Post: #1
Title: ليه السودانيين بيعملو الحركة دي (مرقت على المطر حفيان) ؟ في صور
Author: محمد إبراهيم علي
Date: 08-23-2012, 12:20 PM
لييي السودانيين بيخافوا على جزمهم اكتر من كرعيهم الواحد منهم تلقاهو اول ما المطرة تبدا تصب يدنقر يرفع جزمتو ويمشي حفيان
|
Post: #2
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: محمد إبراهيم علي
Date: 08-23-2012, 12:21 PM
Parent: #1
انا زاتي بعمل كدة وبدون ما اشعر
البنات بيعملو كدة برضو ولا بيخافو على الكرعين اكتر من النعلات
|
Post: #3
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: بشرى مبارك ود السقاى
Date: 08-23-2012, 03:06 PM
Parent: #2
السودانيين (متوكلين على الله ) وشىء طبيعى من يتوكل على الله فهو حسبه ، كيف أخوض فى المطرة والطين وأنا لابس حذاء أكيد الحذاء مهما كان من جلد وسوف يتلف والاهم من كده سوف يعوق الحركة !! الليبى ده حا أقول ليهم مثلما قال زميلنا ضابط الشرطة السودانى والذى عمل فى شرطة الامارات وكان من المفترض أن تتم ترقيته الى رتبة أعلى فدخل فى محاججة مع الضابط الاماراتى المسؤول من ملف الترقيات فقال له الضابط السودانى : يا جنابو الكلام ده ما داير ليهو درس عصر ؟؟ فقال ليه ؟؟ إيش يعنى درس عصر ؟؟؟ فقال له درس العصر ده بدوهو للحمير الزيك وأتوجه عليهو عايز (يخمشو ) فما كان منه إلا أن ضرب الكوراك وأخرجو الضابط السودانى وخلال إسبوع أنهو خدامتو وربنا فتح عليهو بأفضل من الامارات !!!!.
الليبى ده قول ليهوبتقدر تخوض فى النهر الصناعى العظيم بة جزمتك ؟؟؟.
|
Post: #4
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: محمد إبراهيم علي
Date: 08-23-2012, 04:49 PM
Parent: #3
مرحبا بك اخونا ود السقاي عضوا جديدا في المنبر
بعدين تعال هنا اول شي نضف النضارة او شاشة الكومبيوتر لووووول
الكلمة الانت افتكرتها ليبي هي لييييييييي يعني ليه ممطوطة حبة
الكلام ده مشاهدة وتطبيق انا زاتي بعمل كدة انت لو ما بتعمل كدة ورينا السبب شنو :)
لانو في ناس قالو الجزمة غالية واحتمال تبوظ 100% اما الكراع احتمال تجيها حاجة اقل من ذلك بكثير
فالموضوع يبدو انو بعيد شوية من التوكل بتاع السودانيين
|
Post: #5
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: Ashraf el-Halabi
Date: 08-23-2012, 04:58 PM
Parent: #4
إنتا في المطرة ولا في اسمك الظهر بهناك في قوائم الجداد الالكتروني!!!
|
Post: #6
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: سيف النصر محي الدين
Date: 08-23-2012, 05:03 PM
Parent: #4
| Quote: الكلمة الانت افتكرتها ليبي هي لييييييييي |
يا باشمهندس اتخيل الموضوع عندو علاقة بالشخصية السودانية و افتقادها للأستقلالية في الغالب.
البحصل انك بتتلفت في الأول لقيت الناس قالعين نعلاتهم بتقلع ، لقيتهم لابسينها بتلبس!
الوزر يتحملو السوداني الأول المرق على المطر حفيان.
|
Post: #7
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: Elawad
Date: 08-23-2012, 05:13 PM
Parent: #6
سلام يا باشمهندس
أنا إتخيلي دي ليها صلة بالعفوية الزايدة بتاعتنا (سميتها كدا تأدبا) وهي ليست توكلا بأي حال. التوكل عند الخواجات ديل الواحد قبل ما يطلع من البيت بشوف الجو حيكون شكله كيف وإذا في مطرة بلبس ليها تمام و يشيل شمسيته ويطلع ونحن حتى في بلادهم دي نقول والله دقتني المطرة... المطرة دي من أمس ما كلموك قالوا جاية؟ لكن دا طبع عند كتيرين مننا ما بنغيره بسهولة. فإذا الواحد كان لابس جزمة مناسبة للمطرة ما ممكن يقلعها لكن كان لابس جزمة جلد لازم يقلعها حفاظا عليها من ناحية ومن ناحية تانية هي ذاتها ما حتكون مناسبة للمشي في المطرة.
|
Post: #8
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: Rawia
Date: 08-23-2012, 06:06 PM
Parent: #7
كل سنة وإنت طيب يا استاذ محمد
كان عندي مديري لما يكون الجو كعب وفيهو مطرة ولا جليد لما يدخل المكتب بيقلع شي فيهو سستة بالجمبة كدا ويشبه لحد بعيد الجزمة.. تحته بتكون الجزمة نضيييفة وسليمة
اتضح انه لحماية الجزمة الجلد وعشان يقدر يمشي في الوحل وكدا
ممكن أحلف انه مافي سوداني عندو البوت البلاستك بتاع المطرة
الزول ممكن يعمل اعلان في التلفزيون للتوعية وينزل كمية السوق
يبقى مليونير
___________
لاحظ للصور القديمة كلها بتلقى السودانيين مصورين حفايا
مع انه الانسان الاول مع النار إكتشف برضو انه لازم يحمي رجلينه من العوامل الجوية
____
البرلوم صنع يومي
|
Post: #9
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: عمر الفاروق
Date: 08-23-2012, 06:19 PM
Parent: #8
يا ابو حميد :
رمضان كرييم ..:)
تراهو قليع الشباشب والجزم في المطرة عندو عذرو ..لكن الجكس زمان لممن تكون مقدمو لي بيتهم بعد نهاية العرس والحفلة أيييي واحدة فيهم بتكون طابقة جزمتا في يدها ..
تخريمة :
أها لميت في الليبي ده ؟
|
Post: #10
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: تيسير عووضة
Date: 08-23-2012, 06:20 PM
Parent: #8
هييع .. تسلم آللحمر
ــــــــ
تحكي الطرفة إنو في واحد إشترى ليهو "الله يكرمكم" مركوب جديد مصنوع من جلد البقر
لبسو ومرق على الشارع، جا ماري بي درب كلو شوك وحجار قام قلع المركوب وصفق بيهو عشان ينفض التراب
وختاهو تحت ذراعو وقال العبارة أعلاه ثم واصل بعد داك حفيان !
|
Post: #11
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: عمر الفاروق
Date: 08-23-2012, 06:36 PM
Parent: #10
تيسيير :
شحتفتييينا ..منتظرنك تمي الطرفة عليييييك الله ..
|
Post: #12
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: حمد عبد الغفار عمر
Date: 08-23-2012, 07:16 PM
Parent: #11
عيد مبارك يا محمد
| Quote: مرقت على المطر حفيان |
والله يا محمد أنا كنت بنتظر المطر دا مخصوص عشان أمشي حفيان بس في الموية البحس إنها نضيفة ياخ متعة ما بعدها
وفيييييييي السعودية دي مرات بطلع البر عصر عشان أمشي حفيان في الرمل الدافئ
بس زي ما ذكر فوق، الناس في السودان بكونوا خايفين على الجزم أكتر من كرعينم
|
Post: #13
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: الامين موسى البشاري
Date: 08-23-2012, 08:39 PM
Parent: #12
ازيك يا هندســـة
قال الشاعر الرقيق عاطف خيري في احدى قصائده
Quote:
نكــــر صــوتك صـــداك
غــالــطــني الـزمن فيك
شــهرت عــلى الجــفاف وعدك
بطاقاتنا الخريفيـة .
رجــع فاضـي الكــلام مليان
معــاك إتــبـرجـت غـيـمة
وشهق جوايا صوت جدول
مـرقت على المطر حفيان
لـقـيـتــك والــرذاذ مــدخـل
ونـاديـتـك …أقـيـفـي مـعاي نشيل كتف الغناء الميل
ونتخيل حلم دونك بيتحقق
وقبلك خيل دماي واقفة علي شرياني تتشهق
وبرق صوتك صداك غنيتي
|
الغريبة يا هندسة كل السودانيين تقريباً متفقين في الحاجة دي
موضوع جدير بالبحث ولذلك سأكون من المتابعين
|
Post: #15
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: صديق الموج
Date: 08-23-2012, 08:50 PM
Parent: #13
قالو واحد اشترى ليه مركوب جديد بس ما احمر لونه بنى
وماشى فى الشارع فى صفيحه مدفونه فى الواطه طقاها
بالمركوب قرب يقلعها من محلها قال: اريتا كان جات فى كراعى..
طبعاً المركوب بنى عشان الشناف الاعظم حايم فى البوست ده
تيسير السغيل ده تمي ليه النكتة ان شاء الله ورنيش ..
لوووووووووووووووووول،،،،
|
Post: #14
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: Mohamed Yassin Khalifa
Date: 08-23-2012, 08:50 PM
Parent: #12
ههه... موضوع لذيذ حد الوجع، بغض النظر عن معالجة قضية التصريف!
بس إنتا يا أبوحميد لامن كنتا سغير ما كنتا بتشرك للناس في موية الطملة في الخريف؟
يا أخي دي كانت أجمل متعة لعيال بري.. وبتشبه فليع أولاد الخواجات للناس بالتلج!
طبعاً أولاد الزمن ديل ما بعرفو التشريك..
والتشريك للناس هو أن تربط خيط دوبارة طويل بعودين وتثبت العودين في الواطة جوة الطملة
شرط إنك تشدهم بحيث يكونو تحت مستوى الموية.. وتقعد بعدها تنتظر في السمك.. قصدي الناس
يا أخي دي كانت متعة ما بعدها متعة.. لامن تشوف الناس تعتر ليها الدوبارة وتتـ فنقل جوة الموية
والناس كلها كانت عارفة إنو ده مجرد لعب أطفال لغاية ما يوم واحد من الحلة هرشنا وسكانا
وأولاد بري ما بيعرفو الهرش.. مشو جابو قزازة ويسكي بـ قرش-و-نص وكسروها جوة الموية قدام بيتو!
غايتو الله يسامحنا...
راوية يمكن قاصدة الـ Rain Shoe Cover ده البيتلبس فوق الجزمة وسعره 14.99$ في ebay
|
Post: #16
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: Nazik Eltayeb
Date: 08-23-2012, 08:52 PM
Parent: #12
سلامي لكم جميعاً
لا اعتقد ان هناك فائدة من لبس الحذاء المبتل خصوصاً وهو لن يحمي القدم بحالته تلك و سيعيق الحركة..... قرار خلق الحذاء قبل دخول الماء قرار سليم و محسوب بدقة و نابع من البيئة السودانية و الارض المنبسطة و درجة الحرارة المرتفعة نفس هذا السوداني لن يسير على الارض الساخنة حافياً ابداً.
بالنسبة للبنات البقلعوا احزيتهن بعد الحفلة ما من الرقيص الكتبر و ورم الاقدام
|
Post: #17
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: عمر الفاروق
Date: 08-23-2012, 08:58 PM
Parent: #16
تعرف يا هندسة انا حصل لي مع المطرة دي قصة لذييذة جداً في أول ايام الاغتراب ده ..
في أول يوم عمل وكنا شغالين بي نظام الدوامين واخوك جاي كرررت كرتووونة مشيت الدوام الأول في امااان الله ..اها لمن صحيت ومرقت للدوام التاني لقيت ليك المطرة صاااابة ..أها ولااا إتلفففت زااتو وروجججوعوت رجعت ليك الشقة وكملت ليك يومي ما بين التلفزيون والكورة..
اها بكرة الصباح مشيت ليك المكتب عااادي لقيت ليك مديرنا فلسطيني كده واقف منتظرني ..وييينك يا عمر أمس؟؟؟ رديت ليهو بكل ثقة والله كنت جاي لكن لقيت المطرة صااابة..!!!
طيب وبعدين؟
بس المطرة صابة ...
أيوة فاااهم بس علاقة المطرة بي إنك ما تجي الشغل شنو ؟؟
قلت ليهو والله ما عارف لكن نحن في السودان عندنا المطرة لمن تصب الزول ما بيمشي الشغل 
|
Post: #18
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: Ashraf el-Halabi
Date: 08-23-2012, 09:19 PM
Parent: #16
| Quote: ممكن أحلف انه مافي سوداني عندو البوت البلاستك بتاع المطرة |
إذا قصدك دا
ما تحلفي يا راوية
العبد لله كان عندو
لبسته مشيت بيهو تلات أمتار بس حسيت إنو شكلي زي الماشي على سطح القمر قلعته رميتو
|
Post: #19
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: محمد إبراهيم علي
Date: 08-23-2012, 10:44 PM
Parent: #18
اشرف الحلبي عيد مبارك يا صديق
اشرف انت اوع تكون من حناكيش الخرطوم الما بيمرقوا في المطرة ديلاك :)
| Quote: إنتا في المطرة ولا في اسمك الظهر بهناك في قوائم الجداد الالكتروني!!! |
والله اثبتوا فعلا انهم جداد الكتروني لست ناشطا فيسبوكيا ولا متوترا محترفا
فعلا بيضيعوا في زمنهم وقروش البلد
|
Post: #20
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: محمد إبراهيم علي
Date: 08-23-2012, 10:50 PM
Parent: #19
تحياتي دكتور سيف وشكرا ليك على صور العيد خليتني اشوف اخوي بعد مدة (علي ابراهيم)
انا برضو بعتقد انها غريزة القطيع
تشوف غيرك قلع نعلاتو طوالي بدون تفكير تدنقر وتقلع نعلاتك
مطرة 88 جات ونحن في المكتبة (جامعة السودان الجناح الجنوبي)
اها بعد ما الدنيا اتملت موية وطلعونا من المكتبة مشينا الداخلية وفي الطريق في محطة الكهرباء بتاعت الجامعة
والكهربا طبعا كانت شغالة الوكت داك ونحن طبعا كاي سودانيين اصليين شايلين نعلاتنا وماشين
اها واحد انتبه لانو الكهربا شغالو ونحن في الوكت داك امام المحطة انقر ما بدينا نجري وننطط لوووول
مع العلم اننا كنا في سنة تانية هندسة كهربائية !!!!!
|
Post: #21
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: محمد إبراهيم علي
Date: 08-23-2012, 10:55 PM
Parent: #20
اخونا العوض عيدك مبارك وحمد الله على سلامتك ونتمنى نشوفك في وقت اوسع
يا اخوي نحن كان بارينا النشرة الجوية في السودان موضوعنا بيبوظ نهائي
تصدق انو ناس الارصاد قالو النشرة بتاعت التلفزيون السوداني دي من تاليف واخراج تلفزيون السودان
مصدري للكلام الفوق ده جريدة السوداني
نحن غايتو لسه بنعتمد على انو دا برق قبلي وداك عبادي وده عفرت ساي ما بيجيب مطرة
وبعدين هي فرد جزمة بي امها وابوها حليل ايام الكبك والباتا والشدة
|
Post: #22
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: محمد إبراهيم علي
Date: 08-23-2012, 11:11 PM
Parent: #21
كل سنة وانت طيبة يا راوية
| Quote: ممكن أحلف انه مافي سوداني عندو البوت البلاستك بتاع المطرة |
لما اشوف الخواجات الفي المزارع او هنا في السعودية وهم لابسين البوت البلاستيك بتاسف على حال مزراعيننا في الجزيرة وهم قد اهلكتهم البلهارسيا
وقد كان يمكن ان يدربوا ويوصوا بان يلبسوا مثل هذه الابوات في الغيط ولكن تركوا لجهلهم
______________
البرلوم براحة عليهو :)
|
Post: #23
Title: Re: ليه السودانيين بيعملو الحركة دي (مرقت على المطر حفيان) ؟ في صور
Author: ياسر مكاوي
Date: 08-23-2012, 11:14 PM
Parent: #21
المساله هي اننا من هواه الاحذيه المفتوحه في الغالب - والتي في الغالب لن تقيك من شر المطر بل ستلتصق في الوحل والطين وتنقطع و في النهايه حتمشي حفيان
سؤالك دا يوضح انك ما جربتا تمشي في الطين بسفنجه او شبشب 
|
|