الزول السمح هو القال الكلام دا ...

يعاتبني في الدين قومي وإنما ......... ديوني فــــي أشياء تكسبهم حمـــــدا
ألم ير قومي كيف أوسر مـــرة .......... وأعسر حتى تبلغ العسرة الجهـــــدا
فما زادني الإقتار منهـــم تقرباً .......... ولا زادني فضل الغنى منهم بعـــــــدا
أسد به ما قد أخـــــــــلوا ########وا .......... ثغور حقوق ما أطاقوا لــــها ســـــــدا
وفي جفنةٍ ما يغلق الباب دونها .......... مــــكللةٍ لحمــــــــــــــاً مدفقة ثـردا
وفي فـــرسٍ نهدٍ عتيقٍ جعلته .......... حجاباً لبيتـي ثم أخدمته عبــــــــدا
وإن الذي بيني وبين بنـــــــي أبي ........... وبيــــــن بني عمي لمختلفٌ جـــــــــدا
أراهم إلى نصري بطاءً وإن هم .......... دعوني إلـــــــــــى نصر أتيتهم شـدا
فإن يأكلوا لحمي وفرت لحومهم .......... وإن يهدمـــوا مجدي بنيت لهم مجدا
وإن ضيعوا غيبي حفظت غيوبهم .......... وإن هم هووا غيي هويت لهم رشدا
وإن زجـــــروا طيراً بنحسٍ تمر بي .......... زجرت لهــــــــــم طيراً تمر بهم سعدا
ولا أحمل الحقد القديم عليهـــــــم ........... وليس رئيس القوم من يحمل الـــــــحقدا
لهم جلّ مالي إن تتابع لي غنىً ........... وإن قل مالـــــــــــــي لم أكلفهم رفــدا
وإني لعبد الضيف ما دام نازلاً ........... وما شيمةٌ لــــــــــي غيرها تشبه العبدا

المقنع الكندي

الزول السمح شخصية موضوعية تختلف في سلوكها من بيئة لبيئة ومن مجتمع لمجتمع

ممكن اسميهو بلغة القانونيين من حيث السلوك الانساني Reasonable man

السمح يمكن يكون هكذا وسط مجموعته المهنية من حيث التزامه بمعايير السلوك المهني
وممكن يكون مستضاف مع مجموعة من النخب المستنيرة متنوعة التخصصات ( السمح هنا هو الذى يجيد الصمت ويدرك تماما متى آن له ان يتحدث وهو الذى لا يفتح موضوع جانبي مع ضيف آخر والجميع يستمعون بمتعة لمتحدث آخر)

هو الذى لا يدخل على لاعبي الحريق او ال 14 وهم منتظرون الخمسين ويسلم عليهم واحد واحد

هو الذى لا يفتح بوست في المنبر للغناء والمنبر مسود حدادا لوفاة احد اعضاء المنبر.

هو الذى لا يدخل ويحدث ضجيجا والناس منهمكة في متابعة مسلسل تلفزيوني

هو الذى يذهب للمطار بحقيبة واحدة سامسونايت بس زى اخونا واحد فنجري في مسقط اسمه احمد هاشم

هو الذى لا يكلف هذا الاخير بتوصيل كرتونة فسيخ او حطب لاهله في بلاد الغربة

هو العذابي الذى لا يطلع للدوام بدون ترتيب فراشه ويديهو تملسة كمان ونظرة اخيرة عند المغادرة

هو الذي لا يتلهم زميلته ايام الجامعة وهي مع زوجها في السوق لزوم التحية والمجاملة وهو ضاحكا

هو الذى لا يتلهم الناس في بيوتهم قبل الاتصال بهم مسبقا والاطمئنان لجاهزيتهم لاستقباله

نواصل في الزول السمح ثم بعد ذلك نعود للمرأة السمحة كمان

الزل السمح

ما بوقف الطبيب او المحامي في الشارع ليحكي له موضوعه

المحامي السمح ما بوقف القاضي في سهلة المحكمة ويسلم عليهو او يتكلم معاهو وفسحة المحكمة مليانة ناس منتظرين قرار في قضية هو ممثل طرف فيها

الزول السمح

ما يسمع ليهو رنة رسالة على جوال واحد ويقوم جاري ليها

ما بجي خلفك وانت منهمك مع المسنغر عشان يشوف انت بتسوى في شنو

ما بجلس جنبك وانت تتحدث في الاسكايبي مع اهلك او جكسويتك

الزول السمح ما بزعل منك لو ما تداخلت معاهو في احد بوستاتو التي لا يجد مناص للكتابة فيها

اصبروا بس والله الناس السمحين كتيرين جنس كترة اللهم اكرمنا بخصالهم

الزول السمح

ما بتكلم معاك بلغة دارجية سودانية وانتم في مجلس فيهو مجموعة متنوعة من الجنسيات العربية

الزول سمح فوق

تحية الي سعادة المستشار...حياك الغمام ...واطال مقامك الطائل...

قبل ان تدلف بنا الي الزول السمح الفات الكبار والقدرو نستظل باسطرك السمحات يا زين...

موروثنا الثقافي في تنوعه بمعاني الفضيلة راكزة فيه مثل تلك الصور التي اتي بها (الكندي) في زمان قديم...

وزولنا السوداني(الزيك) يفوق في سجاياه معيار الرجل العادي بل يزيد..

السماحة المنبرية هي ضد المساخة المنبرية( حين ترسل السلام او المداخلة الفاهمة الراكزة الي احد اعضاء المنبر ولا يكترث ولا يطيب الخاطر)

الزول السمح هو اعذر الناس للناس...

الزول السمح هو الذي يلا ينساق مع انفعالاته الشخصية ويضع العدل ميزانا لعمته ( الملفوفة بميزان) ..اسمه السودان..

حبيبي ود الكامل

يكفى هذا البوست ان يكون اول مدشنيه زولا سمح زيك يا سعادتك

البركة الاستنطقناك بعد صمت يا جميل

Quote: وزولنا السوداني(الزيك) يفوق في سجاياه معيار الرجل العادي بل يزيد..

تسلم يا الحبيب دا من ذوقك وفضلك

Quote: السماحة المنبرية هي ضد المساخة المنبرية( حين ترسل السلام او المداخلة الفاهمة الراكزة الي احد اعضاء المنبر ولا يكترث ولا يطيب الخاطر) الزول السمح هو اعذر الناس للناس... الزول السمح هو الذي يلا ينساق مع انفعالاته الشخصية ويضع العدل ميزانا لعمته ( الملفوفة بميزان) ..اسمه السودان..

وانت الذى لا يتحدث الا عندما يصمت الاخرون لسماع صوتك ، فلله درك يا عشاى

الزول السمح في بلاد الغربة

ما بمشي للكافتيريا بالعراقي والسروال والسفنجة والراس كمان كاشف

دا شين شنا

Quote: هو الذى لا يدخل على لاعبي الحريق او ال 14 وهم منتظرون الخمسين ويسلم عليهم واحد واحد

Quote: هو الذى لا يدخل ويحدث ضجيجا والناس منهمكة في متابعة مسلسل تلفزيوني

يا الطيب يفترض انك تعدل هذه الجمل لتقرأ كالأتي

الزول السمح هو الذي يرمي اوراق الحريق وهو منتظر الخمسين عندما يدخل عليهم ضيفا

الزول السمح هو الذي يغلق التلفاز وهو يتابع الحلقة الأخيرة من مسلسل عندما يطرق بابه زائرا

مودتي

Quote: الزول السمح هو الذي يرمي اوراق الحريق وهو منتظر الخمسين عندما يدخل عليهم ضيفا الزول السمح هو الذي يغلق التلفاز وهو يتابع الحلقة الأخيرة من مسلسل عندما يطرق بابه زائرا

ود القرشي السمح جيت ؟

حبابك

Quote: يا الطيب يفترض انك تعدل هذه الجمل لتقرأ كالأتي الزول السمح هو الذي يرمي اوراق الحريق وهو منتظر الخمسين عندما يدخل عليهم ضيفا الزول السمح هو الذي يغلق التلفاز وهو يتابع الحلقة الأخيرة من مسلسل عندما يطرق بابه زائرا

كلامك صاح لكن ما على اطلاقه يا دكتور نحن قلنا الزول السمح دا شخصية موضوعية تختلف من مجتمع لمجتمع ومن بيئة لبيئة

يعني كلامك ينطبق على الزول السمح من ناس الضهاري ولكنه لا ينسحب على الزول السمح من ناس البندر

زول الضهاري بجدع الورق وبتلهمك قلدان سااااااااى وبقدل بيك عاني العنقريب

اما زول البندر ما بحسبك سمح اكان قلت السلامة عليكم وهو قافل منتظر الخمسين

فتحي ود على


سلامي

الزول السمح بيخمش الكلام السمح وبكبو في البوست بدون يعلق


باقي لي انت زول ضهاري ساي وود القرشي الناصرتو دا ود ضهاري برضو وانا ذاتي معاكم لكن الزائر السمح عند ناس البندر بيتصل لمعرفة الزمن المناسب مش بتلهم الناس ساي

السمح

ما بقول للطبيب كتبت لي الدواء لشنووووو؟


لانو كتبو ليك لشنو دا موضوع كتاب كامل

ان اداك وكتر ما بقول اديت ...


ما بيتغابا العرفه...

لا يتحدث بصوت عال حين يكون المطلوب همسا..

لا يكتب ليشعر الناس انه موجود او مهم او حاذق او خطير (بتاع فنيلته)...

لا بشتت الكوره حين يكون المطلوب (اللملمه )والتحاور للوصول الي الهدف (العادل)

لا يخترق خلوتك بالسؤال....(قاعد براك؟)

Quote: ان اداك وكتر ما بقول اديت ...

بعد يديك وتديهو ضهرك يقول ليك تعال ازيدك

ما بيتغابا العرفه...

ولو تغابا فيك العرفة لأول مرة كن سمحا بإيجاد العذر له

Quote: لا يتحدث بصوت عال حين يكون المطلوب همسا..

بس ما يشحتف الروح عشان يكون اكثر سماحة

Quote: لا بشتت الكوره حين يكون المطلوب (اللملمه )والتحاور للوصول الي الهدف (العادل)

دى كمان حقيقة ومجازا يا الكامل اخوى

Quote: لا يخترق خلوتك بالسؤال....(قاعد براك؟)

ههههههههها ذكرتني مولانا القاضي ابراهيم حسن

كان قاضي فيري دوقمتك - عندما كان قاضيا مقيما في مدينة سنجة كانت من ضمن هواياته ركوب عربته ماركة لاندروفر استيشن والذهاب بها في العصريات ليجلس على حافة الترعة لوحده .

مر عليه واحد من النوع الذكرتو انت فوق دا - يا الكامل - ووقف بجانبه متسائلا ( مالك يا مولانا واقف هنا عربيتك محتاجة لدفرة؟) السؤال حقيقة بعثر افكار مولانا الذي غالبا ما يكون ساعتئذ متأملا في كيفية ترتيب حيثيات لقضية ما.

مولانا انفجر في الراجل قائلا ( مالك يا راجل ما عندك شغلة انا هسه ناديتك عشان تدفر معاىى عربيتي؟ يلا اتفضل امشي )

تخريمة :

سمعت احد القضاة يقول افضل لحظة برتب فيها افكارو لصناعة حيثيات مرتبة ومنطقية قانونا هي لحظة جلسو داخل الحمام

الزول السمح عند اهلنا العرب:

ما بسألك بقول ليك مراحك دا فيهو كم ناقة ؟

ولا بوريك مشهاد زول جاء لدياره ليحتمي به مهما كانت طبيعة جريمته

ولو زراعتو اتلفتها بهائم الناس بخلي اللجان تمشي تقدر حجم التلف . ويخلي نامن مسبب التلف يجي بفلوسو لدفع التعويض - يقوم يكرمو ليك اول وفي النهاية يحلف طلاق ما يمسك قرش .

المحامي السمح ما بكتّر الطلة لمكاتب زملائه المحامين وكذلك الطبيب السمح ما بعتب على عيادة زميله اطلاقا

الفنان السمح ما بغني وبتلفت للسمحات في الحفلة

ناسنا السمحين زمان اكان الواحد سافر من اولادو فترة طويلة ورجع لكن لحظة رجعتو ووصولو الحلة كانت بالليل اصلا ما بدخل بيتو بالليل داك بنوم في طرف الحلة ويدخل الصباح .

Quote: ما بتكلم معاك بلغة دارجية سودانية وانتم في مجلس فيهو مجموعة متنوعة من الجنسيات العربية

ودو لشيقوق
ايها المستلب عشان لقيت بشاشة مافى

ود اللمير

Quote: ايها المستلب عشان لقيت بشاشة مافى

انت اصلك سمح والكلام دا ما عانيك لانك طولت في الخليج ولسانك اتعوج ذاتو

الزول السمح عندنا ما بخلي زوجتو تكسّر الحطب ،ايا كان نوع الحطب ، هلا هلا بمسك منها الفاس وبقوم بكسرو براهو

البوردابي السمح ما بحشر مداخلتو وسط مداخلات بوستيك ويجي يلومك لانك ما عبرتو بالتعليق عليها

لكن بالمقابل

صاحب البوست السمح بعمل Screening للبوست كلو عشان يشوف اكان في مداخلة اعقبته لحظة انكفائه للرد على اخرين

الزول السمح ما بسأل بنته عن حاجة في لحظة وجود زوجتو

أسأل عنها الزوجة حتى ولو كانت حقة التمباك

الزول السمح
لما يجي الخرتوم ما بياكل العنكوليب في الرقشة ولا الحافلة

المسنوح الليلة قام عليك حق الزول السمح

الزول السمح راح فى حق الله

زمانوا فات وغنايوا مات

واصبح عملة نادرة يا مسنوح

Quote: لما يجي الخرتوم ما بياكل العنكوليب في الرقشة ولا الحافلة

ههههههههههها بالضبط كدا يا عمار

لكن بالمقابل


سواق الركشة السمح بتلهم بالنوع دا الشوارع المظلمة ساااااى

Quote: المسنوح الليلة قام عليك حق الزول السمح الزول السمح راح فى حق الله زمانوا فات وغنايوا مات واصبح عملة نادرة يا مسنوح

الزول الما سمح بفاجأك بمحادثة قصيرة ويشحتف روحك ولما تقول ترجع ليهو بمحادثة بالرقم الاتصل بيهو تجد عبارة ( لا يوجد رقم)

Quote: يا الطيب يفترض انك تعدل هذه الجمل لتقرأ كالأتي الزول السمح هو الذي يرمي اوراق الحريق وهو منتظر الخمسين عندما يدخل عليهم ضيفا الزول السمح هو الذي يغلق التلفاز وهو يتابع الحلقة الأخيرة من مسلسل عندما يطرق بابه زائرا مودتي

الزول السمح الفات الكبار والقدروا ضليع في تصحيح عرب البردانة الغرقانة وناس العونكليب

Quote: الزول السمح الفات الكبار والقدروا ضيلع في تصحيح عرب البردانة الغرقانة وناس العونكليب

الزول السمح بحب الخير لأخيه كما يحب لنفسه هههههها

اوعاك من الدراب

الزول السمح ما بطلب منك جزء من صفحات جريدة بتقرأ فيها
ولو انتظرك لحدى تكمل وشالها منك وكمل تصفحها بطبقها سمح وبملسها بيدو وبديك ليها مع شكرة

Quote: الزول السمح هو الذي يغلق التلفاز وهو يتابع الحلقة الأخيرة من مسلسل عندما يطرق بابه زائرا

يادكتور
الشي مايديه فرصه ؟ يمكن هو ذاتو لاحق الحلقة الاحيرة دي ذاتها !

شوف : الزول السمح (زيي كدا) يكون بيتفرج في برشلونه وريال مدريد يجوا احفاده يقولوا ليه يا جدو عايزين MBC 3
يقوم طوالي يغيرها ليهم ويمشي الصالون يتفرج هناك ولا يزعل ولا يقول بغم

لكن لو الليله جاء واحد منهم قال عايز مويه ساكت .. مش يغيروا ليه هلال مريخ .. الا ينطرد ويتدق هو وابوه كمان ..

الزول السمح يخليك تتفرج علي هلال مريخ وترفّس براك
والزول السمح يتفرج علي المباراه براه ويقفل باب الاوضه وما يفتحه لاي زول

والزول السمح يجي راجع للبوست ده بعد الكوره عشان يبرطع ساي لو غالب وعشان يفش غبينته كان مغلوب

عمر علي حسن

Quote: كن لو الليله جاء واحد منهم قال عايز مويه ساكت .. مش يغيروا ليه هلال مريخ .. الا ينطرد ويتدق هو وابوه كمان .. الزول السمح يخليك تتفرج علي هلال مريخ وترفّس براك والزول السمح يتفرج علي المباراه براه ويقفل باب الاوضه وما يفتحه لاي زول

خايفك يا عم عمر انك تتمنى لو غيرت القناة

خاصة بعد ما ناس المريخ يجيبوا فيكم قون

هذا رأي مشجع قديم للمريخ انتقل الى تشجيع برشلونه

لك كل الود ايها الزول السمح حقا وحقيقة

هلا هلا خالي ابو امير السمح جانا طالي

والزول السمح يجي راجع للبوست ده بعد الكوره عشان يبرطع ساي لو غالب وعشان يفش غبينته كان مغلوب

ههههههههههههها

الزول السمح تكون فاقدو ومشتاق ليهو بالحيل تقوم ترمي ليهو بوست طعمة عشان يجيك ينقد وكش تخمشو وترقص بيهو زى رقصة السامبا

الفنان السمح ما بغني وبتلفت للسمحات في الحفلة

ويا الطيب هو بغنى ليك انت يا السمح ؟
النحكى ليك قصة سمحة
كنت طالبة فى المدرسة المتوسطة
يوم غبنا من المدرسة معاى صاحباتى وبنات من اهلنا ناس بربر فى الابيض
لمن جينا اليوم التانى نادانا الناظر رحمة الله عليه مولانا شيخ عبد القادر
كان مدير لطيف جدا
دخلنا المكتب "عنده غرفة داخل المكتب ورا المكتب لكن بتدخل ليها من المكتب "
نادانا وبدا يسالنا عن غيابنا
سال اختنا منى
ـ بت خوجلى امس ما جيتى المدرسة مالك ؟
ـ امس صحينا متاخرين وكان الصبحية حقت اختى عشان كدا ماجيت
ـ اها رقصتى فى الحفلة ؟
ـ كيف يا مولانا مابرقص فى عرس اختى
ـ خلاس امشى
ـ بت محمد بشير ، امس مالك ماجيتى
ـ امس كانت صبحية اخوى عشان كدا ماجيت
ـ رقصتى فى الحفلة ؟
ـ كيف يا مولانا ؟ مش عرس اخوى ؟
ـ خلاس امشى ، انتى يا بت الناظر " كان والدى ناظر محطة السكة الحديد فى الابيض "امس ما جيتى مالك ؟
ـ كنت فى عرس اهلنا ديل
ـ رقصتى فى الحفلة ؟
ـ لا يامولانا
ـ ما رقصتى ؟ آآآ البحميك ترقصى شنو ؟ وبعدين بعرسوكن كيف كان ما الفنان غنا ليكن فى الحفلة ؟ افتحى ايدك
وضربنى يالطيب ضرب عدوك ، بقيت اضحك وابكى ، اضحك من فكرة انه الفنان يشوفنى ويغنى لى وابكى من الدقة ، والدنيا شتاء وعارف براك كان ضربتك "حنقوقة " بتعبك
اقعد عافية يا زول يا سمح وضيوفك السمحين

Quote: خايفك يا عم عمر انك تتمنى لو غيرت القناة

الدكتور
القضية ما قضية يجيبوا فينا قون .. قاعدين يغلبونا وقاعدين نغلبهم
لكن القضية قضية الرفسي والهستره والدستره .. دي ما بنمرقها للشفع
يمسكوها لينا
اما برشلونه كان شالوا التلفزيون ذاتو ما بنقول شي .. مضمونه طااااااب ..

اها خد عندك : الزول السمح يكون زي ميسي .. محل مايشوتها تدخل

عمر علي حسن

Quote: الزول السمح تكون فاقدو ومشتاق ليهو بالحيل تقوم ترمي ليهو بوست طعمة عشان يجيك ينقد وكش تخمشو وترقص بيهو زى رقصة السامبا

امانه يالطيب ما خمشت ليك ديك بطانه
بس اصبر لي اقلع الدلاقين ديل واجيك راجع .. وكمان اخيتك بت الشيخ المابيه ترقص في عرس بنات اهلها خليها
تستناني ..

عمر علي حسن

اصبروا جاييكم يا السمحين سماحة التعادل بين الهلال والمريخ

معاى ضيوف سمحين وكان انصرفت عنهم للرد علي مداخلاتكم بقولوا لي انت شين طب

Quote: وإن زجـــــروا طيراً بنحسٍ تمر بي .......... زجرت لهــــــــــم طيراً تمر بهم سعدا

لو زجروا طير بنحس تمر بي ...... لزجرت لهم ابالسة

Quote: ويا الطيب هو بغنى ليك انت يا السمح ؟

ست البنات/ سلمي الشيخ سلامة
يعني الفنان يغني بس للبنات .. وانتن سادات دي بي طينه ودي بي عجينه .. طيب خلوه يغني
للطيب .. والله يستاهل .. والمدرس البدق براهو ده ما عارف مكتب الناظر بي وين عشان
يوديك ليه يتم (الحنه) .. بركه الدقوك .. كنتي لي حسع ما عرستي ....

علي ايامنا البت البتابي ترقص في الحفله الا تمشي اهلها براها .. مافي زول بيوصلها ..

تحياتي
عمر علي حسن

Quote: اصبروا جاييكم يا السمحين سماحة التعادل بين الهلال والمريخ

الطيب خالي
الناس ديل ضيعوا وقتنا ساكت .. كنا اتوهطنا في البوست السمح ده .. كان ابرك ..
واخوك طبعا مالقي يفش غبينته الا في المسكينه سلمي .. عارفها بت مهذبه وما
بتقول لي عمها (اتلهي كده) ..
وعليه :
الزول السمح بيسردب للكبار ويفوّت طولة لسانهم عليه ..

عمر علي حسن

خالي ابو امير

الزول السمح بيسردب للكبار ويفوّت طولة لسانهم عليه ..



وكمان الزول السمح ما بشيل ابريقو بتلهم طرف الحوش ويجي راجع عاضي تكة .... بسنونو و ..... وكمان يسمع في نضمي الناس تحت الراكوبة من بعيد ويجي متلهمهم يقاطعم في الحديث من بعيد يبيّن حرف ويخفي حرف في كلامو من عضة ال.....


لقيتني كيف يا خال؟

يا عمر اخوى هو دا الناظر زاتوالبدق "ما بطلق والبخنق ما بعلق "
امانة ما دقانا دق العيش
عارف زمان ايامنا كان فى حاجة اسمها امنية الكتب فى اول العام الدراسى وامنية الكرسى والدرج
مولانا اول شهر بعد المدرسة تفتح يجينا ليك فى الفصل "متخصص فى فصلنا دا "
السمحات كلهن هنا فى الفصل دا لمن سموه "طيور الجنة "
ويبدا من اول واحدة واسمح واحدة كان اسمها شادية كمبال
ابوها اغنى رجل فى المدينة يومها
ويسالا
ـ بت كمبال جبتى الامنية ؟
ـ نسيت يا مولانا
ـ نسيتى ؟ تعالى هنا
وفى مسطبة الفصل يقيف ويدق وشادية تكورك ونحن نضحك
اها الضحك دا ما كان بدورو يمرقنا كلنا فى المسطبة
ويبدا يجلد فينا لمن راسه يلف وقيامته تقرب تقوم
ومرات يقع من التعب
ومرات سبب بلا سبب يجى الفصل ويبدا فى الجلد بدعاوى الازعاج
ونحنا عارفين سببه "الحماهو " وسببه الجابو برضو

اها بخصوص العرس
الابيض مدينة فى الزمن داك كانت صغيرة نسبيا والناس ببتتعارف
الموظفين والتجار كانوا على قمة الهرم والمعرفة بالاسماء لكل موظف فى المدينة وكل تاجر
مولانا كل ما يلاقينى مع امى رحمة الله عليهما يسال امى
ـ البت لسه ما عرستى ليها ؟
كنت يومها فى المرحلة الثانوية
تضحك امى وتجيبه يا مولانا البت لسه ما تمت المدرسة
يرد مولانا
ـ المدرسة ملحوقة البورة ما سمحة
فى ذلك الحين كانت معظم زميلاتى تزوجن من سنة تانية ثانوى عام يومها وهو يعرف تلك الحقيقة
لذلك كان همه ان تتزوج "بناته فى المدرسة "

بالمناسبة حدث ان كنت طالبة فى كلية المعلمات وكانت احدى تلميذاتى فى فصل التدريب يومها بملامح امها
سالتها
ـ انتى امك اسمها فاطمة القراى ؟
فاجابت نعم
فاطمة تلك كانت دفعتى وتزوجت وهى فى الصف الثانى من المرحلة الثانوية العامة
ضحكت يومها وتذكرت كلام مولانا لامى
وكان جينا للجد كان عرست زمان كان هسى بقيت حبوبة حبوبات وما اظن كان اتلاقينا هنا
لانى كنت حاكون مشغولة ب"نفاس بت بتى وبت ولدى وهلم جرا او كما قال المهدى "
تسلم يا يالحبيب ويسلم صحبى الاسفيرى العرفنى عليك

الفاضلابييييييييييييي

وينك يا شقي الحال

لو زجروا طير بنحس تمر بي ...... لزجرت لهم ابالسة

تعال الابلسة فايتاك وين انت ؟

خالي


امانه يالطيب ما خمشت ليك ديك بطانه
بس اصبر لي اقلع الدلاقين ديل واجيك راجع .. وكمان اخيتك بت الشيخ المابيه ترقص في عرس بنات اهلها خليها
تستناني ..


هههههههههههههها ديك بطانة وبس ؟ حرم بي علاعلو

خالي بت الشيخ دي خليها لينا كنت رامي ليها السنارة ما تطفرها مني حتك

تحية...


الزول السمح لا ينسي الذكري السنوية لزواجه.

عيد ميلاد زوجته (فيها قولان)

تحية



الزول السمح لايطلب من الفنان غناء ما ليس من اغانيه


لا يستخدم تعابير مثل شايفك امبارح....او كنت بقول ليك في شنو

سلام يا الطيب المكمل علام
فسر نضيمك ماتجيب لينا الملام
بتدور السماحة البتحمي المنام
ولا قصدك كلاما بجيب الكلام

في سماحة تمام ما فيها فصالة
عقلا رزين ما بسوي الخمالة
لا بتقعد وسط الناس العطالة
لا بعوس كلام ولا بشيل القوالة

وفي سماحة كاسياها هالة
لون شفقا اللافح الغلالة
البلمح لمحة بتمسكو الملاله
لابنفع فيهو بصير ولا إحاله

من الاتنين البدخل يحاور
نصلا انغرس لبطن المغاور
حريرا قبض صقرا بزاور
وا سهر ليل الضرس البيتاور

سلمى بت الشيخ اختي

سلامي وشوقي ليك ممطر


ويا الطيب هو بغنى ليك انت يا السمح ؟
النحكى ليك قصة سمحة
كنت طالبة فى المدرسة المتوسطة
يوم غبنا من المدرسة معاى صاحباتى وبنات من اهلنا ناس بربر فى الابيض
لمن جينا اليوم التانى نادانا الناظر رحمة الله عليه مولانا شيخ عبد القادر
كان مدير لطيف جدا
دخلنا المكتب "عنده غرفة داخل المكتب ورا المكتب لكن بتدخل ليها من المكتب "
نادانا وبدا يسالنا عن غيابنا
سال اختنا منى
ـ بت خوجلى امس ما جيتى المدرسة مالك ؟
ـ امس صحينا متاخرين وكان الصبحية حقت اختى عشان كدا ماجيت
ـ اها رقصتى فى الحفلة ؟
ـ كيف يا مولانا مابرقص فى عرس اختى
ـ خلاس امشى
ـ بت محمد بشير ، امس مالك ماجيتى
ـ امس كانت صبحية اخوى عشان كدا ماجيت
ـ رقصتى فى الحفلة ؟
ـ كيف يا مولانا ؟ مش عرس اخوى ؟
ـ خلاس امشى ، انتى يا بت الناظر " كان والدى ناظر محطة السكة الحديد فى الابيض "امس ما جيتى مالك ؟
ـ كنت فى عرس اهلنا ديل
ـ رقصتى فى الحفلة ؟
ـ لا يامولانا
ـ ما رقصتى ؟ آآآ البحميك ترقصى شنو ؟ وبعدين بعرسوكن كيف كان ما الفنان غنا ليكن فى الحفلة ؟ افتحى ايدك
وضربنى يالطيب ضرب عدوك ، بقيت اضحك وابكى ، اضحك من فكرة انه الفنان يشوفنى ويغنى لى وابكى من الدقة ، والدنيا شتاء وعارف براك كان ضربتك "حنقوقة " بتعبك





كنت عايز اعقب على كلامك الحلو دا لكن لقيت خالي سعادة اللواء رد عليك فحسيت اي بغم بعد كلامو بطلعني من خانة السمحين

خالي سارح ولا معانا انت ؟

ود الكامل

الزول السمح لا ينسي الذكري السنوية لزواجه.

عيد ميلاد زوجته (فيها قولان)

دا سمح المدينة يا الكامل

سمح الضهاري ولا بطرا ولا بحكي في المجالس عيد ميلادو ولا عيد زوجتو

لكن بالمقابل

الزول السمح عند ناس الضهاري ما بجيهم ضيف علا يدو فيها حاجة تفرح الوليدات

ود مجذوب السمح كيفنك؟


فسر نضيمك ماتجيب لينا الملام
بتدور السماحة البتحمي المنام
ولا قصدك كلاما بجيب الكلام

في سماحة تمام ما فيها فصالة
عقلا رزين ما بسوي الخمالة
لا بتقعد وسط الناس العطالة
لا بعوس كلام ولا بشيل القوالة

وفي سماحة كاسياها هالة
لون شفقا اللافح الغلالة
البلمح لمحة بتمسكو الملاله
لابنفع فيهو بصير ولا إحاله

من الاتنين البدخل يحاور
نصلا انغرس لبطن المغاور
حريرا قبض صقرا بزاور
وا سهر ليل الضرس البيتاور


نضميك سمح زى سماحة فكرك - اكرمنا بكلام سمح تاني

منتظرنك تعال صاد

Quote: الفنان السمح ما بغني وبتلفت للسمحات في الحفلة ويا الطيب هو بغنى ليك انت يا السمح ؟ النحكى ليك قصة سمحة كنت طالبة فى المدرسة المتوسطة يوم غبنا من المدرسة معاى صاحباتى وبنات من اهلنا ناس بربر فى الابيض لمن جينا اليوم التانى نادانا الناظر رحمة الله عليه مولانا شيخ عبد القادر كان مدير لطيف جدا دخلنا المكتب "عنده غرفة داخل المكتب ورا المكتب لكن بتدخل ليها من المكتب " نادانا وبدا يسالنا عن غيابنا سال اختنا منى ـ بت خوجلى امس ما جيتى المدرسة مالك ؟ ـ امس صحينا متاخرين وكان الصبحية حقت اختى عشان كدا ماجيت ـ اها رقصتى فى الحفلة ؟ ـ كيف يا مولانا مابرقص فى عرس اختى ـ خلاس امشى ـ بت محمد بشير ، امس مالك ماجيتى ـ امس كانت صبحية اخوى عشان كدا ماجيت ـ رقصتى فى الحفلة ؟ ـ كيف يا مولانا ؟ مش عرس اخوى ؟ ـ خلاس امشى ، انتى يا بت الناظر " كان والدى ناظر محطة السكة الحديد فى الابيض "امس ما جيتى مالك ؟ ـ كنت فى عرس اهلنا ديل ـ رقصتى فى الحفلة ؟ ـ لا يامولانا ـ ما رقصتى ؟ آآآ البحميك ترقصى شنو ؟ وبعدين بعرسوكن كيف كان ما الفنان غنا ليكن فى الحفلة ؟ افتحى ايدك وضربنى يالطيب ضرب عدوك ، بقيت اضحك وابكى ، اضحك من فكرة انه الفنان يشوفنى ويغنى لى وابكى من الدقة ، والدنيا شتاء وعارف براك كان ضربتك "حنقوقة " بتعبك

هههههههههههههههههههه والله ضحكتينى ضحك يا بت الشيخ

وانتى ما كان تقولى ليه رقصتى زى اخواتك مالك ومال الجلد هههههههههههههههه

الزول دا شكلوا كان بحب الحمام الرقاص

الزول دا شكلوا كان بحب الحمام الرقاص

هههههههههههههههههههههههههها مسنووووووووووووووحة

جاك قبضيك؟

الزول السمح بنقي لضيوفو العنكوليب وبديهم ياكلو سااااااااااااااى

Quote: خالي سارح ولا معانا انت ؟

سارح والله في الخراب القايمين فيه ناس الكورة
كل واحد يمشي استاد التاني يكسره .... التقول هو البناهو

ياخي قول ليهم :
الزول السمح يحفظ مال اخوهو وعرضو
والبتسووا فيه قبيح كان ترضو او ماترضو

وسارح والله فوق (ديك البطانه) نافش ريشه فوق بت الشيخ سبه بلا سبب
وساعود لهذا الموضوع بعد ان اعود من (معاينة) حفيدي الجديد الذي قدم الي
الدنيا بعد الكورة بدقائق .... يعني لو جا قبل النهايه كان جماعتك روحوا ..
وكان (ديك البطانه) ما خلي فيها مسلم ولا نصراني .. وكانت سلمي سلمت .

عمر علي حسن

أستاذنا الريس عمر (الما بشير يا وضاحة)
ألف مبروك ما جالكم .. إن شاء الله يتربى في عز أهله السمحين...
---
يا أستاذ الطيب...
في حاجات نتفق معاك فيها وحاجات نختلف وحاجات كده ما فهمناها...

Quote: السمح ما بقول للطبيب كتبت لي الدواء لشنووووو؟ لانو كتبو ليك لشنو دا موضوع كتاب كامل

ده كلام؟؟ ... والله أسأله لما يقرب يطردني من عيادته..المريض أنا ولا هو..؟!
والله يا أخي ما تتصور بحترم كيف الطبيب البصرف زمن عشان يشرح لي أسباب شكوتي وعلاجها..ويحكي لي كمان عن الدوا لو فيه أي "سايد افكتس"

Quote: ناسنا السمحين زمان اكان الواحد سافر من اولادو فترة طويلة ورجع لكن لحظة رجعتو ووصولو الحلة كانت بالليل اصلا ما بدخل بيتو بالليل داك بنوم في طرف الحلة ويدخل الصباح

لكن اولاده المساكين لو مساهرين متوقعين جيته يسووا شنو؟ يساهروا صباحي وهو نايم في طرف الحلة..!

Quote: الزول السمح ما بسأل بنته عن حاجة في لحظة وجود زوجتو أسأل عنها الزوجة حتى ولو كانت حقة التمباك

دي ما وقعت لي... يعني شنو؟
وبرضو موضوع الحريق وخمسين داك برضو ما فهمته..
إن شاء الله ربنا يحيطك بالسمحين وين ما مشيت .. قول آآآمين

رمانة

يا أستاذ الطيب...
في حاجات نتفق معاك فيها وحاجات نختلف وحاجات كده ما فهمناها...

ده كلام؟؟ ... والله أسأله لما يقرب يطردني من عيادته..المريض أنا ولا هو..؟!
والله يا أخي ما تتصور بحترم كيف الطبيب البصرف زمن عشان يشرح لي أسباب شكوتي وعلاجها..ويحكي لي كمان عن الدوا لو فيه أي "سايد افكتس"



يا روما ياخ انت هسه لو جاك متقاضي للدفاع عنه في قضية قتل وكان خط دفاعك هو حق الدفاع الشرعي هل بتشرحي لموكلك هذا لماذا حق الدفاع الشرعي ؟ ياخ كدا محتاجة تشرحي ليه ما قاله قرشنا فازديف وعبد الله النعيم ويمكن تحتاجي تتلهمي بيهو فقهاء القانون النايجيريين كمان .

تخريمة حبة بس

زمان زمن الطفولة عندما امرض وتسوقني امي للدكتور حتى وان كانت نزلة بتقول لي احكي ليهو كلام كتيييييييييييييير عشان يكتر ليك الدواء .يا ولدى



لكن اولاده المساكين لو مساهرين متوقعين جيته يسووا شنو؟ يساهروا صباحي وهو نايم في طرف الحلة..!

اكان الاولاد متوقعين جيتو تكون اسباب التأخير قد انتفت تماما يا روما - لان مقتضى التاخير او النوم برة ..............

اكان ما ناقشة الحتة دي ارخي اضانك في المسنغر احكي ليك


دي ما وقعت لي... يعني شنو؟

موضوع السمح ما بطلب من بتو حاجة في حال وجود زوجتو بتكونى ناقشاها لانها it goes without saying وكان لابد من توضيحها فالزوجة تغير حتى من بنتها يعني عايزة اى حاجة تخص الزوج تعملها هي .



وبرضو موضوع الحريق وخمسين داك برضو ما فهمته..

دي زى الدواء بتاع الطبيب ما بنقشوها الا لعيبة الحريق او الكتشينة لكن على العموم ناس الحريق ديل بيكون اى واحد ماسك ورقو مترقب الكرت الذى يرميه له الشخص الذي في شماله عشان كدا ما بحب اى حد يجي يعمل ليهو انترشن


يمكنك طلب المزيد من الايضاحات ( مش بتاعة الصادق المهدي ) ان كان ثمة لبس في اى جزئية مما ذكر

يا خالي الف الف الف سلامة البنت انحلت بالسلامة وان شاء الله المولود يتربى في عزكم

معليش خاصية الاقتباس ما شغالة عندي -



سارح والله في الخراب القايمين فيه ناس الكورة
كل واحد يمشي استاد التاني يكسره .... التقول هو البناهو

ياخي قول ليهم :
الزول السمح يحفظ مال اخوهو وعرضو
والبتسووا فيه قبيح كان ترضو او ماترضو

دي شينة شينة وعيييييييييييييييب والله - انت عارف لاقاني عماني كان متابع مبارة المريخ واهلي شندي قال لي انا حزين جدا يا الطيب من الشعب السوداني الكان سمح - ما يستوى ياخ فريقان سودانيان تقوم الجماهير تدخل بالصحون مليانة دراب جوووة الاستاذ عشان يجدعوا اخوانهم ما يستوى وما يستوى

الزول دا شكلوا كان بحب الحمام الرقاص

تعرفى يا وضاحة مولانا دا كان بحب البنات السمحات
كان عندنا زميلتنا سمحة وطويلة اطول واحدة فى الفصل
عفاف كانت امها اتوفت ايام الدراسة وكانت بتجى المدرسة متاخرة كل يوم
لانها بتقوم بواجبات الام تجاه اخواتها واخوانها الصغار
كان مولانا بدرسنا التربية الاسلامية
فى الامتحان الاول عفاف اخدت 30 من 25
لمن سالنا مولانا عن السبب قال
ـ دى بت ناضجة كبيرة وسمحة انتن لسه بتلبسن الطرح وهى بتلبس التوب
شفت الحب دا كيف ؟

تعرفى يا وضاحة مولانا دا كان بحب البنات السمحات
كان عندنا زميلتنا سمحة وطويلة اطول واحدة فى الفصل
عفاف كانت امها اتوفت ايام الدراسة وكانت بتجى المدرسة متاخرة كل يوم
لانها بتقوم بواجبات الام تجاه اخواتها واخوانها الصغار
كان مولانا بدرسنا التربية الاسلامية
فى الامتحان الاول عفاف اخدت 30 من 25
لمن سالنا مولانا عن السبب قال
ـ دى بت ناضجة كبيرة وسمحة انتن لسه بتلبسن الطرح وهى بتلبس التوب
شفت الحب دا كيف ؟

هههههههههههههههها غايتو ناس التربية الاسلامية ديل يا بت الشيخ بكايين خلاص لكن ليس للحد الذى يكشحها ب 30 من 25

Quote: تعرفى يا وضاحة مولانا دا كان بحب البنات السمحات كان عندنا زميلتنا سمحة وطويلة اطول واحدة فى الفصل عفاف كانت امها اتوفت ايام الدراسة وكانت بتجى المدرسة متاخرة كل يوم لانها بتقوم بواجبات الام تجاه اخواتها واخوانها الصغار كان مولانا بدرسنا التربية الاسلامية فى الامتحان الاول عفاف اخدت 30 من 25 لمن سالنا مولانا عن السبب قال ـ دى بت ناضجة كبيرة وسمحة انتن لسه بتلبسن الطرح وهى بتلبس التوب شفت الحب دا كيف ؟

هههههههههههههههههه

غايتوا يا بت الشيخ الراجل دا ياخى زواق وبعرف الجمال

الرجل عجبوا الطول و البت الطويلة هى الرجال البحبوها و اكيد جسمها جميل


غايتوا الرجال ديل الله يكفينا شرهم هههههههه

هدية لى سلمى بت الشيخ السمحة علشان بريدة شدييييييييييييييد

يا جماعة تابعوا نشرة الرابعة بتوقيت مسقط في قناة الجزيرة عشان تعرفوا حجم الدمار الذى لحق بالدندر بسبب الفيضان


تابعي يا وضاحة وسجلي لينا

خالي ابو امير السمح وين قنجرت؟

يا حليل اهلنا الشلك السمحين

Quote: خالي ابو امير السمح وين قنجرت؟

والله يالطيب انا زيك مشغول بالدندر وخراب الاستادات الواقع فينا واسلوب التعاطي مع الاحداث في السودان
وما ينتظره من بأس .. بالمناسبه (الوالي) بتاع سنار في الخرطوم .. بيدير الازمة من هناك .. تري هل يحلنا
الحل بله .. والله نشوف لينا سكه تانيه ؟

الزول السمح ابدا مابقول للعوج عديل حتي لو كان موت عدوهو .....

ثم اسألك .. الناس كلها مالها .. بطنها طامة .. وجلدها بقي تخين كده ؟

عمر علي حسن

Quote: ثم اسألك .. الناس كلها مالها .. بطنها طامة .. وجلدها بقي تخين كده ؟

لانوا كتر عليهم

الله يكون فى العون ما عارفين زاتوا يلقوها من وين ولا من يون

حكومة ظالمة

Quote: والله يالطيب انا زيك مشغول بالدندر وخراب الاستادات الواقع فينا واسلوب التعاطي مع الاحداث في السودان وما ينتظره من بأس .. بالمناسبه (الوالي) بتاع سنار في الخرطوم .. بيدير الازمة من هناك .. تري هل يحلنا الحل بله .. والله نشوف لينا سكه تانيه ؟

والله يا ابا امير انا خلجت من العمانيين الشغالين معانا ( او الشغال معاهم) والله كلما يلاقوني يقولوا لي معقول البسوى في خراب الاستاد دا هم السودانيون البنعفهم بسماحتهم نحن من زمان ؟ والله غلبني ارد ليهم .

السياسي السمح بيتعرف لحظات المحن دي يا خال

Quote: الزول السمح ابدا مابقول للعوج عديل حتي لو كان موت عدوهو .....

بالحيل

Quote: ثم اسألك .. الناس كلها مالها .. بطنها طامة .. وجلدها بقي تخين كده ؟

من جيب جيب حقت النسوان انا قايل ولا رايك شنو؟

وضاحة

ان شاء الله شفت مراسل قناة الجزيرة ( الطاهر المرضى) بتكلم ليكم من البردانة ؟

وحياتك الزول دا بتكلم من بيوتنا

تابعي وسجلي بالذات الفقرة الاخيرة البقول فيها ( الطاهر المرضى ولاية سنار قرية البردانة)

الجزيرة دي سمحة خلاص

Quote: لانوا كتر عليهم

الدكتورة
دابو كتر عليهم ؟؟
طيب نحن حقنا راح ولاعبين في الوقت الضايع .. لكن العندو اربعين الف بيت وقعوا ومشاكل صحه وطرق
وامدادات وعروه شتويه .. وسعادتو قاعد في الخرطوم .. والحل بله قبل كده جاكم قلتو مرتزقه ..

القضية يابت اخوي طلعت من (حكومه ظالمه) .. واوعي تكون دخلت في غضب الله

عمر علي حسن

Quote: تابعي وسجلي بالذات الفقرة الاخيرة البقول فيها ( الطاهر المرضى ولاية سنار قرية البردانة)

والله البردانه حقها راح .. مادام الجزيره وصلتها ..
وانا اقول يلربي مالنا بقينا كدي .. حليل مزيج البردانه الراجيهو خالك يعوض بيه كل الفاتو !

عمر علي حسن

Quote: من جيب جيب حقت النسوان انا قايل ولا رايك شنو؟

باقي لك كدي ياخال ..
الجيب ما اتقلب .. والبقولوا جيب جيب شنباتهم تكتف الاسد .. والبجيبوا يا معلم بقوا النسوان ..

الزول السمح .. قالوا عليه :
(إت كان اديت ما بتقول اديت .. تاتاي في الخلا وعقبن كريم في البيت)

تفتكر ده فضل منه كم ؟

عمر علي حسن

Quote: والله البردانه حقها راح .. مادام الجزيره وصلتها ..

لا يا خال مالك داير تفك الدرب انت ماك سمعت قالوا السمعة ولا طولة العمر؟

خلينا نغطس لاضنينا من الفيضان طالما اسم البردانة دخل قوقل

يعني بتك الدكتورة وضاحة دي اكان عايزة تعرف حاجة اسمها البردانة تتلهم ارشيف الجزيرة او ال search engines وحياتك تملأ عبّها وتقدل .

Quote: وانا اقول يلربي مالنا بقينا كدي .. حليل مزيج البردانه الراجيهو خالك يعوض بيه كل الفاتو !

كلو طلع شيح في ريح ربك يستر بس

Quote: الزول السمح .. قالوا عليه : (إت كان اديت ما بتقول اديت .. تاتاي في الخلا وعقبن كريم في البيت) تفتكر ده فضل منه كم ؟

عيك يا حليل جنس ديل


السمح يا خالي البقول ليك هاك لكن ارخي لي اضانك عشان اوريك كمان الاسمح من دا

الاسمح من دا قالوا البقول ليك هاك وبعد تقبض منو وتديهو ضهرك يناديك تاني يقول ليك تعال نزيدك

شفت كيف؟

Quote: وبعد تقبض منو وتديهو ضهرك يناديك تاني يقول ليك تعال نزيدك

هييييع الكيك أب زرد
ديل الماسووها كروش وكضوم ومليارات

عمر علي حسن

Quote: ديل الماسووها كروش وكضوم ومليارات

ديل برموا قدام يا خال

ديل عارفين الدنيا دي ضل دليب

ديل بكوّنوا في ارصدة الاخرة

ربنا يجعلكم ويجعلنا من زمرة هولاء يا ابا امير

انت فاكر الشغلانية ساى؟

Quote: طالما اسم البردانة دخل قوقل

شايفك متكل علي قوقل الاطرش ده .. وحاتك ده تقول ليه (بردانه) يطلعها ليك (ابردين) .. لا تلموا في
المزيج ولا تمرقوا من الفيضان

عمر علي حسن

Quote: .. وحاتك ده تقول ليه (بردانه) يطلعها ليك (ابردين) ..

ههههههههها لا لا محتاج لتسليس حبة بعد داك شوف مجسّو

الزول السمح هو من بادر بالمودة وحافظ عليها..


كيفنك يا شيقوق؟

Quote: من جيب جيب حقت النسوان انا قايل ولا رايك شنو؟

غايتو جنس افترا.. انت حتبقى عليهم انت والحكومة ونهر الدندر...!

Quote: الزول السمح هو من بادر بالمودة وحافظ عليها..

نعم يا أم آية

روما

Quote: غايتو جنس افترا.. انت حتبقى عليهم انت والحكومة ونهر الدندر...!

الله يجازيك انت متابعة كمان؟

والله اليوم البغيب فيهو خالي دا من النت شينا ..... ة قرد بس

Quote: والله اليوم البغيب فيهو خالي دا من النت شينا ..... ة قرد بس

الطيب
خالك حالته تحنن الكافر .. لكن عشانك بيباصر ..

شوف .. الرجال يمكن ما فيهم اكتر من اللي اتقال .. ذاتهم عدمو الفايده في الزمن ده .. عشان
كده اقترح انك تتحول علي النص التاني يمكن يطلع عندهن من السماحه مايزيد قدرهن عن
اجيال الرجال الذين فقدوا الطعم واللون ..

ولا تبدأ بالزول السمح الفات الكبار والقدرو .. الكان شافوه ناس عبدالله كانوا يعضرو .. ده
بقي من بره اكتر من الهم علي القلب .. ومن جوه هللا هللا ..

عايزين البمرقوا الحمية من قلب الرجال .. ويكسروا عين الما بسُتر الحال

عرفت كيف ؟

عمر علي حسن

Quote: خالك حالته تحنن الكافر .. لكن عشانك بيباصر ..

وتصغر في عين العظيم العظائم يا خال

Quote: شوف .. الرجال يمكن ما فيهم اكتر من اللي اتقال .. ذاتهم عدمو الفايده في الزمن ده .. عشان كده اقترح انك تتحول علي النص التاني يمكن يطلع عندهن من السماحه مايزيد قدرهن عن اجيال الرجال الذين فقدوا الطعم واللون ..

والله النص التاني دا ما ساهل طب كلو فوائد .. يا خال ، عشان كدا لابد منه

Quote: عايزين البمرقوا الحمية من قلب الرجال .. ويكسروا عين الما بسُتر الحال

يا حليل ديل يا خال

الزول السمح فوق