Post: #1 Title: لا حولااااااا, فيديو عجيب لكن, النفرين ديل منو؟ محمد وغاندى؟ وصور كمان Author: محمد زكريا Date: 08-24-2012, 11:29 PM
ما تفتكروه زى بوست دندون بتاع البنتين ديل منو داك بالله بوست يصل لحدى عشره الف مشاهده فى اقل من شهر عشان عنوان البوست بس؟ يا حليل بوستات ناس الزقازيق والشعبيه وهلمجرا يا عاملات تبارك...............المهم
اليوم كان عندنا افتتاح مهرجان ميلا الموسيقى فى اوسلو اها كنت مشارك مع فرقة بريطانية&هنديه. الهنود يلعبوا باركشن والانجليز براص سيكشن المهم الشغل كان جميل حتى السودانيين اتكيفو منه (اصلنا بنحب الافلام والموسيقى الهنديه) اها بعد العرض اتكلمت مع الفرقه عن مشاركاتهم العالميه لقيتهم ما خلو حتة فى الكره الارضيه ما عدا السودان لانه مافيه مهرجان موسيقى عالمى؟ اها طوالى اتفاصحت ليهم وقلت ليهم كيييييييييييييييييييييييف منو القال ليكم ما عندنا؟ واتكلمت ليهم عن مهرجان الخرطوم الدولى للموسيقى وما ادراك ما مهرجان الخرطوم وووووو وانهم ممكن يجو يشاركو وانا مستعد للتنسيق وما الى ذلك وحات الخوة اخر مره حضرت المهرجان ده كان سنة 1996 ومنه اتخارجت من البلد نوهائياً وهسه منو المنظم ومنو البنسق ولا هو زاتو متين الله اعلم لكن انحنا بننهزم ولا بنتخازل حرّم اتفاصحت للخواجات جنس فصاحة ودقيت سدرى....... هيييع كيفن ما ننسق واتبادلنا الايميلات وجيت البيت وقلت افتح يا قوقل وقعدت افتش عن مهرجان الخرطوم الدولى للموسيقى كن النلقى لى رابطاً سمح ان شاء لينكاً يلين خاطراً طيب
غايتو نصبركم بصور الهنود لحدى ما نجيب الفيديو العجيب بتاع المهاتما غاندى والسودانى التانى
بالله الصوره الاخيرة ما تركزوا معاها شديد وخلونا فى الفيديو الجايكم ........ثمح
Post: #2 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-24-2012, 11:32 PM Parent: #1
وياريت لو فى ناس يلموا لى فى اى معلومات تلمنى بى ناس مهرجان الخرطوم الدولى للموسيقى ان لا يبخلوا اصل ده الغرض الاساسى من البوست انه نصحى ناس المهرجان هويا هوى يا ناس المهرجان اين انتم
====== لكن الفيديو عجييييييييييييييييييييب
Post: #3 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-24-2012, 11:47 PM Parent: #2
وده الكلام المكتوب تحت الفيديو
Quote: Show during the 1996 'Khartoum International Music Festival' at the Officers Club Line up: Mieke Stemerdink, vocals Rob Kruisman, sax Fred van Straten, trumpet Eric van Dijsseldonk, guitar PP Everts, keyboard Rob Brondsema, bass Pete Dobson, drums special guests: Randi, flute Muhammed, trumpet
يا ربى بتحتاج ترجمة؟ اهم حاجة دى special guests: Randi, flute Muhammed, trumpet
Post: #4 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: احمد محمد بشير Date: 08-25-2012, 00:09 AM Parent: #1
سلامات يا محمد وكل عام وانت بالف خير وربنا يحقق الاماني
Quote: مهرجان الخرطوم الدولى للموسيقى
اذا قصدك معرض الخرطوم الدولي فده كل سنة شايف كان قاعدين يعملوهو معرض كده بتاع منتجات كهربائية و غذائية و منتوجات يدوية و-عضاط - وكله وبعدها كانو بيجيبوا كل يوم فنانين "بالليل" اغلبم سودانيين -تدفع 7الف وتخش من العصور وتمرق بالليل بعد الحفلة- ,,,,, مرة كده بتذكر قلبوا الهوبا و عملوا فيها -دوليين- وجابو فنانة حبشية .
اما اذا بتقصد بـ -مهرجان الخرطوم الدولي- أنه مرجان تاني , ففي السنين الاخيرة دي ما سمعنا بيهو .. معليش يا فنان , بلدنا حاكمنها الكيزان ,,, اعداء كل شيء جميل .
زمان في المعسكر كان في واحد معانا هندي من السيخ (الزول ده كان لافي ليهو عمة برتغالية "قدر الليلة وبكرة فوق راسوا" اصلوا قدر ما حنستوا انه يقلعا ويتخلى عنها ويحاول يتماشى مع ناس البلد رفض نهائيا وقرب يشاكلني, كان نازل معاي في نفس الغرفة , المهم اتكيف من ناس البلد ديل شديد , وقال لي نحن قاعدين في هوتيل يا صديق , حالتو كنا قاعدين في "تانوم وبعدها مشينا طورشوف" هههههه قال لي دي هوتيلات وانه تاني ما حايرجع الهند نهائي طالما انه الحالة بقت كده مريحة معاهو كده , اهو لف الزمن واموروا ما ظبطت وهو الان لافي في بلدكم دييييك بي عمتو البرتغالية , مين عارف ممكن انت يوم من الايام تصادفه في الشارع, ويحكي ليك عن السودان حسب القصص الكتيرة السمعا من العبد لله .
و الله المهرجان (عجيب) وعجبني خالص ..... يا اخي الهنود ديل متمسكين بي اي حاجة تقليدية خاصة بيهم وبيحالوا ينقلوها ويصدروها للآخرين , إبتداءا من العمة السوداء و البرتغالية , ياخي شايف في الصور اللوري بتاعم زاتم واقف ههههههههه جابو اللوري ده من وين ؟ :)
Post: #5 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-25-2012, 00:32 AM Parent: #4
Quote: و الله المهرجان (عجيب) وعجبني خالص ..... يا اخي الهنود ديل متمسكين بي اي حاجة تقليدية خاصة بيهم وبيحالوا ينقلوها ويصدروها , إبتداءا من العمة السوداء و البرتغالية , ياخي شايف في الصور اللوري بتاعم زاتم واقف ههههههههه جابو اللوري ده من وين ؟
عيد سعيد يا ابوحميد الهنود هويتهم ما بهظروا فيها والعدب لو شفت الاكل والملابس وووو فلم هندى بس فى اوسلو لكن فاتك يا ابوحميد
================ والله كان عندنا مهرجان الخرطوم الدولى للموسيقى الا ما عارف حصل عليه شنو شكراً على المرور
Post: #6 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-25-2012, 00:34 AM Parent: #5
اها دى صورة غاندى فى الفيديو
------------------------------------------------ ودى صورة محمد
Post: #7 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-25-2012, 00:37 AM Parent: #6
الفيديو طويل شويه عشان كده نجركم للحتات البتهمنا على طول الاعلان عن الضيف غاندى فى الدقيقة 9.24 وتانى غاندى بيعزف فى الدقيقة 11:57
والاعلان عن ضيف خاص اسمه محمد فى الدقيقة 24:04 ولكن لم يظهر محمد عاد غاندى للعزف فى الدقيقة 25:18 وفجاءة اثناء غاندى يبدع فى صولاته يظهر شخص بقميص احمر
الكلام ده فى الدقيقة 26:27 ويبدو انه اخيراً محمد يظهر بالترامبيت
غاندى زول معروف وعرفناهو اها محمد ده انقرو ده منوووووووووووو؟
هاى.....ده ما انا زاتو
بالله شوفوا المحن دى
.
Post: #8 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-25-2012, 09:45 AM Parent: #7
طبعاً اتذكرت قصة الفيديو ده كنت مشارك فى المهرجان مع مجموعتنا آنذاك مجموعة ساورا الموسيقية الغنائية واتذكر انه المهرجان كان الافتتاح مع هذه الفرقة الهولنديه واخريات اتذكر منها الفرنسيين بتاعين البانجو والبراس فى الهيئة القومية للثقافة والفنون بامدرمان (دار حزب الامه القومى) على ما اظن وكان هنالك ورشة عمل موسيقية فى اليوم التالى بمعهد جوتة الالمانى والمركز الثقافى الفرنسى حيث كانت هناك فرق مختلفة سودانيه واجنبيه اها الهولنديين بعد ورشة العمل اقترحوا على ان اطلع صولة معاهم فى حفل المساء بنادى الضباط جنب المطار طبعاً ما فهمتهم كويس ولكن افتكرتهم عازمنى حفلتهم فى نادى الضباط لانه الحفلات كانت فى مسارح مختلفه حول الخرظوم وام درمان وبحرى (فكرة عجيبة لمهرجان دولى*) المهم جيت نادى الضباط وحجزت محل قدام وقاعد اسمع بى مزاج لحدى ما اسمع ليك بيندهو اسم محمد طبعاً قعدنا نتلفت محمد ده منو محمد ده منو كمان؟ كويس كنت قاعد قدام واتذكر كان معانا فى البروفة الصباحية المرحوم الموسيقار احمد تاور وكان قاعد معاى بنسمع وقام نبهنى انه الناس دى بتفتش ليك انت يا ابو حميد انا!!!!!! ايوا قوم امش وينا طرمبتك؟ الناس دى راجياك مافى زمن, اسرع لكن الترامبيت ما معاى هنا بره فى العربية ومشيت اعتذر ليهم انه ما معاى الالة بتاعتى ووو لكن بتاع الترامبيت الهولندى قال لى تعال هاك طرمبتى وفعلاً فى اللحظة ديك لامن ندهونى كضيف فى المسرح ولم اظهر قام الاخ غاندى بالتغطيه الى حين وصولى الى المسرح ولانه زمن الاغنيه وانتظار الصولة اخدت وكت طوالى شخبت ليهم صولة سريعة غايتو كان جنس فلم وطبعاً منها وجا اقتراح السفر الى هولندا وبعديها التفكير الجاد فى السفر الى اوربا وفعلاً فى نفس الشهر يوم 17 نوفمبر كنت فى مصر والقصة تطول وبالله شوفوا الصدفة الغريبة دى يعنى بس موضوع المهرجان النرويجى والفرقة البريطانية هى اللى خلتنى افتش عن مهرجان الخرطوم فى الانترنيت ولمتنى بالفيديو ده وواضح انه الفرقة الهولنديه هى المصورة و المنزلة الفيديو ده وحتى عدد المشاهدات كان فقط 65 مشاهدة
فأين يا ترى ناس مهرجان الخرطوم الدولى للموسيقى ؟ ولا ناس الثقافة ولا التلفزيون والتوثيق معقولة ما نلقى صفحة ولا حاجة تعرف عن المهرجان فى الشبكة العنكبوتية
.
Post: #9 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: Elmosley Date: 08-25-2012, 09:56 AM Parent: #1
واصل يا محمد هذه الذكريات الجميله والتساؤلات عن مصير تلك المهرجانات تمتع بالعزف في الهواء ابطلق تحياتي
Post: #10 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-25-2012, 10:46 AM Parent: #9
استاذنا وحبيبنا يوسف الموصلى سلام عليك قول من رب رحيم
Quote: Elmosley واصل يا محمد هذه الذكريات الجميله والتساؤلات عن مصير تلك المهرجانات تمتع بالعزف في الهواء ابطلق تحياتي
اعتقد حتى ننهض بثقافتنا وموسيقانا وفنونا عامة الى رحاب العالميه لابد لنا والمهتمين من الاحتكاك برصفائهم من اماكن مختلفة حول العالم وكما قال انور ابوغيدا فلندع ساس تسوس لانه لا خير فى جلهم وعلينا استلام زمام الامور ولنبداء التحرك والمبادرة بانفسنا ولا ننتظر منهم شىء السعى الجاد لاعادة مهرجان موسيقى دولى فى السودان بحسب المقاييس التى عرفناها عن تجاربنا واحتكاكتنا خصوصاً فى ناحية المهرجانات العالميه للموسيقى وانواعها تخيل بلد صغيرة زى النرويج فيها كم مهرجان موسيقى عالمى فى السنة؟ اكثر من 30 مهرجان بدولى معدل متوسط مهرجانين فى الشهر ده غير المهرجانات المحليه ده غير الكونسيرتات لفنانين من شتى انحاء العالم وفى كل مدن وقرى النرويج وزيارات للمدارس والمعاهد الفنيه والموسيقيه ياخ الناس عايشة بغذاء الروح التذوقيه للفنون ونحن لسه بنبحث عن لقمة عيش للصغار الجوعة الله يلعن ابو السلطة والجشع فى الحكم والسياسات القهرية والاستبدادية والمقيدة للحريات
هذا البوست لا ينفصل كثيراً عن يايوسف الموصلى ياخ الله يغفر ليك ياظالم وهذه ستكون اهتماماتى القادمة وهى الاهتمام بموسيقانا وفنوننا وثقافتنا وبرضوا لنقاوم اضطهاد االنظام لمحبى الجمال من بنى شعبى وحتى لا تتبلد الاحاسيس تحت ظل نظام القهر الدموى الجاثم على صدر شعبنا الجميل
فكن قريباً ولنكن معاً يا صديقى الرائع والجميل الدواخل
========= تحياتى
Post: #11 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-25-2012, 12:29 PM Parent: #10
اقتراح للمهرجان القادم وباى اسم الناس تختاره اهم حاجة ان يكون المسرح فى مكان واحد وبه عدة مسارح واحد رئيسى وتلاتة اخريات باركان مختلفة متباعده عن بعضها ولكن فى نفس منطقة المهرجان ما بالضرورة تكون منطقة المهرجان داخل الاماكن المعروفة فى الخرطوم وممكن تتنظم فى منطقة واسعة خارج العاصمة لمدة يومين او تلاته ايام وتتوفر وسائل المواصلات وتتوفر خيم الماكولات والمشروبات والاشياء التجارية المختلفة وتكون المنطقة مقفولة ممكن يكون هنالك عائد مادى بدباجات دخول تربط حول المعصم خلال اليومين او التلاته ايام اهم حاجة انه العمل فى التنفيذ والنظام يعتمد على كمية من المتطوعين والمتبرعين تتكون لجنة المهردان وتقوم بوضع خطة التنفيذ وطبعاً تتقسم وتوزع المهام والاعداد يكون قبل عام او 6 اشهرعلى الاقل قبل الموعد والعمل ده عموماً ساهل جداً وممكن يتعمل من خلال التنسيق بين المهتمين ومن خارج السودان
نعم عزيزي محمد والمهرجانات في السودان لازم كمان يتعمل ليها يوم ختامي يتكون فيه منتخب من أبرع العازفين فيه من مختلف الدول ويقدموا على الاقل عملا واحدا كبيرا تحياتي
Post: #17 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-28-2012, 12:49 PM Parent: #16
Quote: Elmosley نعم عزيزي محمد والمهرجانات في السودان لازم كمان يتعمل ليها يوم ختامي يتكون فيه منتخب من أبرع العازفين فيه من مختلف الدول ويقدموا على الاقل عملا واحدا كبيرا تحياتي
صح يا استاذ وده طبعاً بعد ورش العمل واغلب المهرجانات بيحدث فيها ورش عمل بين موسيقيين من دول مختلفة من انحاء العالم وده هو اهم ما فى المهرجانات انه يحصل تمازج واكتساب تجارب جديده ومعرفة انواع مختلفة من الموسيقى والغناء وهذا ما يفتقده اغب الموسيقيين السودانيين حيث لا تتوفر فرصة المشاركة والتجريب فى مهرجانات موسيقية تضم جنسيات مختلفة من الفنانين
Post: #13 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-27-2012, 12:12 PM Parent: #1
Post: #14 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: ناصر فراج Date: 08-27-2012, 03:33 PM Parent: #13
Post: #15 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: عمر الفاروق Date: 08-27-2012, 03:44 PM Parent: #14
ابو حميد : مع إنو ناس عصام جبر الله بهتوني في صحبة غاندي دي ومع إنو قالوا غاندي قال نكرني لكن هذا الكائن المدعو غاندي كتلة من الإبداع والموهبة الفطرية عندها كرعين .. من أيام مدرسة محمد حسين الثانوية وانا بشوف وبسمع غاندي ..وشاءت الظروف نتلاقا في جامعة السودان وإن إختلفت التخصصات .. الزول ده متصالح مع نفسو شديييد وجواهو نضيييف عشان كده مزيكتو نضيييفة .. لماني فيهو إبن دفعتي ود كسلا غفاري ..وحاجات تانية حامياني .. تحية ليهو أينما حلل ومتابع لجنونه هذا الفتى العجيييييييييب ..
Post: #19 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-28-2012, 12:59 PM Parent: #15
Quote: عمر الفاروق ابو حميد : مع إنو ناس عصام جبر الله بهتوني في صحبة غاندي دي ومع إنو قالوا غاندي قال نكرني لكن هذا الكائن المدعو غاندي كتلة من الإبداع والموهبة الفطرية عندها كرعين .. من أيام مدرسة محمد حسين الثانوية وانا بشوف وبسمع غاندي ..وشاءت الظروف نتلاقا في جامعة السودان وإن إختلفت التخصصات .. الزول ده متصالح مع نفسو شديييد وجواهو نضيييف عشان كده مزيكتو نضيييفة .. لماني فيهو إبن دفعتي ود كسلا غفاري ..وحاجات تانية حامياني .. تحية ليهو أينما حلل ومتابع لجنونه هذا الفتى العجيييييييييب ..
يا عمر الفاروق ياخ انت مرقت سنة اسكت قالو منو الما بمسحك ههههههه وهو كذلك هذا الغاندى الرائع ابو سايمون لكن الحاجات التانية دى اهم حاجة انه فى برج ايفل يضارى الجمال والاندهاش الباريسى له كل الود والتحايا حتماً ذلك الفتى الابنوسى
Post: #18 Title: Re: لا حولااااااا, فيديو عجيب لكن, النفرين ديل منو؟ محمد وغاندى؟ وصور Author: محمد زكريا Date: 08-28-2012, 12:53 PM Parent: #14
Quote: ناصر فراج ابو الزيك سلام دة البوست بتاع الك.......................................................................!
yahoo غايتو الجبسيس عملوها فينا لو شفتهم بيعزفو الاكورديونات بس تقول لى منو عندنا فتشت النت لقيت نفسى ما جديد وفاكيها فيكم من زمان لكن زى ما قالت بت الصافى انا زاتى المقعدنى معاكم شنو بلد يا كافى البلد عدمت كبابى القزاز وبيشحدوا فيها بكبابى الورق
- وكله
ممكن انت يوم من الايام تصادفه في الشارع, ويحكي ليك عن السودان حسب القصص الكتيرة السمعا من العبد لله . 
لكن هذا الكائن المدعو غاندي كتلة من الإبداع والموهبة الفطرية عندها كرعين ..