<<<<< مَــــــــــــــرَوِي >>>>>

هذه هي مروي ، المدينة ، العريقة التأريخية الصامدة المُعتّقة بعبق الماضي الذي يأبى أن يرواح مكانه ليزيحه مستقبلٌ يظنه الناس قد أتاها من كل صوبِ و حدب و يبدو أن أغنية الكابلي (فيك يا مروي شفت كل جديد) قد أوّلها كثيرون على أنه التجديد و الحداثة قد كستها و تعلمنت و تبرّجت و أصبحت تُضاهي مدناً كباريس و كوالا لامبور و ما علِموا أننا لا زلنا نُردد:
بيوتنا و جروفنا و سواقينا لمخدِّرة ديمة بالقش يا حسين
البحر قام قشّاها قش
البحر الطمح حريق القرين و البرتقان و الرش
هذه هي مروي المدينة ليست الأرياف ، أرياف مروي بل هي صور من عمق مدينتنا ، من أمام كبري الصداقة مروي ، و القرية التي ينتمي إليها وزير طاقتنا الأسبق و ابن المنطقة و وزير المال حالياً عوض الجاز ، هذه هي منطقته و منطقتنا (كنت أود أن أقول مدينته لكن لقيتة ما لافقة) كنت أُمنِّي النفس بأن تنطقها إحدى حنكوشات المنبر فتقول (ياااااي يا مروي) لكن بعد الصور المرفقة أعتقد أن أصلح عبارة من أجعصها حنكوشة أو مُتحنكِشة ستكون (وووووب علي و سجم خشمي دي مروي؟)
لن أسترسل كثيراً في السرد أو الحكي أو الشرح فكله سيكون ذو شجون و من باب تقليب المواجع ، سأكتفي بالصور علّها تكن كافية ووافية ليعلم معها الجميع معنى كلِمة تهميش التي يتنطعون بها دون و لا يعلمون من أهم أحق بنطقها و تلمُّظِها بمرارة في كل حين.

المنزل الأبيض اللون (جير جبل) محفور بيد أولادنا و من جبالنا ما بوماستيك أيوب أو المهندس ، المنزل يطل على صينية الكبري ، كبري الصداقة ، اللافتة تشير إلي أرياف مروي ما يعني أننا في المدينة (إسم بس والله) الزومة جلاس مروي المطار ، البيوت العاااااااااااالية دي لا تظنوها خرابات بل هى مأوى و سُكنى للصابرين و الكادحين (نحن)

طبعاً الصورة الأولى تعكس الجانب المطل من المنزل على التمُر و شارع الزلط وهو أول أسفلت يغشى مدينتنا مروي بأسرها من حدها لي حدها ، و عمرو مع عمر كبري الصداقة و المشاريع المرافقة للسد.
يعني في ناس لما شمت بالظلط أهلنا بيونسوهم بيهو ونسة (أهل مروي)



الصورة دي تعكس الجانب المطل على الواجهة الجبلية من المنزل ، و الباب محفور حفر في الجبل .

و الواضح قدامكم دة بيت الأدب و كان ما عرفتوهو التواليت و كان ما وقع ليكم الأدبخانة ، إستعمال بشري (أي والله) لايف على الهواء مباشرة ، و تُظهِر الصورة الشِق الآخر من القرية ، و البيوت دي مسكونة إنس ما جان ، و خرجت رغم شظف العيش المُلِم بها رجالاً نوابغ يُعتمد عليهم.

و يا ناس القصر العالي سلام

أهة شِن قولكم في السلالم الطبيعية دي ؟
عيبوها لي

دي صورة من راس بيتنا تجاه الكبري الشاقي التمر كما هو واضح ، يعني نحن في نص العمار

لوري عمنا العزيز ود محجوب ، لوري نقل بضاعة و عربة إسعاف الحِلة و ناقلتهم لبيوت الأفراح و الأتراح أينما كانت ، و لاحظوا الحِتة المسورة الجنب اللوري دي نمرة عمي يعني قطعة أرض ملك حر (أي والله) مسجلة و بشهادة بحث و مسورنها عشان ما جي واحد يتشربك فيها ، تقول لي الرياض و الطائف و المعمورة ، ياخ نحن ما سائلين في قارد سيتي ذاااااااااااااتة.
بالمناسبة محل اللوري الواقف دة و في عيد الضحية الفات هسي دة كان في حفلة عرس رااااااااااابة طمبور و كورس و دارة و شبّالات صاح للصباح ، عرس خالد ود محجوب ولد صاحب اللوري.

أهة دة سقف بيتنا أو راس البيت ، لا سطوح لا عقِد لا زِنك أمريكي ، بلدي و زبالة و سعف و جريد تمر ، عايز لي واحد شااااطر يفرز لي الحيطة من الجبل من الواطة

Quote: دي نمرة عمي يعني قطعة أرض ملك حر (أي والله) مسجلة و بشهادة بحث

أنت ما بتخاف آ آ زوول ؟؟ ... أهو دا سرك عوض الجاز قاعد يضحك عليك .. هسي بكرة يبيعها للكوايتة إستثمار .. ويقوليك شريك إستراتيجي .. وإنت ولا هنا .. !!!!

Quote: بالمناسبة محل اللوري الواقف دة و في عيد الضحية الفات هسي دة كان في حفلة عرس رااااااااااابة طمبور و كورس و دارة و شبّالات صاح للصباح ، عرس خالد ود محجوب ولد صاحب اللوري.

علاء الدين يا اخوي كيف حالك .... دحن جلد ما عندكم..
متابعين الى اللوحة الفنية هذه..

تحياتي

الامين

عزيزي علاء .. لك التحية والسلام الحار ..
أهديك لقطة من مروي .. حي الدومة في أوائل الستينات من القرن الماضي ..
الفرق الوحيد أنه ما كان في شوارع زلط وكنا بنقرأ .. بي أم نويويرة .. وفي أحسن الحالات بالفانوس الببقبق .. والناس المرتاحة خالص بالرتينة المو خمج ..!!
وبيني وبينك .. وما يسموعونا الجماعة .. وخاصة الليلة كانت في نيران على جهة الكلاكلة .. أنحنا الوحيدين الما دخلنا الغابة لا يومي ويومك دا .. وقول يا لطيف ...!!

الحبيب صديق
أريتك تبقى طيب إنتة و البي كلو هين
سندع الصور تؤكد لهم حديث أروك طون أروك حينما قال :
والله بس ما عندكم غابة
لكن مروي أهلها صابرون رغم مرارات الزمن و ما حاق بمروي عبر الأزمنة و مرور الأنظمة لم يدفعنا لتمرد أو تطاول على الوطن و المواطن باسم التهميش ، مع إنو أنحنا أسيادو و غرقانين فيهو (التهميش أعني) علّمنا أنفسنا بأنفسنا بعد أن هاجرت العقول الفذّة و نوابغ البلد و ما فتئت أياديهم البيضاء تتطاول كل يوم تحنو و تُربِّت عليك يا مروي و على أبناءك و كل يوم فيزا ورا التانية و مغترب ورا مُغترِب و السافر و اغترب يرجع ليخطب ود الحسناء البغني ليها صديق أحمد بعدما شوكوش المسيكين القاعدِ جوة:
أصلو ود أب زيد كل يوم من بلدنا مرحِّل جِدي
و أمسِك حبل الصبر

منزل الدكتور عبد الجليل الشيخ عطا الفضيل من فطاحلة العلم و قدماء الحزب الشيوعي ، أستاذ جامعي

أريتهم يا الحبيب يسمعوا الحديث دا .. ويدخل نافوخهم .. ويخلوا البنادق ونضال الإنترنت .. ويجوا يندرشوا معانا هنا ...!!
حلف بي الله الدراب في .. والحصحاص في .. وإنتفاضتنا تسمع في كلامنا .. بس كيفن نسوي الفزع الوجع عبود ونميري .. يمين بي الله نخلي عجاجة يلوي ,, وأنحنا إن قمينا ما بنندار يا علاء يا خوي ..
خليتك بي عافية .. ولا تبيت القوى .. بكرة ما معروف المولى رايدلنا شنو ...
وقول يا لطيف ..!!

"أبوفواز"

الحبيب أبو فواز
يا أخوي هم سامعنو و فايت أضانم لكن منطانشنو ..
نحن شغالين بنظام التوكيد.. علّ و عسى

ما تشوفلي معاك شبا يا حبيب
خهلني اللعضعض لساني

حبيبنا طارق جبريل
عايز شبا وين ؟
دكان إبراهيم ود الجاز ولا ناس الحاج حاكم ولا جامع شبا وود النني المبروك ولا تادي شبا ولا دكان ود تميم؟

كلهن يا علاء خصمتك بالنبي

اولاد تميم اولاد خالتي
وجامع شبا في ضهره بيوت الكرسناب اولاد خالتي الكبيرة
ونادي شبا البيوت الفوق منه بيوت جدودي
وان بقيت جبتلي خور السواعير ما بتكون قصرت

طارق يا ود العم
كأني أسمعك تُغني مع المُغني:
الشوق للبلد بي حالة
الشوق للتراب و أهلي


إنشاء الله كان ربنا مدّ في الايام تشوف كل العايزو

خش على شبا

زي ما قال ليك ود العمة ..

وجيب لنا طينا ..

ياخ والله الزبالة دي بتجيب ليك كلام

أصلو في ناس بعد ما دقشو اوربا بقو ما بيرضو نقول زبالة ..

لانو مرة انا ذكرتها هاجو فيني .... وكتبوها لي كدة زبالة؟؟؟؟؟؟

بس دي زبالة مروي .... يمكن تكون مختلفة ..

احي الطين وناسو .. الاعمام والعمات والحبوبات ..

المهمشين وصابرين ..

جيب شبا والدوداب ...

Quote: والدوداب

يا قلبنا النابض و القاعد أجيب فيها من قبييييييييييييل دي شني؟
ما ياها دودابنا ذااااااااااتة ؟

و شِبا بتجي أصلها لِزقنا تب

و زبالة مروي ولا طوب حراري المنشية

غنيماتنا و مراحن

عاد يا علاء الدين

كان ما اخاف الكضب اقول دا بيت ناس نفيسة " ولاد عمي اليمني ....

وانا اقول بعرف الغنماية دي ..

والبيت الابيض دا ...

عاااد يا علاء ياكا ولدنا ...

دايرة منو في ولاد اليمني يا قلبنا النابض
التاج ولا صلاح ولا مصطفى ولا أنور ولا يسن و لا واحدة من البتين ؟
يا حليل الفوردكيهات البقن أتوسات و فيزتوهات و السبيل البقى لي ناس الضرايب بس الحسنة في دكان أنور و الله يرحم أبوي اليمني و يدي أمنا نفيسة طولة العمر و الصحة

علاء سلام

وصل تحياتى عبرك للكرو
مروى
عبد العظيم

الكرو المِنها معتمدنا الجديد جعفر حسن بادي
رجل أخو أخوان و زول شغل تب
و من أعز أصدقائي علي محمد خوجلي الدويحي من الكرو كان بتعرفو؟
و ناس عكاشة محمد الحسن كان سامع بيهم جيرانا كانوا في ختوم السجم و الرماد دي

ياخ بالغت ..

أنا من زمان عندي احساس انك ياكا الليلنا ....

ديل اخياني

Quote: ياخ بالغت .. أنا من زمان عندي احساس انك ياكا الليلنا .... ديل اخياني

سلام القلب النابض

............
بورداب معتمدية مروى

Quote: الكرو المِنها معتمدنا الجديد جعفر حسن بادي رجل أخو أخوان و زول شغل تب و من أعز أصدقائي علي محمد خوجلي الدويحي من الكرو كان بتعرفو؟ و ناس عكاشة محمد الحسن كان سامع بيهم جيرانا كانوا في ختوم السجم و الرماد دي · · · أبحث · ملفك ·

سلام علاء
يديك العافية

ومحمد الحسن عكاشة ( بعرفهم تمام المعرفة)
والدويحى
ناس الكرو معظمهم نسابة واهل
انا بعرف من مروى ناس ود الباشا
وناس البحيرى
حتى عندما التقيت الدكتور عوض الجاز .. قلت ليهو ياناس( شبا) نحن ناس الكرو( ادونا نصيبنا من الجاز)
ميزة السودان ( الجميلة) العشرة والمعرفة والعلاقات الجميلة
وشكرا
علاء شبا
وانا درست العالى فى مروى العليا بنين

اجمل من الريف البريطاني

التحية لمروي بيرمنجهام افريقيا في ذلك الزمن السحيق

والتحية لها وهي شامة في جبين السودان الان

يا قلبنا النابض
و عبد العظيم
مروي هي أُمّنا و جذورنا ، نعتز بها و نفاخر ، نباهي بها مدن النور و الزو و الأنفاق و النفاق ، يسكنها الكادحون أبناء المسحوقين بحق و حقيقة ، صابرون مرابطون ما فتئوا يعشقون ترابك يا وطن رغم بؤس الحال ، و حينما ضحِك لنا الزمان ذات مرة التفت إلينا آخرون و قالوا لااااااا، دعوهم فهم لا يستحقون !!! المسحوقون لا يستحقون؟
فمن يستحق إذن؟
الأعمدة الخشبية التي ترونها ظاهرة في بعض الصور كأنها للتلفونات كما اعتاد عليها الناس أن تكون ، بل هي لتمرير تيار كهربائي حسنة و صدقة من حكومة ألمانيا لشعب جاؤوه سياحاً فوجدوه يصارع من أجل البقاء ، كل شيء كان ضده وهو يناتل من أجل أن يعيش كريماً و لا يقول آآآآآآآه ، الظلمة تحيط بنا من كل مكان ، لم نعرف من قبل ما معنى كلمة بنية تحتية لأن عالينا زي واطينا واحد ود جبارة لا تزال كلماته تتردد مغناة للسر عثمان الطيب ، ناعم ترابة على هديماتم رقد ، ريحة التمر فوق الهدوم لون الخدار خانس لبد (و رغم ذلك) و الشوق أوارو بيشتعل كان ظني فيهو يكون خمد ، لكنه ما و لم لن يخمد يوماً ، نحن أكثر من طبّق مقولة أن للأوطان في يد كل حر يد سلفت و دينُ مُستحق ، لم ننتظر الحكومات المتعاقبة يوماً أن تصيخ إلينا السمع بعد أن بُحت أصواتنا لأجل إيصالها للمركز ، كل ما فيها مروي من صنع أبناءها البررة المغاوير، ما وطئت أراضينا الباصات المكيفة و السياحية إلا قبل عام و أو إثنين و نصف كبارنا يعانون من الغضاريف و آلامها و الأزمة و ضيقها ، جربنا كل أنواع التساطيح ، تسطيح القطر و تسطيح الباص و الحيكومات مسطِّحة عمّا يدور فيك يا مروي ، مطارنا عبارة عن سهلة مسورة بسلك شائك لأيام قريبات ، عماراتنا الشواهق طبيعية كما ترونها في الصور لم نعرِف ناس طابق طابقين حتى في مركز المدينة إلا من خلال بنك المزارع و أخيراً و قبل أقل من عام مبنى محافظة مروي ، لا توجد فيها مشاريع أياً كان نوعها غير الطورية في أرضك الخاصة ، مصنع التعليب من قمنا لقيناهو في كتاب التاريخ و كذا الحال مع النقل النهري ، ماذا غيرهم ؟
أي ضنكٍ غير هذا يجبر على التمرد و رفع السلاح ؟
لكن لا ، صبرنا حتى التفت إلينا المركز و بدأت عجلة التنمية غاية في البطء تتجه نحونا و راضون بذلك ، فلماذا تستكثرونه علينا يا هؤلاء؟

Quote: اجمل من الريف البريطاني

بل أجمل من الدنيا و ما فيها
جمال طبيعي أخّاذ فقط لا تثقارن بذاك الريف الوريف
نحن ريفنا ما فيهو Call Box و لا فيهو حمامات السايفون لأنو محفور في حجر السوني ، و ريفنا مافيهو سلالم أسمنتية بل جبلية و ريفنا ما فيهو شوارع مخططة بل محل ما تلفِق تلفِق.

Quote: التحية لمروي بيرمنجهام افريقيا في ذلك الزمن السحيق والتحية لها وهي شامة في جبين السودان الان

و التحية ليك يا خليل
لكن يا أخوي بيرمنجهام دي نحن سامعين بيها بس ما شفناها عشان نقارن بمروي
باقي نحن متعنطظييييييييييين و ما بنقبل
شفتة كيف
صرمانين و عدمانين و متعنطظين

أهة يا طارق جبريل مئذنة جامع شِبا
و البيت الأخدر الهناااااااك بيت ولاد ود الجاز

تقولِّي أنا ..
أنا المأساتي ما بتتقال



الله عليك يا أبو فواز ..الله عليك

و يحيك من على البعد .. في شموخ و إباء و كبرياء الجرح فينا .. جبل البركل

هيي يا يوسى ؟
دا شنو الرووم الجايبو لينا دا ؟
غايتو يا الشايقيى لما تجو تسمحو حقكم ما بغلبكم زول ,,

Quote: دي صورة من راس بيتنا تجاه الكبري الشاقي التمر كما هو واضح ، يعني نحن في نص العمار

ما عندكم بيت لكن .. نص العمار ؟؟ ياااااااااااا يوسى خلى اللبط
قول نحن فى نص الحصار ... ياخ ناس غزة اخير منكم ..



انتو بى صحكم ؟..
وشابكنا المطل المطل .. وواحد فيهن مطل مافى كلهن دايرات خارطة طريق ..
الواحد شال هم من شوفتك انت ذاااتك ... لووووووووول (وش حانى عليكم)
بجيك لى باقى الصور
ياخ دى حاجة فيرى انترستيينق (بلهجة الحناكيش)
الليلة يحلك منى الحلا بلة ......... يااااااااااى ,,

دينا خالد
عازمِك رحلة لمملكة مروي تقضي فيها خمستاشر يوم بس
رايك شنو ؟
شان تشوفي مملكتنا الما بتشبها مملكة بروناي ذااااااااااااتة


بالله بعد دة كتير عليها فرِد سد بلد زي دي؟
ياخي مفروض تاني يعملوا لينا تلاتة أربعة سدود و خمستاشر مطار و و تنتقل وزارة المالية لهناك و تقعد لمن تطمئن إنو إحنا إتساوينا مع باقي البشر حتى تعود أدراجها.

ضحكتيني يا بتي

وااااااااااامغستنا

بالله ما صورتلي برج ود درقي أليل الحمام


فسراع يا نسايم اشواقي
رسلي السلام مطبوق
لي اهلنل وجميع حبانا
في الحلي التحت والفوق

يا علاء الديى ..
خمستتتتتتتتتتتتتاعشر يوم ؟ ياخ فيك الخير
خليهم دقيقة ...

انا موافقة نمشى ونجى راجعين مبيت ما معانا ,, هالله هالله ع الجد
وانعل ابو البنط ,,,

ياخى كلامك صاح مفروض يعملوها كلها سدود دا اصصصصصصلا مكان سدود
وانفاق ما مكان سكننى ..











ــــــــــــــــــــ
قلت لى السلالام كيف ؟؟ بطلعوها باليدين والكرعين مش ..َََ!!!

Quote: يا علاء الديى .. خمستتتتتتتتتتتتتاعشر يوم ؟ ياخ فيك الخير خليهم دقيقة ... انا موافقة نمشى ونجى راجعين مبيت ما معانا ,, هالله هالله ع الجد وانعل ابو البنط ,,, ياخى كلامك صاح مفروض يعملوها كلها سدود دا اصصصصصصلا مكان سدود وانفاق ما مكان سكننى ..

دينا خالد
صابرين مئات السنين على هادا الحال و لسع ممكن نصبر
أها الناس القيلين مروي جنّة و أهلها نايمين بالخير كلو بقولوا شنو في كلامك دة:

Quote: ما مكان سكننى

أها إيه رايك الما مكان سكنى دة هو الطلّع رجال يعلمهم القاصي و الداني ، إنتاج مروي يا دينا

Quote: قلت لى السلالام كيف ؟؟ بطلعوها باليدين والكرعين مش ..َََ!!!

رغم مصائبنا نمشي مرفوعي الهامة منصوبي القامة لا تخلو ديارنا من الشهامة و العقول الفهّامة ، و ما نحن البنحبي يا بت الرجال أو نمشي على أربع إلا عند كبر و كهولة.
نُطوِّع الصخر و ندق عليه ليخرج الصخر لنا قمحاً ووعداً و تمنِّي

Quote: لومايةوهتافاية...إلي مروي حبيبتي ما كنت قايل إني بابعد كل دا ولا كنت فاكر إنو البرجعني بس فقد الحبايب والعزا بتحسر والوم نفسي الحبيسة علي زمن الجفا واقول ياريت مصايرنا وقداح عيشنا ... تودينا وتجيبنا علي مراحنا قفا ***** جيت عشان أترحم علي الميتين لقيت يا زولي مذهول وبتعجب علي الحيين القابضين علي جمر المحنة الزين الماسكين الوضوح بالكلمة حمرة عين برغم ناس الطبلة والتمكين لقيتك يا والدة يا مروي لكل أصالة إنتي عرين ما زلت ياكي صنب العزيزة وحضنك أب رياحين تودري كل من يرفع إنيفو عليك واللا ليكِ يشين ***** وقفت بعد حججاً كتيرة علي تراب اطلالك الشامخة مااحتجت لي لأياً ولا اتوهمت فشان اعرف الدار وريحتها الصارخة وافرق بين الراسخة والماسخة برغم حياً إسمه التعمير .. مسا مع الناس بترفض كل من نغمة مشروخة سلامة الباشا تتلقاك ... وحي الثورة يمشي معاك ... وحي الدومة يفرشلك أحلي الورود بي بسمة مطبوخة ***** وكتين سمع نغمة نساوين الحزن والخوف وييويبوي .. وييويبوي .. وييويبوي ... واسترجعت تاريخها تأكد لي تمام لومي الكتير .... وغيابنا المغلف دايماً باعزاراً مبيخة ومميسيخة !! ***** وبرغم السد وكبري النيل الشفتو فيك يا مهدي الجميل بيقلب كل نهاراً في جوايا ليل إنسان مروي بي أم برد والسهراجة ديمة عليل وأحياناً حزام ناراً وتايفويد مسوي الويل لا بيئة نضيفة ولاتثقيفاً يسبق التهليل وكلو صورنا مقلوبة ومحتاجة للتعديل ***** تعمير الشوارع والحجار .. يا مرحبابو ألف والخزان وكبريه .. نقيفلو ألف وتسوير أتر نبتة .. ندورو ألف لكن فشان يتعمر الإنسان ويبقي ألف عشان تتطور البيئة وتبقالا النضافة ولف وضد كُل ضببينة وبويعيضة نسوي حلف لا زمانة تشميرة وهتافاية ... تقول للدولة وينك يا أم شعارها وقف ؟؟ ***** الإسبتالية البدخلها سليم يمرض ويلقطلو علاية الممرضة توبها جاري وجناها فوق الصفحة وشايلالها إبراية ومحضر العملية بالعراقي والسروال وكمان عامل حكاية والدواء الملعون يا إما مافي .. يا إما القريشات ما كفاية أما الدكاترة البطينين يا تلقي واحد والا إثنين .. والمسيكنين حايرابهم الصرفة والغاية ***** ليش يا أبين كلاماً ديمة حلواً مر سويعة الحق ليش ما بتهاتفونا وتقولوا الحق ليش تداروا علينا وماتورونا الشق وصوت الطق ليش تخبوا علينا كل ما تجونا ... وما تدقوا جرس النجدة دقاً دق ***** النفس العزيزة خلتكم كما المضبوح وبيغني والكدسة السمان غشوكم وغشونا ونحن هناك بنغني جالسين كما الهمبول وقايلين الأهل في ديارنا متهني العذر مفقود ... والأسف آلاف ... وياريت سوات الصاح لي هسي مستني وداعاً ... وداع مشتاق وديمة مدلي شان نرجع سوا وتاني نقفز الجنًيِ بـــقـــــــلم:- صديق عبد الجبار محمد ( أبو فواز ) مدينة مروي في 10/مارس/2005م [email protected] [email protected] جوال : 00249912355113

لا فٌض فوك يا أبو فوّاز

واطاتنا و الكبري يتوهط فيها و يتمدد عليها و تمتد معه آمال عراض نحو المستقبل ، لم نقل سلبونا أرضنا بل وهبناها و إن لم ننل عليها عوض ، فالخير للجميع حتى لو من واطاتنا.

واطاتنا و الكبري يتوهط فيها و يتمدد عليها و تمتد معه آمال عراض نحو المستقبل ، لم نقل سلبونا أرضنا بل وهبناها و إن لم ننل عليها عوض ، فالخير للجميع حتى لو من واطاتنا.



ليتهم يدرون معني الإيثار..



سلمت علاء..



وين بيت ناس ( علي محمد وداعة الله )؟؟

Quote: علاء الدين يا اخوي كيف حالك .... دحن جلد ما عندكم.. متابعين الى اللوحة الفنية هذه.. تحياتي الامين

يا الأمين آخوي مالك معلِّق لينا المداخلة دي فوق كدي

حبابك
إحنا العندنا أخير منو الجلِد والله
لا قريب دة كنا بننقل الموية يا بالسِعِن و الحمارة و يا بالجوز و الجركانات في كتافينا لامن إتملّخنْ والله حتى بناتنا نقلن الموية لامن قالوا فيهن:
يا وفا ليه ليه بتملي الموية إنتي حرام عليكي تشيلي
ما كان حقو تملي الباقة شان هي فاضي عليكي تقيلي
يا وفا ليه

أبوة حوه

بلادي أنا ..
بلاد ناساً تكِرم الضيف
و حتى الطير يجيها جعان و من أطراف تِقيها شِبع
تشيل الناس كل الناس وساع بي خيروا لينا يسع
و تِدّفق مياه النيل على الخيران
بياض الفضة في وهج الهجيرة يشع

كلمات لا تُغنّى فقط بل هي ماثلة على أرض واقعنا

Quote: يا قلبنا النابض و عبد العظيم مروي هي أُمّنا و جذورنا ، نعتز بها و نفاخر ، نباهي بها مدن النور و الزو و الأنفاق و النفاق ، يسكنها الكادحون أبناء المسحوقين بحق و حقيقة ، صابرون مرابطون ما فتئوا يعشقون ترابك يا وطن رغم بؤس الحال ، و حينما ضحِك لنا الزمان ذات مرة التفت إلينا آخرون و قالوا لااااااا، دعوهم فهم لا يستحقون !!! المسحوقون لا يستحقون؟ فمن يستحق إذن؟ الأعمدة الخشبية التي ترونها ظاهرة في بعض الصور كأنها للتلفونات كما اعتاد عليها الناس أن تكون ، بل هي لتمرير تيار كهربائي حسنة و صدقة من حكومة ألمانيا لشعب جاؤوه سياحاً فوجدوه يصارع من أجل البقاء ، كل شيء كان ضده وهو يناتل من أجل أن يعيش كريماً و لا يقول آآآآآآآه ، الظلمة تحيط بنا من كل مكان ، لم نعرف من قبل ما معنى كلمة بنية تحتية لأن عالينا زي واطينا واحد ود جبارة لا تزال كلماته تتردد مغناة للسر عثمان الطيب ، ناعم ترابة على هديماتم رقد ، ريحة التمر فوق الهدوم لون الخدار خانس لبد (و رغم ذلك) و الشوق أوارو بيشتعل كان ظني فيهو يكون خمد ، لكنه ما و لم لن يخمد يوماً ، نحن أكثر من طبّق مقولة أن للأوطان في يد كل حر يد سلفت و دينُ مُستحق ، لم ننتظر الحكومات المتعاقبة يوماً أن تصيخ إلينا السمع بعد أن بُحت أصواتنا لأجل إيصالها للمركز ، كل ما فيها مروي من صنع أبناءها البررة المغاوير، ما وطئت أراضينا الباصات المكيفة و السياحية إلا قبل عام و أو إثنين و نصف كبارنا يعانون من الغضاريف و آلامها و الأزمة و ضيقها ، جربنا كل أنواع التساطيح ، تسطيح القطر و تسطيح الباص و الحيكومات مسطِّحة عمّا يدور فيك يا مروي ، مطارنا عبارة عن سهلة مسورة بسلك شائك لأيام قريبات ، عماراتنا الشواهق طبيعية كما ترونها في الصور لم نعرِف ناس طابق طابقين حتى في مركز المدينة إلا من خلال بنك المزارع و أخيراً و قبل أقل من عام مبنى محافظة مروي ، لا توجد فيها مشاريع أياً كان نوعها غير الطورية في أرضك الخاصة ، مصنع التعليب من قمنا لقيناهو في كتاب التاريخ و كذا الحال مع النقل النهري ، ماذا غيرهم ؟ أي ضنكٍ غير هذا يجبر على التمرد و رفع السلاح ؟ لكن لا ، صبرنا حتى التفت إلينا المركز و بدأت عجلة التنمية غاية في البطء تتجه نحونا و راضون بذلك ، فلماذا تستكثرونه علينا يا هؤلاء؟

ما تاجرو بهذه المعاناة ...

لانهم ينتمون لهذا الطين ولا يستبدلونه بذهب الامريكان ولا وعود بني صهيون ...هذه الأرض لنا .... جميلة نراها ولا نساوم عليها

شفت الغنماية الواقفة دي ... ما بتساوم .....

ولوما جيتا من زي ديل واااأسفاي وا مأساتي يا ذلي

شكرا يا علاء الدين ..

Quote: ما تاجرو بهذه المعاناة ... لانهم ينتمون لهذا الطين ولا يستبدلونه بذهب الامريكان ولا وعود بني صهيون ...هذه الأرض لنا .... جميلة نراها ولا نساوم عليها شفت الغنماية الواقفة دي ... ما بتساوم ..... ولوما جيتا من زي ديل واااأسفاي وا مأساتي يا ذلي

و يا قلبنا النابض لن يتاجروا يوماً بأوجاعهم و آهاتهم ، يكتمونها في صبرِ و جلد ، يألمون و لكن لترابهم عاشقون ، يتأسون و لكن يتمترسون في إباء و يؤثرون على أنفسهم ولو كان بهم خصاصة ، ما ناس خساسة ، فقط ليت القوم يفقهون ، و جئناهم بالصور لتتحدث لأن الصور أصدقٌ إنباءاً من النضمي.

سلام يا علاء ..

عليك الله كم صورة كده من القبة ديييك القصادك بالغرب..

لك التحية

علاء الدين يا حبيب:
زمااان ناس فرقة الاصدقاء عندهم في متاعب حلقة جميييلة فيها هالة اغا عاملة فيها عويرة بعدين قام عرسا مصطفى الخليفة ..
بعد العرس بي يومين جوهم الطيب شعراوي وعبد المنعم في البيت يباركو ليهم ونظام شايلين ليهم هدية كانت عبارة عن قرينتيتين معملوات بي الخشب..اول ما دخلوا ختوها في التربيزة وقالوا ليهم دي هدية بسيطة كده مننا ليكم بي مناسبة الزواج ..
اها لمن جو طالعين في الباب ومع السلامة مع السلامة هالة أغا كوركت ليهم :
هووووي ..هوووي.. تعالوا شيلوا عواليقيكم دي معاكم D:D:D:D

علاء الدين ياخ دي صور كعبة جدا ياخ ما تشبكنا طين والغنماية وريحة الزرع ونسمة البحر ويا حليل الانقاية والمنجل وصوت البوري بتاع لوري الزين ونعجة كلتوم ..
ياخ دي بشتنة ساي :D:D:D:D:D

اسة عليك الله عييب لي البيوت المسلحة والسراميك والحمام البي سخان (بعد ده ما بنستحم ) ..
علاء الدين اخوي :
هووووووي ..هوووووووووي.. شيل البشتنة دي :D:D:D:D

تخريمة :
ليك وحشة والله يا حبيب وراشد سأل منك سؤال شدييييييييد ..

المسيخيت ود الفاروق
هسي يا معولق كان حصل فرتيق فرتيق و قالوا خلاص خرتوم ببح أنفصالات و كل قرِد يطلع جبلو ، إنت تمشي وين و يلموك ياتو ناس ، غايتو أمسِك في الحلفاويين ديل يمكن .. يمكن يقبلو.
ما تقول لي أنا و أم در و خليفة و ما عارف شنو ؟

طبعاً ود الفاورق لما ربنا أذن ليهو بسفر قبل سفرة السعودية الخالعاهو ليييييييييييييييي هسي دي ، مشى القرير و ليومنا دة يحلف بيها و بالشافو فيها.
أهة يا سجم الرماد نحن جبنا الصور المبشتنة دي ما شان نقشِر بيها شان يشوفوها الجماعة القايلننا ماكلين الجدادة و خامين بيضة.

كلام دقاق:
والله مشتاق ليك بشدة يا ود الفاروق و من شفتة إسمك عرفتك جيت لخبتة و مديت لسانك الطويل دة ، بالله ما جاي إجازة قريب؟
و تحياتي آلاف لراشد و كنت داير أقول ليك باقي الشباب لكن ديل إنت هسي بتكون مسميهم نا س قريعتي راحت يا بتاع البنوكة إنتة ، لكن سلم لي عليهم صهيب و منعم و عثمان.

الحبيب أبو نون
شقيق الدم و الرأي و الرؤيا

حبابك يا ود قباب ود حاج

Quote: يا الأمين آخوي مالك معلِّق لينا المداخلة دي فوق كدي حبابك إحنا العندنا أخير منو الجلِد والله لا قريب دة كنا بننقل الموية يا بالسِعِن و الحمارة و يا بالجوز و الجركانات في كتافينا لامن إتملّخنْ والله حتى بناتنا نقلن الموية لامن قالوا فيهن: يا وفا ليه ليه بتملي الموية إنتي حرام عليكي تشيلي ما كان حقو تملي الباقة شان هي فاضي عليكي تقيلي يا وفا ليه

ااااااخ يا علاء الدين اخوي نحن في الجزيرة والله نقل الموية بالحمار من البحر ليناوالعد منه زمن من الثمانينات والبئر والعائدي والشائقي بتاع السوريق من اواخر السبعينيات لسع ذكريات منحوتة فينا..... كدي انا سمعت من اصدقائي الشوايقة هنا قالوا في موجات رمال شديدة في واحد من الفصور الناس قاعدة تنقل في قيزان الرمل .... ممكن لوحة من هذا الذكر ....

وفوتك بعافية... يا اخوي

الامين

أها يا أخوي الأمين
المن السبعينات ما شفتوهو دة لي هسي بيحصل معانا مع الموية المجهجهة ، و كان حاصل بشكل أساسي و رئيسي لي قريييييييييب دة ستة سبعة سنة في مروي ذاتة مش من السبعينات.
أما قيزان الرمال أنا كل الصور النزّلتها دي من مروي شرق لو جبتة ليك أي حتة في مروي غرب وهي مقطع البحر مننا تشوف العجب العجاب ، الرمال عندنا زي أشجار الزينة المتسلقة عندكم ، تحبي و تِدّبة و تحبي و تِدّبة لامن تصل لي نص الحيطة و شويتين كدي تلقاها تنتاوق بي فوق الحيطة و تبدأ تديك كشحة كشحتين في بطن حوشك يا حشتها يا حاشتك ما يتنحاش بي أخوي و أخوك.

.
.

علا الدين ود عمي



هذه الصورة أثارت أشجاني ولوعتي، ففي اللوحة الإرشادية سهم يشير إلى مسقط رأس الأسرة في جلاس والبار والبرصة .

وا شوقاً علي بلدي .

لك خالص الشكر والتقدير والود على هذا البوست الجميل الماتع .
.
.

أبو الزهور يا غالي
بالله إنت من جلاس؟
حبابك يا أخوي و بالله أعزِم صحبتك ميادة تجي تشوف ناس مروي حالم كيف

يا علاء

قالوا مروى ح تصبح عاصمة السودان
والكلام دا قالوه ناس مروى

الاخ / علاء
تحياتي
ما دايرين نخرب صورك الرائعه بالتعليق والتنظير
واصل تنزيل الصور كم هي جميله
وواصل تعليقاتك كم هي ذكية
وعبرك يمتد السلام بالاحضان لكل اهلنا الطيبين

ولدنا علي الكرار
تسلم على المرور الجميل و شاكرين للثناء الذي يدل علي معدن أصيل أصالة مروي

يا عبد العظيم يا أخوي
والله نحن مروي دي بي حالة دة و إنت ذاتك أكيد معانا شايفنها عاصمة الدنيا كلها مش السودان بس و مافي شيتاً بيملا عينا دي بلاها ، تعرِف مروي دي من ناحية بتاعت موارد بشرية فيها إمكانات دولة دولة عدييييييييييييييل كدة مش عاصمة بس ، لكن من ناحية بنية تحتية لا تصلح إلا لأن تكون مروي التي نعشقها نحن و يشوفوها ناس دينا خالد محتاجة لي خارطة طريق.
مروي تحتاج الكثير و تستاهل أكثر و كللللللللللللو بي عرق و جهد و تعب أولادها ، إنت قلت من الكرو أنا حأرفع ليك في البوست دة صور التجديدات الحاصلة في الكرو على يد خيرة أبناءها ، و بعرفم كويس و متابع معاهم ، متابع الإسعاف الجابوهو من برة بالعون الذاتي لا مشوا لي تابيتا بطرس لا لي علي عثمان لا لي عوض الجاز ، مشوا لي أولادهم البرة أولاد الكرو ، و إيد فوق إيد و القرش على القرش لامن إشتروها عربية إسعاف جات من برة و مشوا إستلموها من بورتسودان و دفعوا جماركها على داير مليم من حر مالهم.
حأجيب ليك صور مدرسة الكرو ما قبل و ما بعد ، ما قبل التأهيل و ما بعد التأهيل على يد مهندسيها الطلعوا منها ، ماتمردوا و خشوا غابة أو لبدو في جبل و تمرّغوا في وحل طرق العمالة و الإرتزاق و قالوا الدولة ما عملت لينا و ما سوّت لينا و ما غُلّت أياديهم إلى أعناقهم كحال الآخرين بل امتدت بيضاء من غير سوء و شمّرت عن سواعد الجد فعمّرت لجيل الغد ، ديل أهلي البقيف في الدارة وسط الدارة و اتنبّر و أقول للدنيا كل الدنيا ديل أهلي

المكرم /علاء الدين يوسف

مساء الخير ,,,
----------------------------


هو الشمال ناحية القلب
ونافذة تفضي للحنين
والمشاهد هي ذاته النيل
بيوت الطين
بيوت التمر
حيضان البرسيم على الضفة
ومراكب ورواويس وطانبير والاهل الطيبون

لم ازر مروي لكن سعدت أن ازور من ديار الشايقية القرير يوم كانت على النيل
قبل الفيضان في 1988 م ....

ثم اسعدتني أيامي برحلة اخري عبر شمال السودان بكل ديارها قاطع الصحراء
قبل طريق الاسفلت عبر الباجة ذات الكثبان الرملية صعبة المسالك للدبة
ثم دنقلا وعبر المعدية للسليم ثم كل ديار الدناقلة والمحس والحلفاوين حتى حلفا القديمة
كرمة وكرمة النزل وعبري ووووووووووووووو



رحلة لا تمحي من الذاكرة عبر تلك الديار التي يعلو اهله مثل نخيلهم يعانقون السماء
وجذورهم تضرب في الارض وتغوص بعيدا ...


في البال كابلى :


فيك يامروى شفت كل جميل


تقديري

المِفضال عبد الناصر الخطيب
سلامات و مساك بروعة و حنان مروي و أهلها
يا سيدي تتشرف مروي بزيارتكم أما القرير وكت كانت على النيل أو مروي أو غيرها من أنحاءنا فلسانهم جميعاً يقول:
بيوتنا و جروفنا و سواقينا المخدِّري ديمة بالقش يا حسين البحر قام قشّاها قش
و البحر الطمح يا الخطيب حرق القرين و البرتكان و الرش
لكنا لا زلنا صابرون و مصابرون.
مروي ترحِّب يك في أي وقت

يا علاء الدين .. يا المن الدوداب سلام .. ولي كل ناس الدوداب سلام .. ولي شبا والفيها سلام ..

زيد من الصور ...زيد .. بل شوق الناس العشقو الطين ... وطين بي طينو ..وريحة ناسو ..

عارف نحن قررنا كل الاجازات نقضيها في الدوداب دي ...

أبوي مشا جدد بيت حبوبة .. يعني عمل السبلوقات .. وزبل الحيط .. وما معروف جيرها ولا لا

لكن الاجازة الجاية يانا الجايين ... من كل فج .. نعمر بويتاتنا ... ونوري ولادنا الصغار بلدهم واهلهم .. وعزهم ..

مشتهيالي لبنا مقنن في الحجر داك .. أحلب غنمايتو براي .....

متعك الله بالصحة والعافية .. انت وولاد العم اليمني.. كلهم ..

قلبنا النابض

Quote: عارف نحن قررنا كل الاجازات نقضيها في الدوداب دي ...

معناها أكان حيين بنتلاقى

و الصور جاية
و أسلِّم عليهم أهلي الأفاضل

ياعلاء


إزيك يازول ياراقي شديد

وعاشت مروي وأهل مروي يااارب

يا علاء ياخي نمرة عمك الجبلية دي فيها سماحة فيللا .. أو علي الأقل بيت زي ده ..

الباشمهندس/علاء الدين

تحياتي ياجميل.

تشكر كتير علي الصور الجميلة التي تعكس صور التضحية لانسان مروي؛


طيب ياخي انتو خليتو شنو لمواهيم النضال والتهميش ؟



لقد عوضكم صبركم خيرا بقيام السد .

العزيز دكتور بشير
تحياتي يا غالي
تعرِف يا دكتور كنت بتكلّم مع أخ و صديق من أعضاء البورد قبيل وهو خارج السودان ردّ الله غربته ، قلتة ليهو سنة 2003 أنا كنت في نيالا و عد الفرسان و برام و الفاشر ، نيالا و الفاشر في 2003 بالمقارنة مع مروي 2009 زي واشنطن للخرطوم الآن.
و الكلام دة بإثباتاتو ما ساي.
نحن مفروض يدونا قدر السد دة في عشرومية و ما يتكلّمو
نحن بندخِّل يدنا في جيبنا و تعمِّر مناطقنا برانا
بنهاجر و نتغرّب و أول حاجة نفكِّر فيها أهلنا و حِبّانا
و تعليم أولادنا و أولاد أهلنا و تنمية مناطقنا
لم ننتظر يوماً دعماً من حكومة أو منحة من ديوان زكاة أو دخلت مُنظّمة واحدة وطنية أو أجنبية و قدمت أي نوع من أنواع العون و لا نقبل و لن نقبل و إن كُنا تحت خط الفقر.
و لم نتمرد أو نُفكِّر في استغلال حوجتنا و حاجاتنا و نجعلها بضاعة نُسوِّقها في أسواق النخاسة الجدد أولاد سام السام
فقط لنا الله
و لمنطقتنا لهم أيضاً الله و أبناءهم البررة.

منير
الرجل الذي تُعجبني كتاباته حد التتبُّع
طبعاً أهلنا المساكين ديل لو وديت ليهم الصورة دي بعد التعديل صدقني مكن تحصل ليهم حاجة.

شفتة نحن مظاليم كيف ؟
و يشبكوك سلطة و ثروة و نضال و تهميش !!!
هل تعلم إنو عوض الجاز إتربى في المنطقة دي و بيتو مرمى حجر من المكان دة؟

شكراً دكتور مجدي لمرورك الأنيق أيها المُهذّب المُترع بحب الوطن و المتربِّع في دواخلنا.
شكراً لنكت البوست من أعماق المنبر بعد أن كُنّا قد كدنا ألا نرتدي غير بزة حربٍ ضروس بين ثناياه

تلب امسك حبل الصبر وخلي قلبك ما يبقى ني اصلو ود اب زيد كل يوم من بلدنا برحل جدي ..


واصل اخونا علاء .....

يا عـــــلاء ( كف الله الخير ) معزومـه عرس فى مروى !!

جيت جارية جرى لى بوستك دا عشان اامن ..

هسه اللورى دا يا منير مش براااحة ممكن يعمل لى البيت الجبتو
دا ... تتنس ؟؟

انت ياعلاء صور تمبس دى مالها ماليا البروفايلات؟؟ تمبس مات ؟
ولا على وشك ؟؟ قلبو داك اصلو ميت من زماااان .. اقصد باقى الحاجات يعنى !

اظرف حاجة ناس العرس قالو فى حفلة وعشاء ،، راجعت صورك لقيت
مافى اى فسحة للعرس والرقيص غايتو العشاء دا الا يعملوا لى اسقاط بالمروحيات !!
لووووووووول ...

ياخ الصور دى فيرى انترستينق .. خطييييييرة
هسه اصلوووووو غلبكم تعملو ليكم سلم لى البلح دا ؟؟
















ـــــــــــ
كدى ما تشكرنى بكلمات ذى بتاعت مجدى ديك نفسسسسسها
على بحت البوست .. ياخ انتو ناقصين غوص فى التراب ؟؟ ورماد !

دينا خالد
إنتي بايخة بوخ ما عادي
إنشاء الله تمشي البلد و تركبي ليك تمرة و بندرب تقعي منها
و يشيلوك باللوري البعمل تتنس دة وودوك مستشفى كريمة و يقولوا ليك عملية غضروف مستعجلة و يعمل ليك ممرض


يا بنية

الفسحة العملنا فيها حفلتنا محل اللوري دة ذاااااااااااااتو
إنت بتفتشي على صيوان و كدة

إنتي ما سمعتي بي رقيص الدارة!!؟


بمناسبة تمبس
فال الله و لا فالِك
تمبس حرّق روح جماعة كدة قاموا بلّغوا فيهو ناس الصحافة و المطبوعات و حجبوه من عيني إلا من قلبي ما قدروا حجبوه
يعني منعته الرقابة

شكراً لنكت البوست