Post: #1
Title: سؤال للمريخاب: ماذا تعني نجومية المُباراة لمُهاجم الهلال ولحارس المريخ
Author: صبري طه
Date: 09-20-2012, 10:18 PM
هذا مع رأيي الواضح في أنّ دفاع الهلال قاعد ساي ....
فهل تعترفون بأنّ دفاعكم برضو قاعد ساي ؟!
|
Post: #2
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: 7abib_alkul
Date: 09-20-2012, 10:30 PM
Parent: #1
يا صبري المعني و اضح انه الكورة كان اتجاه و احد علي الطريق السريع كمان
لكن اختلف معك في مش دفاع المريخ بس القاعد فقد اختفي و سط المريخ تماما في الشوط الثاني و استطاع ثلاثي الهلال اكانقا مهند نزار أضافة للمهاجم المتأخر كاريكا و احيانا سانية و خليفه بعد دخوله احكام سيطرتهم علي منطقة الوسط
و اذا كان هناك نجم حقيقي في هذة المبارة هو خليفة لأن دخول خليفة و حركته في و سط الميدان كانت كلمة السر التي غيرت مسار المبارة
و عموما مبروك علينا الدوري
|
Post: #3
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: Elhadi
Date: 09-20-2012, 10:40 PM
Parent: #2
مشكلة المريخ اليوم كانت في ريكاردو أكثر من أي شيء آخر
لفشله في إدارة الشوط الثاني من المباراة..
والهلال أفلت من هزيمة منكرة في الشوط الأول
ضفر ده ما مقتنع بيهو كمدافع يلعب في المريخ، فهو مهزوز للغاية، ويفتقر للمهارة وأكثر من تطفيش الكرات بلا داعي
ـــــــــ
كشف مشاطيب المريخ
ضفر، فيصل موسى، فيصل العجب، مصعب عمر
|
Post: #4
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-20-2012, 11:10 PM
Parent: #3
Quote: حبيب الكل كتب: يا صبري المعني و اضح انه الكورة كان اتجاه و احد علي الطريق السريع كمان
لكن اختلف معك في مش دفاع المريخ بس القاعد فقد اختفي و سط المريخ تماما في الشوط الثاني و استطاع ثلاثي الهلال اكانقا مهند نزار أضافة للمهاجم المتأخر كاريكا و احيانا سانية و خليفه بعد دخوله احكام سيطرتهم علي منطقة الوسط
و اذا كان هناك نجم حقيقي في هذة المبارة هو خليفة لأن دخول خليفة و حركته في و سط الميدان كانت كلمة السر التي غيرت مسار المبارة
و عموما مبروك علينا الدوري |
أضف إلى كلامك أنّ وسط الهلال في الشوط الثاني كان عند الموعد .. قمّة الحيوية والنشاط ... غايتو نزار حامد ما شاء الله عليه ... ولو خفّف سرعته أكثر يمكنه الاحتراف على مستوى عالي ...
Quote: الهادي كتب: مشكلة المريخ اليوم كانت في ريكاردو أكثر من أي شيء آخر
لفشله في إدارة الشوط الثاني من المباراة.. |
يا عزيزي لا تلقي باللوم على ريكاردو فمُشكلة الكرة السودانية أنّ المدرّب يضع خطته واللاعب يلعب بخطته المقطوعة من رأسه ...
لاعبي المريخ في الشوط الثاني اكتفوا بالفُرجة على لاعبي الهلال !!! فهل وجّههم ريكاردو بعدم استخلاص الكُرة حتى ولو خراب ساكت كدة ؟!
|
Post: #5
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-20-2012, 11:13 PM
Parent: #4
يا صبري
كاريكا ما نجم الهلال ولا يحزنون
نجم الهلال حارسه ايضا
|
Post: #6
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-20-2012, 11:17 PM
Parent: #5
Quote: يا صبري
كاريكا ما نجم الهلال ولا يحزنون
نجم الهلال حارسه ايضا |
يا وليد غايتو جائزة شركة سوداني للاتصالات أدّوها لكاريكا من الهلال وللحضري من المريخ ...
ـــــــ
لو جينا للجد يا وليد أجمل لقطات المُباراة أتت من كاريكا والحضري ...
ياخي أنا الليلة شمّيت ليك الحضري جنس شمّة ... محل ما الكورة تقع تلقاهو معاها التقول ضلّها !!!
|
Post: #7
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-20-2012, 11:19 PM
Parent: #6
الحضري يستاهل نجومية المباراة
لكن كاريكا لا يستاهلها
واعطوها له بسبب العنصرية
جمعة هو نجم الهلال الاول
ولو لاه لانهى الشوط الاول اربعة صفر
|
Post: #8
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-20-2012, 11:22 PM
Parent: #7
Quote: جمعة هو نجم الهلال الاول
ولو لاه لانهى الشوط الاول اربعة صفر |
طيب يا وليد ... أجيك للجد بي قرونو وأنت حارس مرمى ...
ما رأيك في حارس المرمى الذي ينفض الكُرة بالعمق (في اتجاه وسط الملعب) ؟!
مثال: جُمعة في مباراة اليوم
|
Post: #9
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-20-2012, 11:25 PM
Parent: #8
هذا دليل واضح لعدم الثقة والتهيب من المباراة واللعب على المضمون
لكن هذه ليست نقطة ضعف جمعة الاولى
نقطة ضعفة عدم التوجية
ووقوفه في خط المرمى على الدوام
والعكسيات
|
Post: #10
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: ودرملية
Date: 09-21-2012, 01:45 AM
Parent: #9
سلامات
وعوافي
الصديق الحبيب صبري طه ..
وكل ضيوفه الكرام ..
طبعا اخوك ياصبري هلالابي مرضان زي ما انت عارف ..
لكن بي صراحة الاهداف الاتنين كانو مبالغة .. تدرس حقيقة ..
لكن بعيد عن اي شي نجومية المباراة للحضري ونزار حامد واحمد الباشا..
ديل بيستحقوا النجومية بالباب العديل "في رأيي طبعا"...
واستغربتا لمنحها لكاريكا .. ولم يقدم كاريكا ما يشفع له في هذه المباراة ..
واقول ليك كمان .. خروج احمد الباشا كان القشة التي قصمت ظهر البعير .. هدت نص المريخ مرة واحدة ..
الباشا كان عامل شغل مبالغة في وسط المريخ طيلة الفترة اللعبا في المباراة .. اي كورة كان بيمسكا بتشكل خطورة كبيرة ..
لانو الباشا بيعرف يتصرف كويس في الكورة .. بعدين في الوقت الحالي هو اللاعب السوداني الوحيد البيلعب بي اعصاب هادئة طيلة زمن المبارة ..
سوى امام الهلال او اي فريق .. تركيزو عالي جدا جدا وحضورو الذهني اكثر من راقي .. شوف باصاتو لي كلتشي ورمضان عجب ومصعب عمر في نصف ملعب الهلال..
ياخي والله لما طلعوهو انا ارتحتا خالص وطمعتا كمان في انو ممكن نعادل النتيجة ونغلب كمان ..
الحضري طلع بالضبط اربعة اهداف في الشوط الاول اتنين والتاني اتنين .. اهداف راسا عديل ولو اي حارس غيرو كانت دخلت ..
كورة اكانقا الحاول يجر الحضري بيها وفي نفس الوقت فكر في لعبها "لب" والكورة الشاتا كاريكا وطلعا الحضري كورنر .. وتسديدات مهند الاتنين ..
يعني خطورة كرات الهلال على مرمى المريخ كانت اكثر من خطورة كرات المريخ على مرمانا .. بي صراحة كدة ..
هذا باستثناء الكرة التي صداها جمعة في اقدام مهاجمي المريخ ورفع فيها رجل الراية الاوف سايد..
على العموم الهلال ما مطمن .. موش لانو كعب .. ابدا لانو محتاج لي مدافع حقيقي في قلب الدفاع .. يعني سيف مساوي دا لاعب وسط نشيط جدا جدا..
ضيعوهو بي قلب الدفاع دي بالرغم من انو هو ممتاز فيها لكن عندو هفوات كبيرة شديدة ..
يعني رمضان عجب دا معروف انو زول سرريع جدا جدا وشوات ما في داعي اصلو يفارقو ويديهو فرصة انو يجري ويهدف..
و\بعدين سيف كان بيجرز اهداف مصيرية وبيقوم بي واجبات هجومية ودفاعية في نفس الوقت عندما يكون في الوسط .. الغريبة انو مازدا برضو في الفريق القومي بيلعبو في الخانة دي..
ياصبري "بي صراحة كدة هدف ابراهيما ساني كان اروع الاهداف حتى الان " ياخي الحضري دا عاين ليها لامن دخلت القون ما حرك كرعيهو .. تتخيل ..
وربك يهون القواسي ..
لكم المودة والسلام ..
|
Post: #11
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-21-2012, 09:24 AM
Parent: #10
Quote: وليد محمد المبارك كتب: هذا دليل واضح لعدم الثقة والتهيب من المباراة واللعب على المضمون
لكن هذه ليست نقطة ضعف جمعة الاولى
نقطة ضعفة عدم التوجية
ووقوفه في خط المرمى على الدوام
والعكسيات |
ثمّ يُطالب بمنحه نجومية المُباراة ... فتأمّل !
يا وليد حارس مرمى بيصد الكرة للمهاجمين عشان يلعبوها تاني في القون وتقول نجم المُباراة .. حيّرت أفكاري معاك !!!
| Quote: ود رميلة كتب: لكن بعيد عن اي شي نجومية المباراة للحضري ونزار حامد واحمد الباشا.. |
صديق الزمن الجميل ... لك التحية وليك وحشة يا غالي ...
أتفق معك في نزار حامد وأختلف معك في الباشا الذي شكّل فقط خطورة في الشوط الأوّل ...
أمّا الشوط الثاني فقد تسيّده الهلال تماماً ولم يعد المريخ إلاّ بعد إحراز هدف التعادل وحينها لم يكن الباشا متواجداً ...
|
Post: #12
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-21-2012, 09:32 AM
Parent: #11
هاهاهاهاهاهاهاها
انا موش قلت ليك خليك في مواضيع الالحاد احسن ليك
الحديث عن نجومية مباراة وليس نجومية موسم
ما اظنك تفهم الفرق
وحتى لو فهمتو ما اظنك تعترف بيه قياسا على التجارب معاك
امبارح ضفر كان من نجوم المباراة ( مع انو الهدف غلتطه ) من لاعبي المريخ
ومع ذلك ضفر لا عنده علاقة بالمريخ ولا بالكورة زاتها
واحد اقوى شغرات المريخ
|
Post: #13
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-21-2012, 10:28 AM
Parent: #12
Quote: صبري طه كتب: طيب يا وليد ... أجيك للجد بي قرونو وأنت حارس مرمى ...
ما رأيك في حارس المرمى الذي ينفض الكُرة بالعمق (في اتجاه وسط الملعب) ؟!
مثال: جُمعة في مباراة اليوم |
يا وليد .. إنت جاوبت على المثال زي ما هو مُحدّد بتوقيت معيّن "مباراة اليوم"
ولا تحدّثت عن المثال فيما لم أطلبه منك ؟
ــــــــــ
إذا جاوبت فيما لم أطلبه منك .. دي تبقى عوجتك إنت .. وفهمك إنت ..
قال كمان ما أظن أفهم .. سبحان الله .. حاجات فعلاً تدعو للإلحاد
ــــــــــ
|
Post: #15
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-21-2012, 10:34 AM
Parent: #13
ابدا العوجة فيك انت ما انا
ده سوال مركب يا صبري
شقه الاول يتحدث بصورة عامة (ما رأيك في حارس المرمى الذي ينفض الكُرة بالعمق (في اتجاه وسط الملعب) ؟!)
وشقه التاني يتحدث عن جمعة في مباراة الامس (مثال: جُمعة في مباراة اليوم)
ان جاوبتك على الشق الاول اظلم جمعة في المباراة
وان جاوبتك على مستوى جمعة في المباراة اظلم السوال
عشان كده خليك في العلمانية
مستوى الحراس لا يقاس بمبارة ولا يحكم عليهم من واحدة
الامن من انطباعي مثلك
حتى الان لا يحق لاحد تقييم مستوى جمعة
فقد اظهر تميزا وتوفيق كبير
واظهر عيوب كذلك
|
Post: #16
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-21-2012, 10:42 AM
Parent: #15
Quote: ابدا العوجة فيك انت ما انا
ده سوال مركب يا صبري
شقه الاول يتحدث بصورة عامة (ما رأيك في حارس المرمى الذي ينفض الكُرة بالعمق (في اتجاه وسط الملعب) ؟!)
وشقه التاني يتحدث عن جمعة في مباراة الامس (مثال: جُمعة في مباراة اليوم)
ان جاوبتك على الشق الاول اظلم جمعة في المباراة
وان جاوبتك على مستوى جمعة في المباراة اظلم السوال
عشان كده خليك في العلمانية
مستوى الحراس لا يقاس بمبارة ولا يحكم عليهم من واحدة
الامن من انطباعي مثلك
حتى الان لا يحق لاحد تقييم مستوى جمعة
فقد اظهر تميزا وتوفيق كبير
واظهر عيوب كذلك |
يا وليد طيب في الحالة دي ... حدّثني عن سؤالي العام أولاً بصفتك حارس مرمى ...
ثمّ حدثني عن المثال المرتبط بمباراة الأمس والذي ارتبط في هذه المُباراة بما سألتك عنه في سؤالي العام ...
إنت قلت جمعة نجم المباراة ... مُش كدة ...
وأنا مثالي يتحدّث عن أخطاء جمعة التي كادت أن تطيح بالهلال ...
فكيف يكون جُمعة نجم المُباراة كما ذكرت أنت "وليد محمد المبارك " وفي نفس الوقت ارتكب هذا الخطأ وفي أكثر من مُناسبة ؟
ـــــــ
يا وليد إيّاك والمُكابرة العمياء
| Quote: صبري حديثك في الحضري يسكت ناس كتار قالت جابين الحضري ليه ... |
يا أزهري .. الحضري كان حاضراً في هذه المُباراة ... ورغم تقدّم سنّه إلاّ أنّه يساوي كل حرّاس السودان ...
هذا رأيي في مستوى حرّاس السودان قبل رأيي في الحضري ...
تسلم ياخ ...
|
Post: #17
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-21-2012, 10:50 AM
Parent: #16
انت من يكابر وليس انا
حدثتك وقلت ليك
الحارس عندما يلجاء الى ابعاد الكرت ونفضها في اي اتجاه
يكون مهزوز وفاقد الثقة في نفسه .. وده شي موضوعي بالنسبة للاعب اول مرة يلعب هلال مريخ
انت ما لعبت هلال مريخ قبل ده عشان تقدر تفهم النفسيات والضغط البكون حاصل
ياتو اخطاء ارتكبها جمعة وكادت ان تطيح بالهلال
حتى الهدف يسال عنه مساوي وليس جمعة
ليس هنالك خطا باشر من جمعة كاد ان يطيح بالهلال
هنالك تصرفات كان بالامكان ان يتصرف جمعة فيها بصورة افضل وقياسا على خبرته ده شي طبيعي
حراسة المرمي تراكم الخبرات يمثل شي حاسم فيها
انت ما حا تقدر تفهم الكلام ده
|
Post: #18
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-21-2012, 10:55 AM
Parent: #17
| Quote: ياتو اخطاء ارتكبها جمعة وكادت ان تطيح بالهلال |
نفض أكثر من كُرة لمهاجمي المريخ ...
خطأ أول + خطأ ثاني + خطأ ثالث = أخطاء
وفور حصول على شريط المُباراة كاملاً على اليوتيوب ... سأجلب لك اللقطات عشان تبطّل مُكابرة ...
أرجع لسؤالي مرّة أخرى ... وأقرأه جيداً وانظر هل قُلت لك شيئاً عن الأخطاء غير صد الكرة بالعمق ... أتحدّاك ...
مساعدة .. هذه مداخلتي:-
Quote: صبري طه كتب: طيب يا وليد ... أجيك للجد بي قرونو وأنت حارس مرمى ...
ما رأيك في حارس المرمى الذي ينفض الكُرة بالعمق (في اتجاه وسط الملعب) ؟!
مثال: جُمعة في مباراة اليوم |
هل ذكرت لك أنّه تسبب في هدف المريخ ؟
هل ذكرت لك خطأ غير نفض الكرة بالعمق ؟
ما تجيب ليك أخطاء من رأسك وتضيفها للخطأ الذي ذكرته وهو تكرّر في أكثر من مُناسبة ....
ــــــــ
خلّي روحك رياضية ياخ فهم شنو وبطيخ شنو ...
وهسّي حدّك الحول تجيب لي خطأ أنا ذكرتو ليك غير صد الكرة بالعمق ؟
|
Post: #21
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-21-2012, 11:11 AM
Parent: #18
(هسّي حدّك الحول تجيب لي خطأ أنا ذكرتو ليك غير صد الكرة بالعمق ؟)
طيب انت وكت ما عندك ليك اخطاء غير الخطا ده .. شايل منو قدر ده مالك
انت مفروض تبوشو جمعة ده وتعمل ليه تمثال بخصوص مباراة امبارح
ووكت يجيك الشريط
بالله خليك امين وجيب الكور والاقوان الصريحة الكانت مفروض تكون ومرقها جمعة بالمرة
|
Post: #22
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-21-2012, 11:15 AM
Parent: #21
Quote: ووكت يجيك الشريط
بالله خليك امين وجيب الكور والاقوان الصريحة الكانت مفروض تكون ومرقها جمعة بالمرة |
يا وليد ما عندك مُشكلة ياخ ... مع إنو الحكاية حتكون متعبة بالنسبة لي ...
وعليك الله خليك أمين مع نفسك ... وأشرح لينا بصفتك حارس مرمى الحضري كان بينفض الكورة كيف وجمعة كان بينفضها كيف ...
|
Post: #14
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: Azhari Mohamed
Date: 09-21-2012, 10:33 AM
Parent: #12
الهادي سلام أنا معاك و الدليل كل الدنيا بتقول الشوط الثاني شوط مدربين وياكد كلامك ود رميله
صبري حديثك في الحضري يسكت ناس كتار قالت جابين الحضري ليه ...
لكن يا اهل الهلال ما قلتو لينا شي عن جمهوركم ......
|
Post: #19
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-21-2012, 11:00 AM
Parent: #14
ويا صبري
مافي لاعب من الهلال يستحق نجوميه المبارة خصوصا لاعبي الوسط
مافي كورة ممرة من لاعبي الوسط شكلت خطورة على مرمي المريخ الا قليلا
وجميع الكرات الخطرة كان من ضربات ثابته
تسديدين من مهند من فاولات
وكورنر عسها مهند وضربها بكري راسية
كورة القون الكورة الوحيد الملعوبة وهي متحركة من لاعب الوسط
ومن لعبها هو البدل علاء الدين يوسف
لاعبي الوسط يدوهم نجومية لشنو وهم ما مرقو ولا باص واحد خطير
وتاني بقول الكلم ده
لا سادومبا وعمر بخيت كان سيحسم المبارة لصالح الهلال
لكن لو هيثم لعب نصف ساعة فقط لهزمنا الهلال
ياخ الهلال هجومو ضارب ..ز لكن ما عنده الممويل الذي يستطيع تمويله بصورة سليمه
|
Post: #20
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-21-2012, 11:06 AM
Parent: #19
Quote: لا سادومبا وعمر بخيت كان سيحسم المبارة لصالح الهلال
لكن لو هيثم لعب نصف ساعة فقط لهزمنا الهلال |
غياب عمر بخيت + هيثم مصطفى ... لم يشكّل أثر على وسط الهلال .. على العكس تماماً وضح سيطرة الهلال على وسط الملعب في الشوط الثاني مُنذ فترة طويلة يا وليد ...
يا وليد ممكن تورّيني آخر كورة تنافسية قوية مع فريق إفريقي أو المريخ .. سيطر فيها الهلال على وسط الملعب غير مُباراة الأمس ...
بالنسبة لسادومبا غيابه كان واضحاً لأنه يُرهق دفاع المريخ بتحركاته المزعجة ...
ــــــــــ
بعدين ما تنسى انغلبنا منّكم كتير وهيثم بكون لاعب المباراة كُلها ياخ
ــــــــــ
|
Post: #23
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-21-2012, 11:16 AM
Parent: #20
صحيح اتغلبتو ممنا كتير وهيثم لاعب
لكن خطة مدربكم دي تحديدا تحتاج لصانع العاب عشان يشغل هجومكم الضارب
والا حا يكون معطل كما هو الحال في مباراة الامس
ويكون مهند الطار هو اكثر من هدد مرمى الحضري ومن كرات ثابته
معقولة الهلال يكون عنده هجوم زي ده ..
وينفرد هجوم المريخ بمرماكم اكثر من انفراد مهاجميكم بمرمانا
وسط شنو يا صبري
انت قايلو دافوري
البحاور كتير ياهو اللعاب
|
Post: #24
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: وليد محمد المبارك
Date: 09-21-2012, 11:24 AM
Parent: #23
اما غياب عمر بخيت فقد ظهر في اربعة انفرادات كاملة للعجب الصغيرثلاثة في الشوط الاول وواحدة في الشوط الثاني
وبكل اسف احرز منها واحدة فقط
هسع لو كان عمر لاعب كان مصعب عمر بلعب باص القون مرتاح لي العجب الصغير
يا صبري ده ما دافور
لاعبها بالجمبة وحاور ليه اتنين وختاها بالبيط ولعب دبل كك
وده احسن زول
دي كورة حقت مهام وتكتيك عالي
اهم شيئن رئيسيين لللاعبي الوست
1-عدم اتحاة الفرصة في تمرير كرات خطرة لمهاجمين الخصم
وده حصل كتير جدا من المريخ امبارح
2- تمويل المهاجمين بكرات محسنة تشكل خطورة
وهذا لم يحدث من لاعبي وسط الهلال
فعلا الهل كان ممتلك الكورة
ولو كان عنده صانع العاب كان سيمتلك الفعالية مع امتلاكه للكورة
ان شاء الله مدربكم ده ما يصالح هيثم كلو كلو
|
Post: #25
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: omer osman
Date: 09-21-2012, 11:33 AM
Parent: #24
ياصبري الهلال غلب انتركلوب 3 - صفر ومع كده جمعة جينارو حارس الهلال كان نجم المبارة
يعني عااااااادي امبارح كان ممكن المريخ يغلب الهلال ويكون الحضري نجم المبارة المانع شنو !!!
|
Post: #26
Title: Re: سؤال للمريخاب: ماذا تعني نجومية المُباراة لمُهاجم الهلال ولحارس ال
Author: صبري طه
Date: 09-21-2012, 09:02 PM
Parent: #24
Quote: اما غياب عمر بخيت فقد ظهر في اربعة انفرادات كاملة للعجب الصغيرثلاثة في الشوط الاول وواحدة في الشوط الثاني
وبكل اسف احرز منها واحدة فقط
هسع لو كان عمر لاعب كان مصعب عمر بلعب باص القون مرتاح لي العجب الصغير |
يا وليد في مُباراة إنتركلوب وفي وجود عُمر بخيت ... انفرد مهاجمي إنتركلوب بالحارس لمّا أنا ذاتي فترت من الانفرادات دي ...
Quote: ياصبري الهلال غلب انتركلوب 3 - صفر ومع كده جمعة جينارو حارس الهلال كان نجم المبارة
يعني عااااااادي امبارح كان ممكن المريخ يغلب الهلال ويكون الحضري نجم المبارة المانع شنو !!! |
يا جنابو هذا يعني أنّ دفاع الهلال قاعد ساي وقد تحدّثت وبعض الأهلة هُنا في المنبر عن ذلك .. راجع أحد بوستات الأخ عمر الفاروق الذي تحدّث عن ذلك ...
فهل تعترف أنت بأن دفاع المريخ برضو قاعد ساي في مُباراته الأخيرة مع الهلال ؟!
ـــــــــــ
|
|