Post: #1
Title: شمروا عن أياديكم - عن 19 يوليو 1971م
Author: صديق_ضرار
Date: 07-21-2012, 04:07 PM
القصيدة الأصل ضاعت منى أيام البطش والمطاردات
لكن حاولت أن أسترجع منها ولم يكن كما وردت هى أصلا
شمروا عن أياديكم
شعر : صديق ضرار
[email protected]
شمِّروا عن أياديكم
حنتحزم
ونتلزم
وبالواضح نعاديكم
وتبقى الحرب بينا سجال
مادام بننحاز إلى العمال
صمود الحزب فى العمال
وإن العبرة بالأعمال
وكل طريق وليه مجال
وإن الحزب كله رجال
كتيبة كتيبة تأتيكم
وساعة الجد
نقاتل عن حمانا نذود
لآخر حد
ولما الموت يشد المد ( منو المد )
نموت واقفين
بكل جلال / نموت واقفين
- وفى السودان
ومعروفين شيوعيين
بحد ترابه منتشرين
قسم ويمين : شيوعيين
بنطلع من بيوت الطين
عَقَبْ عمال وفلاحين
شيوعيين شيوعيين
وبى أبرولنا مفتخرين
وبى شاكوشنا والجزولين
ووكت الحَّارة
جد كعبين
وعند الحلوة
ناس طيبين
وحافضين للعلم والدين
وفى عيشتنا تب راضين
وبالنذر القليل قانعين
ولا بنسرق ولا شيتين
ولا إن جعنا نهابين
ولا بحلِمْنا فوق طايرين
ناس بسطاء زراعيين
وفى الجامعات شيوعيين
محل قبلت تلقانا
على نهج الكرام سايرين
وفى هدى الصراط ماسكين
وان مسانا أى وجار
بناخد التار ، وناخد التار
بناخد التار بتاع راشد
بتاع زولا
عشان الطبقة بيجاهد
ولما خلاص معاده أزف
باسم الحزب كان يهتف
وفوق لمنصة الإعدام
. . . رَكز ووقف
وكان الحبل متعاطف
ويد جلاده كان ترجف
وباسم الحزب برضه هتف
وديك الفجر صاح صيحتين
وإتوقف
وعند التالتة قالوا هتف
باسم الحزب قالوا هتف
وريق مولانا قالوا نشف
حالته الفيها ما بتذكر
وتتوصف
يكرر فى الشهادة أَلِفْ
ويقش فى دموعه ألف وألف
وباسم الحزب برضه هتف
وقمر السما الفوق راسه
قالوا خسف
كان خجلان
يقولوا كشف
بدمع السيل
بكاه الليل
جمام وسرف
لكن بس بكل أسف
نبض الأمة إتوقف
* *
وحلّ على ضهور الخيل
فَتَىً راشد وشيه نبيل
بيسبقه فى سراه صهيل
فتى فارساً مهاب بالحيل
وان وازنته يملا العين
فتى تَخْتَاهُ عِيبَة وشين
مجرتق بالعديل والزين
فَتَىً فى الحارَّة جمل الشيل
فتى فى دمه يجرى النيل
ودمعا سال عليه ثخين
وكان فى حدق العيون سكين
وبين الزملا وقعه تقيل
وشدوا على الجراح بالحيل
ولملموا من وشىَّ الأرض أحزانهم
توشحوا فى غبار الليل باشجانهم
وفى الغابات تدوى طبول
وفى العتمور وفى توتيل
وفى النسم الخفيف وبليل
وفى الشمس البتبكى أصيل
وفى السودان ووادى النيل
وفى الشعب البهدى السيل
ورثنا الحزن جيل عن جيل
بكت لفراقه عصفورة
من الحصل للحزب مقهورة
وكان القمرى ليه هديل
فى حب راشد
لكن بس بكل أسف
نبض الأمة إتوقف
ونحن فى دربه ما نأسف
ونحن لحقه ما بنجحف
حناخد التار حناخد التار
بتاع جوزيف ،
بتاع طاجون
بتاع هاشم ، وود النور
دماء حمدالله سايلة بحور
وود الريح المغوار
كشف سدره ووقف للنار
وقبر أب شيبة فى صحرا
بعيد مجهول وما بنزار
وأب أحمد
برىء فى كوبر إستشهد
لأنه تيقن الثورة
وداير الطبقة تتوحد
وقبال حتى يتشهد
مات مغدور
و فى صدره
وسام السلم متوسد
شفيعنا الغالى يا أب أحمد
الفينا غبينا ما بتبرد
حناخد التار ، حناخد التار
حنفتح ألف مدفع نار
وما بوقف زحفنا التهديد
حنتقدم شهيد وشهيد
بيتبسم
نشيل الراية
إيد ورا إيد
وما نسلم
حنتعقب خطاويكم
نشوف كان مصر تحميكم
وكان ليبيا البتدفع
وبالإسترلينى تديكم
نشوف الفينا مين جبنا
لأنه الشعب قائدنا
يظل الحزب رائدنا
يظل تنظيمنا جبهة عريضة تسندنا
يظل عمالنا والطلبة
طلائع النصر عند الفجر فى الحلبة
ولينا المنعة والغلبة
خاتمة بعد كم وتلاتين سنة . . لابدّ منها
يموت الندل فى جحره
ولا عقَّبْ وَلَدْ خِِلْفَة
يغيب الندل فى قبره
بسوء أعماله والتلفة
وعيب الندل فى سكره
وفى تبزيغته للسفة
وكان تمزيجه بالعرقى
يقرقع وليس يتكفى
وكان يتباهى بى تيهو
يزيد القدلة فى مشيهو
ولما الندل طردوه
وراح بى كراعو للمنفى
جات الندل فى كبره
مصايب دهر مختلفة
أُصيب بالعوجة فى لسانه
واصيب فى إيده بالرجفة
ينام وحفاضة فى طيـ . .
خراه وبوله فى اللفة
يشيلوا الندل فى قفة
* * *
ويطلع فى المدى راشد
ويطلع فى المدى راشد
وحوله الأمة ملتفة
كأنه البدر - جانا ضحىً
كأنه البدر جاااااانا ضحىً
وأشرق نوره فى الشرفة
أصرَّتْ تنزل النجمات
على السودان وتصطف
ودمدم فى هدير النيل
حوار من نمولى لى حلفا
نشيد أغنية أممية
تعطر موكب الزفة
عريس المجد جانا ضحى
وكان قاصدنا - ما صدفة
بحق صرامة التأمين
كنا ندوره يتخفى
وحق صرامة التأمين
كان بندوره يتخفى
ويعبر بينا لج الموج
يسوقنا إلى زمن أوفى
ويبحر بينا للضفة
يسوقنا إلى زمن أوفى
* * *
شيوعيين شيوعيين
إلى ساح النضال دلفوا
شيوعيين شيوعيين
جاءوا الموت وما انصرفوا
شيوعيين شيوعيين
ساروا يسار وما انحرفوا
وعلى مد البصر وقفوا
يا لرجولة الوقفة !
يا لرجولة الوقفة !
|
Post: #2
Title: Re: شمروا عن أياديكم - عن 19 يوليو 1971م
Author: mustafa mudathir
Date: 07-21-2012, 06:20 PM
Parent: #1
فوق يا شاعرنا صديق، وشكراً
|
Post: #3
Title: Re: شمروا عن أياديكم - عن 19 يوليو 1971م
Author: الرفاعي عبدالعاطي حجر
Date: 07-21-2012, 10:09 PM
Parent: #2
الصديق ود ضرار
مودتي رمضان كريم
رمضان فرصة نشوفك يااخي
..............................................حجر.
|
Post: #4
Title: Re: شمروا عن أياديكم - عن 19 يوليو 1971م
Author: صديق_ضرار
Date: 07-22-2012, 02:43 PM
Parent: #3
الشباب مصطفى مدثر وحجر
رمضان كريم وتصوموا وتفطروا على خير
شكرا على الإطراء الجميل
فيما يخص 19 يوليو 1971 م
الرعب والحزن والتجاسر
كانت محنة قاسية ، إختلطت فيها أحاسيس شتى
حتى وأن كيمياء أجسادنا قد تفاعلت
إنتابتنا حالة من الحزن الصامت والرعب الهالك
الذى لم ندر كنه مصدره ، لم يكن خوفا من الهجمة التترية التى
قادها النميرى الفاجر ، بل التخوف على بعضنا البعض
الحزن على عضوية الحزب من الضباط العسكريين ومن الضباط الأحرار
وكنا نعرفهم بالإسم والشخص
كان خريفا دامعاوكان المطر يتساقط ليليا وبيوت الديم بأضوائها
الخافتة والناس صامتون وسائرون والشةارع خالية ولا حديث
بين الناس إلا القليل والقليل
فالحزن كا مطبقا على كل شىء ،
وكانت المدينة قد هجرها سكانها حتى العسكر الذين حرضهم النظام
بدأوا فى التراجع وكنت ترى الحزن على وجوههم
كنت وقتها أسكن والأستاذ لطفى والضابط محمد شرطة محمد
فى ديم برتى قصاد شارع 37 العمارات ويسكن أخى ضرار
شارع 53 العمارات فتوزعت بين البيتين ،
لم يكن الخوف هو الذى ينتابنا ، لكنه شىء آخر :
مزيج من الإستكانة والدفع بالإنتقام
كان الشعب السودانى ومنهم من هتف عائد عائد يانميرى
لكنهم جميعا وبمجرد بدء المحاكمات - جميع الشعب السودانى
كان متعاطفا جدا مع الحزب ومع عضوية الحزب
حتى وأن الناس كانوا لا يرون شابا يسير فى الطريق إلا وينظرون نحوه
نظرة حنان ومحبة ، ففى نظرهم أن الشيوعيين هم جميع الشباب
السودانيين .
ضمتنا بيوت وبيوت ، أكرمنا أهلنا السودانيون وضمدوا
جراحنا وآسونا فى قتلانا الشهداء
شىء لا يمكن وصفه كان يخيم على مدن الخرطوم
ضباط وضباط صف وجنود من أنبل أبناء شعبنا
ذُبحوا بواسطة التتار
كان المحرض الأول هو ال######## الفاسق نميرى
فى ليلة إعدام الشهيد عبد الخالق لقد أمطرت السماء تلك الليلة
مالم تمطره لسنوات وقد نبهنى لذلك الأستاذ لطفى
وذا ورد فى القصيدة
(وقمر السما الفوق راسه
قالوا خسف
كان خجلان
يقولوا كشف
بدمع السيل
بكاه الليل
جمام وسرف
لكن بس بكل أسف
نبض الأمة إتوقف )
سأواصل
|
Post: #5
Title: Re: شمروا عن أياديكم - عن 19 يوليو 1971م
Author: Nasir Ahmed Elmustafa
Date: 07-22-2012, 07:33 PM
Parent: #4
فيما يخص انقلاب يوليو
يجب سرد التاريخ كاملا
مجزرة بيت الضيافة
التي اراق فيها الشيوعيون دماء الابرياء
واطلقوا النيران على المعتقلين العزل
|
Post: #7
Title: Re: شمروا عن أياديكم - عن 19 يوليو 1971م
Author: صديق_ضرار
Date: 07-23-2012, 04:33 PM
Parent: #6
أخ ناصر
رمضان كريم
بس أنا ما كاتب تاريخ
أنا بتاع أحاسيس
وأفتكر السؤال يمكن يوجه للجنة علوب
أو ممكن أيضا بوست دكتور المعز أبو نورة وهو بوست
توثيقى مفيد
ويمكن الأخذ بتوجيه أخيك مصطفى مدثر
( لا يا أخ ناصر
البكان دا بكان شعر.
كان داير غلاط أمشي مذبحة بيت الضيافة وفظاظات أخرى (1 من 20): )
|
|