يا العوض انا جيتك جاري بشوق ومحبة ودمعا جاري ولكن .....

صاحبي العوض ود الضو ما صدقت لقيتو تلفونو فتقطعت بنا السبل لاكثر من عشرين سنة
اسجل في رقمو وما عارف ابكي ام اضحك ولا اجري واجيهو راجع
رررن ررررررررن رررررررن
الو براحة كدا
الوووووووووووووووو ات يا زول العوض ود الضو
آي انا العوض ات منو ؟
معاك عبدالله ود البوش
اهلا عبدالله
ات ما عرفتني يا العوض ولا شنو ؟
عرفتك ياخ وبنفس بارد
قلت في نفسي امكن الصيام وامكن عيان
ات مالك آ العوض عيان ولا نعسان ولا الصيام
ياخ مالك في شنو ومتصل داير شنو ؟
اووووووووووووو معليش ياخي انا آسف والله للازعاج وسامحني ياخي
ياخي ولا معليش ولا حاجة واصلا مافي حاجة اسامحك عليها يعني شنو جايني بعد السنين دي كلها
وتتصل علي عشان نقول شنو أسع عليك الله ... يازول عليك الله خلينا
أصلو يا العوض ما بخليك الا اشوف حكايتك شنو .... والليلة تفطر معاي ولا افطر معاك
يا زول اقوليك حاجة اختاني ياخ وختمها بـ انعل دينكم كلكم
وهنا قفلت الخط بعدما قلت له مع السلامة على امل ان افكر فيه بهدؤ والتقيه مباشرة
قفلت الخط وانا مذهولا مما حدث ..... دمعة نزلت وانا ناقص دموووووووووع
والله العوض دا اصلو ما اخليهو مش لو سب لي دين في رمضان ؟
اواصل ................

صار العوض هما على همومي ولكنه اخذ حيزا هاما في نفسي
ياربي الحاصل شنو ؟
هل تغيرت النفوس لهذه الدرجة
ام هل افرازات الوضع الراهن غيرت العوض الذي كان من اقرب اصدقائي وقتها
وشتتنا الافرازات الاولى شتات القصب كما شتت حسبو قصبو
العوض دا كان زول جميل ومرح ووناس
لابد بان امرا جلل جلجل كيانه واوصله لما هو فيه
وقررت ان امشي ليهو محل ما يكون موجود واتحمل تبعات ذلك

حيا الله أخونا عبدالله!
متابعينك لحد ما نشوف آخر العوض ده!

العوض من اشطر الطلاب الذين التقيتهم في مراحل الدراسة
دخل جامعة الخرطوم كلية الاقتصاد وتخرج منها بدرجة الشرف
الله يا الله ........ يا العوض
قبل ان اصل سكنه الذي عرفته اجتريت كل الذكريات معه
مواقفه
شطارته
غلاتو للاستاذة
ضحكته المجلجلة
خطه الرهيب
والله العظيم مرة كتب القسطنطينية وتحدى كل المدرسة بالمعلين ان كانوا يكتبوا مثلها
.
.
ومرت بخيالي وقفته وهو شامخا يسأل الاستاذ بعد ان خلص لتوه من درس الفعل المضارع
بالصف الرابع الابتدائي
يا استاذ انت قلت الفعل المضارع هو فعل مستمر وحاصل الان والفعل الماضي كما عرفنا
بانه مضى وانتهى
ولكني أمس قرأت جريدة قديمة مكتوب عليها الهلال يهزم المريخ والمبارة اصلا انتهت
فلماذا لم يكتبو الهلال هزم المريخ بدلا من الهلال يهزم المريخ
فاجابه الاستاذ يا العوض اقعد بتعرف بعدين اسع خليك قدر سنة رابعة ......
كان مولعا بقراءة الصحف والكتب والمجلات
والله العظيم واكرر والله العظيم وفي سنة 1979 ونحن في تالتة ثانوي عام
العوض دا قال لي كلمة لا انساها عمري كلو قال لي الرئيس الجديد للعراق
اسمو صدام حسين هذا الرئيس ارعن وسوف يحرق بلاده !!!!!!!!!!!!!!!!!
كل ذلك وغيره وغيره الكثير عن حياة العوض في ذاك الزمن
هو من اسرة فقيرة جدا وكانت ادارة المدرسة في ذاك الزمان تدفع له رسوم الامتحانات
واصلا لاتوجد رسوم غير رسوم الامتحانات
رسوم امتحانات الابتدائية جنيه واحد
ورسوم امتحانات الثانوي العام خمس جنيهات
ورسوم امتحانات الشهادة السودانية عشر جنيهات
هذا كل المطلوب من التلاميذ حتى دخول الجامعة
سف وقارن بالله ....

.
.

وقبل ان اصله حاولت ان اجمع بعض المعلومات عنه
فعرفت انه عمل بأحد البنوك الحكومية وتم فصله
لاسباب غير معروفة لمحدثي
وبعدها صار تائها في شوارع الخرطوم بحثا عن عمل وقفلت امامه كل الابواب
حتى صار يمشي في كل الاتجاهات وبدون اوراق ثبوتية وبدون سيرة ذاتية هذه المرة وبدون عقل
فقط ليبحث عن لقمة حتى ولو كانت ملقاة على الطريق ورشفة ماء وان كانت في بركة يخوضها المارة
.
.
.
بكيت بكيت بكيت وبحرقة ..........
اها وبعدين قول يا زول قول ........
ربك رب الخير اهلو كاسو ليهو وساقوهو وعالجوهو وحاليا بين التيه والصحيان
الزول الدايرو بتلكم معاهو والما بدورو ولا خساهو بيهو

أخونا صلاح بشير
سلام وتحية وخليك متابع
ياخي السودان بقى فيهو حاجات تجنن
الله استر

يا ود البوش
سلام

الحالة دى يبدو انها عامة
يوجد حاليا فى الخرطوم ما لا يقل عن عشرة من دفعتى فى الجامعة
مقابلاتنا و هى مصادفة و متقطعة تتم بكل برود (نوع يمد ليك اصبع و نص او يهز راسو)
الغريبة ان وضعى (اكاديميا و مهنيا و ماديا) افضل منهم بكثير (بل اننى فى وضع الذى يمكن ان يعطى لا ان ياخذ)
ما السبب؟
هل هناك ما يمكن ان يكون هناك اشياء يخجلون منها ايام زمان و ظهورى مجددا يمكنه انعاش ذكراها؟
امر محير للغاية

الاخ عوض محمد احمد
تحية وتقدير

Quote: الحالة دى يبدو انها عامة

لو بقت الحالة دي عامة او حتى شائعة فان تغييرا كبيرا حدث في مجتمعنا
ولكن الحالة التي بصددها انا الان لها وقع خاص

شكرا جزيلا للاضافة والتنوير
مع تحياتي واحترامي