Post: #1
Title: مهند الطاهر وضربات الجزاء
Author: عمر الفاروق
Date: 09-09-2012, 06:14 AM
تنظيرة أولى :
انا ما حارس مرمى لكن يخيل لي حارس المرمى ترتفع عندو إحتمالية صد ضربة الجزاء أو الضربات الترجيحية لنسبة فوق ال 80% لمن يكون اللاعب اللي ح يسدد ضربة الجزاء بيشوت بي رجله الشمال..
مع إنو انا زمااان كده الناس كان عندها وهمة كده إنو البيشوت بي الشمال ضربة الجزاء بتاعتو قون مييية الميية ..
تنظيرة تانية :
ما شرط إنو أي لاعب بيشوت أو بيسدد تسديدات قوية من خارج منطقة الجزاء فده معناها إنو لازم يشوت ضربات الجزاء...
تنظيرة تالتة :
من خلال متابعتي لي مهند الطاهر في السنوات الفاتت دي أو خلونا نقول مننن ما بدا يشوت ضربات جزاء ما حصل مهند شات ليهو ضربة جزاء مطمنة أو مضمونة ..معظم الضربات اللي شجلها من نقطة الجزاء بيكون الحارس حاول معاها أو مشى في إتجاه صاح وكان قريب من صدها..
الخلاصة :
ما عندي إحصائية ثابتة لكن تقريباً مهند في الفترة الأخيرة أضاع أكتر من عشرة ضربات جزاء أو سجلها بي حراق الروح ..ورغم عن كده بلاحظ مهند وما أن يعلن الحكم عن ضربة جزاء إلا ومهند بيجري يحضن الكورة ..سواء مع الهلال أو مع المنتخب القومي..
لبمحيير أكتر إنو في الفريق بيكون في ناس بتسدد بي صورة أضمن وأحسن من مهند ..
يعني في الهلال سادومبا بيشوت بي طريقة دقيقة ومحسنة ..
في المنتخب هيثم مصطفى قد يكون أفضل من مهند..
طيب نحن ما عندنا مدربين؟؟؟ ما عندنا تمارين لي اللاعبين لي ضربات الجزاء؟؟ لسة شغالين بي فكر أولاد الحلة وأوول ما تجي ضربات جزاء بيقوم واحد يكورك ماااين ماااين خلوها لي؟؟
الخوف كلل الخوف إنو جرايد الليلة تقوم تهتف وتقول مهند يمزق شباك الأثيوبي ويحرز هدفين من صاروخين ..
والخوف كل الخوف بي سبب القون التاني يفتكروا إنو مهند جاب قون من تسديدة وليس من ضربة الجزاء..
والخوف كل الخوف يحسب مهند من اللذين غيروا مجرى مباراة السودان لصالح السودان ..
مهند أمبارح كان أسوأ لاعب وكللل وليس معظم بل كللل تمريراته كانت خاطئة ..وتبديله كان كارثة ..
المحيير والمدهش بالجد إنو الناس البنقول عليهم عمرهم الإفتراضي إنتهى وبنطالب بيب إعتزالهم هم كانوا الأفضل وهم من صنعوا الأهداف الخمسة ..
هيثم والعجب..
بالجد الناس ديل ما طبييعيين ..
لمساتهم بي الكورة كلها..
وقفتهم في الميدان ولو متفرجين ساااي بتخليك تتوقع منهم أيييي شي..
التحية لي هيثم والعجب ويا مازدا سيبك من كلام الجرايد وتحلى بالشجاعة ولععب الإتنين مع بعض وصدقني ما بتخسر ..
تخريمة :
أكرم الهادي أثبت إنو إختيار الحضري للأسف هو إختيار صادف أهله..
|
Post: #2
Title: Re: مهند الطاهر وضربات الجزاء
Author: المعز ادريس
Date: 09-09-2012, 06:29 AM
Parent: #1
سلام يا عمر,
مهند بيمتاز بشجاعة و هدوء عالي نحو ضربات الجزاء المهمة جدا
و الحاسمة و لو راجعت الكم سنة الفاتو حا تلقى حاجات بالمعنى دا
ما بتردد في أحلك التحديات و يمكن عشان كدا بيتكلوها عليه مع أنه
مؤخرا بقى يبوظ الأعصاب مع ضربات الجزاء البتصد ليها!
إنت في مهند ولا في الدفاع التعيس
دفاعنا حا يحدد نتيجة مباراة الإياب!
|
Post: #3
Title: Re: مهند الطاهر وضربات الجزاء
Author: عمر الفاروق
Date: 09-09-2012, 06:41 AM
Parent: #2
يا معز..
هي لكن عاد شن فايدة الهدوء إذا كان غحتمال ضياعا 90%؟؟ :)
أحسن تجيب زول كبكابة ورجافة بس بعد داك بتضمن إنو يجيبا ..
بالنسبة للدفاع فمازدا أمبراح حييرني عديييل.. الزول ده شكلو أمبارح لعب بي فهم غارزيتو تلاتة مدافعين وفي رواية إتنين بس سيف مساوي وسامي..
مازدا وضح جداً إنو بيجامل الهلال والمريخ على حساب المنتخب..وإستغربت جداً غياب بعض من لاعبي الأهلي شندي خصوصاً في الدفاع والوسط!!!
مازدا بيجهز الهلال والمريخ لمبارياتهم الأفريقية !!
|
Post: #4
Title: Re: مهند الطاهر وضربات الجزاء
Author: محمد عبدالرحمن
Date: 09-09-2012, 06:51 AM
Parent: #3
هلا ابوصلاح ....
هيثم بالذات اخر واحد ممكن يشوت ضربات امبارح دى ...
فى الظروف العادية اوكى ..بشوت كويس ..لكن امبارح
البعض كان ينتظر فشل هيثم عشان ياكد نظرية ابعادو ...
الحمد لله ماشات ...وظهر بمظهر كويس جدا فى المباراة ...
الحبيب مهند الطاهر زول بااارد ومركز ..فهو الانسب
فى مباراة امبارح ...
|
Post: #6
Title: Re: مهند الطاهر وضربات الجزاء
Author: محمد عبدالرحمن
Date: 09-09-2012, 06:57 AM
Parent: #4
حاجتين نسيتهم ...
كل مااشاهد بشه فى الملعب بتذكر شطارة صلاح
ادريس ...بشه دا لما صلاح ادريس سجلو فى الهلال
لم يكن نجم ..ولا احد يلتفت اليه فى الملعب ..فذكاء
صلاح ادريس انو شاف الماشافوهو الناس ...بشه صاحب
حضور ذهنى عالى ...اتحرك مع شوته العجب للكورة ..
جارى مع الكورة لحظة خروجها من رجل العجب ..توقع
انو الحارس يصدها او تضرب فى القائم ..وقد كان
واحرز هدف ...
الحاجة التانية ...بالله ادونى ميزة واااحد لاحمد الباشا...
انا لو مدرب المريخ احمد الباشا مابلعب فى التشكيلة
لو (كسر رقبتو) ....بالله الناس ماتتحسس ...
|
Post: #5
Title: Re: مهند الطاهر وضربات الجزاء
Author: المعز ادريس
Date: 09-09-2012, 06:57 AM
Parent: #3
فعلا لاحظت أنه متبع طريقة غارزيتو
و لاحظت كذلك أنه الإعتماد على خطة
هجومية في أرضنا ثم دفاعية مع الإعتماد
على الهجمات المرتدة في أرض الخصم دا
حكي فارغ (لاحظ نتائج الهلال, و المريخ, ..
و المنخب خارج الأرض و الآداء كذلك دائما
بيكون أفضل لأنه بيكون في إعتماد على فكر
متوازن بعيد عن صياح الجماهير البيغطي
البيلعب دور كبير في (الحماس) لا غير و
فجأة كدا تلقاها في الشبكة في عقر دارك!
|
Post: #7
Title: Re: مهند الطاهر وضربات الجزاء
Author: عمر الفاروق
Date: 09-09-2012, 07:06 AM
Parent: #5
يا أبو حميد (أربجي لسسسة في حالا أبو صلاح ما بتكتل قلبي ) ..
بالنسبة لي هيثم انا اتوقعت يشرد من الأولى عشان الظروف..لكن ضربة الجزاء التانية كانت مقشرة لأنو في الأساس أرتكبت معاهو ..ونحن بي فهم السودان والدافوري عندنا الاعب لو عملوا معاهو ضربة جزاء وشاتا هو وضييعا فعااادي لأنو بيفتكروا إنو هو العملا فماف مشكلة :)..
هيثم كان محتاج للقون ده شديد في جوانب النفسية والوهمة الإعلامية ..
برود مهند ما مفيد في ظل ضياع الشوت مش؟؟؟
بالنسبة لي بشة فيكفي إنو طالب جامعي عشان كده القصة دي نفعتو في التوقع و المتابعة والحركة بمعدلات مدروسة ..
بشة كرر هدف بالكربون كان سجلو في تصفيات المسابقة الفاتت لو ما خانتني الذاكرة ..
بالنسبة للباشا فخليني أختلف معاك قياسا بما يقدمه الباشا اليومين ديل..
الباشا لا يقل ذكاء عن بشة وبيعرف يوزع مجهوده كويس جوة الميدان ..
الغريبة إنهم اولاد حلة وكورتهم واااحدة بتتشابه :)
|
Post: #8
Title: Re: مهند الطاهر وضربات الجزاء
Author: وليد عبد اللطيف
Date: 09-09-2012, 07:56 AM
Parent: #7
هنا عندي حكي كتير ياعمر عن ضربات الجزاء وتنظير كتير على قولك
بجيكم برواقه كدا
وكم تمنيت ضربة الجزاء التانيه تكون من نصيب الكابتن هيثم مصطفى
|
Post: #9
Title: Re: مهند الطاهر وضربات الجزاء
Author: الحاج حمد الحاج
Date: 09-09-2012, 08:44 AM
Parent: #8
Quote: عمر الفاروق
بالنسبة لي هيثم انا اتوقعت يشرد من الأولى عشان الظروف..لكن ضربة الجزاء التانية كانت مقشرة لأنو في الأساس أرتكبت معاهو ..ونحن بي فهم السودان والدافوري عندنا الاعب لو عملوا معاهو ضربة جزاء وشاتا هو وضييعا فعااادي لأنو بيفتكروا إنو هو العملا فماف مشكلة :)..
هيثم كان محتاج للقون ده شديد في جوانب النفسية والوهمة الإعلامية ..
************************
وليد عبد اللطيف
وكم تمنيت ضربة الجزاء التانيه تكون من نصيب الكابتن هيثم مصطفى |
يا جماعة هيثم ذكي ، فبعد ظهوره بصورة كويسة و ارتكاب ضربة جزاء معاهو اكيد خت في بالو لو ضيع ضربة الجزاء ح تقلل من الرصيد العملو في المباراة عشان كده دي زوغة معلم!!
|
Post: #10
Title: Re: مهند الطاهر وضربات الجزاء
Author: عبد العظيم احمد
Date: 09-09-2012, 09:12 AM
Parent: #9
سلام الفاروق
كنت اتمني
ان تحدثنا
عن اكرم الهادييييييييييييييييييييييييييييييييييييييييييييييييييييييييييييييييييييييييييي
|
Post: #11
Title: Re: مهند الطاهر وضربات الجزاء
Author: وليد عبد اللطيف
Date: 09-09-2012, 09:15 AM
Parent: #9
Quote: يا جماعة هيثم ذكي ، فبعد ظهوره بصورة كويسة و ارتكاب ضربة جزاء معاهو اكيد خت في بالو لو ضيع ضربة الجزاء ح تقلل من الرصيد العملو في المباراة عشان كده دي زوغة معلم!!
|
فعلا هيثم ذكي ياود حمد بس التانيه دي ما منها خوف لان اي حاجه عايز يعملها عملها
ياخي دا لعب ليهو باص قون بس تدخل وتجري الاين ترقص هيثم فعلا معلم التانيه دي كانت فرصة بالنسبة له عشان يثبت لناس الهلال
وكمان كلامك منطقى شديد انا لاحظت له ان كب الزوغه من ضربات الجزاء زوغة معلم على قولك
|
Post: #12
Title: Re: مهند الطاهر وضربات الجزاء
Author: مأمون
Date: 09-09-2012, 09:43 AM
Parent: #7
سلام
رغم إنه البوست عن مهند الطاهر وضربات الجزاء .. لكن بالنسبة للباشا فأنا شايف إنه
كان لايص في الملعب بدون دور واضح
في الحقيقة كل لاعبي الوسط كانوا لايصين وما كان عندهم دور في مراقبة أو مطاردة الخصم في الوقت المناسب
مما جعل الدفاع مكشوفاوبالتالي دخول ثلاثة أهداف ونحن نلعب على أرضنا..
|
Post: #13
Title: Re: مهند الطاهر وضربات الجزاء
Author: جمال السنوسي
Date: 09-09-2012, 09:50 AM
Parent: #12
عمر الفاروق
والمداخلون
ياخي قالو ليكم معز عنده ملاريا
ملااااااااااااااااااااااااريا
اتخيلو
لو عملنا فحص لكل اللاعبين ديل بيكون عندهم ملاريا
مشكورين هم والله على الدفاع عن سمعة البلد على الاقل في الكورة
وحتيأهلو للامم باذن الله تعالى
|
Post: #14
Title: Re: مهند الطاهر وضربات الجزاء
Author: وليد عبد اللطيف
Date: 09-09-2012, 01:57 PM
Parent: #13
Quote: تنظيرة أولى :
انا ما حارس مرمى لكن يخيل لي حارس المرمى ترتفع عندو إحتمالية صد ضربة الجزاء أو الضربات الترجيحية لنسبة فوق ال 80% لمن يكون اللاعب اللي ح يسدد ضربة الجزاء بيشوت بي رجله الشمال..
مع إنو انا زمااان كده الناس كان عندها وهمة كده إنو البيشوت بي الشمال ضربة الجزاء بتاعتو قون مييية الميية ..
|
طبعا اي حارس مرمى ياعمر الفاروق يساره افضل من يمينه اي حارس يتمنى كل زمن المباراه ان تلعب له في يساره
سبحان الله عند جميع حراس المرمى في كل العالم وبالزات الاعب البشوت ليهم الكره بيساره دا بكون وقع ليهم في جرج
لو ملاحظ حتى الحارس التعبان بتاع المنتخب الاثيوبي تحرك لمهند الطاهر في في ضربة الجزاء الاولى في يساره وقرب يطلعها ..
|
Post: #15
Title: Re: مهند الطاهر وضربات الجزاء
Author: حيدر بشير
Date: 09-09-2012, 04:19 PM
Parent: #14
الاخةةعمر وضيوفه الكرام
لكم التحايا
* مشاركة هيثم غير مبررة لأن قائد المنتخب بعيد عن اللعب التنافسي منذ بداية الموسم
و هذا كل ما جاد به قلم الصحفى مزمل ابوالقاسم عن سيدا فى عموده الراتب
فى حين انه قال ما لم يقله مالك فى الخمر عن العجب ( و فعلآ يستاهل الكلام فوقه)
بالرغم من اننا قد شاهدنا المبارأة و رأينا ما صنع هيثم فيها
يكون مفتكر انه الكورة دى حصرية على قناة الصدى الرياضية
كما انه لم يحمل اكرم الا الجزء اليسير من الهدف الثالث
حالة تحتاج الى علاج
|
Post: #16
Title: Re: مهند الطاهر وضربات الجزاء
Author: عمر الفاروق
Date: 09-10-2012, 06:18 AM
Parent: #15
وليد يا حبوب:
الحكي عن ضربات الجزاء مابينتهي بداية من أيام الدافوري والفلسفة ولعبنا ليها بي الشقلبة والكعب نهاية بي تشوتا في الأوت قاااصد عشان الجماعة خرخرو وقالوا ما بنيلتي .. :)
الحاج يا حاج:
أعتقد إنو ضربة الجزاء التانية كان ممكن تتشات عادي وبدون خوف حتى لو ضاعت كان الجمهور ح يقيف مع هيثم ..بس هيثم حسبا غلط في رأيي.
عبد العظيم يا ابو العظمات:
أكرم الهادي كان في وادي تاااني وحقيقة هو أغرب إختيار.
حراسة المرمى تحدييييدا ما زي باقي خانات اللعب ..عايزا زول يكون مستمر في اللعب التنافسي ..عشان كده نحن بنلاحظ في كل الفرق العالمية حارس المرمى بيلعب الدوري كلو دون إنقطاع ..
أكرم الهادي اليوم داك لو شوت فيهو كشك ليمون بيخش..
|
Post: #17
Title: Re: مهند الطاهر وضربات الجزاء
Author: haroon diyab
Date: 09-10-2012, 06:34 AM
Parent: #16
سلامات ياعمر
بالنسبة لضربات الجزاء ..... تابعت المباراة
وعند ضربة الجزاء الاولي .... قلت ليهم حيشوته مهند
اختلف معاي الكباتن ( منقستو ) ورياض عبد الله
ومنقستو بالذات كان متفق معاك في الراي 100%
اها انا مع راي اخونا الانصاري محمد انو ( مهند بااااااااااارد )
اخير يشوت.... لانو لو هيثم شات ######## ( يكون الرماد كال حماد ...!!!)
|
Post: #18
Title: Re: مهند الطاهر وضربات الجزاء
Author: Zomrawi Alweli
Date: 09-10-2012, 09:02 AM
Parent: #17
Quote: المحيير والمدهش بالجد إنو الناس البنقول عليهم عمرهم الإفتراضي إنتهى وبنطالب بيب إعتزالهم هم كانوا الأفضل وهم من صنعوا الأهداف الخمسة ..
هيثم والعجب..
بالجد الناس ديل ما طبييعيين ..
لمساتهم بي الكورة كلها..
وقفتهم في الميدان ولو متفرجين ساااي بتخليك تتوقع منهم أيييي شي..
التحية لي هيثم والعجب ويا مازدا سيبك من كلام الجرايد وتحلى بالشجاعة ولععب الإتنين مع بعض وصدقني ما بتخسر ..
|
والله انا اتفق مع الكلام دا
ورعم هلاليتي الا ان وجود العجب في الملعب مريح للاعصاب وكدا لله في لله بحبو
|
Post: #19
Title: Re: مهند الطاهر وضربات الجزاء
Author: keiga2000
Date: 09-10-2012, 09:50 AM
Parent: #18
سلام ياخونا ود الفاروق
والله مع المليارات دي لو كرعيــنو الأثنين شمـال ( بجيبـــه )
هو يمتاز بالهــدوء ودي من اهم مميزات متخصصي ضربات الجزاء
وبارد بشــكل عشان كدا ما اتمنيت المريخ يسجلــوا ابداً
عشان كدا البرود والهدوء عند تسديد ضربات الجزاء مطلوب وهذه موجوده عند مهند والعجب وهيثم
مهند رزق زول يدخل في اخر ربع ساعـة يجيب لي قونين والله عجيبه دي
مع تحياتي
أبومصطفى
|
|