قمنا به لإثبات أن الرسالة يمكن أن تظهر بذاك الشكل الذي جاءت به ولا تكون مزورة نظراً لنوعية البرامج.
و لكن لا زلت عند موقفي في أن مسألة نشرها لم تكن الحل الأخير
تسلم يا حبيب

Quote: نهاية المقصد الثاني في سؤال: ولي هشام المجمر قلتا دة المقصد الثاني..

طيب اوريك صحصحتي...
يعني انتا جايب نهاية المقصد الثاني في اووول مداخلة واللهي كانت طويلة وبتستحمل توضح اي حاجة...


ما تجيب بداية المقصد الثاني دة الا لمن هشام المجمر يدخل بعد كم مداخلة؟؟؟
الشئ المعروف الواحد بيوضح هدف البوست من اول مداخلة...انتا كلامك كان واضح في المداخلة الاولي..بمعني
الهدف الاول من البوست..التوضيح بالصور النزلا ياسر..

الهدف التاني سؤالك لي تيسير فرقا شنو من البيسجلو المكالمات الخاصة...
بس ..


لكن لمن زرزروك عملتا بداية ونهاية للهدف الثاني وقلتا بدايتو(الكان مفروض تنشرا قبل النهاية) انو تيسير تدخل العام في الخاص...





انتا بتلعب بي عقولنا..
ركز ركز...هسه في واحد جا قال كلامك صح؟؟

غايتو الليلة يا سارة عملت ليك فليتة



أعفي لي يا بت أمي

ياسارة كمان إنتو ماتحكوها شديد كدا
علاء كتر خيرو في السواهو
المسألة على حسب فهمي المتواضع كالاتي:-
علاء كخبير كمبيوتر إكتشف الحقيقة بتاعة الرسائل
وكزول حقاني كان لازم يقول كلمة الحق ولو على نفسو
لكن كزول محسوب على معسكر اليمين المتطرف لازم يطلع تيسير غلطانة في حتة
لانه ماممكن يخليها بي شحمة كلاها كدا وكمان ينصرها ويخت نقطة في صالحها
فقام جاب حتتة إنها (إثيكلي) غلطانة
غمضي عينك من حتة انها نزلت الرسالة من اصلو ليه وعايني للباقي بتلقيهو منور glowing وزي الفل
بالمناسبة بعد خبرة في الاسافير أنا لو من تيسير مابنزل الرسالة حتى لو هشام عمل اللي
بس تفاديا من الناس القاعدين للناس تحت الكيبوردات ديل (وقصة صور جواز عادل عبدالعاطي ليست بالبعيدة) والموقف السخيف جدا الحصل فيها

راوية يا ست الكل ..


وين الرقم يا بت؟

علاء سلام انا عندى من الرد على البوسط دا مقصدين
واحد اشكرك على التوضيح العلمى القاطع
اتنين جيت اشد من ازر الزميله تيسير واقول ليها من حقك تعملى الدايراه
تلاته جيت اسلم على اخيتى رايوهوااقول ليهاممشتاغون فى البنتاغون
أربعه والاهم عمراالفاروق دا اختاهو بغتس حجرك وماتديهو رقم ولا يحزنون والله تانى تبقى فى التخارجك منو

Quote: تلاته جيت اسلم على اخيتى رايوهوااقول ليهاممشتاغون فى البنتاغون

هي ياود الجعلي
ياحليلكم وياحليل امريكا البلد السمحة
وياحليل المطر والجو البديع
المهم جاينكم بإذن واحد أحد قريب جدا
نتلاقى في البنتاغون قريب

شكرا ليك وللتواصل ويسأل منك الخير

Quote: أربعه والاهم عمراالفاروق دا اختاهو بغتس حجرك وماتديهو رقم ولا يحزنون والله تانى تبقى فى التخارجك منو

ود الجعلي
مرحبتين
أشكرك على المدخل المادح
و بالنسبة لود الفاروق ما منو خوف
أديهو الرقم ساي لو طلبو و ما تخاف بشيلو يحفظو عشان لمن تضرب ليهو و إسمك يظهر في شاشة التلاتين عشرة يرد عليك

Quote: المسألة على حسب فهمي المتواضع كالاتي:- علاء كخبير كمبيوتر إكتشف الحقيقة بتاعة الرسائل وكزول حقاني كان لازم يقول كلمة الحق ولو على نفسو لكن كزول محسوب على معسكر اليمين المتطرف لازم يطلع تيسير غلطانة في حتة لانه ماممكن يخليها بي شحمة كلاها كدا وكمان ينصرها ويخت نقطة في صالحها فقام جاب حتتة إنها (إثيكلي) غلطانة غمضي عينك من حتة انها نزلت الرسالة من اصلو ليه وعايني للباقي بتلقيهو منور glowing وزي الفل

راوية

لكن يمين مُتطرِّف حلوة

يا راوية
واللهِ أنا كتبت الكتبتو دة و ما عارف أختنا تيسير دي تابعة لياتو معسكر ذاتو
و ما بهمني كتير لأنو انا لا أبني تعاملي مع الناس بمسألة التصنيفات البايخة دي خالص

Quote: لكن لمن زرزروك عملتا بداية ونهاية للهدف الثاني وقلتا بدايتو(الكان مفروض تنشرا قبل النهاية) انو تيسير تدخل العام في الخاص... انتا بتلعب بي عقولنا.. ركز ركز...هسه في واحد جا قال كلامك صح؟؟

زرزروني!!!؟ حلوووووووووووووووووة (الزرزرة سمح)
كل زول بفهم حسب عقلو
فلو إفتكرتي إنو أنا بلعب بعقلك يبقى إنتي فهمتي من البوست دة كللللللللللو إنو أنا جاي شان ألعب
بعدين ما أنا البنكر كلامي أو هدفي ولا زلت مصراً على ذات الرأي
ـــــــــــــــــــــــــــــــــــــــــــــــــــــ
بعد هرشِك لي دة خفتة قلتة يا ربي ماسكة علي شنو مشيت المسنجر فتحت الآوت بوكس (ما الإن بوكس) لقيت مافي توجيه لأي إسم يبدأ بالسين
قلتة الحمد لله
مافي سكة للزرزرة

Quote: بعد هرشِك لي دة خفتة قلتة يا ربي ماسكة علي شنو مشيت المسنجر فتحت الآوت بوكس (ما الإن بوكس) لقيت مافي توجيه لأي إسم يبدأ بالسين قلتة الحمد لله مافي سكة للزرزرة

hhhhhhh funny
فيك شئ من الفكاهة..
ماسكة ليك شئ بس منتظرة (اساومك بيه) علي حسب نصيحتك..

Quote: فيك شئ من الفكاهة..

و عندي إضنين و شفتين و أسنان و يدين و كراعين
حتى ممكن تسألي حنين

Quote: ماسكة ليك شئ بس منتظرة (اساومك بيه) علي حسب نصيحتك..

أها نبدأ الفِلِم من جديد!!!؟
و أشبِكِك نزِّليهو و إنتي تقولي لي يا زول أعمل حسابك و نشهِّد تلاتة عدول لحدي ما تبهدليني على الملأ
و يجي زول زي كدة يفتح بوست زي حقي تجيهو واحدة لايوقة زيِّك كدة تنط ليهو في حلقو
و دواليك ...

Quote: يجي زول زي كدة يفتح بوست Quote: زي حقي تجيهو واحدة Quote: لايوقة زيِّك كدة تنط ليهو في حلقو و دواليك ...

شكرا عشان طلعتني لايوقة..
وطلعت روحك(زي فقط)..

لكن ما كذبتا..ايوة لايوقة مفروض تديني العذر..اقلاها بقول كلمة حق..

Quote: اقلاها بقول كلمة حق..

ولد دا

طلعتي البطل و أنا طلعتة الخاين
قالوا شماشي سينما حلفاية عزم شماشي سينما وطنية
الفلم بطولة جاكي شان
شماشي سينما وطنية بموت فيهو
لكن دقوهو في سينما حلفايةحمّر لي صحبو وقال ليهو بي زعل:
أه ..
والله لو في سينما وتنية كان تلّأ إيينم برة

فهمتي!!!؟
لو حتى نبدأ من الصفر ...

ليك أجر الإجتهاد لكن تفسيرك لا يُعمل به

Quote: قالوا شماشي سينما حلفاية عزم شماشي سينما وطنية

Quote: فهمتي!!!؟

بصراحة دي ما فهمتها..
كلام وقصص الشماشة ما بيفهمو..
عندو ناسو البيفهمو...عرفتا؟؟؟
بالاضافة لاني زولة بليدة وجدا..ما وراء الكلام ما بفهمو..انتا لو جبتو لي عدددديل بالدرب ما حافهمو...
عشان مستوي الذكاء بينا مختلف جدا..
انتا ذكي ما شاء الله عليك..
وانا بليدة..جدا

Quote: ليك أجر الإجتهاد لكن تفسيرك لا يُعمل به

لو ليك انتا ما فارقة معاي تعمل بيه ولا لا..
لاني ما بقنع فيك ولا انتا في نهاية نهاية نهاية راسي..
ولا بتهمني..
بتهمني تيسير والباقين الممكن يقيموها غلط من بوستيك الروعة دة..

وما تجي تقول لي الفرمالة بتاعت لو ما عجبك داخلة ليه؟؟


مع السلامة..
يا علاء..

كلام اللف و الدوران ما حقنا
كلامنا عديييييييييييييييييل
يعتمد على خاصية الفهم عند الغير ولا يحتاج لكثير إجتهاد و حكة راس

Quote: وما تجي تقول لي الفرمالة بتاعت لو ما عجبك داخلة ليه؟؟

أقول ليك في منبر عام!!!؟
معقولة بس
زيك زي بقية الأعضاء الهِنا لا تزيدين عنهم ولا تنقصين البتّة، تجي في أي وقت و تقولي العايزاهو ما حتلقي مني إلا ما كُتِب في توقيعي
أتعامل معك كإسم يكتب لا أكثر ، إن أحسن أحسنّاو أكثر، و إن أساء تُرد له بضاعته (و بزيادة)

Quote: مع السلامة.. يا علاء..

إشارتك خدرا تركواز

Quote: التحية لتييسير عووضة والرماد للرماد

عادل عبد العاطي
إنتظرت تفسيرك للجملة أعلاه و ما جئت لتزيل اللبس الذي لازمنا في استيعاب مراميها و ما رميت إذ رميت لكنه الطبل رمى
شيل الدلوكة دي و أمشي غادي غادي و مارس مرض الشوفونية بتاعت الواو الضكر أمام نون النسوة كما تشاء لكن ما علينا
أوكي!!!!؟