لا بارك الله في صحن واحد تكثر فيه الايادي!

انها عادة سودانية (كويسة وما كويسة )اي عندما يجتمع السودانيون في اي من وجبات الطعام السودانية والتي غالبا ما تشترك في قدح واحد عدة ايادي صغيرة وكبيرة صحيحة ومريضة ومتسخة ونظيفة وتذهب ذات الايادي بلقمة الطعام الي أفواه فيها النظيف وفيها المتسخ وفيها الصحيح وفيها المعتل وتعود ذات الايادي بعد ان دخلت تلكم الافواه ومسها شئ من لعاب أصحابها الي الصحن مرة اخري لتعاود ذات الامر عدة مرات وهي للاسف ثقافة سودانية نعتز بها بل صارت امر ا من المسلمات التي لا تقبل الجدل والتي ينبغي ان نعيد فيها النظر بشكل جاد للاقلاع عنهالانها ضارة بالصحة جدا ولذا احبذ موضوع ( كل الناس في طربيزة واحدة عشان نحافظ علي اللمة بس كل زول بصحنو اياكلو هسع اياكلو بعدين علي راحتو وكمان عشان الاكالين ما اظلموا المساكين والحناكيش)!
ولذا لن يبارك الله في اكل فيه ضرر بالعباد

هذه مساهمة رمضانية للوقوف عند طعامنا وبعض عاداتنا حيث رمضان و(العصايد الحارة بملاح المفروض نغير أسمو زاتو) عشان يتسق مع اخلاقنا وتديننا!

والله ده ملاح اسمو ساكت لو عاوز تقولوا في رمضان لازم تقول قبل اي حاجة ( اللهم اني صايم) حقو زاتو أمنعوا اكلو في رمضان....يااخي ده فلتر بكري اب صلعة زاتو ما قاعد اخليهو اغشي المنبر.

Quote: والله ده ملاح اسمو ساكت لو عاوز تقولوا في رمضان لازم تقول قبل اي حاجة ( اللهم اني صايم) حقو زاتو أمنعوا اكلو في رمضان... .يااخي ده فلتر بكري اب صلعة زاتو ما قاعد اخليهو اغشي المنبر.

سلام ياهشام ...
رمضان كريم تصوم وتفطر على خير ...

الملاح اسمو ( التقلية ) ...
دي أكلتي المفضلة ياهشام ( عصيدة بي ملاح تقلية ) ......
( عصيدة بي ملاح روب ) ....وممكن العصيدة تقول ليها ( لقمة )

تحياتي

Quote: انها عادة سودانية (كويسة وما كويسة )اي عندما يجتمع السودانيون في اي من وجبات الطعام السودانية والتي غالبا ما تشترك في قدح واحد عدة ايادي صغيرة وكبيرة صحيحة ومريضة ومتسخة ونظيفة وتذهب ذات الايادي بلقمة الطعام الي أفواه فيها النظيف وفيها المتسخ وفيها الصحيح وفيها المعتل وتعود ذات الايادي بعد ان دخلت تلكم الافواه ومسها شئ من لعاب أصحابها الي الصحن مرة اخري لتعاود ذات الامر عدة مرات وهي للاسف ثقافة سودانية نعتز بها بل صارت امر ا من المسلمات التي لا تقبل الجدل والتي ينبغي ان نعيد فيها النظر بشكل جاد للاقلاع عنهالانها ضارة بالصحة جدا ولذا احبذ موضوع ( كل الناس في طربيزة واحدة عشان نحافظ علي اللمة بس كل زول بصحنو اياكلو هسع اياكلو بعدين علي راحتو وكمان عشان الاكالين ما اظلموا المساكين والحناكيش)! ولذا لن يبارك الله في اكل فيه ضرر بالعباد

كلام سليم .... الملاحظ انو العادة دي بقت تنقرض شوية شوية ...وبي شوية
توعية سوف تعم كل البلد ....

باين عليك طولت من البلد .

ياهشام لو انت أكلت مع سعوديين ...حاتقول السودانيين أخير
السعوديين بيكبوا الرز واللحمة في الصينية ( اسمها الكبسة )
الواحد بيشيل رز كتير أكبر من طاقة فمو يقوم يدخل يدو في
خشمو ويقوم يرجع الباقي للصينية بسرعة وهكذا دواليك ..
.
.
ديل بتقدر تاكل معاهم كيف !!!

===============
بالمناسبة ( الخشم ) في اللغة السعودية تعني ( الأنف )
وبالسوداني تعني ( الفم ) .

يا هشام رمضان كريم ..

يعني العصيدة دي إلا تكون بملاح شــرمــوط (لا مؤاخذة) ؟؟
أكلها بويكة الله العادية دي ياخ..




--
أنا أقول يا ربي الملاح ده البيزيدو كده شنو، كلما الناس تاكل الملاح يزيد و (يرق)
أتاريه ده من القصة دي !! يعني لو الملاح كان أم رقيقة، في الآخر الناس بيكونو
بياكلوا ليهم في (عصيدة بالموية) برضو لا مؤاخذة..

Quote: يعني العصيدة دي إلا تكون بملاح شــرمــوط (لا مؤاخذة) ؟؟ أكلها بويكة الله العادية دي ياخ.. -- أنا أقول يا ربي الملاح ده البيزيدو كده شنو، كلما الناس تاكل الملاح يزيد و (يرق) أتاريه ده من القصة دي !! يعني لو الملاح كان أم رقيقة، في الآخر الناس بيكونو بياكلوا ليهم في (عصيدة بالموية) برضو لا مؤاخذة.

اخونا في الله صلاح

رمضان

بالتأكيد الموضوع من القصة ديك............ وليهو علاقة بالاسم العجيب داك!
ولا زلنا في انتظار دعوي تأصيلية لاستبدال بعض الاسماء في السودان باسماء اسلامية اخري ومنها اسم هذا الملاح العجيب واسماء بعض القري والمدن المحرجة جدا والتي لا تستطيع ذكر اسمائها في حضرة هذا الشهر الفضيل ما لم تسبق حديثك بعبارة ( اللهم اني صائم اوبدون مؤاخذة)!.

Quote: بالتأكيد الموضوع من القصة ديك............ وليهو علاقة بالاسم العجيب داك!

انت لما كنت في ليبيا .. ما ضربته (الكسكس ) لمن الله غفر ليك ..
الله فتح عليك قلته لي القذافي .. عليك الله غير لينا الاسم العجيب دا ..؟


انت ليه .. دائما منظورك للاشياء من ناحية ######ـه كدا ..؟
ليه دائما بتدخل الجنس حتى في حيات الناس العادية ..
في واحد امس بتكلم معاهو قالي انت شاذا جنسيا .. والله حقو امشي ادق ليهو كاروشة اجيبو البوست بتاعك دا .. والله احتمال يطلعك .. شنو كدا ما عارف ..
غايتو اكان لقيتو بجيبو ليك .. بس بعدين ما تزعل مني ..
بالمناسبة:
ووين كوستاوي .. حقو تناديهو ما عندو صور للبوست دا يجي ينزله لينا غير صور ملاح الرووب والعصيدة ..؟

العزيز رضا


تحياتي ورمضان كريم

زي الموضوع في راي كتيرين من اهلنا نوع من ( الفلهمة والقندفة والقلعصة والفلفسة) وابدا ما حيفتكروا للمحاذير اللي ذكرتها وهي محاذير تتوخي
مصلحة الجميع مناجل سلامتهم وصحتهم.... فاتمني ان يكون هنالك تفهم لهذا الموضوع الحساس وبالتاكيد فهو مؤثر جدا علي صحة المجتمع
بل مهدد لها................. ولكن لا بد من مواجهته بالصراحة وافهام الناس ان الحياة البشرية كلها مثافقفات ومنافع متبادلة و الكل يستفيد منها....فبذات الروح المتسامحة التي قبلنا بها اعتناق افكار عظيمة اجنبية المنشأ وقبلنا بها ارتداء الزي الافرنجي وتقبلنا بها السلع الاجنبية والمناهج العلمية الاجنبية فما الذي يمنع ان
نحذو حذو البشر ايضا في اتباع بعض ثقافاتهم الراقية مثل ثقافة تناول الطعام وطبيعة مجلسه و هي عادات ايجابية تصون صحة المجتمع وتقيه شر الامراض المعدية!؟

وايه المانع نعمل عصيدة وندي كل زول عصيدتو في صحنو ونخت الملاح في حلة كبيرة وفيها كمشة كبيرة وكل زول اغرف لصحنو اياكلوا بايدو بملعقة هسع بكرة ان شاء الله أتسحر بيهو ما مشكلة المهم تكون في عدالة توزيع وطريقة صحية في تناول الاكل.

هشام انت باين عليك طولت من السودان ....
حكاية الأكل باليد دي بقت قليلة وماشة في انقراض تدريجيا
العصيدة بقوا يعملوها في قوالب صغيرة ...ومعظم الأكل بقى
open buffet والأكل بالملعقة والشوكة والسكينة وحتى خشيبات
الصينيين ديك موجودة وأيضا شراب العصائر بالمصاصة وموية
الصحة متوفرة بكثرة .والشباب البيقدموا الخدمات لابسين ذي
موحد وبالكرفتاب وال BOW TIE وآخر حلاقة كارل لويس وبتكلموا
عدة لغات ...

تحياتي

أخونا رضا

تحياتي

انت بتتكلم عن الاكل في المناسبات العامة ولا كمان في البيوت وعن الخرطوم بس ولا كل السودان؟

Quote: ولا كمان في البيوت

في معظم البيوت برضو ياهشام كلوا واحد يغرف البيقدر ياكلوا ...
وذي ماقلت ليك العادة دي ماشة في انقراض تدريجيا ... ومابتتم
بين يوم وليلة ....والوضع الآن أحسن بكتير من زمان بقوا الناس
يتفهموا مثل هذه الأمور لذلك على سبيل المثال ذكرت ليك حتى الأكل
خارج البيت .

تحياتي

اخي هشام

اعتقد ان التعامل ( والله اعلم ) دعوة من الدين قبل ان يكون عادة سودانية

Quote: قال صلى الله عليه وسلم :( بارك الله في طعامٍ كثرت فيه الايادي )

Quote: لا بارك الله في صحن واحد تكثر فيه الايادي!

انت المقولة دي متمثلها قولا وفعلا كما يبدو من تاريخك الغذائي السايبيري

غايتو ناس البورد ديل لو عمنا هباني دا عايز يقول معلومة صحيحة مايخلو،،


الزول دا كلامه صاح 100% ،

ومع إنتشار جرثومة المعدة وماشابهها : أقترح أن تمنع الدولة الصحن ابو ايادي دا،،

هشام انت صاح ،،

خليك من السياسة ، تعال أنقل لينا العادات الاسلامية الصحيحة في بلد غير المسلمين ، ستكون أكثر فائدة من حديثنا في السياسة والذي لا يسمن ولا يمنع الجوع،،

اخونا رضا

تحياتي

شايفكً بتتكلم عن معظم البيوت ومعظم البيوت دي ما الخرطوم وبس دي بيوت الريف السوداني البمثل تسعين بالمائة من البلد
حتي لو في الخرطوم ما اظن متل الثقافة دي فايتة المنشية وكافوري لانو جل اهل العاصمة فقراء نازحون قريبا من الارياف
عشان كده بهمنا هذا السواد الاعظم وانو تتوافر ليهو ظروف صحية افضل مع الدولة ألما شغالة بيهم دي والوقاية خير من العلاج
لان العلاج ضبح وحتي لو توافرت امكانيات ليهو البلد زاته ما فيها علاج بنثق فيهو عشان كده التماسيح الكبار بتعالجوا ووليداتهم
بره علي حساب ناس قريعتي راحت ديل

.

.

Quote: شايفكً بتتكلم عن معظم البيوت ومعظم البيوت دي ما الخرطوم وبس دي بيوت الريف السوداني البمثل تسعين بالمائة من البلد حتي لو في الخرطوم ما اظن متل الثقافة دي فايتة المنشية وكافوري لانو جل اهل العاصمة فقراء نازحون قريبا من الارياف عشان كده بهمنا هذا السواد الاعظم وانو تتوافر ليهو ظروف صحية افضل مع الدولة ألما شغالة بيهم دي والوقاية خير من العلاج لان العلاج ضبح وحتي لو توافرت امكانيات ليهو البلد زاته ما فيها علاج بنثق فيهو عشان كده التماسيح الكبار بتعالجوا ووليداتهم بره علي حساب ناس قريعتي راحت ديل

الحكايةدي عاوزة وقت وصبر لحدي ماناس ( البيمص مصابعينو بعد الأكل ) يقتنع
بأنو لازم ياكل بالمعلقة والشوكة والسكينة !!!